Tokoniʻi ʻa e Niʻihi Kehé Ke Nau Tali ʻa e Pōpoaki ʻo e Puleʻangá
“Behe e Akiliba kia Baula, Kuo ke meimei fakahehemaʻi [“fakalotoʻi,” NW] au keu hoko koe Kalisitiane.”—Ngāue 26:28, PM.
1, 2. Naʻe anga-fēfē ʻa e hoko ʻo hā ʻa e ʻapositolo ko Paulá ʻi he ʻao ʻo Kōvana Fesito mo Tuʻi Hēlota ʻAkilipa II?
ʻI SESALIA ʻi he 58 T.S., naʻe ʻaʻahi ai ki he kōvana Loma ko Pōsio Fesitó ʻa Tuʻi Hēlota ʻAkilipa II mo hono tuofefiné ko Pelenaise. ʻI he fakaafe ʻa Kōvana Fesitó, naʻa nau haʻu ʻaki ʻa e “teuga lahi aubito, o hu ki he botu fakamāu, moe gaahi eiki tau, moe kau matābule oe kolo.” ʻI he tuʻutuʻuni ʻa Fesitó, naʻe ʻomai ai ʻa e ʻapositolo Kalisitiane ko Paulá ki honau ʻaó. Naʻe anga-fēfē ʻa e hoko ʻo tuʻu ai ʻa e tokotaha muimui ko ʻeni ʻo Sīsū Kalaisí ʻi he ʻao ʻo e nofoʻa fakamaau ʻo Kōvana Fesitó?—Ngāue 25:13-23, PM.
2 Ko e meʻa naʻe tala ʻe Fesito ki heʻene kau fakaafé ʻokú ne ʻomai ha tali ki he fehuʻi ko iá. Naʻá ne pehē: “ʻE Kingi Akilipa, mo kimoutolu Matāpule ʻoku tau hahaʻo ni, ko e toko taha ko eni ʻoku mou meʻa ki ai, ko ia ia kuo fakafiu ai kiate au ʻe he kakai Siu katokātoa ʻi Selusalema mo ʻeni foki, ko ʻenau kalanga ʻoku ʻikai totonu ke ne moʻui. Ka ko au naʻe ʻikai te u tokangaʻi haʻane meʻa oku tāu mo e mate; kaeʻumaʻā naʻe unga ʻe ia, ʻa e tangata ni, kia Akosito: ko ia naʻa ku tuʻutuʻuni ke tuku atu ia ki ai. Ka ʻoku ʻikai haʻane meʻa ʻoku ou maʻu pau ke tohi ki hoku ʻeiki: ko ia kuo u ʻomi ia kiate kimoutolu, kaeʻumaʻā kiate koe, ʻe Kingi Akilipa, heiʻilo, ʻo ka ʻosi hoʻomou ʻeke, pea ai haʻaku meʻa ke tohi. He ʻoku ha matamata kehe kiate au, ke tuku atu ha popula, ʻo ʻikai ʻalu mo ia ha kiʻi fakamatala ki he ngaahi meʻa ʻoku lau kiate ia.”—Ngāue 25:24-27.
3. Ko e hā naʻe fai ai ʻe he kau taki lotú ha ngaahi tukuakiʻi ʻo Paulá?
3 ʻOku fakahaaʻi ʻe he ngaahi lea ʻa Fesitó naʻe fehangahangai ʻa Paula mo e ngaahi tukuakiʻi loi ʻo e feinga ke fakatupu angatuʻu—ko ha hia naʻe tautea mate. (Ngāue 25:11) Kae kehe, naʻe tonuhia ʻa Paula ia. Naʻe tupu ʻa e ngaahi tukuakiʻí ia mei he meheka ʻa e kau taki lotu ʻi Selusalemá. Naʻa nau fakafepakiʻi ʻa e ngāue ʻa Paula ko ha tokotaha fanongonongo ʻo e Puleʻangá pea mo loto-mamahi lahi ʻi heʻene tokoniʻi ʻa e niʻihi kehé ke hoko ko e kau muimui ʻo Sīsū Kalaisí. ʻI he malumalu ʻo e leʻohi fefeká, naʻe ʻomai ai ʻa Paula mei Selusalema ki he kolo taulanga ʻo Sesaliá, ʻa ia naʻá ne tangi ai kia Sisa. Naʻe ʻave leva ia mei ai ki Loma.
4. Ko e hā ʻa e lea fakaʻohovale naʻe fai ʻe Tuʻi ʻAkilipá?
4 Sioloto atu kia Paula ʻi he palasi ʻo e kōvaná ʻi he ʻao ʻo ha kulupu ʻoku kau ai ʻa e pule ʻo ha konga mahuʻinga ʻo e ʻEmipaea Lomá. ʻOku hanga hake ʻa Tuʻi ʻAkilipa kia Paula ʻo ne pehē: “Oku tuku kiate koe ke ke fakamatala.” ʻI he lea ʻa Paulá, ʻoku hoko leva ha meʻa ngalikehe. Ko e meʻa ʻoku leaʻaki ʻe Paulá ʻoku kamata ke ne ueʻi ʻa e tuʻí. Ko hono moʻoní, ʻoku pehē ʻe Tuʻi ʻAkilipa: “Kuo ke meimei fakahehemaʻi [“fakalotoʻi,” NW] au keu hoko koe Kalisitiane.”—Ngāue 26:1-28, PM.
5. Ko e hā naʻe mātuʻaki ola lelei ai ʻa e ngaahi lea ʻa Paulá kia ʻAkilipá?
5 Fakakaukau angé! Ko e ola ʻo e taukapo pōtoʻi ʻa Paulá, naʻe ueʻi ai ha pule ʻe he mālohi ʻa e hūhū ʻo e Folofola ʻa e ʻOtuá. (Hepelu 4:12) Ko e hā naʻe mātuʻaki ola lelei ʻi he taukapo ʻa Paulá? Pea ko e hā ʻoku malava ke tau ako meia Paula ʻe lava ke ne tokoniʻi kitautolu ʻi heʻetau ngāue ngaohi-ākongá? Kapau te tau ʻanalaiso ʻene taukapó, ʻoku eʻa māʻalaʻala mei ai ʻa e ongo meʻa tefito ʻe ua: (1) ʻI he fakamalanga ʻa Paulá naʻe fakatupu fakalotoʻi. (2) Naʻá ne ngāue pōtoʻi ʻaki ʻa ʻene ʻilo mei he Folofola ʻa e ʻOtuá, hangē pē ko hono ngāue ola lelei ʻaki ʻe ha tufunga poto ha meʻangāué.
Ngāueʻaki ʻa e Pōtoʻi ʻi he Fakalotoʻí
6, 7. (a) Hangē ko ia ko hono ngāueʻaki ʻi he Tohitapú, ko e hā ʻa e ʻuhinga ʻo e “fakalotoʻí”? (e) Ko e hā ʻa e ngafa ʻoku fakahoko ʻe he fakalotoʻí ʻi hono tokoniʻi ʻa e niʻihi kehé ke nau tali ha akonaki ʻa e Tohitapú?
6 ʻI he tohi Ngāué, ko e ngaahi foʻi lea faka-Kalisi ki he fakalotoʻí ʻoku toutou ngāueʻaki ia ʻi he fekauʻaki mo Paulá. Ko e hā ʻa e kaunga ʻa e meʻá ni ki heʻetau ngāue ngaohi-ākongá?
7 ʻI he muʻaki lea ʻo e Ngaahi Konga Tohitapu Faka-Kalisi Kalisitiané, ʻoku ʻuhinga ʻa e “fakalotoʻí” ke “ikunaʻi mai” pe ke fakahoko “ha liliu ʻo e fakakaukaú ʻaki ʻa e tākiekina ʻa e fakaʻuhingá pe ngaahi fakakaukau fakamōlalé,” ko e lau ia ʻa e Expository Dictionary of New Testament Words ʻa Vine. ʻI hono sivisiviʻi ʻa e ʻuhinga tefitó ʻokú ne ʻomai ha toe fakamaama. ʻOkú ne ʻomai ʻa e foʻi fakakaukau ʻo e falala. Ko ia ai, kapau te ke fakalotoʻi ha taha ke ne tali ha akonaki ʻa e Tohitapú, kuó ke ikunaʻi mai ʻene falalá, koeʻuhi ke ne tui ki he moʻoni ʻo e akonaki ko iá. ʻOku hā mahino, ʻoku ʻikai ke feʻunga pē ke tala ki ha taha ʻa e meʻa ʻoku leaʻaki ʻe he Tohitapú koeʻuhi ke ne tui ki ai mo ngāue ki ai. Kuo pau ke tuipau hoʻo tokotaha fanongó ko e meʻa ʻokú ke leaʻakí ʻoku moʻoni, tatau pē pe ko e tokotaha ko iá ko ha kiʻi leka, ko ha kaungāʻapi, ko ha kaungāngāue, ko ha kaungāako, pe ko ha kāinga.—2 Timote 3:14, 15.
8. Ko e hā ʻoku kau ʻi hono fakatuipauʻi ha taha ki ha moʻoni Fakatohitapu?
8 ʻE malava fēfē ke ke fakatuipauʻi ha taha ko e meʻa ʻokú ke fanongonongo mei he Folofola ʻa e ʻOtuá ko e moʻoni? ʻAki ʻa e fakaʻuhinga totonu, fakaʻuhinga lelei, mo e kōlenga fakamātoató, naʻe feinga ʻa Paula ke fakahoko ai ha liliu ʻi he fakakaukau ʻa e faʻahinga tāutaha ko ia naʻá ne malanga ki aí.a Ko ia ai, ʻi he ʻikai ko hono talaki atu pē ko e meʻá ʻoku moʻoní, ʻoku fiemaʻu ke ke ʻoatu ʻa e fakamoʻoni fakafiemālie ke poupouʻiʻaki hoʻo fakamatalá. ʻE anga-fēfē nai hono fai ʻení? Fakapapauʻi ko hoʻo fakamatalá ʻoku makatuʻunga fefeka ʻi he Folofola ʻa e ʻOtuá kae ʻikai ʻi he fakakaukau fakafoʻituituí. Pehē foki, ngāueʻaki ha fakamoʻoni fakalahi ke poupouʻiʻaki hoʻo fakamatala Fakatohitapu mei he lotó. (Palovepi 16:23) Hangē ko ʻení, kapau ʻokú ke fakahaaʻi ko e faʻahinga talangofua ʻo e tangatá te nau fiefia ʻi he moʻui ʻi ha māmani palataisi, poupouʻi ʻa e fakamatala ko iá ʻaki ha fakamatala Fakatohitapu, hangē ko e Luke 23:43 pe Aisea 65:21-25. ʻE malava fēfē ke ke fakalahi atu ha fakamoʻoni ki hoʻo poini Fakatohitapú? Te ke ngāueʻaki nai ha ngaahi fakatātā mei he meʻa ʻoku hokosia ʻe hoʻo tokotaha fanongó. ʻE lava ke ke fakamanatu kiate ia ha ngaahi tuʻunga fakaholomamata maʻamaʻa mo ʻikai hano totongi ʻa ia ʻoku haʻu mei he fakaʻofoʻofa ʻo e tō hifo ʻa e laʻaá, ko e namu lelei ʻo ha matalaʻiʻakau, ko e ifo ʻo hano ʻahiʻahiʻi ʻo ha fuaʻiʻakau, pe ko e fiefia ʻi he mamata ki ha faʻē-manupuna ʻokú ne fafanga hono ʻuhikí. Tokoniʻi ia ke ne sio ko e ngaahi tuʻunga fakaholomamata peheé ko e fakamoʻoni ia ʻoku fiemaʻu ʻe he Tokotaha-Fakatupú kitautolu ke tau fiefia ʻi he moʻui ʻi he māmaní.—Koheleti 3:11, 12.
9. ʻE lava fēfē ke tau fakahāhā ʻa e anga-fakaʻatuʻí ʻi heʻetau ngāue fakamalangá?
9 ʻI he feinga ke fakalotoʻi ha taha ke ne tali ha akonaki faka-Tohitapu pau, tokanga ke ʻoua naʻa hanga ʻe hoʻo loto-māfaná ʻo fakatupunga koe ke ke ongo ngali fakamatematē, ʻo toʻo ai ʻa e mahuʻingaʻia ʻa hoʻo tokotaha fanongó. Ko e tohi Ako Fakafaifekau ʻokú ne ʻomai ʻa e fakatokanga ko ʻení: “Ko hano fakamatalaʻi hangatonu ʻo e moʻoní ʻa ia ʻoku fakaeʻa ai ʻoku hala ha tui ʻa ia ʻoku koloaʻaki ʻe ha tokotaha ʻe taha, neongo ʻoku poupouʻiʻaki ia ʻa hono fakalau ʻo ha lisi lōloa ʻo e ngaahi Konga Tohitapú, ʻoku ʻikai ke tali lelei fakalūkufua ia. Ko e fakatātaá, kapau ʻoku fakahalaʻi pē ʻa e ngaahi kātoanga manakoá ʻi he pehē ʻoku fakapangani ʻa hono tupuʻangá, ʻe ʻikai nai liliu ʻe he meʻá ni ʻa e anga ʻo e ongoʻi ʻa e kakai kehé ʻo fekauʻaki mo iá. Ko ha fakaofiofi ʻi he fai ʻo e fakaʻuhingá ʻoku faʻa lavameʻa ange ia.” Ko e hā ʻoku totonu ai ke tau fai ha feinga fakataha ke hoko ʻo fakaʻatuʻí? ʻOku pehē ʻe he tohi akó: “Ko ha founga ʻoku fai fakaʻuhingá ʻoku fakaʻaiʻai ai ʻa e lāuleá, ʻoange ai ʻa e meʻa ki he kakaí ke nau fakakaukau fekauʻaki mo ia ʻamui, pea fakaʻatā ai ʻa e faingamālie ki ha ngaahi fetalanoaʻaki ʻi he kahaʻú. ʻE lava ke hoko ia ko e fakaʻaiʻai mālohi.”—Kolose 4:6.
Fakalotoʻi ʻOku Ueʻi Ai ʻa e Lotó
10. ʻI he founga fē naʻe fakahoko atu ai ʻe Paula ʻene taukapó ʻi he ʻao ʻo ʻAkilipá?
10 Tau fai ange ha vakai ofi ki he ngaahi lea taukapo ʻa Paulá ʻi he Ngāue vahe 26. Fakatokangaʻi ʻa e founga naʻá ne kamataʻaki ʻene fakamalangá. Ke kamata ʻene tuʻunga-leá, naʻe ʻilo ʻe Paula ha makatuʻunga fakalao ʻa ia ʻe fakaongoongoleleiʻi ai ʻa ʻAkilipa, neongo naʻe ʻi ai ha vahaʻangatae fakamā ʻo e tuʻí mo hono tuofefine ko Pelenaisé. Naʻe pehē ʻe Paula: “E tuʻi ko Akiliba, oku ou behe oku ou monuia, i he eku fakamatala maaku i ho ao i he aho ni, ae mea kotoabe oku talatalaakiʻi ai au e he kakai Jiu: Bea ajili be koeuhi oku ke boto i he gaahi gaue moe gaahi mea kotoabe oku eke i he kakai Jiu: koia oku ou kole kiate koe, ke ke kataki be, o fanogo kiate au.”—Ngāue 26:2, 3, PM.
11. Naʻe anga-fēfē hono fakahāhā ʻe he ngaahi lea ʻa Paula kia ʻAkilipá ʻa e fakaʻapaʻapá, pea ko e hā ʻa e ʻaonga naʻe hoko aí?
11 Naʻá ke fakatokangaʻi naʻe fakahaaʻi ʻe Paula ʻa e lakanga māʻolunga ʻo ʻAkilipá ʻaki ʻene lave kiate ia ʻi hono hingoa fakalakanga ko e Tuʻí? Naʻe fakahaaʻi ʻe he meʻá ni ʻa e fakaʻapaʻapa, pea ʻi heʻene filifili fakapotopoto ʻa e ngaahi foʻi leá, naʻe fai ai ʻe Paula ʻa e fakalāngilangi kia ʻAkilipa. (1 Pita 2:17) Naʻe lāuʻilo ʻa e ʻapositoló kia ʻAkilipa ko ha mataotao ʻi he ngaahi anga fakafonua mo e ngaahi lao fihi ʻa hono kakai Siú peá ne pehē naʻá ne fiefia ʻi heʻene malava ke fai ʻene taukapó ʻi he ʻao ʻo ha pule mohu ʻilo pehē. Ko Paulá, ko ha Kalisitiane, naʻe ʻikai te ne fai ha meʻa ke hangē ai naʻá ne ongoʻi ʻokú ne lelei ange ʻia ʻAkilipa, ʻa ia naʻe ʻikai ko ha Kalisitiané. (Filipai 2:3) ʻI hono kehé, naʻe kole ʻe Paula ki he tuʻí ke ne fanongo anga-kātaki ange kiate ia. Ko ia, naʻe fakatupu ʻe Paula ha ʻatimosifia ʻa ia ʻe ngalingali ange ai ke tali ʻe ʻAkilipa, pea pehē ki he kau fanongo kehé, ʻa e meʻa naʻá ne teu ke fakahaá. Naʻá ne fakatoka ha makatuʻunga, ko ha tuʻunga felotoi ke langa hake ai ʻene ngaahi fakaʻuhingá.
12. ʻI he ngāue fanongonongo ʻo e Puleʻangá, ʻe lava fēfē ke tau ueʻi ʻa e loto ʻo ʻetau kau fanongó?
12 Hangē pē ko e ʻi he ʻao ʻo ʻAkilipá ʻa Paulá, mei he lea kamata ki he fakamulituku ʻo ʻetau malanga fekauʻaki mo e pōpoaki ʻo e Puleʻangá, tau ʻai ha meʻa ke ne ueʻi ʻa e lotó. ʻE lava ke tau fai ʻeni ʻaki hono fakahāhā ʻa e fakaʻapaʻapa loto-moʻoni ki he tokotaha ko ia ʻoku tau malanga ki aí pea ʻi hono fakahāhā ʻa e mahuʻingaʻia moʻoni ʻi hono ʻātakaí tonu mo ʻene fakakaukaú.—1 Kolinito 9:20-23.
Ngāue Pōtoʻi ʻAki ʻa e Folofola ʻa e ʻOtuá
13. ʻE lava fēfē ke ke hangē ko Paulá ʻo ueʻi ʻa hoʻo kau fanongó?
13 Naʻe loto ʻa Paula ke ueʻi ʻa ʻene kau fanongó ke nau ngāue ʻo fakatatau ki he ongoongo leleí. (1 Tesalonaika 1:5-7) ʻI he taumuʻa ko iá, naʻá ne ueʻi honau lotó, ko e nofoʻanga ʻo e fakaueʻilotó. ʻI heʻetau toe foki ki he taukapo ʻa Paula ʻi he ʻao ʻo ʻAkilipá, fakatokangaʻi ʻa e founga hono hanga ʻe Paula ʻo ‘tofa totonu ʻa e folofola ʻa e ʻOtuá’ ʻaki ʻa e lave ki he ngaahi meʻa naʻe fakahaaʻi ʻe Mōsese mo e kau palōfitá.—2 Timote 2:15.
14. Fakamatalaʻi ʻa e founga naʻe ngāueʻaki ai ʻe Paula ʻa e fakalotoʻí ʻi heʻene ʻi he ʻao ʻo ʻAkilipá.
14 Naʻe ʻilo ʻe Paula ko ʻAkilipá naʻe Siu ʻi he hingoá pē. ʻI he tautapa ki he ʻilo ʻa ʻAkilipa ki he lotu faka-Siú, naʻe fakaʻuhinga ʻa Paula ʻo pehē ko ʻene malangá naʻe kau moʻoni ki ai ʻo “ikai ha mea kehe ka koia nae tala e he kau balofita mo Mosese e hoko mai” ʻo fekauʻaki mo e pekia pea mo e toetuʻu ʻa e Mīsaiá. (Ngāue 26:22, 23, PM) ʻI he lea fakahangatonu kia ʻAkilipá, naʻe ʻeke ʻe Paula: “E tuʻi ko Akilipa, oku ke tui ki he kau balōfita?” Naʻe fihia heni ʻa ʻAkilipa. Kapau naʻá ne pehē naʻá ne fakataleʻi ʻa e kau palōfitá, ʻe maumauʻi ai hono ongoongo ko ha tokotaha tui Siú. Ka ʻo kapau naʻá ne loto-taha mo e fakaʻuhinga ʻa Paulá, te ne ʻi he tuʻunga ai ʻo e felotoi fakahāhā mo e ʻapositoló pea ʻe ʻi he tuʻunga fakatuʻutāmaki ai ʻi hono ui ko ha Kalisitiané. Naʻe tali pē ʻe Paula ʻene fehuʻi ʻaʻaná, ʻo pehē: “Oku ou ilo oku ke tui.” Naʻe anga-fēfē hono hanga ʻe he loto ʻo ʻAkilipá ʻo ueʻi ia ke ne talí? Naʻá ne tali: “Kuo ke meimei fakahehemaʻi [“fakalotoʻi,” NW] au keu hoko koe Kalisitiane.” (Fakaʻītali ʻamautolu; Ngāue 26:27, 28, PM) Neongo naʻe ʻikai ke hoko ʻa ʻAkilipa ko ha Kalisitiane, ʻoku hā mahino naʻe ueʻi ʻe Paula hono lotó ki ha tuʻunga ʻaki ʻene pōpoakí.—Hepelu 4:12.
15. Naʻe anga-fēfē ʻa e malava ʻe Paula ke ne kamataʻi ha fakatahaʻanga ʻi Tesalonaiká?
15 Naʻá ke fakatokangaʻi naʻe ʻi ai fakatouʻosi ʻi he fakamalanga ʻa Paula fekauʻaki mo e ongoongo leleí ʻa e fanongonongó mo e fakalotoʻí? Koeʻuhi naʻe ngāueʻaki ʻe Paula ʻa e fakaofiofi ko iá ʻi heʻene ‘tofa totonu ʻa e folofola ʻa e ʻOtuá,’ ko e niʻihi naʻa nau fanongo kiate iá naʻa nau liliu mei he hoko ko e kau fanongo peé ʻo hoko ko e kau tui. Ko e meʻa ia naʻe hoko ʻi Tesalonaiká, ʻa ia naʻe kumi ai ʻa Paula ki he kau Siú mo e kau Senitaile manavahē-ʻOtua ʻi he sinakoké. ʻOku pehē ʻe he fakamatala ʻi he Ngāue 17:2-4 (NW): “Fakatatau ki he anga ʻo Paulá naʻá ne hū ki loto kiate kinautolu, pea ʻi he sāpate ʻe tolu naʻá ne fefakaʻuhingaʻaki mo kinautolu mei he ngaahi Konga Tohitapú ʻo fakamatalaʻi mo fakamoʻoniʻi ʻaki ʻa e ngaahi maʻuʻanga fakamatalá naʻe fiemaʻu kia Kalaisi ke ne faingataʻaʻia pea ke ne tuʻu hake mei he pekiá . . . Ko hono olá naʻe hoko ai ʻa e niʻihi ʻo kinautolu ko e kau tui.” Naʻe fakatupu fakalotoʻi ʻa Paula. Naʻá ne fakaʻuhinga, fakamatalaʻi, pea fakamoʻoniʻi ʻaki ʻa e ngaahi Konga Tohitapú ko Sīsū ʻa e Mīsaia naʻe talaʻofa fuoloa ki aí. Ko e olá? Naʻe fokotuʻu ai ha fakatahaʻanga ʻo e kau tuí.
16. ʻE malava fēfē ke ke maʻu ʻa e fiefia lahi ange ʻi hono fanongonongo ʻa e Puleʻangá?
16 ʻE lava ke ke hoko ʻo pōtoʻi ange ʻi he fai ʻo e fakalotoʻí ʻi hono fakamatalaʻi ʻa e Folofola ʻa e ʻOtuá? Kapau ko ia, te ke maʻu ʻa e lavameʻa mo e fiefia lahi ange ʻi hoʻo ngāue ko hono malangaʻi mo akoʻi ʻa e kakaí ʻo fekauʻaki mo e Puleʻanga ʻo e ʻOtuá. Kuo hokosia ʻeni ʻe he kau malanga ʻo e ongoongo leleí ʻa ia kuo nau ngāueʻaki ʻa e ngaahi fokotuʻu ke ngāueʻaki lahi ange ʻa e Tohitapú ʻi he ngāue fakamalangá.
17. Ke fakahāhaaʻi ʻa e ʻaonga ʻo hono ngāueʻaki ʻa e Tohitapú ʻi heʻetau ngāue fakafaifekaú, lave ki ha hokosia fakafoʻituitui pe ʻomai ʻa e kakano ʻo e meʻa ko ia ʻoku ʻi he palakalafi ko ʻení.
17 Ko e fakatātaá, naʻe tohi ʻe ha ʻovasia fefonongaʻaki ʻa e Kau Fakamoʻoni ʻa Sihová: “ʻOku tokolahi ha fanga tokoua mo e fanga tuofāfine ʻoku nau toʻotoʻo he taimí ni ha Tohitapu ʻi heʻenau faifakamoʻoni mei he matapā ki he matapaá. Kuo tokoniʻi ʻe he meʻá ni ʻa e kau malangá ke nau lau ha konga Tohitapu ki he tokolahi ʻo e kakai ko ia ʻoku nau fetuʻutaki mo iá. Kuo tokoniʻi fakatouʻosi ai ʻa e tokotaha-ʻapí mo e tokotaha malangá ke na fakafekauʻaki ʻa e Tohitapú, ʻo ʻikai ngata pē ʻi he ngaahi makasiní mo e ngaahi tohí, ki heʻetau ngāue fakafaifekaú.” Ko hono moʻoní, tatau ai pē pe ʻoku tau ʻai ʻa e Tohitapú ke hā ʻi he taimi ʻoku tau kau ai ʻi he ngāue fakamalangá ʻoku fakatuʻunga ia ʻi he ngaahi meʻa tefito kehekehe, ʻo kau ai ʻa e ngaahi tōʻonga fakalotofonuá. Ka neongo ia, ʻoku totonu ke tau loto ke tau maʻu ha ongoongo ʻi hono ngāue pōtoʻi ʻaki ʻa e Folofola ʻa e ʻOtuá ke fakalotoʻi ʻa e niʻihi kehé ke nau tali ʻa e pōpoaki ʻo e Puleʻangá.
Maʻu ʻa e Vakai ʻa e ʻOtuá ki he Ngāue Fakafaifekaú
18, 19. (a) ʻOku anga-fēfē ʻa e vakai mai ʻa e ʻOtuá ki heʻetau ngāue fakafaifekaú, pea ko e hā ʻoku totonu ai ke tau fakatupulekina ʻa e anga ʻene vakaí? (e) Ko e hā te ne tokoniʻi kitautolu ke fai ha ngaahi toe ʻaʻahi lavameʻá? (Sio ki he puha ʻoku fakakaveinga “Founga ke Hoko ʻo Lavameʻa Ai ʻi Hono Fai ʻa e Ngaahi Toe ʻAʻahí,” ʻi he peesi 16.)
18 Ko e toe founga ʻe taha ke aʻu ai ki he loto ʻo ʻetau kau fanongó ʻoku kau ki ai ʻa e sio ki he ngāue fakafaifekaú mei he anga ʻo e vakai ʻa e ʻOtuá pea hoko ʻo kātaki. Ko e finangalo ia ʻo e ʻOtuá ke hoko ʻa e faʻahinga kotoa pē ʻo “aʻusia ʻa e ʻilo kanokano ki he moʻoni.” (1 Timote 2:3, 4) ʻIkai ko ʻetau fakaʻamú ia? ʻOku toe kātaki ʻa Sihova, pea ko ʻene kātakí ʻoku ʻoange ai ʻa e ngaahi faingamālie ki he tokolahi ke nau aʻusia ʻa e fakatomalá. (2 Pita 3:9) Ko ia ai, ʻi heʻetau maʻu ha taha ʻoku loto-lelei ke fanongo ki he pōpoaki ʻo e Puleʻangá, ʻe fiemaʻu nai ke toutou ʻaʻahi ki ai koeʻuhi ke fakatupulekina ʻa e mahuʻingaʻia ko iá. ʻOku fiemaʻu ʻa e taimi mo e kātaki ki hono tokangaʻi ʻa e ngaahi tenga ʻo e moʻoní ke tupú. (1 Kolinito 3:6) Ko e puha ʻoku ʻalu fakataha mo ʻeni ʻa ia ʻoku fakakaveinga, “Founga ke Hoko ʻo Lavameʻa Ai ʻi Hono Fai ʻa e Ngaahi Toe ʻAʻahí” ʻoku ʻomai ai ʻa e ngaahi fokotuʻu ki hono fakatupulekina ʻa e mahuʻingaʻia peheé. Manatuʻi, ko e moʻui ʻa e kakaí—ko ʻenau ngaahi palopalemá mo honau ngaahi tuʻungá—ʻoku feliliuaki maʻu pē. ʻE fiemaʻu nai ʻa e ngaahi feinga lahi ke maʻu ai kinautolu ki honau ʻapí, ka ʻoku ʻaonga ʻa e feinga ko iá. ʻOku tau loto ke tau ʻoange kiate kinautolu ha faingamālie ke nau fanongo ai ki he pōpoaki ʻo e fakamoʻui ʻa e ʻOtuá. Ko ia ai, lotu kia Sihova ko e ʻOtuá ki ha poto ke fakatupulekina ʻaki ʻa hoʻo ngaahi pōtoʻi ʻi he fakalotoʻí ʻi hoʻo ngāue ko hono tokoniʻi ʻa e niʻihi kehé ke nau tali ʻa e pōpoaki ʻo e Puleʻangá.
19 ʻI hono maʻu pē ha taha ʻoku loto ke fanongo lahi ange fekauʻaki mo e pōpoaki ʻo e Puleʻangá, ko e hā mo ha toe meʻa ʻe lava ke tau fai ʻi hotau tuʻunga ko e Kalisitiané? Ko ʻetau kupu hoko maí te ne ʻomai ʻa e tokoní.
[Fakamatala ʻi lalo]
a Ki ha fakamatala lahi ange ʻi he fakalotoʻí, sio ki he ongo ako 48 mo e 49 ʻo e tohi Maʻu ʻAonga mei he Ako Fakafaifekau Fakateokalatí, ʻoku pulusi ʻe he Kau Fakamoʻoni ʻa Sihová.
ʻOkú Ke Manatuʻi?
• Ko e hā naʻá ne ʻai ʻa e taukapo ʻa Paula ʻi he ʻao ʻo Tuʻi ʻAkilipá ke ola leleí?
• ʻE malava fēfē ke ueʻi ʻe heʻetau pōpoakí ʻa e lotó?
• Ko e hā te ne tokoniʻi kitautolu ke tau ngāueʻaki ola lelei ʻa e Folofola ʻa e ʻOtuá ʻi he feinga ke aʻu ki he lotó?
• ʻE malava fēfē ke tau vakai ki he ngāue fakafaifekaú mei he anga ʻo e vakai ʻa e ʻOtuá?
[Puha/Fakatātā ʻi he peesi 16]
Founga ke Hoko ʻo Lavameʻa Ai ʻi Hono Fai ʻa e Ngaahi Toe ʻAʻahí
• Fakahāhā ha mahuʻingaʻia fakafoʻituitui loto-moʻoni ʻi he kakaí.
• Fili ha tuʻunga-lea faka-Tohitapu fakaueʻiloto ke fetalanoaʻaki ai.
• Fakatoka ha makatuʻunga lelei ki he ʻaʻahi hokohoko taki taha.
• Hanganaki fakakaukau fekauʻaki mo e tokotahá ʻi he hili hoʻo mavahé.
• Toe foki vave, ʻi ha ʻaho pē ʻe taha pe ua nai, koeʻuhi ke kei tauhi maʻu ʻa e mahuʻingaʻiá.
• Tauhi maʻu ʻi he fakakaukaú ko hoʻo taumuʻá ke kamata ha ako Tohitapu ʻi ʻapi.
• Lotu ke hanga ʻe Sihova ʻo ʻai ʻa e mahuʻingaʻiá ke tupulaki.
[Fakatātā ʻi he peesi 15]
Naʻe ngāueʻaki ʻe Paula ʻa e fakalotoʻí ʻi heʻene ʻi he ʻao ʻo Kōvana Fesito mo Tuʻi ʻAkilipá