Puleʻanga ʻo e ʻOtuá—Ko ha Foʻi Moʻoni ʻi he ʻAhó Ni

“ʻE lava fēfē ki ha ngaahi fonua lahi fau, fakataha mo e ngaahi anga fakafonua kehekehe pehē ʻi he ngaahi tuʻunga kehekehe ko ia ʻo e fakalakalaká, ʻo loto-tatau? Kuo pehē tokua ko ha ʻohofi pē ʻe fai mei ha foʻi palanite ʻe taha te ne fakafāʻūtahaʻi ʻa e matakali ʻo e faʻahinga ʻo e tangatá.”​—The Age, nusipepa ʻAositelēlia.

KO HA ʻohofi mei ha toe foʻi palanite ʻe taha? Pe ʻe fakatahatahaʻi ʻe he meʻa ko iá ʻa e fonua kotoa pē ʻo e māmaní pe ʻikai, ʻoku lau ʻa e kikite ʻi he Tohi Tapú fekauʻaki mo ha taimi mahuʻinga ʻoku tuʻunuku mai ʻa ia te ne fakatupunga ʻa e ngaahi fonua kotoa ʻo e māmaní ke nau fāʻūtaha. Pea ko e taimi mahuʻingá, ko e moʻoni ʻe fakatupunga ia ʻe ha ngaahi mālohi tupu mei tuʻa.

Ko Tuʻi Tēvita ʻo ʻIsileli ʻo e kuonga muʻá naʻá ne lea fakaekikite ʻo fekauʻaki mo e tuʻunga ko eni ʻi he māmaní. ʻI he malumalu ʻo e fakamānavaʻi fakaʻotuá naʻá ne tohi: “He tuʻu mai ʻa e ngaahi tuʻi ʻo mamani, pea fakatahataha ʻa e houʻeiki ke puleakiʻi ʻa Sihova, pea mo e pani aʻana: ‘Tau motuhi ʻa e ngaahi haʻi ʻanaua, ʻo liʻaki meiate kitautolu ʻena ngaahi kafa.’” (Sāme 2:​2, 3; Ngāue 4:​25, 26) Fakatokangaʻi ko e kau pule ʻo e māmaní te nau fakatahataha ʻo fakafepaki kia Sihova, ko e Tokotaha-Fakatupu ʻo e ʻunivēsí, mo ʻene tokotaha paní, pe ko ʻene Tuʻi fakanofó, ʻa Sīsū Kalaisi. ʻE anga-fēfē ʻene hoko iá?

Fakatatau ki he fakahokohoko taimi ʻa e Tohi Tapú mo e ngaahi kikite kuo fakahokó, ʻi he taʻu 1914, naʻe fokotuʻu ai ʻa e Puleʻanga ʻo e ʻOtuá ʻi hēvani fakataha mo Sīsū Kalaisi ʻi he tuʻunga ko e Tuʻí.a ʻI he taimi ko iá ko e ngaahi fonua ʻo e māmaní naʻa nau ʻi he foʻi fakakaukau ʻe taha. ʻI he ʻikai ke fakamoʻulaloa ki he tuʻunga-hau ʻo e Puleʻanga fanauʻi foʻou ʻo e ʻOtuá, naʻa nau kau ʻi ha fāinga ki he mafaí—ko e Tau Lahí, pe Tau I ʻa Māmaní.

ʻOku anga-fēfē ʻa e vakai ʻa Sihova ko e ʻOtuá ki ha tali pehē ʻi he tafaʻaki ʻa e kau pule ʻo e faʻahinga ʻo e tangatá? “Kata pe ia ʻoku ʻafio ʻi langi, manukia kinautolu ʻe Atonai. Toki folofola ia ki ai ʻi heʻene ʻita, pea ʻi heʻene houhau ʻoku ne ʻai ke nau ilifia.” ʻE folofola leva ʻa Sihova ki hono ʻAló, ʻa e Tuʻi pani ʻo e Puleʻangá: “Kole mai pea u ʻatu moʻo tofiʻa ʻa e ngaahi kakai, mo e ngaahi ngataʻanga ʻo mamani moʻo ʻinasi. Te ke laiki kinautolu ʻaki ʻa e sepita ukamea te ke haveʻi kinautolu hange ha ipu ʻumea.”—Sāme 2:​4, 5, 8, 9.

Ko e laiki fakaʻosi ko eni ʻo e ngaahi kakai fakafepakí ʻaki ha sēpita ukameá ʻe fakahoko ia ʻi ʻĀmaketone, pe Hāmaketone. Ko e tohi fakaʻosi ʻo e Tohi Tapú, ʻa e tohi Fakahaá, ʻoku fakamatala ai ki he tumutumu ʻo e meʻa ko eni ʻe hokó ko e “tau ʻo e ʻaho lahi ʻo e ʻOtua Aoniu,” ʻa ia ko e “ngaahi tuʻi ʻo mamani kātoa” ʻoku nau fakatahataha fakataha. (Fakahā 16:​14, 16) ʻI he malumalu ʻo e tākiekina fakatēmenioó, ko e ngaahi fonua ʻo e māmaní ʻe faifai pē ʻo nau fāʻūtaha, fakataha mo e taumuʻa ʻe taha​—ke tauʻi ʻa e ʻOtua Māfimafi-Aoniú.

Ko e taimi ʻe fakatahataha ai ʻa e faʻahinga ʻo e tangatá ke faitau ki he tuʻunga-hau ʻo e ʻOtuá ʻoku tuʻunuku vave mai. Ko e meʻa fakaolí, ko ʻenau “fāʻūtahá” ʻe ʻikai ʻomai ai kia kinautolu ha ngaahi ʻaonga fakafoʻituitui. ʻI hono kehé, ko ʻenau ngāué ʻe hoko ia ko ha talateu ki he melino kuo fuoloa ʻa e tatali ki ai ʻa e faʻahinga kotoa ʻo e tangatá. Anga-fēfē? ʻI he tau fakaʻosi ko iá, ʻe hanga ai ʻe he Puleʻanga ʻo e ʻOtuá ʻo “laiki mo fakaʻauha ʻa e ngaahi puleʻanga ko ia [ʻo e māmaní], kae tuʻu pe ia ʻo taʻengata.” (Taniela 2:44) Ko e Puleʻanga ʻo e ʻOtuá, ʻikai ko ha kautaha fakaetangata, ʻe hoko ko e founga-pule te ne fakalato ʻa e holi ʻa e faʻahinga ʻo e tangatá ki he melino ʻi he māmaní.

Ko e Pule Fakahoko Ngāue ʻo e Puleʻangá

Ko e Puleʻanga ia ʻa ia ʻoku lotu ki ai ʻa e kakai loto-moʻoni tokolahi, ʻo pehē: “Ke hoko mai ho Puleʻangá. Ke fai ho finangaló ʻi māmani, ʻo hangē ko ia ʻoku fai ʻi Hēvaní.” (Mātiu 6:​10, Ko e Kōsipeli ʻe Fā) ʻI he ʻikai ke hoko ko ha tuʻunga mahinongataʻa ʻo e lotó, ko e Puleʻanga ʻo e ʻOtuá ko ha founga-pule moʻoni ia ʻa ia kuó ne fakahoko ʻa e ngaahi ngāue fakaofo talu mei hono fokotuʻu ʻi hēvani ʻi he 1914. Tau lāulea angé ki he niʻihi ʻo e ngaahi meʻa tefito ʻoku fakahāhā ai ko e Puleʻanga ʻo e ʻOtuá ko ha meʻa moʻoni ia ʻoku ngāue kakato he ʻahó ni.

ʻUluakí, ʻokú ne maʻu ha vaʻa fakahoko ngāue mālohi mo taau ʻoku taki ai ʻa e Tuʻi fakanofo, ko Sīsū Kalaisí. ʻI he 33 T.S., naʻe ʻai ai ʻe Sihova ko e ʻOtuá ʻa Sīsū Kalaisi ko e ʻUlu ʻo e fakatahaʻanga Kalisitiané. (Efeso 1:​22) Talu mei ai, kuo ngāueʻi ʻe Sīsū ʻa hono tuʻunga-ʻulú, ʻo fakahāhā ai ʻa ʻene malava ke fakahoko ngāué. Ko e fakatātaá, ʻi he taimi naʻe taaʻi ai ʻe ha honge lahi ʻa Siutea ʻi he ʻuluaki senitulí, naʻe ngāue leva ʻa e fakatahaʻanga Kalisitiané ke tokoniʻi ʻa hono kau mēmipá. Naʻe fokotuʻutuʻu ha ngāue tokoni, pea naʻe tuku atu ʻa Panepasa mo Saula mei ʻAniteoke mo ha ngaahi tokoni ʻofa.​—Ngāue 11:​27-​30.

ʻE lava ke tau ʻamanekina ʻa e meʻa lahi ange meia Sīsū Kalaisi he taimí ni, ʻoku lolotonga ngāue ʻa e Puleʻangá. ʻI he taimi pē ʻoku hoko ai ʻa e ngaahi fakatamakí—ngaahi mofuike, honge, tāfea, afā, matangi, pe ngaahi pā ʻa e moʻunga afí—ʻoku tali vave ʻa e fakatahaʻanga Kalisitiane ʻa e Kau Fakamoʻoni ʻa Sihová ki he ngaahi fiemaʻu ʻa e kaungātuí mo e niʻihi kehe ʻi he ngaahi feituʻu ʻoku uesiá. Hangē ko ení, ʻi he taaʻi ʻe ha ngaahi mofuike fakaefakaʻauha ʻa ʻEli Salavatoa ʻi Sanuali mo Fepueli 2001, naʻe fokotuʻutuʻu ai ʻa e ngaahi ngāue tokoni ʻi he tapa kotoa ʻo e fonuá, pea ko e ngaahi kulupu ʻo e Kau Fakamoʻoni ʻa Sihová mei Kānata, Kuatemala mo e ʻIunaite Seteté naʻa nau tokonaki mai ʻa e tokoní. Ko honau feituʻu faiʻanga lotu ʻe tolu pea pehē ki he ngaahi ʻapi laka hake he 500 naʻe toe langa ia ʻi he vahaʻa taimi nounou.

Faʻahinga ʻe Pule ki Ai ʻa e Puleʻangá

Talu mei hono fokotuʻu ʻi he 1914, kuo fakatahatahaʻi mo fokotuʻutuʻu maau ʻe he Puleʻanga fakahēvani ʻo e ʻOtuá ʻa e faʻahinga ʻe pule ki aí mei he kakai takatakai ʻi he māmaní. Ko e fakahoko eni ʻo ha kikite mahuʻinga naʻe lēkooti ʻe ʻAisea: “ʻE hoko ʻo pehe ʻi he kuonga ʻamui, ʻe fokotuʻu ʻa e moʻunga ʻo e fale ʻo Sihova [ʻene lotu moʻoni kuo hakeakiʻí] ko e ʻulu ʻo e ngaahi moʻunga, . . . pea ʻe tafe ki ai ʻa e ngaahi kakai kotoa pe.” ʻOku fakahaaʻi ʻe he kikité ko e “ngaahi kakai” te nau ʻalu ki he moʻunga ko iá ʻo tali ʻa e ngaahi fakahinohino mo e lao ʻa Sihová.—Aisea 2:​2, 3.

Kuo iku ʻa e ngāué ni ki he ngaʻunu mahuʻinga taha ʻi onopōní—ko ha fetokouaʻaki fakavahaʻapuleʻanga ʻo e kau Kalisitiane laka hake he toko 6,000,000 ʻi he ngaahi fonua ʻe 230 tupu he māmaní. Ko ha ngaahi fakataha-lahi fakavahaʻapuleʻanga ʻa e Kau Fakamoʻoni ʻa Sihová, ʻoku faʻa ofo ai ʻa e kau mamatá he sio ki he ʻofa, melino mo e fāʻūtaha ʻi he lotolotonga ʻo e fuʻu kakai tokolahí, ʻo ikuʻi ai ʻa e ngaahi ʻā vahevahe ʻi he tuʻunga fakafonuá, tōʻongá pea mo e leá. (Ngāue 10:​34, 35) ʻIkai te ke loto-tatau ʻe malava ha founga-pule ʻo fakatahatahaʻi ʻa e ngaahi kulupu fakafaʻahinga ʻe laui teau ʻi he melino mo e feongoongoí, kuo pau ke ola lelei ia mo tuʻumaʻu—pea moʻoni?

Puleʻanga ʻo e ʻOtuá mo e Akó

Ko e founga-pule kotoa pē ʻoku ʻi ai hono ngaahi tuʻunga pea ʻoku ʻamanekina ʻa hono kau tangataʻifonuá ke nau aʻusia ia, pea ko e tokotaha kotoa pē ʻoku loto ke moʻui ʻi he malumalu ʻo e founga-pule ko iá kuo pau ke nau aʻusia ʻa e ngaahi tuʻunga ko iá. ʻI he tuʻunga meimei tatau, ko e Puleʻanga ʻo e ʻOtuá ʻoku ʻi ai ʻene ngaahi tuʻunga ʻa ia kuo pau ke aʻusia ʻe he faʻahinga kotoa te nau taau ke hoko ko e faʻahinga ke pule mai ki aí. Kae kehe, ke ʻai ke malava ʻa e fuʻu kakai tokolahi pehē mo e ngaahi ʻātakai kehekehe lahi fau ke nau tali pea muimui ki he ngaahi tuʻunga tatau ko ha ngāue lahi fakaʻulia moʻoni ia. Ko e toe meʻa tefito leva eni ʻe taha ʻoku fakamoʻoni ki he moʻoni ʻo e Puleʻanga ʻo e ʻOtuá—ko ʻene polokalama ako ola lelei ʻa ia ʻoku aʻu ia ʻo ne liliuʻi ʻo ʻikai ngata pē ʻi he ʻatamaí kae pehē foki ki he lotó.

ʻOku anga-fēfē ʻa e lavaʻi ʻe he Puleʻangá ʻa e ngāue faingataʻa ko ení? ʻAki ʻa e founga malanga fakaʻapositoló ʻi he “fale kotoabe” mo hono akoʻi ʻa e Folofola ʻa e ʻOtuá ʻi ha tuʻunga fakatāutaha. (Ngāue 5:​42, PM; Ng 20:20) ʻOku ola lelei fēfē ʻa e founga ko eni ʻo e akó? Ko Jacques Johnson, ko ha pātele Katolika, naʻá ne tohi ʻi ha nusipepa fakauike Kānata ʻo fekauʻaki mo ʻene ngaahi feinga ke fakalotoʻi ha fefine ke tuku ʻene ako mo e Kau Fakamoʻoni ʻa Sihová. “Naʻá ku mātuʻaki puputuʻu ʻo ʻiloʻi naʻá ku kau ki ha tau ʻoku ʻulungia,” ko ʻene leá ia. “Naʻá ku kamata ke ʻiloʻi ʻi he faai mai ʻa e ngaahi māhiná ko e kau fefine JW naʻa nau faʻu ha ngaahi vahaʻangatae mohu ʻuhinga mo e faʻē kei siʻi ko eni naʻe ʻikai lava ke ʻalu ki ha feituʻú. Naʻa nau vāofi mo ia ʻi hono tokoniʻi ia, fakakaumeʻa kiate ia, ʻo fokotuʻu ha ngaahi felotoi mohu ʻuhinga ʻi he lotó. Naʻe vave ʻa ʻene hoko ko ha mēmipa longomoʻui ʻi heʻenau lotú pea naʻe ʻikai lava ke u fai ha meʻa ke taʻofi ia mei heʻene hokó.” Hangē ko e ueʻi ʻa e loto ʻo e Katolika ko eni ki muʻá ʻe he pōpoaki ʻa e Tohi Tapú naʻe akoʻi ʻe he Kau Fakamoʻoni ʻa Sihová pea ʻi honau ʻulungāanga faka-Kalisitiané, ʻoku pehē pē ʻa e aʻu ki he loto ʻo e laui miliona ʻi māmani lahí.

Ko e founga ko eni ʻo e akó—ako ki he Puleʻangá—ʻoku fakatefito ia ʻi he Tohi Tapú, ʻo ne pouaki ʻa hono ngaahi mahuʻingá mo ʻene ngaahi tuʻunga ʻi he ʻulungāanga tāú. ʻOkú ne akoʻi ʻa e kakaí ke nau feʻofaʻaki mo fefakaʻapaʻapaʻaki ʻo tatau ai pē pe ko e hā honau puipuituʻá. (Sione 13:​34, 35) ʻOkú ne toe tokoniʻi ʻa e kakaí ke nau tali ʻa e ekinaki: “Ke ʻoua naʻa mou tuku ke fakaangatatau kimoutolu ki he maama ko eni: kae tuku ke fai ai pe homou liliu, he fakafoʻou ʻo homou ʻatamai, ke mou sivi ʻo ʻilo pe ko e ha ʻa e finangalo ʻo e ʻOtua, ʻa e meʻa ʻoku lelei, ʻa e meʻa te ne hōifua ai, ʻa e meʻa ʻoku haohaoa.” (Loma 12:2) Ko hono liʻaki ʻenau founga moʻui ki muʻá pea liliu fiefia ki he ngaahi lao mo e ngaahi tefitoʻi moʻoni ʻo e Puleʻangá, kuo maʻu ai ʻe he laui miliona ʻa e melino mo e fiefia he taimí ni pea mo e ngaahi ʻamanaki fakafiefia ki he kahaʻú.​—Kolose 3:​9-​11.

Ko ha tokoni tuʻu-ki-muʻa ʻi hono lavaʻi ʻa e fāʻūtaha ko eni ʻi māmani lahí ko e makasini ko ení, ʻa e Taua Leʻo. Fakafou ʻi he ngaahi founga liliu fokotuʻutuʻu māú mo e meʻangāue pulusi lea kehekehé, ko e ngaahi kupu tefito ʻi he Taua Leʻo ʻoku pulusi taimi tatau ia ʻi he lea ʻe 135, pea laka hake he peseti ʻe 95 ʻa hono kau lautohi ʻi māmani lahí ʻoku lava ke nau ako ʻa e fakamatalá ʻi heʻenau leá tonu ʻi he taimi tatau.

Naʻe fakahokohoko ʻe ha faʻu-tohi Māmonga ʻa e ngaahi lavameʻa fakamisinale māʻolunga taha ʻi tuʻa mei hono siasí tonu. Naʻá ne fokotuʻu ʻa e Taua Leʻo mo e ʻĀ Hake! ʻoku pulusi ʻe he Kau Fakamoʻoni ʻa Sihová, ko e ongo makasini fakaʻevangeliō lelei tahá ia peá ne pehē: “ʻOku ʻikai lava ke faifai ange pea tukuakiʻi ʻe ha taha ʻa e Taua Leʻó pe ʻĀ Haké ki hono fakaʻaiʻai ʻa e fakataʻetaʻehohaʻá—ʻi hono kehé, ʻokú na fakatupunga ha ongoʻi ʻo e tokanga ʻa ia kuo tātātaha ʻeku fetaulaki mo ia ʻi he ʻū tohi fakalotu kehé. Ko e Taua Leʻó mo e ʻĀ Haké ʻoku fakaivifoʻou ia ʻi heʻena makatuʻunga ʻi he moʻoní, fakatotoloʻi leleí pea mo e kaunga ki he māmani moʻoní ʻa e meʻa ʻoku ʻi lotó.”

ʻOku lahi fakaʻulia ʻa e fakamoʻoni ko e Puleʻanga ʻo e ʻOtuá ko ha meʻa moʻoni ia ʻoku ngāue kakato. ʻOku vahevahe fiefia mo mālohi atu ʻe he Kau Fakamoʻoni ʻa Sihová “ʻa e ongoongolelei ko eni ʻo e puleʻanga” ki honau ngaahi kaungāʻapí, ʻo fakaafeʻi kinautolu ke nau hoko ko e faʻahinga ke pule mai ki ai ʻa e puleʻangá. (Mātiu 24:14) ʻOku fakamānako ʻa e ʻamanaki peheé kiate koe? ʻE lava ke ke maʻu ʻa e ngaahi tāpuaki ʻa ia ʻoku hoko mai mei he feohi mo e faʻahinga ko ia ʻoku akoʻi pea nau feinga ke moʻuiʻaki ʻa e ngaahi tuʻunga ʻo e Puleʻangá. Ko e meʻa ʻoku kei sai ʻakí, ʻe lava ke ke hoko ʻo fiefia ʻi he ʻamanaki ke moʻui ʻi he malumalu ʻo e pule ʻa e Puleʻangá ʻi he māmani foʻou naʻe talaʻofa ʻa ia ʻe “nofoʻanga ai ʻa maʻoniʻoni.”—2 Pita 3:13.

[Fakamatala ʻi lalo]

[Fakatātā ʻi he peesi 4, 5]

ʻI he 1914 naʻe hoko ai ʻa e ngaahi fonuá ʻo kau ʻi ha tau ʻa e māmaní

[Fakatātā ʻi he peesi 6]

Ko e ngāue tokoni polé ko e fakamoʻoni ia ʻo e ngāue ʻa e ʻofa faka-Kalisitiané

[Fakatātā ʻi he peesi 7]

Ko e Kau Fakamoʻoni ʻa Sihova ʻi māmani lahí ʻoku nau maʻu ʻaonga mei he polokalama ako tatau