ʻE Toe Ngata Koā ʻa e Faingataʻá?

“Ko e ʻOtua . . . te ne holoholo ʻa e loʻimata kotoa pē mei honau mata; pea ʻe ʻikai toe ai ha mate, pea ʻe ʻikai toe ai ha mamahi, pe ha tangi, pe ha ongosia.”​—Fakahā 21:3, 4, Paaki Foʻou.

Fakapapauʻi ʻoku ʻikai ko e ʻOtuá ʻokú ne fakatupunga ʻa ʻetau ngaahi palopalemá.​—Sēmisi 1:13.

Fiemālie mei hono ʻiloʻi ʻoku ongoʻi ʻe he ʻOtuá kitautolu ʻi heʻetau faingataʻaʻiá.​—Sākalaia 2:8.

ʻAmanaki atu ʻe ngata ʻa e faingataʻá kotoa.​—Saame 37:9-11.

ʻIo, ʻi he ʻuhinga ʻe ua:

•  ʻOku fehiʻa ʻa e ʻOtuá ʻi he faingataʻá mo e fakamaau taʻetotonú. Fakakaukau ki he anga ʻo e ongoʻi ʻa Sihova ko e ʻOtuá ʻi he taimi naʻe ngaohikoviʻi anga-fakamamahi ai ʻa hono kakaí ʻi he taimi ʻo e Tohi Tapú. ʻOku pehē ʻe he Tohi Tapú naʻá ne mamahi koeʻuhí ko e “faʻahinga naʻa nau ngaohikoviʻi kinautolú.”—Fakamaau 2:18, Liliu Tohi Tapu Māmani Foʻoú.

  ʻOku ʻikai ko ha meʻa maʻamaʻa ki he ʻOtuá ʻa ʻene vakai ki he faʻahinga ʻoku nau ngaohikoviʻi ʻa e niʻihi kehé. Ko e fakatātaá, ʻoku pehē ʻe he Tohi Tapú ko e “nima ʻa ia ʻokú ne lingi ʻa e toto ʻo e taʻehalaiá” ʻokú ne fakaliliʻa ai.—Palōveepi 6:16, 17.

•  ʻOku tokanga mai ʻa e ʻOtuá kiate kitautolu tāutaha. ʻOku ʻikai ngata pē ʻi he ʻiloʻi ʻe he tokotaha taki taha “ʻa ʻene faingataʻaʻia mo ʻene mamahi” ka ʻoku pehē pē mo Sihova!—2 Kalonikali 6:29, 30.

Fakafou ʻi hono Puleʻangá, ʻe vavé ni ke fakangata ʻe Sihova ʻa e faingataʻaʻia ʻa e tokotaha taki taha. (Mātiu 6:9, 10) Lolotonga iá, ʻokú ne fakafiemālieʻi ʻi he anga-ʻofa ʻa e faʻahinga ʻoku kumi loto-moʻoni kiate iá.—Ngāue 17:27; 2 Kolinitō 1:3, 4.