Ko e Tokotaha Naʻá Ne Ngaohi ʻa e Meʻa Kotoa Pē

ʻOKU OU ʻilo ha meʻa fakaofo. Te ke saiʻia ke fanongo ki ai?— Sio angé ki ho nimá. Peluki ho ngaahi louhiʻi nimá. Sai, toʻo hake ha meʻa ki ʻolunga. ʻOku lava ʻe ho nimá ke fai ʻa e ngaahi meʻa lahi, pea ʻoku malava ke ne fakahoko lelei ia. ʻOkú ke ʻilo pe ko hai naʻá ne ngaohi hota nimá?—

ʻIo, ko e Tokotaha tatau pē ia naʻá ne ngaohi hota ngutú, ko hota ihú mo hota matá. Ko e ʻOtuá, ʻa e Tamai ʻa e Faiako Lahí. ʻIkai ʻokú ta fiefia ʻi hono ʻomai ʻe he ʻOtuá hota matá?— ʻOku malava ke ta sio ki he ngaahi meʻa lahi koeʻuhi ko ia. ʻOku malava ke ta sio ki he matalaʻiʻakaú. ʻOku malava ke ta sio ki he musie lanu matá mo e langi lanu puluú. ʻOku aʻu ʻo ta sio nai ki ha fanga kiʻi manupuna fiekaia ʻo hangē ko ia ʻoku ʻasi ʻi he fakatātaá. Ko e moʻoni, ʻoku fakaofo ʻa ʻeta malava ke sio ki he ngaahi meʻa pehení, ʻikai ko ia?—

Ka ko hai naʻá ne ngaohi ʻa e ngaahi meʻa ko ení? Naʻe ngaohi kinautolu ʻe ha tangata? ʻIkai. ʻOku malava ke ngaohi ʻe he tangatá ha fale. Ka ʻoku ʻikai ha tangata te ne lava ke ngaohi ʻa e musie ʻoku tupú. ʻOku ʻikai lava ʻe he tangatá ke ngaohi ha kiʻi foʻi manupuna valevale, ko ha matalaʻiʻakau, pe ko ha toe meʻamoʻui kehe. Naʻá ke ʻiloʻi ʻa e meʻa ko iá?—

Ko e ʻOtuá ʻa e tokotaha naʻá ne ngaohi ʻa e ngaahi meʻa kotoa ko ení. Ko e ʻOtuá naʻá ne ngaohi ʻa e ngaahi langí mo māmani. Naʻá ne ngaohi foki mo e kakaí. Naʻá ne fakatupu ʻa e ʻuluaki tangatá mo e ʻuluaki fefiné. Ko Sīsū, ʻa e Faiako Lahí, naʻá ne akoʻi mai ʻa e meʻá ni.—Mātiu 19:​4-6.

Naʻe anga-fēfē hono ʻiloʻi ʻe Sīsū ko e ʻOtuá naʻá ne ngaohi ʻa e tangatá mo e fefiné? Naʻe sio ʻa Sīsū ki hono fai ia ʻe he ʻOtuá?— ʻIo, naʻe pehē. Naʻe ʻi he ʻOtuá ʻa Sīsū ʻi hono ngaohi ʻe he ʻOtuá ʻa e tangatá mo e fefiné. Ko Sīsū ʻa e fuofua tokotaha naʻe ngaohi ʻe he ʻOtuá. Ko Sīsuú ko ha ʻāngelo, pea naʻe nofo ia ʻi hēvani mo ʻene Tamaí.

ʻOku talamai ʻe he Tohitapú kia kitaua naʻe folofola ʻa e ʻOtuá: “Ta ngaohi tangata.” (Senesi 1:​26, NW) ʻOkú ke ʻilo pe ko hai naʻe lea ki ai ʻa e ʻOtuá?— Naʻá ne lea ki hono ʻAló. Naʻá ne lea ki he tokotaha ʻa ia naʻe haʻu ki mui ki he māmaní ʻo hoko ko Sīsuú.

ʻIkai ko ha meʻa fakafiefia ia? Fakakaukau angé! ʻI heʻeta fanongo kia Sīsuú, ʻoku akoʻi ai kitaua ʻe he tokotaha naʻe ʻi he ʻOtuá ʻi he taimi naʻe ngaohi ai ʻe he ʻOtuá ʻa e māmaní mo e ngaahi meʻa kehé kotoa. Naʻe ako ʻe Sīsū ʻa e meʻa lahi mei heʻene ngāue mo ʻene Tamaí ʻi hēvaní. Tā neʻineʻi ke hoko ʻa Sīsū ko e Faiako Lahí!

ʻOkú ke fakakaukau naʻe loto-mamahi ʻa e ʻOtuá ʻi heʻene nofo tokotaha ki muʻa ke ne ngaohi hono ʻAló?— ʻIkai, naʻe ʻikai ke pehē. Sai, kapau naʻe ʻikai te ne loto-mamahi, ko e hā naʻá ne ngaohi ai ʻa e ngaahi meʻamoʻui kehé?— Naʻá ne fai eni koeʻuhí ko ha ʻOtua ʻofa ia. Naʻá ne fiemaʻu ʻa e niʻihi kehé ke nau moʻui pea fiefia ʻi he moʻuí. ʻOku totonu ke ta fakamālō ki he ʻOtuá ʻi heʻene foaki mai kia kitaua ʻa e moʻuí.

Ko e meʻa kotoa pē kuo fai ʻe he ʻOtuá ʻoku fakahaaʻi ai ʻene ʻofá. Naʻe ngaohi ʻe he ʻOtuá ʻa e laʻaá. ʻOku ʻomai ʻe he laʻaá kia kitaua ʻa e maama pea tauhi kitaua ke ta māfana. Naʻe mei momoko ʻa e meʻa kotoa pē pea naʻe ʻikai mei ʻi ai ha moʻui ʻi he māmaní kapau naʻe ʻikai te ta maʻu ʻa e laʻaá. ʻIkai ʻokú ke fiefia ʻi hono ngaohi ʻe he ʻOtuá ʻa e laʻaá?—

ʻOku toe ʻai foki ʻe he ʻOtuá ke ʻuha. ʻI he taimi ʻe niʻihi, ʻe ʻikai nai te ke saiʻia ʻi he ʻuhá koeʻuhí he ʻoku ʻikai lava ai ke ke ʻalu ki tuʻa ʻo vaʻinga ʻi heʻene ʻuhá. Ka ʻoku tokoni ʻa e ʻuhá ke tupu ʻa e matalaʻiʻakaú. Ko ia, ʻi heʻeta sio ki he ngaahi matalaʻiʻakau fakaʻofoʻofá, ko hai te ta fakamālō ki ai koeʻuhi ko iá?— Ko e ʻOtuá. Pea ko hai ʻoku totonu ke ta fakamālō ki ai ʻi heʻeta kai ʻa e ngaahi fuaʻiʻakau mo e vesitapolo ifó?— ʻOku totonu ke ta fakamālō ki he ʻOtuá he ko ʻene laʻaá mo ʻene ʻuhá ʻoku tupu ai ʻa e ngaahi meʻá.

Pehē eni ʻoku ʻeke atu ʻe ha taha kia koe, ‘Naʻe ngaohi ʻe he ʻOtuá ʻa e tangatá pea pehē ki he fanga manú?’ Ko e hā te ke leaʻakí?— ʻOku tonu ke pehē: “ʻIo, naʻe ngaohi ʻe he ʻOtuá ʻa e tangatá mo e fanga manú.” Kae fēfē kapau ʻoku ʻikai tui ha taha naʻe ngaohi moʻoni ʻe he ʻOtuá ʻa e tangatá? Fēfē kapau ʻokú ne pehē naʻe haʻu ʻa e tangatá mei he fanga manú? Sai, ʻoku ʻikai ke akoʻi ʻe he Tohitapú ʻa e meʻa ko iá. ʻOku pehē ai naʻe fakatupu ʻe he ʻOtuá ʻa e ngaahi meʻamoʻui kotoa pē.—Senesi 1:​26-31.

Ka ʻe tala atu nai ʻe ha taha kia koe ʻoku ʻikai tui ia ki he ʻOtuá. Ko e hā leva te ke leaʻakí?— Fēfē ke ke tuhu ki ha fale? ʻEke ange ki he tokotahá: “Ko hai naʻá ne ngaohi ʻa e fale ko eé?” ʻOku ʻiloʻi ʻe he tokotaha kotoa kuo pau naʻe ngaohi ia ʻe ha taha. Naʻe ʻikai moʻoni ke ngaohi pē ʻe he falé ia!—Hepelu 3:4.

Taki leva ʻa e tokotahá ki ha ngoue pea fakahā ki ai ha matalaʻiʻakau. ʻEke ange ki ai: “Ko hai naʻá ne ngaohi ení?” Naʻe ʻikai ko ha tangata. Pea hangē pē ko e ʻikai ngaohi ʻe he falé iá, naʻe ʻikai foki ke ngaohi ʻe he matalaʻiʻakaú ni ia. Naʻe ngaohi ia ʻe ha tokotaha. Ko e ʻOtuá ia.

Kole ki he tokotahá ke kiʻi tuʻu hifo ʻo fanongo ki he hiva ʻa ha foʻi manupuna. ʻEke ange leva: “Ko hai naʻá ne ngaohi ʻa e fanga manupuná mo akoʻi kinautolu ke hivá?” Ko e ʻOtuá. Ko e ʻOtuá ʻa e tokotaha naʻá ne ngaohi ʻa e ngaahi langí mo e māmaní mo e ngaahi meʻamoʻui kotoa pē! Ko ia ʻa e Tokotaha ʻokú ne foaki mai ʻa e moʻuí.

Neongo ia, ʻe pehē nai ʻe ha taha ʻokú ne tui pē ki he meʻa ʻoku lava ke sio ki aí. Te ne pehē nai: ‘Kapau ʻoku ʻikai malava ke u sio ki ai, ʻoku ʻikai te u tui ki ai.’ Ko ia, ʻoku pehē ʻe he kakai ʻe niʻihi ʻoku ʻikai te nau tui ki he ʻOtuá koeʻuhí ko e ʻikai malava ke nau sio ki aí.

Ko e moʻoni, ʻoku ʻikai lava ke ta sio ki he ʻOtuá. ʻOku pehē ʻe he Tohitapú: ‘ʻOku ʻikai malava ha tangata ke sio ki he ʻOtuá.’ ʻOku ʻikai ha tangata, fefine pe ko ha kiʻi tama ʻi he māmaní ʻe lava ke sio ki he ʻOtuá. Ko ia, ʻoku ʻikai totonu ai ke feinga ha taha ke ngaohi ha fakatātā pe ko ha ʻīmisi ʻo e ʻOtuá. ʻOku aʻu ʻo folofola mai ʻa e ʻOtuá ke ʻoua te ta ngaohi hano ʻīmisi ʻoʻona. Ko ia leva, ʻe ʻikai te ta ʻai ke fiefia ʻa e ʻOtuá ʻi he ʻi ai ha ngaahi meʻa pehē ʻi hota falé.—Ekisoto 20:​4, 5; 33:20; Sione 1:18.

Ka ʻo kapau ʻoku ʻikai ke ke lava ʻo sio ki he ʻOtuá, ʻoku anga-fēfē hoʻo ʻiloʻi ʻoku ʻi ai moʻoni ha ʻOtua? Fakakaukau angé ki he meʻa ko ení. ʻOkú ke lava ʻo sio ki he havilí?— ʻIkai. ʻOku ʻikai malava ha taha ke sio ki he havilí. Ka ʻoku malava ke ke sio ki he ngaahi meʻa ʻoku fai ʻe he havilí. ʻOku malava ke ke sio ki he lauʻiʻakaú ʻoku ngaue ʻi he taimi ʻoku puhi ai ʻe he havilí ʻa e ngaahi vaʻa ʻo ha fuʻu ʻakau. Ko ia, ʻokú ke tui leva ai ʻoku ʻi ai ʻa e havili.

ʻOku malava foki ke ke sio ki he ngaahi meʻa kuo fai ʻe he ʻOtuá. ʻI he taimi ʻokú ke sio ai ki ha matalaʻiʻakau moʻoni pe ko ha foʻi manupuna, ʻokú ke sio ai ki he meʻa naʻe ngaohi ʻe he ʻOtuá. Ko ia ai, ʻokú ke tui ʻoku ʻi ai moʻoni ʻa e ʻOtua.

ʻE ʻeke atu nai ʻe ha taha kia koe, ‘Ko hai naʻá ne ngaohi ʻa e laʻaá pea mo e foʻi māmaní?’ ʻOku pehē ʻe he Tohitapú: “Naʻe fakatupu ʻe he ʻOtua ʻa e ngaahi langi mo mamani.” (Senesi 1:1) ʻIo, naʻe ngaohi ʻe he ʻOtuá ʻa e ngaahi meʻa fakaofo kotoa ko ení! ʻOku anga-fēfē hoʻo ongoʻi ʻo fekauʻaki mo iá?—

ʻIkai ko e meʻa lelei ke moʻui? ʻOku lava ke ta fanongo ki he ngaahi hiva mālie ʻa e fanga manupuná. ʻOku lava ke ta sio ki he matalaʻiʻakaú mo e ngaahi meʻa kehe kuo ngaohi ʻe he ʻOtuá. Pea ʻoku malava ke ta kai ʻa e ngaahi meʻakai kuo foaki mai ʻe he ʻOtuá.

ʻOku totonu ke ta fakamālō ki he ʻOtuá ʻi he ngaahi meʻa kotoa ko ení. Ko hono kotoá, ʻoku totonu ke ta fakamālō kiate ia ʻi heʻene foaki mai ʻa e moʻuí. Kapau ʻokú ta fakamālōʻia moʻoni ʻa e ʻOtuá, te ta fai leva ha meʻa. Ko e hā ʻa e meʻa ko iá?— Te ta fanongo ki he ʻOtuá, pea te ta fai ʻa e meʻa ʻokú ne tala mai kia kitaua ʻi he Tohitapú. ʻI he founga ko iá, ʻe malava ke ta fakahaaʻi ai ʻokú ta ʻofa ʻi he Tokotaha naʻá ne ngaohi ʻa e meʻa kotoa pē.