Ko e Kau Fakamoʻoni Kalisitiane ki he Tuʻunga-Hau ʻo e ʻOtuá
“Ke mou ongoongoa atu ʻa e ngaahi lelei ʻo ʻEne ʻAfio, ʻa ia naʻa ne ui mai kimoutolu mei he poʻuli ki he maama fakaofo aʻana.”—1 PITA 2:9.
1. Ko e hā ʻa e fakamoʻoni ola lelei naʻe fai ʻo fekauʻaki mo Sihova ʻi he taimi ki muʻa ʻi he Kalisitiané?
ʻI HE taimi ki muʻa ʻi he Kalisitiané, ko ha fakahokohoko lōloa ʻo e kau fakamoʻoní naʻa nau fakamoʻoni loto-toʻa ko Sihová ko e ʻOtua moʻoní pē ia. (Hepelū 11:4–12:1) Naʻa nau mālohi ʻi heʻenau tuí, naʻa nau talangofua taʻemanavahē ki he ngaahi lao ʻa Sihová pea fakafisi ke fakangaloku ʻi he ngaahi meʻa fekauʻaki mo e lotú. Naʻa nau fai ha fakamoʻoni mālohi ki he tuʻunga-hau fakaleveleva ʻo Sihová.—Sāme 18:21-23; 47:1, 2.
2. (a) Ko hai ʻa e Fakamoʻoni lahi taha ʻa Sihová? (e) Ko hai naʻá ne fetongi ʻa e puleʻanga ʻo ʻIsilelí, ʻi he tuʻunga ko e fakamoʻoni ʻa Sihová? ʻOku anga-fēfē ʻetau ʻilo iá?
2 Ko e fakamoʻoni fakamuimui mo lahi taha ki muʻa ʻi he Kalisitiané ko Sione Papitaiso. (Mātiu 11:11) Naʻá ne maʻu ʻa e monū ke fanongonongo ʻa e haʻu ʻa e Tokotaha kuo Filí, pea naʻá ne fakafeʻiloaki ʻa Sīsū ko e Mīsaia ia naʻe talaʻofá. (Sione 1:29-34) Ko Sīsuú ko e Fakamoʻoni lahi taha ia ʻa Sihová, “ko e Fakamoʻoni Falalaʻanga mo Moʻoni.” (Fakahā 3:14) Koeʻuhi naʻe talitekeʻi ʻe ʻIsileli fakaekakanó ʻa Sīsū, naʻe talitekeʻi ai kinautolu ʻe Sihova pea fakanofo ha puleʻanga foʻou, ko e ʻIsileli fakalaumālie ʻo e ʻOtuá, ke hoko ko ʻene fakamoʻoni. (ʻAisea 42:8-12; Sione 1:11, 12; Kalētia 6:16) Naʻe lave ʻa Pita ki ha kikite ʻo fekauʻaki mo ʻIsileli mo fakahā naʻe kaunga ia “ki he haʻa Isileli faka-ʻOtua,” ko e fakatahaʻanga Kalisitiané, ʻi heʻene pehē: “Ka ko kimoutolu ko e haʻa fili, ko e tuʻunga taulaʻeiki fakatuʻi, ko e kakai tapu, ko e faʻahinga ʻoku maʻane meʻa tonu, koeʻuhiā ke mou ongoongoa atu ʻa e ngaahi lelei ʻo ʻEne ʻAfio, ʻa ia naʻá ne ui mai kimoutolu mei he poʻuli ki he maama fakaofo aʻana.”—1 Pita 2:9; ʻEkisoto 19:5, 6; ʻAisea 43:21; 60:2.
3. Ko e hā ʻa e fatongia tefito ʻo e ʻIsileli ʻo e ʻOtuá mo e “fuʻu kakai lahi”?
3 ʻOku fakahā ʻe he ngaahi lea ʻa Pitá ko e fatongia tefito ʻo e ʻIsileli ʻo e ʻOtuá ko e fai ha fakamoʻoni fakahāhā ʻo fekauʻaki mo e lāngilangi ʻo Sihová. ʻI hotau ʻahó ni kuo kau mo e puleʻanga fakalaumālie ko ʻení ʻa e “fuʻu kakai lahi” ʻo e kau fakamoʻoni ʻoku nau toe fakalāngilangiʻi fakahāhā ʻa e ʻOtuá. Naʻa nau kalanga leʻo lahi ke ongoʻi ʻe he tokotaha kotoa pē: “Ko hotau fakamoʻui ʻoku mei hotau ʻOtua, ʻa ia ʻoku ʻafio ʻi he taloni, pea mei he Lami.” (Fakahā 7:9, 10; ʻAisea 60:8-10) ʻOku lava fēfē ʻe he ʻIsileli ʻo e ʻOtuá mo hono takangá ke lavaʻi ʻenau faifakamoʻoní? ʻAki ʻenau tuí mo e talangofuá.
Kau Fakamoʻoni Loí
4. Ko e hā ʻa e ʻuhinga naʻe fakamoʻoni loi ai ʻa e kau Siú ʻi he ʻaho ʻo Sīsuú?
4 ʻOku kau ki he tuí mo e talangofuá ʻa e moʻuiʻaki ʻo e ngaahi tefitoʻi moʻoni mei he ʻOtuá. Ko e mahuʻinga ʻo e meʻa ko ʻení ʻoku hā ia ʻi he meʻa naʻe leʻaʻaki ʻe Sīsū ʻo fekauʻaki mo e kau taki lotu Siu ʻi hono ʻahó. Ko e faʻahingá ni naʻa “nau maʻu ʻa e tuʻunga ʻo Mosese” ko e kau faiako ʻo e Laó. Naʻa mo ʻenau fekau atu ha kau misinale ke fakaului ʻa e kau taʻetuí. Ka neongo ia, naʻe pehē ʻe Sīsū kiate kinautolu: “ʻOku mou foli ʻa e tahi mo e fonua ke fakatafoki ha toko taha; pea ʻo ka tafoki ia, ʻoku ne hoko ʻi hoʻomou ngaue ko e tama ta tuʻo ua ʻa Heli ʻiate kimoutolu.” Ko e kau lotu ko ʻení ko e kau fakamoʻoni loi—fie ʻeiki, mālualoi, mo taʻeʻofa. (Mātiu 23:1-12, 15) ʻI he taimi ʻe taha, naʻe pehē ai ʻe Sīsū ki he kau Siu ʻe niʻihi: “Ko e tamai kuo mou tupu mei ai ko e Tevolo, pea ko e ngaahi manako ʻo hoʻomou tamai ʻoku mou loto ke fai.” Ko e hā naʻá ne leaʻaki ai ha meʻa pehē ki he ngaahi mēmipa ʻo e kakai fili ʻa e ʻOtua? Koeʻuhi he naʻe ʻikai te nau tokanga ki he ngaahi lea ʻa e Fakamoʻoni lahi taha ʻa Sihová.—Sione 8:41, 44, 47.
5. ʻOku tau ʻilo fēfē kuo fai ʻe he Puleʻanga-Haʻa-Kalisitiané ʻa e fakamoʻoni loi ʻo fekauʻaki mo e ʻOtuá?
5 ʻI ha founga meimei tatau, ʻi he lolotonga ʻa e ngaahi senituli talu mei he taimi ʻo Sīsuú, ko e laui teau miliona ʻi he Puleʻanga-Haʻa-Kalisitiané kuo nau taukaveʻi ko ʻene kau ākonga kinautolu. Kae kehe, naʻe ʻikai te nau fai ʻa e finangalo ʻo e ʻOtua, pea ko ia ʻoku ʻikai ʻiloʻi kinautolu ia ʻe Sīsū. (Mātiu 7:21-23; 1 Kolinitō 13:1-3) Kuo fekau atu ʻe he Puleʻanga-Haʻa-Kalisitiané ʻa e kau misinale, ʻoku pau ko e tokolahi ʻo kinautolu naʻe loto-totonu. Ka, naʻa nau akoʻi ʻa e kakaí ke lotu ki ha ʻotua faka-Tolu-Tahaʻi-ʻOtua ʻokú ne tutu ʻa e kau angahalá ʻi ha afi ko heli, pea ko e tokolahi ʻo honau kau uluí ʻoku ʻikai te nau fakahā ʻa e fakamoʻoni ʻo e hoko ko e kau Kalisitiané. Ko e fakatātaá, ko e fonua ʻi ʻAfilika ko Luanitā naʻe hoko ko ha feituʻu naʻe lelei ai ʻa e ngāue ʻa e kau misinale Katolika Lomá. Ka, ʻoku kei kau ʻaufuatō pē ʻa e kau Katolika ʻi Luanitā ʻi he tau fakaematakali ki mui mai ʻi he fonua ko iá. Ko e fua ʻoku hā mei he ngāue ʻa e kau misinalé naʻe ʻikai ke maʻu ai ʻa e fakamoʻoni faka-Kalisitiane moʻoní mei he Puleʻanga-Haʻa-Kalisitiané.—Mātiu 7:15-20.
Moʻuiʻaki ʻa e Ngaahi Tefitoʻi Moʻoni ʻa e ʻOtuá
6. Ko e hā ʻa e ngaahi founga ʻoku hoko ai ʻa e ʻulungaanga totonú ko ha konga mahuʻinga ʻaupito ia ʻo e fai ha fakamoʻoni?
6 Ko e ʻulungaanga kovi ʻa kinautolu ʻoku nau taku ko e kau Kalisitiané ʻoku hoko ai ha luma ki he “hala ʻo e moʻoni.” (2 Pita 2:2) Ko ha Kalisitiane moʻoni ʻokú ne moʻui ʻo fakatatau mo e ngaahi tefitoʻi moʻoni mei he ʻOtuá. ʻOku ʻikai te ne kaihaʻa, loi, kākā, pe moʻui taʻetaau. (Loma 2:22) Kuo pau ʻe ʻikai te ne fakapoongi hono kaungāʻapí. Ko e ngaahi husepāniti Kalisitiané ke nau tauhi anga-ʻofa honau ngaahi fāmilí. ʻOku poupouʻi anga-fakaʻapaʻapa ʻe he ngaahi uaifí ʻa e tauhi ko iá. Kuo akoʻi ʻa e fānaú ʻe heʻenau mātuʻá pea teuteuʻi ai ke hoko ko e kau Kalisitiane lalahi ʻoku malava ʻo fua fatongia. (ʻEfesō 5:21–6:4) Ko e moʻoni, ko kitautolu hono kotoa ʻoku tau taʻehaohaoa pea fai ʻa e ngaahi fehālaaki. Ka ko ha Kalisitiane moʻoni, ʻokú ne tokaʻi ʻa e ngaahi tuʻunga ʻi he Tohitapú mo fai ha feinga moʻoni ke ngāueʻaki kinautolu. ʻOku ʻilo ʻeni ʻe he niʻihi kehé pea ʻoatu ai ha fakamoʻoni lelei. ʻI he taimi ʻe niʻihi, ko kinautolu naʻa nau fakafepakiʻi ki muʻa ʻa e moʻoní kuo nau fakatokangaʻi ʻa e ʻulungaanga totonu ʻo ha Kalisitiane pea kuo ikunaʻi mai ia.—1 Pita 2:12, 15; 3:1.
7. ʻOku fēfē ʻa e mahuʻinga ʻo e feʻofaʻaki ʻa e kau Kalisitiané?
7 Naʻe fakahā ʻe Sīsū ʻa e tafaʻaki mahuʻinga ʻaupito ʻo e ʻulungaanga faka-Kalisitiané ʻi heʻene pehē: “Ko e meʻa ko e ʻe ʻilo ai ʻe he kakai kotoa pē ko e kau ako kimoutolu aʻaku, ʻo kapau ʻe ai haʻamou feʻofaʻaki.” (Sione 13:35) ʻOku ʻulungaangaʻaki ʻe he māmani ʻo Sētané ʻa e “taemaonioni kotoabe, mo e feauaki, moe agakovi, moe manumanu, moe fakafajifaji; o fonu i he meheka, moe fakabo, moe feiteitani, moe kākā, moe fajituu; Koe kau fefanafanahi kovi, moe kau fakakovi, moe kau fehia ki he Otua, moe fakamalohi, moe laukau, moe kau bolebole, moe kau fakatubu oe gaahi mea kovi, moe talagataa ki he mātua.” (Loma 1:29, 30, PM) ʻI ha ʻātakai pehē, ko ha kautaha ʻi māmani lahi ʻoku ʻulungaangaʻaki ʻa e ʻofá ko e fakamoʻoni mālohi ia ʻo e ngāue ʻa e laumālie ʻo e ʻOtuá—ko ha fakamoʻoni ola lelei. Ko e Kau Fakamoʻoni ʻa Sihová ʻoku faʻu ʻaki ʻa e kautaha peheé.—1 Pita 2:17.
Ko e Kau Fakamoʻoní ko e Kau Ako ʻo e Tohitapu
8, 9. (a) Naʻe anga-fēfē ʻa hono fakatupu-ongoʻimālohi ʻa e tokotaha-tohi-sāmé ʻi heʻene ako mo fakalaulauloto ki he Lao ʻa e ʻOtuá? (e) Ko e hā ʻa e ngaahi founga ʻe fakatupu-ongoʻimālohi ai kiate kitautolu ʻa e ako mo fakalaulauloto ʻo e Tohitapú ke hanganaki fai ha fakamoʻoni?
8 Ke lavameʻa ʻi hono fai ha fakamoʻoni leleí, ko ha Kalisitiane kuo pau ke ne ʻilo mo ʻofa ki he ngaahi tefitoʻi moʻoni māʻoniʻoni ʻa Sihová mo fehiʻa moʻoni ki he tuʻunga fulikivanu ʻo e māmaní. (Sāme 97:10) ʻOku fakaoloolo ʻa e māmaní ʻi hono poupouʻi ʻa ʻene fakakaukaú pē, pea ko hono laumālié ʻe lava ke faingataʻa ke talitekeʻi. (ʻEfesō 2:1-3; 1 Sione 2:15, 16) Ko e hā ʻe lava ke tokoni kiate kitautolu ke tauhi maʻu ʻa e fakakaukau totonú? Ako tuʻumaʻu mo mohu ʻuhinga ʻa e Tohitapú. Ko e tokotaha-tohi ʻo e Sāme 119 naʻá ne toutou leaʻaki tuʻo lahi ʻene ʻofa ki he Lao ʻa Sihová. Naʻá ne lau ia mo fakalaulauloto maʻu pē ki ai, “he ʻaho kotoa.” (Sāme 119:92, 93, 97-105) Ko hono olá, ʻoku lava ke ne tohi: “Ko e loi—ʻoku ou fehiʻa mo fakaliliʻa ki ai: Ka ko hoʻo lao ʻoku ou ʻofaʻi.” ʻIkai ko ia pē, naʻe ueʻi ia ʻe heʻene ʻofa lolotó ke ne fai ha meʻa. ʻOkú ne pehē: “Tuʻo fitu ʻi he ʻaho ʻoku ou hiki hoʻo fakafetaʻi; koeʻuhi ko hoʻo konisitutone maʻoniʻoni.”—Sāme 119:163, 164.
9 ʻI ha founga meimei tatau, ko ʻetau ako tuʻumaʻu ʻa e Folofola ʻa e ʻOtuá mo fakalaulauloto ki aí ʻe maongo ai ki hotau lotó pea ueʻi ai kitautolu ke ‘fakafetaʻi kiate ia’—fakamoʻoni ʻo fekauʻaki mo Sihova—ʻo tuʻo lahi, naʻa mo e “tuʻo fitu ʻi he ʻaho.” (Loma 10:10) ʻI he fetāiaki mo e meʻá ni, ʻoku pehē ai ʻe he tokotaha-tohi ʻo e ʻuluaki sāmé ko e tokotaha ʻoku fakalaulauloto maʻu pē ki he ngaahi lea ʻa Sihová “te ne hange ia ha ʻakau kuo to ki he ngaahi mangaʻi vai, ʻa ia ʻoku ne fua ʻi hono toʻukai, ko hono lau foki ʻoku ʻikai mae; pea neongo pe ko e ha ʻoku ne fai ʻoku ne monuʻia pe.” (Sāme 1:3) Naʻe toe fakahā foki ʻe he ʻaposetolo ko Paulá ʻa e mālohi ʻo e Folofola ʻa e ʻOtuá he naʻá ne tohi: “Ko e potu Folofola kotoa pe ne fakamanava mei he ʻOtua, ʻoku ʻaonga foki ki he akonaki, ki he fakaʻilo hala, ki he fakatonutonu, ki he ngaohia ke maʻoniʻoni; koeʻuhiā ke tuʻu kakato ʻa e tangata fakaʻotua, kuo ʻosi sāuni ki he ngāue lelei fulipe.”—2 Tīmote 3:16, 17.
10. Ko e hā ʻoku hā mahino ʻo fekauʻaki mo e kakai ʻa Sihová ʻi he ngaahi ʻaho fakaʻosí ni?
10 Ko e tupu vave ʻa e tokolahi ʻo e kau lotu moʻoni ʻi he senituli hono 20 ní ʻoku hā ai ʻa e tāpuaki meia Sihová. ʻOku ʻikai ha veiveiua, ʻi he tuʻunga ko ha kulupú, ko e kau fakamoʻoni ko ʻeni ʻi onopooní ki he tuʻunga-hau ʻo e ʻOtuá kuo nau fakatupulekina ʻa e ʻofa ki he lao ʻa Sihová ʻi honau lotó. ʻOku nau hangē ko e tokotaha-tohi-sāmé, kuo ueʻi kinautolu ke talangofua ki Heʻene laó mo faifakamoʻoni anga-tonu ʻi he “ʻaho mo e po” ʻo fekauʻaki mo e lāngilangi ʻo Sihová.—Fakahā 7:15.
Ko e Ngaahi Ngāue Mālohi ʻAupito ʻa Sihová
11, 12. Ko e hā naʻe malava ʻe he ngaahi mana naʻe fai ʻe Sīsū mo hono kau muimuí?
11 ʻI he ʻuluaki senitulí, naʻe fakaivia ʻe he laumālie māʻoniʻoní ʻa e kau fakamoʻoni Kalisitiane anga-tonú ke fai ʻa e ngaahi mana, ʻa ia naʻe fakamoʻoniʻi mālohi ai ko ʻenau fakamoʻoní naʻe moʻoni. ʻI he taimi naʻe ʻi pilīsone ai ʻa Sione Papitaisó, naʻá ne fekau atu ʻa e kau ākongá ke ʻeke kia Sīsū: “Ko koe ia naʻe pehe ke haʻu, pe te tau ʻamanaki ki ha taha kehe?” Naʻe ʻikai ke tali ʻio pe ʻikai ʻa Sīsū. Ka naʻá ne pehē: “Mo ō ʻo fakaha kia Sione ʻa e ngāhi meʻa oku mo fanongo mo mamata ki ai: ʻoku ʻā ʻa e kui, pea ʻeveʻeva ʻa e heke, ʻoku fakamaʻa ʻa e kilia, pea ongo ʻa e tuli, pea fokotuʻu ʻa e mate, pea malangaʻaki ʻa e ongoongo lelei ki he masiva: pea monūʻiaā ka ko ia ʻoku ikai tūkia ʻiate au.” (Mātiu 11:3-6) Ko e ngaahi ngāue ivimālohi ko ʻení naʻe hoko ia ko ha fakamoʻoni kia Sione ko e moʻoni ko Sīsuú ko e “tagata mei he Otua.”—Ngāue 2:22, PM.
12 ʻI ha founga meimei tatau, ko e niʻihi ʻo e kau muimui ʻo Sīsuú naʻa nau fakamoʻui ʻa e mahakí naʻa mo e fokotuʻu ʻo e maté. (Ngāue 5:15, 16; 20:9-12) Ko e ngaahi mana ko ʻení naʻe hangē ia ha fakamoʻoni mei he ʻOtuá tonu koeʻuhi ko kinautolu. (Hepelū 2:4) Pea ko e ngaahi ngāue peheé naʻa nau fakahāhaaʻi ʻa e mālohi-aoniu ʻo Sihová. Ko e fakatātaá, ko e moʻoni ko Sētane, “ʻa e ʻeiki ʻo e māmani,” ʻokú ne lava ʻo fakatupu ʻa e maté. (Sione 14:30; Hepelū 2:14) Ka ʻi hono fokotuʻu ʻe Pita ʻa e fefine anga-tonu ko Toakasé mei he maté, naʻe lava pē ke ne fai ia ʻaki ʻa e mālohi meia Sihová, koeʻuhi he ko Ia pē ʻoku lava ke Ne toe fakafoki mai ʻa e moʻuí.—Sāme 16:10; 36:9; Ngāue 2:25-27; 9:36-43.
13. (a) ʻI he founga fē ʻoku kei fakamoʻoni ai ʻa e ngaahi mana ʻi he Tohitapú ki he mālohi ʻo Sihová? (e) ʻOku anga-fēfē ʻa e hoko ʻa hono fakahoko ʻa e kikité ko ha konga mahuʻinga ia ʻi hono fakamoʻoniʻi ʻa e Tuʻunga-ʻOtua ʻo Sihová?
13 ʻI he ʻahó ni, ʻoku ʻikai ke toe fai ʻa e ngaahi ngāue fakaemana ko iá. Kuo lava ʻa honau taumuʻá. (1 Kolinitō 13:8) Ka neongo ia, ʻoku tau kei maʻu ʻa e fakamatala ʻo e ngaahi meʻa ko iá ʻi he Tohitapú, naʻe fakamoʻoniʻi ʻe he kau sio tonu pē ki ai. ʻI hono tohoaki ʻa e tokangá ʻe he kau Kalisitiane ʻi he ʻaho ní ki he ngaahi fakamatala fakahisitōlia ko ʻení, ko e ngaahi ngāue ko iá ʻoku nau kei fai pē ha fakamoʻoni ola lelei ki he mālohi ʻo Sihová. (1 Kolinitō 15:3-6) Tānaki atu ki aí, ʻi he ʻaho ʻo ʻAiseá, naʻe tuhu ʻa Sihova ki he kikite totonu ko ha fakamoʻoni tuʻu-ki-muʻa ia ko Ia ʻa e ʻOtua moʻoní. (ʻAisea 46:8-11) Ko e ngaahi kikite lahi fakamānavaʻi mei he ʻOtuá ʻi he Tohitapú kuo fakahoko ia ʻi he ʻahó ni—ko e niʻihi ʻo kinautolu ʻi he fakatahaʻanga Kalisitiané. (ʻAisea 60:8-10; Tāniela 12:6-12; Malakai 3:17, 18; Mātiu 24:9; Fakahā 11:1-13) ʻI he ʻikai ke ngata ʻi hono tuhuʻi ʻoku tau moʻuí ni ʻi he “kuonga fakamui,” ko e fakahoko ʻo e ngaahi kikite ko ʻení ʻoku fakatonuhiaʻi ai ʻa Sihova ko e ʻOtua moʻoní pē ia.—2 Tīmote 3:1.
14. Ko e hā ʻa e ngaahi founga ʻoku hoko ai ʻa e hisitōlia ʻi onopooni ʻo e Kau Fakamoʻoni ʻa Sihová ko ha fakamoʻoni mālohi ko Sihova ko e ʻEiki Aoniú?
14 Ko hono fakaʻosí, ʻoku kei fai pē ʻe Sihova ʻa e ngaahi meʻa lahi, ngaahi meʻa fakaofo, ki heʻene kakaí. Ko e fakalahiange ʻa e maama ki he moʻoni ʻi he Tohitapú ʻoku tataki ia ʻe he laumālie ʻo Sihová. (Sāme 86:10; Fakahā 4:5, 6) Ko e fakamatala ki he tupu tokolahi ange ʻi māmani lahí ko e fakamoʻoni ia ko Sihova ʻokú ne “fakavave ia ʻi hono taimi.” (ʻAisea 60:22) ʻI he hoko ʻa e fakatanga fakamamahí ʻi he fonua ki he fonua ʻi he lolotonga ʻa e ngaahi ʻaho fakaʻosí, ʻoku malava ʻa e kātaki loto-toʻa ʻa e kakai ʻa Sihová koeʻuhi ko e poupou fakatupu-ivimālohi ʻa e laumālie māʻoniʻoní. (Sāme 18:1, 2, 17, 18; 2 Kolinitō 1:8-10) ʻIo, ko e hisitōlia ʻi onopooni ʻo e Kau Fakamoʻoni ʻa Sihová ko ha fakamoʻoni mālohi ia ko Sihova ko e ʻEiki Aoniú.—Sākalaia 4:6.
Ko e Ongoongo Lelei ke Malangaʻí
15. Ko e hā ʻa e fakamoʻoni fakalahi atu naʻe pau ke fai ʻe he fakatahaʻanga Kalisitiané?
15 Naʻe fakanofo ʻe Sihova ʻa ʻIsileli ko ʻene fakamoʻoni ki he ngaahi puleʻangá. (ʻAisea 43:10) Kae kehe, ko e kau ʻIsileli tokosiʻi pē naʻe fekau ʻe he ʻOtuá ke nau ʻalu ʻo malanga ki he faʻahinga naʻe ʻikai ko e kau ʻIsilelí, pea naʻe faʻa hoko pē ia koeʻuhi ke fanongonongo ai ʻa e ngaahi fakamaau ʻa Sihová. (Selemaia 1:5; Siona 1:1, 2) Ka neongo ia, ko e ngaahi kikite ʻi he Konga Tohitapu Faka-Hepeluú ʻoku nau fakahā ʻe ʻi ai ha ʻaho ʻe fakahanga ai ʻa e tokanga ʻa Sihová ʻo lahi ʻaupito ki he ngaahi puleʻangá, pea kuó ne fai ʻeni ʻo fakafou mai ʻi he ʻIsileli fakalaumālie ʻa e ʻOtuá. (ʻAisea 2:2-4; 62:2) Ki muʻa ke ne ʻalu hake ki hēvaní, naʻe fekau ʻe Sīsū ki hono kau muimuí: “Ko ia ke mou ō, ʻo ngaohi ʻa e ngāhi kakai kotoa pe ko ʻeku kau ako.” (Mātiu 28:19) Lolotonga naʻe nōfoʻi ʻa Sīsū ia ki he “fanga sipi kuo mole ʻi he hako ʻo Isileli,” naʻe fekau ʻa hono kau muimui ki he “ngāhi kakai kotoa pe,” naʻa mo e “ngataʻanga ʻo māmani.” (Mātiu 15:24; Ngāue 1:8) Ko e fakamoʻoni faka-Kalisitiané naʻe pau ke ongona ʻe he faʻahinga kotoa ʻo e tangatá.
16. Ko e hā ʻa e ngāue naʻe vaheʻí, pea naʻe fakahoko ia ʻe he fakatahaʻanga Kalisitiane ʻi he ʻuluaki senitulí, pea ko e hā hono lahí?
16 Naʻe fakahā ʻe Paula naʻe mahino lelei ʻa e meʻá ni kiate ia. ʻI he taʻu 61 H.K. (Hotau Kuonga), naʻe lava ke ne pehē ko e ongoongo leleí naʻe “ʻi mamani katoa, ʻo ne fakatupu fua mo mafola.” Ko e ongoongo leleí naʻe ʻikai ke fakangatangata pē ia ki ha puleʻanga pē ʻe taha pe lotu mavahe pē ʻe taha, ʻo hangē ko ia naʻe kau ʻi he “lotu ki ha kau angelo.” Ka, “ne malangaʻaki ki he meʻa moʻui kotoa pe ʻi he lalo langi.” (Kolose 1:6, 23; 2:13, 14, 16-18) Ko ia, ko e ʻIsileli ʻo e ʻOtua ʻi he ʻuluaki senitulí naʻá ne fakahoko ʻa e ngāue naʻe vaheʻi ki aí ke “ongoongoa atu ʻa e ngaahi lelei ʻo ʻEne ʻAfio, ʻa ia naʻa ne ui mai [kinautolu] mei he poʻuli ki he maama fakaofo aʻana.”
17. ʻOku anga-fēfē ʻa e hokohoko atu ʻa hono fakahoko ʻo e Mātiu 24:14 ʻi ha founga lahi?
17 Ka neongo ia, ko e ngāue fakamalanga naʻe fai ʻi he ʻuluaki senitulí ko ha tomuʻa ʻahiʻahi pē ia ʻo e meʻa ʻe malava ke fakaʻosi ʻi he lolotonga ʻo e ngaahi ʻaho fakaʻosí. ʻI he vakai mei ai tautefito ki hotau taimí, naʻe pehē ʻe Sīsū: “Bea koe ogoogolelei ni oe buleaga e malaga aki i mamani kotoabe, koe mea fakamooni ki he buleaga kotoabe, bea e toki hoko mai ae ikuaga.” (Mātiu 24:14, PM; Maʻake 13:10) Kuo fakahoko ʻa e kikite ko ʻení? Ko e moʻoni, kuo ʻosi fakahoko ia. Naʻe kamata siʻisiʻi pē ʻi he 1919, kuo aʻu ʻeni ʻa e malangaʻi ʻo e ongoongo leleí ki he ngaahi fonua ʻoku laka hake ʻi he 230. Kuo aʻu ʻa e fakamoʻoní ki he ngaahi feituʻu momoko ʻoku ofi ki he pole Noaté pea mo e ngaahi fonua māfana mo ʻafú. Kuo lavaʻi ʻa e faifakamoʻoni ʻi he ngaahi konitinēniti lalahí, pea feinga ke aʻu ki he ngaahi ʻotu motu mamaʻó koeʻuhi ke lava ʻo fai ha fakamoʻoni ki he kakai ʻoku nau nofo aí. Naʻa mo e lotolotonga ʻo ha fuʻu liliu lahi, ʻo hangē ko e tau ʻi Posinia mo Hesikovina, ʻoku hokohoko atu pē hono malangaʻi ʻa e ongoongo leleí ia. ʻOku hangē pē ko e ʻuluaki senitulí, ʻoku maʻu ʻa e fua ʻi he faifakamoʻoní “ʻi mamani katoa.” Kuo fanongonongo fakahāhā ʻa e ongoongo leleí “ki he meʻa moʻui kotoa pe ʻi he lalo langi.” Ko e olá? ʻUluakí, kuo fakatahatahaʻi ai ʻa e faʻahinga ko e toenga ʻo e ʻIsileli ʻo e ʻOtuá “mei he matakali fulipē mo e lea, mo e faʻahinga mo e puleʻanga.” Ko hono uá, kuo kamata ke tānaki mai ʻa e laui miliona ʻo e “fuʻu kakai lahi” mei he “puleʻanga kotoa pē, mo e ngaahi matakali, mo e ngaahi faʻahinga, mo e ngaahi lea.” (Fakahā 5:9; 7:9) ʻOku hokohoko atu ʻa e fakahoko ʻo e Mātiu 24:14 ʻi ha founga lahi.
18. Ko e hā ʻa e ngaahi meʻa ʻe niʻihi kuo lavaʻi ʻi hono malangaʻi ʻa e ongoongo leleí ʻi māmani lahí?
18 ʻOku tokoni ʻa hono malangaʻi ʻo e ongoongo lelei ʻi māmani lahí ke fakamoʻoniʻi kuo ʻosi kamata ke ʻi ai ʻa Sīsū ʻi hono tuʻunga ko e tuʻí. (Mātiu 24:3) ʻIkai ko ia pē, ko e founga tefito ia ʻoku fakafou mai ai ʻa e ‘ututaʻu ʻo mamani,’ he ʻokú ne fakahā ki he kakaí ʻa e ʻamanaki moʻoni pē ʻe taha ki he faʻahinga ʻo e tangata, ʻa ia ko e Puleʻanga ʻo Sihová. (Fakahā 14:15, 16) Koeʻuhi ko e kau Kalisitiane moʻoni pē ʻoku nau kau ʻi hono malangaʻi ʻa e ongoongo leleí, ʻoku tokoni ʻa e ngāue mahuʻinga ko ʻení ki hono fakafaikehekeheʻi ʻa e kau Kalisitiane moʻoní mei he loí. (Malakai 3:18) ʻI he founga ko ʻení, ʻe maʻu ai ʻa e fakamoʻui ʻe he faʻahinga ʻoku nau fai ʻa e malangá pea pehē kiate kinautolu ʻoku nau tali iá. (1 Tīmote 4:16) Ko e meʻa mahuʻinga lahí, ʻi hono malangaʻi ʻa e ongoongo leleí ʻoku hoko ai ʻa e lāngilangi mo e ngeia kia Sihova ko e ʻOtuá, ʻa e tokotaha naʻá ne fekau ke fai iá, ʻa ia ʻokú ne poupouʻi kinautolu ʻoku nau fai iá, mo ne ʻai ia ke fua lahi.—2 Kolinitō 4:7.
19. Ko e hā ʻa e fakapapau ʻoku fakalototoʻaʻi ki ai ʻa e kau Kalisitiane kotoa pē ke nau faí?
19 ʻOku ʻikai ha ofo he naʻe ueʻi ʻa e ʻaposetolo ko Paulá ke ne pehē: “E malaia au, o kabau e ikai teu malaga aki ae ogoogolelei!” (1 Kolinitō 9:16, PM) ʻOku tatau pē mo e ongoʻi ʻa e kau Kalisitiane ʻi he ʻaho ní. Ko ha monū lahi ia mo ha fatongia lahi ke hoko ko e ‘kaungāngaue mo e ʻOtua,’ ʻo tapua atu ʻa e maama ʻo e moʻoní ʻi he māmani kaupoʻulí ni. (1 Kolinitō 3:9; ʻAisea 60:2, 3) Ko e ngāue naʻe kamata siʻisiʻi pē ʻi he 1919 kuo aʻu ʻeni ki ha tuʻunga lahi fakaofo. ʻOku meimei toko nima miliona ʻa e kau Kalisitiane ʻoku nau faifakamoʻoni ki he tuʻunga-hau ʻo e ʻOtuá pea ʻoku nau fakamoleki ʻa e houa ʻoku lahi hake ʻi he piliona ʻi he taʻu ke ʻoatu ʻa e pōpoaki ʻo e fakamoʻuí ki he niʻihi kehé. Ko ha fiefia ē ke kau ki he ngāue ko ʻení, ʻo hono fakamāʻoniʻoniʻi ʻa e huafa ʻo Sihová! Ke tau fakapapauʻi ke ʻoua ʻe fakatuotuai. Ka, te tau tokanga lahi ange ʻi ha toe taimi ki he ngaahi lea ʻa Paula kia Tīmoté: “Malangaʻaki ʻa e folofola, faʻa fai pe ʻi he faingamalie mo e ʻikai ha faingamalie.” (2 Tīmote 4:2) ʻI heʻetau fai peheé, ʻoku tau lotu ʻaki ai hotau lotó kotoa ke hokohoko atu ʻa Sihova hono tāpuakiʻi ʻetau ngaahi feingá.
ʻOkú Ke Manatuʻi?
◻ Ko hai naʻá ne fetongi ʻa ʻIsileli ko e “fakamoʻoni” ʻa Sihova ki he ngaahi puleʻangá?
◻ ʻOku anga-fēfē ʻa e tokoni ʻa e ʻulungaanga faka-Kalisitiané ki hono fai ha fakamoʻoni?
◻ Ko e hā ʻoku ʻikai ala tuku ai ʻa e ako mo fakalaulauloto ʻa e Tohitapú ki he Fakamoʻoni Kalisitiané?
◻ Ko e hā ʻa e founga ʻoku hoko ai ʻa e hisitōlia ʻi onopooni ʻo e Kau Fakamoʻoni ʻa Sihová, ko e fakamoʻoni ko Sihova ʻa e ʻOtua moʻoní?
◻ Ko e hā ʻoku lavaʻi ʻe he malangaʻi ʻo e ongoongo leleí?
[Fakatātā ʻi he peesi 11]
Mamaʻo mei he fakangatangata, ko e ongo- ongo lelei ʻoku fanongonongo ʻi he taimí ni ki “he meʻa moʻui kotoa pe ʻi he lalo langi”