Ngaahi Founga ke Fakalahi Ai Hoʻo Ngāue Fakafaifekaú

ʻI HE aʻu ki he taimi ke fekauʻi atu ai ʻe Sīsū ʻa ʻene kau ākongá ʻi he tuʻunga ko e kau malanga ʻo e Puleʻangá, naʻá ne tala ange kiate kinautolu: “Ko e utu-taʻú ʻoku lahi, ka ʻoku tokosiʻi ʻa e kau ngāué.” Naʻe lahi ʻa e ngāue ke faí, ko ia naʻá ne tānaki atu: “Mou kōlenga ki he ʻEiki ʻo e utu-taʻú ke ne fekau atu ha kau ngāue ki heʻene utu-taʻú.” (Māt. 9:37, 38) Naʻe tala ʻe Sīsū ki heʻene kau ākongá ʻa e founga ke fakahokoʻaki ʻenau ngāue fakafaifekaú. Naʻe ʻi ai ʻa e ongoʻi fakavavevave ʻi heʻene ngaahi leá: “ʻE ʻikai ʻaupito te mou ʻosiki ʻa e vāhenga ʻo e ngaahi kolo ʻo ʻIsilelí kuo aʻu mai ʻa e Foha ʻo e tangatá ia.”—Māt. 10:23.

² ʻOku pehē pē ʻi he ʻahó ni, ʻoku lahi ʻa e ngāue ke fai ʻi he ngāue fakamalangá. ʻOku fakaʻaʻau ke ʻosi ʻa e taimí, pea ko e ongoongo lelei ko ʻeni ʻo e Puleʻangá kuo pau ke malangaʻi ia ki muʻa ke hoko mai ʻa e ngataʻangá! (Mk. 13:10) Koeʻuhi ko e ngoué ko e māmaní, ʻoku tau fehangahangai mo e tuʻunga ʻoku meimei tatau tofu pē mo e meʻa naʻe hokosia ʻe Sīsū mo ʻene kau ākongá, ka ʻi ha tuʻunga lahi ange. ʻOku tau tokosiʻi mo kitautolu ʻi hono fakahoa atu ki he laui piliona ʻo e faʻahinga ʻo e tangatá ʻi he māmaní, ka ʻoku lava ke tau fakapapauʻi ʻe tokoniʻi kitautolu ʻe Sihova. Ko e ongoongo lelei ʻo e Puleʻangá ʻe malangaʻi ia ʻi he kotoa ʻo e māmaní, pea ʻi he taimi kotofa ʻa Sihová, ʻe hoko mai ʻa e ngataʻangá. Te tau fakamuʻomuʻa ʻa e Puleʻanga ʻo e ʻOtuá ʻi heʻetau moʻuí koeʻuhi ke fakahoko kakato ai ʻa ʻetau ngāue fakafaifekaú? Ko e hā ʻa e ngaahi taumuʻa fakateokalati ʻe lava ke tau tuli ki ai ʻo aʻu ki he ngataʻanga ko iá?

³ ʻI hono fakahaaʻi ʻa e meʻa ʻoku kole ʻe Sihova mei Heʻene kau sevāniti fakatapuí, naʻe pehē ʻe Sīsū: “Kuo pau ke ke ʻofa kia Sihova ko ho ʻOtuá ʻaki ho lotó kotoa pea ʻaki hoʻo moʻuí kotoa pea ʻaki ho ʻatamaí kotoa pea ʻaki ho mālohí kotoa.” (Mk. 12:30) ʻOku fiemaʻu ke tau ngāue ki he ʻOtuá ʻaki hotau kotoá. ʻOku ʻuhinga ʻení ke tau fakahāhā ʻa e loloto ʻo ʻetau anga-līʻoá mo e moʻoni ʻo ʻetau fakatapuí ʻaki hono fai ʻetau lelei tahá ʻi he ngāue ʻa Sihová. (2 Tīm. 2:15) ʻOku ʻi ai ʻa e ngaahi faingamālie ʻoku fakaava mai kiate kitautolu taki taha, ʻo fakatatau ki hotau ngaahi tuʻungá mo ʻetau ngaahi malava fakafoʻituituí. Kiʻi fakakaukau angé ki he niʻihi ʻo e ngaahi faingamālie ko ʻení, pea fili pe ko e hā ʻa e ngaahi taumuʻa fakateokalati te ke tuli ki ai ʻi hono fakahoko ʻa hoʻo ngāue fakafaifekaú.

⁴ Ko e tokotaha kotoa ʻokú ne tali ʻa e moʻoní ʻokú ne maʻu ʻa e monū ko hono malangaʻi ʻa e ongoongo leleí. Ko e ngāue tefito eni naʻe ʻoange ʻe Sīsū ki heʻene kau ākongá ke nau faí. (Māt. 24:14; 28:19, 20) ʻOku faʻa kamata leaʻaki ʻe ha ākonga ʻa Sīsū Kalaisi ki he niʻihi kehé ʻo fekauʻaki mo e ongoongo leleí ʻi heʻene fanongo pē ki aí. Ko e meʻa ia naʻe fai ʻe ʻAnitelū, Filipe, Koliniusi mo e faʻahinga kehe. (Sione 1:40, 41, 43-45; Ngā. 10:1, 2, 24; 16:14, 15, 25-34) ʻOku ʻuhinga nai ení ʻe lava ke talaki ʻe ha taha ʻa e ongoongo leleí ki he niʻihi kehé neongo ʻoku teʻeki ai papitaiso ia? ʻIo! ʻI he taau pē ko ia ha taha ke hoko ko ha tokotaha malanga teʻeki papitaiso ʻi he fakatahaʻangá, ʻoku fakaava mai leva kiate ia ʻa e faingamālie ke kau ʻi he faifakamoʻoni fale-ki-he-falé. ʻIkai ko ia pē, fakatatau ki heʻene malavá mo hono ngaahi tuʻungá, te ne kau nai ʻi he ngaahi tafaʻaki kehe ʻo e ngāue fakamalangá.

⁵ ʻI he hili ʻa e papitaiso ʻa ha tokotaha malanga, ʻoku ʻikai ha veiveiua ʻokú ne mahuʻingaʻia ʻi hono fai ʻa e kotoa ʻene malavá ke tokoniʻi ʻa e niʻihi kehé ke nau ako fekauʻaki mo e ongoongo leleí. ʻOku maʻu fakatouʻosi ʻe he tangatá mo e fefiné ʻa e monū ko e kau ʻi he ngāue fakamalangá. ʻOku tau maʻu ʻa e monū ke fai naʻa mo ha kiʻi tafaʻaki siʻisiʻi ʻi hono ʻai ke laka ki muʻa ʻa e ngaahi meʻa ʻo e Puleʻanga ʻo e ʻOtuá. Ko ha taha pē ʻoku lava ke fakalahi ʻa ʻene ngāue fakafaifekaú ʻo fakakau ai ʻa e ngaahi tafaʻaki kehe ʻo e ngāué, ko e moʻoni te ne fiefia.

⁶ Mahalo pē ʻoku faʻa toutou ngāueʻi ʻa e feituʻu ngāue hoʻo fakatahaʻangá pea ʻoku ʻoatu ai ha faifakamoʻoni lelei. Kapau ko ia, te ke ongoʻi nai ʻe lava ke ke fakalahi hoʻo ngāue fakafaifekaú ʻaki ʻa e hiki ki ha feituʻu ʻa ia ʻoku lahi ange ai ʻa e fiemaʻu ki he ngāue fakamalangá. (Ngā. 16:9) Kapau ʻokú ke lolotonga ngāue ko ha mātuʻa pe ko ha sevāniti fakafaifekau, mahalo pē ʻe houngaʻia ha fakatahaʻanga ʻe taha ʻi hoʻo tokoní. ʻE lava ke ʻoatu ʻe hoʻo ʻovasia sēketí ha ngaahi fokotuʻu ki ha founga ʻe lava ke ke tokoni ai ki ha fakatahaʻanga ʻe taha ʻi he sēketí. Kapau ʻokú ke fakaʻamu ke ngāue ʻi ha feituʻu ʻe taha ʻi ho fonuá, ʻe lava ke ʻoatu ʻe he ʻōfisi vaʻá ha fakamatala ʻaonga.

⁷ Te ke saiʻia ke ngāue ʻi ha fonua muli? Kapau ko ia, ʻoku fiemaʻu ke ke fakakaukauʻi fakalelei ʻa e faʻahinga fehikitaki peheé. Ko e hā ʻoku ʻikai te ke lāulea ai ki he meʻá ni mo e kau mātuʻa ʻi ho fakatahaʻanga? Ko ha hiki pehē ʻe maongo moʻoni ia kiate koe pea mo ha taha pē ʻokú ke ʻalu fakataha mo ia. (Luke 14:28) Kae kehe, kapau ʻoku ʻikai ke ke palani ke nofo fuoloa ai, ʻe lelei taha nai ke ke fakakaukau ke ngāue ʻi ha feituʻu ʻi ho fonuá tonu.

⁸ ʻI he ngaahi fonua ʻe niʻihi, ko e fanga tokoua kuo ngāueʻaki ki he tuʻunga tauhí ʻoku nau kei foʻou ʻi he moʻoní. ʻOku loto-lelei ʻa e fanga tokoua anga-fakatōkilalo fakalotofonuá ke tuku ki he kau mātuʻa taukei ange ʻoku hiki atu ki he fakatahaʻangá ke nau takimuʻa. Kapau ko ha mātuʻa koe pea ʻokú ke fakakaukau ke hiki ki ha fonua pehē, manatuʻi ko hoʻo taumuʻá ʻoku ʻikai ko e fetongi ʻa e fanga tokoua fakalotofonuá. ʻI hono kehé, ngāue mo kinautolu. Fakalototoʻaʻi kinautolu ke kakapa atu mo tali ʻa e ngaahi fatongia ʻi he fakatahaʻangá. (1 Tīm. 3:1) Hoko ʻo anga-kātaki kapau kuo ʻikai fakahoko ha ngaahi meʻa ʻe niʻihi ʻo hangē ko ia ʻi ho fonuá. Ngāueʻaki hoʻo taukei ko ha mātuʻá ke tokoniʻi moʻoni ho fanga tokouá. Kapau leva ʻe aʻu ki ha tuʻunga kuo pau ke ke mavahe pea foki ki ho fonuá tonu, ko e kau mātuʻa fakalotofonuá te nau ʻi ha tuʻunga lelei ange ke tokangaʻi ʻa e fakatahaʻangá.

⁹ Ki muʻa ke ʻoatu ʻe he ʻōfisi vaʻá ʻa e ngaahi hingoa ʻo ha ngaahi fakatahaʻanga ʻa ia ʻe lava ke ʻaonga ki ai ʻa hoʻo tokoní, ʻe fiemaʻu ia ke ʻoatu ʻe he Kōmiti Ngāue ho Fakatahaʻangá ha tohi fakaongoongolelei. ʻOku fiemaʻu ʻa e tohi ko ʻení ʻo tatau ai pē pe ko ha mātuʻa koe pe ko ha sevāniti fakafaifekau, ko ha tāimuʻa pe ko ha tokotaha malanga. ʻE ʻave fakahangatonu ʻe he kōmiti ngāué ʻa e tohi fakaongoongoleleí fakataha mo hoʻo tohi kolé ki he ʻōfisi vaʻa ʻo e fonua ʻa ia ʻokú ke loto ke ngāue aí.

¹⁰ Ke fakalahi ʻa hoʻo ngāue fakafaifekaú, te ke fakaʻamu nai ke fakakaukau ke ako ha lea kehe, ʻo kau ai ʻa e lea fakanoá. Kapau ko hoʻo taumuʻá ia ke ako ke malanga ʻi ha lea kehe, fēfē ke tala ia ki he kau mātuʻá mo e ʻovasia sēketí? ʻE lava ke nau ʻoatu ha ngaahi fokotuʻu mo e fakalototoʻa ʻoku fiemaʻú. ʻI he malumalu ʻo e tataki ʻa e ʻōfisi vaʻá, kuo fokotuʻutuʻu maau ai ʻe he ngaahi sēketi ʻe niʻihi ʻa e ngaahi kalasi ako lea ke akoʻi ʻa e kau malanga mo e kau tāimuʻa tāú ke malanga ʻi ha lea kehe.

¹¹ ʻOku totonu ke alāanga ʻa e tokotaha malanga kotoa pē mo e ngaahi fiemaʻu fakalūkufua ki he ngāue tāimuʻa tokoní, tāimuʻa tuʻumaʻú pea mo e tāimuʻa makehé pea pehē foki ki he ngaahi tafaʻaki kehe ʻo e ngāue taimi-kakató. Ko ha tāimuʻa kuo pau ke hoko ia ko ha Kalisitiane alafaʻifaʻitakiʻanga ʻosi papitaiso ʻa ia ʻoku fakaʻatā ia ʻe hono ngaahi tuʻunga fakafoʻituituí ke ngāueʻi ʻa e ngaahi houa pau ʻi he malangaʻi ʻa e ongoongo leleí. Ko e Kōmiti Ngāue ʻa e Fakatahaʻangá ʻokú ne tali ʻa e ngaahi tohi kole ki he ngāue tāimuʻa tokoni mo tuʻumaʻú, ka ko e kau tāimuʻa makehé ʻoku fakanofo ia ʻe he ʻōfisi vaʻá.

¹² Ko e kau tāimuʻa tokoní ʻe fakanofo nai ia ki ha māhina ʻe taha, ki ha ngaahi māhina hokohoko, pe hokohoko atu ʻi ha taimi fuoloa ʻo fakatatau pē ki honau ngaahi tuʻungá. ʻOku fiefia ʻa e kau malanga tokolahi ʻo e Puleʻangá ʻi he ngāue ko e kau tāimuʻa tokoni ʻi he ngaahi taimi makehe, ʻo hangē ko e lolotonga ʻa e faʻahitaʻu Fakamanatú pe ko e māhina ʻo e ʻaʻahi ʻa e ʻovasia sēketí. ʻOku fili ʻe he niʻihi ʻa e ngaahi māhina mālōlō mei he ngāué. Ko e kau malanga ʻosi papitaiso ʻoku nau kei akó, te nau loto nai ke hū ʻo kau ʻi he tāimuʻa tokoní ʻi he tutuku ʻa e akó. ʻE lava ke fili ʻe he kau malangá ke nau tāimuʻa tokoni ʻi ha houa pau ʻi Maʻasi mo ʻEpeleli mo e lolotonga ʻa e māhina ʻoku ʻaʻahi mai ai ʻa e ʻovasia sēketí. Pe ko e hā pē ʻa ho ngaahi tuʻunga fakafoʻituituí, kapau ʻokú ke maʻu ha tuʻunga fakaeʻulungaanga mo ha tōʻonga lelei, ʻe lava ke ke fokotuʻutuʻu ke lavaʻi ʻa e houa ʻoku fiemaʻú, pea tui te ke lava ʻo ngāue ko ha tāimuʻa tokoni ʻi he māhina ʻe taha pe lahi ange, ʻe fiefia ʻa e kau mātuʻá ke fakakaukauʻi hoʻo tohi kole ki he monū ko eni ʻo e ngāué.

¹³ Ke taau ko ha tāimuʻa tuʻumaʻú, kuo pau ke ke ʻi ha tuʻunga ʻi he taimí ni ke aʻusia ai ʻa e houa fakataʻu ʻoku fiemaʻú. ʻI he hoko ko ha tāimuʻa tuʻumaʻú, te ke loto ke ngāue vāofi mo hoʻo fakatahaʻangá. Ko e kau tāimuʻa faivelengá ko ha tāpuaki kinautolu ki ha fakatahaʻanga, ʻi heʻenau fakatupulekina ʻa e faivelenga ʻi he ngāue fakamalangá pea aʻu ʻo nau fakalototoʻaʻi mo e niʻihi kehé ke nau kakapa atu ki he ngāue tāimuʻá. Kae kehe, ki muʻa ke ke kole ke hoko ko ha tāimuʻa tuʻumaʻú, kuo pau ke ke hoko ko ha tokotaha malanga alafaʻifaʻitakiʻanga lelei ʻosi papitaiso ʻi he māhina ʻe ono pe lahi ange.

¹⁴ Ko e kau tāimuʻa makehé ʻoku faʻa fili ia mei he kau tāimuʻa tuʻumaʻu ʻa ia kuo nau fakahāhā ʻenau ola lelei ʻi he ngāue fakafaifekaú. Kuo pau ke nau malava ke ngāue ʻi ha feituʻu pē ʻe fili ʻe he ʻōfisi vaʻá ke vahe kinautolu ki ai. ʻOku meimei ko e ngaahi feituʻu eni ʻoku tuʻu mavahe ʻa ia ʻe lava ke nau maʻu ai ha faʻahinga mahuʻingaʻia pea fokotuʻu mo ha ngaahi fakatahaʻanga foʻou. ʻI he taimi ʻe niʻihi, ʻoku vahe ʻa e kau tāimuʻa makehé ki he ngaahi fakatahaʻanga ʻoku nau fiemaʻu tokoni ke ʻosiki honau feituʻu ngāué. Ko e kau tāimuʻa makehe ʻe niʻihi ʻa ia ko e kau mātuʻá kuo vaheʻi kinautolu ke tokoni ki he ngaahi fakatahaʻanga īkí, naʻa mo e taimi ʻoku ʻikai ha fiemaʻu pau ki ha kau ngāue lahi ange ʻi he ngāue fakamalangá. ʻOku maʻu ʻe he kau tāimuʻa makehé ha kiʻi tokoni fakapaʻanga feʻunga ke tokoni ki heʻenau ngaahi fakamole ʻi he nofó. Ko e kau tāimuʻa makehe ʻe niʻihi ʻoku fakanofo ke nau ngāue ʻi ha vahaʻa taimi.

¹⁵ ʻOku fakanofo ʻe he Kōmiti Ngāue ʻo e Kulupu Pulé ʻa e kau misinale ʻi he ngāue fakamalangá, ʻa ia ʻoku vaheʻi leva kinautolu ʻe he Kōmiti Vaʻa fakalotofonuá ke nau ngāue ʻi he ngaahi feituʻu ʻoku nofoʻi tokolahí. ʻOku nau fakahoko ai ʻa e ngaahi meʻa lahi ʻi hono ʻai ke tuʻu maʻu mo fakaivimālohiʻi ʻa e ngāue fakamalangá mo e ngaahi ngāue ʻa e fakatahaʻangá. Ko e kau misinale ʻi he ngāue fakamalangá ʻoku meimei ke nau ako ʻi he Ako Maʻá e Kau ʻEvangeliō ʻo e Puleʻangá. ʻOku tokonaki kiate kinautolu ha nofoʻanga pea maʻu ha tokoni fakapaʻanga feʻunga ki heʻenau ngaahi fakamolé.

¹⁶ Ko e faʻahinga ko ia ʻoku fakanofo ʻe he Kulupu Pulé ko e kau ʻovasia sēketí, ʻoku akoʻi kinautolu pea maʻu ʻa e taukei ʻi heʻenau tomuʻa hoko ko e kau ʻovasia sēketi tokoni. Ko e kau tangata peheé ʻoku nau ʻofa ʻi he ngāue fakafaifekaú mo ʻofa ʻi honau fanga tokouá. Ko e kau tāimuʻa faivelenga kinautolu, kau ako tōtōivi ʻo e Tohi Tapú, pea ʻoku nau ola lelei ʻi hono fakahoko ʻa e ngaahi malangá mo e faiakó. ʻOku nau tuʻu-ki-muʻa ʻi hono fakahāhā ʻa e fua ʻo e laumālié, pea ʻoku nau fakahāhā ʻa e mafamafatatau, fakaʻatuʻi mo e ʻiloʻilo. Kapau kuo mali ʻa e tokouá, ko hono uaifi tāimuʻá ʻoku alafaʻifaʻitakiʻanga ʻi heʻene tōʻongá mo e fakafeangai mo e niʻihi kehé. Ko e tokotaha malanga ola lelei ia. ʻOkú ne toe mahinoʻi hono ngafa ko ha uaifi Kalisitiane ʻoku anganofo, ʻo ʻikai ke lea maʻa hono husepānití pe puleʻi ʻa e fetalanoaʻakí. ʻOku maʻu ʻe he kau ʻovasia sēketí mo honau ngaahi uaifí ha taimi-tēpile femoʻuekina ʻaupito, ko ia ko e faʻahinga ʻoku kakapa atu ki he ngāue ko ení, kuo pau ke nau moʻui lelei. ʻOku ʻikai tohi kole ʻa e kau tāimuʻá ki he ngāue fakasēketí. Ka, ʻoku nau ʻai ke ʻiloʻi ʻe heʻenau ʻovasia sēketí ʻenau holi ke kau ʻi he ngāue fakasēketí, ʻa ia te ne ʻoange kiate kinautolu ha ngaahi fokotuʻu.

¹⁷ Ako Maʻá e Kau ʻEvangeliō ʻo e Puleʻangá: ʻOku ʻi ai ha fiemaʻu ki he kau ʻevangeliō tokolahi ange ʻo e Puleʻangá ke nau ngāueʻi ʻa e ngaahi feituʻu ʻoku tātātaha hono ngāueʻí mo poupou fakalaumālie ki he ngaahi fakatahaʻangá. Ko ia ai, ko e fanga tokoua mo e fanga tuofāfine teʻeki malí pea mo e ngaahi hoa malí te nau tohi kole nai ke maʻu ha ako makehe ʻi he Ako Maʻá e Kau ʻEvangeliō ʻo e Puleʻangá. Hili hono maʻu ʻa e akó, ʻoku fekauʻi atu ʻa e kau maʻu tohi fakamoʻoni akó ke nau ngāue ko e kau tāimuʻa tuʻumaʻu ʻi he feituʻu ʻoku lahi ange ai ʻa e fiemaʻu ʻi honau fonua tupuʻangá. Kae kehe, ʻe ʻoange nai ki he faʻahinga te nau fakafaingamālieʻi kinautolú ha ngaahi ngāue kehe ʻi honau fonua tupuʻangá pe ʻi ha fonua kehe. ʻE fekau atu ha niʻihi ke nau hoko ko e kau tāimuʻa makehe fakataimi pe kau tāimuʻa makehe tuʻumaʻu. Ko e kau tāimuʻa ʻoku nau mahuʻingaʻia ʻi hono maʻu ʻa e ako ko ení te nau ʻilo nai ki he ngaahi fiemaʻu ko iá ʻi he fakataha ʻe fai ʻi he fakataha-lahi fakavahé.

¹⁸ Akoʻanga Tohi Tapu Taua Leʻo ko Kiliatí: Ko e fanga tokoua mo e fanga tuofāfine teʻeki malí mo e ngaahi hoa mali kuo fili ke nau kau ʻi he ako ko ení ʻoku nau lea faka-Pilitānia pea ʻoku nau ngāue ko ha kau ngāue taimi-kakato makehe. ʻOku nau maʻu ʻa e malava ke fakaivimālohiʻi mo ʻai ke tuʻu maʻu ʻa e ngāue fakamalangá pe ko e fokotuʻutuʻu maau ʻa e vaʻá. Kuo nau ʻosi fakahāhā ʻa e fiefia ʻi he ngāue maʻa honau fanga tokouá pea malava ke tokoniʻi ʻa e niʻihi kehé ʻi ha founga anga-ʻofa ke nau ako mo pipiki ki he fakahinohino ʻa e Folofolá mo fakateokalatí. ʻOku fakaafeʻi ʻe he Kōmiti Vaʻa fakalotofonuá ʻa e faʻahinga ʻoku malava ke kau ki aí ke fakahū ange ʻenau tohi kolé. ʻOku vaheʻi ʻa e kau maʻu tohi fakamoʻoni ako mei he akoʻanga ko ení ki he ngāue fakamalangá pe ki he ʻōfisi vaʻa ʻi ha fonua muli pe ʻi honau fonua tupuʻangá.

¹⁹ Ko e ngāue ʻi he Pētelí ko ha monū makehe ia. Ko e hingoa Pētelí ʻoku ʻuhingá ko e “Fale ʻo e ʻOtuá,” pea ko e hingoa ko iá ʻoku feʻungamālie moʻoni ia mo e ngaahi senitā ko ʻeni ʻo e ngāue fakateokalatí. ʻOku fakahoko ʻe he fanga tokoua mo e fanga tuofāfine ʻi he Pētelí ha ngāue mātuʻaki mahuʻinga ʻoku fekauʻaki mo hono faʻu, liliu, mo tufaki ʻa e ʻū tohi Fakatohitapú. Ko ʻenau ngāué ʻoku mahuʻinga ʻaupito ki he Kulupu Pulé, ʻa ia ʻoku nau ʻomai ʻa e tataki mo e fakahinohino ki he ngaahi fakatahaʻanga takatakai ʻi he māmaní. Ko e tokolahi ʻo e kau Pētelí ko e kau liliu-lea ʻoku nau nofo mo ngāue ʻi he ngaahi feituʻu ʻo e vaʻá ʻa ia ʻoku leaʻaki ai ʻa e lea ʻoku nau liliú. ʻOku nau malava ai heni ke fanongo ʻi he lea ʻoku ngāueʻaki ʻi he moʻui fakaʻahó. ʻE lava ke nau toe siotonu pe ʻoku mahinoʻi ʻe he kakaí ʻa e lea ʻoku ngāueʻaki ʻi he ʻū tohi ʻoku liliú.

²⁰ Ko e lahi ʻo e ngāue ʻoku fakahoko ʻi Pētelí ko e ngāue lahi fakaesino. ʻI heʻene peheé, ko e faʻahinga ʻoku fakaafeʻi ki Pētelí ʻoku meimei ko e fanga tokoua ʻosi fakatapui mo papitaiso ʻa ia ʻoku nau kei talavou, moʻui lelei mo mālohi fakaesino. Kapau ʻe ʻi ai ha fiemaʻu ʻi he vaʻa ʻokú ne tokangaʻi ho fonuá pea te ke loto ke ngāue ʻi he Pētelí, ʻe lava ke ke ʻiloʻi lahi ange fekauʻaki mo e ngaahi fiemaʻu ki aí mei he kau mātuʻa ʻi hoʻo fakatahaʻangá.

²¹ Ko hono langa ʻa e ngaahi fale faiʻanga lotú ko ha ngāue toputapu ia, ʻo meimei tatau pē mo e ngāue ʻo hono langa ʻa e temipale ʻo Solomoné. (1 Tuʻi 8:13-18) ʻOku fakahāhā ʻe he fanga tokoua mo e fanga tuofāfine tokolahi ʻa e faivelenga fisifisimuʻa ʻaki ʻenau pole ke ngāueʻaki honau taimí mo ʻenau koloá ke kau ʻi he ngāue ko ʻení.

²² ʻOkú ke ʻi ha tuʻunga ʻe lava ai ke ke tokoni? Kapau ko ha tokotaha malanga ʻosi papitaiso koe ʻokú ke loto-lelei ke kau ʻi ha ngāue pehē, ʻe houngaʻia ʻa e fanga tokoua ʻoku nau tokangaʻi ʻa e langa ʻi ho feituʻú ʻi hoʻo tokoní pea ʻoku nau loto-lelei ke akoʻi koe neongo kapau ʻoku ʻikai te ke maʻu ha pōtoʻi feʻunga. Ko e hā ʻoku ʻikai te ke ʻai ai ke ʻilo ʻe he kau mātuʻa fakalotofonuá ʻokú ke faingamālie ke tokoní? Ko e kau malanga taau ʻosi papitaiso ʻe niʻihi ʻoku nau ʻi ha tuʻunga ke pole ki he ngāue langa ʻo e ngaahi fale faiʻanga lotu ʻi he ngaahi fonua kehé.

²³ ʻOku lahi ʻa e ngaahi faingamālie ke kau ai ʻi he ngāue langá. Ko e kau malanga ʻosi papitaiso alafaʻifaʻitakiʻanga lelei ʻoku ʻi ai ʻenau kiʻi pōtoʻí ʻa ia ʻe lava ke nau poupou ki he ngaahi langa ofi ki honau feituʻú te nau hoko nai ko e kau ngāue pole Tisaini/Langa Fakalotofonua. ʻOku malava ʻa e niʻihi ke poupou ki ha ngāue langa lahi ange ʻi ha feituʻu mamaʻo ʻi ha vahaʻa taimi nounou pea ʻoku fakanofo ia ʻe he ʻōfisi vaʻá ke nau hoko ko e kau ngāue pole langa mei he uike ʻe ua ki he māhina ʻe tolu. Ko e faʻahinga ʻoku fakanofo ke nau ngāue ʻi ha vahaʻa taimi lōloá ʻoku ui kinautolu ko e kau sevāniti langa. Ko ha sevāniti langa ʻoku ngāue ʻi ha fonua muli ʻokú ne hoko ko ha sevāniti langa ʻi muli. Ko ha Kulupu Langa ʻoku faʻuʻaki ʻa e kau sevāniti langa mo e kau ngāue pole langa, ʻoku nau takimuʻa ʻi he ngāue taki taha pea ʻoku tokoni kia kinautolu ʻa e kau ngāue pole Tisaini/Langa Fakalotofonua mo e kau ngāue pole mei he ngaahi fakatahaʻanga ʻoku kaunga ki he langá. ʻOku hiki ʻa e ngaahi Kulupu Langá mei he langa ʻe taha ki he langa ʻe taha ʻi loto ʻi ha feituʻu vaʻa.

²⁴ Kapau kuó ke ʻosi fakatapui hoʻo moʻuí kia Sihova, ko hoʻo holí ia ke tauhi kia Sihova ʻo taʻengata. Ka ko e hā hoʻo ngaahi taumuʻa fakalaumālié ʻi he ʻalu atu ko ia ʻa e taimí? Ko hono maʻu ha ngaahi taumuʻa fakalaumālié ʻe tokoniʻi ai koe ke ke ngāuefakapotopotoʻaki ho iví mo hoʻo ngaahi koloa kehé. (1 Kol. 9:26) Ko hono fokotuʻu ʻa e ngaahi taumuʻa peheé ʻokú ne pouaki ai ʻa e tupu fakalaumālié pea tokoniʻi ai koe ke ke hangataha ki he ngaahi meʻa mahuʻinga angé ʻi hoʻo kakapa atu ki ha ngaahi monū lahi ange ʻo e ngāué.—Fil. 1:10; 1 Tīm. 4:15, 16.

²⁵ Naʻe fokotuʻu ʻe he ʻapositolo ko Paulá ha faʻifaʻitakiʻanga lelei ke tau faʻifaʻitaki ki ai ʻi heʻetau ngāue ki he ʻOtuá. (1 Kol. 11:1) Naʻe ngāue tōtōivi ʻa Paula ʻi he ngāue ʻa Sihová. Naʻá ne lāuʻilo naʻe tokonaki ʻe Sihova maʻana ʻa e ngaahi faingamālie lahi. Naʻe tohi ʻa Paula ki he fanga tokoua ʻi Kolinitoó: “Kuo ʻomi kiate au ha faingamālie lahi ke fakahoko ai ʻeku ngāué.” ʻIkai ʻoku toe moʻoni foki ʻa e meʻá ni ʻi hotau tuʻungá? ʻIo, ʻoku lahi ʻa e ngaahi faingamālie maʻatautolu ke tau ngāue ai kia Sihova ʻi he felāveʻi mo e fakatahaʻangá, ʻo tautefito ki hono malangaʻi ʻa e ongoongo lelei ʻo e Puleʻangá. Ka ʻi he tuʻunga ʻo Paulá, ko e fou atu ʻi he “faingamālie lahi” ko iá ʻoku kau ki ai ʻa e fāinga mo e “tokolahi ʻa e kau fakafepakí.” (1 Kol. 16:9) Naʻe loto-lelei ʻa Paula ke ne akonekina ia. Fakatokangaʻi ʻa e meʻa naʻá ne leaʻakí: “ʻOku ou tuki pohu ʻa hoku sinó mo taki ia hangē ha pōpulá.” (1 Kol. 9:24-27) ʻOku tau maʻu nai ʻa e fakakaukau tatau?

²⁶ ʻOku fakalototoʻaʻi ʻa e tokotaha taki taha ke ne ngāue ki he ngaahi taumuʻa fakateokalatí ʻo fakatatau ki hono ngaahi tuʻunga fakafoʻituitui ʻi he moʻuí. ʻOku kau ʻa e tokolahi ʻi he tafaʻaki ʻe niʻihi ʻo e ngāue taimi-kakató he ʻahó ni koeʻuhí naʻa nau fokotuʻu ʻa e ngaahi taumuʻa fakateokalatí ki muʻa. Naʻa mo ʻenau kei siʻí, naʻe fakalototoʻaʻi kinautolu ʻe heʻenau ngaahi mātuʻá mo e niʻihi kehé ke fai pehē. Ko ia, kuo nau maʻu ha ngāue fakakoloa moʻoni ʻi he ngāue ʻa Sihová—ʻo ʻikai ha fakaʻiseʻisa. (Pal. 10:22) Ko e ngaahi taumuʻa ʻaonga ʻe niʻihi ko ʻetau kau ki he ngāue fakamalangá ʻi he uike taki taha, kamata mo fakahoko ha ako Tohi Tapu ʻi ʻapi, pe vaheʻi ha taimi lahi ange ke teuteu ai ki he ngaahi fakatahá. Ko e meʻa mahuʻingá ke tau tuʻu maʻu ai pē pea fakahoko kakato ʻetau ngāue fakafaifekaú. Kapau te tau fai pehē, te tau fakalāngilangiʻi ai ʻa Sihova pea lavaʻi ʻetau taumuʻa māʻolunga tahá, ʻa ia ko e tauhi kiate ia ʻo taʻengata.—Luke 13:24; 1 Tīm. 4:7e, 8.