Maluʻi Ho Lotó

“Mahulu hake ʻi he meʻa kehe kotoa pē kuo pau ke maluʻí, maluʻi ho lotó, he ʻoku haʻu mei ai ʻa e ngaahi matavai ʻo e moʻuí.”​—PALOVEPI 4:​23, NW.

1, 2. Ko e hā ʻoku fiemaʻu ai ke tau maluʻi hotau lotó?

KO HA tangataʻeiki ʻi ha motu Kalipiane naʻá ne toki mālanga hake mei hono fakaūūʻangá ʻi he hili ha afā. ʻI heʻene vakai atu ki he maumau takatakai ʻiate iá, naʻá ne fakatokangaʻi ko ha fuʻu ʻakau lahi naʻe tuʻu he ngaahi hongofuluʻi taʻu ʻo ofi ki hono matapā ʻā ʻi muʻá ne pulia ia. ‘Ne malava fēfē ke hoko ia,’ ko ʻene fifilí ia, ‘lolotonga iá ko e ʻulu ʻakau iiki ange ʻi he feituʻú naʻe hao ia?’ ʻI ha sio ki he fuʻu tungaʻi ʻakau ʻo e fuʻu ʻakau naʻe holó naʻe maʻu mei ai ʻa e talí. Ko loto ʻi he fuʻu ʻakau ko ʻeni naʻe hā ngali ʻe ʻikai ala ueʻiá naʻe popo ia, pea naʻe toki fakaeʻa mai pē ʻe he matangí ʻa e ʻauʻaunga taʻehāmai ko iá.

² He meʻa fakamamahi ē ko e taimi ʻoku hoko ai ha tokotaha lotu moʻoni ʻa ia ʻoku hā ʻoku faiaka fefeka ʻi he founga moʻui faka-Kalisitiané ʻo tō ʻi ha ʻahiʻahiʻi ʻo e tuí. ʻOku lea totonu ʻaki ʻe he Tohitapú ʻo pehē “ko e filioʻi ʻo e loto ʻo e tangata ʻoku kovi mei heʻene tamasiʻi.” (Senesi 8:21) ʻOku ʻuhinga ʻení ʻi he ʻikai ha faʻa vakavakai tuʻumaʻú, naʻa mo e ngaahi loto- lelei tahá ʻe lava ke fakataueleʻi ke ne fai ʻa e meʻa ʻoku koví. Koeʻuhi ʻoku ʻikai ha loto fakaetangata taʻehaohaoa ʻe ʻatā mei he tōlalo fakaeʻulungāngá, ʻoku fiemaʻu ke tau tali fakamātoato ʻa e faleʻí: “Mahulu hake ʻi he meʻa kotoa pē kuo pau ke maluʻí, maluʻi ho lotó.” (Palovepi 4:​23, NW) Ko ia ʻe anga-fēfē nai ʻetau maluʻi hotau lotó?

Sivi Tuʻumaʻu​—Ko ha Meʻa Pau Ia

3, 4. (a) Ko e hā ha ngaahi fehuʻi ʻoku lava ke ʻeke nai fekauʻaki mo e foʻi mafú tonu? (e) Ko e hā ʻe tokoni kiate kitautolu ke tau sivisiviʻi ai hotau lotó?

³ Kapau te ke ʻalu ki ha toketā ke fai hao sivi fakaesino, ngalingali te ne sivi ho mafú. ʻOku hanga ʻe ho tuʻunga fakaemoʻuileleí fakalūkufua, kau ai ho mafú, ʻo fakahaaʻi ʻokú ke maʻu ʻa e ngaahi meʻakai feʻunga? ʻOku fēfē ʻa e mālohi ho totó? ʻOku tuʻumaʻu mo mālohi ʻa e tā ho mafú? ʻOkú ke maʻu ha fakamālohi sino feʻunga? ʻOku moʻulaloa ho mafú ki ha loto-mafasia taʻetotonu?

⁴ Kapau ʻoku fiemaʻu ki he mafú tonu ha ngaahi sivi tuʻumaʻu, fēfē hake ai ho lotó? ʻOku sivisiviʻi ia ʻe Sihova. (1 Kalonikali 29:17) ʻOku totonu ke tau fai ʻa e meʻa tatau. Anga-fēfē? ʻAki hono ʻeke ʻa e ngaahi fehuʻi hangē ko ʻení: ʻOku maʻu ʻe hoku lotó ha meʻakai fakalaumālie feʻunga fakafou ʻi he ako fakafoʻituitui tuʻumaʻú mo e maʻu fakatahá? (Sāme 1:​1, 2; Hepelu 10:​24, 25) ʻOku tokanga lahi ʻa hoku lotó ki he pōpoaki ʻa Sihová ʻo hangē “ko e afi vela kuo loki ʻi hoku hui,” ʻo ueʻi au ke u kau ʻi he ngāue fakamalanga ʻo e Puleʻangá mo e ngāue ngaohi-ākongá? (Selemaia 20:9; Mātiu 28:​19, 20; Loma 1:​15, 16) ʻOku ueʻi au ke u ngāue mālohi, ʻo kau ʻi ha tafaʻaki ʻo e ngāue fakafaifekau taimi-kakató ʻi he taimi ʻoku malava aí? (Luke 13:24) Ko e hā ʻa e faʻahinga ʻātakai ʻoku ou fakaeʻa atu ki ai hoku lotó? ʻOku ou feinga ke feohi mo e faʻahinga kehe ko ia ko honau lotó ʻoku fāʻūtaha ʻi he lotu moʻoní? (Palovepi 13:20; 1 Kolinito 15:33) ʻOfa ke tau vave ʻi hono fakatokangaʻi ha tōnounou pē pea fai ha ngaahi laka ke fakatonutonu leva ia.

 5. Ko e hā ʻa e taumuʻa ʻaonga ʻoku malava ke fakahoko ʻe he ngaahi ʻahiʻahiʻi ʻo e tuí?

⁵ ʻOku tau faʻa hokosia ha ngaahi ʻahiʻahiʻi ʻo e tuí. ʻOku tokonaki mai ʻe he ngaahi meʻá ni kiate kitautolu ha ngaahi faingamālie ke tau ʻiloʻi ai ʻa e tuʻunga ʻo hotau lotó. Naʻe pehē ʻe Mōsese ki he kau ʻIsileli ko ia naʻa nau fangafanga hū ki he Fonua ʻo e Talaʻofá: “Kuo taki ai koe ʻe Sihova ko ho ʻOtua, he fangofuluʻi taʻu ni ʻi he Toafa, koeʻuhi ke ne fakavaivaiʻi koe, ka ne sivi koe, ke ha ʻa e meʻa ʻoku ʻi ho loto, pe te ke fie tauhi ʻene ngaahi tuʻutuʻuni pe ʻikai.” (Teutalonome 8:2) ʻIkai ʻoku tau faʻa ʻohovale ʻi he ngaahi ongoʻi, ngaahi holi, pe ngaahi tali ʻoku ʻalu hake ʻi he taimi ʻoku tau fehangahangai ai mo e ngaahi tuʻunga pe ngaahi fakatauele taʻeʻamanekiná? Ko e ngaahi ʻahiʻahi ʻoku fakaʻatā ʻe Sihova ke hokó ʻoku malava ke ne ʻai moʻoni kitautolu ke tau lāuʻilo ai ki heʻetau ngaahi halá, ʻo ʻomai ai kiate kitautolu ha faingamālie ke fai hano fakaleleiʻi. (Semisi 1:​2-4) ʻOfa ke ʻoua ʻaupito te tau tuku ʻa e fakakaukau faʻa lotu fekauʻaki mo ʻetau tali ki he ngaahi ʻahiʻahí!

Ko e Hā ʻOku Fakahaaʻi ʻe Heʻetau Ngaahi Leá?

 6. Ko e hā ʻoku malava ʻe he ngaahi tuʻunga-lea ʻoku tau saiʻia ke fetalanoaʻaki ki aí ʻo fakahaaʻi fekauʻaki mo hotau lotó?

⁶ ʻOku lava fēfē ke tau fakapapauʻi pe ko e hā kuo tau koloaʻaki ʻi hotau lotó? Naʻe pehē ʻe Sīsū: “Ko e tangata lelei ʻoku fisi kituʻa ai ʻa e lelei mei he koloa lelei kuo faʻo ki hono loto; pea ko e tangata kovi ʻoku fisi kituʻa ai ʻa e kovi mei he koloa kovi kuo faʻo ʻi hono loto: he ko e talanoa ʻa e ngutu ʻoku mei he meʻa ʻi he loto ʻoku hulu atu.” (Luke 6:45) Ko e meʻa ʻoku tau faʻa talanoa ʻo kau ki aí ko ha fakahāhā lelei mai ia ʻo e meʻa ʻoku fokotuʻu pau ʻi hotau lotó. ʻOku tau faʻa talanoa fekauʻaki mo e ngaahi meʻa fakamatelié mo e ngaahi lavameʻa fakamāmaní? Pe ʻoku faʻa fakatefito maʻu pē ʻetau ngaahi fetalanoaʻakí ʻi he ngaahi meʻa fakalaumālié mo e ngaahi taumuʻa fakateokalatí? ʻI he lelei ange ke ʻoua ʻe talanoa fekauʻaki mo e ngaahi fehālaaki ʻa e niʻihi kehé, ʻoku tau hehema anga-ʻofa ke ʻufiʻufiʻi kinautolu? (Palovepi 10:​11, 12) ʻOku tau hehema ke talanoa fuʻu lahi ʻo fekauʻaki mo e kakaí mo e ngaahi meʻa ʻoku hoko ʻi heʻenau moʻuí kae siʻisiʻi fekauʻaki mo e ngaahi meʻa fakalaumālié mo e ngaahi meʻa fakaeʻulungāngá? ʻOku malava ke hoko ʻeni ko ha fakaʻilonga ʻoku tau mahuʻingaʻia taʻetotonu ʻi he ngaahi meʻa fakafoʻituitui ʻa e kakai kehé?​—1 Pita 4:15.

 7. Ko e hā ʻa e lēsoni fekauʻaki mo hono maluʻi hotau lotó ʻoku lava ke tau ako mei he fakamatala ʻo kau ki he fanga taʻokete ʻe toko hongofulu ʻo Siosifá?

⁷ Fakakaukau atu ki he meʻa naʻe hoko ʻi ha fuʻu fāmili tokolahi ʻe taha. Ko e ngaahi foha lalahi ange ʻe toko hongofulu ʻo Sēkopé “naʻe ʻikai te nau faʻa lea ʻofa ange” ki honau tehina ko Siosifá. Ko e hā hono ʻuhingá? Naʻa nau meheka koeʻuhi ko ia ʻa e foha naʻe peleʻaki ʻe heʻenau tamaí. Ki mui aí, ʻi hono tāpuakiʻi ʻo Siosifa ʻaki ʻa e ngaahi misi mei he ʻOtuá, ʻo fakamoʻoniʻi ai naʻá ne maʻu ʻa e hōifua ʻa Sihová, naʻe “ʻasili ai ʻenau fehiʻa kiate ia.” (Senesi 37:​4, 5, 11) ʻI he anga-fakamamahí, naʻa nau fakatau atu honau tehiná ko ha pōpula. ʻI he hili iá, ʻi ha feinga ke fūfuuʻi ʻenau faihalá, naʻa nau kākaaʻi ʻenau tamaí ke fakakaukau ko Siosifá ne tāmateʻi ʻe ha manu fekai. Ko e toko hongofulu ʻo e fanga taʻokete ʻo Siosifá naʻe ʻikai te nau malava ke maluʻi honau lotó ʻi he taimi ko ʻení. Kapau ʻoku tau fakavave ke fakaangaʻi ʻa e niʻihi kehé, ʻe lava ke hoko ia ko ha fakamoʻoni ʻo e meheka pe fuaʻa ʻi hotau lotó? ʻOku fiemaʻu ke tau faʻa vakavakai ke sivisiviʻi ʻa e meʻa ʻoku haʻu mei hotau ngutú pea fakavave ke toʻo atu ʻa e ngaahi hehema taʻetotonú.

 8. Ko e hā ʻe tokoni kiate kitautolu ke tau sivisiviʻi hotau lotó kapau ʻoku tau tō ki hono tala ha loi?

⁸ Neongo “ʻoku ʻikai malava ke loi ʻa e ʻOtuá,” ʻoku hehema ʻa e faʻahinga taʻehaohaoa ia ʻo e tangatá ke loi. (Hepelu 6:​18, NW) “Ko e koto loi ʻa e kakai kotoa,” ko e tangilāulau ia ʻa e tokotaha-tohi-sāmé. (Sāme 116:11) Naʻa mo e ʻapositolo ko Pitá naʻá ne fakafisingaʻi loi ʻa Sīsū ʻo tuʻo tolu. (Mātiu 26:​69-75) ʻOku hā mahino, kuo pau ke tau tokanga ke fakaʻehiʻehi mei he loí, he ʻoku fehiʻa ʻa Sihova ʻi he “ʻelelo loi.” (Palovepi 6:​16-19) Kapau naʻa tau tō ki hono tala ha loi, ʻe lelei ke ʻanalaiso hono tupuʻangá. Naʻe hoko iá koeʻuhi ko e manavahē tangatá? Ko e manavahē ki he tauteá ʻa e ʻuhinga ki aí? Mahalo pē ko e maluʻi hoto ongoongó pe ko e mātuʻaki siokita naʻe tupu mei ai ʻa e palopalemá? Pe ko e hā pē ʻa e tuʻungá, he feʻungamālie ē ke tau fakakaukauloto atu ki he meʻá, anga-fakatōkilalo ʻo fakahā ʻetau tōnounoú, pea kole ʻa e fakamolemole ʻa Sihová, ʻo kumi ki heʻene tokoní ke ikuʻi ʻa e vaivaiʻangá! “Ko e kau tangata matuʻotuʻa ʻi he fakatahaʻangá” ʻa e faʻahinga lelei taha nai ki hono ʻomai ʻa e tokoni ko iá.​—Semisi 5:​14, NW.

 9. Ko e hā ʻoku malava ʻe heʻetau ngaahi lotú ʻo fakahaaʻi fekauʻaki mo hotau lotó?

⁹ ʻI he tali ki he kole ʻa e talavou ko Tuʻi Solomoné ki ha poto mo ha ʻiló, naʻe pehē ʻe Sihova: “Koeuhi nae i ho loto ae mea ni bea kuo ikai te ke kole ha koloa, be koe maʻu mea, be koe ogoogolahi, . . . Kuo foaki kiate koe ae boto moe iloilo; bea teu foaki kiate koe ae koloa moe maʻu mea, moe ogoogolahi.” (2 Kalonikali 1:​11, 12, PM) Mei he meʻa naʻe kole ki ai ʻa Solomoné pea mo e meʻa naʻe ʻikai ke kole ki aí, naʻe ʻilo ʻe Sihova ʻa e meʻa naʻe tukulotoʻi ʻe Solomoné. Ko e hā ʻoku hanga ʻe heʻetau ngaahi fetalanoaʻaki mo e ʻOtuá ʻo fakahaaʻi fekauʻaki mo hotau lotó? ʻOku fakahaaʻi ʻe heʻetau ngaahi lotú ʻetau fieinua ki he ʻiló, potó, mo e ʻiloʻiló? (Palovepi 2:​1-6; Mātiu 5:3) ʻOku ʻi hotau lotó ʻa e ngaahi meʻa ʻo e Puleʻangá? (Mātiu 6:​9, 10) Kapau kuo hoko ʻetau ngaahi lotú ʻo fakafounga mo fakafatongia pē, ʻoku malava ke hoko ʻeni ko ha fakahāhā ia ʻo e fiemaʻu ke vaheʻi ha taimi ke fakalaulauloto ai ki he ngaahi ngāue ʻa Sihová. (Sāme 103:2) ʻOku totonu ki he kau Kalisitiane kotoa pē ke nau tokanga ke ʻiloʻilo ki he meʻa ʻoku fakahaaʻi ʻe heʻenau ngaahi lotú.

Ko e Hā ʻOku Fakahā ʻe Heʻetau Ngaahi Ngāué?

10, 11. (a) Ko fē ʻoku kamata mei ai ʻa e tonó mo e feʻauakí? (e) Ko e hā te ne tokoniʻi kitautolu ke ʻoua ʻe ‘tono ʻi he lotó’?

¹⁰ Kuo taku ʻo pehē ʻoku lea pē ʻa ngāue. Ko hono moʻoní ʻoku lea leʻo-lahi ʻetau ngaahi ngāué ʻo fekauʻaki mo e meʻa ʻoku ʻi hotau lotó. Ko e fakatātaá, ʻi he ngaahi meʻa fekauʻaki mo e ʻulungaanga tāú, ko hono maluʻi hotau lotó ʻoku kau ki ai ʻa e meʻa lahi ange ia ʻi he fakaʻehiʻehi pē mei ha tōʻonga ʻo e feʻauakí pe tonó. ʻI heʻene Malanga ʻi he Moʻungá, naʻe pehē ʻe Sīsū: “ʻIlonga ʻa ia te ne fakasio ki ha fefine ke tafunaki ʻene holi ki ai, kuo ne tonoʻi ia ʻi hono loto.” (Mātiu 5:28) ʻE malava fēfē ke tau fakaʻehiʻehi mei hono fakahoko ʻa e tonó naʻa mo e ʻi hotau lotó?

¹¹ Naʻe fokotuʻu ʻe he pēteliake loto-tōnunga ko Siopé ha faʻifaʻitakiʻanga ki he kau tangata mo e kau fefine Kalisitiane ʻosi malí. ʻOku ʻikai ha veiveiua naʻe ʻi ai ʻa e ngaahi feangainga anga-maheni ʻa Siope mo e kau fefine kei iiki angé pea naʻe aʻu ʻo ne tokoni anga-ʻofa kiate kinautolu kapau naʻa nau fiemaʻu ha tokoni. Ka ko e fakakaukau ki hano maʻu ha mahuʻingaʻia fakaemanako ʻiate kinautolú naʻe ʻikai tali ia ʻe he tangata anga-tonu ko ʻení. Ko e hā hono ʻuhingá? Koeʻuhi naʻá ne fai ha fakapapau mālohi ke ʻoua naʻa sio fakamamaʻu ʻo holi ki he kakai fefiné. “Naaku fai ae fuakava mo hoku mata,” ko ʻene leá ia. “Bea ka kuo behe, koeha teu jiofia ai ha taahine?” (Siope 31:​1, PM) ʻOfa ke tau fai ha fuakava meimei tatau mo hotau matá pea maluʻi hotau lotó.

12. ʻE anga-fēfē hoʻo ngāueʻaki ʻa e Luke 16:10 ʻi he fekauʻaki mo hono maluʻi ho lotó?

¹² “Ko ia oku agatonu i he mea jii, oku agatonu foki ia i he mea lahi,” ko e lau ia ʻa e ʻAlo ʻo e ʻOtuá, “bea ko ia oku taeagatonu i he mea jii, oku taeagatonu ia i he mea lahi.” (Luke 16:​10, PM) ʻIo, ʻoku fiemaʻu ke tau sivisiviʻi hotau ʻulungāngá ʻi he fanga kiʻi meʻa ʻoku hā ngali maʻamaʻa ʻi he moʻui fakaʻahó, naʻa mo ia ʻoku hoko ʻi he tuʻunga fakapulipuli ʻo hotau ʻapí. (Sāme 101:2) ʻI he lolotonga ʻetau tangutu ʻi hotau falé, ʻo mamata televīsone, pe fakahoko ki he ʻInitanetí, ʻoku tau fakapapauʻi ke muimui ki he enginaki Fakatohitapu: “Ko e meʻa ki he feʻauaki mo e angaʻuli kotoa pe, ʻumaʻā ʻa e manumanu, naʻa mo e lau ki ai ke mou fakaʻehiʻehi mei ai, telia ʻa e tāu ʻo e feangai ʻa e kakai lotu; . . . kaeʻumaʻā ʻa e angamousaʻa, mo e lau fakasesele pe ko e fiengutuhua, ko e ngaahi meʻa ʻoku ʻikai ngali”? (Efeso 5:​1-4 [Efeso 5:​3, 4, PM]) Pea fēfē ʻa e fakamālohi ʻoku ala maʻu nai ʻi he televīsoné, pe ʻi he ngaahi keimi vitioó? “ʻOku sivisiviʻi ʻe Sihova tonu ʻa e tokotaha māʻoniʻoní pea pehē ki he tokotaha anga-fulikivanú,” ko e lau ia ʻa e tokotaha-tohi-sāmé, “pea ko ha taha pē ʻoku ʻofa ki he fakamālohí ʻoku fehiʻa moʻoni ki ai Hono soulú.”​—Sāme 11:​5, NW.

13. Ko e hā ʻa e fakatokanga ʻokú ne ʻomai ʻa e makatuʻunga lelei ʻi heʻetau fakakaukau atu ki he meʻa ʻoku haʻu ki tuʻa mei hotau lotó?

¹³ “Ko e fungani ʻi he meʻa kākā ka ko e loto, pea ʻoku hilio hono kovi,” ko e fakatokanga ia ʻa Selemaiá. (Selemaia 17:9) Ko e kākā ko ʻeni ʻa e lotó ʻoku hā tonu mai nai ia ʻi he taimi ʻoku tau kumi kalofanga ai ki heʻetau ngaahi halá, fakasiʻisiʻi ʻo e ngaahi tōnounoú, fakaʻuhingaʻi ʻoku lelei pē ʻa e ngaahi mele fakaeangaʻitangata mafatukitukí, pe fakalahiʻi ʻa e ngaahi lavameʻá. Ko ha loto ʻoku mole mei ai ʻa e ʻamanakí ʻoku toe malava ke ne maʻu ha tuʻunga tafaʻaki-ua​—ʻoku lea molemole ʻaki ʻe he loungutú ʻa e meʻa ʻe taha, kae fakahā ʻe he ngaahi ngāué ia ʻa e toe meʻa ʻe taha. (Sāme 12:2; Palovepi 23:7) He mātuʻaki mahuʻinga ē ke tau hoko ʻo faitotonu ʻi heʻetau sivisiviʻi ʻa e meʻa ʻoku haʻu ki tuʻa mei hotau lotó!

ʻOku Huʻufataha Hotau Matá?

14, 15. (a) Ko e hā ʻa e mata “huʻufataha”? (e) ʻOku anga-fēfē hono tokoniʻi kitautolu ʻe he tauhi ke huʻufataha ʻa e matá ke tau maluʻi ai hotau lotó?

¹⁴ “Ko e maamaʻanga ʻo e sino ko e mata,” ko e lea ia ʻa Sīsuú. Naʻá ne tānaki atu: “Ko ia kapau ʻoku huʻufataha ʻa e sio ʻa ho mata, ʻe māma pe ho sino kotoa.” (Mātiu 6:22) Ko e mata ʻoku huʻufatahá ʻoku fakahangataha ki ha foʻi kolo, pe taumuʻa pē taha, ʻo ʻikai ke leʻei pe afeʻi mei ai. Ko e moʻoni, ʻoku totonu ke fakahangataha hotau matá ʻi he ‘fuofua kumi ʻa e puleʻangá mo e māʻoniʻoni [ʻa e ʻOtuá].’ (Mātiu 6:​33, NW) Ko e hā ʻoku malava ke hoko ki hotau lotó kapau ʻoku ʻikai tauhi ke huʻufataha hotau matá?

¹⁵ Fakakaukau atu ki he meʻa fekauʻaki mo hono tokangaʻi ʻa e moʻuí. Ko e tokonaki ki he ngaahi fiemaʻu ʻa hotau fāmilí ko ha fiemaʻu faka-Kalisitiane ia. (1 Timote 5:8) Kae fēfē kapau ʻoku tohoaki kitautolu ia ʻe ha holi ke maʻu ʻa e ākenga fakamuimui tahá, ʻa e lelei tahá, pea mo e ngaahi meʻa manakoa taha ʻi he fekauʻaki mo e meʻakaí, valá, nofoʻangá, mo e ngaahi meʻa kehé? ʻIkai ʻe malava ʻe he meʻa ko iá ʻo fakapōpulaʻi moʻoni ʻa e lotó mo e ʻatamaí, ʻo ʻai kitautolu ke tau lotolotoua ʻi heʻetau lotú? (Sāme 119:113; Loma 16:18) Ko e hā ke tau hoko ai ʻo nōfoʻi ʻi he tokanga ki he ngaahi fiemaʻu fakaesino ʻa ē ʻoku takatakai ai pē ʻetau moʻuí ʻi he ngaahi meʻa fakafāmilí, fakapisinisí, mo e fakamatelié? Manatuʻi ʻa e faleʻi fakamānavaʻí: “Lamasi kimoutolu, naʻa ʻiloange ʻe mafatukituki homou loto, ko e meʻa ʻi he faʻa kai, mo e faʻa inu, mo e faʻa lotomoʻua ki he moʻui ni, pea lapasi kimoutolu ʻe he ʻaho ko ia ʻo hangē ko ha hele puna: he te ne hoko ki he kakai kotoa pe ʻi heʻenau nofo pe ʻi he funga ʻo māmani kotoa.”​—Luke 21:​34, 35.

16. Ko e hā ʻa e faleʻi naʻe ʻomai ʻe Sīsū ʻo fekauʻaki mo e matá, pea ko e hā hono ʻuhingá?

¹⁶ Ko e matá ko ha fetuʻutakiʻanga mahuʻinga ia ki he ʻatamaí mo e lotó. Ko e meʻa ʻoku fakahangataha ki aí ʻoku malava ke ne tākiekina mālohi ʻetau ngaahi fakakaukaú, ngaahi ongoʻí, mo e ngaahi ngāué. ʻI hono ngāueʻaki ha lea fakaefakatātaá, naʻe lave ai ʻa Sīsū ki he mālohi ʻo e fakatauele ʻa e matá ʻo ne pehē: “Ko ia, kapau ko ho mata toʻomataʻú ʻokú ne ʻai koe ke ke tūkiá, kapeʻi ia pea lī mamaʻo meiate koe. He ʻoku ʻaonga ange kiate koe ke mole hao kupu ʻe taha ʻi hono lī atu ho sinó kotoa ki Kīhená.” (Mātiu 5:​29, NW) Kuo pau ke taʻofi ʻa e matá mei he tokangataha ʻi he sio ki he ngaahi meʻa taʻetotonú. Ko e fakatātaá, kuo pau ke ʻoua naʻa fakaʻatā ia ke nōfoʻi ʻi he meʻa ʻoku faʻufaʻu ke ne langaʻi pe fakaʻaiʻai ʻa e ngaahi manako mo e ngaahi holi taʻetotonú.

17. ʻOku anga-fēfē hono tokoniʻi kitautolu ʻe he ngāueʻaki ʻo e Kolose 3:5 ke maluʻi hotau lotó?

¹⁷ Ko hono moʻoní, ko e mamatá ʻoku ʻikai ko ʻetau ongoʻanga pē ia ʻe taha ʻo e fetuʻutaki mo e māmani ʻi tuʻá. Ko e ngaahi ongoʻanga kehé hangē ko e alá mo e fanongó, ʻoku ʻi ai hona kaunga, pea ʻoku fiemaʻu ke tau fai ha tokanga tokamuʻa ki he ngaahi kupu fetuʻutaki kehe ʻo e sinó foki. Naʻe enginaki mai ʻa e ʻapositolo ko Paulá: “Ko ia mou ʻai ke mate leva homou ngaahi kupu ʻoku ʻi mamani, ko e feʻauaki, angaʻuli, havala, holi pango; kaeʻumaʻā ʻa e manumanu, ʻa ia ko e tauhi aitoli tofu pe ia.”​—Kolose 3:5.

18. Ko e hā ʻa e lahi ʻo e meʻa ʻoku totonu ke tau fai ʻo fekauʻaki mo e ngaahi fakakaukau taʻetotonú?

¹⁸ ʻOku malava ke tupu hake ha holi taʻetotonu ʻi he tuʻunga fakapulipuli ʻo hotau ʻatamaí. Ko e nōfoʻi ʻi he meʻa peheé ʻokú ne māʻunga fakalahi ʻa e holi fehālaakí, ʻo tākiekina ai ʻa e lotó. “Faifai pea tuʻituʻia ʻa e holi ko ia, ʻo ne fanauʻi ha angahala.” (Semisi 1:​14, 15) ʻOku fakahā ʻe he tokolahi ko e founga ʻeni ʻoku faʻa hoko ai ʻa e ngāuehalaʻaki ʻa e ʻōkani fakafanaú ʻiate kita peé. He meʻa mātuʻaki mahuʻinga ē ke tau hanganaki fakafonu hotau ʻatamaí ʻaki ʻa e ngaahi fakakaukau fakalaumālié! (Filipai 4:8) Pea kapau ʻoku haʻu ha fakakaukau taʻetotonu ki he ʻatamaí, ʻoku totonu ke tau feinga ke tukuange atu ia.

‘Tauhi ʻa Sihova Aki ha Loto Katoa’

19, 20. Te tau lavameʻa fēfē nai ʻi he tauhi ʻo Sihova ʻaki ha loto kakató?

¹⁹ ʻI heʻene taʻumotuʻá, naʻe tala ʻe Tēvita ki hono fohá: “E Solomone ko hoku foha, ke ke ilo ekoe ki he Otua o hoo tamai, bea ke tauhi kiate ia aki ho loto katoa, bea i he loto fie fai: he oku hakule e Jihova ae loto kotoabe, bea oku ne iloʻi ae filioi moe fakakaukau kotoabe.” (1 Kalonikali 28:​9, PM) Naʻe lotu ʻa Solomone tonu ki ha “loto talangofua.” (1 Tuʻi 3:​9, NW) Kae kehe, naʻá ne fehangahangai mo e pole ʻo hono tauhi maʻu ha loto pehē ʻi he kotoa ʻo ʻene moʻuí.

²⁰ Ke tau lavameʻa ʻi he tafaʻaki ko iá, ʻoku fiemaʻu ke ʻoua ʻe ngata pē ʻi hono maʻu ha loto ʻoku fehoanaki mo Sihová ka ke toe maluʻi foki ia. Ke lavaʻi ʻa e meʻá ni, kuo pau ke tau tauhi ʻa e ngaahi fakamanatu ʻo e Folofola ʻa e ʻOtuá ke ofi ʻi hotau lotó​—‘ʻi he lotoʻi lotó.’ (Palovepi 4:​20-22) ʻOku toe totonu foki ke tau tōʻongaʻaki hono sivisiviʻi hotau lotó, ʻo fakakaukauloto faʻa lotu ki he meʻa ʻoku fakahaaʻi ʻe heʻetau ngaahi leá mo e ngaahi ngāué. Ko e hā hano ʻaonga ʻo e fakakaukau peheé kapau ʻoku ʻikai te tau kumi tōtōivi ki he tokoni ʻa Sihová ke fakatonutonu ha faʻahinga vaivai pē ʻoku tau ʻiloʻi? Pea he meʻa mātuʻaki mahuʻinga ē ke hanganaki tokanga lelei ʻaupito ki he meʻa ʻoku tau faʻo ki hotau ngaahi ongoʻangá! ʻI heʻetau fai ʻa e meʻá ni, ʻoku tau maʻu ai ʻa e fakapapau “ko e nonga ʻa e ʻOtua, ʻa ia ʻoku mamaʻo ʻi he tatae ʻa e ʻatamai kotoa pe, te ne maluʻi [hotau] loto mo [ʻetau] ngaahi fakakaukau ʻia Kalaisi Sisu.” (Filipai 4:​6, 7) ʻIo, tau fakapapauʻi ke maluʻi hotau lotó ʻo lahi ange ia he meʻa kotoa pē kuo pau ke maluʻí pea ke tauhi ʻa Sihova ʻaki ha loto kakato.

ʻOkú Ke Manatuʻi?

• Ko e hā ʻoku mahuʻinga ai ke maluʻi ʻa e lotó?

• ʻOku anga-fēfē ʻa hono hanga ʻe he sivisiviʻi ʻo e meʻa ʻoku tau leaʻakí ʻo tokoniʻi kitautolu ke maluʻi hotau lotó?

• Ko e hā ʻoku totonu ai ke tau tauhi hotau matá ke “huʻufataha”?

[Fakatātā ʻi he peesi 23]

Ko e hā ʻoku tau māʻunga talanoa ʻo fekauʻaki mo ia ʻi he malaʻe ngāué, ʻi he ngaahi fakatahá, pea ʻi ʻapí?

[Fakatātā ʻi he peesi 25]

Ko e mata ko ia ʻoku huʻufatahá ʻoku ʻikai ke hoko ia ʻo leʻei