Manakoekina—Fakahīkihiki ki he Tangatá pe Fakalāngilangi ki he ʻOtuá?

“ʻOKU totonu ki ha pule ke lelei ange ia ʻi heʻene faʻahinga ʻoku pule ki aí, ʻi he ʻikai ngata pē ʻi he poini ko ʻene hoko moʻoni ʻo lelei ange ʻiate kinautolú, ka ʻoku totonu foki ke ne fai ha faʻahinga fakakāveaʻi kinautolu,” ko e tohi ia ʻa Xenophon, ko ha seniale Kalisi ʻiloa. ʻI he ʻahó ni, ʻe ui ʻe he tokolahi ha “fakakāvea” pehē ko e manakoekina.

Ko e moʻoni, ʻoku ʻikai ke maʻu ʻe he kau pule fakaetangata kotoa pē ʻa e manakoekiná. Ka ko kinautolu ʻoku nau maʻu iá ʻoku nau ngāueʻaki honau tufakangá ke fakatupungaʻaki ange ha līʻoa, pea ke ngāuekākāʻaki ʻa e tokolahi ki heʻenau ngaahi taumuʻa pē ʻanautolu. Mahalo pē ko e fakatātā ʻiloa taha ki mui ní ko ʻAtolofi Hitilā. “[ʻI he 1933] ki he tokolahi taha ʻo e kau Siamané ko Hitilaá ne ʻosi​—pe ʻe lau vave pē—ko e huelo ʻo ha taki manakoekina moʻoni,” ko e tohi ia ʻa William L. Shirer ʻi heʻene tohi ko e The Rise and Fall of the Third Reich. “Naʻe pau ke nau muimui kui kiate ia, ʻo hangē ia kuó ne maʻu ha fakamaau fakaʻotua, ki he ngaahi taʻu maveuveu ʻe taha ua hono hokó.”

ʻOku toe fonu foki ʻa e hisitōlia fakalotú ʻi he kau taki manakoekina ʻa ia ʻoku nau fakatupunga ʻa e kakaí ke hoko ʻo līʻoa ange kiate kinautolu ka ʻoku nau ʻomai ʻa e faingataʻa ki honau kau muimuí. “Tokanga ke ʻoua ʻe takihalaʻi kimoutolu ʻe ha taha,” naʻe fakatokanga ʻe Sīsū, “he ʻe tokolahi ʻa e kau tangata te nau haʻu ʻi hoku huafá ʻo pehē ‘ko au ʻa e Kalaisí,’ pea te nau takihalaʻi ʻa e tokolahi.” (Mātiu 24:​4, 5, Phillips) Ko e kau Kalaisi loi manakoekiná naʻe ʻikai te nau hā pē ʻi he ʻuluaki senitulí. Lolotonga ʻa e 1970 tupú, naʻe taukaveʻi ai ʻe Jim Jones ko ia ʻa e “mīsaia ʻo e Temipale ʻo e Kakaí.” Naʻe fakamatalaʻi ia ko ha “tangata lotu manakoekina” fakataha “mo ha mafai ngalikehe ki he kakaí,” pea ʻi he 1978 naʻá ne fakalanga ai ʻa e taha ʻo e ngaahi taonakita tokolahi, lahi taha ʻi he hisitōliá.a

ʻOku hā mahino, ʻoku lava ke hoko ʻa e manakoekiná ko ha meʻaʻofa fakatuʻutāmaki. Kae kehe, ʻoku talanoa ʻa e Tohitapú fekauʻaki mo ha faʻahinga meʻaʻofa kehe, pe ngaahi meʻaʻofa, mei he ʻOtuá, ʻoku ala maʻu maʻá e tokotaha kotoa pē, maʻá e lelei ʻa e tokotaha kotoa pē. Ko e foʻi lea faka-Kalisi ki he meʻaʻofa ko ʻení ko e khaʹri·sma, pea ʻoku hā tuʻo 17 ia ʻi he Tohitapú. ʻOku fakaʻuhingaʻi ia ʻe ha mataotao Kalisi ʻe taha ko ha ‘meʻaʻofa tauʻatāina mo maʻataʻatā, ko ha meʻa kuo foaki ki ha tangata naʻe ʻikai te ne ngāue mo ʻikai te ne taau, ko ha meʻa ʻoku haʻu mei he kelesi ʻa e ʻOtuá pea naʻe ʻikai ʻaupito mei lava ia ke maʻu pe tauhi ʻi ha feinga tonu pē ʻa ha tangata.’

Ko ia mei he vakai Fakatohitapú, ko e khaʹri·sma ko ha meʻaʻofa ia kuo maʻu, mālō mo e ʻofa maʻataʻatā ʻa e ʻOtuá. Ko e hā ʻa e niʻihi ʻo e ngaahi meʻaʻofa ko ʻeni kuo anga-ʻofa ʻa e ʻOtuá ʻo foaki mai kiate kitautolú? Pea ʻoku lava fēfē ke tau ngāueʻaki kinautolu ke ʻomai ai ʻa e fakahīkihikí kiate ia? Tau vakai angé ki he meʻa ʻe tolu ʻi he ngaahi meʻaʻofa fakaʻotua ko ʻení.

Moʻui Taʻengata

Ko e meʻaʻofa lahi tahá ʻoku ʻikai ha veiveiua ko e meʻaʻofa ʻo e moʻui taʻengatá. Naʻe tohi ʻa Paula ki he fakatahaʻanga Lomá: “Ko e tokonaki [“totongi,” NW] ʻa Angahala ko e mate; ka ko e meaʻofa [khaʹri·sma] ʻa e ʻOtua ko e moʻui taʻengata, tuʻu ʻia Kalaisi Sisu ko hotau ʻEiki.” (Loma 6:23) ʻOku taau ke fakatokangaʻi ko e “totongi” (mate) ko e meʻa ia kuo tau ngāueʻi, neongo e taʻeloto ki ai, ʻi hotau natula angahalaʻiá. ʻI he tafaʻaki ʻe tahá, ko e moʻui taʻengata ko ia ʻoku ʻai ʻe he ʻOtuá ke ala maʻú ko e meʻa maʻataʻatā kotoa ia ʻe ʻikai lava ke tau ngāueʻi ʻi he feinga pē ʻatautolu.

Ko e meʻaʻofa ʻo e moʻui taʻengatá ʻoku totonu ke koloaʻaki mo vahevahe. ʻOku lava ke tau tokoniʻi ʻa e kakaí ke nau ʻiloʻi ʻa Sihova, ke tauhi kiate ia pea foaki mai ai ʻa e meʻaʻofa ʻo e moʻui taʻengatá. ʻOku pehē ʻi he Fakahā 22:17: “Ko e Laumalie mo e Taʻahine ʻoku na pehe, Haʻu. Pea ko ia ʻoku ne fanongo ke ne pehe, Haʻu. Pea ko ia ʻoku fieinu ke ne haʻu. Pea ko ia ʻoku ne loto ki ai, ke ne toʻo taʻetotongi ʻa e Vaiola.”

ʻOku lava fēfē ke tau tataki ʻa e niʻihi kehé ki he vai foaki moʻui ko ʻení? ʻOku fakatefito ia ʻaki hono ngāueʻaki ʻa e Tohitapú ke ola lelei ʻi heʻetau ngāue fakafaifekaú. Ko e moʻoni ia ʻi he ngaahi tapa ʻe niʻihi ʻo e māmaní, ʻoku tātātaha pē ai ʻa e lau ia pe fakakaukau ʻa e kakaí fekauʻaki mo e ngaahi meʻa fakalaumālié; ka neongo ia, ʻoku ʻi ai maʻu pē ʻa e ngaahi faingamālie ke ‘ueʻi ʻa e telinga’ ʻo ha taha. (Aisea 50:4) ʻI he fekauʻaki mo e meʻá ni, ʻoku lava ke tau falala ki he ivi fakaueʻiloto ʻo e Tohitapú, “he ko e folofola ʻa e ʻOtua, ko e koto moʻui mo e koto malohi.” (Hepelu 4:12) Tatau ai pē pe ko e poto ʻaonga ʻo e Tohitapú, ko e fakafiemālie mo e ʻamanaki ʻokú ne ʻomaí, pe ko ʻene fakamatala fekauʻaki mo e taumuʻa ʻo e moʻuí, ʻoku lava ʻa e Folofola ʻa e ʻOtuá ʻo aʻu ki he lotó pea tataki ʻa e kakaí ʻi he hala ki he moʻuí.​—2 Timote 3:​16, 17.

Tānaki atu ki ai, ʻoku lava ke tokoniʻi kitautolu ʻe he ngaahi tohi makatuʻunga ʻi he Tohitapú ke tau pehē “Haʻu!” Naʻe tomuʻa tala ʻe he palōfita ko ʻAiseá, ʻi he lolotonga ʻo e taimi ko ʻení ʻo e fakapoʻuli fakalaumālié, ʻe ‘hopo ʻa Sihova’ ki heʻene kakaí. (Aisea 60:2) ʻOku tapua mai ʻi he ngaahi tohi ʻa e Sōsaieti Taua Leʻó ʻa e tāpuaki ko ʻeni meia Sihová, pea ʻi he taʻu kotoa pē ʻoku nau tataki ʻa e kakai ʻe laui afe kia Sihova, ko e Matavai ʻo e fakamaama fakalaumālié. ʻI honau ngaahi pēsí kotoa ʻoku ʻikai fai ai hano fakamāʻolungaʻi ha faʻahinga tāutaha. Hangē ko ia ʻoku fakamatala ʻi he talateu ki he Taua Leʻo, “ko e taumuʻa ʻo e Taua Leʻo ke fakahīkihikiʻi ʻa Sihova ko e ʻOtuá ko e ʻEiki Hau Fakaleveleva ʻo e ʻunivēsí. . . . ʻOkú ne fakaʻaiʻai ʻa e tui ki he Tuʻi ʻa e ʻOtuá ʻoku lolotonga pulé, ʻa Sīsū Kalaisi, ʻa ia ko hono taʻataʻa ne lilingí ʻokú ne fakaʻatā ʻa e hala ki he faʻahinga ʻo e tangatá ke maʻu ai ʻa e moʻui taʻengatá.”

Ko ha faifekau Kalisitiane taimi-kakato, ʻa ia kuo ʻiloa ʻa ʻene lavameʻa ʻi he ngaahi taʻu lahi ʻi heʻene ngāue fakafaifekaú, ʻokú ne fakamatala ki he mahuʻinga ʻo e Taua Leʻo mo e Awake!, ʻi hono tokoniʻi ʻa e kakaí ke nau ʻunuʻunu ke ofi ki he ʻOtuá: “ʻI he taimi ʻoku kamata ai ʻeku kau ako Tohitapú ke lau mo fiefia ʻi he Taua Leʻo mo e Awake!, ʻoku nau fai ʻa e fakalakalaka vave. ʻOku ou sio ki he ngaahi makasiní ko ha tokoni taʻemafakatataua ia ʻi hono tokoniʻi ʻa e kakaí ke nau ʻiloʻi ʻa Sihová.”

Ngaahi Monū Fakaengāué

Ko Tīmoté ko ha ākonga Kalisitiane ia naʻe foaki ki ai ʻa e meʻaʻofa ʻe taha ʻa ia ʻoku taau ke fai ki ai ha tokanga mavahe. Naʻe tala ange kiate ia ʻe he ʻaposetolo ko Paulá: “ʻOua naʻa ke tuku noa pe ʻa e mafai [“meʻaʻofa,” NW; khaʹri·sma] ʻoku ʻiate koe, ʻa ia naʻe foaki kiate koe ʻi he palofisai mo e hilifaki nima ʻe he kau Faifekau.” (1 Timote 4:14) Ko e hā ʻa e meʻaʻofa ko ʻení? Naʻe kau ki ai ʻa hono fakanofo ʻo Tīmote ko ha ʻovasia fefonongaʻakí, ko ha monū fakaengāue ʻa ia naʻe pau ke ne fatongiaʻaki hono tokangaʻí. ʻI he lea tatau, naʻe enginakiʻi ai ʻe Paula ʻa Tīmote: “Nofo ki he lau lesoni, mo e fai ha tokoni, mo e faiako. Lamalama kiate koe mo e meʻa ʻoku ke akoʻaki: ke ke nofoʻaki fai ʻa e ongo meʻa ko ia; he ʻi hoʻo fai pehe, te ke fakamoʻui koe mo kinautolu foki ʻoku fanongo kiate koe.”—1 Timote 4:​13, 16.

ʻOku toe fiemaʻu foki ki he kau mātuʻa ʻi he ʻaho ní ke tukulotoa ʻa honau ngaahi monū fakaengāué. Hangē ko ia naʻe tuhu ki ai ʻa Paulá, ko e founga ʻe taha ʻoku lava ke nau fai ai ʻení ko e ‘lamalama ʻa e meʻa ʻoku nau akoʻakí.’ ʻI he ʻikai ke faʻifaʻitaki ki he kau taki manakoekina fakamāmaní, ʻoku nau tataki ʻa e tokangá ki he ʻOtuá, ʻo ʻikai kiate kinautolu. Ko Sīsū, honau Tokotaha-Faʻifaʻitakiʻangá, ko ha faiako tuʻu-ki-muʻa ʻa ia ʻoku ʻikai ha veiveiua naʻá ne maʻu ha ʻulungaanga fakamānako, ka naʻá ne ʻave anga-fakatōkilalo ʻa e lāngilangí ki heʻene Tamaí. “Ko ʻeku tokāteline ʻoku ʻikai aʻaku, ka ʻoku aʻana naʻa ne fekau mai au,” ko ʻene leá ia.​—Sione 5:41; 7:16.

Naʻe fakalāngilangiʻi ʻe Sīsū ʻa ʻene Tamai fakahēvaní ʻaki hono ngāueʻaki ʻa e Folofola ʻa e ʻOtuá ko e mafai ia ki heʻene akonakí. (Mātiu 19:​4-6; 22:​31, 32, 37-40) Naʻe fakamamafaʻi tatau ʻe Paula ʻa e fiemaʻu ki he kau ʻovasiá ke ‘piki pe ki he tokateline moʻoni, ʻa ia naʻa nau ako aí.’ (Taitusi 1:9) ʻAki hono fakatuʻunga mālohi ʻenau malangá ʻi he ngaahi Konga Tohitapú, ko hono moʻoní, ʻe lea ai ʻa e kau mātuʻá ʻo hangē ko ia naʻe leaʻaki ʻe Sīsuú: “Ko e ngaahi lea ʻoku ou fai kiate kimoutolu, ʻoku ʻikai te u leaʻaki meiate au.”​—Sione 14:10.

ʻE lava fēfē ʻa e kau mātuʻá ʻo ‘piki pe ki he tokateline moʻoní’? ʻAki e fakatefito ʻenau ngaahi malangá mo e ngaahi konga kuo vaheʻi ki he fakatahá ʻi he Folofola ʻa e ʻOtuá, ʻo fakamatalaʻi mo fakamamafaʻi ʻa e ngaahi konga tohi ʻoku nau ngāueʻakí. Ko e ngaahi fakatātā fakatoʻoaloto pe fakamatala fakaolí, tautefito kapau ʻe fai ʻo tōtuʻa, ʻe fakaleluʻi nai ai ʻa e kau fanongó mei he Folofola ʻa e ʻOtuá pea tohoaki ai ʻa e tokangá ki he pōtoʻi ʻa e tokotaha malangá tonu. ʻI he tafaʻaki ʻe tahá, ko e ngaahi veesi ʻi he Tohitapú, ko e meʻa ia ʻe aʻu ki he lotó peá ne ueʻi ʻa e kau fanongó. (Sāme 19:​7-9; 119:40; fakafehoanaki mo Luke 24:32.) Ko e ngaahi malanga peheé ʻokú ne tohoaki ʻa e tokanga siʻisiʻi ki he tangatá pea ʻoatu ʻa e lāngilangi lahi ange ki he ʻOtuá.

Ko e toe founga ʻe taha ʻoku lava ai ke hoko ʻa e kau mātuʻá ko e kau faiako ola lelei angé ko e feakoʻaki ʻiate kinautolu. Hangē ko hono tokoniʻi ʻe Paula ʻa Tīmoté, ʻoku pehē pē ʻa e lava ke tokoniʻi ʻe ha mātuʻa ʻe taha ha tokotaha kehe. “ʻOku fakamasila ʻa e aione ʻaki ʻa e aione: pehe ʻoku fakamasila ha tangata he feangai mo ha taha kehe.” (Palovepi 27:17; Filipai 2:3) ʻOku maʻu ʻe he kau mātuʻá ʻa e ʻaonga ʻi heʻenau fevahevaheʻaki ʻa e ngaahi fakakaukaú mo e ngaahi fokotuʻú. Naʻe fakamatala ha mātuʻa ʻe taha naʻe fokotuʻu foʻou: “Naʻe vaheʻi ʻe ha mātuʻa taukei ha taimi ke fakahā mai kiate au ʻa e founga ʻo ʻene fokotuʻutuʻu ʻa e malanga maʻá e kakaí. ʻI heʻene teuteú, ʻokú ne fakakau ki ai ʻa e ngaahi fehuʻi ke taki taha tali pē, ko e ngaahi fakatātā, ngaahi faʻifaʻitakiʻanga, pe ngaahi meʻa nounou naʻe hokosia, pehē ki he ngaahi kupuʻi lea Fakatohitapu ʻa ia kuó ne fekumi lelei ki ai. Kuó u ako meiate ia ʻa e founga ke tānaki atu ai ha meʻa kehe ki heʻeku ngaahi malangá koeʻuhi ke fakaʻehiʻehi ai mei ha taʻefakamānako, mo fakafiu ʻa hono fakahokó.”

Ko kitautolu kotoa ʻoku fiefia ʻi he ngaahi monū ʻo e ngāué, tatau ai pē pe ko e kau mātuʻa kitautolu, kau sevāniti fakafaifekau, pe ko e kau tāimuʻa, ʻoku fiemaʻu ke tau koloaʻaki ʻa ʻetau meʻaʻofá. Taimi nounou pē ki muʻa ʻi heʻene maté, naʻe fakamanatu ʻa Paula kia Tīmote ‘ke hunuaki ʻene mafai [“meʻaʻofa,” NW; khaʹri·sma] mei he ʻOtuá ʻa ia ʻoku ʻiate iá,’ ʻa ia ʻi he meʻa fekauʻaki mo Tīmoté naʻe kau ki ai ʻa e meʻaʻofa makehe ʻo e laumālié. (2 Timote 1:6) ʻI he ngaahi ʻapi ʻIsilelí, naʻe faʻa uloulo maʻu pē ai ʻa e malalá ʻi he afí. Naʻe malava ke ‘hunuaki kinautolu’ ke fakatupu ha ulo mo ha mafana lahi ange. Ko ia ai, ʻoku fakaʻaiʻai kitautolu ke tuku hotau lotó mo e iví ki heʻetau ngaahi ngāue kuo vaheʻi maí, ʻo hunuaki hangē ha afí ʻa e hā pē ʻa e meʻaʻofa fakalaumālie kuo tuku mai kiate kitautolú.

Ngaahi Meʻaʻofa Fakalaumālie ke Vahevahe Atu

Ko e ʻofa ʻa Paula ki hono fanga tokoua ʻi Lomá naʻá ne ueʻi ia ke ne tohi: “ʻOku ou holi ke feʻiloaki mo kimoutolu; koeʻuhi ke u ʻatu haʻamou kelesi [“meʻaʻofa,” NW; khaʹri·sma] fakalaumalie, heiʻilo ʻe poupou ai kimoutolu​—ʻa, ko ʻeku pehe pe, ke ai haʻatau fetokoniʻaki ʻi heʻeku ʻiate kimoutolu, ʻa au ʻaki ʻa e lotu ʻamoutolu, pea ko kimoutolu ʻaki e lotu aʻaku.” (Loma 1:​11, 12) Naʻe vakai ʻa Paula ki heʻetau malava ke fakaivimālohiʻi ʻa e tui ʻa e niʻihi kehé ʻaki ʻetau lea kiate kinautolú ko ha meʻaʻofa fakalaumālie. Ko e fefoakiʻaki ʻo e ngaahi meʻaʻofa fakalaumālie peheé ʻe iku ia ki hono poupouʻi ʻo e tuí pea mo e fefakalototoʻaʻakí.

Pea ʻoku pau ʻa hono fiemaʻu ʻení. ʻI he fokotuʻutuʻu fulikivanu ko ʻeni ʻoku tau moʻui aí, ʻoku tau fehangahangai kotoa mo e loto-mafasia ʻi he founga kehekehe. Kae kehe, ko ha fefoakiʻaki tuʻumaʻu ʻo e fakalototoʻá, ʻoku lava ke ne tokoniʻi kitautolu ke kītaki. Ko e fakakaukau ʻo e fefoakiʻakí​—fakatouʻosi ʻa e foaki atú mo e maʻu maí—ʻoku mahuʻinga ia ki hono tauhi maʻu ʻa e mālohi fakalaumālié. Ko e moʻoni, ʻoku tau fiemaʻu kotoa ʻa e fakalototoʻá ʻi he taimi ki he taimi, ka ʻoku lava ke tau felangahakeʻaki kotoa foki.

Kapau ʻoku tau ʻāʻā ke fakatokangaʻi ʻa e kaungā-tui ʻoku nau loto-mafasiá, mahalo pē te tau ‘faa fai ai ke fakafiemalieʻi akinautolu oku mamahiia, aki ae fakafiemalie koia aia oku fakafiemalieʻi aki akitautolu e he Otua.’ (2 Kolinito 1:​3-5, PM) Ko e foʻi lea faka-Kalisi ki he fakafiemālié (pa·raʹkle·sis) ʻoku ʻuhinga fakafoʻileá “ko ha ui ki hoto tafaʻakí.” Kapau, ʻi he taimi naʻe fiemaʻu aí, ʻoku tau ʻi he tafaʻakí ke fai ha tokoni ki hatau tokoua pe tuofefine, ʻoku ʻikai ha veiveiua ko kitautolu tonu te tau maʻu ʻa e poupou anga-ʻofa tatau ʻi he taimi ʻoku tau fiemaʻu aí.​—Koheleti 4:​9, 10; fakafehoanaki mo Ngāue 9:​36-41.

ʻOku toe ʻaonga lahi ʻa e ngaahi ʻaʻahi fakatauhisipi anga-ʻofa ʻa e kau mātuʻá. Neongo ʻoku ʻi ai ʻa e ngaahi taimi ʻoku fai ai ʻa e ngaahi ʻaʻahi ke fai ha akonaki Fakatohitapu ki ha meʻa ʻoku fiemaʻu ki ai ʻa e tokangá, ko e ngaahi taimi ia ki he fakalototoʻá ʻa e lahi taha ʻo e ngaahi ʻaʻahi fakatauhisipí, ko ha ‘feinga ke fiemalie ʻa e lotó.’ (Kolose 2:2) ʻI he taimi ʻoku fai ai ʻe he kau ʻovasiá ʻa e ngaahi ʻaʻahi–​fakatuimālohi peheé, ʻoku nau foaki moʻoni ai ha meʻaʻofa fakalaumālie. ʻI he hangē ko Paulá, te nau ʻilo ai ʻa e fakafiemālie ʻo e founga foaki laulōtaha ko ʻení, pea te nau fakatupulekina ai ha “holi” ki honau fanga tokouá.​—Loma 1:11.

Naʻe moʻoni ʻeni ʻi he meʻa fekauʻaki mo ha mātuʻa ʻi Sipeini, ʻa ia naʻá ne fakamatala ki he meʻa naʻe hokosia hono hokó: “Ko Ricardo, ko ha kiʻi tamasiʻi taʻu 11, naʻe hā ngali ʻoku siʻisiʻi pē ʻene fakahāhā ʻa e mahuʻingaʻia ʻi he ngaahi fakatahá, pea mo e fakatahaʻangá fakalūkufua. Ko ia naʻá ku kole ai ki he ongo mātuʻa ʻa Ricardo ki he ngofua ke u ʻaʻahi ai ki hona fohá, ʻa ia naʻá na loto-lelei ki ai. Naʻa nau nofo ʻi he ʻotu moʻungá meimei ko e houa ʻe taha ʻa e lele ki aí mei hoku ʻapí. Naʻe hā mahino ʻa e fiefia ʻa Ricardo ʻi he sio ki heʻeku mahuʻingaʻia ʻiate iá, pea naʻá ne tali leva ʻo ʻikai toe tatali. Naʻe vave ʻene hoko ko ha tokotaha malanga teʻeki papitaiso pea mo ha mēmipa longomoʻui ʻi he fakatahaʻangá. Ko hono natula maá naʻe fetongiʻaki ia ha ʻulungaanga fakakaumeʻa, fiefia ange. Naʻe ʻeke ʻe he niʻihi ʻi he fakatahaʻangá: ‘Ko e hā kuo hoko kia Ricardo?’ Naʻe hā ngali ko e ʻuluaki taimi ia ʻo ʻenau fakatokangaʻi iá. ʻI he fakakaukau atu ki he ʻaʻahi fakatauhisipi mahuʻinga ko iá, ʻoku ou ongoʻi kuó u maʻu ʻe au ʻa e meʻa lahi ange ʻia Ricardo. ʻI heʻene hū ki he Fale Fakatahaʻangá, ʻokú ne mata malimali, pea fakavavevave mai ʻo fakafeʻiloaki kiate au. Ko ha fiefia ia ke sio ki heʻene fakalakalaka fakalaumālié.”

ʻOku taʻetoeveiveiua, ko e ngaahi ʻaʻahi fakatauhisipí, hangē ko e taha ko ʻení, ʻoku tāpuakiʻi lahi. Ko e ngaahi ʻaʻahi peheé ʻoku fehoanaki ia mo e kole ʻa Sīsuú: “Tauhi ʻeku fanga sipi.” (Sione 21:16) Ko e moʻoni, ʻoku ʻikai ko e kau mātuʻá pē ʻa e faʻahinga ʻoku lava ke nau foaki ʻa e ngaahi meʻaʻofa peheé. Ko e tokotaha kotoa pē ʻi he fakatahaʻangá ʻoku lava ke ne fakaʻaiʻai ʻa e niʻihi kehé ki he ʻofa mo e ngaahi ngāue lelei. (Hepelu 10:​23, 24) Hangē pē ko e haʻi maea fakataha ʻa e kau kaka ʻoku nau hake ʻi ha moʻungá, ʻa hono fakatahaʻi kitautolu ʻaki ʻa e ngaahi haʻi fakalaumālié. ʻOku papau, ko e meʻa ʻoku tau fai mo leaʻakí ʻokú ne uesia ʻa e niʻihi kehé. ʻOku lava ke fakavaivaiʻi ʻe ha lea manuki pe fakaanga fefeka ʻa e ngaahi haʻi ʻokú ne fakafāʻūtahaʻi kitautolú. (Efeso 4:29; Semisi 3:8) ʻI he tafaʻaki ʻe tahá, ko e ngaahi lea ʻosi filifili lelei ʻo e fakalototoʻá mo e tokoni anga-ʻofá ʻoku lava ke ne tokoniʻi hotau fanga tokouá ke nau ikunaʻi honau ngaahi faingataʻaʻiá. ʻI he foungá ni te tau fevahevaheʻaki ai ʻa e ngaahi meʻaʻofa fakalaumālie ʻoku mahuʻinga tuʻuloá.​—Palovepi 12:25.

Tapua Atu ʻi ha Tuʻunga Kakato Ange ʻa e Lāngilangi ʻo e ʻOtuá

ʻOku hā mahino ko e Kalisitiane kotoa pē ʻoku ʻi ai hano tuʻunga manakoekina. Kuo foaki mai kiate kitautolu ʻa e ʻamanaki taʻehanotatau ʻo e moʻui taʻengatá. ʻOku tau toe maʻu foki mo e ngaahi meʻaʻofa fakalaumālie ʻa ia ʻe lava ke tau fevahevaheʻaki. Pea ʻoku lava ke tau feinga ke fakatupu pe ueʻi ʻa e niʻihi kehé ki he ngaahi taumuʻa totonu. ʻOku toe maʻu ʻe he niʻihi ʻa e ngaahi meʻaʻofa ʻi he tuʻunga ʻo e ngaahi monū fakangāué. Ko e ngaahi meʻá ni kotoa ko e fakamoʻoni ia ʻo e anga-ʻofa maʻataʻatā ʻa e ʻOtuá. Pea koeʻuhi ko ha faʻahinga meʻaʻofa pē nai ʻoku tau maʻú ko e meʻa ia kuo tau maʻu mei he ʻOtuá, ʻoku ʻikai moʻoni ha ʻuhinga ke tau pōlepole ai.​—1 Kolinito 4:7.

ʻI hotau tuʻunga ko e kau Kalisitiané, ko e meʻa lelei ia ke tau ʻeke hifo kiate kitautolu, ‘Te u ngāueʻaki ha faʻahinga tuʻunga pē ʻo e manakoekina nai ʻoku ou maʻú ke ʻomai ai ʻa e lāngilangi kia Sihova, ko e Tokotaha-Foaki ʻo e “foaki lelei, pea . . . ha meʻaʻofa haohaoa”? (Semisi 1:17) Te u faʻifaʻitaki kia Sīsū pea tauhi ki he niʻihi kehé fakatatau ki heʻeku ngaahi malavá mo hoku ngaahi tuʻungá?’

ʻOku fakanounou ʻe he ʻaposetolo ko Pitá ʻa hotau fatongiá ʻi he fekauʻaki mo e meʻá ni: “Ke mou fetauhiʻaki kimoutolu ʻaki ʻa e mafai [“meʻaʻofa,” NW; khaʹri·sma] fakalaumalie ne mou taki taha maʻu, ʻi he ʻalunga o ʻene maʻu, ʻo tāu mo ha kau setuata lelei ʻo e kelesi faifio ʻa e ʻOtua. Kapau ko e fai malanga ʻa ha taha, ke ne fai ko e folofola ʻa e ʻOtua; kapau ʻoku fai ha tauhi ʻofa ʻe ha taha, ke ne fai ʻo ngali ko ha toko taha kuo ne maʻu ʻene mafai mei he ʻEiki; koeʻuhi ke fakahikihikiʻi ʻa e ʻOtua ʻi he meʻa kotoa pe ʻia Sisu Kalaisi.”​—1 Pita 4:​10, 11.

[Fakamatala ʻi lalo]

[Maʻuʻanga ʻo e Tā ʻi he peesi 23]

Corbis-Bettmann

UPI/Corbis-Bettmann