Fakaivimālohiʻi Homou Nimá

ʻI HE Tohitapú, ʻoku lave ai ki he nimá ʻo laka hake he tuʻo 1,800. Ko e ngaahi ʻitiome fekauʻaki mo e nimá ʻoku ngāueʻaki ia ʻi he ngaahi founga kehekehe. Ko e fakatātaá, ko ha nima maʻa ʻoku ʻuhinga iá ki he tonuhia. (2 Samiuela 22:21; Sāme 24:​3, 4) Ko hono folahi ʻo e nimá ʻoku ʻuhinga iá ko hono fakahaaʻi ʻa e nima-homo ki he niʻihi kehé. (Teutalonome 15:11; Sāme 145:16) Ko e tokotaha ʻoku tuku ʻene moʻuí ki he fakatuʻutāmakí ʻoku pehē ʻokú ne ʻai ʻene moʻuí ki hono nimá. (1 Samiuela 19:​5, PM) Ko e lī noa ki lalo ʻa e nimá ʻoku ʻuhinga iá ko e loto-siʻi. (2 Kalonikali 15:​7, NW) Pea ko e fakaivimālohiʻi ʻa e nima ʻo ha taha ko e ʻai ia ke mālohi mo fakaivia ki ha ngāue.—1 Samiuela 23:16.

ʻI he ʻahó ni ʻoku ʻi ai ha fiemaʻu fakavavevave ke fakaivimālohiʻi hotau nimá. ʻOku tau moʻui ʻi he “ngaahi taimi faingataʻa.” (2 Timote 3:1) ʻI he taimi ʻoku tau hoko ai ʻo loto-siʻí, ko e hehema fakaetangatá ia ke foʻi, ke tuku ki lalo hotau nimá. ʻOku anga-maheni ʻaki ke sio ki he nofo ʻa e kau taʻu hongofulu tupú he akó, tukuange ʻe he ngaahi husepānití honau fāmilí, pea liʻaki ʻe he ngaahi faʻeé ʻenau fānaú. ʻI he tuʻunga ko e kau Kalisitiané, ʻoku fiemaʻu ke tau fakaivimālohiʻi hotau nimá koeʻuhi ke kātakiʻi ʻa e ngaahi ʻahiʻahi ʻoku tau fehangahangai mo ia ʻi heʻetau ngāue ki he ʻOtuá. (Mātiu 24:13) ʻI hono fai iá, ʻoku tau ʻai ai ʻa e loto ʻo Sihová ke fiefia.​—Palovepi 27:11.

Founga ʻOku Fakaivimālohiʻi Ai ʻa e Nimá

Ko e kau Siu ʻi he ʻaho ʻo ʻĒselá naʻe fiemaʻu ke fakaivimālohiʻi honau nimá koeʻuhi ke fakakakato ʻa hono toe langa ʻo e temipale ʻo Sihova ʻi Selusalemá. Naʻe anga-fēfē hono fakaivimālohiʻi honau nimá? ʻOku pehē ʻe he fakamatalá: “O nau fai ae katoaga oe ma tae fakalevani i he aho e fitu i he fiefia lahi: he nae fakafiefiaʻi akinautolu e Jihova, o ne fakatafoki ae loto oe tuʻi o Asilia kiate kinautolu, ke fakamalohi ho nau nima i he gaue oe fale oe Otua, koe Otua o Isileli.” (Esela 6:​22, PM) ʻOku hā mahino, ko hono ivi ngāué naʻe langaʻi ai ʻe Sihova ʻa e “tuʻi o Asilia” ke fakaʻatā ʻa e kakai ʻa e ʻOtuá ke nau fokí, pea naʻá Ne ueʻi ʻa e laumālie ʻo e kakaí, koeʻuhi ke nau fakaʻosi ʻa e ngāue ne nau kamatá.

Ki mui ai, ʻi he taimi naʻe fiemaʻu ai ke monomono ʻa e ngaahi ʻā ʻo Selusalemá, naʻe fakaivimālohiʻi ʻe Nehemaia ʻa e nima ʻo hono fanga tokouá ki he ngāué. ʻOku tau lau: “Neu toki tala kiate kinautolu ae nima o hoku Otua aia nae hili lelei kiate au; bea moe gaahi lea ae tuʻi foki aia naa ne lea kiate au. Bea naa nau behe, Ke tau tuu hake bea laga. Koia naa nau fakamalohiʻi ho nau nima ki he gaue lelei ni.” ʻAki ʻa e nima kuo fakaivimālohiʻí, naʻe malava ai ʻa Nehemaia mo hono kaungā Siú ke toe langa ʻa e ngaahi ʻā ʻo Selusalemá ʻi ha ʻaho fakaofo ʻe 52!—Nehemaia 2:18; 6:​9, 15.

ʻI he founga meimei tatau, ʻoku fakaivimālohiʻi ʻe Sihova hotau nimá ke malangaʻi ʻa e ongoongo lelei ʻo e Puleʻangá. (Mātiu 24:14) ʻOkú ne fai ia ʻaki hono ‘fakakakato kitautolu ʻi he meʻa lelei fulipe ke tau ʻosiki hono finangaló.’ (Hepelu 13:21) Kuó ne tuku mai ki hotau nimá ʻa e ngaahi meʻa ngāue tuʻunga māʻolunga tahá. ʻOku tau maʻu ʻa e Tohitapú mo e ngaahi tohi makatuʻunga ʻi he Tohitapú, ngaahi makasini, ngaahi polosiua, ngaahi tuleki mo e ngaahi tepi pea mo e ngaahi vitiō kuo hiki ke tau ngāueʻaki ke aʻu ai ki he kakai takatakai ʻi he māmaní. Ko hono moʻoní, ʻoku ala maʻu ʻetau ʻū tohí ʻi he ngaahi lea laka hake he 380. Tānaki atu ki aí, fakafou ʻi he ngaahi fakataha ʻa e fakatahaʻangá, ngaahi ʻasemipilī, mo e ngaahi fakataha-lahí, ʻoku tokonaki mai ai ʻe Sihova ʻa e ako fakateokalatí mo e ako ki he founga ke ngāueʻaki ai ʻa e meʻangāue lelei ko ení ʻi hono fakahoko ʻetau ngāue fakafaifekaú.

Neongo ʻoku fakaivimālohi ʻe Sihova hotau nimá ʻi he ngaahi founga lahi ʻaupito, ʻokú ne toe ʻamanekina mai ke tau ngāue mālohi mo kitautolu. Manatuʻi ʻa e meʻa naʻe tala ʻe he palōfita ko ʻIlaisá kia Tuʻi Sōasi, ʻa ia naʻe haʻu kia ʻIlaisa ki ha tokoni ke tauʻi ʻa e kau tau fakatūʻuta Sīliá. Naʻe tala ʻe ʻIlaisa ki he tuʻí ke ne ʻave ha ngaahi foʻi ngahau ʻo taaʻi ʻaki ʻa e kelekelé. ʻOku pehē ʻe he fakamatala ʻa e Tohitapú: “Naa ne ta ia o liuga tolu bea tuku. Bea nae mamahi kiate ia ae tagata oe Otua, o ne behe, Nae totonu a hoo ta ke liuga nima be liuga ono; ka ne behe, behe kuo ke teia ae kakai Silia kae oua ke nau auha; ka koeni e tuo tolu be a hoo teia a Silia.” (2 Tuʻi 13:​18, 19, PM) ʻI he ʻikai lava ke ne ngāue mālohi faivelengá, naʻe lavameʻa fakangatangata pē ai ʻa Sōasi ʻi hono tauʻi ʻa e kau Sīliá.

ʻOku ngāueʻaki ʻa e tefitoʻi moʻoni tatau kia kitautolu kapau ʻoku tau loto ke fakahoko ʻa e meʻa kuo ʻomai ʻe Sihova ke tau faí. ʻI he ʻikai hohaʻa fekauʻaki mo e ngaahi fakafaingataʻaʻiaʻanga ʻoku ʻi hotau halá pe fekauʻaki mo e faingataʻa ʻe hoko nai ʻi hotau vāhenga-ngāué, ʻoku totonu ke tau fai ia ʻi he faivelenga mo e ʻaufuatō. ʻOku fiemaʻu ke tau fakaivimālohiʻi hotau nimá pea hanga kia Sihova ki ha tokoni.​—Aisea 35:​3, 4.

ʻE Fakaivimālohiʻi ʻe Sihova Hotau Nimá

ʻE ʻikai taʻemalava ke tokoniʻi mo fakaivimālohiʻi ʻe Sihova hotau nimá ke fai hono finangaló. Ko e moʻoni, ʻe ʻikai ke fakahoko ʻe he ʻOtuá ha mana pea fai ʻa e meʻa kotoa pē maʻatautolu. ʻOkú ne ʻamanekina mai ke tau fai ʻetau tafaʻakí—ʻo lau fakaʻaho ʻa e Tohitapú, teuteu mo maʻu tuʻumaʻu ʻa e ngaahi fakatahá, kau ki he ngāue fakafaifekaú ʻi he lahi taha ʻe malavá, pea lotu maʻu pē kiate ia. Kapau te tau fai loto-tōnunga mo tōtōivi ʻetau tafaʻakí lolotonga ʻetau maʻu ʻa e faingamālié, ʻe ʻomai ʻe Sihova kia kitautolu ʻa e mālohi ke fai ʻa e meʻa ʻokú ne ʻamanekina meia kitautolú.​—Filipai 4:​13.

Fakakaukau ki he tuʻunga ʻo ha Kalisitiane ʻa ia naʻe mole fakatouʻosi ʻa hono uaifí mo ʻene faʻeé ʻi he maté ʻi loto ʻi he taʻu ʻe tahá. Lolotonga ʻene kei mamahí kuo liʻaki ʻe hono ʻofefine-ʻi-he-fonó ia ʻa hono fohá pea liʻaki ʻa e founga moʻui faka-Kalisitiané. “Naʻá ku ako ai ʻe ʻikai lava ke tau fili hotau ngaahi ʻahiʻahí, ko e taimi te nau hoko aí pe ko e tuʻo lahi ʻo ʻene hokó,” ko e lau ia ʻa e tokouá ni. Naʻe anga-fēfē ʻene maʻu ʻa e mālohi ke hokohoko atú? “Ko e lotú mo e ako fakafoʻituituí kuo hoko ia ko ha sāketi kakau fakahaofi ʻokú ne kei fakamaʻanu hoku ʻulú ki ʻolunga ʻi he fukahi vaí. Pea ko e poupou ʻa hoku fanga tokoua mo e fanga tuofāfine fakalaumālié kuó ne ʻomai kiate au ʻa e fiemālie lahi. Hiliō he meʻa kotoa, kuó u hoko ʻo ʻiloʻi ʻa e mahuʻinga ʻo hono fakatupu ha vahaʻangatae lelei fakafoʻituitui mo Sihova ki muʻa ke malanga hake ʻa e ngaahi tuʻunga faingataʻá.”

Ko e hā pē ʻa e meʻa kuó ke hokosia ʻi he moʻuí, fakapapauʻi ke falala kakato kia Sihova pea ke ngāueleleiʻaki ʻa e tokonaki kotoa ʻokú ne ʻai ke fakaivimālohiʻi ʻaki ho nimá. Te ke malava leva ai ke fai ha ngāue kia Sihova ʻi he tuʻunga māʻolunga tahá pea ʻoatu ai ʻa e fakahīkihiki mo e fakalāngilangi ki hono huafa mahuʻingá.​—Hepelu 13:15.

[Fakatātā ʻi he peesi 31]

ʻI he taʻemalava ke ne ngāue faivelengá, naʻe maʻu pē ai ʻe Sōasi ʻa e lavameʻa fakangatangata ʻi hono tauʻi ʻa e kau Sīliá