Ko e Faʻahinga Tuʻu-ki-Muʻa Taha ʻo e ʻOfá

ʻI HE tafaʻaki lahi taha ʻo e Ngaahi Konga Tohitapu Faka-Kalisi Kalisitiané, pe Fuakava Foʻoú, ko e foʻi lea “ʻofa” ko ha liliu ia ʻo e foʻi lea faka-Kalisi ko e a·gaʹpe.

ʻI hono fakamatalaʻi ʻa e ʻuhinga ʻo e foʻi lea ko iá, ko e tohi maʻuʻanga fakamatala Insight on the Scripturesa ʻoku pehē ai: “Ko e [A·gaʹpe] ʻoku ʻikai ko e tuʻunga ia ʻo e ongoʻí, makatuʻunga ʻi ha pīkitai fakafoʻituitui pē, hangē ko ia ʻoku faʻa fakakaukau ki aí, ka ko ha ʻofa fakaeʻulungaanga pe fakasōsiale ia ʻoku makatuʻunga ʻi he felotoi hangatonu ʻa e lotó ʻi he tuʻunga ko ha tefitoʻi moʻoni, fatongia, mo e tōʻonga, ʻi he kumi loto-moʻoni ki he lelei ʻa e tokotaha kehé ʻo fakatatau ki he meʻa ʻoku totonú. Ko e A·gaʹpe (ʻofá) ʻoku fakalaka ia ʻi he ngaahi tāufehiʻa fakafoʻituituí, ʻo ʻikai ʻaupito fakaʻatā ʻa e ngaahi meʻá ni ke ne fakatupunga ha taha ke ne liʻaki ʻa e ngaahi tefitoʻi moʻoni totonú pea ke fetongiʻaki ʻa e meʻa tatau.”

ʻOku toe lava ke kau ʻi he A·gaʹpe ʻa e ongoʻi loloto. “Ke mou tauhi ai pe hoʻomou feʻofaʻaki [a·gaʹpe] ke tukuingata,” ko e enginaki ia ʻa e ʻapositolo ko Pitá. (Fakaʻītali ʻamautolu; 1 Pita 4:8) Ko ia ai, ʻe lava ke pehē ʻoku fekauʻaki ʻa e a·gaʹpe mo e lotó pea pehē ki he ʻatamaí. Ko e hā ʻoku ʻikai lāulea ai ki he ngaahi konga Tohitapu ʻe niʻihi ʻoku fakahaaʻi ai ʻa e mālohi mo e lahi ʻo e founga tuʻu-ki-muʻa ko eni ʻo e ʻofá? ʻE tokoni nai ʻa e ngaahi maʻuʻanga fakamatala ko ení: Mātiu 5:​43-​47; Sione 15:​12, 13; Loma 13:​8-​10; Efeso 5:​2, 25, 28; 1 Sione 3:​15-​18; 4:​16-​21.

[Fakamatala ʻi lalo]