Ko e ʻOhomohe ʻa e ʻEikí ʻOku ʻI Ai Hono ʻUhinga Lahi Kiate Koe

ʻOKU ʻi ai ha ʻuhinga mahuʻinga mo tuʻuloa kiate koe ʻa e ʻOhomohe ʻa e ʻEikí? Ke ʻiloʻi iá, tau ʻuluaki fakapapauʻi angé ʻa e ʻuhinga naʻe fakakaukau ai ʻa Sīsū Kalaisi ke ʻai ʻa e kātoanga makehe ko ení.

ʻI he efiafi ʻo Nīsani 14, 33 T.S., naʻe fakatahataha ai ʻa Sīsū Kalaisi mo ʻene kau ʻapositolo ʻe toko 12 ʻi ha loki ʻi ʻolunga ʻi Selusalema ke kātoangaʻi ʻa e Pāsova fakataʻú. Hili ʻenau kai e meʻakai ʻo e Pāsová, naʻe mavahe ai ʻa Siutasi lavaki mei he lokí ke lavakiʻi ʻa Sīsū. (Sione 13:​21, 26-30) Naʻe fokotuʻu ai ʻe Sīsū ki he toenga ʻo e kau ʻapositolo ʻe toko 11, ʻa e “ʻOhomohe ʻo e ʻEiki.” (1 Kolinito 11:20) ʻOku toe lave ki ai ko e Fakamanatu, koeʻuhí he naʻe fekauʻi ʻe Sīsū ʻa hono kau muimuí: “Fai eni koe fakamanatu kiate au.” Ko e kātoanga pē eni ʻe taha ʻoku fekau ki he kau Kalisitiané ke nau fakamanatú.—1 Kolinito 11:​24, PM.

Fakatatau ki he tikisinale Webster’s, ko ha fakamanatu ko e meʻa ia ʻoku tokoni “ke fakatolonga ʻa e manatú” pe “ʻokú ne tauhi ke moʻui ʻa e manatú.” ʻI he ngaahi feituʻu lahi, ʻoku fokotuʻu ai ʻe he kakaí ha maka fakamanatu pe fili ha ʻaho makehe ke fakamanatu ai, pe fai ha kātoanga, ki ha tokotaha pe ko ha meʻa ʻoku mahuʻinga. ʻI he tuʻunga ko ení naʻe fokotuʻu ai ʻe Sīsū ha kai fakamanatu—ko ha houa kai ʻe hoko ko ha tokoni ki he manatú, ʻo tokoniʻi ai ʻene kau ākongá ke fakatolonga ʻa ʻenau manatuʻi ʻa e ngaahi meʻa mātuʻaki mahuʻinga lahi ʻo e ʻaho mahuʻinga ko iá. Ki he ngaahi toʻutangata ka hoko maí, ko e kai fakamanatu ko ení ʻe fakamanatu ai ki he kau maʻu fakamanatú ʻa e ʻuhinga loloto ʻo e meʻa naʻe fai ʻe Sīsū ʻi he pō ko iá, tautefito ki he ongo fakaʻilonga naʻá ne ngāueʻakí. Ko e hā ʻa e ongo fakaʻilonga, pe ongo meʻa fakaefakatātā, naʻe ngāueʻaki ʻe Sīsuú, pea ko e hā hona ʻuhingá? Tau sivisiviʻi angé ʻa e fakamatala faka-Tohitapu ki he meʻa naʻe hoko ʻi he pō ko iá ʻi he 33 T.S.

Ongo Fakaʻilonga Toputapu

“Naʻa ne toʻo . . . ha foʻi ma, ʻo ne fakafetaʻi, mo ne pakipaki ʻo ʻange kiate kinautolu, ʻo ne pehē, [“ʻOku ʻuhinga eni ki,” NW ] hoku sino . . . ʻa ia ʻoku foaki koeʻuhi ko kimoutolu: mou fai ʻeni mōku fakamanatu.”—Luke 22:19.

ʻI hono toʻo ʻe Sīsū ʻa e foʻi maá peá ne pehē, “ʻoku ʻuhinga eni ki hoku sino,” naʻá ne fakahaaʻi ai ko e mā taʻelēvaní ko e fakafofonga ia, pe ko ha fakaʻilonga, ʻo hono sino fakakakano taʻeangahala ʻoʻoná, ʻa ia naʻá ne foaki “koeʻuhiā ko e moʻui ʻa māmani.” (Sione 6:51) Neongo ʻoku pehē ʻe he ngaahi liliu Tohitapu ʻe niʻihi “ko [faka-Kalisí, es·tinʹ] hoku sinó eni,” ʻoku pehē ʻe he Greek-English Lexicon of the New Testament ʻa Thayer ko e foʻi veape ko ení ʻoku faʻa ʻuhinga ia “ke fakahaaʻi, ʻuhinga, fakahuʻunga.” ʻOku fakahaaʻi ai ʻa e foʻi fakakaukau ʻo e fakafofongaʻi, pe fakaʻilongaʻi.​—Mātiu 26:26.

Naʻe tatau pē mo e ipu uainé. Naʻe pehē ʻe Sīsū: “Ko e ipu ni ko e fuakava foʻou ia ʻoku faiʻaki hoku toto, ʻa ia ʻoku lilingi koeʻuhi ko kimoutolu.”—Luke 22:20.

ʻI he fakamatala ʻa Mātiú, naʻe pehē ʻe Sīsū ʻi he fekauʻaki mo e ipú: “ʻOku ʻuhinga eni ko hoku ‘toto ʻo e fuakavá,’ ʻa ia ʻe lilingi maʻá e tokolahi ki he fakamolemole ʻo e ngaahi angahalá.” (Mātiu 26:​28, NW ) Naʻe ngāueʻaki ʻe Sīsū ʻa e uaine ʻi he ipú ko ha fakafofonga ia, pe fakaʻilonga, ʻo hono taʻataʻá tonu. Ko hono taʻataʻa ne lilingí naʻe pau ke hoko ia ko e makatuʻunga ʻo ha “fuakava foʻou” ki he kau ākonga pani ʻe he laumālié, ʻa ia te nau pule ko e ngaahi tuʻi mo e kau taulaʻeiki fakataha mo ia ʻi hēvaní.​—Selemaia 31:​31-​33; Sione 14:​2, 3; 2 Kolinito 5:5; Fakahā 1:​5, 6; 5:​9, 10; 20:​4, 6.

Ko e uaine ʻi he ipú ʻoku toe ngāue ia ko ha fakamanatu ko e taʻataʻa ʻo Sīsū ne lilingí ʻe hoko ia ko e makatuʻunga ki hono tokonaki mai ʻo e “fakamolemole ʻo e ngaahi angahalá,” ʻo fakaʻatā ai ʻa e hala ki he kau maʻu ʻinasí ke ui ki he moʻui fakahēvaní ʻi he tuʻunga ko e ngaahi kaungāʻea fakataha mo Kalaisi. ʻOku hā mahino, ko e faʻahinga ʻoku nau maʻu ʻa e ui fakahēvani ko ení—ko ha fika fakangatangata ia—ko e faʻahinga pē ia ʻoku nau maʻu ʻinasi ʻi he maá pea mo e uainé ʻi he Fakamanatú.​—Luke 12:32; Efeso 1:​13, 14; Hepelu 9:​22; 1 Pita 1:​3, 4.

Fēfē leva ʻa e kau muimui kotoa ko ia ʻo Sīsū ʻoku ʻikai te nau ʻi he fuakava foʻoú? Ko e “fanga sipi kehe” eni ʻa e ʻEikí, ʻa ia ʻoku nau hanga atu, ʻo ʻikai ke pule fakataha mo Kalaisi ʻi hēvani, ka ke maʻu ʻa e moʻui taʻengatá ʻi ha māmani palataisi. (Sione 10:16; Luke 23:43; Fakahā 21:​3, 4) ʻI he tuʻunga “ko e fuʻu kakai lahi” ʻo e kau Kalisitiane loto-tōnunga ʻoku nau “tauhi [ki he ʻOtuá] . . . ʻi he ʻaho mo e po,” ʻoku nau fiefia ke hoko ko e kau mamata loto houngaʻia ʻi he ʻOhomohe ʻa e ʻEikí. Ko hono moʻoní, ko ʻenau ngaahi leá mo e ngāué ʻoku fakahaaʻi ai: “Ko hotau fakamoʻui ʻoku mei hotau ʻOtua, ʻa ia ʻoku ʻafio ʻi he taloni, pea mei he Lami.”—Fakahā 7:​9, 10, 14, 15.

Tuʻo Fiha?

“Fai ʻeni mōku fakamanatu.”—Luke 22:19.

ʻOku totonu ke tuʻo fiha ʻa hono kātoangaʻi ʻa e Fakamanatú koeʻuhi ke fakatolonga ʻa hono manatuʻi ʻo e pekia ʻa Kalaisí? Naʻe ʻikai ke tala papau ia ʻe Sīsū. Kae kehe, koeʻuhi naʻá ne fokotuʻu ʻa e Kai Efiafi ʻa e ʻEikí ʻi Nīsani 14, ʻa e efiafi ʻo e Pāsová, ʻa ia naʻe kātoangaʻi fakataʻu ʻe he kau ʻIsilelí, ʻoku hā mahino naʻe fakataumuʻa ʻa Sīsū ki he Fakamanatú ke fakamanatu ia ʻi he founga tatau. Koeʻuhi naʻe kātoangaʻi fakataʻu ʻe he kau ʻIsilelí honau fakahaofi mei he nofo pōpula ʻi ʻIsipité, ʻoku fakamanatu fakataʻu ʻe he kau Kalisitiané honau fakatauʻatāinaʻi mei he pōpula ki he angahalá mo e maté.​—Ekisoto 12:​11, 17; Loma 5:​20, 21.

Ko e foʻi fakakaukau ki ha ouau fakataʻu ke fakamanatuʻaki ha meʻa mahuʻinga naʻe hokó ʻoku ʻikai moʻoni ke ngalikehe ia. Ko e fakatātaá, fakakaukau atu, ki he taimi ʻoku fakafiefiaʻi ai ʻe ha ongo meʻa ʻa e ʻaho fakamanatu ʻo ʻena malí pe ki he taimi ʻoku fakamanatu ai ʻe ha puleʻanga ha meʻa mahuʻinga ʻi hono hisitōliá. ʻOku faʻa fai ʻa e fakamanatú tuʻo taha ʻi he taʻu ʻi he ʻaho fakamanatu ʻo e meʻa ko iá. ʻOku mahuʻingá, ʻi he ngaahi senituli hili ʻa Kalaisí, ko e kau Kalisitiane lau tokolahi naʻe ui kinautolu ko e Kau Kuatatesimani, ko hono ʻuhingá ko e “Kau Hongofulu-mā-fā,” koeʻuhi naʻa nau fakamanatu ʻa e pekia ʻa Sīsuú ʻo tuʻo taha ʻi he taʻu, ʻi Nīsani 14.

Faingofua ka ʻOku Mahuʻinga

Naʻe fakamatalaʻi ʻe he ʻapositolo ko Paulá ko hono kātoangaʻi ʻa e ʻOhomohe ʻa e ʻEikí ʻe ʻai ai ke malava ʻa e kau ākonga ʻa Sīsuú ke nau “[hanganaki] fakaha ʻa e pekia ʻa e ʻEiki.” (1 Kolinito 11:26) Ko ia ai, ko e fakamanatu ko ení ʻe fakahangataha ia ki he ngafa mahuʻinga naʻe maʻu ʻe Sīsū, ʻi heʻene pekiá, ʻi hono fakahoko ʻa e taumuʻa ʻa e ʻOtuá.

ʻI heʻene loto-tōnunga ʻo aʻu ki he pekiá, naʻe fakatonuhiaʻi ai ʻe Sīsū Kalaisi ʻa Sihova ko e ʻOtuá ko ha Tokotaha-Fakatupu poto mo ʻofa ia mo ha Hau māʻoniʻoni. ʻI he kehe mei he ngaahi taukaveʻi ʻa Sētané pea ʻi he ʻikai tatau mo ʻĀtamá, naʻe fakamoʻoniʻi ʻe Sīsū ʻoku malava ki ha tangata ke loto-tōnunga ai pē ki he ʻOtuá, naʻa mo e ʻi he malumalu ʻo e ngaahi tenge tōtuʻá.​—Siope 2:​4, 5.

ʻOku toe fakatolonga ʻe he ʻOhomohe ʻa e ʻEikí ha manatu loto-hounga ki he ʻofa feilaulauʻi-kita ʻa Sīsuú. Neongo ʻa e ngaahi ʻahiʻahi fefeká, naʻe talangofua haohaoa ai pē ʻa Sīsū ki heʻene Tamaí. Naʻá ne malava leva ai ke ʻoatu ʻa ʻene moʻui fakaetangata haohaoá tonu ke ʻufiʻufiʻaki ʻa e totongi lahi ʻo e angahala ʻa ʻĀtamá. Hangē ko ia naʻe fakamatalaʻi tonu ʻe Sīsuú, naʻá ne haʻú “ke tuku ʻene moʻui ke huhuʻiʻaki ha tokolahi, heʻene fetongi kinautolu.” (Mātiu 20:28) Ko ia ai, ko e faʻahinga kotoa ʻoku tui kia Sīsuú ʻe lava ke fakamolemoleʻi ʻenau ngaahi angahalá pea maʻu ʻa e moʻui taʻengatá ʻi he fehoanaki mo e muʻaki taumuʻa ʻa Sihova ki he faʻahinga ʻo e tangatá.​—Loma 5:​6, 8, 12, 18, 19; 6:​23; 1 Timote 2:​5, 6.a

Ko e meʻá ni kotoa ʻoku toe fakamamafaʻi ai ʻa e anga-lelei lahi mo e ʻaloʻofa maʻataʻatā ʻa Sihova ʻi hono fai ʻa e tokonaki ki he fakamoʻui ʻo e faʻahinga ʻo e tangatá. ʻOku pehē ʻe he Tohitapú: “Ko eni ia ʻa e meʻa kuo fakaha ai ʻa e ʻofa ʻa e ʻOtua ʻiate kitautolu, ʻa e fekau atu ki mamani ʻe he ʻOtua hono ʻAlo tofu-pe-taha-ne-fakatupu, koeʻuhi ke tau moʻui ʻiate ia. Ko eni ia ʻa e meʻa ʻoku ʻi ai ʻa ʻOfa, ʻo ʻikai ko e pehe naʻa tau feia ha ʻofa ki he ʻOtua ʻe kitautolu, ka ko ʻene ʻofaʻi kitautolu ʻe he ʻEne ʻAfio, mo ne fekau atu hono ʻAlo moʻo fakatupuhōifuaʻanga koeʻuhi ko ʻetau ngaahi hia.”—1 Sione 4:​9, 10.

ʻIo, ko ha kātoanga fisifisimuʻa moʻoni ē ko e Fakamanatú! ʻOku faingofua mo ala fakahoko feʻunga ke fakamanatu ʻi māmani lahi ʻi he malumalu ʻo ha ngaahi tuʻunga lahi, neongo ia ʻoku fakaefakaʻilonga feʻunga ke hoko ai pē ko ha meʻa fakamanatu mohu ʻuhinga ʻi ha vahaʻa taimi lōloa.

Ko Hono ʻUhinga Kiate Koé

Ko e pekia fakaefeilaulau ʻa hotau ʻEiki ko Sīsū Kalaisí naʻe fai ia ʻi he mole lahi kiate ia mo ʻene Tamai ko Sihová. ʻI he tuʻunga ko ha tangata haohaoá, naʻe ʻikai ke fehangahangai ʻa Sīsū mo e mate tukufakaholó ʻo hangē ko e kotoa ʻo kitautolú. (Loma 5:​12; Hepelu 7:​26) Naʻe mei malava ke ne moʻui ai pē ʻo taʻengata. Naʻe ʻikai mei lava ke toʻo ʻene moʻuí, naʻa mo hono fakamālohiʻi, ka ne ʻikai ʻene fakaʻatā iá. Naʻá ne pehē: “Talaʻehai ko e faʻao [ʻeku moʻuí] ʻe ha taha meiate au, ka ko ʻeku ʻatu ia ʻe au.”—Sione 10:18.

Neongo ia, naʻe foaki loto-lelei ʻe Sīsū ʻa ʻene moʻui fakaetangata haohaoá ko ha feilaulau koeʻuhi “ko e meʻa ʻi heʻene mate, ke ne fakakaʻanga ʻa e toko taha ʻa ia ʻoku aʻana ʻa e malohi ʻo e mate, ʻa ia ko e Tevolo. Pea ke ne fakatauʻataina ʻa e faʻahinga ko ia kotoa pe kuo nau moʻui ʻaki ʻa e nofo popula, heʻenau manavahe ki he mate.” (Hepelu 2:​14, 15) Ko e ʻofa feilaulauʻi-kita ʻa Kalaisí ʻoku fakamoʻoniʻi lahi ange ia ʻi he founga ʻo e pekia ʻa ia naʻá ne fakamoʻulaloa tonu ia ki aí. Naʻá ne lāuʻilo lahi ki he founga te ne faingataʻaʻia ai pea maté.​—Mātiu 17:22; 20:​17-​19.

ʻOku toe fakamanatu mai kia kitautolu ʻe he Fakamanatú ʻa e fakahāhā lahi taha ʻo e ʻofa kuo fai ʻe heʻetau Tamai fakahēvaní, ʻa Sihova. He fakamamahi ē kiate ia, ʻa ia “oku aloofa aubito . . . bea manavaofa,” ke fanongo mo sio ki he “fuʻu kalanga, mo e tangi loʻimata” ʻa Sīsū ʻi he ngoue Ketisemaní, ko e uipi fakamamahí, ko e tutuki langa mamahí, pea mo e mate māmālie langa fakaʻuliá. (Semisi 5:​11, PM; Hepelu 5:7; Sione 3:​16; 1 Sione 4:​7, 8) Ko e foʻi fakakaukau atu pē ki ai naʻa mo e ʻi he taimi ní, hili ia ha laui senituli, ʻoku fakatupunga ai ʻa e mamahi fakaeongo ki he tokolahi.

Feinga ke fakakaukauloto atu ki he totongi ʻe Sihova ko e ʻOtuá mo Sīsū Kalaisi ha fuʻu totongi lahi pehē maʻatautolu kau angahalá! (Loma 3:​23) ʻOku tau fehangahangai ʻi he ʻaho kotoa pē mo e moʻoni fakamamahi ʻo hotau natula angahalaʻiá mo ʻetau ngaahi taʻehaohaoá. Kae kehe, makatuʻunga ʻi he tui ki he feilaulau huhuʻi ʻa Sīsuú, ʻe lava ke tau kōlenga ki he ʻOtuá ki ha fakamolemole. (1 Sione 2:​1, 2) ʻOku ʻai ʻe he meʻá ni ke tau malava ai ʻo maʻu ʻa e tauʻatāina ʻo e lea ki he ʻOtuá fakataha mo ha konisēnisi maʻa. (Hepelu 4:​14-​16; 9:​13, 14) Ko e toe meʻa ʻe taha, ʻe lava ke tau maʻu ʻa e ʻamanaki ʻo e moʻui ʻi ha māmani palataisi ʻi he kotoa ʻo ʻitānití. (Sione 17:3; Fakahā 21:​3, 4) Ko e ngaahi meʻá ni mo e ngaahi tāpuaki lahi kehe ko e ngaahi ola kotoa ia ʻo e ngāue lahi taha ʻo e feilaulauʻi-kita ʻa Sīsuú.

Fakahāhā ʻa e Houngaʻia ki he ʻOhomohe ʻa e ʻEikí

Ko e ʻOhomohe ʻa e ʻEikí ʻoku ʻikai ha veiveiua ko ha fakahāhā fisifisimuʻa ia ʻo e “ofa lahi ae Otua.” Pea ko e tokonaki ʻa Sihova ko e ʻOtuá ʻo e feilaulau huhuʻí—naʻe ʻai ke malava ʻe he ʻofa feilaulauʻi-kita ʻa Sīsuú—ko e moʻoni ko ʻene “foaki [taʻetotongi] oku taefaalaua.” (2 Kolinito 9:​14, 15, PM ) ʻIkai ʻoku ueʻi ʻiate koe ʻe he ngaahi fakahāhā ko eni ʻo e anga-lelei ʻa e ʻOtuá fakafou ʻia Sīsū Kalaisí ha ongoʻi loloto mo tuʻuloa ʻo e fakamālō mo e houngaʻia?

ʻOku tau tuipau ʻoku pehē. Ko ia ai, ʻoku mau fakaafeʻi loto-māfana atu koe ke ke kau fakataha mo e Kau Fakamoʻoni ʻa Sihová ʻi hono kātoangaʻi ʻa e Fakamanatu ʻo e pekia ʻa Sīsuú. ʻI he taʻú ni ʻe fai ʻa e Fakamanatú ʻi he ʻaho Pulelulu, ʻo ʻEpeleli 16, hili e tō ʻa e laʻaá. Ko e Kau Fakamoʻoni ʻa Sihova ʻi ho feituʻú te nau fiefia ke fakahā atu ʻa e taimi tonu mo e feituʻu ki he kātoanga mahuʻinga taha ko ení.

[Fakamatala ʻi lalo]

[Puha/Fakatātā ʻi he peesi 6]

“KO HOKU SINO ʻENI” PE “ʻOKU ʻUHINGA ENI KI HOKU SINO” KO FĒ?

ʻI he pehē ʻe Sīsū, “Ko au ko e matapa,” mo e “Ko au ko e vaine moʻonia,” naʻe ʻikai ha taha ʻe fakakaukau ko ha matapā moʻoni pe ko ha vaine moʻoni ia. (Sione 10:7; 15:​1, fakaʻītali ʻamautolu.) ʻI he founga tatau, ʻi he hiki ʻe he The New Jerusalem Bible ʻa e lea ʻa Sīsū ʻo pehē: “Ko e ipú ni ko e fuakava foʻou,” ʻoku ʻikai te tau fakaʻosiʻaki ai ko e ipú tonu ko e fuakava foʻou moʻoní ia. Pehē foki, ʻi heʻene pehē ko e maá ‘ko’ hono sinó, ʻoku hā mahino mei ai ko e maá naʻe ʻuhinga ia, pe naʻá ne fakaʻilongaʻi, ʻa hono sinó. Ko ia, ko e liliu ʻa Charles B. Williams ʻoku pehē ai: “ʻOku fakafofongaʻi ʻe he meʻá ni ʻa hoku sinó.”​—Luke 22:​19, 20.

[Fakatātā ʻi he peesi 5]

Ko e mā taʻelēvaní mo e uainé ko e ongo fakaʻilonga feʻungamālie ia ʻo e sino taʻeangahala ʻo Sīsuú mo hono taʻataʻa ne lilingí

[Fakatātā ʻi he peesi 7]

Ko e Fakamanatú ko ha fakamanatu ia ʻo e ʻofa lahi naʻe fakahāhā ʻe Sihova ko e ʻOtuá mo Sīsū Kalaisí