Nofo Ofi kia Sihova

1, 2. Ko fē ʻe lava ke tau maʻu mei ai ha maluʻanga he ʻaho ní?

SIOLOTO atu ʻokú ke luelue ʻi tuʻa ʻi ha ʻaho afā. ʻOku fakaʻau ke fakapoʻuli ange ʻa e langí, tapa ʻa e ʻuhilá, pea kamata ke mana. Tuai-e-kemo ʻoku tō hifo ʻa e ʻuhá. ʻOkú ke kumi ki ha feituʻu ke ke toi ai. He fiefia ē ʻi he faifai peá ke maʻu ha feituʻu ʻoku malu mo mātuʻú!

² ʻOku tau ʻi ha tuʻunga meimei tatau he ʻahó ni. Ko e tuʻunga ʻo e māmaní ʻoku fakaʻau ke toe kovi ange. ʻOkú ke fifili nai, ‘Ko fē te u maʻu ai ha maluʻangá?’ Naʻe tohi ʻa e tokotaha-tohi-sāmé: “Te u pehē kia Sihova: ‘Ko koe ʻa hoku hūfangaʻangá mo hoku maluʻangá, ko hoku ʻOtua ʻa ia ʻoku ou falala ki ai.’” (Saame 91:2) ʻIo, ʻoku lava ke ʻomi ʻe Sihova ha fakafiemālie he taimí ni ki heʻetau ngaahi palopalemá, pea ʻokú ne ʻomi ha ʻamanaki fisifisimuʻa ki he kahaʻú.

 3. ʻE lava fēfē ke tau ʻai ʻa Sihova ko hotau hūfangaʻanga?

³ ʻE lava fēfē ke maluʻi kitautolu ʻe Sihova? ʻE lava ke ne tokoniʻi kitautolu ke fekuki mo haʻatau palopalema pē, pea ʻokú ne mālohi mamaʻo ange ʻi ha taha pē ʻoku feinga nai ke ne fai mai ha kovi. Neongo kapau ʻoku hoko ha kovi kiate kitautolu he taimí ni, ʻe lava ke tau fakapapauʻi ʻe fakaleleiʻi ʻe Sihova ʻa e maumau ko iá ʻi he kahaʻú. ʻOku fakalototoʻaʻi kitautolu ʻe he Tohi Tapú: “Tauhi kimoutolu ʻi he ʻofa ʻa e ʻOtuá.” (Sute 21) ʻOku fiemaʻu ke tau nofo ofi kia Sihova ke tau maʻu ʻene tokoní lolotonga ʻa e taimi faingataʻá. Ka ʻe lava fēfē ke tau fai iá?

4, 5. Kuo anga-fēfē hono fakahāhā mai ʻe Sihova ʻene ʻofá?

⁴ Ke nofo ofi kia Sihova, ʻoku fiemaʻu ke tau ʻiloʻi ʻa e lahi ʻo ʻene ʻofa ʻiate kitautolú. Fakakaukau atu ki he meʻa kotoa kuo fai ʻe Sihova maʻatautolú. Kuó ne foaki mai ha māmani fakaʻofoʻofa pea fakafonu ia ʻaki ʻa e ʻuluʻakau mo e fanga manu fakatoʻoaloto. Kuó ne foaki mai foki ha meʻakai vovo ke tau kai mo ha vai maʻa ke tau inu. ʻI he Tohi Tapú, kuo akoʻi mai ai ʻe Sihova ʻa hono huafá mo hono ngaahi ʻulungaanga fisifisimuʻá. Hiliō he meʻa kotoa, naʻá ne fakahaaʻi mai ʻene ʻofá ʻi heʻene fekauʻi hifo ʻa hono ʻAlo ʻofeiná, ʻa Sīsū, ki he māmaní ke foaki ʻene moʻuí maʻatautolu. (Sione 3:16) Pea koeʻuhi ko e feilaulau ko iá, ʻoku tau maʻu ai ha ʻamanaki fisifisimuʻa ki he kahaʻú.

⁵ Kuo tokonaki mai ʻe Sihova ʻa e Puleʻanga Faka-Mīsaiá, ko ha founga-pule fakahēvani kuo vavé ni ke ne fakangata ʻa e faingataʻá kotoa. ʻE ngaohi ʻe he Puleʻangá ʻa e māmaní ko ha palataisi, ke nofo ai ʻa e tokotaha kotoa ʻi he melino mo e fiefia ʻo taʻengata. (Saame 37:29) Ko e toe founga ʻe taha kuo fakahaaʻi ai ʻe Sihova ʻene ʻofá ko hono akoʻi kitautolu ke moʻui ʻi he founga lelei taha ʻe ala lavá he taimí ni. ʻOkú ne toe fakaafeʻi mai ke tau lotu ange kiate ia, pea ʻokú ne mateuteu maʻu pē ke fanongo mai ki heʻetau lotú. Kuo fakahaaʻi mahino mai ʻe Sihova ʻa ʻene ʻofá ki he tokotaha kotoa pē.

 6. ʻOku totonu ke fēfē hoʻo tali ki he ʻofa ʻa Sihová?

⁶ ʻOku totonu ke fēfē hoʻo tali ki he ʻofa ʻa Sihová? Fakahaaʻi kiate ia hoʻo fakamālōʻia ʻa e meʻa kotoa kuó ne fai maʻaú. Ko hono pangó, ʻoku ʻikai houngaʻia ai ʻa e tokolahi he ʻahó ni. Naʻe hoko ʻa e meʻa tatau ʻi he ʻi māmani ʻa Sīsuú. ʻI he taimi ʻe taha, naʻe fakamoʻui ai ʻe Sīsū ha kau kilia ʻe toko hongofulu, ka ko e toko taha pē naʻe fakamālō kiate iá. (Luke 17:12-17) ʻOku tau loto ke tau hangē ko e tangata naʻe fakamālō kia Sīsuú. ʻOku tau loto maʻu pē ke fakamālō kia Sihova.

 7. ʻOku totonu ke lahi fēfē ʻetau ʻofa kia Sihová?

⁷ ʻOku toe fiemaʻu ke tau fakahāhā ʻetau ʻofa kia Sihová. Naʻe tala ʻe Sīsū ki heʻene kau ākongá kuo pau ke nau ʻofa kia Sihova ʻaki honau lotó kotoa, moʻuí kotoa, mo honau ʻatamaí kotoa. (Lau ʻa e Mātiu 22:37.) ʻOku ʻuhinga iá ki he hā?

8, 9. ʻOku lava fēfē ke tau fakahāhā kia Sihova ʻoku tau ʻofa kiate ia?

⁸ ʻOku feʻunga ke tau pehē pē ʻoku tau ʻofa kia Sihova? ʻIkai. Kapau ʻoku tau ʻofa kia Sihova ʻaki hotau lotó, moʻuí, mo e ʻatamaí kotoa, te tau fakahāhā ʻetau ʻofa kiate iá ʻi heʻetau ngaahi ngāué. (Mātiu 7:16-20) ʻOku akoʻi mahino mai ʻe he Tohi Tapú kapau ʻoku tau ʻofa ki he ʻOtuá, te tau talangofua ki heʻene ngaahi fekaú. ʻOku faingataʻa ia? ʻIkai, he ko e ngaahi fekau ʻa Sihová “ʻoku ʻikai ke fakamafasia.”​—Lau ʻa e 1 Sione 5:3.

⁹ ʻI heʻetau talangofua kia Sihová, ʻoku tau maʻu ai ha moʻui fiefia mo fiemālie. (ʻAisea 48:17, 18) Ka ko e hā te ne tokoniʻi kitautolu ke tau nofo ofi kia Sihová? Tau sio angé ki aí.

10. Ko e hā ʻoku totonu ai ke hokohoko atu hoʻo ako fekauʻaki mo Sihová?

¹⁰ Naʻe anga-fēfē hoʻo hoko ko e kaumeʻa ʻo Sihová? ʻI hoʻo ako ʻa e Tohi Tapú, ʻokú ke ʻilo lahi ange ai kia Sihova pea fakatupulekina ha kaumeʻa mo ia. Ko e kaumeʻa ko ení ʻoku hangē ia ko ha afi ʻokú ke loto ke hokohoko atu ʻene uló. Hangē pē ko e fiemaʻu ki ha afi ha fefie ke uló, ʻoku fiemaʻu ke hokohoko atu hoʻo ako fekauʻaki mo Sihová ke tauhi ke mālohi hoʻomo kaumeʻá.​—Palōveepi 2:1-5.

11. ʻE fēfē hono ueʻi koe ʻe he akonaki ʻa e Tohi Tapú?

¹¹ ʻI he hokohoko atu hoʻo ako ʻa e Tohi Tapú, te ke ʻilo ai ʻa e ngaahi meʻa ʻe aʻu moʻoni ki ho lotó. Vakai angé ki he anga ʻo e ongoʻi ʻa e toko ua ʻo e kau ākonga ʻa Sīsuú ʻi hono fakamatalaʻi ange ʻe Sīsū ʻa e ngaahi kikite ʻi he Tohi Tapú. Naʻá na pehē: “ʻIkai ne vela hota lotó ʻi heʻene lea kiate kitaua ʻi he halá, ʻi heʻene veteveteki kakato mai ʻa e Folofolá kiate kitauá?”​—Luke 24:32.

12, 13. (a) Ko e hā ʻe lava ke hoko ki heʻetau ʻofa ki he ʻOtuá? (e) ʻE lava fēfē ke tau tauhi ke moʻui ʻa ʻetau ʻofa kia Sihová?

¹² Hangē ko e maongo ki he loto ʻo e ongo ākongá ʻena mahinoʻi ʻa e Folofolá, naʻá ke ongoʻi nai ʻa e loto-māfana tatau ʻi hoʻo kamata mahinoʻi ʻa e Tohi Tapú. Naʻe tokoniʻi koe ʻe he meʻá ni ke ke ʻiloʻi ʻa Sihova pea ʻofa kiate ia. ʻOku ʻikai te ke loto ke momoko ʻa e ʻofa ko ení.​—Mātiu 24:12.

¹³ ʻI hoʻo kaumeʻa pē mo e ʻOtuá, ʻoku fiemaʻu ke ke ngāue mālohi ke tauhi ke mālohi ʻa hoʻomo kaumeʻá. Kuo pau ke hokohoko atu ʻa hoʻo ako fekauʻaki mo ia mo Sīsuú pea fakakaukau ki he meʻa ʻokú ke akó mo e founga ʻe lava ke ke ngāueʻaki ai ia ʻi hoʻo moʻuí. (Sione 17:3) ʻI hoʻo lau pe ako ʻa e Tohi Tapú, ʻeke hifo kiate koe: ‘Ko e hā ʻoku akoʻi mai ʻe he meʻá ni ʻo fekauʻaki mo Sihova ko e ʻOtuá? Ko e hā ʻoku totonu ai ke u ʻofa kiate ia ʻaki hoku lotó mo ʻeku moʻuí kotoá?’​—1 Tīmote 4:15.

14. ʻOku anga-fēfē ʻa e tokoni ʻa e lotú ki hono ʻai ke mālohi ʻetau ʻofa kia Sihová?

¹⁴ ʻI he ʻi ai hao kaumeʻa leleí, ʻokú ke talanoa maʻu pē mo ia, pea ʻoku ʻai ʻe he meʻá ni ke mālohi hoʻomo kaumeʻá. ʻI he founga tatau, ko ʻetau talanoa maʻu pē mo Sihova ʻi he lotú, ʻoku ʻai ai ke mālohi ʻetau ʻofa kiate iá. (Lau ʻa e 1 Tesalonaika 5:17.) Ko e lotú ko ha meʻaʻofa fisifisimuʻa mei heʻetau Tamai fakahēvaní. ʻOku totonu ke tau lea maʻu pē kiate ia mei hotau lotó. (Saame 62:8) ʻOku ʻikai totonu ke tau toutou leaʻaki maʻuloto ʻetau lotú, ka ʻoku totonu ke tau ʻuhingaʻi moʻoni ʻa e meʻa ʻoku tau leaʻakí. ʻIo, kapau ʻe hokohoko atu ʻetau ako ʻa e Tohi Tapú pea lotu mei hotau lotó, te tau ʻai ai ke mālohi ʻetau ʻofa kia Sihová.

15, 16. ʻOku anga-fēfē hoʻo vakai ki he ngāue fakamalangá?

¹⁵ Kapau ʻoku tau loto ke nofo ofi ai pē kia Sihova, ʻoku toe fiemaʻu ke tau talanoa ki he niʻihi kehé ʻo fekauʻaki mo ʻetau tuí. Ko e talanoa ki he niʻihi kehé fekauʻaki mo Sihová ko ha monū fisifisimuʻa ia. (Luke 1:74) Pea ko ha fatongia ia naʻe ʻoange ʻe Sīsū ki he kau Kalisitiane moʻoní kotoa. Ko kitautolu taki taha ʻoku totonu ke tau malangaʻi ʻa e ongoongo lelei ʻo e Puleʻanga ʻo e ʻOtuá. Kuó ke ʻosi fai eni?​—Mātiu 24:14; 28:19, 20.

¹⁶ Naʻe ʻiloʻi ʻe he ʻapositolo ko Paulá ʻoku mahuʻinga ʻaupito ʻa e ngāue fakamalangá; naʻá ne ui ia ko ha ‘koloa.’ (2 Kolinitō 4:7) Ko e talanoa ki he niʻihi kehé ʻo fekauʻaki mo Sihova mo ʻene taumuʻá ʻa e ngāue mahuʻinga taha ʻe lava ke ke faí. Ko ha founga ia ke ke tauhi ai kia Sihova, pea ʻokú ne fakamahuʻingaʻi ʻa e meʻa ʻokú ke fai maʻaná. (Hepelū 6:10) ʻOku malava foki ke ʻaonga ʻa e malangá kiate koe mo e faʻahinga ʻoku fanongo kiate koé koeʻuhí ʻokú ke tokoniʻi ʻa e niʻihi kehé mo koe tonu ke ʻunuʻunu ofi kia Sihova pea maʻu ʻa e moʻui taʻengatá. (Lau ʻa e 1 Kolinitō 15:58.) ʻOku toe ʻi ai ha ngāue ʻe lava ke ne ʻoatu kiate koe ha fiemālie lahi ange?

17. Ko e hā ʻoku fiemaʻu fakavavevave ai ʻa e ngāue fakamalangá?

¹⁷ ʻOku mātuʻaki fiemaʻu fakavavevave ʻa e ngāue fakamalangá. ʻOku totonu ke tau “malangaʻi ʻa e folofolá,” pea “fai fakavavevave ia.” (2 Tīmote 4:2) ʻOku fiemaʻu ke fanongo ʻa e kakaí fekauʻaki mo e Puleʻanga ʻo e ʻOtuá. ʻOku pehē ʻe he Tohi Tapú: “Ko e ʻaho lahi ʻo Sihová ʻoku ofi! ʻOku ofi ia pea ʻoku tuʻunuku vave ʻaupito mai!” Ko e ngataʻangá “ʻe ʻikai ke tōmui!” (Sēfanaia 1:14; Hapakuke 2:3) ʻIo, kuo vavé ni ʻaupito ke fakaʻauha ʻe Sihova ʻa e māmani fulikivanu ʻo Sētané. Ki muʻa ke hoko iá, ʻoku fiemaʻu ke fai ha fakatokanga ki he kakaí koeʻuhi ke nau fili ke tauhi kia Sihova.

18. Ko e hā ʻoku totonu ai ke tau lotu kia Sihova fakataha mo e kau Kalisitiane moʻoni kehé?

¹⁸ ʻOku fiemaʻu ʻe Sihova ke tau lotu kiate ia fakataha mo e kau Kalisitiane moʻoni kehé. ʻOku pehē ʻe he Tohi Tapú: “Tuku ke tau fetokangaʻaki koeʻuhi ke fakaʻaiʻai ai kitautolu ki he ʻofá mo e ngaahi ngāue leleí, ʻo ʻoua ʻe liʻaki ʻa ʻetau fakataha fakatahatahá, ʻo hangē ko ia ʻoku angaʻaki ʻe he niʻihi, kae fefakalototoʻaʻaki, pea toe ʻāsili angé ʻi hoʻomou sio ko ia ki he fakaofiofi mai ʻa e ʻahó.” (Hepelū 10:24, 25) ʻOku totonu ke tau fai hotau lelei tahá ke maʻu ʻetau ngaahi fakatahá kotoa. ʻOku ʻomai ʻe he ngaahi fakatahá ha faingamālie ke tau fefakalototoʻaʻaki mo fefakaivimālohiʻaki ai.

19. Ko e hā ʻe lava ke ne tokoniʻi kitautolu ke tau ʻofa ʻi hotau fanga tokoua mo e fanga tuofāfine Kalisitiané?

¹⁹ ʻI hoʻo maʻu ʻa e ngaahi fakatahá, te ke maʻu ai ha ngaahi kaumeʻa lelei te nau tokoniʻi koe ke ke lotu kia Sihova. Te ke fetaulaki ai mo e fanga tokoua mo e fanga tuofāfine kehekehe, ʻoku nau fai honau lelei tahá ke lotu kiate ia ʻo hangē ko koé. Pea ʻoku nau taʻehaohaoa mo fai ha fehālaaki hangē ko koé. ʻI heʻenau fai iá, mateuteu ke fakamolemoleʻi kinautolu. (Lau ʻa e Kolose 3:13.) Tokanga maʻu pē ki he ʻulungaanga lelei ʻo ho fanga tokoua mo e fanga tuofāfine Kalisitiané, he ʻi he fai peheé ʻe tokoniʻi ai koe ke ke ʻofa ʻiate kinautolu mo ʻunuʻunu ʻo toe ofi ange ai pē kia Sihova.

20, 21. Ko e hā ʻa e “moʻui moʻoní”?

²⁰ ʻOku fiemaʻu ʻe Sihova ke maʻu ʻe hono ngaahi kaumeʻá kotoa ʻa e moʻui lelei taha ʻe ala lavá. ʻOku akoʻi mai ʻe he Tohi Tapú ko ʻetau moʻui ʻi he kahaʻú ʻe kehe fakaʻaufuli ia mei heʻetau moʻui he ʻaho ní.

²¹ ʻI he kahaʻú, te tau moʻui ai ʻo taʻengata, ʻo ʻikai ʻi ha taʻu pē ʻe 70 pe 80. Te tau fiefia ʻi he “moʻui taʻengatá” ʻi he moʻui lelei haohaoa, melino, mo fiefia ʻi ha palataisi fakaʻofoʻofa. Ko e meʻa ia ʻoku ui ʻe he Tohi Tapú ko e “moʻui moʻoní.” ʻOku talaʻofa ʻe Sihova te ne ʻomai ʻa e moʻui moʻoni ko ení, ka kuo pau ke tau fai ʻa e meʻa kotoa te tau malavá he taimí ni ke tau “piki maʻu” ki ai.​—1 Tīmote 6:12, 19.

22. (a) ʻE lava fēfē ke tau “piki maʻu ki he moʻui moʻoní”? (e) Ko e hā ʻoku ʻikai lava ai ke tau ngāueʻi ʻa e moʻui taʻengatá?

²² ʻE lava fēfē ke tau “piki maʻu ki he moʻui moʻoní”? Kuo pau ke tau “failelei” pea “hulu atu ʻi he ngaahi ngāue lelei.” (1 Tīmote 6:18) ʻOku ʻuhinga ení ʻoku fiemaʻu ke tau ngāueʻaki ʻa e meʻa ʻoku tau ako mei he Tohi Tapú. Ka ko e moʻui moʻoní ʻoku ʻikai fakatuʻunga ia ʻi heʻetau ngaahi feingá. Heʻikai ʻaupito lava ke tau ngāueʻi ʻa e moʻui taʻengatá. Ko ha meʻaʻofa taʻetotongi ia meia Sihova ki heʻene kau sevāniti faitōnungá, ko ha fakatātā ia ʻo ʻene “ʻofa maʻataʻatā.” (Loma 5:15) ʻOku fiemaʻu moʻoni ʻe heʻetau Tamai fakahēvaní ke foaki ki heʻene kau sevāniti faitōnungá ʻa e meʻaʻofá ni.

23. Ko e hā ʻoku fiemaʻu ai ke ke fai ʻa e fili totonú he taimi ní?

²³ ʻEke hifo kiate koe, ‘ʻOku ou lotu ki he ʻOtuá ʻi he founga ʻokú ne hōifua aí?’ Kapau ʻokú ke ʻilo ʻoku fiemaʻu ke ke fai ha liliu, ʻoku totonu ke ke fai leva ia. ʻI heʻetau falala kia Sihova pea fai ʻa e meʻa kotoa te tau malavá ke talangofua kiate ia, ʻe hoko ai ʻa Sihova ko hotau hūfangaʻanga. Te ne maluʻi ʻene kakai faitōnungá he lolotonga ʻa e ngaahi ʻaho fakaʻosi ʻo e māmani fulikivanu ʻa Sētané. Pea ʻe fakapapauʻi ʻe Sihova te tau moʻui ʻi Palataisi ʻo taʻengata, ʻo hangē tofu pē ko ia naʻá ne talaʻofaʻakí. ʻIo, ʻe lava ke ke maʻu ʻa e moʻui moʻoní kapau ʻokú ke fai ʻa e fili totonú he taimí ni!