Kuo Anga-Fēfē Hono Malangaʻi ʻa e Ongoongo Leleí?

Fakafou ʻi hono Puleʻangá, kuo vavé ni ke toʻo kotoa atu ʻe Sihova hotau ngaahi palopalemá. Ko e ongoongo lelei ʻaupito ia ʻoku fiemaʻu ke ʻilo ki ai e taha kotoa. Naʻe loto ʻa Sīsū ke vahevahe ʻe hono kau muimuí ʻa e pōpoaki ko ení ki he taha kotoa! (Mātiu 28:19, 20) Kuo anga-fēfē hono fakahoko ʻe he Kau Fakamoʻoni ʻa Sihová ʻa e fekau ʻa Sīsuú?

1. ʻOku fakahoko fēfē ʻa e Mātiu 24:14 ʻi he ʻahó ni?

Naʻe tomuʻa tala ʻe Sīsū: “Ko e ongoongo lelei ko ʻeni ʻo e Puleʻangá ʻe malangaʻi ia ʻi he kotoa ʻo e māmani kuo nofoʻí.” (Mātiu 24:14) ʻOku fiefia ʻa e Kau Fakamoʻoni ʻa Sihová ke kau ʻi he ngāue mahuʻinga ko ení. ʻOku mau malangaʻi ʻa e ongoongo leleí ʻi māmani laka hake ʻi he lea ʻe 1,000 tupu! Ko e ngāue lahi fakaʻulia ko ení ʻoku fiemaʻu ki ai ʻa e taimi mo e ivi lahi pea kuo pau ke fokotuʻutuʻu lelei ʻaupito ia. Ka naʻe ʻikai ʻa e tokoni ʻa Sihová ʻe ʻikai malava ia.

2. Ko e hā ʻa e ngaahi feinga kuo mau faí ke malanga ai ki he kakaí?

ʻOku mau malanga ʻi ha feituʻu pē ʻoku maʻu ai ʻa e kakaí. Hangē ko e kau Kalisitiane ʻi he ʻuluaki senitulí, ʻoku mau malanga “mei he fale ki he fale.” (Ngāue 5:42) ʻI he founga fokotuʻutuʻu maau ko ení ʻoku mau malava ai ke aʻu ki he kakai e laui miliona ʻi he taʻu taki taha. Koeʻuhi ʻoku ʻikai ke faʻa ʻi ʻapi ʻa e kakaí, ʻoku mau toe malanga ʻi he ngaahi feituʻu ʻoku maʻu ai ʻa e kakaí. ʻOku mau kumi maʻu pē ki he ngaahi faingamālie ke tala ki he niʻihi kehé fekauʻaki mo Sihova mo ʻene ngaahi taumuʻá.

3. Ko hai ʻokú ne maʻu ʻa e fatongia ke malangaʻi ʻa e ongoongo leleí?

Ko e kotoa ʻo e kau Kalisitiane moʻoní ʻoku totonu ke nau vahevahe ʻa e ongoongo leleí ki he niʻihi kehé. ʻOku mau fakahoko fakamātoato homau fatongiá. ʻOku mau malanga he lahi taha te mau malavá koeʻuhi ʻoku mau ʻilo ʻoku kaunga ki ai ʻa e moʻui ʻa e kakaí. (Lau ʻa e 1 Tīmote 4:16.) ʻOku ʻikai totongi kimautolu ki he ngāue ko ení, he ʻoku pehē ʻe he Tohi Tapú: “Kuo mou maʻu taʻetotongi, foaki taʻetotongi.” (Mātiu 10:7, 8) ʻOku ʻikai ke tali ʻe he taha kotoa ʻemau pōpoakí. Ka ʻoku mau hokohoko atu ʻemau malangá koeʻuhi ko hono fai iá ʻoku mau talangofua ai kia Sihova pea ʻai ia ke fiefia.

KELI LOLOTO ANGE

4. ʻOku mau ngāue mālohi ke aʻu ki he kakai kotoa

VITIŌ: Malanga ʻi he “Feituʻu Taupotu Taha ʻo e Māmaní” (7:38)

• Ko e hā ʻoku maongo kiate koe fekauʻaki mo e feinga ʻa e Kau Fakamoʻoni ʻa Sihová ke malangá?

Lau ʻa e Mātiu 22:39 mo e Loma 10:13-15, pea lāulea leva ki he ongo fehuʻi ko ení:

• ʻOku anga-fēfē hono fakahaaʻi heʻemau ngāue fakamalangá ʻoku mau ʻofa ki he kakaí?

• ʻOku anga-fēfē ongoʻi ʻa Sihova ki he faʻahinga ʻoku nau malangaʻi ʻa e ongoongo leleí?​—Sio ki he veesi 15.

5. Ko e kaungāngāue kimautolu ʻo e ʻOtuá

ʻOku lahi ʻa e ngaahi hokosia ʻoku hā mei ai ʻa hono tataki ʻe Sihova ʻemau ngāué. Ko e fakatātaá, ko ha tokoua ko Paul ʻi Nuʻu Sila, naʻá ne fetaulaki mo ha fefine ʻi he ngāue fale ki he falé. ʻI he pongipongi pē ko iá, naʻe lotu ʻa e fefiné ki he ʻOtuá ʻo ngāueʻaki hono huafá, ʻa e Sihová, pea kole ange ke fekauʻi mai ha taha ke tokoniʻi ia ke ne ʻiloʻi ʻa e ʻOtuá. ʻOku pehē ʻe Paul, “ʻI he houa ʻe tolu ki mui aí, naʻá ku aʻu atu ki he ʻapi ʻo e fefiné.”

Lau ʻa e 1 Kolinitō 3:9, pea lāulea leva ki he fehuʻi ko ení:

• ʻOku anga-fēfē hono fakahaaʻi ʻe he hokosia hangē ko eni ʻi Nuʻu Silá, ʻoku tataki ʻe Sihova ʻa e ngāue fakamalangá?

Lau ʻa e Ngāue 1:8, pea lāulea leva ki he fehuʻi ko ení:

• Ko e hā ʻoku mau fiemaʻu ai ʻa e tokoni ʻa Sihová ke fakahoko ʻemau ngāue fakamalangá?

Naʻá ke ʻiloʻi?

ʻI he uike kotoa ʻi heʻemau fakataha lolotonga ʻa e uiké, ʻoku mau maʻu ʻa e fakahinohino ke tokoniʻi kimautolu ke malangá. Kapau kuó ke maʻu ha fakataha, ko e hā haʻo fakakaukau fekauʻaki mo e akó?

6. ʻOku mau talangofua ki he fekau ʻa e ʻOtuá ke malangá

ʻI he ʻuluaki senitulí, naʻe feinga ʻa e kau fakafepakí ke taʻofi ʻa e kau muimui ʻo Sīsuú mei he malangá. Ko e muʻaki kau Kalisitiané naʻa nau taukapoʻi ʻenau totonu ke malangá ʻaki hono “fokotuʻu fakalao ʻa e ongoongo leleí.” (Filipai 1:7) ʻOku fai ʻe he Kau Fakamoʻoni ʻa Sihová ʻa e meʻa tatau ʻi he ʻahó ni.a

VITIŌ: Taukapoʻi Fakalao ʻa e Ongoongo Leleí (2:28)

Lau ʻa e Ngāue 5:27-42, pea lāulea leva ki he fehuʻi ko ení:

• Ko e hā heʻikai tuku ai ʻemau malangá?​—Sio ki he veesi 29, 38 mo e 39..

FAKANOUNOU

Naʻe fekau ʻe Sīsū ʻa hono kau muimuí ke malangaʻi ʻa e ongoongo leleí ki he fonua kotoa pē. ʻOku tokoni ʻa Sihova ki hono kakaí ke fai ʻa e ngāue ko ení.

Fakamanatu

• ʻOku anga-fēfē hono malangaʻi ʻa e ongoongo leleí ʻi māmani lahí?

• ʻOku anga-fēfē hono fakahaaʻi ʻe heʻemau ngāue fakamalangá ʻoku mau ʻofa ki he kakaí?

• ʻOkú ke fakakaukau ko e ngāue fakamalangá te ne ʻai kimautolu ke fiefia? Ko e hā hono ʻuhingá?

AKO LAHI ANGE

Sio ki he founga ʻoku malanga ai ʻa e Kau Fakamoʻoni ʻa Sihová ki he kakai ʻi he ngaahi kolo lalahí.

Feingangāue Fakamalanga Makehe ʻi Pālesi (5:11)

Ko e hā kuo fai ʻe he Kau Fakamoʻoni ʻa Sihová ke tokoni ki he kau kumi hūfangá?

Fakalato ʻa e Fieinua Fakalaumālie ʻo e Kau Kumi Hūfangá (5:59)

Fanongo tonu ki he fakafiefia ʻa ha fefine ʻi hono ngāueʻaki ʻene moʻuí he malangá.

ʻOku Ou Fiefia Naʻá Ku Fili ʻa e Ngāue ko Ení (6:29)

Ako ki he ngaahi fili mahuʻinga ʻa e fakamaauʻangá kuo ʻai ai ke faingofua ange hono malangaʻi ʻa e ongoongo leleí.

“ʻAve ʻe he Kau Malanga ʻo e Puleʻangá ʻEnau Keisí ki he Fakamaauʻangá” (Pule ʻa e Puleʻanga ʻo e ʻOtuá!, vahe 13)