Ko e ʻUhinga ʻOku Hoko Ai ʻo Puke ʻa e Kakaí

ʻOKÚ KE ʻilo ha taha ʻoku puke?— ʻOkú ke hoko nai ʻo puke ʻi ha taimi. ʻOkú ke fofonu, pe ʻoku langa nai ho keté. ʻOku puke lahi ʻa e kakai ʻe niʻihi. ʻOku aʻu ʻo ʻikai lava ke nau tuʻu ki ʻolunga ʻo taʻeʻiai ha taha ke ne tokoniʻi kinautolu. ʻOku faʻa hoko ʻa e meʻá ni ʻi he taimi ʻoku vaivai ʻaupito ai ʻa e kakaí.

ʻOku hoko ʻo puke ʻa e tokotaha kotoa pē ʻi ha ngaahi taimi. ʻOkú ke ʻilo ʻa e ʻuhinga ʻoku hoko ai ʻo puke, tupu ʻo vaivai pea mate ʻa e kakaí?— ʻI he ʻaho ʻe taha, naʻe ʻomai ai kia Sīsū ha tangata naʻe ʻikai lava ke ʻalu, pea naʻe fakahā ʻe Sīsū ʻa e ʻuhinga ʻoku hoko ai ʻo puke pea mate ʻa e kakaí. Tuku ke u talanoa atu ia.

Naʻe nofo ʻa Sīsū ʻi ha fale ʻi ha kolo naʻe ofi ki he Tahi Kālelí. Naʻe haʻu ha fuʻu kakai ke sio kiate ia. Naʻe fuʻu tokolahi ʻaupito ʻa e kakai naʻe haʻú ʻo ʻikai ai ʻatā ki he niʻihi kehé ke nau hū mai ki he falé. Naʻe aʻu ʻo ʻikai lava ke ofi atu ha taha ki he matapaá. Ka neongo ia, naʻe kei haʻu pē ʻa e kakaí ia! Ko e kulupu ʻe taha naʻa nau ʻomai ha tangata naʻe mamatea ʻa ia naʻe aʻu ʻo ʻikai lava ke ne ʻalu. Naʻe feʻunga mo e kau tangata ʻe toko fā ke nau hiki ia ʻi ha kiʻi mohenga, pe ko ha meʻa-fata.

ʻOkú ke ʻilo ʻa e ʻuhinga naʻa nau fiemaʻu ai ke ʻomai ʻa e tangata puke ko ení kia Sīsuú?— Naʻa nau tui ʻe malava ʻe Sīsū ke ne tokoniʻi ia, ʻe malava ke ne fakamoʻui ia mei he mahaki ko iá. ʻOkú ke ʻilo ʻa e founga naʻa nau ʻave ai ʻa e tangata mamatea ko iá kia Sīsū neongo ʻa e fuʻu tokolahi ʻa e kakai ʻi he falé?—

Sai, ko e fakatātā ʻokú ke sio ki ai ʻi hení ʻoku fakahaaʻi ai ʻa e founga naʻa nau fai ai iá. ʻUluakí, naʻa nau hiki hake ʻa e tangatá ki ʻolunga ki he ʻató. Ko ha ʻato lafalafa ia. Naʻa nau ʻai leva ha foʻi ava lahi ai. Fakaʻosí, naʻa nau tuku hifo ʻa e tangata mahakí ʻi hono meʻa-fatá ʻo ʻalu hifo tonu ʻi he foʻi ava ko iá pea ki he loki ʻi laló. Ko ha tui mālohi moʻoni naʻa nau maʻú!

Ko e kakai kotoa ʻi he falé naʻa nau ʻohovale ʻi heʻenau sio ki he meʻa naʻe hokó. Ko e tangata mamatea ʻi he meʻa-fatá naʻe ʻalu hifo tonu ʻi honau lotolotongá. Naʻe ʻita ʻa Sīsū ʻi heʻene sio ki he meʻa naʻe fai ʻe he kau tangatá?— ʻIkai ʻaupito! Naʻá ne fiefia ke sio naʻa nau maʻu ha tui. Naʻá ne pehē ki he tangata mamateá: “Kuo fakamolemole hoʻo ngāhi angahala.”​—⁠Fakaʻītali ʻamautolu.

Naʻe fakakaukau ʻa e kakai ʻe niʻihi naʻe ʻikai totonu kia Sīsū ke ne leaʻaki ia. Naʻe ʻikai te nau fakakaukau ʻe malava ke ne fakamolemole ʻa e ngaahi angahalá. Ko ia, ke fakahaaʻi naʻá ne malava moʻoní, naʻe pehē ʻe Sīsū ki he tangatá: “Tuʻu, toʻo ho mohenga, pea mole ki ho ʻapi.”

ʻI he taimi naʻe leaʻaki ai ʻe Sīsū ʻa e meʻa ko iá, naʻe moʻui ʻa e tangatá! Naʻe ʻikai te ne toe mamatea. Naʻe malava leva he taimí ni ke ne tuʻu ʻiate ia pē ʻo ʻalu. Ko e kakai naʻa nau sio ki he mana ko ení naʻa nau ʻohovale. Naʻe ʻikai ʻaupito te nau mamata ʻi ha meʻa fakaʻohovale pehē ʻi he kotoa ʻo ʻenau moʻuí! Naʻa nau fakahīkihikiʻi ʻa Sihova ʻi hono ʻomai kia kinautolu ʻa e Faiako Lahi ko eni, ʻa ia ʻoku aʻu ʻo malava ke ne fakamoʻui ʻa e ngaahi mahaki ʻo e kakaí.—Maake 2:​1-12.

Ko e hā ʻa e meʻa ʻokú ta ako mei he mana ko ení?— ʻOkú ta ako ai ʻoku maʻu ʻe Sīsū ʻa e mafai ke fakamolemole ʻa e ngaahi angahalá pea ke fakamoʻui ʻa e kakai puké. Ka ʻokú ta toe ako ai ha meʻa ʻe taha, ko ha meʻa mahuʻinga ʻaupito ia. ʻOkú ta ako ai ʻoku hoko ʻo puke ʻa e kakaí koeʻuhi ko e angahalá.

Koeʻuhi ʻoku tau hoko kotoa pē ʻo puke ʻi ha taimi, ʻoku ʻuhinga ení ko e kau angahala kotoa kitautolu?— ʻIo, ʻoku pehē ʻe he Tohitapú ʻoku fanauʻi kotoa mai kitautolu mo e angahala. ʻOkú ke ʻilo ʻa e ʻuhinga ʻo e fanauʻi mo e angahalá?— ʻOku ʻuhingá ʻoku fanauʻi mai kitaua ʻokú ta taʻehaohaoa. ʻOkú ta fai ʻi he taimi ʻe niʻihi ʻa e ngaahi meʻa ʻoku hala, neongo ʻoku ʻikai te ta loto ki ai. ʻOkú ke ʻilo ʻa e founga naʻa tau hoko kotoa ai ʻo maʻu ʻa e angahalá?—

Naʻa tau hoko ki he tuʻunga ko ení koeʻuhi ko e ʻuluaki tangata ko ʻĀtamá, naʻe ʻikai te ne talangofua ki he ʻOtuá. Naʻá ne faiangahala ʻi he taimi naʻá ne maumauʻi ai ʻa e lao ʻa e ʻOtuá. Pea ʻoku tau maʻu kotoa ʻa e angahalá meia ʻĀtama. ʻOkú ke ʻilo ʻa e founga naʻá ta maʻu ai ʻa e angahalá meiate iá? Te u feinga ke fakamatalaʻi ia ʻi ha founga ʻe lava ke ke mahinoʻi aí.

Mahalo pē kuó ke sio ʻi ha taha ʻokú ne taʻo ha foʻi mā ʻi ha kapa. Ko e hā ʻe hoko ki he foʻi maá kapau ʻoku makoko ʻa e kapá? ʻOkú ke ʻilo?— Ko e foʻi fakaʻilonga tatau pē ko iá, pe makokó, ʻe hā ia ʻi he foʻi mā kotoa pē naʻá ne taʻo ʻi he kapa ko iá, ʻikai ko ia?—

Ko ʻĀtamá naʻe hangē ko e kapa ko iá, pea ko kitaua ʻokú ta hangē ko e foʻi maá. Naʻá ne hoko ʻo taʻehaohaoa ʻi heʻene maumauʻi ʻa e lao ʻa e ʻOtuá. Naʻe hangē ia naʻá ne maʻu ha fakaʻilonga koví pe makokó. Ko ia, ʻi he taimi naʻá ne maʻu fānau aí, te nau hoko ʻo fēfē?— Ko ʻene fānaú kotoa te nau maʻu ʻa e fakaʻilonga tatau pē ko eni ko e taʻehaohaoá.

Ko e tokolahi taha ʻo e fānaú ʻoku ʻikai ke fanauʻi mai kinautolu fakataha mo ha fuʻu mele ʻoku malava ke ke sio ki ai. ʻOku ʻikai te nau hala ha nima pe ko ha vaʻe. Ka ko e taʻehaohaoa ʻoku nau maʻú ʻoku mamafa feʻunga ia ki heʻenau hoko ʻo puke pea ʻi he ʻalu ʻa e taimí ʻo nau mate.

ʻOku moʻoni, ko e kakai ʻe niʻihi ʻoku faʻa hoko ʻo lahi ange ʻenau puké ʻi ha niʻihi. Ko e hā ʻoku hoko ai iá? ʻOku peheé koeʻuhi ʻoku fanauʻi mai kinautolu mo ha angahala lahi ange?— ʻIkai, ko e tokotaha kotoa ʻoku fanauʻi mai mo e angahala tatau pē. ʻOku fanauʻi kotoa mai kitautolu ʻoku tau taʻehaohaoa. Ko ia, ʻe faifai atu pē, ko e tokotaha kotoa pē ʻe puke ʻi ha faʻahinga mahaki. Naʻa mo e kakai ʻoku feinga ke talangofua ki he ngaahi lao kotoa ʻa e ʻOtuá pea ʻoku ʻikai te nau fai ha meʻa ʻoku kovi lahí ʻoku malava ke nau puke.

Ka ko e hā ʻoku faʻa lahi ange ai ʻa e puke ʻa e kakai ʻe niʻihi ʻi he niʻihi kehé?— ʻOku lahi ʻa e ngaahi ʻuhingá. Mahalo pē ʻoku ʻikai ke ʻi ai ha meʻakai feʻunga ke nau kai. Pe ʻoku ʻikai nai te nau kai ʻa e faʻahinga meʻakai totonú. ʻOku fuʻu lahi nai ʻenau kai ʻa e keké mo e lolé. Ko e toe ʻuhinga ʻe taha, mahalo pē ko ʻenau ʻā ʻo fuʻu fuoloa ʻi he poʻulí pea ʻikai ke maʻu ha mohe feʻungá. Pe ʻoku ʻikai nai te nau tui ha vala māfana feʻunga ʻi he taimi ʻoku ʻuha aí. Ko e kakai ʻe niʻihi ʻoku fuʻu vaivai ʻaupito honau sinó, pea ʻoku ʻikai lava ke nau tauʻi ʻa e mahakí, neongo kapau ʻoku nau feinga ke tokangaʻi kinautolu.

ʻE ʻi ai nai ha taimi ʻe ʻikai ai ke ta toe puke? ʻE ʻi ai ha taimi ʻe mole ai ʻa e angahalá meiate kitaua?— Sai, ko e hā naʻe fai ʻe Sīsū ki he tangata mamateá?— Naʻe fakamolemoleʻi ʻe Sīsū ʻa ʻene ngaahi angahalá pea fakamoʻui ia. ʻI he meʻa ko iá, naʻe fakahā ai ʻe Sīsū ʻa e meʻa te ne fai ʻi ha ʻaho maʻá e faʻahinga kotoa ʻoku nau feinga mālohi ke fai ʻa e meʻa ʻoku totonú.

Kapau ʻokú ta fakahaaʻi ʻoku ʻikai te ta loto ke ta faiangahala pea ʻokú ta fehiʻa ʻi he meʻa ʻoku halá, ʻe fakamoʻui kitaua ʻe Sīsū. ʻI he kahaʻú, te ne toʻo meia kitaua ʻa e taʻehaohaoa ʻokú ta lolotonga maʻú. Te ne fai eni ʻi he tuʻunga ko e Tuʻi ʻo e Puleʻanga ʻo e ʻOtuá. ʻE ʻikai ke toʻo kotoa meia kitautolu ʻa e angahalá ʻi ha foʻi taimi pē ʻe taha. ʻE toʻo atu ia ʻi ha vahaʻa taimi. Pea ʻi he taimi ʻe mole ʻaupito ai ʻetau angahalá, ʻe ʻikai ʻaupito ke tau toe puke. Te tau maʻu kotoa pē ʻa e moʻui haohaoa. Ko ha tāpuaki ē ko ia!