Ko Hai ʻa Sīsū Kalaisi?

1, 2. (a) Ko e hā ʻoku ʻikai ʻuhinga ai ko e ʻilo fekauʻaki mo ha tokotaha ʻiloá ʻokú ke ʻiloʻi moʻoni ai ia? (e) Ko e hā ʻa e puputuʻu ʻoku ʻi ai fekauʻaki mo Sīsuú?

ʻOKU tokolahi ʻa e kakai ʻiloa ʻi he māmaní. ʻOku ongoongoa ʻa e niʻihi ʻi honau feituʻú, koló, pe fonuá. ʻOku ʻiloa ʻa e niʻihi kehe ʻi māmani lahi. Kae kehe, ko hono ʻiloʻi pē ʻa e hingoa ʻo ha taha ʻoku ʻiloá ʻoku ʻikai ʻuhinga ai iá ʻokú ke ʻiloʻi moʻoni ia. ʻOku ʻikai ʻuhinga iá ʻokú ke ʻiloʻi ʻa e ngaahi fakaikiiki fekauʻaki mo hono puipuituʻá pea ko e faʻahinga tokotaha fēfē moʻoni ia.

² Kuo fanongo ʻa e kakai takatakai ʻi he māmaní ki ha meʻa fekauʻaki mo Sīsū Kalaisi, neongo naʻá ne moʻui ʻi he māmaní ʻi he taʻu nai ʻe 2,000 kuo maliu atú. Neongo ia, ʻoku puputuʻu ʻa e tokolahi fekauʻaki mo Sīsū pe ko hai moʻoni ia. ʻOku pehē ʻe he niʻihi ko ha tangata lelei pē ia. ʻOku taukaveʻi ʻe he niʻihi ko ha palōfita ia. Lolotonga iá ʻoku tui ʻa e niʻihi ko Sīsū ʻa e ʻOtuá pea ʻoku totonu ke fai ki ai ʻa e lotú. ʻOku totonu ke pehē?

 3. Ko e hā ʻoku mahuʻinga ai kiate koe ke ke ʻiloʻi ʻa e moʻoni fekauʻaki mo Sīsuú?

³ ʻOku mahuʻinga kiate koe ke ke ʻiloʻi ʻa e moʻoni fekauʻaki mo Sīsuú. Ko e hā hono ʻuhingá? Koeʻuhí he ʻoku pehē ʻe he Tohi Tapú: “Ko eni ia ʻa e moʻui taʻengata, ke nau fai ke ʻilo koe ko e Otua moʻonia pe taha, pea mo Sisu ne ke fekau mai ko e Misaia.” (Fakaʻītali ʻamautolu; Sione 17:3) ʻIo, ko hono ʻiloʻi ʻa e moʻoni fekauʻaki mo Sihova ko e ʻOtuá pea fekauʻaki mo Sīsū Kalaisí ʻe lava ke taki atu ia ki he moʻui taʻengata ʻi ha māmani palataisi. (Sione 14:6) ʻIkai ko ia pē, ʻoku fokotuʻu ʻe Sīsū ʻa e faʻifaʻitakiʻanga lelei taha ʻo e founga ke moʻui aí mo e founga ke tōʻongafaiʻaki ki he niʻihi kehé. (Sione 13:​34, 35) ʻI he ʻuluaki vahe ʻo e tohí ni, naʻa tau lāulea ai ki he moʻoni fekauʻaki mo e ʻOtuá. Sai, tau lāulea angé ki he meʻa ʻoku akoʻi moʻoni ʻe he Tohi Tapú fekauʻaki mo Sīsū Kalaisí.

 4. Ko e hā ʻa e ʻuhinga ʻo e ongo hingoa fakalakanga ko e “Mīsaiá” mo e “Kalaisí”?

⁴ ʻI he taimi lōloa ki muʻa ke ʻaloʻi ʻa Sīsuú, naʻe tomuʻa tala ai ʻe he Tohi Tapú ʻa e haʻu ʻa e tokotaha ʻa ia ʻe fekauʻi mai ʻe he ʻOtuá ko e Mīsaiá, pe Kalaisí. Ko e ongo hingoa fakalakanga ko e “Mīsaia” (mei ha foʻi lea faka-Hepelū) mo e “Kalaisí” (mei ha foʻi lea faka-Kalisi) ʻoku ʻuhinga fakatouʻosi ia ko e “Tokotaha Pani.” Ko e Tokotaha ko eni naʻe talaʻofá ʻe pani ia, ʻa ia, ʻe fakanofo ʻe he ʻOtuá ki ha tuʻunga makehe. ʻI he ngaahi vahe ki mui ʻo e tohí ni, te tau ako ai ʻa e meʻa lahi ange fekauʻaki mo e tuʻunga mahuʻinga ʻo e Mīsaiá ʻi hono fakahoko ʻo e ngaahi talaʻofa ʻa e ʻOtuá. Te tau toe ako foki ai fekauʻaki mo e ngaahi tāpuaki ʻe lava ke ʻomai ʻe Sīsū kiate kitautolu naʻa mo e ʻi he taimi ní. Kae kehe, ki muʻa ke ʻaloʻi ʻa Sīsuú, ʻoku ʻikai ha veiveiua naʻe fifili ʻa e tokolahi, ‘Ko hai ʻe fakamoʻoniʻi ko e Mīsaiá?’

 5. Ko e hā naʻe tuipau kakato ai ʻa e kau ākonga ʻa Sīsuú ʻo fekauʻaki mo iá?

⁵ ʻI he ʻuluaki senituli T.S., naʻe tuipau kakato ai ʻa e kau ākonga ʻa Sīsū ʻo Nasaletí ko ia ʻa e Mīsaia naʻe tomuʻa talá. (Sione 1:41) Ko e taha ʻo e kau ākongá, ko ha tangata ko Saimone Pita, naʻá ne lea fakahāhā kia Sīsū: “Ko koe koe Kalaisi.” (Mātiu 16:​16, PM) Ko ia ai, naʻe lava fēfē ki he kau ākonga ko iá—pea te tau lava fēfē⁠—ke fakapapauʻi ko Sīsū moʻoni ʻa e Mīsaia naʻe talaʻofá?

 6. Fakatātaaʻi ʻa e founga kuo tokoniʻi ai ʻe Sihova ʻa e faʻahinga faitōnungá ke nau ʻiloʻi ʻa e Mīsaiá.

⁶ Ko e kau palōfita ʻa e ʻOtuá naʻe moʻui ki muʻa ʻia Sīsuú naʻa nau tomuʻa tala ʻa e ngaahi fakaikiiki lahi fekauʻaki mo e Mīsaiá. Ko e ngaahi fakaikiikí ni ʻe tokoniʻi ai ʻa e niʻihi kehé ke nau ʻiloʻi ia. Te tau fakatātaaʻi nai ʻa e ngaahi meʻá ʻi he foungá ni: Tau pehē naʻe kole atu ke ke ʻalu ki ha tauʻanga pasi, pe ko ha tauʻanga lēlue pe ko ha malaʻe vakapuna moʻumoʻua ke tali mai ha taha kuo teʻeki ai ʻaupito ke ke fetaulaki mo ia ki muʻa. ʻIkai ʻe tokoni kapau ʻe ʻoatu ʻe ha taha kiate koe ha fakaikiiki ʻe niʻihi fekauʻaki mo ia? ʻI he founga meimei tatau, fakafou ʻi he kau palōfita ʻi he Tohi Tapú, naʻe ʻomai ai ʻe Sihova ha fakamatala fakaikiiki ʻi he tuʻunga lahi ʻo e meʻa ʻe fai ʻe he Mīsaiá mo e meʻa te ne hokosiá. Ko e fakahoko ʻo e ngaahi kikite lahi ko ení ʻe tokoniʻi ai ʻa e faʻahinga faitōnungá ke nau ʻiloʻi lelei ia.

 7. Ko e hā ʻa e ongo kikite ʻe ua naʻe fakahoko ʻi he fekauʻaki mo Sīsuú?

⁷ Fakakaukau angé ki ha fakatātā pē ʻe ua. ʻUluakí, laka hake he taʻu ʻe 700 ki muʻa, naʻe tomuʻa tala ai ʻe he palōfita ko Maiká ko e Tokotaha naʻe talaʻofá ʻe ʻaloʻi ia ʻi Pētelihema, ko ha kiʻi kolo ʻi he fonua ko Siutá. (Maika 5:2) Ko fē naʻe ʻaloʻi moʻoni ai ʻa Sīsuú? ʻĀua, ʻi he kolo tonu pē ko iá! (Mātiu 2:​1, 3-9) Ko hono uá, ʻi he ngaahi senituli lahi ki muʻá, naʻe tuhu ai ʻa e kikite ʻoku lēkooti ʻi he Taniela 9:25 ki he taʻu tofu pē ko ia naʻe pau ke hā ai ʻa e Mīsaiá​—ko e 29 T.S.a Ko e fakahoko ʻo e ongo meʻá ni mo e ngaahi kikite kehe ʻoku fakamoʻoniʻi ai ko Sīsū ʻa e Mīsaia naʻe talaʻofá.

8, 9. Ko e hā ʻa e fakamoʻoni naʻe hoko ʻo mahino ʻi heʻene papitaisó ko Sīsū ʻa e Mīsaiá?

⁸ Ko e fakamoʻoni lahi ange ko Sīsū ʻa e Mīsaiá naʻe hoko ʻo hā mahino ia ʻi he ofi ki he ngataʻanga ʻo e 29 T.S. Ko e taʻu ia naʻe ʻalu ai ʻa Sīsū kia Sione Papitaiso ke papitaiso ʻi he Vaitafe Sioataní. Naʻe talaʻofa ʻe Sihova kia Sione ha fakaʻilonga koeʻuhí ke lava ai ʻo ne ʻiloʻi ʻa e Mīsaiá. Naʻe sio ʻa Sione ki he fakaʻilonga ko iá ʻi he papitaiso ʻo Sīsuú. ʻOku pehē ʻe he Tohi Tapú ko e meʻa eni naʻe hokó: “Kuo papitaiso ʻa Sisu, naʻa ne ʻalu hake leva mei he vai; pea vakai, naʻe matangaki ʻa e langi kiate ia, pea ne mamata ki he Laumalie ʻo e ʻOtua ʻoku ʻalu hifo ʻi he tatau ʻo ha lupe, ʻo ne aʻu kiate ia. Pea ʻiloange, naʻe ai ha leʻo mei he langi naʻe pehe mai, Ko Hoku ʻAlo Pele ʻena, ʻa ia kuo u hōifua ai.” (Mātiu 3:​16, 17) Hili ʻa e sio mo fanongo ki he meʻa naʻe hokó, naʻe ʻikai ha veiveiua ʻa Sione ko Sīsuú naʻe fekauʻi mai ia ʻe he ʻOtuá. (Sione 1:​32-34) ʻI he mōmeniti naʻe huaʻi hifo ai ʻa e laumālie, pe ivi ngāue ʻo e ʻOtuá kiate ia ʻi he ʻaho ko iá, naʻe hoko ai ʻa Sīsū ko e Mīsaiá, pe Kalaisí, ko e tokotaha kuo fakanofo ko e Takimuʻa pea mo e Tuʻi.—Aisea 55:4.

⁹ Ko e fakahoko ʻo e kikite ʻa e Tohi Tapú pea mo e fakamoʻoni tonu ʻa Sihova ko e ʻOtuá ʻoku fakahaaʻi mahino ai ko Sīsū ʻa e Mīsaia naʻe talaʻofá. Ka ʻoku tali ʻe he Tohi Tapú ʻa e ongo fehuʻi mahuʻinga kehe ʻo fekauʻaki mo Sīsū Kalaisi: Naʻá ne haʻú mei fē, pea ko e faʻahinga tokotaha fēfē ia?

10. Ko e hā ʻoku akoʻi ʻe he Tohi Tapú fekauʻaki mo e ʻi ai ʻa Sīsū ki muʻa ke ne haʻu ki māmaní?

¹⁰ ʻOku akoʻi ʻe he Tohi Tapú naʻe moʻui ʻa Sīsū ʻi hēvani ki muʻa ke ne haʻu ki māmaní. Naʻe kikite ʻa Maika ʻo pehē ko e Mīsaiá ʻe ʻaloʻi ia ʻi Pētelihema peá ne toe pehē ko Hono tupuʻangá naʻe “talu mei muʻa.” (Maika 5:2) ʻI he ngaahi taimi lahi, naʻe lea tonu ai ʻa Sīsū ʻo pehē naʻá ne moʻui ʻi hēvani ki muʻa ke ʻaloʻi mai ia ko ha tangatá. (Sione 3:​13; 6:​38, 62; 17:​4, 5) ʻI he tuʻunga ko ha meʻamoʻui laumālie ʻi hēvaní, naʻe maʻu ai ʻe Sīsū ha vahaʻangatae makehe mo Sihova.

11. ʻOku anga-fēfē hono fakahaaʻi ʻe he Tohi Tapú ko Sīsū ʻa e ʻAlo mahuʻinga taha ʻo Sihová?

¹¹ Ko Sīsū ʻa e ʻAlo mahuʻinga taha ʻo Sihová—pea ʻi he ʻuhinga lelei. ʻOku ui “ko e ʻUluaki ia naʻe fakatupu,” he ko ia ʻa e ʻuluaki fakatupu ʻa e ʻOtuá.b (Kolose 1:15) ʻOku ʻi ai ʻa e toe meʻa kehe ʻokú ne ʻai ʻa e ʻAlo ko ení ke makehé. Ko ia ʻa e “ʻAlo tofu-pe-taha-ne-fakatupu.” (Sione 3:16) ʻOku ʻuhinga ení ko Sīsū pē tokotaha naʻe fakatupu fakahangatonu ʻe he ʻOtuá. Ko Sīsū foki ʻa e tokotaha pē taha ʻa ia naʻe ngāueʻaki ʻe he ʻOtuá ʻi he taimi naʻá Ne fakatupu ai ʻa e ngaahi meʻa kehé kotoa. (Kolose 1:16) Pea ko Sīsū foki ʻoku ui ko “Folofola.” (Sione 1:14) ʻOku tala mai kiate kitautolu ʻe he meʻá ni naʻá ne lea maʻá e ʻOtuá, ʻo ʻikai ha veiveiua naʻá ne fakahoko ʻa e ngaahi pōpoaki mo e fakahinohino ki he ngaahi foha kehe ʻo e Tamaí, fakatouʻosi ʻa e ngaahi foha laumālié mo e tangatá.

12. ʻOku anga-fēfē ʻetau ʻiloʻi ko e ʻAlo ʻuluaki fakatupú ʻoku ʻikai ke tatau mo e ʻOtuá?

¹² ʻOku tatau ʻa e ʻAlo ʻuluaki fakatupú mo e ʻOtuá, ʻo hangē ko e tui ʻa e niʻihi? ʻOku ʻikai ko e meʻa ia ʻoku akoʻi ʻe he Tohi Tapú. Hangē ko ia kuo tau fakatokangaʻi ʻi he palakalafi ki muʻá, naʻe fakatupu ʻa e ʻAló. ʻOku hā mahino mai leva, naʻe ʻi ai hono kamataʻanga, lolotonga ia ko Sihova ko e ʻOtuá ʻoku ʻikai hano kamataʻanga pe ngataʻanga. (Sāme 90:2) Ko e ʻAlo tofu-pē-taha-ne-fakatupú naʻe ʻikai ʻaupito ke vakai ki ai naʻá ne feinga ke tatau mo ʻene Tamaí. ʻOku akoʻi mahino ʻe he Tohi Tapú ko e Tamaí ʻoku lahi ange ia ʻi he ʻAló. (Sione 14:28; 1 Kolinito 11:3) Ko Sihova pē taha ʻa e ‘Otua Mafimafi-Aoniú.’ (Senesi 17:​1, PM) Ko ia ai, ʻoku ʻikai hano tatau.c

13. ʻOku ʻuhinga ki he hā ʻa e Tohi Tapú ʻi heʻene lave ki he ʻAló “ko e Imisi ia ʻo e ʻOtua ko e Taʻehamai”?

¹³ Ko Sihova mo hono ʻAlo ʻuluaki fakatupú naʻá na maʻu ha feohi vāofi ʻi he ngaahi taʻu ʻe laui piliona—ki muʻa fuoloa ia ʻi hono fakatupu ʻa e ngaahi langi fetuʻuá mo e māmaní. He pau moʻoni ē ko ʻena feʻofaʻakí! (Sione 3:35; 14:31) Ko e ʻAlo ʻofeina ko ení naʻá ne hangē tofu pē ko ʻene Tamaí. Ko e ʻuhinga ia ʻoku lave ai ʻa e Tohi Tapú ki he ʻAló “ko e Imisi ia ʻo e ʻOtua ko e Taʻehamai.” (Kolose 1:15) ʻIo, hangē nai ko e meimei tatau ʻa ha foha fakaetangata mo ʻene tamaí ʻi he ngaahi founga kehekehe, ko e ʻAlo fakahēvani ko ení naʻá ne tapua atu ʻa e ngaahi ʻulungāanga mo e tōʻonga ʻa ʻene Tamaí.

14. Naʻe anga-fēfē ʻa e hoko ʻa e ʻAlo tofu-pē-taha-ne-fakatupu ʻo Sihová ʻo fanauʻi mai ko ha tangatá?

¹⁴ Ko e ʻAlo tofu-pē-taha-ne-fakatupu ʻo Sihová naʻá ne liʻaki loto-lelei ʻa hēvani ʻo ne hifo ki māmani ke moʻui ko ha tangata. Ka te ke fifili nai, ‘Naʻe malava fēfē ki ha meʻamoʻui laumālie ke fanauʻi mai ko ha tangata?’ Ke lavaʻi ení, naʻe fakahoko ʻe Sihova ha mana. Naʻá ne hiki ʻa e moʻui ʻa hono ʻAlo ʻuluaki fakatupú mei hēvani ki he manava ʻo ha tāupoʻou Siu ko Mele. Naʻe ʻikai ke kau ki ai ha tamai fakaetangata. Ko ia naʻe fanauʻi ai ʻe Mele ha foha haohaoa pea fakahingoa ia ko Sīsū.—Luke 1:​30-35.

15. Ko e hā ʻoku lava ai ke tau pehē ʻoku tau hoko ʻo ʻiloʻi lelei ange ʻa Sihova fakafou ʻia Sīsuú?

¹⁵ Ko e meʻa naʻe leaʻaki mo fai ʻe Sīsū lolotonga ʻene ʻi māmaní ʻoku tokoniʻi ai kitautolu ke tau hoko ʻo ʻiloʻi lelei ia. ʻIkai ngata ʻi he meʻa ko iá, ʻoku tau hoko ʻo ʻiloʻi lelei ange ʻa Sihova fakafou ʻia Sīsū. Ko e hā ko e tuʻungá ai ení? Manatuʻi ko e ʻAló ni ko ha tapua haohaoa atu ia ʻo ʻene Tamaí. Ko e ʻuhinga ia naʻe tala ai ʻe Sīsū ki he taha ʻo ʻene kau ākongá: “Ko ia kuo ne mātā au, kuo ne mātā ʻa e Tamai.” (Sione 14:9) Ko e ngaahi tohi Fakatohitapu ʻe fā ʻoku ʻiloa ko e ngaahi Kōsipelí—ʻa e Mātiu, Maake, Luke mo e Sioné—ʻoku nau tala mai kiate kitautolu ʻa e meʻa lahi fekauʻaki mo e moʻui, ngāue pea mo e ngaahi ʻulungāanga fakafoʻituitui ʻo Sīsū Kalaisí.

16. Ko e hā ʻa e pōpoaki tefito ʻa Sīsuú, pea naʻe haʻu mei fē ʻene ngaahi akonakí?

¹⁶ Naʻe ʻiloa ʻa Sīsū ko e “faiako.” (Sione 1:38; 13:​13, KF ) Ko e hā naʻá ne akoʻí? ʻI he tuʻunga tefitó, ko ʻene pōpoakí ko e “ogoogolelei oe buleaga”—ʻa ia ko e Puleʻanga ʻo e ʻOtuá, ʻa e founga-pule fakahēvani ʻa ia ʻe pule mai ki he māmaní kotoa pea te ne ʻomai ʻa e ngaahi tāpuaki taʻehanongataʻanga ki he faʻahinga talangofua ʻo e tangatá. (Mātiu 4:​23, PM) Ko e pōpoaki eni ʻa hai? Naʻe pehē ʻe Sīsū tonu: “Ko eku akonaki oku ikai aaku, ka oku aana naa ne fekau au,” ʻa ia ko Sihova. (Sione 7:​16, PM) Naʻe ʻiloʻi ʻe Sīsū ʻoku fiemaʻu ʻe heʻene Tamaí ke fanongo ʻa e faʻahinga ʻo e tangatá ʻo fekauʻaki mo e ongoongo lelei ʻo e Puleʻangá. ʻI he Vahe 8, te tau ako ai ʻa e meʻa lahi ange fekauʻaki mo e Puleʻanga ʻo e ʻOtuá pea mo e meʻa te ne fakahokó.

17. Ko fē naʻe fai ai ʻe Sīsū ʻene faiakó, pea ko e hā naʻá ne ngāue mālohi ai ke akoʻi ʻa e niʻihi kehé?

¹⁷ Naʻe fai ʻi fē ʻe Sīsū ʻene faiakó? ʻI he feituʻu kotoa pē naʻá ne maʻu ai ʻa e kakaí—ʻi he feituʻu ʻutá pea pehē foki ʻi he ngaahi kolo lalahí, ʻi he ngaahi kolo īkí, ʻi he ngaahi māketí pea ʻi honau ngaahi ʻapí. Naʻe ʻikai ʻamanekina ʻe Sīsū ke haʻu ʻa e kakaí kiate ia. Naʻá ne ʻalu kiate kinautolu. (Maake 6:56; Luke 19:​5, 6) Ko e hā naʻe ngāue mālohi ai ʻa Sīsū pea fakamoleki ʻa e konga lahi ʻo hono taimí ʻi he malangá mo e faiakó? Koeʻuhi ko hono fai iá ko e finangalo ia ʻo e ʻOtuá kiate iá. Naʻe fai maʻu pē ʻe Sīsū ʻa e finangalo ʻo ʻene Tamaí. (Sione 8:​28, 29) Ka naʻe ʻi ai mo e toe ʻuhinga ʻe taha ʻo ʻene malangá. Naʻá ne ongoʻi manavaʻofa ki he fuʻu kakai naʻa nau haʻu ke sio kiate iá. (Mātiu 9:​35, 36) Naʻe liʻekina kinautolu ʻe honau kau taki lotú, ʻa ē naʻe totonu ke nau akoʻi kiate kinautolu ʻa e moʻoni fekauʻaki mo e ʻOtuá pea mo ʻene ngaahi taumuʻá. Naʻe ʻiloʻi ʻe Sīsū ʻa e lahi ʻo e fiemaʻu ʻe he kakaí ke nau fanongo ki he pōpoaki ʻo e Puleʻangá.

18. Ko e hā ʻa e ngaahi ʻulungāanga ʻo Sīsū ʻoku fakamānako taha kiate koe?

¹⁸ Ko Sīsuú ko ha tangata ʻofa māfana mo ongoʻi loloto ia. Naʻe ʻiloʻi ai ʻe he niʻihi kehé ʻokú ne fotungofua mo anga-lelei. Naʻa mo e fānaú naʻa nau ongoʻi fiemālie ʻiate ia. (Maake 10:​13-16) Naʻe taʻefilifilimānako ʻa Sīsū. Naʻá ne fehiʻa ʻi he kākaá mo e fakamaau taʻetotonú. (Mātiu 21:​12, 13) ʻI he taimi naʻe maʻu ai ʻe he kakai fefiné ʻa e fakaʻapaʻapa siʻisiʻi mo ha ngaahi monū siʻí, naʻá ne tōʻongafai kiate kinautolu ʻaki ʻa e ngeia. (Sione 4:​9, 27) Naʻe anga-fakatōkilalo moʻoni ʻa Sīsū. ʻI he taimi ʻe taha, naʻá ne fufulu ai ʻa e vaʻe ʻo ʻene kau ʻapositoló, ko ha ngāue ʻa ia naʻe faʻa fakahoko ʻe ha sevāniti māʻulalo.

19. Ko e hā ʻa e fakatātā ʻoku fakahaaʻi ai naʻe ongongofua ʻa Sīsū ki he ngaahi fiemaʻu ʻa e niʻihi kehé?

¹⁹ Naʻe ongongofua ʻa Sīsū ki he ngaahi fiemaʻu ʻa e niʻihi kehé. Naʻe hā mahino tautefito ení, ʻi he taimi naʻá ne fakahoko ai ʻa e ngaahi mana ʻo e faifakamoʻuí, ʻi he mālohi ʻo e laumālie ʻo e ʻOtuá. (Mātiu 14:14) Ko e fakatātaá, naʻe haʻu ha tangata kilia kia Sīsū ʻo ne pehē: “Ka ne ke loto ke fai, te ke lava ke fakamaʻa au.” Naʻe ongoʻi fakafoʻituitui ʻe Sīsū ʻa e mamahi mo e faingataʻaʻia ʻa e tangatá ni. ʻI hono ueʻi ʻe he fakaʻofaʻiá, naʻe mafao atu ʻe Sīsū hono nimá ʻo ala ki he tangatá, mo ne pehē: “ʻOku ou loto pe; ke ke maʻa koe.” Pea naʻe moʻui ʻa e tangata mahakí! (Maake 1:​40-42) ʻOku lava ke ke fakaʻuta atu ki he anga ʻo e ongoʻi kuo pau naʻe maʻu ʻe he tangatá?

20, 21. Naʻe anga-fēfē hono fokotuʻu ʻe Sīsū ha faʻifaʻitakiʻanga ʻo e talangofua mateaki ki he ʻOtuá?

²⁰ Naʻe fokotuʻu ʻe Sīsū ʻa e faʻifaʻitakiʻanga lelei taha ʻo e talangofua mateaki ki he ʻOtuá. Naʻá ne faitōnunga ai pē ki heʻene Tamai fakahēvaní ʻi he malumalu ʻo e faʻahinga tuʻunga kotoa pē pea neongo ʻa e faʻahinga kotoa pē ʻo e fakafepakí mo e faingataʻá. Naʻe talitekeʻi mālohi mo lavameʻa ʻe Sīsū ʻa e ngaahi ʻahiʻahi ʻa Sētané. (Mātiu 4:​1-11) ʻI he taimi ʻe taha, naʻe ʻikai ke tui ai ʻa e niʻihi ʻo e ngaahi kāinga tonu ʻo Sīsuú kiate ia, naʻa mo ʻenau pehē naʻá ne “sesele.” (Maake 3:21) Ka naʻe ʻikai tuku ʻe Sīsū ke nau tākiekina ia; naʻá ne hanganaki fai pē ʻa e ngāue ʻa e ʻOtuá. Neongo ʻa e ngaahi ngaohikoviá mo e leakoviá, naʻe tauhi maʻu ʻe Sīsū ʻa e mapuleʻi-kitá, ʻo ʻikai ʻaupito feinga ke fakatupu ha maumau ki hono kau fakafepakí.—1 Pita 2:​21-23.

²¹ Naʻe hanganaki faitōnunga ʻa Sīsū ʻo aʻu ki heʻene pekiá—ko ha pekia fakamamahi mo langa lahi ʻi he nima ʻo hono ngaahi filí. (Filipai 2:8) Fakakaukau angé ki he meʻa naʻá ne kātekina ʻi he ʻaho fakaʻosi ʻo ʻene moʻui ko ha tangatá. Naʻe puke ia, talatalaakiʻi ʻe he kau fakamoʻoni loi, fakahalaiaʻi ʻe he kau fakamaau kākā, kataʻi ʻe he fuʻu kakaí pea fakamamahiʻi ʻe he kau sōtiá. ʻI hono tutuki ki ha ʻakaú, naʻá ne heʻaki ʻene mānava fakaʻosí, ʻo ne kalanga: “Kuo lava!” (Sione 19:​30, KF ) Kae kehe, ʻi hono ʻaho tolu hili ʻa e pekia ʻa Sīsuú, naʻe fokotuʻu hake ia ʻe heʻene Tamai fakahēvaní ki he moʻui laumālié. (1 Pita 3:18) ʻI ha ngaahi uike siʻi ki mui ai, naʻá ne toe foki ki hēvani. ʻI aí, naʻá ne “nofo hifo mei he toʻomataʻu ʻo e ʻOtua” ʻo tatali ai ke maʻu ʻa e mafai fakatuʻí.—Hepelu 10:​12, 13.

22. Ko e hā naʻe fakahoko ʻe Sīsū ʻi heʻene hanganaki faitōnunga ʻo aʻu ki heʻene pekiá?

²² Ko e hā naʻe fakahoko ʻe Sīsū ʻi heʻene hanganaki faitōnunga ʻo aʻu ki heʻene pekiá? Ko e pekia ʻa Sīsuú naʻe fakaava moʻoni mai ai kiate kitautolu ʻa e faingamālie ki he moʻui taʻengata ʻi ha māmani palataisí, ʻi he fehoanaki mo e muʻaki taumuʻa ʻa Sihová. Ko e anga hono ʻai ke malava ia ʻi he pekia ʻa Sīsuú ʻe lāulea ki ai ʻi he vahe hokó.