Talanoa ki he Moʻuí

Maʻu ʻe ha Paea Līʻekina ha Tamai ʻOfa

FAKAMATALA FAI ʻE DIMITRIS SIDIROPOULOS

“Ngaue, toʻo ʻa e meʻataú pea fana,” ko e lea ʻūʻū-nifo mai ia ʻa e ʻōfisá, ʻi heʻene tekeʻi mālohi mai ʻa e laifoló ki muʻa ʻiate au. Naʻá ku fakafisi anga-mokomoko. ʻI he fakalilifuʻia ʻa e kau sōtia naʻe tuʻu ʻo sió, naʻe kamata ke heke ʻa e ngaahi foʻi mahafu ʻo e meʻafana ʻa e sōtiá ʻi hoku funga umá. Ne hā ngali tuʻunuku mai ʻa e maté. Ko e meʻa fakafiefiá, he naʻá ku hao. Ka naʻe ʻikai ko e ʻuluaki taimi eni naʻe ʻi he tuʻunga fakatuʻutāmaki ai ʻa ʻeku moʻuí.

NAʻE kau ʻa hoku fāmilí ki ha kulupu fakafaʻahinga tokosiʻi naʻe nofo ofi ki Kayseri, ʻi Kapatōsia, Toake. ʻOku hā mahino naʻe tali ʻe he faʻahinga tāutaha mei he feituʻu ko ení ʻa e lotu faka-Kalisitiané ʻi he ʻuluaki senituli T.S. (Ngāue 2:9) Kae kehe, ʻi he aʻu mai ki he kamataʻanga ʻo e senituli hono 20, naʻe liliu lahi fau ai ʻa e ngaahi meʻá.

Mei he Kumi Hūfangá ki he Paea

ʻI ha ngaahi māhina siʻi hili hono fāʻeleʻi au ʻi he 1922, naʻe fakatupunga ai ʻe ha fepaki fakafaʻahinga ke hola ki Kalisi ʻa hoku fāmilí ʻi he tuʻunga ko e kau kumi hūfanga. Naʻe mavahe ʻa ʻeku ongo mātuʻa manavaheé ʻo halaʻatā mo ha meʻa tuku kehe pē au, ko ʻena kiʻi pēpē lau māhina siʻi pē. Hili ʻa e fuesia ha ngaahi faingataʻa taʻehanotatau, naʻá na aʻu ai ki ha tuʻunga kovi ʻaupito ʻi ha kolo ko Kiria, ofi ki Drama, ʻi he fakatokelau ʻo Kalisí.

ʻI he taimi naʻá ku taʻu fā aí, pea ʻi he hili ʻa hono fāʻeleʻi ʻa hoku kiʻi tokouá, naʻe mate ʻa ʻeku tamaí. Naʻá ne taʻu 27 pē, ka ko e tuʻunga faingataʻa ʻo e ngaahi taimi fakamamahi ko iá naʻá ne fakavaivaiʻi iá. Naʻe fuesia ʻe he fineʻeikí ʻa e ngaahi taimi faingataʻa, pea naʻe ʻikai fuoloa naʻá ne toe mate mo ia foki. Naʻe liʻaki tukuhāusia fakaʻaufuli au mo hoku tokouá. Naʻe ʻave kimaua mei he ʻapi paea ki he ʻapi paea, pea ʻi hoku taʻu 12, naʻá ku iku ai ki ha ʻapi paea ʻi Tesalonaika, ʻa ia naʻá ku ngāue ai ko ha tokotaha akoako makēnika.

ʻI heʻeku tupu hake ʻi loto ʻi he ngaahi ʻā ʻo e ngaahi ʻapi paea anga-taʻefakakaumeʻa mo ʻikai anga-talitali kakaí, naʻá ku fifili ai pe ko e hā ʻoku hokosia ai ʻe he kakai ʻe niʻihi ʻa e faingataʻa mo e fakamaau taʻetotonu lahi faú. Naʻá ku ʻeke hifo kiate au pe ko e hā ʻoku fakaʻatā ai ʻe he ʻOtuá ke ʻi ai ʻa e ngaahi tuʻunga fakalotomamahi peheé. ʻI heʻemau ngaahi kalasi ako fakalotú, naʻe akoʻi mai ai ko e ʻOtuá ʻoku mālohi fakaʻaufuli, ka naʻe ʻikai ʻomai ha fakamatala ʻuhinga lelei fekauʻaki mo e ʻi ai pea mo e mafolalahia ʻa e koví. Naʻe pehē tokua ʻi ha lea manakoa ko e Siasi ʻOfotokisī Kalisí ʻa e lotu lelei tahá. ʻI heʻeku ʻeke, “Kapau ko e ʻOfotokisií ʻa e lotu lelei tahá, ko e hā ʻoku ʻikai ʻOfotokisī ai ʻa e tokotaha kotoa?” naʻe ʻikai te u maʻu ha tali fakafiemālie.

Neongo ia, ko ʻemau faiakó naʻá ne ʻapasia loloto ki he Tohi Tapú, pea naʻá ne fakamamafaʻi mai kia kimautolu ko ha tohi toputapu ia. Naʻe fakahāhā ʻe he talēkita ʻo e ʻapi paeá ʻa e fakakaukau tatau, ka naʻá ne fakaʻehiʻehi ʻi ha ʻuhinga taʻeʻiloa mei he kau ki he ngaahi ouau fakalotú. ʻI heʻeku fakaʻekeʻeke fekauʻaki mo e meʻa ko ení, naʻe tala mai kiate au naʻá ne ako ʻi ha taimi mo e Kau Fakamoʻoni ʻa Sihová, ko ha lotu naʻe ʻikai te u ʻiloʻi.

ʻI he kakato ʻeku ako ʻi he ʻapi paea ʻi Tesalonaiká, naʻá ku taʻu 17 ai. Naʻe kamata ʻa e Tau II ʻa Māmaní pea naʻe ʻi he malumalu ʻo e puleʻi faka-Nasí ʻa Kalisi. Naʻe mate ʻa e kakaí ʻi he ngaahi halá tupu mei he fiekaiá. Koeʻuhi ke hao moʻui, naʻá ku hola ai ki he feituʻu ʻutá ke ngāue ki ha kiʻi vāhenga siʻisiʻi ko ha tokotaha leipa ʻi he ngoueʻangá.

ʻOmai ʻe he Tohi Tapú ʻa e Ngaahi Talí

ʻI heʻeku foki ki Tesalonaika ʻi ʻEpeleli 1945, naʻá ku talitali ai ha ʻaʻahi mei he tuofefine ʻo e taha ʻo hoku ngaahi kaumeʻa ʻi he kei siʻí ʻa ia naʻá ku nofo fakataha mo ia ʻi ha ngaahi ʻapi paea. Naʻe tala mai ʻe Paschalia kiate au naʻe pulia hono tuongaʻané peá ne ʻeke mai pe ʻoku ou ʻiloʻi ʻa e ngaahi feituʻu nai ʻokú ne ʻi aí. Lolotonga ʻa e fetalanoaʻakí, naʻá ne tala mai ai ko e taha ia ʻo e Kau Fakamoʻoni ʻa Sihová peá ne lave ai ki he mahuʻingaʻia ʻa e ʻOtuá ʻi he faʻahinga ʻo e tangatá.

ʻI he loto-ʻitá, naʻá ku ʻohake ai ʻa e ngaahi fakaanga lahi. Ko e hā naʻá ku faingataʻaʻia ai talu mei heʻeku kei siʻí? Ko e hā naʻe liʻaki ai au ko ha paeá? Ko fē ʻa e ʻOtuá ʻi he taimi ʻoku tau fiemaʻu lahi taha ai iá? Naʻá ne tali mai, “ʻOkú ke fakapapauʻi ko e ʻOtuá ke tukuakiʻi ki he ngaahi tuʻunga ko ení?” ʻI hono ngāueʻaki ʻa ʻene Tohi Tapú, naʻá ne fakahaaʻi mai kiate au ʻoku ʻikai ʻai ʻe he ʻOtuá ke faingataʻaʻia ʻa e kakaí. Naʻe tokoniʻi ai au ke u sio ʻoku ʻofa ʻa e Tokotaha-Fakatupú ʻi he faʻahinga ʻo e tangatá pea ʻe vavé ni ke ne fakaleleiʻi ʻa e ngaahi meʻá. ʻI hono ngāueʻaki ʻa e ngaahi konga Tohi Tapu hangē ko e Aisea 35:​5-7 mo e Fakahā 21:​3, 4, naʻá ne fakahaaʻi mai ai kiate au ʻe vavé ni ke toʻo atu ʻa e taú, fekeʻikeʻí, puké mo e maté, pea ʻe moʻui taʻengata ʻa e kakai faitōnungá ʻi he māmaní.

Ko Hono Maʻu ha Fāmili Poupou

Naʻá ku ʻiloʻi naʻe mate ʻa e tuongaʻane ʻo Paschalia ʻi ha tau ʻa e ngaahi kongakau tautoitoí. Naʻá ku ʻaʻahi ki hono fāmilí ke fakafiemālie kia kinautolu, ka ʻi hono kehé naʻa nau ʻomai ha fakafiemālie Fakatohitapu kiate au. Naʻá ku toe foki ki ai ki ha ngaahi fakakaukau fakafiemālie lahi ange mei he Tohi Tapú, pea ʻikai fuoloa naʻá ku hoko ai ko ha konga ʻo ha kiʻi kulupu ʻo e Kau Fakamoʻoni ʻa Sihová, ʻa ia naʻa nau fakataha fakapulipuli ke ako mo lotu. Neongo ʻa e tapui ʻa e Kau Fakamoʻoní, naʻá ku fakapapauʻi ke hokohoko atu ʻa e feohi mo kinautolú.

ʻI he kulupu ko ia ʻo e kau Kalisitiane anga-fakatōkilaló, naʻá ku maʻu ai ʻa e ʻatimosifia fakafāmili māfana mo ʻofa naʻe ʻikai te u maʻú. Naʻa nau ʻomai ʻa e poupou mo e tokoni fakalaumālie naʻá ku fiemaʻu vavalé. Naʻá ku maʻu ʻia kinautolu ʻa e ngaahi kaumeʻa taʻesiokita mo tokanga, ʻa ia naʻa nau mateuteu mo loto-lelei ke tokoniʻi mo fakafiemālieʻi au. (2 Kolinito 7:​5-7) Ko e meʻa naʻe mahuʻinga angé, naʻe tokoniʻi au ke u ʻunuʻunu ofi ange kia Sihova, ʻa ia ʻoku ou fakakaukau ki ai he taimí ni ko ʻeku Tamai fakahēvani ʻofá. Ko hono ngaahi ʻulungāanga ko e ʻofá, manavaʻofá mo e tokanga lolotó naʻe mātuʻaki fakamānako. (Sāme 23:​1-6) Naʻe iku ʻou maʻu ha fāmili fakalaumālie mo ha Tamai ʻofa! Naʻe maongo ia ki hoku lotó. Naʻe vave hono ueʻi au ke u fakatapui kia Sihova, pea naʻá ku papitaiso ʻi Sepitema 1945.

Ko hono maʻu ʻa e ngaahi fakataha faka-Kalisitiané naʻe ʻikai ngata pē ʻi hono fakalahi ai ʻeku ʻiló ka naʻe toe fakalolotoʻi ai ʻeku tuí. Koeʻuhi naʻe ʻikai ha toe ngaahi founga kehe ʻo e fetuʻutakí, ko ha tokolahi ʻo kimautolu naʻa mau faʻa lue ʻi he kilomita ʻe 6.5 ʻi he vahaʻa ʻo homau koló mo e faiʻanga fakatahá, ʻi heʻemau kau ki he ngaahi fetalanoaʻaki fakalaumālie fakangalongataʻa. ʻI he konga ki mui ʻo e 1945, ʻi heʻeku ʻiloʻi ʻa e faingamālie ke kau ʻi he ngāue fakaʻevangeliō taimi-kakató, naʻá ku kamata tāimuʻa ai. Naʻe mātuʻaki mahuʻinga ha vahaʻangatae fefeka mo Sihova, ʻi he vave ke ʻahiʻahiʻi ʻa ʻeku tuí mo e anga-tonú ki hono tuʻunga taupotú.

Maʻu e Ngaahi Ola Kehe ʻi he Fakafepakí

Naʻe faʻa ʻohofi fakamanamanaʻi meʻafana ʻe he kau polisí homau faiʻanga fakatahá. Naʻe ʻi he malumalu ʻo e puleʻi fakakautaú ʻa e fonuá, koeʻuhí naʻe lahi fakaʻulia ʻa e tau fakalotofonua ʻi Kalisí. Naʻe tauʻaki feʻohofiʻaki ʻa e ngaahi kulupu fakafepakí fakataha mo e tāufehiʻa anga-fītaʻa. ʻI hono ngāueʻaongaʻaki ʻa e tuʻunga ko iá, naʻe tākiekina ai ʻe he kau faifekaú ʻa e kau maʻu mafaí ke nau tui ko e kau Kominiusi kimautolu pea ke fakatangaʻi kakaha kimautolu.

Lolotonga ha vahaʻa taimi ko e taʻu ʻe ua, naʻe puke tuʻo lahi ai kimautolu pea naʻe tuʻo ono ʻemau maʻu ʻa e ngaahi tautea naʻe aʻu ki he māhina ʻe fā. Kae kehe, ne ʻosi fonu ʻa e ngaahi pilīsoné ʻi he kau pōpula fakapolitikalé, ko ia naʻe tukuange ai kimautolu. Naʻa mau ngāueʻaki ʻemau tauʻatāina taʻeʻamanekiná ke hokohoko atu ai ʻa e malangá, ka ʻi he hili ha kiʻi taimi siʻi naʻe toe puke ai kimautolu—tuʻo tolu ʻi he uike tatau. Naʻa mau ʻiloʻi ko e tokolahi ʻo homau fanga tokouá naʻe fakaheeʻi ki he ngaahi motu liʻaki. ʻE mālohi feʻunga ʻeku tuí ke u fetaulaki mo ha ʻahiʻahi pehē?

Naʻe hoko ʻo faingataʻa lahi fakaʻulia ʻa e ngaahi tuʻungá ʻi he taimi naʻe fiemaʻu ai ke u tali ui fakaʻaho ki he kau polisí. Koeʻuhi ke siofi au, naʻe ʻave ai au ʻe he kau polisí ki Evosmos, ofi ki Tesalonaika, ʻa ia naʻe ʻi ai ha ʻapitanga polisi. Naʻá ku totongi ai ha loki ofi ki ai, pea ke tauhi au, naʻá ku kamata ngāue ai ko ha tufunga fakasanisani hikihiki holo, ʻi hono fakangingila ʻa e ngaahi meʻa ngaohi kai kopá. Lolotonga ʻa ʻeku tāimuʻa ʻi he ngaahi kolo takatakaí, naʻe ʻai ʻe he ngāué ni ke u malava ai ʻo aʻungofua ki he ngaahi ʻapí ʻo ʻikai langaʻi ʻa e huʻuhuʻu ʻa e kau polisí. Ko hono olá, naʻe fanongo ai ʻa e kakai tokolahi ki he ongoongo leleí pea nau tali lelei. Laka hake he toko hongofulu ʻo kinautolu naʻe iku ʻo nau hoko ko e kau lotu fakatapui kia Sihova.

Taʻu ʻe Hongofulu, Pilīsone ʻe Valu

Naʻá ku ʻi he malumalu ai pē ʻo hono tokangaʻi ʻe he kau polisí ʻo aʻu ki he ngataʻanga ʻo e 1949, peá u foki leva ki Tesalonaika, ʻi he vēkeveke ke hokohoko atu ʻi he ngāue fakafaifekau taimi-kakató. ʻI he taimi pē ko ia naʻá ku fakakaukau ai naʻe ʻosi ʻa hoku ngaahi ʻahiʻahí ʻi he 1950, naʻe tuʻutuʻuni taʻeʻamanekina ai ke u kau ki he kau taú. Koeʻuhi ko ʻeku tuʻu-ʻatā faka-Kalisitiané, naʻá ku fakapapauʻi ai ke ʻoua ʻe “akotau.” (Aisea 2:4) Naʻe kamata leva ai ha fononga fakamamahi lōloa, ʻa ia naʻe ʻave ai au ki he niʻihi ʻo e ngaahi pilīsone ongoongo-kovi taha ʻo Kalisí.

Naʻe kamata kotoa ia ʻi he kolo ko Drama. Lolotonga ʻa e ngaahi ʻuluaki uike ʻo hoku tuku pilīsone aí, naʻe kamata ai ʻa e ako fana ʻa e kau sōtia naʻe toki ui foʻoú. ʻI he ʻaho ʻe taha, naʻe ʻave ai au ki he feituʻu faná. Naʻe tekeʻi fakamālohi mai ʻe he taha ʻo e kau ʻōfisá ha laifolo ki muʻa ʻiate au pea tuʻutuʻuni mai ke u fana. ʻI heʻeku fakafisí, naʻá ne kamata fana au. ʻI he sio ʻa e kau ʻōfisa kehé ʻe ʻikai te u fakangalokú, naʻa nau kamata ke tuki anga-fakamanu au. Naʻa nau tutu ʻa e sikaletí ʻo tāmateʻi ʻi hoku ongo lauʻinimá. Hili iá, naʻa nau lī au ki he pilīsone malú. Naʻe hokohoko atu eni ʻo feʻunga mo e ʻaho ʻe tolu. Ko e langa mei he vela he sikaletí naʻe lahi fakaʻulia pea naʻe ʻasi ʻi hoku ongo nimá ʻa e ngaahi lavelavea ko iá ʻi he ngaahi taʻu lahi.

Ki muʻa ke fakamāuʻi fakakautau aú, naʻe ʻave ai au ki ha kemi fakakautau ʻi Iráklion, Kēliti. ʻI aí, ʻi ha feinga ke maumauʻi ʻa ʻeku anga-tonú, naʻa nau haha lahi au. ʻI he ilifia naʻa faifai peá u foʻí, naʻá ku lotu tōtōivi, ʻo kole ki heʻeku Tamai fakahēvaní ke fakaivimālohiʻi au. Naʻe haʻu ki heʻeku fakakaukaú ʻa e ngaahi lea ʻo e Selemaia 1:19: “Te nau tau mo koe; ka ʻe ʻikai te nau lavaʻi koe: he ʻoku ou ʻiate koe ke fai ho fakahaofi—ko Sihova ia.” Ko e fakafiemālie ʻo e “melino oe Otua” naʻá ne ʻomai ʻa e fiemālie mo e nonga. Naʻá ku mahinoʻi ʻa e fakapotopoto ʻo hono tuku kia Sihova ʻa e falala kakató.—Filipai 4:​6, 7, PM; Palovepi 3:5.

ʻI he hopo naʻe hoko atu aí, naʻe tauteaʻi ai au ki he ngāue pōpula ki he mate. Naʻe fai ʻa e vakai ki he Kau Fakamoʻoni ʻa Sihová ko e kovi taha kinautolu ʻi he “ngaahi fili ʻo e Puleʻangá.” Ko e taimi ngāue ki he maté naʻe kamata ia ʻi he pilīsone faihia Itsedin, ʻi tuʻa ʻi Canea, ʻa ia naʻe tuku ai au ʻi he pilīsone malú. Ko Itsedin ko ha kāsolo motuʻa ia, pea naʻe kumāʻia ʻa hoku pilīsoné. Naʻá ku faʻa takatakai ʻiate au ha kafu motuʻa mahaehae mei hoku ʻulú ki he louhiʻi vaʻé koeʻuhí ke ʻoua ʻe pā hangatonu ʻa e fanga kumaá ki hoku sinó ʻi heʻenau totolo holo ʻiate aú. Naʻá ku hoko ai ʻo puke lahi ʻi he niumōniá. Naʻe pehē ʻe he toketaá ʻoku fiemaʻu ke u tangutu ʻo fakalaʻalaʻā, pea naʻá ku malava ai ke fetalanoaʻaki mo e tokolahi ʻo e kau pōpula ʻi he lotoʻaá. Kae kehe, naʻe faai ki he kovi ange ʻa hoku tuʻungá, pea ʻi he hili ha fānoa lahi ʻa e totó ʻi hoku maʻamaʻá, naʻe ʻave ai au ki he falemahaki ʻi Iráklion.

Naʻe toe ʻi ai ʻa hoku fāmili ʻo e kaungā Kalisitiané ʻi he taimi naʻá ku fiemaʻu ai kinautolú. (Kolose 4:11) Naʻe ʻaʻahi mai maʻu pē kiate au ʻa e fanga tokoua ʻi Iráklion, ʻo ʻomai ʻa e fakafiemālie mo e fakalototoʻa. Naʻá ku tala ange kia kinautolu naʻá ku fiemaʻu ha ʻū tohi koeʻuhi ke u faifakamoʻoni ki he faʻahinga mahuʻingaʻiá. Naʻa nau ʻomai ha kato-leta naʻe takele lō-ua ʻa ia naʻe lava ke u fufū ʻo malu ai ʻa e ʻū tohí. He fiefia ē ko au he ʻi he lolotonga ʻa ʻeku nofo ʻi he ngaahi pilīsone ko iá, naʻá ku tokoniʻi ai ʻo ʻikai siʻi hifo ʻi he kaungā ngāue pōpula ʻe toko ono ke nau hoko ko e kau Kalisitiane moʻoni!

ʻI he taimi ko ení naʻe ngata ʻa e tau fakalotofonuá, pea naʻe holoki hifo ai hoku tauteá ki he taʻu ʻe hongofulu ʻi he pilīsoné. Naʻá ku ngāueʻi ʻa e toenga ʻo hoku tautea ʻi he ngaahi pilīsone ʻi Rethimno, Genti Koule mo Cassandra. Hili hono fakamoleki ʻa e meimei taʻu ʻe hongofulu ʻi he pilīsone ʻe valu, naʻe tukuange au, pea naʻá ku foki ki Tesalonaika, ʻa ia naʻe talitali māfana ai au ki he uma ʻo hoku fanga tokoua Kalisitiane ʻofeiná.

Lakalakaimonū ʻi he Fetokouaʻaki Faka-Kalisitiané

ʻI he aʻu mai ki he taimi ko ení, naʻe lava ai ʻa e Kau Fakamoʻoni ʻi Kalisí ke lotu ʻi ha tuʻunga tauʻatāina. Naʻá ku puke leva ʻa e faingamālié ke hokohoko atu ai ʻi he ngāue fakafaifekau taimi-kakató. Naʻe tānaki vave mai ha toe tāpuaki, ʻi heʻeku hoko ai ʻo ʻiloʻi ha tuofefine Kalisitiane faitōnunga, ko Katina, ʻa ia naʻá ne ʻofa kia Sihova pea longomoʻui ʻaupito ʻi he ngāue fakamalangá. Naʻá ma mali ʻi ʻOkatopa 1959. Ko e fāʻeleʻi ʻa homa ʻofefine, ko Agape, pea mo hono maʻu haku fāmili Kalisitiane tonú naʻá ne fakamoʻui ʻa e ngaahi kafo ʻi he taimi ʻo ʻeku paeá. Hiliō he meʻa kotoa, naʻe fiemālie ʻa homau fāmilí ke ngāue ʻi he malumalu ʻo e tokanga maluʻi ʻa ʻemau Tamai fakahēvani ʻofá, ʻa Sihova.—Sāme 5:11.

Koeʻuhi ko e ngaahi tuʻunga naʻe ʻikai lava ke u mapuleʻi, naʻe pau ai ke tuku ʻeku tāimuʻá, ka naʻá ku poupouʻi ʻa hoku uaifí ʻi heʻene hokohoko atu ʻi he ngāue taimi-kakató. Ko ha maka-maile moʻoni ʻi heʻeku moʻui faka-Kalisitiané naʻe hoko ia ʻi he 1969 ʻi hono fai ha fakataha-lahi fakavahaʻapuleʻanga ʻa e Kau Fakamoʻoni ʻa Sihová ʻi Nuremberg, Siamane. ʻI heʻeku teuteu ke fononga ki aí, naʻá ku tohi kole ai ki ha paasipooti. ʻI he taimi naʻe ʻalu ai hoku uaifí ki he ʻapitanga polisí ke ʻeke ʻa e ʻuhinga kuo laka hake ai he māhina ʻe ua mo e ʻikai ke u maʻu ʻeku paasipōtí, naʻe tohoʻi hake ai ʻe ha ʻōfisa ha faile matolu mei heʻene toloá ʻo ne pehē: “ʻOkú ke ʻeke ha paasipooti maʻá e tokotaha ko ení koeʻuhi ke lava ʻo ne fakaului ʻa e kakai ʻi Siamané? Mole ke mamaʻo! ʻOkú ne fakatuʻutāmaki.”

ʻI he tokoni ʻa Sihová mo e tokoni ʻa e niʻihi ʻo e fanga tokouá, naʻe fakakau ai au ʻi ha paasipooti fakakulupu pea malava ai ke u maʻu ʻa e fakataha-lahi fisifisimuʻa ko iá. Naʻe aʻu ʻa e kau maʻu fakatahá ki ha tumutumu laka hake he toko 150,000, pea naʻe lava ke u sio māʻalaʻala ai ki hono tataki mo fakafāʻūtahaʻi ʻe he laumālie ʻo Sihová ʻa e fāmili fakalaumālie fakavahaʻapuleʻanga ko ení. Ki mui ange ʻi he moʻuí, naʻá ku fakamahuʻingaʻi ʻo toe lahi ange ai ʻa e mahuʻinga ʻo e fetokouaʻaki faka-Kalisitiané.

ʻI he 1977 naʻe mālōlō ai ʻa hoku uaifi ʻofaʻanga pea ko e kaumeʻa faitōnungá. Naʻá ku feinga ʻaki ʻeku lelei tahá ke tauhi hake ʻa hoku ʻofefiné ʻo fakatatau ki he ngaahi tefitoʻi moʻoni Fakatohitapú, ka naʻe ʻikai te u toko taha pē. Naʻe toe hoko mai ʻa hoku fāmili fakalaumālié ʻo tokoniʻi au. Te u houngaʻia maʻu pē ʻi he poupou ʻa e fanga tokouá lolotonga ʻa e taimi faingataʻa ko iá. Ko e niʻihi ʻo kinautolu naʻe aʻu ʻo nau hiki mai ki homau ʻapí ʻi ha taimi ke tokangaʻi ʻa hoku ʻofefiné. ʻE ʻikai ʻaupito ngalo ʻiate au ʻa ʻenau ʻofa feilaulauʻi-kitá.—Sione 13:​34, 35.

Naʻe tupu hake ʻa Agape ʻo mali mo ha tokoua, ko Elias. ʻOku ʻi ai hona ngaahi foha ʻe toko fā, ʻoku nau ʻi he moʻoní kotoa. ʻI he ngaahi taʻu ki mui ní, kuo hoko ai kiate au ha ngaahi pā-kālava pea ʻoku hōloa ʻa ʻeku tuʻunga moʻui-leleí. Ko hoku ʻofefiné mo hono fāmilí ʻoku nau tokangaʻi aú. Neongo ʻa e mahamahakí, ʻoku ou kei maʻu pē ʻa e ngaahi ʻuhinga lahi ke fiefia ai. ʻOku ou manatuʻi ʻa e taimi ʻa ia naʻe toko teau pē nai ai ʻa e fanga tokoua kotoa ʻi Tesalonaiká, ʻo nau fakataha fakapulipuli ʻi he ngaahi ʻapi tāutahá. ʻI he taimi ní ʻoku ʻi ai ʻa e Kau Fakamoʻoni faivelenga ʻe toko nima afe nai ʻi he feituʻu ko iá. (Aisea 60:22) ʻI he ngaahi fakataha-lahí, ʻoku ʻunuʻunu mai ai kiate au ʻa e fanga tokoua kei siʻi, ʻo ʻeke mai: “ʻOkú ke manatuʻi ʻa hoʻo faʻa haʻu mo e ngaahi makasiní ki homau ʻapí?” Neongo naʻe ʻikai nai ke lau ʻe he ngaahi mātuʻá ʻa e ngaahi makasini ko iá, naʻe lau ia ʻe heʻenau fānaú pea naʻa nau fakalakalaka fakalaumālie!

ʻI heʻeku sio ki he tupu ʻa e kautaha ʻa Sihová, ʻoku ou ongoʻi ai naʻe tuha ia mo e ngaahi ʻahiʻahi kotoa naʻá ku kātekiná. ʻOku ou tala maʻu pē ki hoku fanga makapuná mo e fānau kehé ke nau manatuʻi ʻenau Tamai fakahēvaní ʻi heʻenau kei talavoú, pea ʻe ʻikai ʻaupito te ne liʻaki kinautolu. (Koheleti 12:2 [Koh 12:​1, PM]) Naʻe fakahoko moʻoni ʻe Sihova ʻa ʻene folofolá, ʻo ne hoko kiate au ko ha “tamai ki he tamai mate.” (Sāme 68:5) Neongo naʻá ku hoko ko ha paea tukuhāusia ʻi he konga ki muʻa ʻo ʻeku moʻuí, naʻe faifai pē ʻou maʻu ha Tamai tokanga!

[Fakatātā ʻi he peesi 22]

Naʻá ku ngāue ko ha kuki ʻi he pilīsone Drama

[Fakatātā ʻi he peesi 23]

Mo Katina ʻi homa ʻaho malí, 1959

[Fakatātā ʻi he peesi 23]

Ko ha ʻasemipilī ʻi ha vaotā ofi ki Tesalonaika, ʻi he konga ki mui ʻo e 1960 tupú

[Fakatātā ʻi he peesi 24]

Mo homa ʻofefiné, 1967