Ko e Hā Kuo Hoko ki he Afi ʻo Helí?

KO E HĀ ʻa e ʻīmisi ʻoku ʻomai ʻe he foʻi lea “helí” ki hoʻo fakakaukaú? ʻOkú ke sioloto atu ki helí ko ha feituʻu moʻoni ia ʻo e afi mo e sūlifa, ʻo e fakamamahi mo e mamahi taʻengata? Pe ko helí ko hano fakamatalaʻi fakaefakatātā nai ia ʻo ha tuʻunga, ʻo ha anga?

ʻI he laui senituli, kuo sioloto atu ai ʻa e kau taki lotu ʻo e Puleʻanga-Haʻa-Kalisitiané ki ha heli ʻoku vela ʻo e ngaahi fakamamahi lahi fakaʻulia, ko e tufakanga pau ia ki he kau angahalá. ʻOku kei manakoa ʻa e fakakaukau ko ení ʻi he haʻohaʻonga ʻo e ngaahi kulupu lotu lahi kehe. “Kuo ʻai nai ʻe he lotu faka-Kalisitiané ʻa e helí ko ha foʻi lea ʻiloa,” ko e lau ia ʻa e U.S.News & World Report, “ka ʻoku ʻikai te ne puleʻi fakaʻaufuli ʻa e tokāteliné. Ko e fakamanamana ʻo e totongi fakamamahi ʻi he moʻui-ka-hokó ʻoku ʻi ai hono tatau ʻi he meimei lotu tefito kotoa pē ʻi he māmaní pea ʻi he fanga kiʻi lotu īkí foki.” Ko e kau lotu Hinituú, lotu Putá, Mosilemí, lotu Sāiní, mo e kau lotu faka-Taó ʻoku nau tui ki ha faʻahinga faʻunga ʻo heli.

Neongo ia, kuo toe maʻu ʻe he helí ha ʻīmisi ʻe taha ʻi he fakakaukau fakaeonopōní. “Lolotonga ko e ʻīmisi tukufakaholo ʻo e afí ʻoku kei ʻi ai ʻa e kau tui ki ai,” ko e fakamatala ia ʻa e makasini naʻe lave ki ai ki muʻá, “ko e ngaahi vakai fakaeonopooni ki he tautea taʻengatá ko ha tuku pilīsone tokotaha ʻi he tuʻunga ʻikai leleí ʻoku kamata ke eʻa ia, ʻo pehē ai tā ko e helí ʻoku ʻikai ko ha afi ia.”

Ko e pepa Sēsuti La Civiltà Cattolica naʻe pehē ai: “ʻOku fakatupu takihalaʻi . . . ke fakakaukau atu ki he ʻOtuá, fakafou ʻi he kau tēmeniō, ʻokú ne hilifaki ha ngaahi fakamamahi fakamanavahē ki he faʻahinga kuo fakahalaiaʻí ʻo hangē ko ia ʻi he afí.” Naʻe tānaki mai ai: “ʻOku ʻi ai ʻa e heli, ʻo ʻikai ko ha feituʻu ka ko ha tuʻunga, ko ha tuʻunga ʻo e hoko ko e tokotaha ʻa ia ʻoku tofanga ʻi he mamahi ʻi hono fakamavaheʻi mei he ʻOtuá.” Naʻe pehē ʻe Tuʻitapu Sōane Paulo II ʻi he 1999: “ʻI he ʻikai ko ha feituʻú, ʻoku fakahaaʻi ʻe he helí ʻa e tuʻunga ʻo e faʻahinga ʻoku nau loto-lelei pea mo fakamavaheʻi kakato kinautolu mei he ʻOtuá, ko e matavai ʻo e moʻui mo e fiefia kotoa pē.” Ki he ngaahi ʻīmisi leva ʻo heli ko ha feituʻu velá, naʻá ne pehē: “ʻOku nau fakahaaʻi ʻa e laufānō mo e taʻeʻaonga fakaʻaufuli ʻa e moʻui taʻekau ai ʻa e ʻOtuá.” Kapau naʻe fakamatalaʻi ʻe he tuʻitapú ʻa e helí ko e “afi ulo mo ha tēvolo teunga kula mo ha fuʻu huo-langa,” naʻe pehē ʻe he faihisitōlia fakasiasi ko Martin Marty, “ʻe ʻikai ke tui ki ai ʻa e kakaí.”

ʻOku hoko ʻa e ngaahi liliu meimei tatau ʻi he ngaahi kautaha lotu kehé. Ko ha līpooti ʻa e komisoni tokāteline ʻo e Siasi ʻIngilaní naʻe pehē ai: “Ko e helí ʻoku ʻikai ko ha fakamamahi taʻengata, ka ko e fili fakaʻosi mo taʻealaliliu ia ha ʻalunga moʻui ʻa ia ʻoku fakafepaki mātuʻaki kakato mo mātuʻaki fakaʻaufuli ki he ʻOtuá ʻa ia ko hono ikuʻangá pē ko e fakaʻauhamālie.”

Ko e fehuʻi mo e tali ʻa e Siasi ʻEpikopō ʻi he ʻIunaite Seteté ʻoku fakamatalaʻi ai ʻa e helí ko e “mate taʻengata tupu mei heʻetau siʻaki ʻa e ʻOtuá.” ʻOku pehē ʻe he U.S.News & World Report, ko e tokolahi fakautuutu ʻo e kakaí ʻoku nau poupouʻi ʻa e foʻi fakakaukau ko ia “ko e ngataʻanga ʻo e fulikivanú ko e ʻauha, ʻo ʻikai ko e mamahi taʻengata. . . . ʻOku [nau] taukaveʻi ko e faʻahinga ʻoku nau siʻaki ʻa e ʻOtuá ʻi he ngataʻangá ʻe fakaʻauha kinautolu ʻi he ‘afi fakaʻauha’ ʻo helí.”

Neongo ko e hehema ʻi onopōní ke mavahe mei he fakakaukau ki he afí mo e sūlifá, ʻoku hokohoko atu ʻa e tokolahi ʻi he pipiki ki he tui ko helí ko ha potu moʻoni ʻo e fakamamahi. “ʻOku lave mahino ʻa e konga Tohitapú fekauʻaki mo heli ko ha feituʻu fakamatelie ia ʻo e fakamamahiʻi ʻi he afi,” ko e lau ia ʻa Albert Mohler ʻo e Seminālio Teolosia ʻo e Siasi Papitaiso Fakatongá ʻi Louisville, Kentucky, U.S.A. Pea ko e līpooti The Nature of Hell, naʻe teuteu ʻe he Komisoni Fepikitaki Faka-ʻEvangelioó, ʻoku pehē ai: “Ko e helí ko ha hokosia ia ʻa e ʻiloʻi ʻo e siʻaki mo e fakamamahi.” ʻOku toe tānaki mai ai: “ʻOku ʻi ai ʻa e ngaahi tuʻunga ʻo e tautea mo e mamahi ʻi heli ʻo felāveʻi ia mo e mafatukituki ʻo e ngaahi angahala naʻe fai ʻi māmaní.”

Ke toe ʻeke, ko helí ko ha feituʻu vela ia ʻo e fakamamahi taʻengata pe ko e fakaʻauhamālie? Pe ko ha tuʻunga pē ia ʻo e mavahe mei he ʻOtuá? Ko e hā moʻoni ʻa heli?

[Puha/Fakatātā ʻi he peesi 4]

Ko ha Hisitōlia Nounou ʻo e Afi ʻo Helí

NAʻE ohi ʻanefē ʻe he faʻahinga ʻoku taku ko e kau Kalisitiané ʻa e tui ki he afi ʻo helí? ʻI ha taimi fuoloa hili ʻa e taimi ʻo Sīsū Kalaisi mo ʻene kau ʻapositoló. “Ko e Apocalypse of Peter (senituli hono 2 T.S.) ʻa e ʻuluaki tohi [fakaʻapokalifa] faka-Kalisitiane ke ne fakamatalaʻi ʻa e tautea mo e ngaahi fakamamahiʻi ʻo e kau angahalá ʻi helí,” ko e lau ia ʻa e Encyclopædia Universalis Falaniseé.

Kae kehe, ʻi he haʻohaʻonga ʻo e muʻaki ngaahi Tamai ʻa e Siasí, naʻe ʻi ai ha taʻefelotoi ai ʻi he helí. Ko Sasitini Maʻata, Kelemeni ʻo ʻAlekisanituliá, Tetuliane, mo Sipiliane naʻa nau tui ko helí ko ha feituʻu vela ia. Ko ʻOliseni mo e teolosia ko Kelekōlio ʻo Nisá naʻá na fakakaukau ki heli ko ha feituʻu ia ʻo e mavahe mei he ʻOtuá​​—ʻo e mamahi fakalaumālie. ʻI he tafaʻaki ʻe tahá, ko ʻAokositaine ʻo Hipó, naʻá ne tui ko e mamahi ʻi helí naʻe fakatou fakalaumālie ia mo fakaeongo​​—ko ha fakakaukau ia naʻe tali. “ʻI he aʻu mai ki he senituli hono nimá ko e tokāteline fefeka ko ia ʻo e pehē ʻe ʻikai ha toe faingamālie hono ua ʻo e kau angahalá hili ʻa e moʻui ko ení pea ko e afi te ne keina kinautolú ʻe ʻikai ʻaupito tāmateʻí naʻe tuʻu-ki-muʻa ia ʻi he feituʻu kotoa pē,” ko e tohi ia ʻa Palōfesa J.N.D. Kelly.

ʻI he senituli hono 16, ko e ongo fakalelei-lotu Palotisani hangē ko Mātini Lūtelo mo Sione Kalaviní naʻá na mahinoʻi ai ko e fakamamahi ʻi ha afi ʻo helí ko e tuʻu fakaefakatātā ia ki he nofo mavahe mei he ʻOtuá ʻo taʻengata. Kae kehe, ko e fakakaukau ki heli ko ha feituʻu fakamamahí naʻe toe foki mai ia ʻi he senituli ʻe ua hoko mai aí. Ko ha tokotaha malanga Palotisani ko Sionatane ʻEtuate naʻá ne faʻa ʻoatu ʻa e manavahē ki he loto ʻo e kau ʻAmelika faka-Kolonia ʻi he senituli hono 18 ʻaki ʻa e ngaahi fakatātā maeʻeeʻa ʻo e helí.

Neongo ia, ʻi he taimi nounou hili iá, naʻe kamata ke hōloa hifo ai ʻa e tui ki he helí. “Ko e senituli hono 20 naʻe meimei mate ai ʻa e helí,” ko e fakamatala ia ʻa e U.S.News & World Report.

[Fakatātā]

Naʻe tui ʻa Sasitini Maʻata ko helí ko ha feituʻu vela ia

Ko ʻAokositaine ʻo Hipó naʻá ne akoʻi ko e mamahi ʻi helí naʻe fakalaumālie mo fakaesino