Ngaahi Tāpuaki ʻa Sihova ki Hotau “Fonua”

“ʻE moʻui ʻa e meʻa kotoa ʻi he potu ʻoku aʻu ki ai ʻa e vaitafe.”​—ISIKELI 47:9.

1, 2. (a) ʻOku mahuʻinga fēfē ʻa e vaí? (e) Ko e hā ʻoku fakatātaaʻi ʻe he vaitafe ʻi he vīsone ʻa ʻIsikelí?

KO E vaí ko ha huhuʻa tuʻu-ki-muʻa ia. ʻOku fakatuʻunga mei ai ʻa e moʻui fakaesino kotoa pē. Hala ʻatā ha taha ʻo kitautolu ʻe lava ke moʻui fuoloa taʻekau ai ia. ʻOku tau toe fakafalala ki ai ki he fakamaʻá, koeʻuhi ʻoku lava ʻe he vaí ke fakavaiaʻi mo fufulu ʻa e ʻulí. Ko ia ʻoku tau fakamaʻa ai hotau sinó, ko hotau valá, naʻa mo ʻetau meʻakaí. Ko e fai peheé ʻe haofakiʻi nai ai ʻetau moʻuí.

² ʻOku ngāueʻaki ʻe he Tohitapú ʻa e vaí ke fakatātaaʻiʻaki ʻa e ngaahi tokonaki fakalaumālie ʻa Sihova ki he moʻuí. (Selemaia 2:​13; Sione 4:​7-​15) Ko e ngaahi tokonakí ni ʻoku kau ai ʻa hono fakamaʻa ʻo ʻene kakaí fakafou ʻi he feilaulau huhuʻi ʻa Kalaisí pea mo e ʻiloʻi ʻo e ʻOtuá ʻoku maʻu ʻi heʻene Folofolá. (Efeso 5:​25-​27) ʻI he vīsone ʻa ʻIsikeli ki he temipalé, ko e vaitafe fakaemana ko ia ʻoku tafe mai mei he temipalé ʻokú ne fakatātaaʻi ʻa e ngaahi tāpuaki foaki moʻui peheé. Ka ko fē ʻa e taimi ʻoku tafe ai ʻa e vaitafe ko iá, pea ko e hā ʻene ʻuhinga kiate kitautolu he ʻaho ní?

ʻOku Tafe ha Vaitafe ʻi ha Fonua Naʻe Toe Fakafoki

 3. Ko e hā naʻe hokosia ʻe ʻIsikelí, hangē ko ia ʻoku hiki ʻi he Isikeli 47:​2-​12?

³ ʻI he tuʻunga ko e kau pōpula ʻi Pāpiloné, ko e kakai ʻa ʻIsikelí naʻa nau mātuʻaki fiemaʻu ʻa e ngaahi tokonaki ʻa Sihová. He fakalotolahi leva ē kia ʻIsikeli ke sio ki ha tulutā vai ʻoku hā mai mei he feituʻu toputapú pea tafe mai ki tuʻa mei he temipale fakaevīsoné! ʻOku fua ʻe ha ʻāngelo ʻa e vaí ʻi he ngaahi vahaʻa ko e kiupite ʻe 1,000. Ko hono lolotó ʻoku fakautuutu ia mei he tungaʻi vaʻé ki he tuí, ki he konga lotó, ki ha vaitafe lahi ʻoku lava ke kakau holo ai. ʻOku ʻomai ʻe he vaitafé ʻa e moʻui mo e mahu. (Isikeli 47:​2-​11) ʻOku tala kia ʻIsikeli: “ʻI he veʻe vaitafe ʻe tupu ʻi hono kauvai ko e mo é ʻa e ʻakau kai kehekehe.” (Isikeli 47:​12a) ʻI he hū atu ʻa e vaitafé ki he Tahi Maté​—ko ha fuʻu vai taʻemoʻuí​—ʻoku mapuna hake ai ʻa e moʻuí! ʻOku fakapotanga ʻa e iká. ʻOku lakalakaimonū ai ha toutaiʻanga ika.

 4, 5. ʻOku anga-fēfē ʻa e meimei tatau ʻa e kikite ʻa Sioeli fekauʻaki mo ha vaitafé mo e kikite ko ia ʻa ʻIsikelí, pea ko e hā ʻoku mahuʻinga ai ení?

⁴ Ko e kikite fakaʻofoʻofa ko ení kuo pau pē naʻá ne fakamanatu ki he kau Siu fakahēʻí fekauʻaki mo ha kikite ʻe taha naʻe hiki laka hake he senituli ʻe ua ki muʻa ange: “ʻE ʻalu ha tufu mei he fale ʻo Sihova, ʻo fakaviviku ʻa e talalo ko Sitimi.”a (Sioeli 3:​18) Ko e kikite ʻa Sioelí, hangē ko ʻIsikelí, ʻoku tomuʻa tala ai ʻe tafe mai ha vaitafe mei he fale ʻo e ʻOtuá, ʻa e temipalé, pea ʻomai ʻa e moʻuí ki ha feituʻu pakukā.

⁵ Kuo fuoloa hono fakamatalaʻi ʻe he Taua Leʻo ko e kikite ʻa Sioelí ʻoku lolotonga fakahoko ia ʻi hotau taimí.b ʻOku pau leva, ʻoku pehē pē ʻa ʻene moʻoni fekauʻaki mo e vīsone meimei tatau ʻa ʻIsikelí. ʻI he fonua naʻe toe fakafoki ʻo e kakai ʻa e ʻOtuá he ʻaho ní, hangē pē ko ia naʻe ʻi ʻIsileli ʻo e kuonga muʻá, ko e ngaahi tāpuaki ʻa Sihová kuo tafe moʻoni mai ia.

Ko ha Tafe Mālohi Mai ʻo e Ngaahi Tāpuakí

 6. Ko hono afuhi ʻo e toto ʻi he ʻōlita fakaevīsoné naʻe totonu ke ne fakamanatu ki he kau Siú ʻa e hā?

⁶ Ko e hā ʻa e matavai ʻo e ngaahi tāpuaki ki he kakai ʻa e ʻOtuá naʻe toe fakafokí? Sai, fakatokangaʻi ʻoku tafe mai ʻa e vaí mei he temipale ʻo e ʻOtuá. Hangē pē ko e ʻaho ní, ʻoku haʻu ʻa e ngaahi tāpuakí meia Sihova fakafou ʻi hono temipale lahi fakalaumālié​—ko e fokotuʻutuʻu ki he lotu maʻá. ʻOku tānaki mai ʻi he vīsone ʻa ʻIsikelí ha fakaikiiki mahuʻinga. ʻI he lotoʻā ʻi lotó, ʻoku tafe mai ʻa e vaí ʻo fakalaka ʻi he ʻōlitá, ʻi he fakatonga pē ʻo iá. (Isikeli 47:1) Ko e ʻōlitá ʻoku ʻi he lotomālie tonu pē ʻo e temipale fakaevīsoné. ʻOku fakamatalaʻi fakamākukanga ia ʻe Sihova kia ʻIsikeli peá ne fekau ke afuhi ki ai ha toto ʻo ha feilaulau. (Isikeli 43:​13-​18, 20) Ko e ʻōlita ko iá naʻe ʻi ai hono ʻuhinga lahi ki he kau ʻIsileli kotoa pē. Ko ʻenau fuakava mo Sihová naʻe fuoloa pē ki muʻa ʻene fakalaó ʻaʻana ʻi he taimi naʻe afuhi ai ʻe Mōsese ha toto ki ha ʻōlita ʻi he veʻe Moʻunga Sainaí. (Ekisoto 24:​4-8) Ko hono afuhi ʻo e totó ki he ʻōlita fakaevīsoné naʻe totonu ke fakamanatu ai kiate kinautolu ʻi he taimi pē ʻo ʻenau foki ki honau fonua ne toe fakafokí, ʻe tafe mai ʻa e ngaahi tāpuaki ʻa Sihová kapau pē te nau moʻui ʻo fakatatau ki heʻenau fuakava mo iá.​—Teutalonome 28:​1-​14.

 7. Ko e hā ʻa e ʻuhinga ʻoku maʻu ʻe he kau Kalisitiane he ʻaho ní ʻi he ʻōlita fakaefakatātaá?

⁷ ʻI he tuʻunga meimei tatau, ʻoku tāpuakiʻi ʻa e kakai ʻa e ʻOtuá he ʻaho ní fakafou ʻi ha fuakava​—ʻoku lelei ange, ʻa e fuakava foʻoú. (Selemaia 31:​31-​34) Naʻe fakalao fuoloa mo ia foki, ʻo fai ʻaki ʻa e taʻataʻa ko ia ʻo Sīsū Kalaisí. (Hepelu 9:​15-​20) ʻI he ʻahó ni, tatau ai pē pe ʻoku tau ʻi he lotolotonga ʻo e kau paní, ʻa ia ʻoku nau kau ki he fuakava ko iá, pe ʻoku tau ʻi he lotolotonga ʻo e “fanga sipi kehe,” ʻa ia ʻoku nau maʻu ʻaonga mei aí, ʻoku tau maʻu ʻa e ʻuhinga lahi ʻi he ʻōlita fakaefakatātaá. ʻOkú ne fakatātaaʻi ʻa e finangalo ʻo e ʻOtuá ʻi heʻene felāveʻi mo e feilaulau ʻa Kalaisí. (Sione 10:16; Hepelu 10:10) Hangē pē ko e ʻi he lotomālie tonu ʻo e temipale fakalaumālié ʻa e ʻōlita fakaefakatātaá, ko e feilaulau huhuʻi ʻa Kalaisí ʻoku mahuʻinga tefito ia ki he lotu maʻá. Ko e makatuʻunga ia ki he fakamolemole ʻo ʻetau ngaahi angahalá pea pehē ki heʻetau ʻamanaki kotoa ki he kahaʻú. (1 Sione 2:2) ʻOku tau feinga leva ai ke moʻui ʻo fakatatau ki he lao ʻoku fekauʻaki mo e fuakava foʻoú, “ʻa e lao ʻa Kalaisi.” (Kaletia 6:2) ʻI heʻetau fai iá, te tau maʻu ai ʻa e ʻaonga mei he ngaahi tokonaki ʻa Sihova ki he moʻuí.

 8. (a) Ko e hā ʻoku ʻikai hā ʻi he lotoʻā ʻi loto ʻo e temipale fakaevīsoné? (e) ʻI he founga fē ʻe lava ai ʻa e kau taulaʻeiki ʻi he temipale fakaevīsoné ke fakamaʻa kinautolú?

⁸ Ko e ʻaonga pehē ʻe taha ko ha tuʻunga maʻa ʻi he ʻao ʻo Sihová. ʻI he temipale fakaevīsoné, ʻoku ʻikai ke hā ʻi he lotoʻā ʻi lotó ʻa e meʻa ʻa ia naʻe mātuʻaki tuʻu-ki-muʻa ʻi he lotoʻā ʻo e tāpanekalé pea ʻi he temipale ʻo Solomoné​—ko ha pēsoni lahi, naʻe ui ki mui ko ha tahi, maʻá e kau taulaʻeikí ke nau kaukau ai. (Ekisoto 30:​18-​21; 2 Kalonikali 4:​2-6) Ko e hā leva naʻe lava ke ngāueʻaki ʻe he kau taulaʻeiki ʻi he vīsone fakaetemipale ʻa ʻIsikelí ki he fakamaʻá? ʻIkai koā, ko e vai fakaemana ko ia ʻoku tafe ʻo fou atu he lotoʻā ʻi lotó! ʻIo, ʻe tāpuakiʻi kinautolu ʻe Sihova ʻaki ʻa e ngaahi founga te nau fiefia ai, ʻi he tuʻunga maʻa pe māʻoniʻoni.

 9. ʻE lava fēfē ke maʻu ha tuʻunga maʻa he ʻahó ni ʻe he faʻahinga ko ia ʻo e kau paní mo e faʻahinga ʻo e fuʻu kakai lahí?

⁹ Hangē pe ko e ʻaho ní, kuo tāpuakiʻi ʻa e kau paní ʻaki ha tuʻunga maʻa ʻi he ʻao ʻo Sihová. ʻOku vakai ʻa Sihova kiate kinautolu ʻoku nau toputapu, ʻo fakahaaʻi ʻoku nau māʻoniʻoni. (Loma 5:​1, 2) Fēfē ʻa e “fuʻu kakai lahi,” naʻe fakatātaaʻi ʻe he ngaahi matakali taʻetaulaʻeikí? ʻOku nau lotu ʻi he lotoʻā ʻi tuʻá, pea ko e vai tatau pē ʻoku tafe ʻo fou atu ʻi he konga ko ia ʻo e temipale fakaevīsoné. He feʻungamālie leva ē, ko e mamata ʻa e ʻapositolo ko Sioné ki he fuʻu kakai lahí ʻoku nau tui ʻa e ngaahi kofu hinehina maʻá, ʻi heʻenau lotu he lotoʻā ʻo e temipale fakalaumālié! (Fakahā 7:​9-​14) Tatau ai pē pe naʻe ngaohi fēfeeʻi kinautolu ʻi he māmani ololalo ko ení, ʻe fakapapauʻi nai kiate kinautolu kapau pē te nau ngāueʻi ʻa e tui ki he feilaulau huhuʻi ʻa Kalaisí, ʻoku vakai ʻa Sihova kiate kinautolu ʻoku nau maʻa mo ʻāsinisini. ʻOku anga-fēfē ʻenau ngāueʻi ʻa e tuí? ʻAki ʻa e muimui ʻi he topuvaʻe ʻo Sīsuú, ʻo maʻu ʻa e loto-falala kakato ki he feilaulau huhuʻí.​—1 Pita 2:21.

10, 11. Ko e hā ʻa e tafaʻaki mahuʻinga ʻe taha ʻo e vai fakaefakatātaá, pea ʻoku anga-fēfē ʻa e felāveʻi ʻa e meʻá ni mo e fakautuutu fakaʻulia ʻo e vaitafé?

¹⁰ Hangē ko ia naʻe ʻosi lave ki aí, ʻoku ʻi ai ha tafaʻaki mātuʻaki mahuʻinga ʻe taha ʻo e vai fakaefakatātā ko ení​—ko e ʻiló. ʻI he ʻIsileli naʻe toe fakafoki maí, naʻe tāpuakiʻi ʻe Sihova ʻa hono kakaí ʻaki ʻa e fakahinohino Fakatohitapu fakafou ʻi he kau taulaʻeikí. (Isikeli 44:23) ʻI ha founga fakafehoanaki, kuo tāpuakiʻi ʻe Sihova ʻa hono kakaí ʻi he ʻahó ni ʻaki ʻa e fakahinohino feʻunga fekauʻaki mo ʻene Folofola ʻo e moʻoní, fakafou ʻi he “tuʻunga taulaʻeiki fakatuʻi.” (1 Pita 2:9) Ko e ʻilo fekauʻaki mo Sihova ko e ʻOtuá, fekauʻaki mo ʻene ngaahi taumuʻa ki he faʻahinga ʻo e tangatá, pea tautefito fekauʻaki mo Sīsū Kalaisi pea mo e Puleʻanga faka-Mīsaiá kuo tafe mai ia ko ha vaitafe ʻoku faai ki he lahi ange, lolotonga ʻa e ngaahi ʻaho fakaʻosí ni. He kāfakafa moʻoni ko e fuʻu tafenga vai loloto ange ʻo e fakaivifoʻou fakalaumālie ʻoku tau maʻú!​—Taniela 12:4.

¹¹ Hangē ko ia ko e tupu fakautuutu ʻo loloto ange ʻa e vaitafe naʻe fua ʻe he ʻāngeló, ʻoku pehē pē ʻa e tupulekina fakaofo ʻa e tafe mai ʻa e ngaahi tāpuaki foaki moʻui meia Sihová koeʻuhi ke feʻunga ki he holo mai ʻa e kakaí ki hotau fonua faitāpuekina fakalaumālié. Ko e kikite ʻe taha ʻo e toe fakafokí naʻe tomuʻa tala ai: “Ko e kiʻi siʻi ʻe hoko ko e toko afe, pea ko e momoʻi meʻa ko e puleʻanga malohi: ko au Sihova te u fakavave ia ʻi hono taimi.” (Aisea 60:22) Kuo hoko moʻoni ʻa e ngaahi leá ni​—kuo fakatahataha mai ʻa e laui miliona ke kau mo kitautolu ʻi he lotu maʻá! Kuo ʻai ʻe Sihova ʻo hulu ʻa e “vai” ʻo ala maʻu ia kiate kinautolu kotoa ʻoku tafoki kiate iá. (Fakahā 22:17) ʻOkú ne fakapapauʻi ʻoku tufaki ʻe heʻene kautaha fakaemāmaní ʻa e ngaahi Tohitapu mo e tohi faka-Tohitapu ʻi he māmaní kotoa, ʻi he ngaahi lea ʻe lauingeau. ʻI he tuʻunga meimei tatau, ko e ngaahi fakataha mo e fakataha-lahi faka-Kalisitiané, kuo fokotuʻutuʻu ia ʻi māmani lahi koeʻuhi ke lava ʻo tokonaki mai ai ki he tokotaha kotoa pē ʻa e vai maʻa hangē ha kilisitala ʻo e moʻoní. ʻOku anga-fēfē hono ueʻi ʻa e kakaí ʻe he ngaahi tokonaki peheé?

ʻOku ʻOmai ʻe he Vaí ʻa e Moʻui!

12. (a) Ko e hā ʻoku malava ai ke fua pehē ʻa e ʻuluʻakau ʻi he vīsone ʻa ʻIsikelí? (e) Ko e hā ʻoku fakafofongaʻi ʻe he ʻuluʻakau fua ko ení lolotonga ʻa e ngaahi ʻaho fakaʻosí?

¹² Ko e vaitafe ʻi he vīsone ʻa ʻIsikelí ʻokú ne ʻomai ʻa e moʻui mo e moʻui lelei. ʻI he ʻilo ʻa ʻIsikeli ki he ʻuluʻakau ʻe tupu ʻi he veʻe vaitafé, naʻe tala ange ki ai: “ʻE ʻikai mae hono lau, pea ʻe ʻikai hala hono fua: . . . pea ko hono fua ʻoku maʻa e meʻakai, pea ko hono lau ʻoku maʻa e faitoʻo.” Ko e hā ʻoku fua ai ʻa e ʻuluʻakaú ni ʻi he founga fakaofo ko ení? “He ko hono vai ko é ʻoku hu ia mei he Potu Tapu.” (Isikeli 47:12e) Ko e ʻuluʻakau fakaefakatātā ko ení ʻoku nau tomuʻa fakatātaaʻi ʻa e ngaahi tāpuaki kotoa ʻa e ʻOtuá ki hono toe fakafoki ʻa e faʻahinga ʻo e tangatá ki he haohaoa makatuʻunga ʻi he feilaulau huhuʻi ʻa Sīsuú. ʻI māmani ʻi he taimi ko ení, ʻoku taki ai ʻa e toenga ʻo e kau paní ʻi hono tokonaki mai ʻa e meʻakai mo e faitoʻo fakalaumālie. Hili hono maʻu kotoa ʻe he toko 144,000 honau pale fakahēvaní, ko e ngaahi ʻaonga tupu mei heʻenau ngāue fakataulaʻeikí ʻi he tuʻunga kaungāpule mo Kalaisí ʻe fakalahi atu ia ki he kahaʻú, ʻo toki taki atu ai ki hono ikunaʻi fakaʻaufuli ʻo e mate ʻia ʻĀtamá.​—Fakahā 5:​9, 10; 21:​2-4.

13. Ko e hā ʻa e fakamoʻui kuo fakahoko lolotonga hotau taimí?

¹³ Ko e vaitafe fakaevīsoné ʻoku tafe atu ia ki he Tahi Mate taʻemoʻuí pea ʻokú ne fakamoʻui ʻa ia kotoa ʻoku aʻu ki aí. ʻOku fakatātaaʻi ʻe he tahí ni ha ʻātakai ʻo e mate fakalaumālie. Ka ʻoku fonu ʻa e moʻuí “ʻi he potu kotoa pe ʻe aʻu ki ai ʻa e vaitafe.” (Isikeli 47:9) ʻI he tuʻunga meimei tatau, ʻi he ngaahi ʻaho fakaʻosí, ʻi ha feituʻu pē kuo hūhū atu ki ai ʻa e vai ʻo e moʻuí kuo hoko ai ʻa e kakaí ʻo moʻui fakalaumālie. Ko e ʻuluaki faʻahinga pehē kuo fakaivifoʻoú ko e toenga ʻo e kau paní ʻi he 1919. Naʻa nau toe mapuna hake ki he moʻui fakalaumālié mei ha tuʻunga taʻengāue hangē ha maté. (Isikeli 37:​1-​14; Fakahā 11:​3, 7-​12) Talu mei ai ko e vai mātuʻaki mahuʻinga ko iá kuo toe aʻu foki ia ki he faʻahinga kehe naʻe mate fakalaumālie, pea ko e faʻahingá ni kuo nau hoko ʻo moʻui pea nau faʻu ha fuʻu kakai lahi tupulekina ʻo e fanga sipi kehé, ʻa ia ʻoku nau ʻofa mo tauhi ʻa Sihova. Kuo vavé ni ke fakalahi atu ʻa e tokonakí ni ki he fuʻu tokolahi ʻo e faʻahinga ʻe toetuʻú.

14. Ko e toutaiʻanga ika lakalakaimonū ʻi he konga matātahi ʻo e Tahi Maté ʻokú ne fakatātaaʻi lelei ʻa e hā ʻi he ʻahó ni?

¹⁴ ʻOku iku ʻa e longomoʻui fakalaumālié ki he fua lahi. ʻOku fakatātaaʻi eni ʻe he toutaiʻanga ika ko ia ʻoku lakalakaimonū ʻi he kauvai ʻo e tahi ko ē naʻe mate ki muʻá. Naʻe tala ʻe Sīsū ki hono ongo muimuí: “Te u ngaohi kimoua ko e ongo toutai tangata.” (Mātiu 4:19) ʻI he ngaahi ʻaho fakaʻosí, naʻe kamata ʻa e ngāue toutaí ʻaki hono fakatahatahaʻi ʻo e faʻahinga ko e toenga ʻo e kau paní, ka naʻe ʻikai ke ngata pē ai. Ko e vai foaki moʻui mei he temipale fakalaumālie ʻo Sihová, kau ai ʻa e tāpuaki ʻo e ʻilo totonú, ʻokú ne ueʻi ʻa e kakai ʻo e puleʻanga kotoa pē. Ko fē pē kuo aʻu ki ai ʻa e vaitafe ko iá, kuo iku ia ki he moʻui fakalaumālie.

15. Ko e hā ʻokú ne fakahā ʻe ʻikai ke tali ʻe he tokotaha kotoa pē ʻa e ngaahi tokonaki ʻa e ʻOtuá ki he moʻuí, pea ko e hā ʻa e ikuʻanga fakaʻosi ki he faʻahinga peheé?

¹⁵ Ko e moʻoni, ʻoku ʻikai ke tali lelei ʻe he tokotaha kotoa pē ʻa e pōpoaki ʻo e moʻuí he taimí ni; pehē ki he faʻahinga kotoa ko ia ʻa ia ʻe toetuʻu lolotonga ʻa e Pule Taʻu ʻe Taha Afe ʻa Kalaisí. (Aisea 65:20; Fakahā 21:8) ʻOku talaki ʻe he ʻāngeló ʻoku ʻikai fakamoʻui ha ngaahi konga ʻo e tahí. Ko e ngaahi feituʻu ano taʻemoʻui ko ení, ʻoku ‘tuku pe ke maʻu ʻe he masimá.’ (Isikeli 47:11) Ka ki he kakai ʻi hotau ʻaho ní, ʻoku ʻikai ke tali ia ʻe he kotoa ʻo kinautolu ʻoku tuʻuaki ki ai ʻa e vai foaki moʻui ʻa Sihová. (Aisea 6:10) ʻI ʻĀmaketone, ko e faʻahinga kotoa kuo nau fili ke nōfoʻi ʻi ha tuʻunga taʻemoʻui fakalaumālie mo mahamahakí ʻe tuku pē ke maʻu ʻe he māsimá, ʻa ia, ko hono fakaʻauha taʻengata. (Fakahā 19:​11-​21) Kae kehe, ko e faʻahinga ko ia kuo nau inu fai tōnunga ʻa e vaí ni ʻe lava ke nau ʻamanaki ke hao moʻui atu ʻo mamata ʻi hono fakahoko fakaʻosi ʻo e kikité ni.

ʻOku Tafe ʻa e Vaitafé ʻi Palataisi

16. Ko ʻafē pea ʻe anga-fēfē hono fakahoko fakaʻosi ʻa e vīsone ʻa ʻIsikeli ki he temipalé?

¹⁶ Hangē pē ko e ngaahi kikite kehe ʻo e toe fakafokí, ʻoku hanga atu ʻa e vīsone ʻa ʻIsikeli ki he temipalé ki hono fakahoko fakaʻosí ʻi he lolotonga ʻo e Taʻu ʻe Taha Afé. Ko e kalasi taulaʻeikí leva ʻe ʻikai te nau kei ʻi heni he māmaní. “Te nau nofo ko e kau taulaʻeiki ʻa e ʻOtua mo Kalaisi, pea te nau Hau mo ia [ʻi hēvani] ʻi he taʻu ʻe taha afe.” (Fakahā 20:6) Ko e kau taulaʻeiki fakahēvani ko iá te nau fāitaha mo Kalaisi ʻi hono fakahoko ʻa e ngaahi ʻaonga kakato ʻo e feilaulau huhuʻi ʻa Kalaisí. Ko ia ʻe fakahaofi ʻa e faʻahinga māʻoniʻoni ʻo e tangatá, ʻo toe fakafoki ki he haohaoá!​—Sione 3:17.

17, 18. (a) ʻOku anga-fēfē hono fakamatalaʻi ʻo ha vaitafe foaki moʻui ʻi he Fakahā 22:​1, 2, pea ko fē ʻa e taimi tefito ʻo hono ngāueʻaki ʻo e vīsone ko iá? (e) ʻI Palataisi, ko e hā ʻe hoko ai ha taimi ʻo e fuʻu mafola lahi ki he vaitafe ʻo e vai ʻo e moʻuí?

¹⁷ Ko hono olá, ko e vaitafe naʻe sio ki ai ʻa ʻIsikelí ʻe toki tafe mai leva ia ʻaki ʻa e vai mālohi taha ʻo e moʻuí. Ko e taimi tefito eni ʻo hono ngāueʻaki ʻa e kikite ʻoku lēkooti ʻi he Fakahā 22:​1, 2: “Pea ne fakaha kiate au ha vaitafe ʻo e Vaiola, naʻe ngingila ʻo hange ko e kilisitala, ʻoku tafe mai mei he taloni ʻo e ʻOtua mo e Lami. ʻI he vahaʻa ʻo e hala ʻo e kolo pea mo e vaitafe, ʻi he kauvai ʻe taha, naʻe tuʻu ai ʻa e ʻakau ʻo e moʻui, pea pehe mo e kauvai ʻe taha. Naʻe hongofulu ma ua hono faʻahinga fua, ʻo taki taha ʻa e mahina hono fua: pea ko e louʻakau ʻoku ʻaonga ki he faitoʻo ʻo e ngaahi kakai.”

¹⁸ Lolotonga ʻa e Taʻu ʻe Taha Afé, ko e ngaahi mahaki​—fakaesino, fakaeʻatamai, mo e fakaeongó​—ʻe fakamoʻui. ʻOku fakatātaaʻi lelei eni ʻaki ʻa e “faitoʻo ʻo e ngaahi kakai” fakafou ʻi he ʻuluʻakau fakaefakatātaá. Fakafetaʻi ki he ngaahi tokonaki naʻe fakahoko ʻe Kalaisi mo e toko 144,000, “ʻoku ʻikai ha nofo ai te ne pehe, ʻOku ou mahaki.” (Aisea 33:24) Pea ʻe hū atu ʻa e vaitafé ki hono taimi mafola lahi tahá! ʻE pau ke fakafālahi mo fakaloloto ia koeʻuhi ke feʻunga ai ʻa e laui miliona, mahalo pē ko e laui piliona, ʻo e faʻahinga ʻo e tangatá ʻe toetuʻú ʻa ia te nau inu mei he ngaahi vai maʻa ko eni ʻo e moʻuí. Naʻe fakamoʻui ʻe he vaitafe fakaevīsoné ʻa e Tahi Maté, ʻo ʻomai ʻa e moʻui ki he feituʻu pē naʻe tafe atu ki ai ʻa hono ngaahi vaí. ʻI Palataisi, ko tangata mo fafine te nau hoko ʻo moʻui ʻi he ʻuhinga kakato tahá, ʻi he hoko ʻo fakamoʻui mei he mate tukufakaholo meia ʻĀtamá kapau te nau ngāueʻi ʻa e tui ki he ngaahi ʻaonga ʻo e huhuʻí kuo fakaaʻu mai kiate kinautolú. ʻOku tomuʻa tala ʻi he Fakahā 20:12 ʻe fakaava ʻa e “ngaahi tohi” ʻi he ngaahi ʻaho ko iá, ʻo tokonaki mai ʻa e maama lahi ange ʻo e mahino ʻa ia ʻe maʻu ʻaonga mei ai foki ʻa e kau mate ʻe toetuʻú. Ko e meʻa fakamamahí, he ʻe fakafisi ʻa e niʻihi ia ke fakamoʻui, naʻa mo e ʻi Palataisí. Ko e kau angatuʻu ko ení ko e faʻahinga ia ʻe ‘tuku pe ke maʻu ʻe he masima’ ʻo e fakaʻauha taʻengatá.​—Fakahā 20:15.

19. (a) ʻE anga-fēfē hono fakahoko ʻa e vahevahe ʻo e fonuá ʻi Palataisí? (e) Ko e hā ʻa e tafaʻaki ʻi Palataisi ʻoku fakatātaaʻi ʻe he koló? (f) Ko e hā ʻa e ʻuhinga ʻo e tuʻu ʻa e koló ʻo kiʻi mamaʻo mei he temipalé?

¹⁹ ʻI he toe taimi ko iá, ko hono vahevahe ʻo e fonuá ʻi he vīsone ʻa ʻIsikelí ʻe maʻu ai ʻa hono fakahoko fakaʻosí. Naʻe sio ʻa ʻIsikeli kuo vahevahe lelei ʻa e fonuá; ʻi he tuʻunga tatau, ʻe lava ke fakapapauʻi ʻe he Kalisitiane anga-tonu taki taha ʻe ʻi ai hano nofoʻanga, ko ha tofiʻa, ʻi Palataisi. Hangehangē ko e holi ke maʻu hato fale tonu ke nofo ai mo tokangaʻí ʻe fakahoko ia ʻi ha founga maau. (Aisea 65:21; 1 Kolinito 14:33) Ko e kolo naʻe mamata ki ai ʻa ʻIsikelí ʻokú ne fakatātaaʻi feʻungamālie ʻa e fokotuʻutuʻu fakaepuleʻi ʻoku fakataumuʻa ʻe Sihova ki he māmani foʻoú. Ko e kalasi taulaʻeiki paní ʻe ʻikai te nau kei ʻi ai fakaesino ʻi he lotolotonga ʻo e faʻahinga ʻo e tangatá. ʻOku fakamahino lahi mai ia ʻi he vīsoné ʻaki hono fakatātaaʻi ʻa e koló ʻi he fonua “ngofua” ʻo mamaʻo mei he temipalé. (Isikeli 48:​15) Lolotonga ʻoku pule fakataha ʻa e toko 144,000 mo Kalaisi ʻi hēvani, ko e Tuʻí ʻoku ʻikai taʻeʻiai hano kau fakafofonga ʻi he māmaní. Ko ʻene kakai ʻe pule hifo ki aí te nau maʻu ʻa e ʻaonga lahi mei he tataki mo e fakahinohino anga-ʻofa ʻa e kalasi ʻeikí. Kae kehe, ko e tuʻuʻanga moʻoni ʻo e puleʻangá ʻe ʻi hēvani ia, kae ʻikai ʻi māmani. Ko e tokotaha kotoa ʻi māmaní kau ai ʻa e kalasi ʻeikí, te nau moʻulaloa ki he Puleʻanga faka-Mīsaiá.​—Taniela 2:​44; 7:​14, 18, 22.

20, 21. (a) Ko e hā ʻoku feʻungamālie ai ʻa e hingoa ʻo e koló? (e) Ko e hā ʻa e ngaahi fehuʻi ʻoku totonu ke ne fakatupunga ke tau ʻeke hifo kiate kitautolu ʻi heʻetau mahinoʻi ʻa e vīsone ʻa ʻIsikelí?

²⁰ Fakatokangaʻi ange ʻa e ngaahi lea fakaʻosi ʻo e kikite ʻa ʻIsikelí: “Talu ai ko e hingoa ʻo e kolo ko Sihova Sama. (ʻOku ʻi ai ʻa Sihova.)” (Isikeli 48:35) ʻE ʻikai ke ʻi ai ʻa e kolo ko ení ke ʻave ki he tangatá ha mafai pe tākiekina; pea ʻe ʻikai ʻi aí ke fakamālohiʻi ha loto pē ʻo e tangatá. Ko e kolo ia ʻo Sihova, ʻo tapua maʻu ai pē mei ai ʻa ʻene fakakaukaú mo ʻene ngaahi founga anga-ʻofa mo fakaʻatuʻí. (Semisi 3:17) ʻOku ʻomai ʻe he meʻá ni kiate kitautolu ʻa e fakapapau fakalotomāfana ʻe tāpuakiʻi ʻe Sihova ʻa ʻene faʻu “fonua foʻou” ko e sōsaieti ʻo e faʻahinga ʻo e tangatá ki ha kahaʻu tuʻuloa taʻehanongataʻanga.​—2 Pita 3:13.

²¹ ʻOku tau loto-māfana ʻi he ʻamanaki ʻoku ʻi muʻa ʻiate kitautolú? ʻOku feʻungamālie leva, ʻa e lelei kiate kitautolu taki taha ke ʻeke: ‘ʻOku anga-fēfē ʻa ʻeku tali ki he ngaahi tāpuaki fakaofo kuo tatala ʻi he vīsone ʻa ʻIsikelí? ʻOku ou poupouʻi anga-tonu ʻa e ngāue ʻoku fai ʻe he kau ʻovasia anga-ʻofá, ʻo kau ai ʻa e faʻahinga ko ia ko e toenga ʻo e kau paní mo e kau mēmipa ʻamanekina ʻo e kalasi ʻeiki? Kuó u ʻai ʻa e lotu maʻá ko e uho tonu ia ʻo ʻeku moʻuí? ʻOku ou ngāue ʻaonga kakato ʻaki ʻa e vai ʻo e moʻuí ʻoku mātuʻaki tafe lahi he ʻaho ní?’ ʻOfa ke hokohoko atu ʻa e fai pehē ʻa e tokotaha taki taha ʻo kitautolu pea fiefia ʻi he ngaahi tokonaki ʻa Sihová ʻi he kotoa ʻo ʻitānití!

[Fakamatala ʻi lalo]

Ko e Hā Haʻo Tali?

◻ Ko e hā ʻoku fakatātaaʻi ʻe he ngaahi vai ʻoku tafe mai mei he temipalé?

◻ Ko e hā ʻa e fakamoʻui kuo fakahoko ʻe Sihova fakafou ʻi he vaitafe fakaefakatātaá, pea ko e hā kuo fakautuutu ai ʻa e lahi ʻo e vaí?

◻ Ko e hā ʻoku fakatātaaʻi ʻe he ʻuluʻakau ʻi he ongo veʻe vaitafé?

◻ Ko e hā ʻe fakatātaaʻi ʻe he koló lolotonga ʻa e Pule Taʻu ʻe Taha Afé, pea ko e hā ʻoku feʻungamālie ai ʻa e hingoa ʻo e koló?

[Fakatātā ʻi he peesi 23]

ʻOku fakatātaaʻi ʻe he vaitafe ʻo e moʻuí ʻa e tokonaki ʻa e ʻOtuá ki he fakamoʻuí