Neongo e Ngaahi ʻAhiʻahí, Piki ki Hoʻo Tuí!

“Siʻoku kainga, mou lau ko e koto fakafiefia ʻo ka mou ka to ki he ngaahi ʻahiʻahi kehekehe.”—SEMISI 1:2.

 1. ʻOku tauhi ʻa e kakai ʻa Sihová kiate ia ʻaki ʻa e tui mo e “fiefia ʻo e loto” neongo ʻa e hā?

KO E kakai ʻa Sihová ʻoku nau ngāue ʻi he tuʻunga ko ʻene Kau Fakamoʻoni fakataha mo e tui kiate ia pea mo e “fiefia oe loto.” (Teutalonome 28:​47, PM; Aisea 43:10) ʻOku nau fai ʻeni neongo hono fakahohaʻasi kinautolu ʻe he ngaahi ʻahiʻahi lahi. Neongo ʻenau faingataʻaʻiá, ʻoku nau maʻu ʻa e fakafiemālie mei he ngaahi lea: “Siʻoku kainga, mou lau ko e koto fakafiefia ʻo ka mou ka to ki he ngaahi ʻahiʻahi kehekehe; ko hoʻomou ʻilo, ko e sivi ʻo hoʻomou tui ʻoku ne fakatupu ʻa e kataki.”​—Semisi 1:​2, 3.

 2. Ko e hā ʻoku ʻiloa fekauʻaki mo e tokotaha-tohi ʻo e tohi ʻa Semisí?

² Ko e fakamatala ko iá naʻe hiki ia ʻi he 62 T.S. nai ʻe he ākonga ko Sēmisí, ko ha tokoua faʻē taha ʻo Sīsū Kalaisi. (Maake 6:3) Ko ha mātuʻa ʻa Sēmisi ʻi he fakatahaʻanga ʻi Selusalemá. Ko hono moʻoní, ko ia ē, ʻa Kīfasi (Pita), mo Sione “naʻe hā ngali ko e ongo pou”​—ko e ongo poupou mālohi mo fefeka ʻo e fakatahaʻangá. (Kaletia 2:9) ʻI he taimi naʻe ʻoatu ai ki he “kau abosetolo mo e mātua” ʻa e fakakikihi fekauʻaki mo e kamú ʻi he 49 T.S. nai, naʻe fai ai ʻe Sēmisi ha fokotuʻu mālohi Fakatohitapu ʻa ia naʻe ngāueʻaki ʻe he kulupu pule ko ia ʻo e ʻuluaki senitulí.​—Ngāue 15:​6-29, PM.

 3. Ko e hā ʻa e ngaahi palopalema ʻe niʻihi naʻe fehangahangai mo e kau Kalisitiane ʻi he ʻuluaki senitulí, pea ʻe lava fēfē ke tau maʻu ʻa e ʻaonga lahi taha mei he tohi ʻa Semisí?

³ ʻI he tuʻunga ko ha tokotaha tauhi-sipi fakalaumālie tokangá, naʻe ‘ʻiloʻi ʻa e anga ʻo e tākangá,’ ʻe Sēmisi. (Palovepi 27:23) Naʻá ne fakatokangaʻi naʻe fehangahangai ʻi he taimi ko iá ʻa e kau Kalisitiané mo e ngaahi ʻahiʻahi kakaha. Ko e fakakaukau ʻa e niʻihi naʻe fiemaʻu ki ai ʻa e fakatonutonu, he naʻa nau fakahāhā ʻa e filifilimānako ki he koloaʻiá. Ki he niʻihi, ko e lotú ia ko ha meʻa fakaeouau pē. Naʻe fakatupunga loto-mamahi ʻa e niʻihi ʻaki honau ʻelelo puleʻingataʻá. Naʻe hoko ha ngaahi nunuʻa fakatupu maumau ʻi he laumālie fakamāmaní, pea naʻe ʻikai ke kātaki pe faʻa lotu ʻa e tokolahi. Ko hono moʻoní, naʻe hoko ʻo puke fakalaumālie ʻa e kau Kalisitiane ʻe niʻihi. ʻOku fakahanga ʻa e tokanga ki he ngaahi meʻa peheé, ʻi he tohi ʻa Sēmisí ʻi ha founga langa hake, pea ʻoku ʻaonga ʻene akonakí ʻi he ʻahó ni ʻo hangē pē ko ia naʻe ʻi ai ʻi he ʻuluaki senitulí T.S. Te tau maʻu ʻa e ʻaonga lahi kapau ʻoku tau fakakaukau atu ki he tohi ko ʻení ko e tohi ia kuo fai fakafoʻituitui mai kiate kitautolu.a

ʻI Heʻetau Aʻusia ʻa e Ngaahi ʻAhiʻahí

 4. ʻOku totonu ke fēfē ʻetau vakai ki he ngaahi ʻahiʻahí?

⁴ ʻOku fakahā mai ʻe Sēmisi kiate kitautolu ʻa e founga ke vakaiʻaki ki he ngaahi ʻahiʻahí. (Semisi 1:​1-4) ʻI he ʻikai lave ki heʻene fehokotaki fakafāmili mo e ʻAlo ʻo e ʻOtuá, ʻokú ne ui anga-fakatōkilalo ia tonu “ko e tamaioʻeiki ʻa e ʻOtua mo e ʻEiki ko Sisu Kalaisi.” ʻOku tohi ʻa Sēmisí ki he “matakali ʻe hongofulu ma ua” ʻo e ʻIsileli fakalaumālie “ʻoku nofo movetevete,” ʻuluakí pē koeʻuhi ko e fakatangá. (Ngāue 8:1; 11:19; Kaletia 6:16; 1 Pita 1:1) ʻI hotau tuʻunga ko e Kalisitiané, ʻoku fakatangaʻi mo kitautolu foki, pea ʻoku tau “to ki he ngaahi ʻahiʻahi kehekehe.” Ka ʻo kapau ʻoku tau manatuʻi ko e kātekina ʻo e ngaahi ʻahiʻahí ʻoku ʻai ai ke mālohi ʻetau tuí, te tau “lau ko e koto fakafiefia” ʻa e taimi ʻoku hoko mai ai kiate kitautolú. Kapau ʻoku tau tauhi maʻu ʻetau mateaki-angatonu ki he ʻOtuá lolotonga ʻa e ngaahi ʻahiʻahí, ʻe ʻomai ʻe he meʻá ni kiate kitautolu ʻa e fiefia tuʻuloa.

 5. Ko e hā nai ʻoku kau ki hotau ngaahi ʻahiʻahí, pea ko e hā ʻoku hoko ʻi he taimi ʻoku tau lavameʻa ai ʻi hono kātekina kinautolú?

⁵ Ko hotau ngaahi ʻahiʻahí ʻoku kau ai ʻa e ngaahi tuʻunga faingataʻa ʻoku hoko lahi ki he faʻahinga ʻo e tangatá. Ko e fakatātaá, ʻe fakahohaʻasi nai ʻe he mahamahakí kitautolu. ʻOku ʻikai fai ʻe he ʻOtuá he taimí ni ha ngaahi fakamoʻui fakaemana, ka ʻokú ne tali ʻetau ngaahi lotu ki he poto mo e mālohi naʻe fiemaʻu ke fekukiʻaki mo e mahamahakí. (Sāme 41:​1-3) ʻOku tau toe faingataʻaʻia foki koeʻuhi ko e māʻoniʻoní ʻi he tuʻunga ko e Kau Fakamoʻoni fakatangaʻi ʻa Sihova. (2 Timote 3:12; 1 Pita 3:14) ʻI he taimi ʻoku tau lavameʻa ai ʻi hono kātekina ʻa e ngaahi ʻahiʻahi peheé, ʻoku fakamoʻoniʻi ai ʻetau tuí, ʻo hoko ai ʻo ‘sivi ʻa e tuí.’ Pea ʻi he taimi ʻoku ikuna ai ʻetau tuí, “ʻoku fakatupu ʻa e kataki” ʻi he meʻá ni. Ko e tui ʻoku ʻai ʻo mālohi ange fakafou ʻi he ngaahi ʻahiʻahí te ne tokoniʻi kitautolu ke kātekina ʻa e ngaahi ʻahiʻahi ʻi he kahaʻú.

 6. ʻOku anga-fēfē ʻa e “fai ʻe kataki ʻene ngaue ke haohaoa,” pea ko e hā ʻa e ngaahi sitepu ʻaonga ʻe lava ke tau laka ai ʻi he taimi ʻoku tau ʻi he malumalu ai ʻo e ʻahiʻahí?

⁶ “Pea ko eni,” ko e lea ia ʻa Sēmisí, “tuku ke fai ʻe kataki ʻene ngaue ke haohaoa.” Kapau ʻoku tau fakaʻatā ha ʻahiʻahi ke hokohoko atu, ʻo ʻikai feinga ke fakangata vave ia ʻaki ha ngaahi founga taʻefakatohitapu, ʻe fai leva ʻe he kātakí ʻa e “ngaue” ko hono ʻai kitautolu ke kakato ʻi he tuʻunga ko e kau Kalisitiané, ʻo ʻikai hala ʻi he tuí. Ko e moʻoni, kapau ʻoku fakaeʻa mai ha vaivaiʻanga ʻi ha ʻahiʻahi, ʻoku totonu ke tau kumi ki he tokoni ʻa Sihová ke ikunaʻi ia. Fēfē kapau ko e ʻahiʻahí ko ha fakatauele ke kau ʻi he ʻulungaanga taʻetaau fakaefehokotaki fakasinó? Ke tau lotu ʻo fekauʻaki mo e palopalema ko iá pea ngāue leva ʻo fehoanaki mo ʻetau ngaahi lotú. Te tau fiemaʻu nai ke fetongi ʻetau ngāué pe laka ʻi ha ngaahi sitepu kehe ke tauhi maʻu ʻa e mateaki-angatonu ki he ʻOtuá.​—Senesi 39:​7-9; 1 Kolinito 10:13.

Ko e Kumi ki he Potó

 7. ʻE anga-fēfē nai hono tokoniʻi kitautolu ke fekuki mo e ngaahi ʻahiʻahí?

⁷ ʻOku fakahā mai ʻe Sēmisi kiate kitautolu ʻa e meʻa ke faí kapau ʻoku ʻikai te tau ʻilo pe ʻe anga-fēfē ke fekuki mo ha ʻahiʻahi. (Semisi 1:​5-8) ʻE ʻikai ke lumaʻi kitautolu ʻe Sihova ʻi he ʻikai ʻi ai ha potó, mo e lotu ki ai ʻi he tuí. Te ne tokoniʻi kitautolu ke tau vakai lelei ki he ʻahiʻahí pea ke kātekina ia. ʻE ʻomai nai ʻa e ngaahi Konga Tohitapú ki heʻetau tokangá ʻe he kaungā-tuí pe ʻi he lolotonga ʻo e ako Tohitapú. Ko e ngaahi meʻa naʻe hokó ʻa ia naʻe tataki lelei ʻo fakafou ʻi he tataki ʻa e ʻOtuá te ne ʻai nai kitautolu ke sio ki he meʻa ʻoku totonu ke tau faí. ʻE tataki nai kitautolu ʻe he laumālie ʻo e ʻOtuá. (Luke 11:13) Ke fiefia ʻi he ngaahi ʻaonga peheé, ʻoku fakaenatula pē ʻa e pau ke tau pipiki ofi ki he ʻOtuá mo ʻene kakaí.​—Palovepi 18:1.

 8. Ko e hā ʻe ʻikai maʻu ai ʻe he tokotaha tālaʻá ha meʻa ʻe taha meia Sihová?

⁸ ʻOku foaki mai ʻe Sihova kiate kitautolu ʻa e potó ke fekuki ai mo e ngaahi ʻahiʻahí kapau ʻoku tau “kole tui pe, ʻo ʻoua ʻe talaʻa.” Ko e tokotaha tālaʻá “ʻoku ne hange ko e peau ʻo e tahi ʻoku fakateka ʻo fepaleʻekina ʻe he matangi” taʻeʻamanekiná. Kapau naʻa tau taʻetuʻumaʻu fakalaumālie pehē, ‘ke ʻoua naʻa tau mahalo te tau maʻu ha meʻa meia Sihova.’ Ke ʻoua naʻa tau “lotolotoua” mo “taʻemāu” ʻi he lotú pe ʻi he ngaahi founga kehé. ʻI hono kehé, tau tui kia Sihova, ko e Matavai ʻo e potó.​—Palovepi 3:​5, 6.

ʻOku Lava ke Fiefia ʻa e Koloaʻiá mo e Masivá

 9. Ko e hā ʻoku tau maʻu ai ʻa e ʻuhinga ke fiefia ʻi he tuʻunga ko e kau lotu ʻa Sihová?

⁹ Neongo kapau ko e taha ʻo hotau ngaahi ʻahiʻahí ʻa e masivá, tau tuku maʻu ʻi he fakakaukaú ʻoku lava fakatouʻosi ke fiefia ʻa e kau Kalisitiane koloaʻiá mo e masivá. (Semisi 1:​9-11) Ki muʻa ke hoko ko e kau muimui ʻo Sīsuú, ko e tokolahi taha ʻo e faʻahinga paní naʻe siʻi ʻenau meʻa fakamatelié pea naʻe sio lalo ki ai ʻa e māmaní. (1 Kolinito 1:26) Ka ʻoku lava ke nau fiefia ʻi honau “hakeakiʻi” ki honau tuʻunga totonu ko e ngaahi ʻea ki he Puleʻangá. (Loma 8:​16, 17) ʻI he tafaʻaki ʻe tahá, ko e kakai koloaʻia ko ia naʻe fakaʻapaʻapaʻi ki muʻá naʻa nau hokosia ʻa e “fakatōkilaloʻi” ʻi heʻenau hoko ko e kau muimui ʻo Kalaisí koeʻuhi ko e sio lalo kiate kinautolu ʻa e māmaní. (Sione 7:​47-52; 12:​42, 43) Kae kehe, ʻi he hoko ko e kau sevāniti ʻa Sihová, ʻoku lava ke tau fiefia kotoa koeʻuhi he ko e koloaʻia fakaemāmaní, mo e tuʻunga māʻolungá, ʻoku halaʻatā hano ʻaonga ʻi hono fakahoa atu ki he ngaahi koloa fakalaumālie ʻoku tau fiefia aí. Pea ko e houngaʻia ē ko kitautolu he ʻi hotau lotolotongá ʻoku ʻikai ha feituʻu ia ai ki he hīkisiá ʻi he tuʻunga fakasōsialé!​—Palovepi 10:22; Ngāue 10:​34, 35.

10. ʻOku totonu ke fēfē ʻa e vakai ʻa ha Kalisitiane ki he koloaʻia fakamatelié?

¹⁰ ʻOku tokoniʻi kitautolu ʻe Sēmisi ke sio ʻoku ʻikai ke fakatuʻunga ʻetau moʻuí ʻi he koloá mo e ngaahi lavameʻa fakamāmaní. Hangē pē ko e ʻikai lava ʻe ha fakaʻofoʻofa ʻo ha matalaʻiʻakau ʻo taʻofi ia mei heʻene maé ʻi he “fakaaʻafu” ʻa e laʻaá, ʻoku pehē pē ʻa e ʻikai lava ʻe he koloa ʻa e tangata koloaʻiá ke fakalōloa ʻene moʻuí. (Sāme 49:​6-9; Mātiu 6:27) Te ne mate nai lolotonga ʻene tuli ki hono “ʻalunga,” ʻi he pisinisí nai. Mei hení, ko e meʻa mahuʻingá ke “fakatupu koloa ki he ʻOtua” pea ke fai ʻa e meʻa kotoa te tau malavá ke poupouʻiʻaki ʻa e ngaahi meʻa mahuʻinga ʻo e Puleʻangá.​—Luke 12:​13-21; Mātiu 6:33; 1 Timote 6:​17-19.

Fiefiaā ko Kinautolu ʻOku Nau Kātekina ʻa e ʻAhiʻahí

11. Ko e hā ʻa e ngaahi ʻamanaki ki he faʻahinga ko ia ʻoku piki ki heʻenau tuí ʻi he fehangahangai mo e ngaahi ʻahiʻahí?

¹¹ Koloaʻia pe masiva, ʻoku lava pē ke tau fiefiá kapau ʻoku tau kātekina ʻa hotau ngaahi ʻahiʻahí. (Semisi 1:​12-15) Kapau ʻoku tau kātekina ʻa e ngaahi ʻahiʻahi ʻaki ʻetau tuí taʻetoeueʻia, ʻoku lava ke pehē ʻoku tau fiefia, he ʻoku ʻi ai ʻa e fiefia ʻi hono fai ʻa e meʻa ʻoku totonú ʻi he vakai mai ʻa e ʻOtuá. ʻI he piki ki heʻenau tuí ʻo aʻu ki he maté, ʻoku maʻu ai ʻe he kau Kalisitiane fanauʻi ʻe he laumālié ʻa e “kalauni ʻo e moʻui,” ko e moʻui taʻefaʻamate ʻi hēvani. (Fakahā 2:10; 1 Kolinito 15:50) Kapau ʻoku tau maʻu ʻa e ngaahi ʻamanaki fakaemāmaní pea tauhi maʻu ʻetau tui ki he ʻOtuá, ʻoku lava ke tau hanga atu ai ki he moʻui taʻengatá, ʻi ha māmani palataisi. (Luke 23:43; Loma 6:23) He fai lelei ē ko Sihova kiate kinautolu kotoa ʻoku ngāueʻi ʻa e tui kiate iá!

12. ʻI he taimi ʻoku hokosia ai ʻa e mamahí, ko e hā ʻoku totonu ai ke ʻoua te tau pehē: “ʻOku mei he ʻOtua hoku ʻahiʻahiʻi”?

¹² ʻOku malava ke ʻahiʻahiʻi ʻaki ʻe Sihova tonu kitautolu ʻa e mamahí? ʻIkai, ʻoku ʻikai totonu ke tau pehē: “ʻOku mei he ʻOtua hoku ʻahiʻahiʻi.” ʻOku ʻikai feinga ʻa Sihova ia ke fakatupunga kitautolu ke fai angahala, ka ʻoku pau ke ne tokoniʻi kitautolu pea ʻomai kiate kitautolu ʻa e mālohi naʻe fiemaʻú ke kātekina ʻaki ʻa e ngaahi ʻahiʻahí kapau ʻoku tau tuʻumaʻu ʻi he tuí. (Filipai 4:13) ʻOku māʻoniʻoni ʻa e ʻOtuá, ko ia ai, ʻoku ʻikai te ne tuku kitautolu ʻi ha ngaahi tuʻunga te ne fakavaivaiʻi ʻa ʻetau fakafepaki ki he faihalá. Kapau ʻoku tau ʻai kitautolu ki ha tuʻunga taʻemāʻoniʻoni pea fai ha angahala, ʻoku ʻikai totonu ke tau tukuakiʻi ia, “he ko e ʻOtua ʻoku ʻikai maʻahiʻahiʻi ʻe he kovi, pea ʻoku ʻikai ke ʻahiʻahiʻi ha taha ʻe he ʻEne ʻAfio.” Neongo ʻe fakangofua nai ʻe Sihova ha ʻahiʻahi ke akonakiʻi ʻaki kitautolu maʻa ʻetau leleí, ʻoku ʻikai te ne ʻahiʻahiʻi kitautolu ʻaki ha taumuʻa kovi. (Hepelu 12:​7-11) ʻE fakataueleʻi nai kitautolu ʻe Sētane ke fai hala, ka ʻoku lava ʻe he ʻOtuá ke ne fakahaofi kitautolu mei he tokotaha fulikivanu ko iá.​—Mātiu 6:13.

13. Ko e hā ʻoku lava ke hokó kapau ʻoku ʻikai te tau talitekeʻi ha holi fehālaaki?

¹³ ʻOku fiemaʻu ke tau lotu fakamātoato koeʻuhi he ʻe fakatupunga nai ʻi ha tuʻunga pau ha holi fehālaaki ʻe lava ke ne fakataueleʻi kitautolu ke fai angahala. ʻOku pehē ʻe Sēmisi: “ʻOku ʻahiʻahiʻi ʻa e tangata taki taha he tohoaki ia ʻe heʻene holi aʻana.” ʻOku ʻikai lava ke tau tukuakiʻi ʻa e ʻOtuá ki heʻetau angahalá kapau kuo tau tuku hotau lotó ke nōfoʻi ʻi he holi angahalaʻiá. Kapau ʻoku ʻikai ke tau tukunoaʻi ha holi fehālaaki, ʻe ‘faifai pea tuʻituʻia ia,’ ʻo tauhi ia ʻi he lotó, “ʻo ne fanauʻi ha angahala.” ʻI he taimi ʻoku kakato ai ʻa e angahalá, ʻokú ne “faʻeleʻi ʻa e mate.” ʻOku hā mahino, ʻoku fiemaʻu ke leʻohi hotau lotó pea talitekeʻi ʻa e ngaahi filioʻi angahalaʻiá. (Palovepi 4:23) Naʻe fakatokanga kia Keini ʻe lōmekina ia ʻe he angahalá, ka naʻe ʻikai te ne talitekeʻi. (Senesi 4:​4-8) Ko ia, fēfē leva kapau ʻoku tau kamata ke tuli ki ha ʻalunga taʻefakatohitapu? Ko e moʻoni ʻoku totonu ke tau houngaʻia kapau ʻoku feinga ʻa e kau mātuʻa Kalisitiané ke fakatonutonu kitautolu koeʻuhi ke ʻoua naʻa tau faiangahala fakafepaki ki he ʻOtuá.​—Kaletia 6:1.

ʻOtuá​—Ko e Matavai ʻo e Ngaahi Meʻa Lelei

14. ʻI he ʻuhinga fē ʻoku lava ai ke pehē ʻoku “haohaoa” ʻa e ngaahi meʻaʻofa ʻa e ʻOtuá?

¹⁴ ʻOku totonu ke tau manatuʻi ko Sihová ko e Matavai, ʻikai ʻo e ngaahi ʻahiʻahi, ka ko e ngaahi meʻa lelei. (Semisi 1:​16-18) Naʻe tohi ʻa Sēmisi ki he kaungā-tuí ko e “kainga ʻofaʻanga” pea fakahaaʻi ko e ʻOtuá ko e Tokotaha-Foaki ia ʻo e ‘foaki lelei mo e meaʻofa haohaoá.’ Ko e meʻaʻofa fakalaumālie mo fakamatelie ʻa Sihová ʻoku “haohaoa,” pe kakato, ʻo ʻikai hala ai ha meʻa. ʻOku nau ʻalu “hifo” mei he ʻafioʻanga ʻo e ʻOtuá ʻi he ngaahi langí. (1 Tuʻi 8:39) Ko Sihova ʻa e “Tamai ʻa e ngaahi maama”​—ko e laʻaá, ko e māhiná, mo e ngaahi fetuʻú. ʻOkú ne toe ʻomai kiate kitautolu ʻa e maama fakalaumālie mo e moʻoni. (Sāme 43:3; Selemaia 31:35; 2 Kolinito 4:6) ʻI he ʻikai tatau mo e laʻaá ʻa ia ʻokú ne liliu ʻa e ngaahi ʻatá ʻi heʻene ngaʻunú pea ʻoku ʻi heʻene māʻolunga taupotú pē ʻi he hoʻatā mālié tonu, ʻoku ʻi heʻene tumutumú maʻu pē ʻa e ʻOtuá ʻi heʻene tokonaki mai ʻa e meʻa ʻoku leleí. Te ne teuʻi moʻoni kitautolu ke fehangahangai mo e ngaahi ʻahiʻahí kapau ʻoku tau ngāue ʻaonga kakato ʻaki ʻa ʻene ngaahi tokonaki fakalaumālie kuo ʻomai fakafou ʻi heʻene Folofolá mo e “tamaioeiki agatonu mo boto.”​—Mātiu 24:​45, PM.

15. Ko e hā ʻa e taha ʻo e ngaahi meʻaʻofa lelei taha ʻa Sihová?

¹⁵ Ko e hā kuo hoko ko e taha ʻo e ngaahi meʻaʻofa lelei taha ʻa e ʻOtuá? Ko hono ʻomai ʻa e ngaahi foha fakalaumālie ʻaki ʻa e laumālie māʻoniʻoní, ʻo ngāue fakataha mo e ongoongo leleí, pe “tala ʻo e moʻoni.” Ko e faʻahinga ko ia ʻoku nau hokosia ha fanauʻi fakalaumālié ko e “polopolo tokua,” kuo fili mei he lotolotonga ʻo e faʻahinga ʻo e tangatá ke hoko ko ha “puleʻanga mo e ngaahi taulaʻeiki” fakahēvani. (Fakahā 5:10; Efeso 1:​13, 14) Mahalo pē naʻe fakakaukau ʻa Sēmisi ki he ngaahi polopolo paʻale naʻe foaki ʻi Nīsani 16, ʻa ia ko e ʻaho ia naʻe toetuʻu ai ʻa Sīsuú, pea mo e foaki ʻo e foʻi mā uite ʻe ua ʻi he ʻaho Penitekosí, ʻi he taimi naʻe lilingi hifo ai ʻa e laumālie māʻoniʻoní. (Livitiko 23:​4-11, 15-17) ʻI he meʻa ko iá, ko Sīsū ʻa e polopoló pea ko e ngaahi “polopolo tokua,” ʻa hono kaungā-ʻeá. Fēfē kapau ʻoku tau maʻu ha ʻamanaki fakaemāmani? Sai, ʻi heʻetau tauhi maʻu ia ʻi heʻetau fakakaukaú te ne tokoniʻi kitautolu ke pipiki ki heʻetau tui ki he Tokotaha-Foaki ʻo e “foaki lelei,” ʻa ia kuó ne ʻai ke malava ʻa e moʻui taʻengatá ʻi he malumalu ʻo e pule ʻa e Puleʻangá.

Hoko ko ha ‘Tokotaha Fai ki he Folofolá’

16. Ko e hā ʻoku totonu ai ke tau ‘vave he fanongó, kae fakatotoka ki he leá pea ki he ʻitá’?

¹⁶ Tatau ai pē pe ʻoku tau hokosia ha ngaahi ʻahiʻahiʻi ʻo ʻetau tuí ʻi he taimí ni pe ʻikai, kuo pau ke tau hoko ko e “kau fai ki he folofola.” (Semisi 1:​19-25) ʻOku fiemaʻu ke tau “vave . . . he fanongo” ki he folofola ʻa e ʻOtuá, ʻo hoko ko e kau fai talangofua ki ai. (Sione 8:47) ʻI he tafaʻaki ʻe tahá, ke tau “fakatotoka ki he lea,” ʻo fakafuofua tokanga ʻetau ngaahi leá. (Palovepi 15:28; 16:23) Mahalo pē ʻoku naʻinaʻi mai ʻa Sēmisi kiate kitautolú ke ʻoua te tau vave ki he pehē ʻoku tupu hotau ngaahi ʻahiʻahí mei he ʻOtuá. ʻOku toe faleʻi kitautolu ke tau “fakatotoka ki he ʻita. He ko e ʻita ʻa e tangata ʻoku ʻikai te ne ngaue ki he maʻoniʻoni fakaʻotua.” Kapau ʻoku fakaʻitaʻi ʻi ha meʻa ʻoku lea ʻaki ʻe ha taha, ke tau ‘fakatotoka’ koeʻuhi ke fakaʻehiʻehi mei ha tali anga-sāuni. (Efeso 4:​26, 27) Ko ha laumālie ʻiteʻita ʻa ia te ne fakatupunga nai ha ngaahi palopalema kiate kitautolu pea hoko ko ha ʻahiʻahi ki he niʻihi kehé, ʻe ʻikai lava ke ne fakatupu ʻe ia ʻa e tui ʻoku fiemaʻu meiate kitautolu ʻe hotau ʻOtua māʻoniʻoní. Kae kehe, kapau ʻoku tau “ʻatamai lahi,” te tau “fakatotoka ki he ʻita,” pea ʻe tohoekina mai ai kiate kitautolu ʻa hotau ngaahi tokouá mo e tuofāfiné.​—Palovepi 14:29.

17. Ko e hā ʻoku lavaʻí ʻi hono toʻo atu ʻo e koví mei he lotó mo e ʻatamaí?

¹⁷ ʻOku fiemaʻu papau ke tau ʻatā mei he “veve kotoa pe”​—ʻa e meʻa kotoa pē ʻoku fakaliliʻa ai ʻa e ʻOtuá mo fakatupunga hono houhaú. ʻIkai ngata aí, kuo pau ke tau ‘hiko ʻa e ngaohaʻa ʻo e lotokoví.’ Ko kitautolu kotoa ʻoku totonu ke tau fakaʻataʻatā mei heʻetau moʻuí ha ʻuli pē ʻi he kakanó pe laumālié. (2 Kolinito 6:19 [2Ko 7:​1, PM]; 1 Pita 1:​14-16; 1 Sione 1:9) Ko hono toʻo ʻo e koví mei he lotó mo e ʻatamaí kuo tokoniʻi ai kitautolu ke “tali angavaivai ʻa e folofola kuo to” ʻo e moʻoní. (Ngāue 17:​11, 12) Tatau ai pē pe ko e hā hono fuoloa ʻo ʻetau hoko ko e kau Kalisitiané, kuo pau ke tau hokohoko atu hono tuku ke tō ʻiate kitautolu ʻa e ngaahi moʻoni Fakatohitapu lahi ange. Ko e hā hono ʻuhingá? Koeʻuhi ʻi he laumālie ʻo e ʻOtuá, ko e folofola kuo toó ʻokú ne fakatupu “ʻa e tangata foʻou” ʻa ia ʻokú ne maʻu ʻa e fakamoʻuí.​—Efeso 4:​20-24.

18. ʻOku anga-fēfē ʻa e kehekehe ʻa e taha ko ha fanongo pe ki he folofolá mei he taha ko ia ʻoku toe fai ki aí?

¹⁸ ʻOku anga-fēfē ʻetau fakahaaʻi ko e folofolá ʻa hotau tatakí? ʻAki ʻetau talangofua ʻo hoko “ko e kau fai ki he folofola, ʻo ʻikai ko e kau fanongo pe.” (Luke 11:28) “Ko e kau fai” ʻoku nau maʻu ʻa e tui ʻa ia ʻokú ne fakatupu ʻa e ngaahi ngāue pehē hangē ko e ngāue faivelenga ʻi he ngāue fakafaifekau faka-Kalisitiané mo e kau maʻu pē ʻi he ngaahi fakataha ʻa e kakai ʻa e ʻOtuá. (Loma 10:​14, 15; Hepelu 10:​24, 25) Ko ha tokotaha fanongo pē ki he folofolá “ʻoku tatau ia mo ha siana ʻoku ne fakasio ki he fōtunga naʻe tupu mo ia ʻi ha sioʻata.” ʻOkú ne fakasio, peá ne mavahe leva ʻo ngalo ʻa e meʻa naʻe fiemaʻu nai ke fakaleleiʻiʻaki hono fōtungá. ʻI he tuʻunga ko e “kau fai ki he folofola,” ʻoku tau ako tokanga pea talangofua ki he “lao haohaoa,” ʻa e ʻOtuá ʻa ia ʻoku kau ai ʻa e meʻa kotoa pē ʻokú ne fiemaʻu meiate kitautolú. Ko ia, ko e tauʻatāina ʻoku tau fiefia aí ko e mātuʻaki tuʻu fehangahangai ia ʻo e pōpula ki he angahalá mo e maté, he ʻoku taki atu ia ki he moʻuí. Ko ia, tuku ke tau ‘taʻutū ai ʻi he lao haohaoá,’ ʻo sivisiviʻi maʻu pē ia pea talangofua ki ai. Pea fakakaukau atu! ʻI he tuʻunga ‘ko e kau fai ngaue, ʻikai ko ha kau fanongo kae ngalo,’ ʻoku tau maʻu ai ʻa e fiefia ko e ola ia ʻo e hōifua mai ʻa e ʻOtuá.​—Sāme 19:​7-11.

Mātuʻaki Lahi Ange ʻi he Hoko Pē ʻo Tōʻongaʻaki ko e Kau Lotú

19, 20. (a) Fakatatau ki he Semisi 1:​26, 27, ko e hā ʻoku fiemaʻu ʻe he lotu maʻá meiate kitautolú? (e) Ko e hā ʻa e ngaahi faʻifaʻitakiʻanga ʻe niʻihi ʻo e lotu taʻeʻuliʻí?

¹⁹ Kapau ʻoku tau loto ke fiefia ʻi he hōifua fakaʻotuá, ʻoku fiemaʻu ke tau manatuʻi ko e lotu moʻoní ʻoku ʻikai ko ha faʻahinga tōʻonga lotu pē. (Semisi 1:​26, 27) ʻOku tau fakakaukau nai ʻoku tau fakahōifua ʻi he ‘tōʻongaʻaki ko e kau lotu’ ʻa Sihová, ka ko e meʻa moʻoni ʻoku laú ko e anga ʻo ʻene fakafuofua mai kiate kitautolú taki taha. (1 Kolinito 4:4) Ko ha mele mafatukituki ʻe taha, ko e taʻemalava nai ke ‘ʻai piti e ʻeleló.’ Te tau kākaaʻi kitautolu kapau ʻoku tau fakakaukau ʻoku hōifua mai ʻa e ʻOtuá ki heʻetau lotú kapau ʻoku tau lauʻikoviʻi ʻa e niʻihi kehé, tala ʻa e ngaahi loi, pe ngāuehalaʻaki ʻa e ʻeleló ʻi ha ngaahi founga kehe. (Livitiko 19:16; Efeso 4:25) Ko e moʻoni, ʻoku ʻikai te tau fiemaʻu ʻetau “toʻonga lotu” ke hoko ʻo “launoa” pea taʻefakahōifua ki he ʻOtuá ʻi ha faʻahinga ʻuhinga pē.

²⁰ Neongo ʻoku ʻikai ke lave ʻa Sēmisi ki he tafaʻaki kotoa pē ʻo e lotu maʻá, ʻokú ne pehē ʻoku kau ki ai ʻa e ‘ʻaʻahi ki he faʻahinga matuʻamaté mo e kau uitoú ʻi heʻenau mamahí.’ (Kaletia 2:10; 6:10; 1 Sione 3:18) ʻOku fakahaaʻi ʻe he fakatahaʻanga Kalisitiané ʻa e mahuʻingaʻia makehe ʻi he tokonaki maʻá e kau uitoú. (Ngāue 6:​1-6; 1 Timote 5:​8-10) Koeʻuhi ko e ʻOtuá ʻa e Tokotaha-Maluʻi ʻo e uitoú mo e tamai-maté, tau fāitaha mo Ia ʻaki ʻa hono fai ʻa e meʻa ʻoku tau lavá ke tokoniʻi kinautolu fakalaumālie mo fakamatelie. (Teutalonome 10:​17, 18) ʻOku toe ʻuhinga ʻa e lotu maʻá ko “ʻete tauhi kita mei mamani ke taʻe hato ʻila,” ʻa ia ko e sōsaieti taʻemāʻoniʻoni ia ʻo e faʻahinga ʻo e tangatá ʻoku tokoto ʻi he mafai ʻo Sētané. (Sione 17:16; 1 Sione 5:19) Ko ia ai, tau tuʻumaʻu ʻo ʻatā mei he ʻulungaanga fakaʻotuamate ʻo e māmaní koeʻuhi ke tau fakalāngilangiʻi ai ʻa Sihova pea hoko ʻo ʻaonga ki heʻene ngāué.​—2 Timote 2:​20-22.

21. ʻI he fekauʻaki mo e tohi ʻa Semisí, ko e hā ʻa e toe ongo fehuʻi ʻoku taau ke tau fakakaukau ki ai?

²¹ Ko e akonaki ko ia ʻa Sēmisi kuo tau lāulea mai ki aí ʻoku totonu ke ne tokoniʻi kitautolu ke kātekina ʻa e ngaahi ʻahiʻahí pea piki ki heʻetau tuí. ʻOku totonu ke tau fakalahiʻi ʻetau houngaʻia ki he Tokotaha-Foaki anga-ʻofa ʻo e ngaahi meʻaʻofa leleí. Pea ʻoku tokoniʻi kitautolu ʻe he ngaahi lea ʻa Sēmisí ke fai ʻa e lotu maʻá. Ko e hā ʻa e toe meʻa kehe ʻokú ne ʻomai ki heʻetau tokangá? Ko e hā ʻa e ngaahi sitepu lahi ange ke tau laka ai ke fakamoʻoniʻi ʻoku tau maʻu ʻa e tui moʻoni kia Sihová?

[Fakamatala ʻi lalo]

Ko e Hā Haʻo Tali?

◻ Ko e hā te ne tokoniʻi kitautolu ke kātekina ʻa e ngaahi ʻahiʻahí?

◻ Neongo ʻa e ngaahi ʻahiʻahí, ko e hā ʻoku lava ai ke fiefia ʻa e kau Kalisitiané?

◻ ʻOku lava fēfē ke tau hoko ko e kau fai ki he folofolá?

◻ Ko e hā ʻoku kau ki he lotu maʻá?

[Fakatātā ʻi he peesi 9]

ʻI he taimi ʻoku tau ʻi he malumalu ai ʻo e ʻahiʻahí, ngāueʻi ʻa e tui ki he mafai ʻo Sihova ke tali ʻa e ngaahi lotú