Sīsū—Ko ʻEne Moʻuí mo ʻEne Ngāue Fakafaifekau

Ko e Talanoa ʻo ha Foha Naʻe Mole

KUO fakaangaʻi ʻe he kau Fālesí ʻa Sīsū ʻi heʻene takanga mo e kau faiangahala ʻiloa, pea ʻi heʻene talí kuo toki ʻosi ʻene lave ai ki he ongo talanoa fakatātā ʻo fekauʻaki mo hono toe maʻu ha sipi naʻe mole mo e paʻanga kapa naʻe mole. ʻOkú ne toki hoko atu eni mo ha talanoa fakatātā kehe ʻe taha, ʻoku kau ia ki ha tamai ʻofa mo ʻene angafai ki hono ongo foha, ʻa ia ʻoku ʻi ai hona mele mamafa taki taha.

ʻUluaki, ko e foha siʻisiʻí, ko e tokotaha tefito ia ʻi he talanoa fakatātaá. ʻOkú ne maʻu hono ʻinasi, ʻa ia ʻoku ʻoange taʻetoumoua ʻe heʻene tamaí. ʻOkú ne mavahe leva mei ʻapi ʻo kau ki he founga moʻui taʻetaau ʻaupito. Ka ke fanongo ki hono fai ʻe Sīsū ʻa e talanoá, pea vakai ange pe te ke ʻilo pe ko hai ʻoku fakatātaaʻi ʻe kinautolú.

ʻOku kamata ʻe Sīsū: “Tokua naʻe ai ha tangata mo hono ongo foha ʻe toko ua. Pea pehē ʻe he tehina ki heʻene ʻeiki, ʻAlā tamai, vaheʻi mai muʻa hoku ʻinasi ʻi he koloa. Pea ne tufa [ʻe he tamai] kiate kinaua ʻio mo e meʻa kotoa naʻe tauhi ʻaki siʻene moʻui.” Ko e hā ʻoku faiʻaki ʻe he foha siʻisiʻí ʻa e meʻa naʻá ne maʻú?

ʻOku fakamatalaʻi ʻe Sīsū: “Pea hili ʻa e ngaahi ʻaho​—naʻe ʻikai loko lahi​—naʻe tanaki ʻe he tehina ʻene meʻa kotoa, ʻo ne hiki ki ha fonua mamaʻo; pea ʻi he potu ko ia naʻa ne tolovekaʻaki ʻene koloa ʻi heʻene moʻui fakalusa.” Ko hono moʻoní, ʻokú ne fakamoleki ʻene paʻangá ʻi he nonofo mo e kau paʻumutú. Ki mui mai ʻoku hoko ha ngaahi taimi faingataʻa, ʻo hangē ko ia ʻoku hoko atu ʻa e lave ki ai ʻa Sīsuú:

“Pea ʻi he faifai pea ʻosi atu ʻene meʻa kotoa, ʻiloange naʻe honge vale ʻa e fonua ko ia, pea naʻa mo ia naʻa ne kamata masiva meʻakai. Pea ne ʻalu ʻo musu ia ki ha toko taha, ko e tangata totonu ʻo e fonua ko ia; pea ne fekau ia ke ʻalu ki heʻene ngoueʻanga, ʻo tauhi ʻene fanga puaka. Pea ne moʻu fakaʻamu ki he ngaahi foʻi pīni naʻe kai ʻe he fanga puaka ke ne mānavaʻaki; he naʻe ʻikai ke ʻange ʻe ha taha haʻane meʻa.”

Ko ha toki meʻa maʻulalo ē ʻa hono kouna kita ʻe hoto tuʻungá ke tauhi ʻa e fanga puaká, koeʻuhi he ko e fanga monumanu ko ʻení naʻe taʻemaʻa fakatatau ki he Laó! Ka ko e meʻa mamahi lahi taha ki he fohá ko e langa feʻola ʻo e fiekaiá ʻo fakatupunga ai ia ke ne holi ki he meʻakai naʻe fafangaʻaki ʻa e fanga puaká. Koeʻuhi ko ʻene tuʻutāmaki lahí, naʻe pehē ʻe Sīsū, “pea foki mai ʻene fakakaukau lelei.”

ʻI heʻene hoko atu ʻa e talanoá, ʻoku fakamatala ʻe Sīsū: “Pea ne pehē [kiate ia tonu pē], ʻE taʻingaā ʻa e kau ngāue totongi ʻa ete ʻeiki ʻoku fokotuʻu ʻenau toenga kai, ka ko kita ʻoku te mate ʻi heni ʻi he honge! Kau tuʻu muʻa ʻo ʻalu ki heʻeku tamai; pea u pehē kiate ia, ʻAlā tamai, kuo u fai angahala ki he langi, kae tautonu kiate koe; ʻoku ʻikai te u kei tāu ke lau ko ho foha: ka ke fai kiate au ʻo hangē ko ha taha ʻi hoʻo kau ngāue totongi. Pea ne tuʻu pe ʻo ʻalu ki heʻene ʻeiki.”

Ko ha meʻa ʻeni ke fakakaukau ki ai: Kapau naʻe fakafepaki ʻene tamaí kiate ia peá ne kaila ʻita kiate ia ʻi heʻene mavahe atu mei he ʻapí, ngalingali ʻe ʻikai ke huʻufataha pehē ʻa e fakakaukau ia ʻa e fohá ki he meʻa ʻoku totonu ke ne faí. Naʻe mei fili nai ia ke foki pē ʻo kumi ha ngāue ʻi ha feituʻu kehe ʻi hono fonua totonú ke ʻoua te ne toe fetaulaki mo ʻene tamaí. Kaekehe, naʻe ʻikai ke ʻi ai ha faʻahinga fakakaukau pehē ʻe hū ki heʻene fakakaukaú. Ko e feituʻu naʻá ne loto ke ʻi aí ko ʻapi pē!

ʻOku hā mahino, ko e tamai ʻi he talanoa fakatātā ʻa Sīsuú ʻokú ne fakatātaaʻi ʻa ʻetau Tamai fakahēvani angaʻofa mo manavaʻofá, ko e ʻOtua ko Sihová. Pea mahalo ʻokú ke fakatokangaʻi foki ko e foha naʻe molé, pe maumau-koloá, ʻokú ne fakatātaaʻi ʻa e kau angahalaʻia ʻiloa. Ko e kau Fālesí, ʻa ia ʻoku lea ki ai ʻa Sīsū, kuo nau fakaangaʻi ki muʻa ʻa Sīsū ki heʻene kai mo e faʻahinga ko ʻení.

Ka ko hai ʻoku fakatātaaʻi ʻe he foha lahí? Pea ko e hā ʻa hono ʻuhinga ʻo e talanoa fakatātā ʻa Sīsuú ʻi hotau senituli hono uofulú ni? Ko e ʻīsiu hono hoko mai ʻo e makasini ko ʻení te ne tali ʻa e ngaahi fehuʻi ko ʻení ʻi heʻene fakamatala ki he toenga ʻo e talanoa ʻa Sīsū ʻo fekauʻaki mo hono toe ʻilo ʻa e foha ne molé. Luke 15:​11-20, 30; Livitikō 11:​7, 8.

◆ Ko e tala ʻe Sīsū ʻa e talanoa fakatātā pe ko e talanoa ko ʻení kia hai, pea ko e hā hono ʻuhingá?

◆ Ko hai ʻa e tokotaha tefito ʻi he talanoá, pea ko e hā ʻa e meʻa ʻoku hoko ki aí?

◆ Ko hai ʻoku fakatātaaʻi ʻe he tamaí mo e foha siʻisiʻí?

◆ Ko e hā ʻa e fakamatala te tau fakatuʻamelie ki ai ʻi he ʻīsiu hono hoko mai ʻo e makasini ko ʻení?