Tenge mei he Toʻumeʻá—ʻE Lava ke ʻAonga Ia Kiate Koe?

Ko kitautolu hono kotoa ʻoku fanauʻi mai mo e holi tefito ke tali ʻe hotau ngaahi toʻumeʻá. ʻOku ʻikai loto ha taha ke fehiʻanekinaʻi, mo talitekeʻi. Ko ia ai, ʻoku tākiekina kitautolu ʻe hotau ngaahi toʻumeʻá, ʻi he ngaahi tuʻunga kehekehe.

KO HA toʻumeʻa ʻoku fakamatalaʻi ia ko ha “taha ʻa ia ʻoku tuʻunga tatau mo ha toe tokotaha; . . . ko ha taha ʻoku kau ki he kulupu fakaesōsaieti tatau, ʻo makatuʻunga tau[tefito] ʻi he taʻumotuʻá, kalasí, pe tuʻungá.” Ko ia ai, ko e tenge mei he toʻumeʻá, ko e mālohi ia ʻoku fakamālohituʻu mai kiate kitautolu ʻe hotau ngaahi toʻumeʻá, ko ia, ʻi he ʻilo pe taʻeʻilo ki ai, ʻoku tau fakatatau ai ki heʻenau founga fakakaukaú pe tōʻongá. ʻOku faʻa fai ʻa e vakai ʻoku ʻikai ha ʻaonga ʻo e tenge mei he toʻumeʻá. Kae, hangē ko ia te tau sio ki aí, ʻe lava ke tau liliu ia ke ʻaonga kiate kitautolu.

Tākiekina ʻa e Ngaahi Taʻumotuʻa Kotoa

ʻOku ʻikai fakangatangata pē ʻa e tenge mei he toʻumeʻá ki he taʻu siʻí; ʻokú ne uesia ʻa e taʻumotuʻa kotoa. Ko ʻene tākiekiná ʻoku hā ia ʻi he taimi ʻoku tau ʻilo ai ʻoku tau ʻeke ʻa e ngaahi fehuʻi hangē ko e: “ʻOku fai ia ʻe he niʻihi kehé, ko e hā ka ʻikai ai te u lava ʻe aú?” “Ko e hā ʻoku pau maʻu ai pē ke u kehé?” “Ko e hā ʻe fakakaukau pe lea mai ʻaki ʻe he niʻihi kehé?” “Ko e kotoa ʻo hoku ngaahi kaumeʻá ʻoku nau faialea pea nau mali, ka ko au ia ʻoku ʻikai. ʻOku ʻi ai ha meʻa ʻe fehālaaki ʻiate au?”

Lolotonga ko e tenge ke liliú ʻokú ne uesia ʻa e taʻumotuʻa kotoa, ʻoku hehema ia ke toe lahi ange lolotonga ʻa e talavoú. ʻOku pehē ʻe he The World Book Encyclopedia ko e “tokolahi taha ʻo e kau talavoú ʻoku nau hoko ʻo fekauʻaki lahi mo honau kulupu toʻumeʻá​—ʻa ia, ko honau siakale ʻo e ngaahi kaungāmeʻá mo e mahení. Ko e kau taʻu hongofulu tupu ko ení ʻoku nau hanga ki honau kulupu toʻumeʻá, kae ʻikai ki heʻenau ngaahi mātuʻá, ki hano tali lelei, pea te nau liliu nai ʻenau tōʻongá ke maʻu ʻa e tali lelei ko iá.” ʻOku tānaki mai ai, ko e kau taʻu hongofulu tupú, “ʻoku nau pehē ʻoku nōmolo ʻenau tupú kapau ʻoku tali mo saiʻia ʻiate kinautolu honau ngaahi toʻumeʻá.” ʻI he meʻa ko iá ʻoku nau “hoko ai ʻo nōfoʻi ʻi he ngaahi meʻa ʻoku nau fakakaukau ʻoku kaunga ki heʻenau manakoá, hangē ko e sīpinga ʻo e valá, malava fakaetakí, pea mo e lavameʻa ʻi he faialeá.”

Ko e ngaahi hoa malí te nau ʻiloʻi nai ko ʻenau ngaahi fili fekauʻaki mo e faʻahinga ʻapi ke fakataú pe nofo totongi aí, faʻahinga kā ke heka aí, ke maʻu fānau pe ʻikai, mo e ngaahi meʻa lahi kehe, ʻoku tākiekina ia ʻe he tenge mei he toʻumeʻá​—ʻa e meʻa ʻoku tali ʻi honau feituʻú, ʻi he lotolotonga ʻo honau ngaahi kaungāfeohí pe kulupu fakamatakalí. Kuo aʻu ʻa e ngaahi fāmili ʻe niʻihi ʻo lahi honau ngaahi moʻuá koeʻuhi pē ke ʻalu tatau fakamatelie mo e ngaahi kaungāʻapí pea mo e ngaahi toʻumeʻá. ʻIo, ko ʻetau ngaahi taumuʻá, ko ʻetau fakakaukaú, mo ʻetau ngaahi filí ʻoku faʻa hā mei ai ʻa e mālohi olopoto ʻo e tenge mei he toʻumeʻá. ʻI he vakai atu ki hono mālohí, ʻe lava ke tau feangai mo e tenge mei he toʻumeʻá ʻi ha founga ʻaonga, ke ne tokoniʻi kitautolu ʻi he feituʻu ʻoku tau loto ke ʻalu aí? Ko e moʻoni, te tau lava!

Ngāueleleiʻaki ʻa e Tākiekina Lelei ʻa e Toʻumeʻá

ʻOku ʻiloʻi ʻe he kau toketaá mo e kau palōfesinale kehe ʻi he moʻuí ʻa e mahuʻinga ʻo hono ʻātakaiʻiʻaki ʻenau ngaahi kau mahakí ʻa e kakai fakakaukau pau pea mo e ngaahi tākiekina fakatupu moʻui lelei kehe. Ko ha ʻātakai pehē ʻe lava ke hoko ia ko ha fakaueʻi pau ki he fakaakeaké. Ko e fakatātaá, ko e kakai ko ia kuo mole honau nimá pe vaʻé, ʻoku faʻa tokoniʻi kinautolu fakafou ʻi ha ngāue fuoloa ʻo e toe fakaleleiʻi fakaesino mo e fakaakeake fakaeongo ʻaki ʻa e faʻifaʻitakiʻanga lelei mo e fakalototoʻa ʻa e niʻihi kehe ko ia kuo nau faingataʻaʻia meimei tataú. ʻOku hā mahino, ko e nōfoʻi ʻa ha taha ʻi ha ʻātakai lelei ʻoku kau ki ai ʻa e fakatuʻamelié, ko e faʻahinga ʻoku nau faʻifaʻitakiʻanga paú, ko ha founga ia ʻo e ngāueleleiʻaki ʻa e faʻahinga tenge totonu mei he toʻumeʻá.

ʻOku toe moʻoni ʻa e tefitoʻi moʻoni ko ení ʻi he fakatahaʻanga Kalisitiané, he ko e tākiekina pau mei he toʻumeʻá ko e taha ia ʻo e ngaahi ʻuhinga kuo fakahinohino ai ʻe Sihova ʻa hono kakaí ke nau fakatahataha fakataha maʻu peé. ʻOku enginaki kitautolu ʻe he ʻOtuá ke tau ‘fefakaʻaiʻaiʻaki ki he feʻofaʻaki mo e ngaue lelei.’ (Hepelu 10:​24, 25) ʻOku mahuʻinga taʻehanotatau ʻa e fakalototoʻa peheé koeʻuhi ko e ngaahi tenge fakalotosiʻi mo fakamamahi lahi ʻi he māmaní he ʻaho ní. Ko hono ola ʻo e ngaahi tenge ko ení, kuo pau ai ki he kau Kalisitiané ke ‘nau tōtōivi’ ke hokohoko atu ʻenau mālohi fakalaumālié. (Luke 13:24) Ko ia ai, ʻoku tau fiemaʻu mo houngaʻia ʻi he poupou anga-ʻofa mei he kaungātuí. ʻI he tānaki atu ki aí, ʻe pau nai ki he niʻihi ke nau kātakiʻi ʻa e ‘tolounua i he kakanó,’ mahalo ko ha puke pe taʻemalava. (2 Kolinito 12:7, PM) ʻE fāinga nai ʻa e niʻihi ke ikuʻi ha ngaahi tōʻonga kovi pe loto-mafasia, pe ʻoku nau ʻilo nai ʻoku faingataʻa ke fai ki he ngaahi fiemaʻu ʻi he moʻuí. Ko ia ai, ʻoku tau poto, ʻi hano ʻai ke takatakai ʻiate kitautolu ʻa e kakai ʻoku nau nofo ofi kia Sihova ko e ʻOtuá pea ʻoku nau fiefia ʻi he tauhi kiate iá. ʻE langaʻi hake kitautolu ʻe he ngaahi toʻumeʻa peheé mo tokoniʻi kitautolu ke tau ‘kataki ʻo aʻu ki he ngataʻangá.’​—Mātiu 24:13.

ʻI hono fili leva ʻa e ngaahi toʻumeʻa totonú, ʻe lava ai ke tau mapuleʻi ʻa e tākiekina ʻoku nau fai mai kiate kitautolú. Tānaki atu ki ai, ko e meʻakai fakalaumālie lelei mo e tataki ʻaonga ʻoku ʻomai ʻi he ngaahi fakataha faka-Kalisitiané ʻokú ne fakaivimālohiʻi ʻa e fakalototoʻa fakafoʻituitui ʻoku tau maʻu mei hotau ngaahi toʻumeʻá.

Ko e moʻoni, ʻoku ʻikai ke faingofua maʻu pē ʻa e ʻalu ki he ngaahi fakataha faka-Kalisitiané. Ko e niʻihi ʻoku nau maʻu siʻisiʻi pē nai pe ʻikai ha poupou mei honau ngaahi hoa malí, ʻe pau nai ki he niʻihi ke teuteuʻi ʻa e fānaú, pea ki he niʻihi kehe ko ha palopalema fakameʻalele nai. Kae fakakaukau: Kapau ʻoku ʻikai te ke fakaʻatā ʻa e ngaahi fakafaingataʻaʻiaʻanga ko ení ke nau taʻofi koe, ʻe ueʻi leva nai ai ʻe hoʻo faʻifaʻitakiʻangá ʻa e niʻihi ʻa ia ʻoku nau fetakai nai mo e ngaahi tuʻunga meimei tatau. Ko hono toe fakalea ʻe tahá, ko koe mo e niʻihi kehe hangē ko koé ʻoku mou tokonaki mai ʻo ʻikai ko ha faʻifaʻitakiʻanga lelei pē ka ko ha toe tuʻunga tākiekina lelei fakaetoʻumeʻa​—pea ʻoku hoko ia ʻo ʻikai hā mei ai ha fakamālohi.

Ko hono moʻoní, ko e ʻapositolo ko Paulá, ʻa ia ko ia tonu naʻe pau ke ne fetakai mo e ngaahi faingataʻa lahi mo e ngaahi fakafelei, ʻokú ne fakalototoʻaʻi mai ʻa e kau Kalisitiané ke nau faʻifaʻitaki ki heʻene faʻifaʻitakiʻanga leleí pea mo ia ʻa e kau Kalisitiane matuʻotuʻa kehé. Naʻá ne pehē: “Kainga, mou kau ʻi he faʻifaʻitaki kiate au; pea mou vakai kiate kinautolu ʻoku tatau ʻenau laka mo e faʻifaʻitakiʻanga ʻoku mou maʻu ʻiate kimaua.” (Filipai 3:​17; 4:9) Ko e muʻaki kau Kalisitiane ʻi Tesalonaiká naʻa nau hanga ki he faʻifaʻitakiʻanga lelei ʻa Paulá. Fekauʻaki mo kinautolu naʻe tohi ʻa Paula: “Naʻa mou hoko ko e kau faʻifaʻitaki kiate kimautolu pea mo e ʻEiki; he neongo naʻe hoko ʻa e folofola mo e fuʻu mamahi, ka mou tali fiefia pe, ko e fiefia tupu ʻi he Laumalie Maʻoniʻoni. Ko ia kuo mou hoko ai ko e faʻifaʻitakiʻanga kiate kinautolu kotoa pe ʻi Masitonia mo Akeia kuo lotu.” (1 Tesalonaika 1:​6, 7) Ko ʻetau fakakaukau mo e faʻifaʻitakiʻanga paú ʻe lava ke ʻi ai hono ola meimei tatau ki he faʻahinga ko ia ʻoku tau feohi mo iá.

Fakaʻehiʻehi mei he Ngaahi Tākiekina Taʻepaú

Kapau ʻoku tau loto ke fakaʻehiʻehi mei he tenge ʻikai lelei mei he toʻumeʻá, kuo pau ke tau talitekeʻi ʻa e tākiekina ʻa ‘kinautolu ʻoku nau angafakakakanó.’ (Loma 8:​4, 5; 1 Sione 2:​15-​17) He ka ʻikai, ʻe tataki mamaʻo kitautolu meia Sihova pea mo ʻene akonaki fakapotopotó ʻe he tenge fakamamahi mei he toʻumeʻá. ʻOku pehē ʻe he Palovepi 13:20: “Ko ia ʻoku fafale ki he kau poto, te ne hoko ko e poto: ka ko ia ʻoku kaumeʻa mo e sesele ʻe hoko ko e lusa.” ʻE lava ke ke fakakaukau ki ha taha ʻoku hoko ko e lusa koeʻuhi ko e tenge ʻikai lelei mei he toʻumeʻá? Ko e fakatātaá, kuo taki ʻa e kau Kalisitiane ʻe niʻihi ki he tuli ki he meʻa fakamatelié, ʻulungaanga taʻetāú, pe ngāuekoviʻaki ʻa e faitoʻo kona tapú mo e ʻolokaholó koeʻuhi ko e tākiekina ʻa honau ngaahi toʻumeʻá.

Naʻa mo e ʻi he loto fakatahaʻangá, ʻe lava ke tau hoko ʻo ʻi he malumalu ʻo e tākiekina ʻo e tenge ʻikai lelei mei he toʻumeʻá kapau ʻoku tau fili ʻa e faʻahinga tāutaha ʻoku vaivai fakalaumālié ke hoko ko hotau kaungāfeohi ofí kinautolu. (1 Kolinito 15:33; 2 Tesalonaika 3:​14) ʻOku ʻikai faʻa hehema ʻa e faʻahinga peheé ke lāulea ki he ngaahi meʻa fakalaumālié; naʻa mo haʻanau manukiʻi nai ʻa e faʻahinga ko ia ʻoku nau fiefia ʻi he ngaahi fetalanoaʻaki peheé. Kapau ʻoku tau fili ʻa e faʻahinga ko ení ko hotau kaungāfeohi ofí kinautolu, ʻe fakamālohiʻi nai ai kitautolu ʻe he tenge mei he toʻumeʻá ki ha oʻi meimei tatau, pea ʻe vave pē ʻetau ʻilo nai ʻoku tapua mai ʻi heʻetau fakakaukaú mo ʻetau vakaí haʻanautolú fakakaukau. ʻE aʻu nai ʻo tau kamata ke fakakaukau taʻepau ki he faʻahinga ko ia ʻoku nau faimoʻoni ʻi heʻenau tuí pea ʻoku nau feinga ke fai ha laka ki muʻa fakalaumālié.​—1 Timote 4:​15.

He fakapotopoto lahi ange ē ke fakatupulekina ʻa e kaumeʻa mo e faʻahinga ko ia ʻoku nau feinga ke fakahōifuaʻi ʻa Sihová, ʻa ē ʻoku nau fiefia ʻi he ngaahi meʻa fakalaumālié! Ko e ngaahi feohi peheé te ne tokoniʻi kitautolu ke tapua mei ai ʻa e “poto ʻoku mei ʻolunga.” Ko hono “anga tuʻu muʻa ko e maʻa, pea hoko ai mo ʻene melino mo ʻene anga fakaʻatūʻi, ʻo taka fakaoleole, ʻo mohu manavaʻofa, pea fuhi ai ʻa e fua lelei, . . . ʻoku ʻikai momoleʻolunga.” (Semisi 3:​17) ʻOku ʻikai ʻuhinga eni ia ko e kakai fakakaukau fakalaumālié ʻoku taʻemalava ke nau toe talanoa kinautolu fekauʻaki mo ha meʻa kehe mei he ngaahi meʻa fakalaumālié. ʻIkai ʻaupito! Fakakaukau atu pē ki he kehekehe ʻo e ngaahi tuʻunga-lea mahuʻinga ʻoku lāulea ki ai ʻi he ngaahi tohi ʻa e Taua Leʻó hangē ko e makasini Awake! Ko e moʻoni ʻoku taʻehanongataʻanga ʻa e ngaahi tuʻunga-lea lelei ki he fetalanoaʻakí, pea ʻi he maʻu ha mahuʻingaʻia ʻi ha ngaahi tuʻunga lahi ʻo e ngaahi tuʻunga-leá, ʻoku tapua atu ai meiate kitautolu ha ʻofa ki he moʻuí pea mo e ngaahi ngāue tonu ʻa Sihová.

Hangē pē ko e fakaleleiʻi ʻe ha tokotaha tenisi lelei ʻa ʻene ngaahi pōtoʻí ʻaki ʻene vaʻinga mo e kau vaʻinga lelei kehé, ko e ngaahi feohi totonú ʻokú ne hiki hake fakaeʻatamai, fakaeongo, mo fakalaumālie kitautolu. ʻI he tafaʻaki ʻe tahá, ko e ngaahi feohi fehālaakí ʻe lava ke ne tataki kitautolu ki ha ʻalunga ʻo e mālualoi ʻaki hono fakaʻaiʻai kitautolu ke taki ha moʻui lōua. He lelei lahi ange ē ke fiefia ʻi ha konisēnisi maʻa fakataha mo ha tokaʻi-kita!

Niʻihi ʻOku Nau Maʻu ʻAongá

Ko e tokolahi taha ʻo e kakaí ʻoku nau ʻiloʻi ko e ako ʻo e ngaahi tokāteline ʻo e Tohitapú pea mo ʻene ngaahi fiemaʻu fakaeʻulungaanga mo fakalaumālié ʻoku ʻikai ke fuʻu faingataʻa. Kae kehe, ko e meʻa ʻe lava ke faingataʻá, ko hono ngāueʻaki ʻa e ngaahi meʻa ko ení. Hangē ko ia ʻoku fakahaaʻi ʻi he ngaahi fakatātā hokó, ko e tākiekina lelei mei he toʻumeʻá ʻe lava ke ne tokoniʻi kitautolu ke tau tauhi ʻaufuatō ʻa Sihova.

Ko ha tokotaha Fakamoʻoni ʻoku ʻi he ngāue fakafaifekau taimi-kakató mo hono uaifí naʻá ne pehē ko e ngaahi faʻifaʻitakiʻanga ʻo hono ngaahi toʻumeʻá naʻe kaunga ia ki heʻene ngaahi taumuʻa ʻi he moʻuí. Lolotonga ʻene tupu haké, naʻe pau ke ne fekuki mo e ngaahi tākiekina ʻikai lelei. Ka naʻá ne fili ke hoko ko hono ngaahi kaumeʻa ʻa e faʻahinga ko ia naʻa nau fakaʻaiʻai ia ke kau maʻu pē ʻi he ngāue fakafaifekaú pea ʻi hono maʻu ʻa e ngaahi fakataha faka-Kalisitiané. Ko e pipiki ki he ngaahi kaungāfeohi ko ení naʻá ne tokoniʻi ia ʻi he hala ki he matuʻotuʻa fakalaumālié.

ʻOku tohi ʻe ha Fakamoʻoni ʻe taha: “Hili ʻa ʻeku mali mo hoku uaifí, naʻá ma hiki ki ha fakatahaʻanga ʻa ia ko ha ongo meʻa mali ai ʻi homa taʻumotuʻá nai naʻá na tāimuʻa tuʻumaʻu. Naʻe tokoni ʻa ʻena faʻifaʻitakiʻangá ki heʻema kau ki he ngāue fakafaifekau taimi-kakató. Pea naʻá ma toe ngāue foki ki hono langa hake ʻa e laumālie ʻo e tāimuʻá ʻi he fakatahaʻangá. Ko hono olá, naʻe kau fakataha mai ʻa e tokolahi mo kimaua ʻi he hoko ko e kau tāimuʻa.”

Ko e feohi mo e faʻahinga ko ia ʻoku ʻi ai ʻenau ngaahi taumuʻa fakateokalatí ʻe lava ke ne ʻai ke faingofua ange ai ʻa e talangofua kia Sihová. Ko ha toe ola lelei ʻaonga ia ʻe taha ʻo e tākiekina lelei mei he toʻumeʻá. Ko ha Fakamoʻoni ʻa ia naʻá ne kamata ʻi he ngāue fakafaifekau taimi-kakató ko ha kiʻi talavou pea hoko ki mui ko ha ʻovasia fefonongaʻaki ʻokú ne ngāue he taimí ni ʻi he taha ʻo e ngaahi ʻōfisi vaʻa ʻo e Sōsaieti Taua Leʻó. ʻOkú ne tohi: “Ko e niʻihi ʻo ʻeku ngaahi muʻaki manatu peá u saiʻia taha ai ʻi he kei siʻí ko e ʻaʻahi mai ʻa e kau sevāniti taimi-kakató ki homau ʻapí. Naʻe ʻi ai maʻu pē ha toe sea ʻe taha ne ʻatā ʻi he tēpile ʻi homau loki kaí. Naʻe ʻomai ʻe he ʻovasia fefonongaʻaki ʻe taha haʻaku kato malanga ʻi heʻeku taʻu hongofulú. ʻOku ou koloaʻaki ʻa e kato ko iá ʻo aʻu mai ki he ʻahó ni.”

ʻI he fakakaukauloto atu ki hono taʻu hongofulu tupú, ʻoku tānaki mai ʻe he Fakamoʻoni ko ení: “Ko e tokolahi ʻo e kau talavou ʻi he fakatahaʻangá naʻa nau loto ke kau ʻi he ngaahi ngāue ʻa e fakatahaʻangá, pea naʻe ueʻi ʻe heʻenau faʻifaʻitakiʻangá ʻa e niʻihi ʻo kimautolu ke holi ki he meʻa tatau.” Ko e ngaahi toʻumeʻa leleí naʻa nau tokoniʻi ʻa e toʻutupu ko ení, ʻo hangē ha kiʻi huli, ʻoku tupu hake ʻo hoko ko ha tangata Kalisitiane lelei hangē ko ha fuʻu ʻakaú. Ngaahi mātuʻa, ʻoku mou fakaafeʻi ki homou ʻapí ʻa e faʻahinga ʻoku lava ke nau tākiekina pau mo langa hake hoʻomou fānaú?​—Malakai 3:​16.

Ko e moʻoni, ʻoku ʻikai lava ke tau kau kotoa ʻi he ngāue fakafaifekau taimi-kakató ʻo hangē ko e faʻahinga tāutaha ko ia naʻe toki lave pē ki aí. Ka ko kitautolu kotoa ʻoku lava ke tau ako ke ʻofa ʻia Sihova ‘ʻaki ʻa e kotoa ʻo hotau lotó, laumalié, mo e ʻatamaí.’ (Mātiu 22:37) Ko ʻetau filifili ʻo e ngaahi toʻumeʻá ʻokú ne fakahoko ha ngafa lahi ʻi heʻetau fakatupulekina ʻa e ʻofa ko iá pea ʻoku fekauʻaki ia, mo ʻetau ngaahi ʻamanaki ki he moʻui taʻengatá.

ʻOku ʻomai ʻe he tokotaha-tohi-sāmé ha founga faingofua kae ola lelei ki he lavameʻa moʻoni ʻi he moʻuí: “Monuʻiaa, ka ko e tangata ko ē kuo ʻikai fou ʻi he fakakaukau ʻa e fakaʻotuamate, pe tuʻu ʻi he hala ʻo e kau faikovi, pe nofo ʻi he nofoʻanga ʻo haʻa manuki: ka ko e Lao ʻo Sihova ʻa ʻene manako, ʻio ʻi he lao oʻona ʻoku ne fakalaulauloto ʻaho mo e po. Te ne hange ia ha ʻakau kuo to ki he ngaahi mangaʻivai, ʻa ia ʻoku ne fua ʻi hono toʻukai, ko hono lau foki ʻoku ʻikai mae; pea neongo pe ko e ha ʻoku ne fai ʻoku ne monuʻia pe.”​—Sāme 1:​1-3.

He fakapapau fakaofo moʻoni ia! Neongo ʻoku tau taʻehaohaoa pea fai ʻa e ngaahi fehālaaki, ʻe lavameʻa ʻetau moʻuí kapau te tau tuku ʻa Sihova ke ne tataki kitautolu pea kapau te tau laka tauʻatāina atu ki he tānekina ko ia ʻo e tākiekina lelei mei he toʻumeʻa kuo foaki mai ʻe he ʻOtuá​—“ko e feohiʻanga fakakātoa ʻo [hotau] fanga tokoua ʻi he māmaní.”​—1 Pita 5:9, NW.

[Fakatātā ʻi he peesi 24]

ʻOku ʻomai ʻe he fakatahaʻangá ha founga lelei ʻo e tākiekina fakaetoʻumeʻá

[Fakatātā ʻi he peesi 25]

Ngaahi mātuʻa, fakaʻaiʻai hoʻomou fānaú ke feohi mo e ngaahi toʻumeʻa fakatupu langa haké