Ko Hai ʻa e ʻOtuá?

“KO E ʻOtuá ko e hingoa ia ʻoku ʻoange anga-maheni ki he matavai mo e mālohi taupotu ʻo e ʻunivēsí pea ko ia ʻoku fakahanga ki ai ʻa e līʻoa fakalotú,” ko e lau ia ʻa e The Encyclopedia Americana. ʻOku fakamatalaʻi ʻa e foʻi lea ko e “ʻOtua” ʻo pehē “ko e sinoʻi moʻoni māʻolunga pe taupotú” ia. Ko e hā ʻa e natula ʻo ha sinoʻi moʻoni fakaofo pehē?

Ko ha mālohi taʻefakaetangata ʻa e ʻOtuá pe ko ha tokotaha moʻoni? ʻOku ʻi ai hano hingoa? Ko ha ʻotua ia ʻoku ʻi ai ʻa e toko tolu, ʻo hangē ko e tui ʻa e tokolahi? ʻE lava fēfē ke tau hoko ʻo ʻiloʻi ʻa e ʻOtuá? ʻOku ʻomai ʻe he Tohitapú ʻa e tali totonu mo fakafiemālie ki he ngaahi fehuʻí ni. Ko hono moʻoní, ʻokú ne fakaʻaiʻai kitautolu ke kumi ki he ʻOtuá, ʻi he pehē: “Talāʻehai ʻokú ne mamaʻo mei hatau toko taha.”​—Ngāue 17:27.

Ko ha Mālohi Taʻefakaetangata pe ko ha Tokotaha Moʻoni?

Ko e tokolahi ʻoku tui ki he ʻOtuá ʻoku nau fakakaukau kiate ia ko ha mālohi, ʻikai ko ha tokotaha. Ko e fakatātaá, ʻi he ngaahi sivilaise ʻe niʻihi, kuo fakakalasi fakataha ai ʻa e ngaahi ʻotuá mo e ngaahi mālohi ʻo natulá. Ko ha niʻihi naʻa nau sivi ʻa e fakamoʻoni kuo fakatahatahaʻi fakafou ʻi he fakatotolo fakasaienisi ki he faʻunga ʻo e ʻunivēsí mo e natula ʻo e moʻuí ʻi he māmaní kuo nau fakaʻosiʻaki kuo pau pē ke ʻi ai ha Muʻaki Tupuʻanga. Neongo ia, ʻoku nau toumoua ke taku ha angaʻitangata ki he Tupuʻanga ko ení.

Neongo ia, ʻikai ʻoku fakahaaʻi ʻe he fihituʻu ʻo e fakatupú kuo pau pē naʻe maʻu ʻe he Muʻaki Tupuʻangá ʻa e poto lahi? Ko e potó ʻoku fiemaʻu ki ai ʻa e ʻatamai. Ko e ʻatamai tefito ʻoku tupu mei ai ʻa e meʻa fakatupu kotoa pē ʻoku ʻa e tokotaha ia ko e ʻOtuá. ʻIo, ʻoku ʻi ai ha sino ʻo e ʻOtuá, ʻo ʻikai ko ha sino fakakakano ʻo hangē ko kitautolú, ka ko ha sino fakalaumālie. “Kapau ʻoku ai ha sino fakakakano,” ko e lau ia ʻa e Tohitapú, “ta ʻoku ʻi ai mo ha sino fakalaumalie.” (1 Kolinito 15:44) ʻI hono fakamatalaʻi ʻa e natula ʻo e ʻOtuá, ʻoku fakahā mahino mai ʻe he Tohitapú: “Ko e ʻOtua ko e laumālie.” (Sione 4:24) Ko e laumālié ʻokú ne maʻu ha faʻahinga moʻui ʻoku faikehekehe lahi ia mei haʻatautolú, pea ʻoku taʻehāmai ia ki he mata fakaetangatá. (Sione 1:18) ʻOku ʻi ai foki mo e ngaahi meʻamoʻui laumālie taʻehāmai. Ko e kau ʻāngelo kinautolu​—‘ko e ngaahi foha ʻo e ʻOtua moʻoní.’​—Siope 1:6; 2:1.

Koeʻuhi ko e ʻOtuá ko ha tokotaha taʻefakatupu ia fakataha mo ha sino fakalaumālie, ʻoku ʻi ai moʻoni leva hono feituʻu nofoʻanga. ʻI he lave ki he nofoʻanga laumālié, ʻoku tala mai ai ʻe he Tohitapú kia kitautolu ko e ngaahi langí ʻa e “ʻafioʻanga” ʻo e ʻOtuá. (1 Tuʻi 8:43) Pea ʻoku pehē ʻe he tokotaha-tohi Tohitapu ko Paulá: ‘Kuo hu ʻa Kalaisi ki he langí tonu ke fakaha ni ia ki he fofonga ʻo e ʻOtuá maʻatautolu.’​—Hepelu 9:24.

Ko e foʻi lea ko e “laumālie” ʻoku toe ngāueʻaki ia ʻi he Tohitapú ʻi ha ʻuhinga kehe. ʻI he hanga ki he ʻOtuá ʻi he lotú, naʻe pehē ai ʻe he tokotaha-tohi-sāmé: “ʻOkú ke fekau atu ho Laumalie​—ʻoku nau tupu ai.” (Sāme 104:30) Ko e laumālie ko ení ʻoku ʻikai ko e ʻOtuá tonu ia ka ko ha ivi ʻoku ʻohifo ʻe he ʻOtuá, pe ngāueʻaki ke fakahoko ai ha meʻa pē ʻokú ne loto ki ai. Fakafou ʻi he meʻá ni, naʻe fakatupu ai ʻe he ʻOtuá ʻa e ngaahi langi fakamatelié, ko e foʻi māmaní pea mo e ngaahi meʻamoʻui kotoa pē. (Senesi 1:2; Sāme 33:6) Ko hono laumālié ʻoku ui ko e laumālie māʻoniʻoni. Naʻe ngāueʻaki ʻe he ʻOtuá ʻa hono laumālie māʻoniʻoní ke tatakiʻaki ʻa e kau tangata naʻa nau hiki ʻa e Tohitapú. (2 Pita 1:​20, 21) Ko ia ai, ko e laumālie māʻoniʻoní ko e ivi ngāue taʻehāmai ia ʻoku ngāueʻaki ʻe he ʻOtuá ke fakahokoʻaki ʻa ʻene ngaahi taumuʻá.

ʻOku ʻI Ai ha Huafa Laulōtaha ʻo e ʻOtuá

Naʻe ʻeke ʻe he tokotaha tohi Tohitapu ko ʻAuká: “Ko hai kuo kuku ʻa e matangi ʻi hono ongo nima? Ko hai kuo lokuloku ʻa e vai ʻi ha kofu? Ko hai kuo hunuki ʻa e ngaahi ngataʻanga ʻo mamani? Ko hai hono huafa, pea ko hai ʻa e huafa ʻo hono ʻAlo?” (Palovepi 30:4) Ko hono moʻoní, naʻe ʻeke ʻe ʻAuká, ‘ʻOkú ke ʻiloʻi ʻa e hingoa pe laine fakafāmili ʻo ha tangata pē kuó ne fai ʻa e ngaahi meʻá ni?’ Ko e ʻOtuá pē ʻokú ne maʻu ʻa e mālohi ke puleʻi ʻa e ngaahi ivi ʻo natulá. Lolotonga ko e fakatupú ʻokú ne ʻomai ʻa e fakamoʻoni mālohi ʻoku ʻi ai ʻa e ʻOtuá, ʻoku ʻikai te ne fakahā ʻa e huafa ʻo e ʻOtuá. Ko hono moʻoní, ʻe ʻikai ʻaupito lava ke tau ʻiloʻi ʻa e huafa ʻo e ʻOtuá kae ʻoua kuo fakahā tonu mai ia ʻe he ʻOtuá kia kitautolu. Pea kuó ne fai ia. “Ko Sihova au,” ko e lau ia ʻa e Tokotaha-Fakatupú, “ko hoku hingoa ia.”​—Aisea 42:8.

Ko e huafa laulōtaha ʻo e ʻOtuá, ʻa e Sihová, ʻoku hā meimei tuʻo 7,000 ia ʻi he Ngaahi Konga Tohitapu Faka-Hepeluú ʻataʻatā pē. Naʻe fakaʻilo ʻe Sīsū Kalaisi ʻa e huafa ko iá ki he niʻihi kehé pea fakahīkihikiʻi ia ʻi honau lotolotongá. (Sione 17:​6, 26) Ko e huafa ko iá ʻoku maʻu ia ʻi he tohi fakamuimui taha ʻo e Tohitapú ko ha konga ʻo e kupuʻi lea “Haleluia,” ʻoku ʻuhingá ke “fakahīkihikiʻi ʻa Iaa.” Pea ko e “Iaa” ko e faʻunga fakanounou ia ʻo e “Sihova.” (Fakahā 19:​1-6) Neongo ia, ʻoku tātātaha ke ngāueʻaki ʻe he ngaahi Tohitapu lahi ʻi onopooni ʻa e huafa ko iá. ʻOku nau faʻa ngāueʻaki ʻa e foʻi lea ko e “ʻEIKI” pe “ʻOTUA,” ʻo hiki fakamataʻitohi lalahi kotoa ke fakafaikehekeheʻi ia mei he ongo hingoa fakalakanga anga-maheni ko e “ʻEiki” mo e “ʻOtua.” ʻOku fokotuʻu mai ʻe he kau mataotao ʻe niʻihi ko e huafa fakaʻotuá naʻe puʻaki nai ia ko e Yahweh.

Ko e hā ʻoku kehekehe pehē ai ʻa e vakai ki he huafa ʻo e Tokotaha māʻolunga taha ʻi he ʻunivēsí? Naʻe kamata ʻa e palopalemá ʻi ha laui senituli ki muʻa, ʻi hono tuku ʻe he kau Siú ʻi ha tui taʻeʻuhinga ʻa hono puʻaki ʻo e huafa fakaʻotuá pea kamata ke fetongiʻaki ia ʻa e foʻi lea faka-Hepelū ki he “ʻEiki Haú” ʻi he taimi pē naʻa nau aʻu mai ai ki he huafa fakaʻotuá ʻi heʻenau lau ʻa e ngaahi Konga Tohitapú. Koeʻuhi ko e Tohitapu faka-Hepeluú naʻe hiki ia ʻo ʻikai ha ngaahi vauele, ʻoku taʻemalava ke ʻiloʻi totonu ʻa e founga naʻe puʻaki ai ʻe Mōsese, Tēvita, pea mo e niʻihi ʻo e kuonga muʻá ʻa e ngaahi foʻi mataʻitohi ʻoku faʻuʻaki ʻa e huafa fakaʻotuá. Kae kehe, ko e puʻaki faka-Tonga ko e Sihová, kuo ngāueʻaki ia ʻi he laui taʻu lahi, pea ko hono tataú ʻi he ngaahi lea lahi ʻoku talilahia ia ʻi he ʻahó ni.​—Ekisoto 6:3; Aisea 26:4.

Neongo ʻoku ʻi ai ʻa e veiveiua ʻo kau ki he founga ʻo hono puʻaki ʻo e huafa ʻo e ʻOtuá ʻi he lea faka-Hepelū motuʻá, ko hono ʻuhingá ʻoku ʻikai ko ha misiteli fakaʻaufuli ia. Ko hono huafá ʻoku ʻuhingá, “ʻOkú Ne Fakatupunga ke Hoko.” ʻOku fakahaaʻi ai ʻe Sihova ko e ʻOtuá ʻa ia tonu ko e Tokotaha Fakahoko-Taumuʻa Lahi. ʻOkú ne ʻai maʻu pē ʻa ʻene ngaahi taumuʻá mo ʻene ngaahi talaʻofá ke hoko ʻo moʻoni. Ko e ʻOtua moʻoní pē, ʻa ia ʻokú ne maʻu ʻa e mālohi ke fakahoko ení, ʻoku malava totonu ke ne maʻu ʻa e huafa ko iá.​—Aisea 55:11.

ʻI he taʻetoefehuʻia, ko e huafa Sihová ʻoku ngāue ia ke fakafaikehekeheʻi ʻa e ʻOtua Māfimafi-Aoniú mei he ngaahi ʻotua kehe kotoa pē. Ko e ʻuhinga ia ʻoku toutou ʻasi ai ʻa e huafa ko iá ʻi he Tohitapú. Lolotonga ʻoku ʻikai ke ngāueʻaki ʻe he ngaahi liliu lahi ʻa e huafa fakaʻotuá, ʻoku fakahā mahino ʻe he Sāme 83:18 (PM): “Ko koe, ko ho huafa oou ko Jihova, koe Fugani Maoluga i mamani kotoabe.” Lolotonga ʻa ʻene ngāue fakafaifekaú, naʻe akoʻi ai ʻe Sīsū Kalaisi ʻa hono kau muimuí: “Ko ia ke pehe ni haʻamoutolu lotu: Ko ʻemau Tamai ʻoku ʻi Hevani, ke tapuhā ho Huafa.” (Mātiu 6:9) ʻOku totonu leva ke tau ngāueʻaki ʻa e huafa ʻo e ʻOtuá ʻi heʻetau lotú, lea ʻo kau kiate iá pea ʻi hono fakahīkihikiʻi ia ʻi he ʻao ʻo e niʻihi kehé.

Ko e ʻOtuá ʻa Sīsū?

Ko Sihova tonu ko e ʻOtuá ʻokú ne fakahaaʻi māʻalaʻala ʻa e tuʻunga moʻoni ʻo hono ʻAló. ʻOku fakahā ʻe he fakamatala Kōsipeli ʻa Mātiú, ʻi he hili ʻa hono papitaiso ʻo Sīsuú, “naʻe ai ha leʻo mei he langi naʻe pehe mai, Ko Hoku ʻAlo Pele ʻena, ʻa ia kuó u hōifua ai.” (Mātiu 3:​16, 17) Ko Sīsū Kalaisí ko e ʻAlo ia ʻo e ʻOtuá.

Neongo ia, ʻoku pehē ʻe he kakai lotu ʻe niʻihi ko e ʻOtuá ʻa Sīsū. ʻOku pehē ʻe he niʻihi kehe ia ko e ʻOtuá ko ha Tolu-Tahaʻi-ʻOtua. Fakatatau ki he akonaki ko ení, “ʻoku ʻOtua ʻa e Tamaí, ʻOtua ʻa e ʻAló pea ʻOtua mo e Laumālie Māʻoniʻoní, pea neongo ia ʻoku ʻikai ke toko tolu ʻa e ʻOtuá ka ko e ʻOtua pē ʻe taha.” ʻOku pehē ko e toko tolú ni “ʻoku nau ʻi ai taʻengata mo tatau tofu pē.” (The Catholic Encyclopedia) ʻOku tonu ʻa e ngaahi fakakaukau ko ení?

Fekauʻaki mo Sihová, ʻoku pehē ʻe he ngaahi Konga Tohitapu fakamānavaʻí: “Talu mei muʻa ʻo lauikuonga ko e ʻOtua pe ʻa e ʻAfiona.” (Sāme 90:2) Ko ia ʻa e “Tuʻi Itaniti”​—ʻo ʻikai hano kamataʻanga pe ngataʻanga. (1 Timote 1:17) ʻI he tafaʻaki ʻe tahá, ko Sīsuú, “ko e ʻUluaki ia naʻe fakatupu . . . ʻi he meʻa kotoa pe kuo ngaohi,” “ko e Kamataʻanga ʻo e Fakatupu ʻe he ʻOtua.” (Kolose 1:​13-15; Fakahā 3:14) ʻI he lave ki he ʻOtuá ko ʻene Tamaí, naʻe pehē ʻe Sīsū: “ʻOku lahi ʻa e Tamai ʻiate au.” (Sione 14:28) Naʻe toe fakamatala ʻe Sīsū ʻoku ʻi ai ʻa e ngaahi meʻa ʻoku ʻikai te ne ʻiloʻi pe ko e kau ʻāngeló ka ko e ʻOtuá pē ʻokú ne ʻafioʻí. (Maake 13:32) ʻIkai ngata aí, naʻe lotu ʻa Sīsū ki heʻene Tamaí, ʻo ne pehē: “Ke ʻoua naʻa fai hoku loto ka ko hoʻou pē.” (Luke 22:42) Ko hai naʻá ne lotu ki aí ʻo kapau naʻe ʻikai ki ha Tokotaha naʻe māʻolunga hake ʻiate ia? Pea ko e ʻOtuá naʻá ne fokotuʻu ʻa Sīsū mei he maté, ʻo ʻikai ko Sīsū tonu pē.​—Ngāue 2:32.

ʻI he ngaahi Konga Tohitapú leva, ko Sihova ʻa e ʻOtua Māfimafi-Aoniú, pea ko Sīsū ko hono ʻAló ia. Ko e toko uá ni naʻe ʻikai te na tatau ki muʻa pea haʻu ʻa Sīsū ki he māmaní pe ʻi he lolotonga ʻa ʻene moʻui fakaemāmaní; pea naʻe ʻikai hoko ʻa Sīsū ʻo tatau mo ʻene Tamaí ʻi he hili ʻa hono fokotuʻu hake ia ki hēvaní. (1 Kolinito 11:3; 15:28) Hangē ko ia kuo tau vakai ki aí, ko e tokotaha hono tolu ʻoku taku ʻo e Tolu-Tahaʻi-ʻOtuá, ʻa e laumālie māʻoniʻoní, ʻoku ʻikai ko ha tokotaha ia. ʻI hono kehé, ko e ivi ia ʻoku ngāueʻaki ʻe he ʻOtuá ke fakahokoʻaki ha meʻa pē ʻokú ne loto ki ai. Ko ia, ko e Tolu-Tahaʻi-ʻOtuá ʻoku ʻikai ko ha akonaki Fakatohitapu.a “Ko Sihova ko hotau ʻOtua ko e tahaʻi Sihova ia,” ko e lau ia ʻa e Tohitapú.​—Teutalonome 6:4.

Hoko ʻo ʻIloʻi Lelei Ange ʻa e ʻOtuá

Koeʻuhi ke ʻofa ki he ʻOtuá mo fai kiate ia ʻa e līʻoa maʻataʻatā ʻoku taau mo iá, ʻoku fiemaʻu ke tau ʻilo ʻa hono tuʻunga moʻoní. ʻE lava-fēfē ke tau hoko ʻo ʻiloʻi lelei ange ʻa e ʻOtuá? “Naʻa mo e ngaahi meʻa oʻona ʻoku taʻehāmai, ka talu e ngaohi ʻo mamani mo e ha ia,” ko e lau ia ʻa e Tohitapú, “ʻi hono ʻutangiʻi mei he ngaahi meʻa kuó ne ngaohi, ʻio, ʻa hono māfimafi mo hono ʻotua.” (Loma 1:20) Ko e founga ʻe taha ke hoko ʻo ʻiloʻi lelei ai ʻa e ʻOtuá ko hono siofi mo fakalaulauloto ʻi he loto-houngaʻia ki he meʻa kuó ne fakatupú.

Kae kehe, ʻoku ʻikai tala mai ʻe he fakatupú kia kitautolu ʻa e meʻa kotoa ʻoku tau fiemaʻu ke ʻiloʻi ai ʻa e ʻOtuá. Hangē ko ení, ke mahinoʻi ko ha Tokotaha laumālie moʻoni ia fakataha mo ha huafa laulōtaha, ʻoku fiemaʻu ke tau vakaiʻi ʻa e Tohitapú. Ko hono moʻoní, ko hono ako ʻa e Tohitapú, ʻa e founga lelei taha ke hoko ai ʻo ʻiloʻi lelei ange ʻa e ʻOtuá. ʻI he ngaahi Konga Tohitapú, ʻoku tala mai ai ʻe Sihova ʻa e meʻa lahi ange fekauʻaki mo e faʻahinga ʻOtua ko iá. ʻOkú ne toe fakahaaʻi mai kia kitautolu ʻa ʻene ngaahi taumuʻá pea akoʻi kitautolu ʻi heʻene ngaahi foungá. (Emosi 3:7; 2 Timote 3:​16, 17) He fiefia ē ka ko kitautolu ʻi hono fiemaʻu ʻe he ʻOtuá ke tau “aʻusia ʻa e ʻilo kanokano ki he moʻoni” koeʻuhi ke malava ai ke tau maʻu ʻaonga mei heʻene ngaahi tokonaki anga-ʻofá! (1 Timote 2:4) Ko ia, tau fai ʻa e feinga kotoa pē ke ako ʻa e meʻa kotoa te tau malava ʻo kau kia Sihová.

[Fakamatala ʻi lalo]

[Fakatātā ʻi he peesi 5]

Naʻe ngāueʻaki ʻe he ʻOtuá ʻa hono laumālie māʻoniʻoní ke fakatupu ʻa e māmaní pea ke tatakiʻaki ha kau tangata ke hiki ʻa e Tohitapú

[Fakatātā ʻi he peesi 5]

Naʻe pehē ʻe ha leʻo mei hēvani: ‘Ko Hoku ʻAló ʻena’

[Fakatātā ʻi he peesi 7]

Naʻe lotu ʻa Sīsū ki he ʻOtuá​—ʻa e Tokotaha ʻoku māʻolunga hake ʻiate iá

[Fakatātā ʻi he peesi 7]

Naʻe fakaʻilo ʻe Sīsū ʻa e huafa ʻo e ʻOtuá ki he niʻihi kehé

[Fakatātā ʻi he peesi 7]

ʻE malava ke tau hoko ʻo ʻiloʻi lelei ange ʻa e ʻOtuá