ʻOku Fakaeonoʻaho ʻa e ʻAukaí?

“KUÓ U ʻaukai ʻi he Mōnite kotoa pē talu mei heʻeku kei taʻu hongofulutupú,” ko e lau ia ʻa Mrudulaben ko ha fefine tuʻumālie ʻInitia taʻu 78. Ne hoko ʻeni ia ko e konga ʻo ʻene founga-lotú, ko ha meʻa ia ke fakapapauʻi ai ke ne maʻu ha nofo mali lelei mo ha fānau moʻui lelei, pea pehē foki ki ha maluʻanga ki hono husepānití. Ko ha uitou ia he taimí ni, ʻoku hoko atu pē ʻene ʻaukai he ʻū Mōnité ki ha moʻui lelei mo ha tuʻumālie ʻo ʻene fānaú. Hangē pē ko e fefiné ni, ko e konga lahi ʻo e kakai fefine Hinituú ʻoku nau ʻai ha ngaahi ʻaukai tuʻumaʻu ko ha konga ia ʻi heʻenau moʻuí.

Ko Prakash, ko ha tangata pisinisi matuʻotuʻa ia ʻoku nofo ʻi ha tuʻakolo ʻi Mumbai (Bombay), ʻInitia, ʻokú ne pehē ʻoku ʻaukai ia ʻi he taʻu kotoa pē ʻi he ʻū Mōnite ko ia ʻo Sawan (Shravan). Ko e māhina ʻeni ʻoku mahuʻinga makehe fakalotu ʻi he tohimāhina faka-Hinituú. ʻOku fakamatala ʻa Prakash: “Ne u kamata hono faí ki ha ngaahi ʻuhinga fakalotu, ka ʻi he taimí ni ʻoku ou toe maʻu ha holi makehe ke fai ia ki ha moʻui lelei. Koeʻuhí ʻoku hoko ʻa Sawan ʻi he fakaʻau ko ia ke ngata ʻa e faʻahitaʻu ʻuhá, ʻoku tuku ai ʻe he ʻaukaí ki hoku sinó ha faingamālie ke ne fakamaʻa ʻiate ia pē ʻa e ngaahi mahaki ko ia ʻoku ngali kehe ke ʻasi ʻi ha faʻahitaʻu ʻuha.”

ʻOku ongoʻi ʻe he faʻahinga ia ko e ʻaukaí ʻokú ne tokoniʻi fakasino, fakaʻatamai mo fakalaumālie ha taha. Ko e fakatātaá, ʻoku pehē ʻe he Grolier International Encyclopedia: “Ko e fekumi fakasaienisi ki mui mai ʻokú ne pehē, ko e ʻaukaí ʻe ngali fakatupu moʻui lelei, pea ʻi hono fai fakaleleiʻí, te ne ngali ʻomi nai ha ngaahi tuʻunga lelei ki he fakakaukaú mo e anga ʻo e ongó.” ʻOku lau ko e filōsefa Kalisi ko ia ko Palató naʻe ʻaukai ia ʻi ha ʻaho ʻe hongofulu pe lahi ange, pea ko e matematika ko ia ko Pythagoras naʻá ne ʻai ʻe ia ʻene kau akó ke nau ʻaukai ki muʻa pea toki fai honau akoʻí.

Ki he faʻahinga, ʻoku ʻuhinga ʻa e ʻaukaí ia ko e mātuʻaki fakaʻehiʻehi mei he meʻakaí mo e vaí ʻi ha vahaʻa taimi pau, lolotonga ia ʻoku inu pē ʻa e niʻihi ia ʻi honau taimi ʻaukaí. Ko ha taʻekai ʻi ha ngaahi houa kai, pe fakaʻehiʻehi mei ha faʻahinga meʻakai ʻoku lau ia ʻe he faʻahinga tokolahi ko e ʻaukai. Ka ko e ʻaukai lōloa taʻetokangaʻí ʻe hoko ia ʻo fakatuʻutāmaki. ʻOku pehē ʻe he tangata faiongoongo ko ia ko Parul Sheth, hili ko ia hono ngāueʻaki ʻe he sinó ʻa e kāpohaituleiti ʻoku tukutauhi ʻiate ia peé, ʻoku hoko atu leva ʻo liliu ʻa e ngaahi polotini ʻi he uouá ki he suka pea toki tafoki hake leva ki he ngako he sinó. Ko hono liliu ko ia ʻa e ngakó ki he suká ʻoku tukuange mai ai ha ngaahi huhuʻa kona ʻoku ui ko e ngaahi ʻēsiti ketone. ʻI heʻenau fakaʻau ke lahí, ʻoku nau ngaʻunu leva ki he ʻutó, ʻo maumauʻi ʻa e halanga neave tefitó. “Ko e taimi ʻeni ʻe mafuli ai ʻo fakatuʻutāmaki ʻa e ʻaukaí,” ko e lau ia ʻa Sheth. “ʻE lava ke ke puputuʻu ai, mole ʻa e manatú, pea kovi angé. . . . [ʻE lava ke ne fakatupunga] ha mohe ʻo ʻikai toe ʻā pea fakaʻau atu ai pē ki he mate.”

Ko ha Meʻangāue mo ha Ouau

Kuo ngāueʻaki ʻa e ʻaukaí ko ha meʻangāue mālohi ia ki ha ngaahi taumuʻa fakapolitikale pe fakasōsiale. Ko ha tokotaha naʻe tuʻu-ki-muʻa ʻi hono ngāueʻaki ʻa e meʻangāué ni ko Mohandas K. Gandhi ʻi ʻInitia. ʻI hono hakeakiʻi māʻolunga ia ʻe he lauingeau miliona ʻo e kakaí, naʻá ne ngāueʻaki ai ʻa e ʻaukaí ke tohoaki mālohiʻaki ʻa e fuʻu kakai Hinitū tokolahi ko ia ʻo ʻInitiá. ʻI hono fakamatalaʻi ʻa e ola ʻo ʻene ʻaukaí ke fakaleleiʻi ʻa e fekīhiaki fakangāue ʻi he vā ʻo e kau ngāué mo e kau maʻu falengāué, naʻe pehē ai ʻe Gandhi: “Ko hono ola fakalūkufuá, ne fakatupu ai ha vā lelei ʻiate kinautolu hono kotoa. He naʻe maongo moʻoni ki he loto ʻo e kau maʻu falengāué . . . Naʻe taʻofi ʻa e tukungāué hili ʻeku ʻaukai he foʻi ʻaho pē ʻe tolu.” Ko e palesiteni ko ia ʻo Saute ʻAfiliká, Nelson Mandela, naʻe kau ia ʻi ha ʻaukai ʻaho ʻe nima lolotonga ʻa e ngaahi taʻu ʻo ʻene kei hoko ko ha pōpula fakapolitikalé.

Ko e konga lahi ʻo kinautolu kuo nau fai ʻa e ʻaukaí, ne nau fai nai ia ʻi ha ngaahi ʻuhinga fakalotu. Ko e ʻaukaí ko ha ouau tuʻu-ki-muʻa ia ʻi he lotu faka-Hinituú. ʻI ha ngaahi ʻaho pau, ko e lau ia ʻa e tohi ko e Fast and Festivals of India, “ʻoku tauhi kakato ai ʻa e ʻaukaí . . . naʻa mo e vaí ʻoku ʻikai teitei inu. ʻOku mātuʻaki tauhi ʻa e ʻaukaí ʻe he tangata mo e fefine . . . ke fakapapauʻi ha fiefia, tuʻumālie mo ha fakamolemole ʻo e ngaahi koví mo e ngaahi angahalá.”

Ko e ʻaukaí ʻoku fai lahia ʻaupito ia ʻi he lotu Sāiní. ʻOku fakamatala ʻa e The Sunday Times of India Review: “Ko ha muni [tangata poto] faka-Sāini ʻi Bombay [Mumbai] naʻá ne inu pē ha ipu vai ʻosi haka ʻe ua fakaʻaho​—he ʻaho ʻe 201. Naʻá ne holoʻaki ai ha 33 kg [73 lb].” Ko e faʻahinga ia ʻe niʻihi naʻa nau ʻaukai pē ki he fasimanava pea mate, ko e tuipau tokua ʻe maʻu ai ʻa e fakamoʻuí.

Ki he fakalūkufua ʻo e kakai lalahi lotu faka-ʻIsilamí, ko e tuʻutuʻuni pau ia ke ʻaukai he lolotonga ʻo e māhina ko Ramadan. ʻIkai ke fai ha kai pe inu he kotoa ʻo e māhiná mei he hopo ki he tō ʻa e laʻaá. Kapau ʻe puke pe folau ha taha he lolotonga ʻo e taimi ko ʻení te ne toki ʻaukai leva ʻi ha taimi kehe ke tāpuniʻaki ʻa e ngaahi ʻaho ne liʻakí. Ko e Lēnití, ʻa e ʻaho ʻe 40 ki muʻa he Toetuʻú, ko ha taimi ʻaukai ia ki he faʻahinga ʻi he Puleʻanga-Haʻa-Kalisitiané, pea ko e ngaahi lotu lahi ʻoku nau tuʻutuʻuni ke tauhi ha ngaahi ʻaukai ʻi ha ngaahi ʻaho pau.

ʻOku teʻeki ʻosi atu hono fai ʻona ʻo e ʻaukaí. Pea koeʻuhi ko ha konga ia ʻo e ngaahi lotu lahi, te tau ʻeke nai, ʻOku fiemaʻu nai ʻe he ʻOtuá ha ʻaukai? ʻOku ʻi ai nai ha ngaahi taimi ke fili ai ʻe he Kalisitiané pe te ne ʻaukai? ʻE ʻaonga nai ʻeni? Ko e kupu hono hokó ʻe lāulea ki he ngaahi fehuʻí ni.

[Fakatātā ʻi he peesi 3]

Ko e lotu Sāiní ʻoku sio ia ki he ʻaukaí ko ha founga ia ke maʻu ai ʻa e fakamoʻui ki he soulú

[Fakatātā ʻi he peesi 4]

Ko Mohandas K. Gandhi naʻá ne ngāueʻaki ʻe ia ʻa e ʻaukaí ko ha meʻangāue mālohi ia ki ha taumuʻa fakapolitikale pe fakasōsiale

[Fakatātā ʻi he peesi 4]

ʻI he ʻIsilamí, ʻoku tuʻutuʻuni pau ia ai ke ʻaukai lolotonga ʻa e māhina ko Ramadan

[Maʻuʻanga ʻo e Tā]

Garo Nalbandian