Ko e Hā ke Fakaʻapaʻapaʻi Ai ʻa e Mafaí?

1, 2. (a) Ko e fakahinohino ʻa hai ʻoku fiemaʻu ke tau muimui ki aí? (e) Ko e hā ʻa e ngaahi fehuʻi te tau lāulea ki ai ʻi he vahe ko ení?

ʻI HOʻO kei siʻí, ngalingali naʻe ʻi ai ʻa e ngaahi taimi naʻe kole atu ai ʻe hoʻo ongo mātuʻá ke ke fai ha meʻa naʻe ʻikai te ke loto ke fai. ʻOkú ke ʻofa ʻi hoʻo ongo mātuʻá pea ʻiloʻi ʻoku totonu ke ke talangofua kiate kinaua. Neongo ia, ʻoku ngalingali naʻe ʻikai maʻu pē te ke loto ke talangofua kiate kinaua.

² ʻOku tau ʻiloʻi ko Sihova, ʻa ʻetau Tamaí, ʻokú ne ʻofa ʻiate kitautolu. ʻOkú ne tokangaʻi kitautolu pea fakapapauʻi ʻoku tau maʻu ʻa e meʻa kotoa pē ʻoku tau fiemaʻu ke fiefia ai ʻi he moʻuí. ʻOkú ne ʻomai kiate kitautolu ʻa e fakahinohino ʻoku fiemaʻu ke tau hoko ai ʻo lavameʻá. ʻI he taimi ʻe niʻihi, ʻokú ne ngāueʻaki ʻa e kakai kehé ke nau ʻomai kiate kitautolu ʻa e fakahinohino. ʻOku fiemaʻu ke tau fakaʻapaʻapaʻi ʻa e mafai ʻo Sihová. (Palōveepi 24:21) Ka ko e hā ʻoku faingataʻa ai ʻi he taimi ʻe niʻihi ke tau tali ʻa e fakahinohinó? Ko e hā ʻoku kole mai ai ʻe Sihova ke tau muimui ʻi he fakahinohinó? Pea ʻoku anga-fēfē ʻetau fakahāhā ʻoku tau fakaʻapaʻapaʻi ʻa hono mafaí?​—Sio ki he Fakamatala ʻi he Ngataʻangá 9.

3, 4. Naʻe anga-fēfē ʻa e hoko ʻa e faʻahinga ʻo e tangatá ʻo taʻehaohaoá? Ko e hā ʻoku lava ai ke faingataʻa ke tau tali ʻa e fakahinohino mei he niʻihi kehé?

³ ʻI he tuʻunga ko e faʻahinga ʻo e tangatá, ʻoku tau maʻu ha hehema ke angatuʻu. Kuo hoko moʻoni eni talu pē mei he faiangahala ʻa e ʻuluaki tangatá mo e ʻuluaki fefiné, ʻa ʻĀtama mo ʻIvi. Neongo naʻe fakatupu haohaoa kinaua, naʻá na angatuʻu ki he mafai ʻo e ʻOtuá. Talu mei ai, mo hono fanauʻi mai ʻa e faʻahinga kotoa ʻo e tangatá ʻoku nau taʻehaohaoa. Ko ʻetau taʻehaohaoá ʻa e taha ʻo e ʻuhinga ʻoku lava ke faingataʻa ai ʻetau tali ʻa e fakahinohino meia Sihova mo e faʻahinga ʻo e tangatá. Ko e toe ʻuhinga ʻe tahá he ko e faʻahinga ʻoku ngāueʻaki ʻe Sihova ke nau ʻomai ʻa e fakahinohinó ko e faʻahinga taʻehaohaoa foki mo kinautolu.​—Sēnesi 2:15-17; 3:1-7; Saame 51:5; Loma 5:12.

⁴ Koeʻuhi ko ʻetau taʻehaohaoá, ʻoku tau hehema ai ke pōlepole. Ko e pōlepolé ʻokú ne ʻai ke faingataʻa ke tau tali ʻa e fakahinohinó. Ko e fakatātaá, ʻi ʻIsileli ʻo e kuonga muʻá, naʻe fili ai ʻe Sihova ʻa Mōsese ke ne taki ʻa Hono kakaí. Ko ha tangata ko Kola, ʻa ia naʻe tauhi kia Sihova ʻi he ngaahi taʻu lahi, naʻá ne hoko ʻo pōlepole pea fakahāhā ʻa e taʻefakaʻapaʻapa lahi kia Mōsese. Neongo naʻe taki ʻe Mōsese ʻa e kakai ʻa e ʻOtuá, naʻe ʻikai ko ha tangata pōlepole ia. Ko hono moʻoní, naʻe fakamatalaʻi ia ko e tangata anga-fakatōkilalo taha naʻe moʻui ʻi hono taimí. Ka naʻe ʻikai lava ke tali ʻe Kola ʻa e fakahinohino ʻa Mōsesé. Naʻe aʻu ʻo ne fakalotoʻi ha fuʻu kakai tokolahi ke nau kau mo ia pea angatuʻu kia Mōsese. Ko e hā naʻe hoko kia Kola mo e kau angatuʻú? Naʻe tāmateʻi kinautolu. (Nōmipa 12:3; 16:1-3, 31-35) ʻI he Tohi Tapú, ʻoku tau maʻu ai ʻa e ngaahi fakatātā lahi ʻoku akoʻi mai ai ko e pōlepolé ʻoku fakatuʻutāmaki.​—2 Kalonikali 26:16-21; sio ki he Fakamatala ʻi he Ngataʻangá 10.

 5. Kuo anga-fēfē hono ngāuehalaʻaki ʻe he niʻihi ʻa honau mafaí?

⁵ Kuó ke fanongo nai ʻi he lea, ko e “Hau pea kui.” ʻI he kotoa ʻo e hisitōliá, kuo ngāuehalaʻaki ai ʻe he tokolahi ʻa honau mafaí. (Lau ʻa e Tangata Malanga 8:9.) Ko e fakatātaá, ko Saulá ko ha tangata lelei ia mo anga-fakatōkilalo ʻi he taimi naʻe fili ai ia ʻe Sihova ke ne hoko ko e tuʻi ʻo ʻIsilelí. Ka naʻá ne fakaʻatā ʻa e pōlepolé mo e meheká ke tupu ʻi hono lotó, pea naʻe taki ia ʻe he meʻá ni ke ne fakatangaʻi ʻa Tēvita, ko ha tangata tonuhia. (1 Sāmiuela 9:20, 21; 10:20-22; 18:7-11) Ki mui ai, naʻe hoko ʻa Tēvita ʻo tuʻi, pea ko e taha ia ʻo e ngaahi tuʻi lelei taha naʻe faifai ange pea maʻu ʻe ʻIsilelí. Neongo ia, naʻe aʻu ʻi ha taimi ʻo ngāuehalaʻaki ʻe Tēvita ʻa hono mafaí. Naʻá ne fehokotaki fakasino mo Pati-sepa, ko e uaifi ʻo ha tangata ko ʻUlaia, peá ne feinga ʻi he hili iá ke fufū ʻa ʻene angahalá ʻaki ʻene fekauʻi atu ʻa ʻUlaia ke mate ʻi he taú.​—2 Sāmiuela 11:1-17.

6, 7. (a) Ko e hā ʻoku ueʻi kitautolu ʻe he ʻofa kia Sihová ke tau faí? (e) Ko e hā te ne tokoniʻi kitautolu ke tau talangofua naʻa mo e taimi ʻoku ʻikai faingofua ai ke fai peheé?

⁶ ʻOku tau fakaʻapaʻapaʻi ʻa e fakahinohino meia Sihová koeʻuhí ʻoku tau ʻofa kiate ia. Koeʻuhi ʻoku tau ʻofa kia Sihova ʻo laka ia ʻi ha toe meʻa pe ko ha toe taha pē, ʻoku tau loto ke ʻai ia ke ne fiefia. (Lau ʻa e Palōveepi 27:11; Maʻake 12:29, 30.) Mei he taimi naʻe nofo ai ʻa e ʻuluaki ongo meʻa fakaetangatá ʻi he ngoue ʻo ʻĪtení, naʻe loto ʻa Sētane ke fehuʻia ʻe he kakaí ʻa e mafai ʻo Sihová. ʻOku loto ʻa e Tēvoló ke tau fakakaukau ʻoku ʻikai ke maʻu ʻe Sihova ʻa e totonu ke ne tala mai ʻa e meʻa ke tau faí. Ka ʻoku tau ʻiloʻi ko ha loi eni. ʻOku tau loto-tatau mo e ngaahi leá ni: “ʻOku taau mo koe ʻe Sihova ko homau ʻOtua, ke ke maʻu ʻa e ngeiá mo e lāngilangí pea mo e mālohí, koeʻuhí naʻá ke fakatupu ʻa e ngaahi meʻa kotoa pē.”​—Fakahā 4:11.

⁷ ʻI hoʻo kei siʻí, ʻoku ngalingali naʻe akoʻi koe ke ke talangofua ki hoʻo ongo mātuʻá naʻa mo e ʻikai ke ke loto ki aí. ʻI ha founga meimei tatau, ʻi he tuʻunga ko e kau sevāniti ʻa Sihová, ʻoku ʻi ai nai ʻa e ngaahi taimi ʻoku ʻikai faingofua ai ke talangofua. Ka ʻoku tau ʻofa mo fakaʻapaʻapa kia Sihova, ko ia ʻoku tau fai ai ʻa e meʻa kotoa ʻoku tau malavá ke talangofua kiate ia. Naʻe fokotuʻu ʻe Sīsū ʻa e faʻifaʻitakiʻanga kiate kitautolu. Naʻá ne talangofua kia Sihova naʻa mo e taimi naʻe ʻikai faingofua ai pe feʻungamālie ke ne fai peheé. Ko e ʻuhinga ia naʻe lava ai ke ne pehē ki heʻene Tamaí: “Tuku ke ʻoua naʻa fai ki hoku lotó, ka ki hoʻoú pē.”​—Luke 22:42; sio ki he Fakamatala ʻi he Ngataʻangá 11.

 8. Ko e hā ʻa e ngaahi founga ʻe niʻihi ʻoku tataki ʻaki kitautolu ʻe Sihová? (Sio ki he puha “Fanongo ki he Faleʻí.”)

⁸ ʻI he ʻahó ni, ʻoku tataki kitautolu ʻe Sihova ʻi he ngaahi founga kehekehe. Ko e fakatātaá, kuó ne ʻomai kiate kitautolu ʻa e Tohi Tapú. Kuó ne toe ʻomai foki kiate kitautolu ʻa e kau mātuʻa ʻi he fakatahaʻangá. ʻOku tau fakahāhā ʻoku tau fakaʻapaʻapaʻi ʻa e mafai ʻo Sihová ʻi he taimi ʻoku tau fakaʻapaʻapaʻi ai ʻa e faʻahinga ʻokú ne ngāueʻaki ke nau tataki kitautolú. Kapau ʻoku tau siʻaki ʻa ʻenau tokoní, ʻi ha ʻuhinga ʻoku tau siʻaki ai ʻa Sihova. ʻI hono siʻaki ʻe he kau ʻIsilelí ʻa Mōsesé, naʻe vakai ki ai ʻa Sihova ʻoku mafatukituki. Naʻá ne vakai ki ai ʻo hangē naʻa nau siʻaki iá.​—Nōmipa 14:26, 27; sio ki he Fakamatala ʻi he Ngataʻangá 12.

 9. ʻE anga-fēfē hono ueʻi kitautolu ʻe he ʻofá ke tau muimui ʻi he fakahinohinó?

⁹ ʻI he taimi ʻoku tau fakaʻapaʻapaʻi ai ʻa e mafaí, ʻoku fakahaaʻi ai ʻoku tau ʻofa foki ʻi hotau fanga tokouá mo e fanga tuofāfiné. Fakakaukau angé ki hení. ʻI he ʻi ai ha fakatamaki fakanatulá, ʻoku faʻa ngāue fakataha ai ha timi tokoni ke fakahaofi ʻa e kakai tokolahi taha ʻe ala lavá. Ke lavameʻa ʻa e timí, ʻoku fiemaʻu ha taha ke ne fokotuʻutuʻu pea ʻoku fiemaʻu ʻa e mēmipa taki taha ʻo e timí ke muimui ʻi he fakahinohinó. Kae fēfē kapau ʻe tukunoaʻi ʻe ha toko taha ia ʻa e fakahinohinó peá ne fai pē ʻe ia ʻa e meʻa ʻokú ne loto ki aí? Neongo kapau ʻoku lelei pē ʻene taumuʻá, ko ʻene fakafisi ke fanongó ʻe lava ke fakatupunga ai ha palopalema ki he faʻahinga ʻi heʻene timí, ʻo fakatupunga nai ai ke nau lavea lahi. ʻI ha founga meimei tatau, kapau heʻikai ke tau muimui ʻi he fakahinohino meia Sihova mo e faʻahinga kuó ne foaki ki ai ha mafaí, ʻe faingataʻaʻia nai ai ʻa e niʻihi kehé. Ka ʻi he taimi ʻoku tau talangofua ai kia Sihová, ʻoku tau fakahaaʻi ai ʻoku tau ʻofa ʻi hotau fanga tokouá pea fakaʻapaʻapaʻi ʻa e fokotuʻutuʻu ʻa Sihová.​—1 Kolinitō 12:14, 25, 26.

10, 11. Ko e hā te tau lāulea ki ai he taimi ní?

¹⁰ Ko e hā pē meʻa ʻoku fiemaʻu mai ʻe Sihova ke tau faí ko e lelei pē ia maʻatautolu. ʻI heʻetau fakahāhā ʻa e fakaʻapaʻapa ki he mafaí ʻi hotau fāmilí, ʻi he fakatahaʻangá, pea ʻi he feangainga mo e kau ʻōfisa fakapuleʻangá, ʻe maʻu ʻaonga mei ai ʻa e tokotaha kotoa.​—Teutalōnome 5:16; Loma 13:4; ʻEfesō 6:2, 3; Hepelū 13:17.

¹¹ Ko hono mahinoʻi ʻa e ʻuhinga ʻoku fiemaʻu ai ʻe Sihova ke tau fakahāhā ʻa e fakaʻapaʻapa ki he niʻihi kehé ʻe lava ke ne tokoniʻi kitautolu ke tau fai pehē. Tau lāulea angé ke toe fakaikiiki ange ki he founga ʻe lava ke tau fakahāhā ai ʻa e fakaʻapaʻapa ʻi he tafaʻaki ʻe tolu ʻi he moʻuí.

12. ʻE lava fēfē ke fakahāhā ʻe ha husepāniti ʻokú ne fakaʻapaʻapaʻi ʻa e mafaí?

¹² Naʻe faʻu ʻe Sihova ʻa e fāmilí pea ʻoange ha fatongia ki he mēmipa taki taha ʻo e fāmilí. ʻI hono mahinoʻi ʻe he mēmipa taki taha ʻa e meʻa ʻoku ʻamanekina ʻe Sihova meiate iá, ʻe ngāue lelei ai ʻa e fokotuʻutuʻu fakafāmilí pea ʻe maʻu ʻaonga mei ai ʻa e fāmilí kotoa. (1 Kolinitō 14:33) Kuo ʻai ʻe Sihova ʻa e husepānití ko e ʻulu ʻo e fāmilí. ʻOku ʻuhinga ení ʻoku ʻamanekina ʻe Sihova meiate ia ke ne tokangaʻi mo tataki anga-ʻofa ʻa hono uaifí mo e fānaú. Ko ia kuo pau ke fai ʻe ha husepāniti ha tali kia Sihova ʻi he anga ʻo ʻene tokangaʻi kinautolú. Ko ha husepāniti Kalisitiane ʻoku anga-lelei mo anga-ʻofa pea ʻokú ne tōʻongafai ki hono fāmilí ʻi he anga ʻo e tōʻongafai ʻa Sīsū ki he fakatahaʻangá. ʻI hono fai eni ʻe ha husepānití, ʻokú ne fakahāhā ai ʻokú ne fakaʻapaʻapa kia Sihova.​—ʻEfesō 5:23; sio ki he Fakamatala ʻi he Ngataʻangá 13.

13. ʻE lava fēfē ke fakahāhā ʻe ha uaifi ʻokú ne fakaʻapaʻapaʻi ʻa e mafaí?

¹³ ʻOku toe maʻu ʻe ha uaifi Kalisitiane ha fatongia mahuʻinga mo fakangeingeia. ʻOkú ne poupou ki hono husepānití ʻi heʻene ngāue mālohi ke hoko ko ha ʻuluʻi fāmili leleí. ʻOkú ne maʻu fakataha mo ia ʻa e fatongia ke akoʻi ʻa e fānaú. Ko e founga ʻe taha ʻo ʻene akoʻi ʻa ʻene fānaú ke nau anga-fakaʻapaʻapá ko ʻene faʻifaʻitakiʻangá tonu. (Palōveepi 1:8) ʻOkú ne fakaʻapaʻapa ki hono husepānití pea ngāue fāitaha mo ʻene ngaahi filí. Naʻa mo e taimi ʻoku ʻikai ai te ne loto-tatau mo ia fekauʻaki mo ha meʻá, ʻokú ne fakamatalaʻi ʻa ʻene ongoʻí ʻi he anga-lelei mo e anga-fakaʻapaʻapa. ʻI he mali ha fefine Kalisitiane mo ha tokotaha ʻikai ko ha Fakamoʻoní, ʻokú ne maʻu ʻa e ngaahi pole makehe. Ka ʻo kapau ʻe hokohoko atu ʻene tōʻongafai ki hono husepānití ʻi he ʻofa mo e fakaʻapaʻapa, mahalo pē te ne loto foki ʻi ha ʻaho ke ʻilo kia Sihova pea lotu kiate ia.​—Lau ʻa e 1 Pita 3:1.

14. ʻE lava fēfē ke fakahāhā ʻe he fānaú ʻa e fakaʻapaʻapa ki he mafaí?

¹⁴ ʻOku mahuʻinga ʻa e fānaú kia Sihova, pea ʻoku tautefito ʻa e fiemaʻu kiate kinautolu ʻa e maluʻí mo e tatakí. ʻI he talangofua ʻa e fānaú ki heʻenau mātuʻá, ʻoku nau ʻai ai ke fiefia ʻa ʻenau mātuʻá. Ko e meʻa ʻoku toe mahuʻinga angé, ʻi he talangofuá ʻoku nau fakahāhā ai ʻa e fakaʻapaʻapa kia Sihova pea ʻai ai ia ke ne fiefia. (Palōveepi 10:1) ʻI he ngaahi fāmili lahi, ʻoku ʻohake ai ʻa e fānaú ʻi ha mātuʻa pē ʻe toko taha. ʻOku lava ke mātuʻaki faingataʻa eni fakatouʻosi ki he mātuʻá mo e fānaú. Ka ʻi he taimi ʻoku talangofua ai ʻa e fānaú pea poupou ki heʻenau faʻeé pe tamaí, ʻe lelei lahi ange ai ʻa e moʻui fakafāmilí. Ko e hā pē ʻa e tuʻungá, ʻoku ʻikai ha fāmili ʻe haohaoa. Ka ko e fāmili kotoa pē ʻe lava ke nau fiefia ange ʻi he taimi ʻoku muimui ai ʻa e mēmipa taki taha ʻi he tataki ʻa Sihová. ʻOku ʻoatu ʻe he meʻá ni ʻa e lāngilangi kia Sihova, ʻa e Tokotaha-Fakatupu ʻo e ngaahi fāmilí kotoa.​—ʻEfesō 3:14, 15.

15. ʻE lava fēfē ke tau fakahāhā ʻoku tau fakaʻapaʻapaʻi ʻa e mafai ʻi he fakatahaʻangá?

¹⁵ ʻOku tataki kitautolu ʻe Sihova fakafou ʻi he fakatahaʻanga Kalisitiané, pea kuó ne ʻoange kia Sīsū ʻa e mafai kakato ki ai. (Kolose 1:18) ʻI heʻene peheé, kuo ʻoange ʻe Sīsū ki he “tamaioʻeiki anga-tonu mo potó” ʻa e fatongia ko hono tokangaʻi ʻa e kakai ʻa e ʻOtuá ʻi he māmaní. (Mātiu 24:45-47) ʻI he ʻahó ni, ko e “tamaioʻeiki anga-tonu mo potó” ʻa e Kulupu Pulé. ʻOku tokonaki mai ʻe he Kulupu Pulé ʻa e meʻa ʻoku tau fiemaʻú ʻi he taimi totonu ke tokoni ki hono tauhi ke mālohi ʻa ʻetau tuí. Ko e kau mātuʻá, kau sevāniti fakafaifekaú, mo e kau ʻovasia sēketí ʻoku nau poupou ki he ngaahi fakatahaʻanga takatakai ʻi he māmaní pea maʻu ʻa e fakahinohino mei he Kulupu Pulé. Ko e fanga tokoua kotoa ko ení ʻoku nau maʻu ʻa e fatongia ko hono tokangaʻi kitautolu. ʻOku nau fai ha tali kia Sihova ʻi he anga ʻo ʻenau fakahoko ʻa e fatongia ko ení. Ko ia ʻi he taimi ʻoku tau fakaʻapaʻapa ai ki he kau tangata ko ení, ʻoku tau fakaʻapaʻapa ai kia Sihova.​—Lau ʻa e 1 Tesalonaika 5:12; Hepelū 13:17; sio ki he Fakamatala ʻi he Ngataʻangá 14.

16. Ko e hā ʻe lava ai ke tau pehē ʻoku fakanofo ʻe he laumālie māʻoniʻoní ʻa e kau mātuʻá mo e kau sevāniti fakafaifekaú?

¹⁶ ʻOku tokoniʻi ʻe he kau mātuʻá mo e kau sevāniti fakafaifekaú ʻa e fakatahaʻangá ke nau nofoʻaki faitōnunga mo fāʻūtaha. Ko e moʻoni, ko e faʻahinga taʻehaohaoa kinautolu ʻo hangē pē ko kitautolú. Ko ia ʻoku anga-fēfē hono fili kinautolú? Ko e fanga tokoua ko ení kuo pau ke nau aʻusia ʻa e ngaahi tuʻunga taau ʻoku ʻi he Tohi Tapú. (1 Tīmote 3:1-7, 12; Taitusi 1:5-9) Naʻe ngāueʻaki ʻe Sihova ʻa e laumālie māʻoniʻoní ke tokoniʻi ʻa e kau hiki Tohi Tapú ke nau fakamatalaʻi ʻa e ngaahi tuʻunga taau ko ení. ʻOku lotu ʻa e kau mātuʻa ʻi he fakatahaʻangá kia Sihova ʻo kole ʻa hono laumālie māʻoniʻoní ʻi heʻenau lāulea pe ko hai ʻoku totonu ke fokotuʻu ke hoko ko ha mātuʻa pe ko ha sevāniti fakafaifekau. ʻOku hā mahino, ko e ngaahi fakatahaʻangá ʻoku ʻi he malumalu ʻo e tataki ʻa Sīsū mo Sihová. (Ngāue 20:28) Ko e kau tangata kuo fakanofo ke nau poupouʻi mo tokangaʻi kitautolú ko ha ngaahi meʻaʻofa kinautolu mei he ʻOtuá.​—ʻEfesō 4:8.

17. Ke fakahāhā ʻa e fakaʻapaʻapá, ko e hā nai ʻe fiemaʻu ʻi he taimi ʻe niʻihi ke fai ʻe ha tuofefine?

¹⁷ ʻI he taimi ʻe niʻihi heʻikai nai ke faingamālie ha taha ʻo e kau mātuʻá pe ko e kau sevāniti fakafaifekaú ke ne fakahoko ha fatongia ʻi he fakatahaʻangá. ʻOku faʻa lava ke tokoni ʻa e fanga tokoua ʻosi papitaiso kehé, ka ʻo kapau ʻoku ʻikai ha taha ʻe faingamālie, ʻe fiemaʻu nai ki ha tuofefine ke ne fakahoko ha fatongia ʻa ia ʻoku angamaheniʻaki hono fai ʻe ha tokoua ʻosi papitaiso. Kapau ko e tuʻungá ia, te ne tui ha pūlou ʻi hono ʻulú, ko ha sikaafi nai pe ko ha tatā. (1 Kolinitō 11:3-10) ʻI he foungá ni, ʻokú ne fakahāhā ai ʻa ʻene fakaʻapaʻapa ki he fokotuʻutuʻu ʻa Sihova ki he tuʻunga-ʻulú, fakatouʻosi ʻi he fāmilí pea ʻi he fakatahaʻangá.​—Sio ki he Fakamatala ʻi he Ngataʻangá 15.

18, 19. (a) Ko e hā ʻoku tau ako mei he Loma 13:1-7? (e) ʻOku anga-fēfē ʻetau fakahāhā ʻa e fakaʻapaʻapa ki he ngaahi puleʻangá?

¹⁸ ʻI he ʻahó ni, ʻoku fakaʻatā ʻe Sihova ke ʻi ai ha mafai ʻo e ngaahi puleʻangá, pea ʻoku totonu ke tau fakaʻapaʻapaʻi kinautolu. ʻOku nau fokotuʻutuʻu maau ʻa e ngaahi fonuá mo e ngaahi feituʻú ke lele lelei pea tokonaki ki he kakaí ʻa e ngaahi sēvesi ʻoku fiemaʻú. ʻOku talangofua ʻa e kau Kalisitiané ki he fakahinohino ʻi he Loma 13:1-7. (Lau.) ʻOku tau fakaʻapaʻapa ki he “ngaahi mafai māʻolungá” pea talangofua ki he lao ʻa e fonua pe feituʻu ʻoku tau nofo aí. ʻOku kaunga nai ʻa e ngaahi laó ni ki hotau fāmilí, pisinisí, pe ko ʻetau koloá. Ko e fakatātaá, ʻoku tau totongi ʻa e tukuhaú pea ʻoatu ʻa e fakamatala ʻoku fiemaʻu ʻe he puleʻangá. Ka ko e hā ʻoku totonu ke tau faí kapau ʻoku fiemaʻu ʻe he puleʻangá ke tau fai ha meʻa ʻoku fepaki mo e lao ʻa e ʻOtuá? Naʻe pehē ʻe he ʻapositolo ko Pitá: “Kuo pau ke mau talangofua ki he ʻOtuá ko e pulé ia kae ʻikai ki he tangatá.”​—Ngāue 5:28, 29.

¹⁹ Kapau te tau fengāueʻaki mo ha ʻōfisa fakapuleʻanga, hangē ko ha fakamaau pe ko ha polisi, ʻoku totonu maʻu pē ke tau anga-fakaʻapaʻapa. Ko e toʻutupu Kalisitiané ʻoku nau fakahāhā ʻa e fakaʻapaʻapa ki heʻenau kau faiakó mo e kau ngāue ʻi he ʻapiakó. ʻI hotau feituʻu ngāué, ʻoku tau fakahāhā ai ʻa e fakaʻapaʻapa ki hotau pule ngāué, ʻo tatau ai pē pe ʻoku ʻikai ke fai pehē ʻa e kau ngāue kehé. ʻI heʻetau fai ení, ʻoku tau faʻifaʻitaki ai ki he ʻapositolo ko Paulá, ʻa ia naʻe fakaʻapaʻapa ki he kau ʻōfisá neongo naʻe faingataʻa ʻi he taimi ʻe niʻihi. (Ngāue 26:2, 25) Tatau ai pē pe ʻoku ʻikai ke lelei ʻa e tōʻongafai mai ʻa e niʻihi kehé, te tau kei fakaʻapaʻapa ai pē.​—Lau ʻa e Loma 12:17, 18; 1 Pita 3:15.

20, 21. Ko e hā ʻa e ngaahi meʻa lelei ʻe lava ke hoko ʻi he taimi ʻoku tau fakahāhā ai ʻa e fakaʻapaʻapa ki he niʻihi kehé?

²⁰ ʻI he māmaní kotoa, ʻoku fakaʻaʻau ke siʻi ange ai hono fakahāhā ʻe he kakaí ʻa e fakaʻapaʻapa ki he niʻihi kehé. Ka ʻoku kehe ʻa e kakai ia ʻa Sihová. ʻOku tau ʻai ko ʻetau taumuʻá ia ke fakaʻapaʻapa ki he tokotaha kotoa pē. ʻOku tau muimui ʻi he fakahinohino ʻa e ʻapositolo ko Pitá: “Fakaʻapaʻapa ki he faʻahinga kotoa pē ʻo e tangatá.” (1 Pita 2:17) ʻI heʻetau fakaʻapaʻapaʻi ʻa e niʻihi kehé, ʻoku nau fakatokangaʻi ia. Naʻe tala mai ʻe Sīsū: “Mou ʻai hoʻomou māmá ke ulo atu ki he kakaí, koeʻuhí ke nau sio ki hoʻomou ngaahi ngāue leleí pea nau ʻoatu ai ʻa e lāngilangí ki hoʻomou Tamai ʻoku ʻi hēvaní.”​—Mātiu 5:16.

²¹ ʻI heʻetau fakahāhā ʻa e fakaʻapaʻapa ʻi hotau fāmilí, fakatahaʻangá, pea ʻi he ngaahi tafaʻaki kehe ʻo e moʻuí, ko ʻetau faʻifaʻitakiʻanga leleí ʻe loto nai ai ʻa e niʻihi kehé ke nau ako lahi ange fekauʻaki mo Sihova. Pea ʻi hono fakahāhā ʻa e fakaʻapaʻapa ki he niʻihi kehé, ʻoku tau fakahāhā ai ʻa e fakaʻapaʻapa kia Sihova tonu. ʻOku ʻai heni ke fiefia ʻa Sihova pea fakahāhā ai kiate ia ʻoku tau ʻofa kiate ia.