Ko e “Isileli oe Otua” mo e “Fuʻu Kakai Lahi”

“Hili ia naʻa ku vakai, pea ta ko e fuʻu kakai lahi, ʻa ia ʻe ʻikai lava ʻe ha taha hono lau.”​—FAKAHĀ 7:9.

 1-3. (a) Ko e hā ʻa e ngaahi ʻamanaki lāngilangi fakahēvani ʻoku maʻu ʻe he kau Kalisitiane paní? (e) Naʻe anga-fēfē ʻa e feinga ʻa Sētane ke fakaʻauha ʻa e fakatahaʻangá ʻi he ʻuluaki senitulí? (f) Ko e hā naʻe hoko ʻi he 1919 ʻo hā ai naʻe ʻikai ke lavameʻa ʻa e ngaahi feinga ʻa Sētane ke fakameleʻi ʻa e fakatahaʻanga Kalisitiane paní?

KO E fokotuʻu ʻo e “Isileli oe Otua” ʻi he 33 T.S. ko ha laka lahi ia ki hono fakakakato ʻa e ngaahi taumuʻa ʻa Sihova. (Kalētia 6:​16, PM) Naʻe maʻu ʻe hono kau mēmipa paní ʻa e ʻamanaki ke hoko ko e ngaahi meʻamoʻui laumālie taʻefaʻamate pea mo pule mo Kalaisi ʻi he Puleʻanga fakahēvani ʻo e ʻOtuá. (1 Kolinitō 15:​50, 53, 54) ʻI he tuʻunga ko iá ʻoku nau taki muʻa ai ʻi hono fakamāʻoniʻoniʻi ʻa e huafa ʻo Sihová mo laiki ʻa e ʻulu ʻo e Fili lahí, ʻa ia ko Sētane ko e Tēvolo. (Sēnesi 3:15; Loma 16:20) ʻOku ʻikai ha ofo ʻi hono fai ʻe Sētane ʻa e meʻa kotoa pē ʻi hono mafaí ke fakaʻauha ʻa e fakatahaʻanga foʻoú ni, fakatouʻosi ʻi hono fakatangaʻi mo e feingaʻi ke fakameleʻi ia!​—2 Tīmote 2:18; Siutasi 4; Fakahā 2:10.

² ʻI he kei moʻui ʻa e kau ʻaposetolo, naʻe ʻikai ke lavameʻa ʻa Sētane. Kae kehe, ʻi he hili ʻo ʻenau maté, naʻe movete ʻa e tafoki mei he moʻoni ʻo ʻikai toe ʻi ai ha taʻofi. Faifai atu pē, ʻi he vakai fakaetangatá, ko e fakatahaʻanga Kalisitiane maʻa naʻe fokotuʻu ʻe Sīsuú naʻe ngalingali fakameleʻi ia ʻi hono ʻomai ʻe Sētane ʻa e fokotuʻutuʻu fakalotu-loi ʻo e tafoki mei he moʻoní kuo ʻiloa ia ʻi he ʻahó ni ko e Puleʻanga-Haʻa-Kalisitiané. (2 Tesalonaika 2:​3-8) Ka neongo ia, naʻe kei tolonga pē ʻa e lotu faka-Kalisitiane moʻoní ia.​—Mātiu 28:20.

³ ʻI he talanoa fakatātā ʻa Sīsū ki he uité mo e teá, naʻe kikiteʻi ai ko e kau Kalisitiane moʻoní ʻe tupu pē ʻi ha vahaʻa taimi fakataha mo e “ngāhi tea,” pe kau Kalisitiane loí; pea naʻe hoko ʻa e meʻá ni. Ka naʻá ne toe pehē foki ʻi he lolotonga ʻo e ngaahi ʻaho fakaʻosí, “ko e fanau ʻo e Puleʻanga” ʻe lava ʻo ʻiloʻi ʻa hono fakamavaheʻí mei he “ngāhi tea.” (Mātiu 13:​36-43) Naʻe fakamoʻoniʻi moʻoni foki ʻeni. ʻI he 1919 naʻe haʻu mei he nofo pōpula ki Pāpiloné ʻa e kau Kalisitiane moʻoni naʻe paní. Naʻe fakapapauʻi kinautolu ʻe he ʻOtua ko e “tamaioeiki agatonu mo boto,” pea naʻa nau ʻalu loto-toʻa ʻo malangaʻi ʻa e ongoongo lelei ʻo e Puleʻangá. (Mātiu 24:​14, 45-47, PM; Fakahā 18:4) Ko e tokolahi taha ʻo kinautolú ko e kau Senitaile; ka koeʻuhi naʻa nau maʻu ʻa e tui ʻa ʻĒpalahame, ko hono moʻoni ko e “hako ʻo Epalahame” ʻa kinautolu. Ko e ngaahi mēmipa ʻo e “Isileli oe Otua.”​—Kalētia 3:​7, 26-29.

Ko e “Fuʻu Kakai Lahi”

 4. Ko e hā ʻa e kulupu ʻo e kau Kalisitiane naʻe hoko ʻo ʻilongá, tautefito ʻi he 1930 tupú?

⁴ ʻUluakí, ko e faʻahinga naʻa nau tali ʻa e malanga ʻa e kau Kalisitiane pani ko ʻení naʻa nau hoko foki ko e kau ʻIsileli fakalaumālie, ʻa e toenga ʻo e toko 144,000, mo ha ʻamanaki fakahēvani. (Fakahā 12:17) Kae kehe, tautefito ki he 1930 tupú, naʻe hoko ʻo ʻilonga ha kulupu kehe ʻe taha. Naʻe fakaʻilongaʻi ʻa e faʻahingá ni ko e “fanga sipi kehe” ʻo e talanoa fakatātā ʻo e ngaahi lotoʻā sipi. (Sione 10:16) Ko e kau ākonga ia ʻa Kalaisi mo e ʻamanaki ʻo e moʻui taʻengata ʻi he māmani palataisí. ʻI he lea fakaefakatātaá, ko e fānau fakalaumālie kinautolu ʻo e kau Kalisitiane pani. (ʻAisea 59:21; 66:22; fakafehoanaki mo 1 Kolinitō 4:​15, 16.) Naʻa nau ʻiloʻi ko e fakatahaʻanga Kalistiane paní ko e tamaioʻeiki anga-tonu mo potó ia, pea hangē pē ko honau ngaahi tokoua paní, naʻa nau maʻu ʻa e ʻofa loloto kia Sihova, tui ki he feilaulau ʻa Sīsū, mo faivelenga ki he fakamālōʻia ʻo e ʻOtua, pea mo loto-lelei ke faingataʻaʻia koeʻuhi ko e māʻoniʻoní.

 5. Kuo anga-fēfē ʻa e hoko ʻo fakalakalaka ʻo mahino lelei ange ai ʻa e tuʻunga ʻo e fanga sipi kehé?

⁵ ʻI he kamataʻangá, naʻe ʻikai ke mahino lelei ʻa e tuʻunga ʻo e fanga sipi kehe ko ʻení, ka ʻi he ʻalu pē ʻa e taimí, naʻe hoko ʻo mahino lelei ange. ʻI he 1932 naʻe fakalototoʻaʻi ai ʻa e kau Kalisitiane paní ke nau faleʻi ʻa e fanga sipi kehe ke nau kau ki he ngāue fakamalangá​—ko ha meʻa naʻe ʻosi fai pē ia ʻe he tokolahi ʻo e fanga sipi kehé. ʻI he 1934 naʻe fakalototoʻaʻi ai ʻa e fanga sipi kehé ke nau papitaiso ʻi he vaí. ʻI he 1935 naʻe ʻiloʻi ai kinautolu mo e “fuʻu kakai lahi” ʻo e Fakahā vahe 7. ʻI he 1938 naʻe fakaafeʻi ai kinautolu ke nau kau ki he Fakamanatu ʻo e pekia ʻa Sīsū Kalaisí ʻa ia ko e kau mamata pē. ʻI he 1950 naʻe ʻilo ai ha kau tangata matuʻotuʻa ʻi honau lotolotongá ʻoku nau kau ki he “houʻeiki [“kau pilinisi,” NW]” ʻoku nau hoko “hange ha fakaū mei he matangi, mo e toitoiʻanga mei he ʻalotamaki.” (Sāme 45:16; ʻAisea 32:1, 2) ʻI he 1953, ko e kautaha ʻi māmani ʻa e ʻOtuá​—ko hono konga lahi ange ʻi he taimi ko iá naʻe faʻuʻaki ia ʻa e fanga sipi kehé​—naʻe sio ki ai ko e kakai tefito ia te nau ʻi he māmani foʻoú. ʻI he 1985 naʻe mahino ai ko e feilaulau huhuʻi ʻa Sīsuú naʻe makatuʻunga ai hono fakahā ʻa e fanga sipi kehe ʻoku nau māʻoniʻoní ko e ngaahi kaumeʻa ʻo e ʻOtua mo e ʻamanaki ʻo e hao moʻui atu ʻi ʻĀmaketoné.

 6. Ko e hā ʻa e ongo tuʻunga felāveʻiʻaki ʻo e kau paní mo e fanga sipi kehé ʻi he ʻaho ní, ko e hā ʻa e ongo fehuʻi ʻoku iku atu ki aí?

⁶ ʻI he taimí ni, ko e konga fakaʻosi ʻeni ʻo e “kuonga fakamui,” ko e tokolahi taha ʻo e toko 144,000 naʻa nau mate pea kuo nau maʻu honau pale fakahēvaní. (2 Tīmote 3:1; Fakahā 6:​9-11; 14:13) ʻOku fai ʻi he taimí ni ʻe he kau Kalisitiane ʻoku nau ʻamanaki ki he māmaní ʻa e lahi taha ʻo e malangaʻi ʻo e ongoongo leleí, pea ʻoku nau lau ia ko ha monū ke poupouʻi ʻa e ngaahi tokoua pani ʻo Sīsuú ʻi he meʻá ni. (Mātiu 25:40) Kae kehe, ko e faʻahinga pani ko ʻeni ko e tamaioʻeiki anga-tonu mo potó ʻa ia ʻoku fakafou mai ai ʻa e meʻakai fakalaumālie kuo ʻomai ʻi he lolotonga ʻo e ngaahi ʻaho fakaʻosí ni. Ko e hā ʻa e tuʻunga ʻo e fanga sipi kehe ʻi hano maʻu kotoa ʻe he kau paní ʻa honau pale fakahēvaní? Ko e hā ʻa e ngaahi tokonaki ʻe fai maʻá e fanga sipi kehé? Ko ha vakai fuonounou ki ʻIsileli ʻo e kuonga muʻá ʻe tokoni ia kiate kitautolu ke tali ʻa e ongo fehuʻi ko iá.

Ko ha “Buleaga oe Kau Taulaeiki” Fakaefakatātā

 7, 8. Ko e hā ʻa e tuʻunga naʻe aʻu ki ai ʻa ʻIsileli ʻo e kuonga muʻá ko ha puleʻanga ʻo e kau taulaʻeiki mo e kakai māʻoniʻoni ʻi he malumalu ʻo e fuakava ʻo e Laó?

⁷ ʻI hono fili ʻe Sihova ʻa ʻIsileli ko hono puleʻanga makehé, naʻá ne fai ha fuakava mo kinautolu ʻo pehē: “Bea koeni, kabau te mou tuitala mooni ki hoku leʻo, o tauhi eku fuakava, te mou iate au koe koloa lelei lahi i he kakai kotoabe: he oku ooku a mamani kotoabe. Bea te mou iate au koe buleaga oe kau taulaeiki, moe kakai maonioni.” (ʻEkisoto 19:​5, 6, PM) Naʻe hoko ʻa ʻIsileli ko e kakai makehe ʻa Sihova ʻo makatuʻunga ʻi he fuakava ʻo e Laó. Ka neongo ia, ʻoku anga-fēfē ʻa hono fakahoko ʻo e talaʻofa ʻo fekauʻaki mo ha puleʻanga ʻo e kau taulaʻeiki mo ha kakai māʻoniʻoni?

⁸ ʻI he anga-tonu ʻa ʻIsilelí, naʻa nau fakamoʻoniʻi ai ʻa e tuʻunga-hau ʻo Sihová pea nau tali ia ko honau Tuʻi. (ʻAisea 33:22) Ko ia, naʻa nau hoko ko ha puleʻanga. Kae hangē ko ia naʻe fakahā ki mui maí, ko e talaʻofa ʻo fekauʻaki mo e “buleaga” ʻe lahi ange ʻa hono ʻuhingá ʻona ia. ʻIkai ko ia pē, ʻi heʻenau talangofua ki he Lao ʻa Sihová, naʻa nau maʻa, ʻo mavahe mei he ngaahi puleʻanga takatakai ʻiate kinautolú. Ko ha kakai māʻoniʻoni kinautolu. (Teutalōnome 7:​5, 6) Naʻa nau hoko ko ha puleʻanga ʻo e kau taulaʻeiki? Sai, ʻi ʻIsileli naʻe fakamavaheʻi ʻa e matakali ʻo Līvai ki he ngāue ʻi he temipalé, pea ʻi he matakali ko iá naʻe ʻi ai ha haʻa taulaʻeiki Līvai. ʻI hono fokotuʻu ʻa e Lao ʻa Mōsese, naʻe fakafetongi ʻa e kau tangata Līvaí mo e ʻuluaki fānau ʻa e fāmili kotoa pē naʻe ʻikai ko ha Līvaí.a (ʻEkisoto 22:29; Nōmipa 3:​11-16, 40-51) Ko ia, naʻe hangē ko e fāmili kotoa pē ʻi ʻIsilelí, naʻe fakafofongaʻi ʻi he ngāue ʻi he temipalé. Ko e tuʻunga ofi taha pē ia naʻe aʻu ki ai ʻa e puleʻangá ke hoko ko ha haʻa taulaʻeikí. Ka neongo ia, naʻa nau fakafofongaʻi ʻa Sihova ʻi he ʻao ʻo e ngaahi puleʻangá. Ko ha tokotaha muli naʻe loto ke lotu ki he ʻOtua moʻoní naʻe totonu ke fai pehē ʻi heʻene feohi mo ʻIsilelí.​—2 Kalonikali 6:​32, 33; ʻAisea 60:10.

 9. Ko e hā naʻe tupunga ai ʻa hono talitekeʻi ʻe Sihova ʻa e puleʻanga tokelau ko Isilelí ‘mei heʻene taulaʻeiki kiate ia’?

⁹ ʻI he hili ʻa e mate ʻa Solomoné, naʻe mavahe ʻa e kakai ʻa e ʻOtua ki he puleʻanga ki he tokelau ko ʻIsilelí ʻia Tuʻi Selopoame pea ko e puleʻanga ki he tonga ko Siuta ʻia Tuʻi Lehopoame. Koeʻuhi ko e temipalé, ʻa e senitā ʻo e lotu maʻá, naʻe ʻi he feituʻu ia ʻo Siutá, naʻe fokotuʻu ʻe Selopoame ha founga-lotu taʻefakalao ʻaki hono fokotuʻu ha ʻīmisi ʻo ha ngaahi ʻuhikiʻi pulu ʻi he fonua ʻo hono puleʻangá. ʻIkai ko ia pē, “pea ne ngaohi fale ʻi he ngaahi sia, ʻo ne fokotuʻu taulaʻeiki mei he kakai kotoa pe ʻo aʻu ki he kimui, ʻa kinautolu naʻe ʻikai kau ki haʻa Livai.” (1 Tuʻi 12:31) Naʻe loloto ange ʻa e kau atu ʻa e puleʻanga tokelau ki he lotu loí ʻi hono fakaʻatā ʻe Tuʻi ʻĒhapi ʻa hono uaifi mulí, ko Sisipelí, ke fokotuʻu ʻa e lotu Peali ʻi he fonuá. Faifai atu pē, naʻe fakahā ʻe Sihova ʻa e fakamaaú ki he puleʻanga angatuʻú. Naʻá ne pehē ʻo fakafou ʻia Hōsea: “ʻOku fakaʻauha hoku kakai ko e masiva poto; he ko koe kuo ke fakataleʻi ʻa e poto, ko ia te u fakataleʻi koe mei hoʻo taulaʻeiki kiate au.” (Hōsea 4:6) Pea ʻosi ia ʻo taimi siʻi, naʻe fakaʻauha ʻe he kau ʻAsīlia ʻa e puleʻanga ki he tokelau ʻo ʻIsilelí.

10. ʻI heʻenau anga-tonú, naʻe anga-fēfē ʻa hono fakafofongaʻi ʻa Sihova ʻe he puleʻanga ki he tonga ko Siutá, ki he ʻao ʻo e ngaahi puleʻangá?

¹⁰ Naʻe fēfē ʻa e puleʻanga ki he tonga ʻa ia ko Siutá? ʻI he ʻaho ʻo Hesekaiá, naʻe pehē ʻe Sihova kiate kinautolu ʻo fakafou ʻia ʻAisea: “Ko kimoutolu ʻa e kau fakamoʻoni aʻaku, . . . mo e sevaniti aʻaku kuo u fili: . . . ko e kakai kuo u ngaohi maʻaku, te nau aʻau hoku fakamalo.” (ʻAisea 43:​10, 21; 44:21) ʻI he tauhi anga-tonu ʻa e puleʻanga ki he tongá, naʻe fanongonongo ki he ngaahi puleʻanga ʻa e lāngilangi ʻo Sihová mo tohoaki ʻa e faʻahinga loto-totonu ke lotu kiate ia ʻi hono temipalé mo hono tauhi kinautolu ʻe he haʻa taulaʻeiki Līvai totonú.

Kau Muli ʻi ʻIsilelí

11, 12. Tala mai ʻa e kau muli ʻe niʻihi naʻa nau ngāue kia Sihova ʻi he feohi mo ʻIsilelí.

¹¹ Ko e kau muli naʻa nau tali ʻa e fakamoʻoni fakafonua ko ʻení, naʻe ʻi ai ʻa e tokonaki maʻanautolu ʻi he Lao naʻe foaki fakafou ʻia Mōsese​—ʻa ia ko hono uaifi ko Sīpola ko ha Mitiani ia. Ko e “koto faʻahinga kakai” naʻe ʻikai ko e kau ʻIsileli naʻa nau ʻalu mei ʻIsipite mo e kau ʻIsilelí pea naʻa nau ʻi ai ʻi hono foaki ʻa e Laó. (ʻEkisoto 2:​16-22; 12:38; Nōmipa 11:4) Naʻe fakahaofi ʻa Lēhapi mo hono fāmilí mei Sielikō pea ki mui maí naʻe tali kinautolu ʻi he fakatahaʻanga Siú. (Siōsiua 6:​23-25) Pea ʻosi ia ʻo taimi siʻi, naʻe fakamelino ʻa e kau Kipioné mo ʻIsileli pea naʻe vaheʻi kiate kinautolu ʻa e ngaahi ngāue ʻo fekauʻaki mo e tāpanekalé.​—Siōsiua 9:​3-27; sio foki ki he 1 Tuʻi 8:​41-43; ʻĒseta 8:17.

¹² Faifai atu pē, pea naʻe ngāue ʻa e kau muli ʻi he ngaahi lakanga māʻolungá. Ko ʻUlaia ko e Heti ia, ʻa e husepāniti ʻo Patisepá naʻe ʻi he lotolotonga ʻo e “kau helo” ʻa Tēvita ʻo hangē ko Seleti ko e ʻĀmoní. (1 Kalonikali 11:​26, 39, 41; 2 Sāmiuela 11:​3, 4) Ko ʻEpi-meleki, ko ha ʻItiōpea, naʻe ngāue ʻi he palasí pea naʻe ʻatā ke ne ʻalu ki he tuʻí. (Selemaia 38:​7-9) ʻI he hili ʻa e toe foki ʻa ʻIsileli mei he nofo pōpula ʻi Pāpiloné, ko e kau Netinimi naʻe ʻikai ko ha kau ʻIsilelí naʻe fakalahi atu ʻa e fatongia kiate kinautolu ʻi he tokoni ki he kau taulaʻeikí. (ʻĒsela 7:24) Koeʻuhi ko e niʻihi ʻo e kau muli anga-tonu ko ʻení, pe kau nofo mulí, ʻoku vakai ki ai ko e tomuʻa fakatātaaʻi ia ʻo e fuʻu kakai lahi ʻi he ʻaho ní, ko honau tuʻunga ʻoku mahuʻinga ia kiate kitautolu.

13, 14. (a) Ko e hā ʻa e ngaahi monū mo e ngaahi fatongia ʻo e kau ului ʻi ʻIsilelí? (e) Ko e hā ʻa e vakai naʻe tonu ke ʻi he kau ʻIsilelí ki he kau ului anga-tonú?

¹³ Ko e faʻahinga ko ia naʻa nau uluí, ko e kau lotu fakatapui ʻo Sihova ʻi he malumalu ʻo e Lao ʻa Mōsesé ʻa ia naʻe fakamavaheʻi kinautolu mei he ngaahi puleʻanga fakataha mo e kau ʻIsilelí. (Livitikō 24:22) Naʻa nau ʻoatu ʻa e ngaahi feilaulau, fakaʻehiʻehi mei he lotu loí, mo fakaʻehiʻehi mei he totó, ʻo hangē pē ko ia naʻe fai ʻe he kau ʻIsilelí. (Livitikō 17:​10-14; 20:2) Naʻa nau tokoni ʻi hono langa ʻo e temipale ʻo Solomoné mo kau ʻi hono toe fakafoki ʻo e lotu moʻoní ʻi he malumalu ʻo Tuʻi ʻAsa mo Tuʻi Hesekaiá. (1 Kalonikali 22:2; 2 Kalonikali 15:​8-14; 30:25) ʻI hono ngāueʻaki ʻe Pita ʻa e ʻuluaki kī ʻo e Puleʻangá ʻi he Penitekosi 33 T.S., naʻe ongona ʻene ngaahi leá ʻe he kau “Siu moʻoni mo e kau ului [ʻikai ko ha Siu].” Mahalo pē ko e niʻihi ʻo e toko tolu afe naʻa nau papitaiso ʻi he ʻaho ko iá ko e kau ului kinautolu. (Ngāue 2:​10, 41) Taimi siʻi pē mei ai, naʻe papitaiso ha tokotaha ului mei ʻItiōpea ʻe Filipe​—ki muʻa ke ngāueʻaki ʻe Pita ia ʻa e kī fakaʻosi ʻo e Puleʻangá ʻia Koliniusi mo hono fāmilí. (Mātiu 16:19; Ngāue 8:​26-40; 10:​30-48) ʻOku hā mahino, ko e kau uluí naʻe ʻikai ke lau kinautolu ko e kau Senitaile.

¹⁴ Ka neongo ia, ko e tuʻunga ʻo e kau ului ʻi he fonua ʻo ʻIsilelí naʻe ʻikai ke tatau ia mo e kau ʻIsileli totonú pē. Naʻe ʻikai ke hoko ʻa e kau uluí ia ko e kau taulaʻeiki, pea ko ʻenau ʻuluaki tamá naʻe ʻikai ke fakafofongaʻi ia ʻi he haʻa taulaʻeiki Līvaí.b Pea naʻe ʻikai ha tofiʻa ʻi he kelekelé ʻa e kau ului ʻi ʻIsilelí. Ka neongo iá, naʻe tuʻutuʻuni ki he kau ʻIsileli ke nau fakaʻatuʻi ʻa e kau ului anga-tonú mo lau kinautolu ko e ngaahi tokoua.​—Livitikō 19:​33, 34.

Ko e Puleʻanga Fakalaumālie

15. Ko e hā ʻa hono ola ʻi he fakafisi ʻa ʻIsileli totonu ke tali ʻa e Mīsaia?

¹⁵ Naʻe faʻu ʻa e Laó ia ke tauhi ʻa ʻIsileli ke maʻa, mavahe mei he ngaahi puleʻanga takatakai kiate kinautolu. Ka naʻe ʻi ai hano taumuʻa ʻe taha. Naʻe tohi ʻe he ʻaposetolo ko Paulá: “Ko e Lao ko hota fakaleʻo maʻa Kalaisi, kae fakatonuhia kitaua mei he tui.” (Kalētia 3:24) Ko e meʻa pangó, ko e tokolahi taha ʻo e kau ʻIsileli naʻe ʻikai te nau fakaʻatā ke taki atu kinautolu ʻe he Laó kia Kalaisi. (Mātiu 23:15; Sione 1:11) Ko ia naʻe talitekeʻi ʻe Sihova ko e ʻOtua ʻa e puleʻanga ko iá peá ne ʻai ke fānauʻi ʻa e “Isileli oe Otua.” ʻIkai ko ia pē, naʻe aʻu ki he faʻahinga naʻe ʻikai ko e kau Siú ʻa e fakaafe ke hoko ko e tangataʻifonua kakato ʻi he ʻIsileli foʻou ko ʻení. (Kalētia 3:28; 6:​16, PM) ʻI he puleʻanga foʻou ko ʻení ko e talaʻofa ia ʻa Sihova ʻi he ʻEkisoto 19:​5, 6 ʻo fekauʻaki mo ha haʻa taulaʻeiki fakatuʻi ʻe fakaofo ʻa hono fakahoko fakaʻosí. ʻO fēfē?

16, 17. ʻI he ʻuhinga fē ko e kau Kalisitiane pani ʻi māmaní ʻoku tuʻunga “fakatuʻi”? ko ha “tuʻunga taulaʻeiki”?

¹⁶ Naʻe lave ʻa Pita ki he ʻEkisoto 19:6 ʻi heʻene tohi ki he kau Kalisitiane pani ʻi hono ʻahó: “Ko kimoutolu ko e haʻa fili, ko e tuʻunga taulaʻeiki fakatuʻi, ko e kakai tapu, ko e faʻahinga ʻoku maʻane meʻa tonu.” (1 Pita 2:9) ʻOku ʻuhinga ʻeni ki he hā? Ko e ngaahi tuʻí ʻa e kau Kalisitiane pani ʻi māmaní? ʻIkai, ko honau tuʻunga-tuʻí ʻoku kei ʻi he kahaʻu. (1 Kolinitō 4:8) Ka neongo iá, ʻoku nau ʻi he tuʻunga “fakatuʻi” ʻi he ʻuhinga kuo fili kinautolu ki he ngaahi monū fakatuʻi ʻi he kahaʻú. Naʻa mo e taimí ni ko ha puleʻanga kinautolu ʻi he malumalu ʻo e tuʻi ko Sīsuú, naʻe fakanofo ʻe he Hau Fakaleveleva, ko Sihova ko e ʻOtuá. Naʻe tohi ʻe Paula: “ʻA ʻene ʻAfio [Sihova] naʻa ne hamusi kitautolu mei he pule ʻa Poʻuli, mo ne hiki kitautolu ki he puleʻanga ʻo hono ʻAlo ʻOfaʻanga.”​—Kolose 1:13.

¹⁷ Ko ha haʻa taulaʻeiki ʻa e kau Kalisitiane pani ʻi māmaní? ʻI ha ʻuhinga, ʻio. ʻI hono tuʻunga ko ha fakatahaʻangá, ʻoku nau fai ha ngāue fakataulaʻeiki ʻo ʻikai toe fehuʻia. Naʻe fakamatala ʻeni ʻe Pita ʻi heʻene pehē: “Ke langa hake kimoutolu . . . moʻo fale fakalaumalie; ke mou hoko ko e tuʻunga taulaʻeiki tapu.” (1 Pita 2:5; 1 Kolinitō 3:16) ʻI he ʻahó ni, ko e kulupu ʻo e toenga ʻo e kau Kalisitiane paní ʻoku nau hoko ko e “tamaioeiki agatonu mo boto,” ʻoku fakafou mai ai hono tufaki ʻa e meʻakai fakalaumālie. (Mātiu 24:​45-47, PM) Naʻe hangē pē ko ia ʻi ʻIsileli ʻo e kuonga muʻá, ka ʻi ai ha taha ʻokú ne fie lotu kia Sihova ʻe malava pē ia ʻi heʻene feohi mo e kau Kalisitiane pani ko ʻení.

18. ʻI he tuʻunga haʻa taulaʻeikí, ko e hā ʻa e fatongia tefito ʻo e fakatahaʻanga Kalisitiane paní ʻi māmani?

¹⁸ Pehē foki, naʻe fetongi ʻe he kau Kalisitiane paní ʻa ʻIsileli ʻi hono maʻu ʻa e monū ʻo e fai fakamoʻoni ki he tuʻu-ki-muʻa ʻa Sihova ʻi he lotolotonga ʻo e ngaahi puleʻangá. ʻOku hā ʻi hono potutohí ʻi hono ui ʻe Pita ʻa e kau Kalisitiane pani ko ha haʻa taulaʻeiki fakatuʻí, naʻá ne fakakaukau ki he ngāue fakamalangá. Ko e moʻoni, naʻá ne fakatahaʻi ʻi ha kupuʻi lea ʻa e talaʻofa ʻa Sihova ʻi he ʻEkisoto 19:6 mo ʻEne ngaahi lea ki ʻIsileli ʻi he ʻAisea 43:21 ʻi heʻene pehē: “Ka ko kimoutolu . . . ko e tuʻunga taulaʻeiki fakatuʻi, . . . koeʻuhiā ke mou ongoongoa atu ʻa e ngaahi lelei ʻo ʻEne ʻAfio, ʻa ia naʻa ne ui mai kimoutolu mei he poʻuli ki he maama fakaofo aʻana.” (1 Pita 2:9) ʻI he fetāiaki mo e meʻá ni, naʻe lea ʻa Paula ki he fanongonongo ʻa e ngaahi lāngilangi ʻo Sihová ʻoku hangē ko ha feilaulau ʻi he temipalé. Naʻá ne tohi: “Ko ia ke tau ʻatu ʻiate ia [Sīsū] pe, maʻu ai pe, ha feilaulau fakafetaʻi ki he ʻOtua, ʻa é ko e fua ʻo e loungutu ʻoku takua hono huafa.”​—Hepelū 13:15.

Ko ha Fakahoko Fakahēvani

19. Ko e hā ʻa e fakahoko fakaʻosi fisifisimuʻa ʻo e talaʻofá ʻa ia ko ʻIsileli ʻe hoko ko ha puleʻanga ʻo e kau taulaʻeikí?

¹⁹ Kae kehe, ʻe toki fakahoko lāngilangiʻia ange ʻa e ʻEkisoto 19:​5, 6. ʻI he tohi Fakahā, ʻoku fanongo ai ʻa e ʻaposetolo ko Sioné ki he ngaahi meʻamoʻui fakahēvaní ʻoku nau ngāueʻaki ʻa e konga tohi ko ʻeni ʻi heʻenau fakahīkihikiʻi ʻa Sīsū naʻe toetuʻú: “He naʻa ke mate tamateʻi pea naʻa ke fakatau kakai maʻa e ʻOtua ʻaki ho taʻataʻa mei he matakali fulipē mo e lea, mo e faʻahinga mo e puleʻanga; pea naʻa ke ngaohi kinautolu ko e puleʻanga mo e ngaahi taulaʻeiki: Pea te nau Hau ʻi mamani.” (Fakahā 5:​9, 10) ʻI hono ʻuhinga fakaʻosí, ko e haʻa taulaʻeiki fakatuʻí ko e Puleʻanga fakahēvani ai pē ia ʻo e ʻOtuá, ko e mafai ʻo e pulé ia ʻa ia naʻe akoʻi kitautolu ʻe Sīsū ke tau lotu ʻakí. (Luke 11:2) Ko e toko 144,000 kotoa ʻo e kau Kalisitiane pani ʻe kātaki anga-tonu ki he maté te nau kau ʻi he fokotuʻutuʻu ʻo e Puleʻanga ko iá. (Fakahā 20:​4, 6) Ko ha fakahoko fakaofo ē ʻo e talaʻofa naʻe fai ʻi he taimi fuoloa ki muʻa ʻo fakafou ʻia Mōsesé!

20. Ko e hā ʻa e fehuʻi ʻoku kei toe ke talí?

²⁰ Ko e hā ʻa e kaunga ʻo e ngaahi meʻá ni kotoa mo e tuʻunga ʻo e fuʻu kakai lahí mo honau kahaʻú ʻi hono maʻu ʻe he kau paní hono kotoa ʻa honau tofiʻa fakaofó? ʻE hoko ʻo mahino ange ʻi he kupu fakaʻosi ʻo e ngaahi fakahokohoko ko ʻení.

[Fakamatala ʻi lalo]

ʻE Lava ke Ke Fakamatalaʻi?

◻ Kuo anga-fēfē ʻa e hoko ʻo fakalakalaka ʻa e mahino lelei ange ʻa e tuʻunga ʻo e fanga sipi kehé?

◻ Ko e hā naʻe talitekeʻi ai ʻe Sihova ʻa e puleʻanga ki he tokelau ko ʻIsilelí mei heʻene hoko ko ha taulaʻeiki kiate ia?

◻ ʻI he anga-tonú, ko e hā ʻa e tuʻunga ʻo Siuta ʻi he ʻao ʻo e ngaahi puleʻangá?

◻ Ko e hā ʻa e tuʻunga ʻo e kau ului anga-tonu ʻi ʻIsilelí?

◻ ʻOku anga-fēfē ʻa e hoko ʻa e fakatahaʻanga paní ko ha puleʻanga ʻo e kau taulaʻeikí?

[Fakatātā ʻi he peesi 14]

Ko e haʻa taulaʻeiki fakatuʻí, ko e kau Kalisitiane paní ʻoku nau fanongonongo ʻa e lāngilangi ʻo Sihová ʻi māmani