Faʻifaʻitaki ki he Faiako Lahí

“Ko ia ke mou ō, ʻo ngaohi ʻa e ngāhi kakai kotoa pe ko ʻeku kau ako . . . , mo e akoʻi kinautolu ke tauhi ʻa e ngāhi meʻa kotoa pe kuo u tuʻutuʻuni atu.”​—MĀTIU 28:​19, 20.

1, 2. (a) ʻOku anga-fēfē ʻetau hoko kotoa ʻi ha tuʻunga, ko e kau faiakó? (e) ʻI he hoko mai ki he faiakó, ko e hā ʻa e fatongia makehe ʻoku maʻu ʻe he kau Kalisitiane moʻoní?

KO HA faiako koe? Ko e kau faiako kotoa kitautolu, ʻi ha tuʻunga. Ko e taimi kotoa pē ʻokú ke fai ai ha ngaahi fakahinohino ki ha tokotaha fononga ʻoku hē, fakahaaʻi ki ha kaungāngāue ʻa e founga ke fakahoko ai ha ngāue pau, pe fakamatalaʻi ki ha kiʻi tama ʻa e founga ke nonoʻo ai ʻa e tepi hono suú, ʻokú ke faiako ai. Ko hono tokoniʻi ʻa e niʻihi kehé ʻi he ngaahi founga peheé ʻoku ʻomai ai ha tuʻunga ʻo e fiemālie, ʻikai ko ia?

² ʻI he taimi ʻoku hoko mai ai fekauʻaki mo e faiakó, ʻoku maʻu ʻe he kau Kalisitiane moʻoní ha fatongia makehe. ʻOku fekauʻi kitautolu ke ‘ngaohi ʻa e ngāhi kakai kotoa pe ko e kau ako, . . .  mo akoʻi kinautolu.’ (Mātiu 28:​19, 20) ʻI he loto fakatahaʻangá foki, ʻoku tau maʻu ai ʻa e taimi ke faiako. ʻOku fakanofo ʻa e kau tangata taau ke nau ngāue ko e kau “tauhi mo faiako,” fakataha mo e vakai atu ki hono langa hake ʻa e fakatahaʻangá. (Efeso 4:​11-13) ʻI heʻenau ngaahi ngāue fakaʻaho faka-Kalisitiané, ʻoku totonu ke hoko ai ʻa e kakai fefine matuʻotuʻá ko e “akoʻanga meʻa lelei” ki he kakai fefine kei siʻi angé. (Taitusi 2:​3-5) ʻOku enginaki mai kia kitautolu kotoa ke fakalotolahiʻi ʻa e kaungātuí, pea ʻe lava ke tau tokanga ki he naʻinaʻi ko iá ʻaki hono ngāueʻaki ʻa e Tohitapú ke langa hake ʻaki ʻa e niʻihi kehé. (1 Tesalonaika 5:​11) Ko ha monū ia ke hoko ko ha faiako ʻo e Folofola ʻa e ʻOtuá pea ke vahevahe atu ʻa e ngaahi meʻa mahuʻinga fakalaumālie ʻa ia ʻe lava ke ʻi ai hono ngaahi ʻaonga tuʻuloá!

 3. ʻE lava fēfē ke tau fakaleleiʻi ʻetau ola lelei ʻi he tuʻunga ko e kau faiakó?

³ Ko ia ai, ʻe lava fēfē ke tau fakaleleiʻi ʻetau ola lelei ʻi he tuʻunga ko e kau faiakó? ʻUluakí, ʻaki ʻa e faʻifaʻitaki ki he Faiako Lahí, ʻa Sīsū. ‘Ka ʻe lava fēfē ke tau faʻifaʻitaki kia Sīsū?’ ko e fifili nai ia ʻa e niʻihi. ‘Naʻá ne haohaoa.’ Ko e moʻoni, ʻe ʻikai lava ke tau hoko ko e kau faiako haohaoa. Neongo ia, tatau ai pē pe ko e hā ʻetau ngaahi malavá, ʻe lava ke tau fai ʻetau lelei tahá ke faʻifaʻitaki ai ki he founga naʻe faiakoʻaki ʻe Sīsuú. Tau lāulea angé ki he founga ʻe lava ke tau ngāueʻaki ai ʻa e tafaʻaki ʻe fā ʻo ʻene ngaahi foungá​—ko e tuʻunga faingofua, ngaahi fehuʻi ola lelei, fakaʻuhinga totonu, mo e ngaahi talanoa fakatātā feʻungamālie.

Tauhi Ia ke Faingofua

4, 5. (a) Ko e hā ʻoku hoko ai ʻa e tuʻunga faingofuá ko ha tafaʻaki tefito ia ʻo e moʻoni faka-Tohitapú? (e) Ke faiakoʻaki ʻa e tuʻunga faingofuá, ko e hā ʻoku mahuʻinga ai ke tokanga ki he ngaahi foʻi lea ʻoku tau ngāueʻakí?

⁴ Ko e ngaahi moʻoni tefito ʻo e Folofola ʻa e ʻOtuá ʻoku ʻikai ke fihi. ʻI ha lotu, naʻe pehē ai ʻe Sīsū: “ʻOku ou fakatonuhiaʻia koe, ʻe Tamai, . . . ʻi hoʻo fufū ʻa e ngāhi meʻa pehe ni mei ha kakai ʻoku poto mo ʻiloʻilo, ka ke tatala ki ha kau tamaiki.” (Mātiu 11:25) Kuo ʻai ʻe Sihova ke fakahaaʻi ʻene ngaahi taumuʻá ki he faʻahinga ʻoku loto-moʻoni mo loto-anga fakatōkilaló. (1 Kolinito 1:​26-​28) Ko ia ai, ko e tuʻunga faingofuá ko ha tafaʻaki tefito ia ʻo e moʻoni faka-Tohitapú.

⁵ ʻI hoʻo fai ha ako Tohitapu ʻi ʻapi, pe fai ha ngaahi toe ʻaʻahi ki he faʻahinga mahuʻingaʻiá, ʻe lava fēfē ke ke faiako ʻaki ha tuʻunga faingofua? Sai, ko e hā naʻa tau ako mei he Faiako Lahí? Ke aʻu ki heʻene kau fanongó, ʻa ia ko e tokolahi ai ko e kau ‘taʻe kolisi kinautolu, pea taʻe maʻu tuʻunga,’ naʻe ngāueʻaki ʻe Sīsū ʻa e lea mahino naʻe lava ke nau mahinoʻí. (Ngāue 4:13) Ke faiakoʻaki leva ʻa e tuʻunga faingofuá, ko ha fiemaʻu ʻuluaki, ke tokanga ki he ngaahi foʻi lea ʻoku tau ngāueʻakí. ʻOku ʻikai fiemaʻu ke tau ngāueʻaki ha ngaahi foʻi lea pe ngaahi kupuʻi lea fakangeingeia koeʻuhi ke ʻai ai ʻa e moʻoni ʻo e Folofola ʻa e ʻOtuá ke fakatuipau lahi ange ki he niʻihi kehé. Ko e “malie oe lea” peheé ʻe lava ke hoko ia ʻo fakatupu manavasiʻi, tautefito ki he faʻahinga ʻoku fakangatangata honau tuʻunga fakaakó pe ko e malavá. (1 Kolinito 2:​1, 2, PM) Ko e faʻifaʻitakiʻanga ʻa Sīsuú ʻoku fakahaaʻi ai ko e ngaahi lea faingofua ʻoku filifili leleí ʻe lava ke fakahaaʻi ai ʻa e moʻoní fakataha mo e mālohi lahi.

 6. ʻE lava fēfē ke tau fakaʻehiʻehi mei hano lōmekina ha tokotaha ako Tohitapu ʻaki ha fakamatala fuʻu lahi?

⁶ Ke faiakoʻaki ʻa e tuʻunga faingofuá, kuo pau ke tau toe tokanga ke fakaʻehiʻehi mei hono lōmekina ha tokotaha ako Tohitapu ʻaki ha fakamatala ʻoku fuʻu lahi. Naʻe fakaʻatuʻi ʻa Sīsū fekauʻaki mo e ngaahi ngataʻanga ʻo ʻene kau ākongá. (Sione 16:12) Ko kitautolu foki, kuo pau ke tau fakaʻatuʻi ʻa e ngataʻanga ʻo e tokotaha akó. Ko e fakatātaá, ʻi hono fai ha ako ʻi he tohi ʻIlo ʻA Ia ʻOku Taki Atu ki he Moʻui Taʻengatá, ʻoku ʻikai fiemaʻu ke tau fakamatalaʻi ʻa e fakaikiiki kotoa pē.a Pea ʻoku ʻikai fiemaʻu ke fakavaveʻi ʻa e fakamatalá, ʻo hangē ia ko e meʻa mahuʻinga tahá ko hono kāpui ha lahi pau ʻo e fakamatalá. ʻI hono kehé, ʻoku fakapotopoto ke tuku ke fakapapauʻi ʻe he ngaahi fiemaʻu mo e ngaahi malava ʻa e tokotaha akó ʻa e tuʻunga vave ʻo e akó. Ko ʻetau taumuʻá ke tokoniʻi ha tokotaha ako ke hoko ko ha ākonga ʻa Kalaisi mo ha tokotaha lotu ʻa Sihova. ʻOku fiemaʻu ke tau vaheʻi ʻa e taimi pē ʻoku fiemaʻú ke tokoniʻi ai ʻa e tokotaha ako mahuʻingaʻiá ke ne mahinoʻi lelei ʻa e meʻa ʻokú ne akó. Ko ia ai, ʻe laveʻi nai ʻe he moʻoní ʻa hono lotó pea ueʻi ia ke ne fai ha meʻa.​—Loma 12:2.

 7. Ko e hā ʻa e ngaahi fokotuʻu ʻe lava ke ne tokoniʻi kitautolu ke faiakoʻaki ʻa e tuʻunga faingofua ʻi he taimi ʻoku tau fai ai ha ngaahi malanga ʻi he fakatahaʻangá?

⁷ ʻI heʻetau fai ʻa e ngaahi malanga ʻi he fakatahaʻangá, tautefito kapau ʻoku ʻi ai ha kau haʻu foʻou ʻi he kau fanongó, ʻe lava fēfē ke tau leaʻaki ha lea ʻa ia ʻoku “ʻilongofua”? (1 Kolinito 14:9) Fakakaukau angé ki ha ngaahi fokotuʻu ʻe tolu ʻa ia ʻe lava ke tokoni. ʻUluakí, fakamatalaʻi ha ngaahi kupuʻi lea ʻikai anga-maheni pē te ke ngāueʻaki. Ko ʻetau mahinoʻi ʻa e Folofola ʻa e ʻOtuá kuó ne ʻomai ai kia kitautolu ha ngaahi foʻi lea makehe. Kapau ʻoku tau ngāueʻaki ʻa e ngaahi kupuʻi lea hangē ko e “tamaioʻeiki anga-tonu mo potó,” “fanga sipi kehé,” mo e “Pāpilone ko e Lahí,” ʻe fiemaʻu nai ke tau fakamatalaʻi ia ʻaki ʻa e ngaahi kupuʻi lea faingofua te ne ʻai ke mahino ʻa e ʻuhingá. Ko hono uá, fakaʻehiʻehi mei hono ngāueʻaki ha ngaahi foʻi lea lahi. Ko e fuʻu lahi ʻa e ngaahi foʻi leá, ko hono fakamatalaʻi ʻo fuʻu fakaikiikí, ʻe mole nai ai ʻa e mahuʻingaʻia ʻa e kau fanongó. Ko e tuʻunga maʻalaʻalá ʻe hoko mai ia ʻi hono tuʻusi ʻa e ngaahi foʻi lea mo e ngaahi kupuʻi lea ʻoku ʻikai fiemaʻú. Ko hono tolú, ʻoua ʻe feinga ke kāpui ha fakamatala ʻoku fuʻu lahi. Ko ʻetau fekumí te ne ʻomai nai ʻa e ngaahi fakaikiiki mahuʻinga lahi. Ka ʻoku lelei tahá ke fokotuʻutuʻu ʻa e fakamatalá ki ha ngaahi poini siʻi tefito, ʻo ngāueʻaki pē ʻa e fakamatala ʻoku poupouʻi ai ʻa e ngaahi poini ko iá pea ʻe lava ke fakahoko maʻalaʻala ʻi he taimi ʻoku vaheʻi maí.

Ngāueʻaki Ola Lelei ʻo e Ngaahi Fehuʻí

8, 9. ʻE lava fēfē ke tau fili ha foʻi fehuʻi ʻa ia ʻoku ʻai ke feʻunga mo e mahuʻingaʻia ʻa ha tokotaha-ʻapi? ʻOmai ha ngaahi fakatātā.

⁸ Manatuʻi ko Sīsuú naʻe mataotao ia ʻi hono ngāueʻaki ʻa e ngaahi fehuʻí ke ʻai ai ʻene kau ʻapositoló ke nau fakahaaʻi ʻa e meʻa naʻe ʻi honau ʻatamaí pea ke ueʻi mo akoʻi ʻenau fakakaukaú. ʻI heʻene ngaahi fehuʻí, naʻe laveʻi ʻi he tuʻunga fakaalaala mo ueʻi ai ʻe Sīsū honau lotó. (Mātiu 16:​13, 15; Sione 11:26) ʻE lava fēfē ke tau hoko, hangē ko Sīsuú, ʻo ngāueʻaki ola lelei ʻa e ngaahi fehuʻí?

⁹ ʻI he malanga mei he fale ki he falé, ʻe lava ke tau ngāueʻaki ai ʻa e ngaahi fehuʻí ke langaʻi ʻa e mahuʻingaʻiá, ʻo fakatoka ai ʻa e hala kia kitautolu ke talanoa ai fekauʻaki mo e Puleʻanga ʻo e ʻOtuá. ʻE lava fēfē ke tau fili ha foʻi fehuʻi ʻa ia ʻoku ʻai ke feʻunga mo e ngaahi mahuʻingaʻia ʻa e tokotaha-ʻapí? Tokanga. ʻI he fakaofiofi ki ha fale, sio ki he ngaahi ʻātakaí. ʻOku ʻi ai ha ngaahi meʻa vaʻinga ʻi he loto-ʻapí, ʻo fakahaaʻi ai ʻoku ʻi ai ʻa e fānau ʻi he ʻapí? Kapau ko ia, te tau ʻeke nai, ‘Kuo faifai ange peá ke fifili pe ʻe fēfē ʻa e māmaní ʻi he taimi ʻe tupu hake ai hoʻo fānaú?’ (Sāme 37:​10, 11) ʻOku lahi ha ngaahi foʻi loka ʻi he matapā ʻi halá, pe ʻoku ʻi ai ha meʻa maluʻi mei he kaihaʻá? ʻE lava leva ke tau ʻeke: ‘ʻOkú ke fakakaukau ʻe faifai ange pea hoko mai ha taimi ʻa ia ʻe lava ai ke tau ongoʻi malu ʻi hotau ʻapí pea ʻi he halá?’ (Maika 4:​3, 4) ʻOku ʻi ai ha foʻi hala tahifo ki he hūʻanga ʻo ha saliote? Te tau ʻeke nai: ‘ʻE faifai ange pea ʻi ai ha taimi ʻa ia ʻe maʻu ai ʻe he tokotaha kotoa pē ʻoku moʻuí ha moʻui lelei?’ (Aisea 33:24) ʻOku lava ke maʻu ʻa e ngaahi fokotuʻu lahi ʻi he kiʻi tohi Founga ke Kamata mo Hoko Atu ʻa e Fetalanoaʻaki Fakatohitapú.b

10. ʻE lava fēfē ke tau ngāueʻaki ʻa e ngaahi fehuʻí ke “fusi hake” ʻa e ngaahi fakakaukau mo e ongoʻi ʻi he loto ʻo ha tokotaha ako Tohitapu, ka ko e hā ʻoku totonu ke tau manatuʻí?

¹⁰ ʻE lava fēfē ke tau ngāueleleiʻaki ʻa e ngaahi fehuʻí ʻi hono fai ʻa e ngaahi ako Tohitapú? ʻI he ʻikai hangē ko Sīsuú, ʻoku ʻikai lava ke tau ʻiloʻi ʻa e lotó. Kae kehe, ko e ngaahi fehuʻi fakapotopoto kae ʻiloʻiló ʻe lava ke tokoniʻi ai kitautolu ke “fusi hake” ʻa e ngaahi fakakaukau mo e ongoʻi ʻi he loto ʻo e tokotaha akó. (Palovepi 20:5) Ko e fakatātaá, tau pehē ʻoku tau ako ʻa e vahe “ʻUhinga ʻOku ʻOmai Ai ʻe he Moʻuiʻaki ha Moʻui Anga-Fakaʻotuá ʻa e Fiefiá,” ʻi he tohi ʻIlo. ʻOku lāulea ai ki he vakai mai ʻa e ʻOtuá ki he taʻefaitotonú, feʻauakí, mo e ngaahi meʻa kehe. ʻE tali totonu nai ʻe he tokotaha akó ʻa e ngaahi fehuʻi kuo pulusí, ka ʻokú ne loto-tatau mo e meʻa ʻokú ne akó? Te tau ʻeke nai: ‘ʻOku ʻuhinga lelei kiate koe ʻa e vakai ʻa Sihova ki he ngaahi meʻa peheé?’ ‘ʻE lava fēfē ke ke ngāueʻaki ʻa e ngaahi tefitoʻi moʻoni faka-Tohitapu ko ení ʻi hoʻo moʻuí?’ Neongo ia, manatuʻi ʻa e fiemaʻu ke anga-fakaʻapaʻapa, ʻo ʻoange ʻa e tuʻunga ngeiá ki he tokotaha akó. ʻE ʻikai te tau loto ke ʻeke ha ngaahi fehuʻi ʻe fakamaaʻi pe fakahāeaʻi ai ʻa e tokotaha ako Tohitapú.​—Palovepi 12:18.

11. ʻI he ngaahi founga fē ʻe lava ke ngāueʻaki ola lelei ai ʻe he kau malanga maʻá e kakaí ʻa e ngaahi fehuʻí?

¹¹ ʻE toe lava foki ke ngāueʻaki ola lelei ʻe he kau malanga maʻá e kakaí ʻa e ngaahi fehuʻí. Ko e ngaahi fehuʻi tali lotó​—ʻa e ngaahi fehuʻi ʻoku ʻikai te tau ʻamanekina ke tali leʻo-lahi ʻe heʻetau kau fanongó—ʻe lava ke ne tokoniʻi ha kau fanongo ke nau fakakaukau ai mo fakaʻuhinga. Naʻe toutou ngāueʻaki ʻe Sīsū ʻa e ngaahi fehuʻi peheé. (Mātiu 11:​7-9) Tānaki atu ki ai, hili ʻa e ngaahi fakamatala talateú, ʻe ngāueʻaki nai ʻe he tokotaha malangá ʻa e ngaahi fehuʻí ke fakahaaʻi ʻa e ngaahi poini tefito ʻa ia ʻe fai ki ai ʻa e lāuleá. ʻE lava ke ne pehē: “ʻI heʻetau lāulea ʻi he ʻaho ní, te tau fakakaukau ai ki ha tali ki he ngaahi fehuʻi ko ení . . .” ʻI he fakamulitukú leva, ʻe lava ke ne lave ai ki he ngaahi fehuʻi ko iá ke fakamanatu ʻa e ngaahi poini tefitó.

12. ʻOmai ha fakatātā ke fakahaaʻi ai ʻa e founga ʻe lava ai ke ngāueʻaki ʻe he kau mātuʻa Kalisitiané ʻa e ngaahi fehuʻí ke tokoniʻi ha kaungātui ke ne maʻu ʻa e fakafiemālie mei he Folofola ʻa e ʻOtuá.

¹² ʻI heʻenau ngāue fakaetauhí, ʻe lava ke ngāueʻaki ʻe he kau mātuʻa Kalisitiané ʻa e ngaahi fehuʻí ke tokoniʻi ha tokotaha “lotosiʻi” ke ne maʻu ʻa e fakafiemālie mei he Folofola ʻa Sihová. (1 Tesalonaika 5:​14) Ko e fakatātaá, ke tokoniʻi ha taha ʻoku ongoʻi loto-taʻotaʻomia, ʻe fakahanga nai ʻe ha mātuʻa ʻa e tokangá ki he Sāme 34:18. ʻOku pehē ai: “Ko e loto lavea ʻoku ofi ki ai ʻa e ʻEiki [“Jihova,” PM], pea ʻoku ne fakamoʻui ʻakinautolu ʻoku laumalie mafesi.” Ke fakapapauʻi ʻoku sio ʻa e tokotaha loto-siʻí ki he anga ʻo hono ngāueʻaki eni kiate ia fakafoʻituituí, ʻe ʻeke nai ʻe he tokotaha mātuʻá: ‘ʻOku ofi ʻa Sihová kia hai? ʻOkú ke ongoʻi “loto lavea” mo “laumalie mafesi” ʻi ha ngaahi taimi? Kapau ʻoku ofi ʻa Sihova ki he faʻahinga peheé, hangē ko ia ko e lau ʻa e Tohitapú, ʻoku ʻuhingá ia ʻokú ne ofi mai kiate koe?’ Ko e fakapapau anga-ʻofa peheé ʻe lava ke ne fakaake ʻa e laumālie ʻo e tokotaha ʻa ia ʻoku loto-taʻotaʻomiá.​—Aisea 57:15.

Fakaʻuhinga Totonu

13, 14. (a) ʻE anga-fēfē haʻatau fakaʻuhinga mo ha taha ʻokú ne pehē ʻoku ʻikai tui ia ki ha ʻOtua ʻoku ʻikai lava ke ne sio ki ai? (e) Ko e hā ʻoku totonu ai ke ʻoua te tau ʻamanekina ʻe tuipau ʻa e tokotaha kotoa?

¹³ ʻI heʻetau ngāue fakafaifekaú, ʻoku tau loto ke aʻu ki he lotó ʻaki ʻa e fakaʻuhinga lelei mo fakalotoʻi. (Ngāue 19:8; 28:​23, 24) ʻOku ʻuhinga iá kuo pau ke tau ako ke ngāueʻaki ʻa e fakaʻuhinga fihi koeʻuhi ke fakatuipauʻi ai ʻa e niʻihi kehé fekauʻaki mo e moʻoni ʻo e Folofola ʻa e ʻOtuá? ʻIkai ʻaupito. Ko e fakaʻuhinga leleí ʻoku ʻikai fiemaʻu ia ke fihi. Ko e ngaahi fakaʻuhinga totonu ʻoku fakahoko ʻi ha founga faingofuá ʻoku faʻa ola lelei tahá. Fakakaukau angé ki ha fakatātā.

¹⁴ ʻE anga-fēfē nai haʻatau tali ʻi he taimi ʻe pehē ai ʻe ha taha ʻoku ʻikai te ne tui ki ha ʻOtua ʻoku ʻikai lava ke ne sio ki ai? ʻE lava ke tau fakaʻuhinga ʻi he lao fakanatula ʻo e tupuʻangá mo e olá. ʻI heʻetau sio ki ha ola, ʻoku tau tali kuo pau pē ʻoku ʻi ai ha tupuʻanga. Te tau pehē nai: ‘Kapau ʻokú ke ʻi ha feituʻu mamaʻo pea ke aʻu ai ki ha fale lelei ʻa ia ʻoku fonu ʻi he meʻakaí (olá), te ke tali lelei naʻe langa ʻe ha taha (tupuʻanga) ʻa e fale ko iá pea fakafonu ʻa hono ngaahi kōpate meʻakaí. Pehē foki, ʻi he taimi ʻoku tau sio ai ki he hā mahino ʻa e faʻú ʻi natulá pea mo e lahi ʻo e meʻakaí ʻi he “tukuʻanga meʻakai” (ola) ʻo e māmaní, ʻikai ʻoku ʻuhinga lelei ke tali ko ha Tokotaha (tupuʻanga) ʻoku tupu mei aí?’ Ko e fakaʻuhinga faingofua ʻa e Tohitapú ʻoku fakahaaʻi mahino ai eni: “Seuke, ʻilonga ha ʻapi, kuo pau naʻe langa ʻe ha taha; pea ko ia naʻa ne langa ʻa e meʻa kotoa pe ko e ʻOtua.” (Hepelu 3:4) Kae kehe, tatau ai pē pe ko e hā nai ʻa e lelei ʻo ʻetau fakaʻuhingá, ʻe ʻikai ke tuipau ki ai ʻa e tokotaha kotoa. ʻOku fakamanatu mai ʻe he Tohitapú kia kitautolu ko e faʻahinga pē ʻoku “hehema totonu” te nau hoko ko e kau tuí.—Ngāue 13:​48, NW; 2 Tesalonaika 3:2.

15. Ko e hā ʻa e tuʻunga ʻo e fakaʻuhingá ʻe lava ke tau ngāueʻaki ke fakamamafaʻi ʻaki ʻa e ngaahi ʻulungaanga mo e ngaahi founga ʻa Sihová, pea ko e hā ʻa e ongo fakatātā ʻe ua ʻoku fakahaaʻi ai ʻa e founga te tau ngāueʻaki nai ai ʻa e fakaʻuhinga peheé?

¹⁵ ʻI heʻetau faiakó, tatau ai pē ʻi he malaʻe fakafaifekaú pe ʻi he fakatahaʻangá, ʻe lava ke tau ngāueʻaki ʻa e fakaʻuhinga totonú ke fakamamafaʻi ʻaki ʻa e ngaahi ʻulungaanga mo e ngaahi founga ʻa Sihová. ʻOku tautefito ʻa e ola lelei ʻa e tuʻunga fakaʻuhinga ‘huanoa’ naʻe faʻa ngāueʻaki ʻe Sīsuú. (Luke 11:13; 12:24) Makatuʻunga ʻi he faikehekehé, ko e faʻahinga fakaʻuhinga ko ení ʻe lava ke ne ʻai ke ʻi ai ha maongo loloto. Ke fakaeʻa ʻa e taʻeʻuhinga ʻo e tokāteline afi ʻo helí, te tau pehē nai: ‘ʻE ʻikai ha tamai ʻofa te ne tauteaʻi ʻa ʻene kiʻi tamá ʻaki hono pukepuke ʻa e nima ʻo ʻene kiʻi tamá ʻi ha afi. Huanoa hake ai ʻa e taukovi ʻo e foʻi fakakaukau tonu ki he afi ʻo helí ki heʻetau Tamai fakahēvani ʻofá!’ (Selemaia 7:​31) Ke akoʻi ʻoku tokanga ʻa Sihova ki heʻene kau sevānití ʻi honau tuʻunga tāutahá, ʻe lava ke tau pehē: ‘Kapau ʻoku ʻafioʻi ʻe Sihova ʻa e hingoa taki taha ʻo e laui piliona ʻo e ngaahi fetuʻú, huanoa hake ai ʻene tokanga fekauʻaki mo e faʻahinga ʻo e tangatá ʻa ia ʻoku nau ʻofa kiate iá pea naʻe fakatauʻaki ʻa e taʻataʻa mahuʻinga ʻo hono ʻAló!’ (Aisea 40:26; Ngāue 20:28) Ko e fakaʻuhinga mālohi peheé ʻe lava ke ne tokoniʻi kitautolu ke aʻu ai ki he loto ʻo e niʻihi kehé.

Ngaahi Talanoa Fakatātā Feʻungamālie

16. Ko e hā ʻoku mahuʻinga ai ʻa e ngaahi talanoa fakatātaá ʻi he faiakó?

¹⁶ Ko e ngaahi talanoa fakatātā ola leleí ko ha meʻa fakaifoifo ia ʻa ia ʻe lava ke ne ʻai ʻetau faiakó ke hā fakaʻuakai ki he niʻihi kehé. Ko e hā ʻoku mahuʻinga ai ʻa e ngaahi talanoa fakatātaá ʻi he faiakó? Naʻe pehē ʻe ha faiako ʻe taha: “Ko e malava ke fakakaukau taʻetokangá ʻa e taha ʻo e ngaahi meʻa faingataʻa taha ʻoku hoko ki he tangatá.” ʻOku hanga ʻe he ngaahi talanoa fakatātaá ʻo ʻai ke maongo ʻa e ngaahi fakatātā mohu ʻuhingá ki hotau ʻatamaí, ʻo tokoniʻi kakato ange ai kitautolu ke tau mahinoʻi ʻa e ngaahi fakakaukau foʻoú. Naʻe ʻiloa ʻa Sīsū ʻi heʻene ngāueʻaki ʻa e ngaahi talanoa fakatātaá. (Maake 4:​33, 34) Tau vakai angé ki he founga ʻe lava ke tau ngāueʻaki ai ʻa e founga faiako ko ení.

17. Ko e hā ʻa e meʻa tefito ʻe fā ʻokú ne ʻai ke ola lelei ai ha talanoa fakatātā?

¹⁷ Ko e hā ʻokú ne ʻai ha talanoa fakatātā ke ola leleí? ʻUluakí, ʻoku totonu ke feʻungamālie ia mo ʻetau kau fanongó, ʻo ngāueʻaki ʻa e ngaahi tuʻunga ʻe malavangofua ke mahino ki heʻetau kau fanongó. ʻOku tau manatuʻi naʻe toʻo ʻe Sīsū ʻa e lahi ʻo ʻene ngaahi talanoa fakatātaá mei he moʻui fakaʻaho ʻa ʻene kau fanongó. Ko hono uá, ko ha talanoa fakatātā ʻoku totonu ke huʻufataha ia ʻi he ʻuhinga lelei mo e poini ʻoku ngāueʻakí. Kapau ʻoku ʻikai feʻungamālie ʻa e fakahoá, ʻe fakahohaʻasi pē nai ʻe he talanoa fakatātaá ʻa ʻetau kau fanongó. Ko hono tolú, ʻoku ʻikai totonu ke fihi ʻa e talanoa fakatātaá ʻi ha ngaahi fakaikiiki ʻoku ʻikai fiemaʻu. Manatuʻi naʻe ʻomai ʻe Sīsū ʻa e ngaahi meʻa pau naʻe fiemaʻú kae liʻaki ʻa e ngaahi meʻa naʻe ʻikai fiemaʻú. Ko hono faá, ʻi heʻetau ngāueʻaki ha talanoa fakatātā, ʻoku totonu ke tau fakapapauʻi ʻoku mahino ʻa hono kaungá. He ka ʻikai, ʻe ʻikai nai ke maʻu ʻe he niʻihi ʻa e poiní.

18. ʻE lava fēfē ke tau faʻu ha ngaahi talanoa fakatātā feʻungamālie?

¹⁸ ʻE lava fēfē ke tau faʻu ha ngaahi talanoa fakatātā feʻungamālie? ʻOku ʻikai fiemaʻu ke tau fakakaukau ki ha ngaahi talanoa lōloa mo fuʻu fakaikiiki. Ko e ngaahi talanoa fakatātā nounoú ʻe lava ke ola lelei ʻaupito. Feinga pē ke fakakaukau ki ha ngaahi fakatātā ʻo e poini ʻoku fai ki ai ʻa e lāuleá. Hangē ko ení, tau pehē ʻoku tau lāulea ki he tuʻunga-lea ʻo e fakamolemole ʻa e ʻOtuá, pea ʻoku tau loto ke fakatātaaʻi ʻa e poini ʻoku ʻomai ʻi he Ngāue 3:​19, ʻa ia ʻoku pehē ai ko Sihová ʻokú ne “tamateʻi,” pe lapaʻi, ʻetau ngaahi fehālaakí. Ko e meʻa ko iá tonu ko ha lea fakatātā maeʻeeʻa ia, ka ko e hā ʻa e fakatātā moʻoni ʻe lava ke tau ngāueʻaki ke fakatātaaʻi ʻaki ʻa e poiní​—ko ha foʻi lapa? ko ha ulapa molū? Te tau pehē nai: ‘ʻI hono fakamolemoleʻi ʻe Sihova ʻetau ngaahi angahalá, ʻokú ne lapaʻi ia ʻo hangē ʻokú ne ngāueʻaki ha ulapa molū (pe ko ha foʻi lapa).’ ʻOku faingataʻa ke taʻemahinoʻi ʻa e poini ʻo ha talanoa fakatātā faingofua pehē.

19, 20. (a) Ko fē ʻe lava ke tau maʻu mei ai ʻa e ngaahi talanoa fakatātā leleí? (e) Ko e hā ʻa e ngaahi fakatātā ʻe niʻihi ʻo e ngaahi talanoa fakatātā ola leleí kuo pulusi ʻi heʻetau ʻū tohí? (Sio foki ki he puhá.)

¹⁹ Ko fē ʻe lava ke ke maʻu mei ai ha ngaahi talanoa fakatātā feʻungamālie, ʻo kau ai ʻa e ngaahi fakatātā moʻoni ʻi he moʻuí? Kumi ki ai ʻi hoʻo moʻuí tonu pe ʻi he ngaahi puipuituʻa mo e ngaahi meʻa kehekehe ʻoku hokosia ʻe he kaungātuí. ʻE lava ke fili ʻa e ngaahi talanoa fakatātaá mei he ngaahi maʻuʻanga fakamatala lahi kehe, ʻo kau ai ʻa e ngaahi meʻa moʻui mo e meʻa mate, ngaahi meʻa tefito ʻi he fāmilí, pea ko ha meʻa ʻoku lolotonga hoko ʻo ʻiloa ʻi he feituʻú. Ko ha founga lelei ki hono maʻu ʻa e ngaahi talanoa fakatātā leleí, ko e tokanga ke “siofi lelei” ʻa e ngaahi tuʻunga fakaʻaho takatakai ʻia kitautolú. (Ngāue 17:​22, 23, NW) Ko ha tohi maʻuʻanga fakamatala ʻe taha ki he malanga maʻá e kakaí ʻoku fakamatala ai: “Ko e tokotaha malanga ʻokú ne siofi ʻa e moʻui fakaetangatá mo hono ngaahi ngāue kehekehé, talanoa mo e faʻahinga kakai kehekehe, sivisiviʻi fakalelei ʻa e ngaahi meʻá, pea ʻeke ha ngaahi fehuʻi kae ʻoua ke mahino kiate iá, te ne tānaki ha fakamatala lahi fakaefakatātā ʻa ia ʻe mātuʻaki ʻaonga kiate ia ʻi he taimi ʻe fiemaʻu aí.”

²⁰ ʻOku toe ʻi ai ha maʻuʻanga ʻo e ngaahi talanoa fakatātā ola lelei lahi​—Ko e Taua Leʻo, ʻĀ Hake!, mo e ʻū tohi kehe ʻoku faʻu ʻe he Kau Fakamoʻoni ʻa Sihová. ʻE lava ke ke ako ʻa e meʻa lahi mei hono siofi ʻa e anga hono ngāueʻaki ʻi he ʻū tohi ko ení ʻa e ngaahi talanoa fakatātaá.c Ko e fakatātaá, fakakaukau angé ki he talanoa fakatātā ʻoku ngāueʻaki ʻi he palakalafi 11 ʻo e vahe 17 ʻi he tohi ʻIlo. ʻOku fakahoa ai ʻa e ngaahi angaʻitangata kehekehe ʻi he fakatahaʻangá ki he ngaahi meʻalele kehekehe ʻoku nau fononga fakataha ʻi ho tafaʻakí ʻi he halá. Ko e hā ʻokú ne ʻai ia ke ola leleí? Fakatokangaʻi ʻoku makatuʻunga ia ʻi he ngaahi tuʻunga fakaʻahó, ʻoku mātuʻaki huʻufataha ia mo e poini ʻokú ne ʻomaí, pea ʻoku mahino ʻa hono kaungá. ʻE lava ke tau ngāueʻaki ʻa e ngaahi talanoa fakatātā kuo pulusí ʻi heʻetau faiakó, ʻo ʻai nai kinautolu ki he ngaahi fiemaʻu ʻa ha tokotaha ako Tohitapu pe feʻunuʻaki kinautolu ke ngāueʻaki ʻi ha malanga.

21. Ko e hā ʻa e ngaahi pale ʻoku hoko mai ʻi he hoko ko ha faiako ola lelei ʻo e Folofola ʻa e ʻOtuá?

²¹ Ko e pale ʻo e hoko ko ha faiako ola leleí ʻoku lahi. ʻI heʻetau faiakó, ʻoku tau fevahevaheʻaki ai mo e niʻihi kehé; ʻoku tau ngāueʻaki ai ʻa e niʻihi ʻo ʻetau koloá ke tokoniʻi kinautolu. Ko e foaki peheé ʻoku ʻomai ai ʻa e fiefia, he ʻoku pehē ʻe he Tohitapú: “ʻOku te monuʻia [“fiefia,” NW] lahi ʻi he fai ha foaki atu, ʻi heʻete maʻu ha foaki mai.” (Ngāue 20:35) Ki he kau faiako ʻo e Folofola ʻa e ʻOtuá, ko e fiefia ko iá ko e fiefialoto ʻi hono ʻiloʻi ʻoku tau ʻoatu ha meʻa mahuʻinga moʻoni mo tuʻuloa​—ko e moʻoni fekauʻaki mo Sihová. ʻE toe lava ke tau maʻu ʻa e fiemālie ʻoku hoko mai mei hono ʻiloʻi ʻoku tau faʻifaʻitaki ki he Faiako Lahí, ʻa Sīsū Kalaisi.

[Fakamatala ʻi lalo]

ʻOkú Ke Manatuʻi?

• ʻE lava fēfē ke tau faiakoʻaki ʻa e tuʻunga faingofuá ʻi heʻetau fai ha ako Tohitapu ʻi ʻapi? ʻi hono fai ha malanga ʻi he fakatahaʻangá?

• ʻE lava fēfē ke tau ngāue ola lelei ʻaki ʻa e ngaahi fehuʻí ʻi he malanga fale ki he falé?

• Te tau ngāueʻaki fēfē nai ʻa e fakaʻuhinga totonú ke fakamamafaʻi ʻaki ʻa e ngaahi ʻulungaanga mo e ngaahi founga ʻa Sihová?

• Ko fē ʻe lava ke tau maʻu mei ai ʻa e ngaahi talanoa fakatātā feʻungamālié?

[Puha/Fakatātā ʻi he peesi 23]

ʻOkú Ke Manatuʻi ʻa e Ngaahi Fakatātā ko Ení?

ʻOku hoko heni ha ngaahi fakatātā ola lelei ʻe niʻihi. Ko e hā ʻoku ʻikai kumi ai ki he maʻuʻanga fakamatalá pea fakatokangaʻi ʻa e anga ʻo e tokoni ʻa e fakatātaá ke fakamamafaʻi ʻa e poini ʻoku fai ki ai ʻa e lāuleá?

• ʻI he hangē ko e kau faiva ʻi he ʻeá pe ngaahi hoa sikeití, ko e faʻahinga ʻoku nau feinga ke langa ha nofo mali leleí ʻoku fakatuʻunga lahi ia ʻi ha hoa lelei.​—Ko e Taua Leʻo, Mē 15, 2001, peesi 16.

• Ko hono fakahaaʻi hoʻo ongoʻí ʻoku hangē ia ko hono lī ha foʻi pulú. ʻE lava ke ke lī fakalelei ia pe ʻe lava ke ke tolongi mālohi ia ʻo fakatupunga ai ha lavea.​—ʻĀ Hake!, ʻEpeleli-Sune, 2001, peesi 10.

• Ko e ako ke fakahaaʻi ʻa e ʻofá ʻoku hangē ia ko hano ako ha lea foʻoú.​—Ko e Taua Leʻo, Fepueli 15, 1999, peesi 18, 22-3.

• Ko e angahala tukufakaholó ʻe lava ke fakahoa ia ki he meʻa ʻoku hoko ʻi he taimi ʻoku fakameleʻi ai ʻe ha vailasi ʻa e ngaahi faile ʻo ha komipiuta.​—Is There a Creator Who Cares About You?, peesi 156.

• ʻOku ʻaonga ʻa e fakahaʻele faʻahikehé ki he kau tēmenioó ʻo hangē pē ko e ʻaonga ʻa e mounú ki he kau tulimanú. ʻOkú ne tohoakiʻi mai ʻa e faʻahinga ke maʻukoviá.​—ʻIlo ʻA Ia ʻOku Taki Atu ki he Moʻui Taʻengatá, peesi 111.

• Ko e founga ʻo e hoko ʻa Sīsū ʻo fakahaofi ʻa e hako ʻo ʻĀtamá ʻe lava ke fakahoa ia ki ha tokotaha foaki meʻaʻofa koloaʻia ʻokú ne totongi ha moʻua ʻo ha kautaha (naʻe fakatupunga ʻe ha pule ngāue taʻefaitotonu) pea toe fakaava ʻa e fale ngāué, ʻo maʻu ʻaonga ai ʻa hono kau ngāue tokolahi.​—Ko e Taua Leʻo, Fepueli 1, 1992, peesi 13.

• Hangē pē ko e feinga ʻa e kau manako ʻi he tā valivalí ke toe fakaleleiʻi ha ngāue pōtoʻi naʻe maumauʻi, ʻoku lava ʻa Sihova ke ne sio fakalaka atu ʻi heʻetau ngaahi taʻehaohaoá, ʻo sio ki heʻetau leleí, pea iku ai ʻo fakafoki kitautolu ki he tuʻunga haohaoa naʻe fakamoleki ʻe ʻĀtamá.​—The Watchtower, Fepueli 15, 1990, peesi 22.

[Fakatātā ʻi he peesi 20]

Ko e kau Kalisitiane moʻoní ko e kau faiako ʻo e Folofola ʻa e ʻOtuá

[Fakatātā ʻi he peesi 21]

ʻE lava ke ngāueʻaki ʻe he kau mātuʻá ʻa e ngaahi fehuʻí ke tokoniʻi ʻaki ʻa e kaungātuí ke nau maʻu ʻa e fiemālie mei he Folofola ʻa e ʻOtuá