‘Mou Toutou Fefakamolemoleʻaki Maʻataʻatā’

“Mou toutou fekātakiʻaki mo fefakamolemoleʻaki maʻataʻatā.”​—KOLOSE 3:​13, NW.

 1. (a) ʻI he taimi naʻe fokotuʻu mai ai ʻe Pita ke tau fakamolemoleʻi ʻa e niʻihi kehé “ʻo tuʻo fitu,” ko e hā ne tau mei fakakaukau ai naʻá ne fuʻu anga-lelei? (e) Ko e hā naʻe ʻuhinga ki ai ʻa Sīsū ʻi he taimi naʻá ne pehē ai ʻoku totonu ke tau fakamolemole “tuʻo fitu ʻo liungaʻaki ʻa e fitungofulu”?

“ʻEIKI, ʻe tuʻo fiha ʻa e fai hala ʻa hoto tokoua kia kita, ka te fakamolemole pe? ʻo tuʻo fitu ʻapē?” (Mātiu 18:21) Naʻe fakakaukau nai ʻa Pita naʻá ne mātuʻaki fuʻu angalelei ʻi heʻene fokotuʻu naʻe faí. ʻI he taimi ko iá, naʻe pehē ʻe he talatukufakaholo fakalāpaí, ʻoku ʻikai totonu ke laka hake ʻi he tuʻo tolú hano fakamolemoleʻi ʻe ha taha ha hia tatau.a Fakaʻuta atu ki he ʻohovale ʻa Pitá, ʻi he taimi naʻe tali ange ai ʻe Sīsū: “ʻOku ʻikai te u pehe kiate koe, ʻO tuʻo fitu: ka, ʻO tuʻo fitu liunga ʻaki ʻa e fitungofulu”! (Mātiu 18:22) Ko e toutou ʻasi ʻa e fitú ʻoku tatau pē ia mo e pehē atu “taʻengata.” ʻI he vakai ʻa Sīsuú, ʻoku ʻikai moʻoni ʻi ai ha ngataʻanga ia ki he lahi ʻoku totonu ke fakamolemoleʻi ai ʻe ha Kalisitiane ʻa e niʻihi kehé.

 2, 3. (a) Ko e hā ʻa e ngaahi tuʻunga ʻe niʻihi ʻe hā ngali faingataʻa nai ke fakamolemoleʻi ʻa e niʻihi kehé? (e) Ko e hā ʻoku lava ai ke tau falala ko e lelei pē ia maʻa kitautolu ke fakamolemoleʻi ʻa e niʻihi kehé?

² Kae kehe, ko hono ngāueʻaki ʻa e akonaki ko iá, ʻoku ʻikai faʻa faingofua. Ko hai ha taha ʻiate kitautolu kuo teʻeki ai ke ne ongoʻi ʻa e mahuhu ʻo hano fakalotomamahiʻi taʻetotonu? Mahalo pē ko ha taha naʻá ke falala ki ai kuó ne lavakiʻi ʻe ia ha meʻa fakapulipuli. (Palovepi 11:13) Ko ha lea taʻefakakaukauʻi nai ʻa ha kaumeʻa mamae kuó ne ‘hokohokaʻi koe hangē ha heletā.’ (Palovepi 12:18) Ko hono ngaohikoviʻi koe ʻe ha taha naʻá ke ʻofa mo falala ki aí kuó ne fakatupunga nai ai ha ngaahi kafo loloto. ʻI he taimi ʻoku hoko ai ʻa e ngaahi meʻa peheé, ko e ongo fakaenatula pē ʻoku tau maʻú nai ko e ongoʻi ʻita. Te tau hehema nai ʻo taʻofi ʻa e toe lea ki he tokotaha faihalá, pea mātuʻaki fakaʻehiʻehi fakaʻaufuli meiate ia kapau ʻoku ala lava. Ko hono fakamolemoleʻi iá, ʻe hā nai, te ne fakaʻatā ai ia ke ne hao mei heʻene fakalotomamahiʻi kitautolú. Kae kehe, ko hono tukutauhi ʻa e lotomamahí, te tau iku ai pē ʻo fakamamahiʻi kitautolu.

³ Ko ia ai, ʻoku akoʻi ʻe Sīsū kitautolu ke tau fakamolemole​—“ʻo tuʻo fitu liungaʻaki ʻa e fitungofulu.” ʻOku papau moʻoni ko ʻene ngaahi akonakí ʻe ʻikai ʻaupito hoko ia ko ha fakatuʻutāmaki kiate kitautolu. Ko e meʻa kotoa pē naʻá ne akoʻakí ko e tupu ia meia Sihova, ‘ʻokú ne ako kitautolu ke fai meʻa ʻaonga.’ (Aisea 48:17; Sione 7:​16, 17) ʻOku ʻuhinga lelei leva, ʻoku pau ko e lelei pē maʻa kitautolú ke fakamolemoleʻi ʻa e niʻihi kehé. Ki muʻa ke tau lāulea ki he ʻuhinga ʻoku totonu ai ke tau fakamolemolé pea mo e founga ʻe lava ke tau fai pehē aí, ʻe tokoni nai ke tomuʻa fakamahinoʻi ko e hā ʻa e fakamolemolé pea mo e hā ʻoku ʻikai ko iá. Ko ʻetau fakakaukau fekauʻaki mo e fakamolemolé ʻe ʻi ai nai ʻene kaunga ki heʻetau malava ko ia ke fakamolemole ʻi he taimi ʻoku fakalotomamahiʻi ai kitautolu ʻe he niʻihi kehé.

 4. Ko e hā ʻoku ʻikai ʻuhinga ki ai ʻa e fakamolemoleʻi ʻo e niʻihi kehé, ka ʻoku anga-fēfē ʻa hono fakamatalaʻi ʻo e fakamolemolé?

⁴ Ko hono fakamolemoleʻi ʻa e niʻihi kehé ki ha ngaahi hala kiate kita tokotaha ʻoku ʻikai ʻuhinga ia ke tau fakamolemoleʻi noaʻia pē pe fakasiʻisiʻi ʻa e meʻa kuo nau faí; pea ʻoku ʻikai ʻuhinga ia ke fakaʻatā ai ʻa e niʻihi kehé ke nau maʻu faingamālie ai ke ngāue taʻetotonuʻaki kitautolu. Kae kehe, ʻi he taimi ʻoku fakamolemoleʻi ai kitautolu ʻe Sihová, ʻoku ʻikai moʻoni ke ne fakamaʻamaʻaʻi ʻe ia ʻetau ngaahi angahalá, pea ʻe ʻikai ʻaupito te ne fakaʻatā ʻa e tangata angahalaʻiá ke ne tāmalaki ʻene meesí. (Hepelu 10:29) Fakatatau ki he Insight on the Scriptures, ko e fakamolemolé ʻoku fakaʻuhingaʻi ia ko e “fai ʻo ha fakamolemole ki ha taha faihala; ʻikai toe ongoʻi loto-mamahi kiate ia koeʻuhi ko haʻane faihala pea mo e tuku fakaʻaufuli ʻo hano toe ʻeke ha totongi-huhuʻi.” (Voliume 1, peesi 861)b ʻOku tokonaki mai ʻe he Tohitapú kiate kitautolu ʻa e ngaahi ʻuhinga lelei ki hono fakamolemoleʻi ʻo e niʻihi kehé.

Ko e Hā ke Fakamolemoleʻi Ai ʻa e Niʻihi Kehé?

 5. Ko e hā ʻa e ʻuhinga mahuʻinga ke fakamolemoleʻi ai ʻa e niʻihi kehé ʻoku fakamahino mai ʻe he Efeso 4:33 [5:​1, PM]?

⁵ Ko ha ʻuhinga mahuʻinga ke fakamolemoleʻi ai ʻa e niʻihi kehé ʻoku fakahā mai ia ʻi he Efeso 4:33 (5:1, PM): “Ko ia, mou hoko muʻa ko e kau faʻifaʻitaki ki he ʻOtua, ʻo tāu mo e fanau kuo ʻofeina.” ʻI he tuʻunga fē ʻoku totonu ai ke tau “hoko . . . ko e kau faʻifaʻitaki ki he ʻOtua”? Ko e foʻi lea “ko ia,” ʻokú ne fakafehokotaki ʻa e fakamatalá mo e foʻi veesi ki muʻá, ʻa ia ʻoku pehē: “Ka mou angaʻofa muʻa ʻi hoʻomou feangai, mo manavaʻofa, pea mou [“fefakamolemoleʻaki maʻataʻatā,” NW] ʻo hange foki ko e ʻOtua ne ne [“fakamolemole maʻataʻatā,” NW] kimoutolu ʻia Kalaisi.” (Efeso 4:​32, fakaʻītali ʻamautolu.) ʻIo, ʻi he aʻu mai ki he fakamolemolé, ʻoku totonu ke tau hoko ko e kau faʻifaʻitaki ki he ʻOtuá. Hangē pē ko e feinga ʻa ha kiʻi tamasiʻi ke hangē tofu pē ko ʻene tamaí, ko kitautolú, koeʻuhí ko e fānau ʻoku mātuʻaki ʻofa ai ʻa Sihova, ʻoku totonu ke tau fiemaʻu ke tau hoko ʻo hangē ko ʻetau Tamai faʻa fakamolemole fakahēvaní. He meʻa fakafiefia pau moʻoni ia ki he loto ʻo Sihová ʻi heʻene fofonga hifo mei hēvani ʻo ne mamata ki heʻene fānau fakaemāmaní ʻoku nau feinga ke hangē ko iá ʻo fefakamolemoleʻaki!​—Luke 6:​35, 36; fakafehoanaki mo Mātiu 5:​44-48.

 6. ʻI he founga fē ʻoku ʻi ai ai ha fuʻu faikehekehe lahi fakaʻulia ʻi he fakamolemole ʻa Sihová pea mo kitautolú?

⁶ Ko e moʻoni, ʻe ʻikai ʻaupito lava ke tau fakamolemole ʻi ha tuʻunga haohaoa ʻo hangē ko ia ʻoku fai ʻe Sihová. Ka ko e taha ia ʻa e toe ʻuhinga ʻoku totonu ai ke tau fefakamolemoleʻakí. Fakakaukau angé: ʻOku ʻi ai ʻa e fuʻu faikehekehe lahi ʻaupito ʻi he vahaʻa ʻo e fakamolemole ʻa Sihová pea mo kitautolú. (Aisea 55:​7-9) ʻI he taimi ʻoku tau fakamolemoleʻi ai ʻa e faʻahinga kuo nau fai angahala mai kiate kitautolú, ʻoku faʻa fai ia ʻaki ʻa e lāuʻilo ʻe vavé ni pē haʻatau fiemaʻu nai kinautolu ke totongi mai ʻetau fai lelei angé ʻaki hono fakamolemoleʻi kitautolu. Fekauʻaki mo e faʻahinga ʻo e tangatá, ʻoku hoko maʻu pē ʻa e tuʻunga ko e fakamolemoleʻi ʻe he kau angahala ʻa e kau angahala. Kae kehe, ʻi he fekauʻaki mo Sihová, ko e fakamolemolé ʻoku tafaʻaki taha maʻu pē. ʻOkú ne fakamolemoleʻi kitautolu, ka he ʻikai ʻaupito ha fiemaʻu ia kiate kitautolu ke fakamolemoleʻi ia. Kapau ʻoku lava ʻe Sihova, ʻa ia ʻoku ʻikai te ne fai ha angahalá, ke ne fakamolemoleʻi mātuʻaki anga-ʻofa mo fakaʻaufuli kitautolu, ʻikai ʻoku totonu mo kitautolu faʻahinga angahalaʻia ʻo e tangatá ke tau feinga ke fefakamolemoleʻaki?​—Mātiu 6:12.

 7. Kapau ʻoku tau fakafisi ke fakamolemoleʻi ʻa e niʻihi kehé ʻi he taimi ʻoku ʻi ai ai ha makatuʻunga ki he mēsí, ʻe anga-fēfē ʻa e lava ke ne uesia kovi hotau vahaʻangatae mo Sihová?

⁷ ʻOku toe mahuʻinga ange foki, kapau ʻoku tau fakafisi ke fakamolemoleʻi ʻa e niʻihi kehé neongo ʻoku ʻi ai ha makatuʻunga ki ha meesi, ʻe lava ke uesia kovi ai hotau vahaʻangatae mo e ʻOtuá. ʻOku ʻikai ko e kole mai pē ʻa Sihova ke tau fefakamolemoleʻaki; ʻokú ne ʻamanekina mai kitautolu ke tau fai pehē. Fakatatau ki he ngaahi Konga Tohitapú, ko e tafaʻaki ʻe taha ʻokú ne ueʻi kitautolu ke fakamolemolé koeʻuhí ke fakamolemoleʻi nai ai kitautolu ʻe Sihova, pe koeʻuhí kuó ne ʻosi fakamolemoleʻi kitautolu. (Mātiu 6:14; Maake 11:25; Efeso 4:32; 1 Sione 4:11) Kapau leva ʻoku tau taʻeloto ke fakamolemoleʻi ʻa e niʻihi kehé lolotonga ia ʻoku ʻi ai ʻa e ʻuhinga lelei ke fai pehē ai, ʻe lava ke tau ʻamanekina ha fakamolemole pehē meia Sihova?—Mātiu 18:​21-35.

 8. Ko e hā ʻoku iku lelei ai kiate kitautolu ʻa e hoko ʻo fakamolemolé?

⁸ ʻOku akoʻi ʻe Sihova ki heʻene kakaí “ʻa e hala lelei ke nau fou ai.” (1 Tuʻi 8:36) ʻI he taimi ʻokú ne fakahinohinoʻi ai kitautolu ke fefakamolemoleʻakí, ʻoku lava ke tau falala pau ko e lelei pē maʻa kitautolú ʻokú ne tokanga mai ki aí. ʻAki ʻa e ʻuhinga lelei ʻoku tala mai ai kiate kitautolu ʻe he Tohitapú ke “mou fakaataatā ki he houhau.” (Loma 12:​19, PM) Ko e loto-mamahí ko ha kavenga mamafa ia ke fua ʻi he moʻuí. ʻI he taimi ʻoku tau tukulotoa ai iá, ʻokú ne keina ʻetau fakakaukaú, kaihaʻasia ʻa e melinó meiate kitautolu, pea lōmia ʻetau fiefiá. Ko e ʻita fuoloá, ʻo hangē ko e meheká, ʻoku lava ke ne fakahoko ha nunuʻa fakatuʻutāmaki ki heʻetau moʻui lelei fakasinó. (Palovepi 14:30) Pea lolotonga ʻetau tofanga ʻi he ngaahi meʻá ni kotoa, ʻe fou pē nai ʻa e tokotaha faihalá ia ʻi hono ʻalungá ʻo ʻikai haʻane ʻilo ʻe taha ki hotau faingataʻaʻiá! ʻOku ʻilo ʻe hotau Tokotaha-Fakatupu ʻofá ʻoku fiemaʻu kiate kitautolu ke fakamolemoleʻi loto-fiefai ʻa e niʻihi kehé ʻo ʻikai ko ha lelei pē maʻa kinautolu kae pehē foki kiate kitautolu. Ko e akonaki faka-Tohitapu ke fakamolemolé, ko e moʻoni, ‘ko e hala lelei ke fou ai.’

“Mou Toutou Fekātakiʻaki”

 9, 10. (a) Ko e ngaahi tuʻunga fēfē ʻoku ʻikai loko fiemaʻu ai ha fuʻu fakamolemolé? (e) Ko e hā ʻoku fokotuʻu mai ʻe he kupuʻi lea “mou fekatakiʻaki”?

⁹ Ko e ngaahi kafo fakakakanó ʻe fakahokohoko nai mei he fanga kiʻi lavea iikí ʻo aʻu ki he ngaahi lavea lolotó, pea ʻoku ʻikai fiemaʻu kiate kinautolu kotoa ʻa e tokanga lahi tatau. ʻOku pehē pē mo e ngaahi kafo fakaeongó​—ʻoku loloto ange ʻa e ngaahi lavea ʻe niʻihi ʻi he niʻihi. ʻOku fiemaʻu moʻoni ke tau ʻai ke fuʻu lahi ʻa e kiʻi fakavolu siʻisiʻi kotoa pē ʻoku tau faingataʻaʻia ai ʻi hotau vahaʻangatae mo e niʻihi kehé? Ko e fanga kiʻi fakatupuʻita, taʻetokaʻi, mo e fakatupulotomamahi iikí ko e konga pē ia ʻo e moʻuí pea ʻoku ʻikai loko fiemaʻu ia ke fai ha fuʻu fakamolemole. Kapau kuo ʻiloa kitautolu ko e faʻahinga ʻoku fakaʻehiʻehi mei he niʻihi kehé ʻi he kiʻi fakalotomamahi siʻisiʻi kotoa pē pea tau kouna leva kinautolu ka nau ka toki kole fakamolemole mai te tau toki anga-lelei atú, te tau ʻai nai ai kinautolu ke nau fakaalaala ʻi heʻetau feohí​—pe ko ʻenau mātuʻaki fakamamaʻo!

¹⁰ Ka, ʻoku lelei ange ke “ʻiloa ʻi he fakaʻatuʻí.” (Filipai 4:5, Phillips) Koeʻuhí ko e ngaahi meʻamoʻui taʻehaohaoa kitautolu ʻoku tau ngāue uma ki he uma, ʻe ʻuhinga lelei ai ke tau ʻamanekina ʻe fakaʻitaʻi nai kitautolu ʻe hotau fanga tokouá ʻi he taimi ki he taimi, pea te tau toe fai pehē nai foki kiate kinautolu. ʻOku fakahinohinoʻi kitautolu ʻe he Kolose 3:​13 (NW): “Mou toutou fekātakiʻaki.” ʻOku fokotuʻu mai ʻe he fakamatala ko iá ke tau anga-kātaki ki he niʻihi kehé, ʻo kātakiʻi ʻa e ngaahi meʻa ʻoku ʻikai ke tau saiʻia ai ʻiate kinautolú pe ko e ngaahi anga ʻoku tau ʻilo nai ʻoku fakatupuʻitá. Ko e kātaki mo e fakamaʻumaʻu peheé te ne lava ʻo tokoniʻi kitautolu ke fekuki mo e fanga kiʻi maoloolo mo e fanga kiʻi makohikohi iiki ʻoku tau maʻu ʻi heʻetau feangainga ko ia mo e niʻihi kehé​—ʻo ʻikai fakahohaʻasi ai ʻa e melino ʻa e fakatahaʻangá.​—1 Kolinito 16:14.

Taimi ʻOku Loloto Ai ʻa e Ngaahi Laveá

11. ʻI he taimi ʻoku angahala mai ai ʻa e niʻihi kehé kiate kitautolú, ko e hā ʻa e meʻa te ne lava ʻo tokoniʻi kitautolu ke fakamolemoleʻi kinautolú?

¹¹ Kae kehe, fēfē kapau ʻoku angahala mai ʻa e niʻihi kehé kiate kitautolu, ʻo fakatupu ha lavea ʻoku ʻilonga lelei. Kapau ʻoku ʻikai ke fuʻu lahi fēfē ʻa e angahalá, ʻe ʻikai nai ke loko faingataʻa ke tau ngāueʻaki ʻa e akonaki ʻa e Tohitapú ke ‘fefakamolemoleʻaki maʻataʻatā.’ (Efeso 4:32) Ko ha tokateu pehē ke fakamolemolé ʻoku fehonakimālie ia mo e ngaahi lea fakamānavaʻi ʻa Pitá: “Sinoemeʻa ke mou tauhi ai pe hoʻomou feʻofaʻaki ke tukuingata pe: he ko e ʻofa ʻoku ne ʻufiʻufi ha fuʻufuʻunga angahala.” (1 Pita 4:8) Ko hono tauhi maʻu ʻi he fakakaukaú ko e kau angahala foki mo kitautolú, ʻe tokoni ia kiate kitautolu ke fakamolemoleʻi ʻa e ngaahi hala ʻa e niʻihi kehé. ʻI he taimi ʻoku tau fakamolemole pehē aí, ʻoku tau tuku ange ai ʻa e loto-mamahí kae ʻikai ko hono tukutauhi ia. Ko hono olá leva, ko hotau vahaʻangatae mo e tokotaha faihalá ʻe ʻikai nai te ne hokosia ha kovi tuʻuloa, pea te tau tokoni ai ke maluʻi ʻa e melino mahuʻinga ʻo e fakatahaʻangá. (Loma 14:19) ʻI he faai atu ʻa e taimí, ʻe fakaʻau pē ʻo mole ha toe manatu ki he meʻa naʻá ne faí.

12. (a) Ko e hā ʻa e kamata te tau fiemaʻu nai koeʻuhí kae fakamolemoleʻi ha taha kuó ne fakalotomamahiʻi lahi kitautolu? (e) ʻOku anga-fēfē ʻa hono fakamahino mai ʻe he ngaahi lea ʻi he Efeso 4:26 ʻoku totonu ke tau fakaleleiʻi ʻa e ngaahi meʻá ʻi he vave tahá?

¹² Fēfē leva, kapau ʻoku angahala mai ha taha kiate kitautolu ʻi ha founga mafatukituki ange, ʻo fakalaveaʻi loloto kitautolu? Ko e fakatātaá, ne tala nai ʻe hao kaumeʻa falalaʻanga ʻa e ngaahi meʻa mātuʻaki fakafoʻituitui naʻá ke talafūfū kiate iá. ʻOkú ke ongoʻi mātuʻaki mamahi, mā, pea lavakiʻi. Kuó ke feinga ke tuku ange ia mei hoʻo fakakaukaú ka ʻoku ʻikai pē mavahe ia. ʻI he tuʻunga peheé, ʻe fiemaʻu nai kiate koe ke ke kamata ʻa hono fakaleleiʻi ʻa e palopalemá, mahalo pē ʻaki haʻo lea ki he tokotaha faihalá. ʻOku fakapotopoto ke fai ʻa e meʻá ni ki muʻa ʻoku teʻeki ai ha faingamālie ke fakaʻau ke kovi ange ʻa e meʻá. Naʻe enginaki mai ʻa Paula kiate kitautolu: “ʻIta pe, kae ʻoua ʻe angahala ai [ʻa ia ko hono tukulotoʻi pe fakahoko ʻetau ʻitá]: ʻoua ʻe tuku ke to ʻa e laʻa ʻoku mou kei mamahi.” (Efeso 4:26) ʻOku toe ʻuhinga ange ʻa e ngaahi lea ʻa Paulá ʻi he moʻoniʻi meʻa ko ia fekauʻaki mo e kau Siú, ʻoku fakaʻilongaʻi ʻe he tō ʻa e laʻaá ʻa e ngata ʻa e ʻaho ʻe taha mo e kamata ʻo e ʻaho foʻou. Ko ia, ko e akonakí leva ko e: Fakaleleiʻi ʻa e meʻá ʻi he vave tahá!​—Mātiu 5:​23, 24.

13. ʻI he taimi ʻoku tau fakakofiofi ai ki ha taha kuó ne faihala mai kiate kitautolu, ko e hā ʻoku totonu ko ʻetau taumuʻá iá, pea ko e hā ʻa e ngaahi fokotuʻu ʻe lava ʻo tokoniʻi kitautolu ke aʻusia iá?

¹³ ʻOku totonu ke fēfē hoʻo fakaofiofi ki he tokotaha faihalá? “Kumi ki he melino, ʻIo, ʻo tuli ki ai,” ko e lau ia ʻa e 1 Pita 3:11. Ko hoʻo taumuʻá leva, ʻoku ʻikai ko e fakahā ʻa e ʻitá ka ko e fai ha fakamelino mo ho tokouá. Ke aʻusia iá, ʻoku lelei tahá ke fakaʻehiʻehi mei he ngaahi lea mo e ngaahi tōʻonga fefeká; ko e ngaahi meʻá ni te ne fakatupunga nai ha tali tatau mei he tokotaha ʻe tahá. (Palovepi 15:18; 29:11) Tānaki atu ki aí, fakaʻehiʻehi mei he ngaahi lea fakalahi hangē ko e, “ʻOkú ke faʻa . . . !” pe, “Naʻe halaʻatā ke ke . . . !” Ko e ngaahi lea fakalahi peheé te ne fakatupunga pē nai ia ke hoko ʻo kumi kalofanga. ʻI he ʻikai peheé, ʻai ʻa e tō ho leʻó mo e fōtunga ho matá ke ne fakamahino atu ʻokú ke fiemaʻu ke fakaleleiʻi ʻa e meʻa kuó ne fakalotomamahiʻi lahi koé. ʻAi ke fakahangatonu hoʻo fakamatalaʻi ʻa e anga hoʻo ongoʻi fekauʻaki mo e meʻa naʻe hokó. Tuku ha faingamālie ki he tokotaha kehé ke ne fakamatalaʻi ʻene ngaahi faiangá. Fanongo ki he meʻa te ne leaʻakí. (Semisi 1:19) Ko e hā ha lelei ʻe fai ʻe he meʻa ko iá? ʻOku fakamatala ʻe he Palovepi 19:11: “Ko e fakapotopoto ʻa ha tangata ʻa ia ʻokú ne fakatotoka ai ki he ʻita: Pea ko ʻene lakai ha angahala ko hono langilangi ia.” Ko hono maʻu ha mahino ʻo fekauʻaki mo e ngaahi ongoʻi ʻa e tokotaha kehé pea mo e ngaahi ʻuhinga ki heʻene tōʻongá, te ne tatala nai ʻa e ngaahi fakakaukau mo e ngaahi ongoʻi hala fekauʻaki mo iá. ʻI he taimi ʻoku tau fakaofiofi ai ki he meʻa ʻoku hokó ʻaki ʻa e taumuʻa ko e fakamelino pea tauhi maʻu ki he fakakaukau ko iá, ʻe hangehangē pē ʻe lava ke fakaleleiʻi ha kiʻi taʻefemahinoʻaki pē, fai ʻa e ngaahi kole fakamolemole ʻoku taau ke faí, pea ʻe fakaaʻu leva ʻa e fakamolemolé.

14. ʻI he taimi ʻoku tau fakamolemoleʻi ai ʻa e niʻihi kehé, ʻi he ʻuhinga fē ʻoku totonu ke tau fakangaloʻi aí?

¹⁴ ʻOku ʻuhinga ʻa hono fakamolemoleʻi ʻo e niʻihi kehé kuo pau moʻoni ke tau fakangaloʻi ʻa e meʻa naʻe hokó? Manatu ki he faʻifaʻitakiʻanga ʻa Sihová tonu ʻi he fekauʻaki mo e meʻá ni, ʻo hangē ko ia naʻe lāulea ki ai ʻa e kupu ki muʻá. ʻI he taimi ʻoku pehē ai ʻe he Tohitapú ʻoku fakangaloʻi ʻe Sihova ʻetau ngaahi angahalá, ʻoku ʻikai ʻuhinga ia ʻokú ne taʻemalava ke toe manatuʻi kinautolu. (Aisea 43:25) Ka, ʻokú ne fakangaloʻi ʻi he ʻuhinga ko ʻene fakamolemoleʻí pē, ʻe ʻikai te ne toe tukuakiʻi ʻa e ngaahi angahala ko iá kiate kitautolu ʻi ha taimi ʻi he kahaʻú. (Isikeli 33:​14-16) ʻOku pehē pē, ko hono fakamolemoleʻi ʻo e kaungā faʻahinga ʻo e tangatá ʻoku ʻikai moʻoni ʻuhinga ia ʻe ʻikai malava ke toe manatuʻi ʻa e meʻa naʻa nau faí. Kae kehe, ʻe lava ke tau fakangaloʻi ʻi he ʻuhinga ʻoku ʻikai te tau toe tukuakiʻi ʻa e tokotaha faihalá pe toe ʻohake ia ʻi he kahaʻú. ʻI hono fakaleleiʻi peheʻi ʻo e meʻá, ʻe ʻikai leva ke taau ke toe fai ha lau ki ai; pea ʻoku ʻikai ko ha anga-ʻofa ia ke mātuʻaki fakaʻehiʻehi fakaʻaufuli mei he tokotaha faihalá, ʻo sio ki ai ʻo hangē ia kuo tuʻusí. (Palovepi 17:9) ʻOku moʻoni, ʻe ʻi ai ʻa e vahaʻa taimi ʻe toki fakaleleiʻi ai ʻa hoto vahaʻangatae mo iá; ʻe ʻikai nai ke tau toe maʻu ʻa e vā ofi tatau ʻo hange ko ia ki muʻá. Ka ʻoku tau kei ʻofa pē kiate ia ko hotau tokoua faka-Kalisitiane, pea fai hotau lelei tahá ke tauhi maʻu ha ngaahi vahaʻangatae melino.​—Fakafehoanaki mo Luke 17:3.

Taimi ʻOku Hā Ai ʻE Taʻemalava ke Fakamolelmoleʻí

15, 16. (a) ʻOku fiemaʻu nai ʻa e kau Kalisitiané ke nau fakamolemoleʻi ha tokotaha faihala ʻa ia ʻoku ʻikai ke fakatomala? (e) ʻE malava fēfē ke tau ngāueʻaki ʻa e akonaki ʻoku ʻi he Sāme 37:8?

¹⁵ Fēfē leva, kapau ʻoku angahala mai ʻa e niʻihi kehé kiate kitautolu ʻi ha founga ʻoku fakahoko ai ʻa e kafo loloto tahá, lolotonga ia ʻoku ʻikai fakahaaʻi ʻa e angahalá ia, ʻikai ha fakatomala, pea ʻikai ha kole fakamolemole mei he tafaʻaki ʻa e tokotaha faihalá? (Palovepi 28:13) ʻOku fakahā mahino mai ʻe he ngaahi Konga Tohitapú ʻoku ʻikai fakamolemoleʻi ʻe Sihova ʻa e kau angahala mahimango, taʻefakatomalá. (Hepelu 6:​4-6; 10:​26, 27) Fēfē kitautolu? ʻOku pehē ʻe he Insight on the Scriptures: “ʻOku ʻikai ke fiemaʻu ʻa e Kalisitiané ia ke nau fakamolemoleʻi ʻa e faʻahinga ʻoku nau fai loto-fiefai ʻa e angahala loto-kovi ʻo ʻikai ha fakatomalá. Ko e faʻahinga peheé ʻoku nau hoko ko e ngaahi fili ʻo e ʻOtuá.” (Voliume 1, peesi 862) ʻOku ʻikai totonu ki ha Kalisitiane kuo fai ki ai ha tōʻonga mātuʻaki taʻetotonu, fulikivanu, pe kovi ʻaupito, ke ne ongoʻi ʻoku fakamālohiʻi ke ne fakamolemoleʻi pe kātakiʻi ha tokotaha faihala ʻoku ʻikai ke fakatomala.​—Sāme 139:​21, 22.

¹⁶ ʻOku mahino, ko e faʻahinga ko ia kuo ngaohikoviʻi anga-fakamamahí te nau ongoʻi loto-mamahi nai mo ʻita. Kae kehe, manatuʻi ko hono tauhi ʻo e ʻitá mo e loto-mamahí ʻe lava ke hoko ia ʻo mātuʻaki fakatuʻutāmaki kiate kitautolu. Ko e fakatatali ko ia ki ha vetehia pe kole fakamolemole ʻe ʻikai ʻaupito fai maí, ʻe fakatupunga ai pē nai kitautolu ke loto-mamahi lahi mo lahi ange. ʻI he uluisino ʻiate kitautolu ʻa e taʻefaitotonú te ne tauhi nai ʻa e ʻitá ke lili ʻi loto ʻiate kitautolu, pea iku ʻo ne maumauʻi ai ʻetau moʻui fakalaumālié, fakaeongó mo e fakaesinó. Ko e meʻa ʻe iku ki aí, ʻoku tau fakaʻatā ai ʻa e tokotaha naʻá ne fakalotomamahiʻi kitautolú ke hokohoko atu ʻene fakalotomamahiʻi kitautolú. ʻOku akonaki fakapotopoto mai ʻa e Tohitapú: “Tukuage ae ita, bea liaki ae lili.” (Sāme 37:8, PM) Ko ia ai, ko e kau Kalisitiane ʻe niʻihi kuo nau ʻilo ʻi he faai mai ʻa e taimí kuo nau lava ʻo fai ha fili ke fakamolemoleʻi ʻi he ʻuhinga ko e tuku ʻa hono tukulotoa ʻa e loto-mamahí​—ʻoku ʻikai ko hono kalofaki ʻa e meʻa naʻe hoko kiate kinautolú, ka ko e fakafisi ke hoko ʻo lōmekina ʻe he ʻitá. ʻI hono tuku ʻa e meʻá kotoa ʻi he nima ʻo e ʻOtua ʻo e fakamaau totonú, ʻoku nau aʻusia ai ʻa e fiemālie lahi pea nau lava ai ke hokohoko lelei atu ʻa e moʻuí.​—Sāme 37:28.

17. Ko e hā ʻa e fakapapau fakafiemālie ʻoku tokonaki mai ʻe he talaʻofa ko ia ʻa Sihova ʻoku hiki ʻi he Fakahā 21:4?

¹⁷ ʻI he taimi ʻoku fuʻu loloto ai ha kafo, ʻe ʻikai nai te tau lavameʻa ʻi hono tafiʻi kakato atu ia mei he ʻetau fakakaukaú, naʻa mo e ʻi he lolotonga ʻo e ngaahi meʻa ʻo e fokotuʻutuʻu ko ʻeni ʻe ʻikai. Ka ʻoku talaʻofa mai ʻe Sihova ha maama foʻou ʻa ia “te ne holoholo ʻa e loʻimata kotoa pē mei he honau mata; pea ʻe ʻikai toe ai ha mate, pea ʻe ʻikai toe ai ha mamahi, pea ha tangi, pe ha ongosia; kuo mole ʻa e ngaahi meʻa muʻa.” (Fakahā 21:4) Ko e hā pē ʻa e meʻa te tau manatuʻi nai ʻi he taimi ko iá ʻe ʻikai te ne fakatupu ʻe ia ʻiate kitautolu ʻa e langa lahi pe mamahi, ʻa ia ʻokú ne fakamāfasiaʻi nai hotau lotó ʻi he taimi ní.​—Aisea 65:​17, 18.

18. (a) Ko e hā ʻoku ʻi ai ai ʻa e fiemaʻu ke fakamolemolé ʻi heʻetau ngaahi feangainga mo hotau fanga tokouá mo e fanga tuofāfiné? (e) ʻI he taimi ʻoku angahala mai ai ʻa e niʻihi kehé kiate kitautolú, ʻi he ʻuhinga fē ʻe lava ai ke tau fakamolemoleʻi pea fakangaloʻí? (f) ʻOku anga-fēfē ʻa e ʻaonga ʻa e meʻá ni kiate kitautolu?

¹⁸ Lolotonga iá, kuo pau ke tau moʻui mo ngāue fakataha ko e fanga tokoua mo e fanga tuofāfine ʻa ia ko e faʻahinga taʻehaohaoa mo angahalaʻia ʻo e tangatá. ʻOku tau fai kotoa pē ʻa e ngaahi hala. ʻOku tau fefakasivesivaʻaki pea tau fefakalotomamahiʻaki ʻi he taimi ki he taimi. Naʻe ʻilo lelei ʻe Sīsū te tau fiemaʻu ke fakamolemoleʻi ʻa e niʻihi kehé, “ʻikai . . . tuʻo fitu: ka tuʻo fitu liunga ʻaki ʻa e fitungofulu”! (Mātiu 18:22) ʻOku moʻoni, ʻoku ʻikai te tau lava ʻo fakamolemole fakaʻaufuli ʻo hangē ko ia ko Sihová. Kae kehe, ʻi he ngaahi tuʻunga lahi tahá, ʻi he taimi ʻoku fai angahala mai ai hotau fanga tokouá kiate kitautolú, ʻoku lava ke tau fakamolemole ʻi he ʻuhinga ko hono ikuʻi ʻa e loto-mamahí, pea lava ke tau fakangaloʻi ʻi he ʻuhinga ko e ʻikai toe tukuakiʻi ʻa e meʻá kiate kinautolu ʻo ʻikai toe ngata ʻi he kahaʻú. ʻI he taimi ʻoku tau fakamolemoleʻi mo fakangaloʻi pehē aí, ʻoku tau tokoni ai ke fakatolonga ʻo ʻikai ngata pē ʻi he melino ʻa e fakatahaʻangá kae pehē foki ki he melino ʻa hotau ʻatamaí mo hotau lotó tonu. Sinoemeʻa, te tau fiefia ai ʻi he melino ko ia, ko hotau ʻOtua ʻofá pē, ʻa Sihova, ʻokú ne malava ke tokonaki maí.​—Filipai 4:7.

[Fakamatala ʻi lalo]

Ngaahi Fehuʻi ke Fakamanatu

◻ Ko e hā ʻoku totonu ai ke tau loto-lelei ke fakamolelmoleʻi ʻa e niʻihi kehé?

◻ Ko e ngaahi tuʻunga fēfē ʻe fiemaʻu ai kitautolu ke “fekatakiʻaki”?

◻ ʻI he taimi kuo fakalotomamahiʻi lahi ai kitautolu ʻe he ngaahi angahala ʻa e niʻihi kehé, ko e hā ʻoku lava ke tau fai ke fakaleleiʻi ai ʻa e meʻá ʻi he melinó?

◻ ʻI he taimi ʻoku tau fakamolemoleʻi ai ʻa e niʻihi kehé, ʻi he ʻuhinga fē ʻoku totonu ke tau fakangaloʻi aí?

[Fakatātā ʻi he peesi 29]

ʻI he taimi ʻokú ke fakaofiofi ai ki he niʻihi kehé ke fai ha fakamelinó, ʻe faingofua nai ke fakaleleiʻi ʻa e ngaahi taʻefemahinoʻakí