Ko e Tali ʻa e Nō Paʻanga ʻa e Kaungā-Kalisitiané

KO Pedro mo Carlos ko ha ongo kaungāmeʻa lelei.a Ko e kaungā-Kalisitiane kinaua, pea ko hona ongo fāmilí naʻá na faʻa fefeohiʻaki māfana. Ko ia ʻi he fiemaʻu ʻe Carlos ha paʻanga ki heʻene pisinisí, naʻe ʻikai ke toumoua ʻa Pedro ke ne tali ʻa e nō paʻanga kiate ia. ʻOku fakamatala ʻe Pedro: “Naʻe ʻikai te u tokanga au ia ki ai koeʻuhi he naʻá ma kaungāmeʻa lelei.”

Kaekehe, ʻi ha mahina pē ʻe ua ki mui mai ai, naʻe mate ʻa e pisinisi ia ʻa Carlos, pea naʻe tuku leva ʻa e totongi fakafoki ia ʻo e noó. Naʻe ʻohovale ʻa Pedro ʻi heʻene ʻilo naʻe ngāueʻaki ʻe Carlos ia ʻa e konga lahi ʻo e paʻanga naʻá ne noó ke totongiʻaki ʻa e ngaahi moʻua kehe ia mei he pisinisí pea mo fakapaʻangaʻaki ha founga moʻui maʻumeʻa. Naʻe ʻikai lava ke fakaleleiʻi ʻa e meʻá ni ke fiemālie ki ai ʻa Pedro ʻo feʻunga mo e taʻu ʻe taha ʻo hono fai ʻo e ngaahi ʻaʻahi mo e ngaahi tohi ki ai. Tupu mei he ongoʻi laufanō e feingá, naʻe ʻalu ai ʻa Pedro ki he kau maʻu mafai māʻolungá ke nau puke ʻa Carlos, ko hono kaungāmeʻa mo hono tokoua Kalisitiané, ʻo fakahū pilisone.b Ko ha founga totonu ʻeni ke fai? Te tau sio ange ki ai.

Ko e ngaahi loto-kehekehé mo e fetaʻemahinoʻaki ʻo kau ki he ngaahi nō paʻangá ʻoku faʻa fakatupunga ai ʻa e faʻa movete ʻa e tuʻunga fakakaungāmeʻa ʻi he lotolotonga ʻo e kakai ʻi he māmaní. ʻI he taimi ʻe niʻihi ʻoku aʻu ʻo hoko ko e tupuʻanga ia ʻo e fepaki ʻi he lotolotonga ʻo e kaungā-Kalisitiané. ʻOku faingataʻa ke maʻu mei he pangikeé ha ngaahi nō ʻi he ngaahi fonua lahi, ko ia ʻoku anga-maheniʻaki ʻe he kakai ʻoku nau fiemaʻu ha tokoni fakaepaʻangá ke nau ʻalu ki he ngaahi kaungāmeʻá mo e ngaahi kaingá. Kaekehe, ko e meʻa naʻe hokosia fakamamahi ʻe Pedro mo Carlos, ʻokú ne fakahāhā mai kapau ʻe ʻikai ke muimui tokanga ki he ngaahi tefitoʻi moʻoni faka-Tohitapú fakatouʻosi ʻe he tokotaha noó mo ia ʻokú ne foaki ʻa e noó, ʻe hoko nai ha ngaahi palopalema faingataʻa. Ko ia, ko e hā ʻa e founga totonu ke fai ki ha kole nō ʻa ha kaungā-Kalisitiane?

Fatu ʻa e Ngaahi Fakamole ʻo e Noó

ʻOku fakalotoʻi mai ʻe he Tohitapú ke ʻoua ʻe fai ha nō noaʻia pē. ʻOku ekinaki mai ʻe he ʻapositolo ko Paulá ʻo pehē: “ʻOua naʻa ai hamou moʻua ki ha niʻihi, ngata pe ʻi he moʻua ke ʻofa ki ai.” (Loma 13:8) Ko ia ai, ki muʻa ke fai ha fakamoʻuá, fatu ʻa e fakamole ʻo e fai peheé. (Fehoanaki mo Luke 14:28.) ʻOku ʻi ai ha fiemaʻu moʻoni ke fai ha nō paʻanga? Ko ha meʻa ia ke tauhiʻaki hoʻo founga ke maʻu paʻanga ke ke tokangaʻi ʻaki ho fāmilí? (1 Tīmote 5:8) Pe ʻoku kau ki ai ha mānumanu​—ko e holi nai ke moʻui maʻumeʻa ange?​—1 Tīmote 6:​9, 10.

Ko ha toe meʻa mahuʻinga ʻe taha ʻi hono maʻu mai ha nō pe ʻe fakamālohiʻi ai koe ke ke ngāue ʻi ha ngaahi houa lahi ange pea mahalo pē te ke liʻaki ai ʻa e ngaahi fakatahá mo e ngāue fakamalangá. ʻIkai ke ngata ai, ka te ke malava moʻoni ke totongi ʻa e paʻanga ʻa ha tokotaha kehe naʻá ke nō mei ai ʻo kapau ʻe ʻi ha tuʻunga faingatāmaki? Fēfē kapau ʻe mate ʻa e pisinisí pe ko e ngāue kuo kamata ke faí? Manatuʻi, “ʻoku no ʻe he faikovi, ʻo ʻikai totongi.”​—Sāme 37:21.

‘Lea Moʻoni’ ki he Kau Tali ʻa e Nō Paʻanga

ʻI he ʻosi ha fakakaukau ki he ngaahi meʻa peheé, te ke kei pehē pē nai ʻoku kei taau ke fai pē ha nō fakapisinisi. Kapau ʻe ʻikai lava ke maʻu ia mei he ngaahi maʻuʻanga fakaemāmaní, ʻoku ʻikai ke hala ke kole ki ha kaungā-Kalisitiane, he ʻoku anga-maheniʻaki ke hanga ki ha ngaahi kaungāmeʻa ʻi he taimi ʻoku fiemaʻu ai ha meʻa, ʻo hangē ko ia naʻe lave ki ai ʻa Sīsū ʻi he Luke 11:5. Ka ʻoku totonu ke te mātuʻaki tokanga ke “lea moʻoni.” (ʻEfesō 4:25) Fai ha fakamatala faitotonu ʻo kau ki he ngaahi meʻa kotoa pē ʻoku kau ki ai, kau ai mo e ngaahi tuʻunga faingatāmaki, naʻa mo e ngaahi meʻa ʻoku ngali ʻe ʻikai ke hoko ai. Pea ʻoua te ke loto-mamahi ʻo kapau ʻe ʻeke ʻe he tokotaha te ke nō mei aí ha ngaahi fehuʻi hangatonu koeʻuhi ke ne ʻilo fakapapau ʻa e meʻa ʻoku fai ki ai ʻa e noó.c

Ko e leaʻaki ia ʻa e moʻoní ke nō ki ha ʻuhinga ʻe taha pea ngāueʻaki ʻa e paʻangá ia ki ha meʻa kehe? ʻIkai ʻaupito. ʻOku fai fakamatala ʻe ha pule pangikē ʻi ʻAmelika Latina ʻo ne pehē: “ʻE puke ʻe he pangikē ʻa hoʻo paʻanga, pea kapau naʻe ʻikai te ke totongi vave ho moʻuá, te nau maʻu ha tuʻutuʻuni mei he fakamaauʻangá ke puke ʻa hoʻo ngaahi koloá.” Kapau ko e paʻanga kuo nō maí naʻe makatuʻunga ʻi he fakakaukau ʻe tupulekina ai ʻa e tupu ʻi ha pisinisi, ko hono moʻoní ko hono ngāueʻaki ia ki ha taumuʻa kehe ʻokú ne toʻo ai ʻa e tui pau mei he tokotaha naʻá ne foaki ʻa e noó pe ʻe lava ke toe totongi fakafoki. Ko e moʻoni, ʻe ʻikai te ke manavasiʻi nai ki ha sāuni fakalao ʻi haʻo nō mei hao kaungā-Kalisitiane. Ka neongo ia, “ko ia kuo ne fai ha no, ʻoku ne tamaioʻeiki ki he tangata kuo tali ʻa e no,” pea ʻoku ʻi ai ho fatongia ke ke faitotonu kiate ia.​—Palōvepi 22:7.

Ngāueʻaki ʻa e Lao Koulá ʻi he Pisinisí

Naʻe pehē ʻe Sīsū: “Ko ia ʻilonga ha meʻa ʻoku mou loto ke fai ʻe he kakai kiate kimoutolu, fai pehe foki kiate kinautolu.” (Mātiu 7:12) Ko ha toki meʻa mātuʻaki mahuʻinga ē ke ʻi ai ʻa e lao ko ʻení ʻi heʻetau fai ha pisinisi mo e kaungā-tuí! Hangē ko ʻení, ʻe anga-fēfē haʻo tali ʻo kapau ʻe ʻikai ke tali ʻe ha tokoua haʻo kole nō? Te ke fakakaukau kuó ne taʻemateaki ki hoʻomo tuʻunga kaungāmeʻá? Pe te ke fakaʻapaʻapa ki heʻene totonu ke ʻoua te ne tali ʻa e meʻa ʻokú ke kolé, ʻo mahino te ne fiemaʻu nai ʻe ia ʻa ʻene paʻangá pe te ne fakafuofua ki he ngaahi tuʻunga faingatāmaki ʻe lava ke hokó ʻoku mamafa ange ʻi ho tuʻungá? Te ne fehuʻia faitotonu nai ʻa hoʻo malava ke ke ngāueolaleleiʻaki ʻa e paʻangá. ʻI ha tuʻunga pehē, ko ʻene fakafisingaʻi hoʻo kolé ko ha meʻa nai ia ʻoku fakatou ʻaonga mo anga-ʻofa.​—Palōvepi 27:6.

Kapau ʻoku loto ha kaungāmeʻa ke ke nō mei ai ha paʻanga, ʻoku totonu ke hiki ʻa e ngaahi fakamatala fakaikiiki ʻi ha tohi, ʻo kau ai ʻa e lahi ʻo e paʻanga noó, ko e hā ʻa e taumuʻa ʻo e noó, ko e hā ʻa e ngaahi koloa ʻoku maluʻiʻaki ʻa e noó, pea ko ʻafē mo anga-fēfē ʻa e totongi fakafoki ʻa e noó. ʻI he tuʻunga ʻe niʻihi ʻoku fakapotopoto ange ke ngāueʻaki ha loea ke ne ʻai ʻa e aleapaú pe ke ne lau ʻo sivi fakalelei pea ke tuku tauhi ki he kau maʻu mafaí. Ko ha meʻa pē ʻe fai, ko ʻene ʻosi pē ha fakamoʻoni hingoa ki ha aleapau, ʻai “hoʻomou lea, ‘ʻIo, ʻIo, ʻIkai, ʻIkai.” (Mātiu 5:37) ʻOua te ke tukunoaʻi ʻa e anga-lelei ʻa ho kaungāmeʻá ʻaki ha ʻikai te ke fai fakamātoato ho fatongia kiate iá ʻo hangē pē ko haʻo fai ki he pangikeé.

Kau Tali Nō Paʻanga ʻOku Tokanga

Fēfē ʻo kapau ʻe ʻalu atu ha taha kiate koe ki ha nō? ʻOku lahi ʻa e meʻa ʻe makatuʻunga ia ʻi he ngaahi tuʻunga ʻoku kau ki aí. Hangē ko ʻení, ko ha tokoua Kalisitiane nai kuó ne tō ki he faingatāmaki fakaepaʻangá, ʻo ʻikai ko hano foʻui ia ʻoʻona. ʻE ueʻi koe ʻe he ʻofa faka-Kalisitiané ke ‘ʻange kiate ia ʻa e ngaahi fiemaʻu ʻo hono sinó,’ ʻo kapau ʻokú ke maʻu ha tokoni ke ke fai pehē.​—Sēmisi 2:​15, 16.

Ko ha taʻeʻofa lahi ē ke ngāuekoviʻaki ʻa e faingataʻaʻia ʻo ha tokoua ʻaki hano toe hilifaki ki ai ha totongi tupu ʻi ha tuʻunga pehē! Naʻe naʻinaʻi ʻe Sīsū ʻo pehē: “Ka mou ʻofaʻi homou ngaahi fili; pea fai lelei mo tali nonō [ʻo ʻoua hilifaki ha totongi tupu ki ai, NW], neongo ʻoku ʻikai te mou ʻamanaki ʻe to e maʻu mai ha meʻa.”​—Luke 6:35; fehoanaki mo Livitikō 25:​35-38.

Ka, fēfē ʻo kapau kuo kole kiate koe ke ke fakapaʻanga ke fokotuʻu ha pisinisi pe ke maluʻi ha nō? ʻI he tuʻunga fakalūkufuá, ko e ngaahi meʻa ko iá ʻoku lelei ange ke vakai ki ai ko ha meʻa ʻe maʻu mei ai ha tupu ʻi he kahaʻú. ʻOku fakatokanga mahino ʻe he Tohitapú, ʻo ne ekinaki: “ʻOua te ke ului ki he faahinga ʻoku ʻatu nima, ʻa kinautolu ʻoku hoko ko e talifaki ʻo e ngaahi moʻua.”​—Palōvepi 22:26.

ʻI ha tuʻunga pehē, kuo pau ke ke ʻuluaki fifili pē te ke lava moʻoni ke fai ʻa e vaheʻi ʻa e paʻanga ko iá. ʻE hoko ha tuʻutāmaki fakapaʻanga kiate koe ʻo kapau ʻe mate ʻa e pisinisí pe ko e ʻikai ke lava ʻe he tokotaha maʻu noó ke ne totongi ʻa e noó ʻi he taimi totonu? Kapau ʻokú ke malava ke ʻoatu ʻa e nō pea ʻe maʻu mei ai ha tupu, ʻoku ʻi ai hoʻo totonu foki ke ke kau ki he tupu ko iá ʻaki hano hilifaki ha tupu taau ki hoʻo paʻanga nō atu. (Fehoanaki mo Luke 19:​22, 23.) ʻOku fakatokanga mai ʻe Palōvepi 14:15: “Ko e hehemangofua ʻoku ne tui ki he lea kotoa: Ka ko e fakapotopoto ʻoku ne fakakaukau ʻene laka.” Ko ha kau tangata pisinisi fakapotopoto ʻe niʻihi kuo ʻikai te nau tokanga ʻi he fetuʻutaki fakapisinisi mo e kaungā-Kalisitiané. Ko e fakatauele ʻa e ngaahi totongi tupu lahí kuó ne ʻai ʻa e niʻihi ʻo fai ha vaheʻi paʻanga taʻe tokanga ʻa ia kuo fakatou mole ai meiate kinautolu ʻa ʻenau paʻangá mo ʻenau tuʻunga fakakaungāmeʻa mo honau kaungā-Kalisitiané.

Ko e meʻa fakatupu tokangá, ko e kau pule pangikeé ʻoku nau faʻa fakakaukauʻi ʻa e ngaahi meʻa ʻe tolu ke fakafuofua mai pē ʻe tuʻu fēfē ha nō ʻe fai: (1) ko e ʻulungaanga ʻo e tokotaha kole noó, (2) ko ʻene malava ko ē ke totongi fakafokí, mo e (3) ko e ngaahi tuʻunga lolotonga ʻo kau ki he faʻahinga pisinisi ko ia ʻokú ne ʻi aí. ʻIkai ʻoku fakahāhā ai ʻa e “fakapotopoto” ke ke fai ha fakafuofua pehē ʻi he ngaahi meʻa ko ia ʻo tautautefito ʻi haʻo fakakaukau ke nō atu hoʻo paʻanga naʻá ke ngāue mālohi ke maʻú ki ha tokotaha kehe?​—Palōvepi 3:21.

Ko e fakatātaá, ko e hā ʻa e ongoongo ʻo e tokoua ʻoku kole nō paʻangá? ʻOku ʻiloa ia ʻoku alafalalaʻanga pe ʻoku taʻefalalaʻanga mo anga-feliliuaki? (Fehoanaki mo 1 Tīmote 3:7.) Kapau ʻokú ne loto ke fakalahi ʻa ʻene pisinisí, kuo ola lelei ʻa ʻene fai mai ʻo aʻu ki he tuʻunga lolotonga ʻokú ne ʻi aí? (Luke 16:10) Kapau ʻoku ʻikai, ko ha tokoni ki hono ngāueʻaki pē ʻa ʻene paʻangá ʻe tokoni lahi ange nai ia ʻi he vahaʻa taimi lōloa ange ʻi hano atu ki ai ha nō paʻanga ʻa ia ʻe ʻikai ke ngāueleleiʻaki.

Ko e toe meʻa ʻe taha ko e malava ʻa e tokouá ke fai ʻa e totongi fakafokí. Ko e hā ʻa ʻene paʻanga hū maí? Ko e hā ʻa hono ngaahi moʻuá? Ko e meʻa ʻuhinga totonu pē ke ne lea totonu kiate koe. Ka neongo ia, ko e ʻofa faka-Kalisitiané kuo pau ke kei maeʻeeʻa pē ai. Hangē ko ʻení, mahalo pē te ke loto ke maluʻiʻaki ha nō ʻa ha tokoua meiate koe ʻaki ʻa e ngaahi koloa ʻa e tokouá ʻoku ala fakatau atú. Naʻe fakahalaiaʻi ʻe he Lao ʻa Mōsesé ʻa hono puke ha maʻuʻanga moʻui ʻo ha tangata pe ko ʻene ngaahi koloa tefitó ke maluʻiʻaki ha nō. (Teutalōnome 24:​6, 10-12) Ko ia ai, ko ha tokoua ʻi ʻAmelika Tonga ko ha tokotaha pisinisi ia ʻokú ne pehē te ne tali pē ʻa e nō atu ha paʻanga ʻe ha tokoua ʻo aʻu pē ki he vaeua ʻo e mahuʻinga ʻo e ngaahi koloa ʻa e tokouá ʻoku ala fakatau atú. ʻOkú ne fakamatala: “ʻOku ʻikai te u lau ʻa e ngaahi meʻangāue ʻaʻaná pe ko hono falé ko e ngaahi koloa ʻoku ala fakatau atu. ʻOku ʻikai ʻaupito te u loto ke tuli hoku tokouá ke nofo ʻi he halá ka u puke hono falé koeʻuhi ke fakafoki mai ʻaki ʻa ʻeku paʻangá.”

Ko e meʻa fakaʻosí, ʻoku totonu ke ke fakakaukau matala ki he ngaahi tuʻunga fakapisinisi fakalūkufua ʻi he feituʻu ʻokú ke nofo aí. ʻOku tau lolotonga nofo ʻi he “kuonga fakamui,” ʻi he lolotonga ʻa e taimi ko ʻení ko e kau tangatá ʻoku nau “ʻofa ki he paʻanga, . . . ko e kau lavaki.” (2 Tīmote 3:​1-4) Neongo ko ho kaungāmeʻá pea ko ho tokouá ʻe faitotonu nai, ka ko hono kaungāpisinisí, kau ngāue, mo e kau kasitomá ʻoku ʻikai te nau fai pehē nai. ʻI he tuʻunga ko ha tokotaha Kalisitiane, ʻoku ʻikai lava ke ne fai totongi fufū mo loi, ʻa ia ʻe ngāueʻaki nai ia ʻe hono kau feʻauhí ki ha lelei pe maʻanautolu. Ko e toe meʻa ʻe taha ke fakakaukau ki ai ko e ngaahi faingataʻaʻiá “ʻoku hokonoa.” (Koheleti 9:11) ʻOku lava ʻa e mahuʻinga ʻo e koloá ke tō fakafokifā pē. Ko e fuʻu hulu ʻa e fakautuutu ʻa e mamafa ʻo e totongi ʻo e koloá ʻe lava ke ne maumauʻi ha pisinisi pe ke mole ʻaupito ai ʻa e mahuʻinga ʻo hoʻo noó. Ko e ngaahi meʻa ʻoku faʻa hoko foki ki he tuʻunga pisinisí ko e kaihaʻa, ko e fakatuʻutāmaki, ko e maumauʻi ʻo e ngaahi koloá, mo e ngaahi lavea. ʻOku totonu ke ke fakakaukauʻi lelei ʻa e ngaahi tafaʻaki kotoa ko ʻení ʻi hoʻo fai ha fili.

ʻIkai Ke Lava

ʻI he taimi ʻe niʻihi, neongo kuo fai ʻa e toka teuteu kotoa, ʻoku ʻikai pē ke lava ʻe ha tokotaha Kalisitiane ia ke ne totongi fakafoki ʻa ʻene noó. Ko e Lao Koulá ʻoku totonu ke ne ueʻi ia ke fetuʻutaki maʻu pē mo e tokotaha ʻokú ne moʻua ki aí. Mahalo pē ko ha totongi siʻisiʻi pē ʻe lava ke fai ʻi ha vahaʻa taimi. Ka neongo ia, ʻoku ʻikai totonu ki ha tokotaha Kalisitiane ke ne pehē ko ʻene totongi ha kiʻi konga siʻi pē ʻoku ʻai ai ia ke ne ʻataʻatā ai mei hono fai ha ngaahi feilaulau moʻoni ke ne fakakakato ʻa hono ngaahi moʻuá. (Sāme 15:4) Ko ha tokotaha Kalisitiane ʻokú ne tali ʻa e nō paʻanga atú ʻoku toe fatongiaʻaki ke ne fakahāhā ʻa e ʻofá. Kapau ʻokú ne pehē kuo fai ange ha kākā kiate ia, te ne ngāueʻaki nai ʻa e akonaki ʻi he Mātiu 18:​15-17.

ʻOku tātātaha pē ke hoko ko e tuʻunga lelei ke fakakau mai ʻa e kau maʻu mafai fakaemāmaní, ʻo hangē ko ia naʻe fai ʻe Pedro naʻe lave ki ai ʻi he kamataʻangá. ʻOku pehē ʻe he ʻapositolo ko Paulá: “ʻUoi! ʻoku ʻi ai koā hamou toko taha ʻoku pehe fau ʻene fiematamuʻa, ke ʻave ʻene meʻa mo ha taha ʻo fakamāu ki he faʻahinga taʻefaitotonu, ʻo ʻikai fakamāu ki he kakai lotu? . . . He ʻoku pehe koā hoʻomou masiva kakai poto? ʻOku ʻikai koā ha taha te ne lava ke fakamāu au ʻa e meʻa ʻa siʻono tokoua lotu? Ka ko eni ʻoku tala hopo ʻa e tangata lotu ki hono tokoua lotu, kaeʻumaʻā ko e pehe ke fakamāu ki ha niʻihi ʻoku ʻikai lotu. Seuke, ko e ʻi ai ha momoʻi lau fakamāu ʻiate kimoutolu, ko e matuʻaki holomui ʻataʻatā ia. Ko e ha ʻoku ʻikai ai te mou fie kataki muʻa ʻa e ngaue taʻetotonu kuo fai mai?”​—1 Kolinitō 6:​1-7.

ʻE ʻi ai nai ha ngaahi tuʻunga ʻe niʻihi, ʻoku fakakau ki ai ʻa e ngaahi hoa taʻetuí, ko e kau fakatau koloa fakaemāmaní, pe ngaahi meʻa fakaemaluʻí, ʻoku ngalingali ʻe fiemaʻu ha fakatonutonu ʻi he fakamaauʻanga fakaemāmaní pe fai ʻe ha kautaha fakapuleʻanga. Ka ʻi he ngaahi taimi lahi tahá, ʻe loto-lelei ange ha tokotaha Kalisitiane ke ne faingataʻaʻia fakaepaʻanga ʻi ha hoko ha fakamā ki he fakatahaʻangá ʻi hono fakaʻilo hono tokouá ko e taʻetotongi ange ʻo ʻene nō.

ʻI he taimi lahi taha ʻe lava ke fakaʻehiʻehi mei he ngaahi tuʻunga faingataʻaʻia lahi. Anga-fēfē? Ki muʻa ke ʻoatu pe kole ha nō mei ha tokoua, ʻai ke fakatokangaʻi ʻa e ngaahi tuʻunga fakatuʻutāmaki ʻe malava ke hokó. Ngāueʻaki ʻa e tokanga mo e fakapotopoto. Sinoemeʻa, ko hoʻomou ngaahi “meʻa ʻe fai,” kau ai mo e ngaahi meʻa fakapisinisí, “fai pe ʻi he ʻofa.”​—1 Kolinitō 16:14.

[Fakamatala ʻi lalo]