Talanoa ki he Moʻuí

Fiefia ʻi Heʻeku Kau ʻi he Ako Tohi Tapu Fakaemāmani Lahí

FAKAMATALA FAI ʻE ANNA MATHEAKIS

Ne vela ʻa e vaka uta pāsesé. Kapau ʻe ngoto, ʻe ʻohifo au ʻe he fuʻu vaka lōloa mita ʻe 171 ko ení ki kilisi tahi. Naʻá ku kakau fāivavale ke hao, ʻo fāinga mo e ngaahi fuʻu peau lalahi. Ko e founga pē taha ke u kei tētē aí ko e piki maʻu ki ha meʻa kakau naʻe tui ʻe ha fefine ia ʻe taha. Naʻá ku lotu ki he ʻOtuá ki ha mālohi mo ha loto-toʻa. Ko e meʻa pē ia naʻá ku lava ʻo faí.

KO E taʻu 1971 ia, pea ko ʻeku foki atu eni ki hoku vāhenga-ngāue fakamisinale hono tolú, ki ʻĪtali. ʻI he vaka ngoto ko iá, naʻe meimei mole ai ʻa e meʻa kotoa pē naʻá ku maʻú. Ka naʻe ʻikai mole ai ʻa e ngaahi meʻa mahuʻinga tahá​—ʻa ʻeku moʻuí, fetokouaʻaki faka-Kalisitiane ʻofá mo e monū ʻo e tauhi kia Sihová. Ko e ngāue ko iá kuó ne ʻosi ʻave au ki he ngaahi konitinēniti ʻe tolu, pea ko e vaka ngoto ko ení ko e taha pē ia ʻo e ngaahi meʻa naʻe hoko ʻi ha moʻui mohu meʻa.

Naʻe fāʻeleʻi au ʻi he 1922. Naʻe nofo hoku fāmilí ʻi Rām Allāh, meimei kilomita ʻe 16 ki he tokelau ʻo Selusalemá. Ko ʻeku ongo mātuʻá ko ʻena fakatou haʻu mei he motu ko Kēliti, ka naʻe tupu hake ʻeku tangataʻeikí ʻaku ʻi Nasaleti. Ko e siʻisiʻi taha au ʻi he tamaiki tangata ʻe toko tolu mo e fefine ʻe ua. Ne hoko e fakamamahi lahi ki homau fāmilí ʻi he mate hoku tuongaʻane fika uá, ʻa ia naʻe melemo ʻi he Vaitafe Sioataní lolotonga ha ʻeva ʻenau kalasí. Hili ʻa e meʻa fakamamahi ko ení naʻe ʻikai toe fie nofo ʻeku fineʻeikí ʻaku ʻi Rām Allāh, pea ne mau hiki ai ki ʻAtenisi, Kalisi, ʻi hoku taʻu tolú.

Aʻu ʻa e Moʻoni Fakatohitapú ki Homau Fāmilí

Taimi nounou hili ʻemau aʻu ki Kalisí, ko hoku tuongaʻane lahi tahá, ʻa Nikos, ʻa ia naʻe taʻu 22 he taimi ko iá, naʻe fetaulaki ia mo e Kau Ako Tohi Tapú, ko hono ui ia ʻo e Kau Fakamoʻoni ʻa Sihová he taimi ko iá. ʻI hono maʻu ko ia ʻa e ʻilo Fakatohitapú ne hoko ai ha fiefia lahi mo ha holi faivelenga ʻiate ia ki he ngāue faka-Kalisitiané. Naʻe matalili heni ʻeku tangataʻeikí, peá ne tuli ʻa Nikos mei ʻapi. Kae kehe, ʻi he taimi ka ʻalu ai ʻeku tangataʻeikí ki Pālesitainé, ko ʻeku faʻeé, ko hoku tokouá, pea mo au, ne mau ʻalu kimautolu mo Nikos ki he ngaahi fakataha faka-Kalisitiané. ʻOku ou kei fanongo pē ki he lea loto-māfana ʻeku faʻeé fekauʻaki mo e ngaahi meʻa naʻá ne fanongo ai ʻi he ngaahi fakataha ko iá. Kae taimi nounou mei ai, ne maʻukovia ia ʻe he kanisaá peá ne mālōlō ai ʻi hono taʻu 42. Lolotonga ʻa e taimi faingataʻa ko iá, ko hoku tokouá, ʻa Ariadne, naʻá ne tokangaʻi anga-ʻofa homau fāmilí. Neongo ʻene kei finemuí, naʻá ne hangē ha faʻeé kia au ʻi he ngaahi taʻu ka hokó.

Naʻe faʻa ʻave maʻu pē au ʻe heʻeku tangataʻeikí ki he Siasi ʻOfotokisií ʻi he taimi naʻá ne ʻi ʻAtenisi aí, pea hili ʻene mālōloó, naʻá ku hokohoko atu pē ke ʻalu ki he siasí, neongo naʻe ʻikai kei hokohoko. Koeʻuhi naʻe ʻikai te u sio ki ha fakaʻilonga ʻo ha līʻoa fakaʻotua naʻe fai ʻi he siasí, naʻe iku pē ʻo ʻikai te u toe maʻu lotu.

Hili e mālōlō ʻeku tangataʻeikí, naʻe lava ʻo maʻu ʻeku ngāue tuʻumaʻu ʻi he potungāue paʻangá. Kae kehe, ko hoku tuongaʻané, naʻá ne līʻoa ʻe ia ʻene moʻuí ki he ngāue malangaʻi ʻo e Puleʻangá, ʻo ngāue ai ʻi he ngaahi taʻu lahi ʻi Kalisi. ʻI he 1934 naʻá ne hiki ai ki Saipalo. ʻI he taimi ko iá, naʻe ʻikai ha Kau Fakamoʻoni ʻa Sihova kuo papitaiso ʻi he motu ko iá, ko ia naʻá ne maʻu ʻa e monū ko hono ʻai ke fakalakalaka ki muʻa ai ʻa e ngāue fakamalangá. Hili ʻene malí, ko hono uaifí, ʻa Galatia, naʻe toe ngāue mo ia ko ha faifekau taimi-kakato ʻi he ngaahi taʻu lahi.a Naʻe toutou ʻomai ʻe Nikos ʻa e ngaahi tohi mo e ngaahi makasini, ka naʻe tātātaha haʻamau lau ia. Naʻá ne nofo ai pē ʻi Saipalo ʻo aʻu ki heʻene mālōlō.

ʻAi ʻa e Moʻoni ʻo e Tohi Tapú ko ʻEku Meʻa

ʻI he 1940, ko George Douras, ko ha Fakamoʻoni faivelenga ʻi ʻAtenisi pea ko ha kaumeʻa ʻo Nikos, naʻe ʻaʻahi mai ia kia kimautolu ʻo ne fakaafeʻi kimautolu ki ha kiʻi kulupu ako Tohi Tapu ʻi hono ʻapí. Naʻa mau tali fiefia ʻa e fakaafé. Naʻe vave ʻemau kamata ke vahevahe atu ki he niʻihi kehé ʻa e meʻa naʻa mau akó. ʻI hono maʻu ʻa e ʻilo mei he Tohi Tapú naʻe taki atu ai ʻa hoku tokouá mo au ke fakatapui ʻema moʻuí kia Sihova. Ko Ariadne naʻe papitaiso ia ʻi he 1942, pea ko au ʻi he 1943.

ʻI he ngata ʻa e Tau II ʻa Māmaní, naʻe fakaafeʻi kimaua ʻe Nikos ke ma ō ange ki Saipalo, ko ia ʻi he 1945 naʻá ma hiki ai ki Nicosia. ʻI he ʻikai hangē ko Kalisí, ʻi Saipalo naʻe ʻikai ke tapui ai ʻa e ngāue fakamalangá. Naʻá ma kau ʻo ʻikai ngata pē he ngāue fale-ki-he-falé kae pehē foki ki he fakamoʻoni ʻi he halá.

Hili ha taʻu ʻe ua mei ai, naʻe pau ke foki ʻa Ariadne ki Kalisi. Naʻá ne fetaulaki ai mo hono husepāniti ki he kahaʻú, ko ha kaungālotu kia Sihova, ko ia naʻá ne nofo ai pē ʻi ʻAtenisi. Naʻe vave hono fakaʻaiʻai mai ʻe hoku tuongaʻane-ʻi-he-fonó mo hoku tokouá ke u foki ange ki Kalisi ʻo ngāue fakafaifekau taimi-kakato ʻi he kolomuʻá. Koeʻuhi ko e ngāue tāimuʻá naʻe hoko maʻu pē ko ʻeku taumuʻa, naʻá ku foki ai ki ʻAtenisi, ʻa ia naʻe lahi ange ai ʻa e fiemaʻú.

Fakaava Mai ʻa e Ngaahi Matapā Foʻou ʻo e Faingamālié

ʻI Nōvema 1, 1947, naʻá ku kamata tāimuʻa ai, ʻo fakamoleki ʻa e houa ʻe 150 ʻi he māhina kotoa pē ʻi he ngāue fakamalangá. Ko e feituʻu ngāue ʻemau fakatahaʻangá naʻe lahi ʻaupito, pea naʻe pau ke u fai ha lue lahi. Neongo ia, naʻá ku maʻu ha ngaahi tāpuaki lahi. Naʻe faʻa puke ʻe he kau polisí ha Kau Fakamoʻoni pē ʻoku nau ʻilo ʻoku kau ʻi he ngāue fakamalangá pe ko e maʻu ʻo e ngaahi fakataha faka-Kalisitiané, ko ia naʻe ʻikai fuoloa kuo puke au.

Naʻe tukuakiʻi au ko e fai fakaului, ko ha hia mamafa ia ʻi he taimi ko iá. Naʻe tautea au ki he māhina ʻe ua ʻi he Pilīsone Kakai Fefine Averof ʻi ʻAtenisí. Naʻe ʻosi ʻi ai ʻa e fefine Fakamoʻoni ia ai, pea naʻá ma fakatou maʻu ha feohi fiefia mo fakatupu langa hake faka-Kalisitiane ai, neongo hono tuku pōpula kimauá. Hili ʻeku ngāueʻi hoku tauteá, naʻá ku hokohoko fiefia atu ʻeku ngāue tāimuʻá. Ko e tokolahi ʻo kinautolu naʻá ku ako Tohi Tapu mo ia he taimi ko iá ʻoku nau kei hoko pē ko e kau sevāniti faitōnunga ʻa Sihova, pea ʻoku ʻomi ai kia au ha fiefia lahi.

ʻI he 1949, naʻá ku maʻu ai ha fakaafe ke kau ʻi he kalasi hono 16 ʻa e Akoʻanga Tohi Tapu Taua Leʻo ko Kiliatí ʻi he ʻIunaite Seteté, ʻa ē ʻoku akoʻi ai ʻa e kau sevāniti taimi-kakató ki he ngāue fakamisinalé. Naʻe fiefia ai hoku kāingá mo au. Naʻá ku palani ke kau ʻi ha fakataha-lahi fakavahaʻapuleʻanga ʻi he 1950 ʻi he Kolo Niu ʻIoké pea toki hū ai ki Kiliati.

Hili ʻeku tūʻuta ki he ʻIunaite Seteté, naʻá ku maʻu ai ʻa e monū ʻo e ngāue ʻi ha ngaahi māhina siʻi ko ha tauhi-ʻapi ʻi he ʻuluʻi ʻapitanga ʻi he māmaní ʻo e Kau Fakamoʻoni ʻa Sihová ʻi he Kolo Niu ʻIoké. Ko e ʻātakaí naʻe maʻa, lelei pea fakatupu langa hake, pea naʻe haʻofia au ʻe he fanga tuongaʻane mo e fanga tokoua malimali. Te u manatu ʻofa maʻu pē ki he māhina ʻe ono ko ia naʻá ku fakamoleki aí. Ne hoko mai leva ʻa e taimi ke hū ai ki he Akoʻanga Kiliatí, ʻa ia ko ha māhina vave ʻaupito ia ʻe nima ʻo e ako lahi mo e fakahinohino. Ko kimautolu kau akó ne mau hoko ai ʻo ʻilo tā he meʻa fakakoloa mo fakaʻofoʻofa moʻoni ko hono ʻiloʻi ʻo e Folofolá, pea naʻe fakalahi ai ʻemau fiefia mo e holi ke vahevahe ki he niʻihi kehé ʻa e ʻilo foaki-moʻui ʻo e moʻoní.

Ko ʻEku ʻUluaki Vāhenga-Ngāue Fakamisinalé

ʻI he Akoʻanga Kiliatí, naʻe fakaʻatā ai ke mau fili homau hoa ngāue ki he kahaʻú ki muʻa ke maʻu ʻemau ngaahi vāhenga-ngāue fakamisinalé. Ko Ruth Hemmig (Bosshard he taimí ni), ko ha tokoua lelei ʻaupito, naʻe hoko ko hoku hoa ngāué. Ko Ruth mo au naʻá ma fiefia lahi ʻi he taimi naʻe maʻu mai ai ʻema vāhenga-ngāue ki ʻIsitenipulu, Toake​—ko ha kolosiʻanga ʻi he vahaʻa ʻo ʻĒsia mo ʻIulopé! Naʻá ma ʻilo ko e ngāue fakamalangá naʻe teʻeki ke tali lelei ʻi he fonua ko iá, ka naʻe ʻikai haʻama veiveiua ʻe poupouʻi kimaua ʻe Sihova.

Ko ʻIsitenipulú ko ha fuʻu kolo fakaʻofoʻofa ia ʻoku fio ai e kakai kehekehe. Naʻá ma ʻilo ai e hakeʻuta ʻa e ngaahi feituʻu fakatauʻangá, ko ha tuifio ʻo e ngaahi founga kuki lelei taha ʻi he māmaní, ngaahi misiume fakaholomamata, ngaahi kaungāʻapi lelei mo e ngaahi matāfanga ʻoku fakaʻofoʻofa maʻu pē. Ko e meʻa ʻoku mahuʻinga angé, naʻá ma ʻilo ai ha kakai loto-totonu naʻa nau loto ke ako fekauʻaki mo e ʻOtuá. Ko e kiʻi kulupu ʻo e Kau Fakamoʻoni ʻi ʻIsitenipulú naʻe meimei lahi pē ko e kau ʻAmīnia, Kalisi mo e kau Siu. Kae kehe, naʻe lahi mo e kakai mei he ngaahi fonua kehé, pea naʻe ʻaonga ke maheni mo ha ngaahi lea kehekehe, kau ai ʻa e faka-Toaké. Naʻá ma mātuʻaki fiefia he fetaulaki mo e kakai ʻo e ngaahi fonua kehekehe ʻa ia naʻa nau fieinua ki he moʻoní. Ko e tokolahi ʻo e faʻahingá ni ʻoku nau kei hokohoko atu ke tauhi faitōnunga kia Sihova.

Ko e meʻa pangó, naʻe taʻemalava kia Ruth ke fakafoʻou ʻene ngofua nofó, pea naʻe pau ai ke ne mavahe mei he fonuá. Naʻá ne hokohoko atu ʻi he ngāue taimi-kakató ʻi Suisalani. Hili ʻa e ngaahi taʻu kotoa ko ení, heʻikai ngalo ʻia au ʻa ʻene feohi lelei mo fakatupu langa haké.

Hiki ki ha Toe Hemisefia Kehe

ʻI he 1963 naʻe ʻikai fakafoʻou ai ʻeku ngofua nofo ʻi Toaké. Naʻe faingataʻa ke māvae mo e kaungā Kalisitiane ko ia ne u sio ʻi heʻenau fakalakalaka fakalaumālié lolotonga ʻenau fāinga ke ikuʻi ʻa e ngaahi faingataʻa lahi. Koeʻuhi ke ʻai au ke u fiefia, naʻe anga-ʻofa ai hoku kāingá ʻo totongi ʻeku ʻalu ki he Kolo Niu ʻIoké ke u maʻu ha fakataha-lahi ai. Naʻe teʻeki ke u maʻu ʻeku vāhenga-ngāue hono hokó.

Hili ʻa e fakataha-lahí, naʻe vaheʻi au ki Lima, Pelū. Fakataha mo ha tokoua finemui ʻa ia ʻe hoko ko hoku hoa ngāué, naʻá ku ʻalu hangatonu pē mei Niu ʻIoke ki hoku vāhenga-ngāue foʻoú. Naʻá ku ako ki he lea faka-Sipeiní peá u nofo ʻi he ʻapi misinalé ʻa ia naʻe tuʻu ʻi ʻolunga ʻi he ʻōfisi vaʻa ʻo e Kau Fakamoʻoni ʻa Sihová. Naʻe fakalata ʻa e malanga aí pea mo e hoko ʻo maheni mo e fanga tuongaʻane mo e fanga tokoua fakalotofonuá.

Toe Vāhenga-Ngāue ʻe Taha, Toe Lea ʻe Taha

ʻI he ʻalu ʻa e taimí, ko hoku kāinga ʻi Kalisí ne kamata ke nau hokosia ʻa e haʻahaʻa ʻo e taʻumotuʻá mo e hoholo ʻo e tuʻunga moʻui leleí. Naʻe ʻikai ʻaupito te nau fakalototoʻaʻi au ke tuku ʻeku ngāue taimi-kakató pea foki tokua ki he moʻui anga-mahení koeʻuhí ke tokoniʻi ai kinautolu. Kae kehe, hili ha fakakaukau lahi mo ha lotu, naʻá ku ʻilo ai ʻe lelei ange ke u ngāue ofi ange ki hoku fāmilí. Ko e fanga tuongaʻane fua fatongiá naʻa nau loto-lelei ʻi he anga-ʻofa ʻo vaheʻi au ki ʻĪtali, pea naʻe loto hoku kāingá ke totongi ʻa e fakamole ki heʻeku fehikitakí. Ko e meʻa ne hokó, naʻe ʻi ai ʻa e fuʻu fiemaʻu lahi ia ki ha kau ʻevangeliō ki ʻĪtali.

Ne pau ai kiate au ke u toe ako ha lea foʻou​—ko e faka-ʻĪtalí. Ko ʻeku ʻuluaki vāhenga-ngāué ko e kolo ko ia ko Foggia. Ki mui ai, naʻe ʻave au ki Naples, ʻa ia naʻe lahi ange ai ʻa e fiemaʻú. Ko hoku feituʻu ngāué ko Posilipo, ko e taha ʻo e ngaahi feituʻu fakaʻofoʻofa taha ʻo Naples. ʻOkú ne kāpui ʻa e fuʻu ʻēlia lahi, pea naʻe taha pē ʻa e tokotaha malangaʻi ʻo e Puleʻangá. Naʻá ku saiʻia ʻaupito ʻi he ngāué, pea naʻe tokoniʻi au ʻe Sihova ke kamata ha ngaahi ako Tohi Tapu lahi. ʻI he ʻalu ʻa e taimí, naʻe tupulaki ai ha fakatahaʻanga kaukaua ʻi he feituʻu ko iá.

ʻI he muʻaki kakai fakalotofonua naʻá ku ako Tohi Tapu mo iá naʻe kau ai ha faʻē mo ʻene fānau ʻe toko fā. Ko ia mo ʻene ongo tamaiki fefine ʻe toko ua ʻoku nau kei hoko ko e Fakamoʻoni ʻa Sihova. Naʻá ku toe ako mo ha ongo meʻa mali naʻe ʻi ai ʻena kiʻi taʻahine. Naʻe fakalakalaka kotoa ʻa e fāmilí ʻi he moʻoní ʻo fakahāhā ʻenau fakatapuí ʻaki ʻa e papitaiso ʻi he vaí. ʻOku mali he taimí ni ʻa e ʻofefiné ki ha sevāniti faitōnunga ʻa Sihova, pea ʻokú na fakatou ngāue faivelenga ki he ʻOtuá. Lolotonga ʻa e ako Tohi Tapu mo ha fuʻu fāmili tokolahi ʻe taha, naʻe maongo kia au ʻa e mālohi ʻo e Folofola ʻa e ʻOtuá. ʻI he taimi naʻa mau lau ai ha ngaahi konga Tohi Tapu kehekehe ʻoku hā ai ʻoku ʻikai hōifua ʻa e ʻOtuá ʻi he lotu fakafou ʻi he ngaahi ʻīmisí, naʻe ʻikai toe tatali ʻa e faʻeé ia ke ʻosi ʻa e akó. ʻI he taimi pē ko iá, naʻá ne fakaʻauha leva ʻa e ngaahi ʻīmisi kotoa pē ʻi hono falé!

ʻI he Ngaahi Fakatamaki ʻi Tahi

ʻI heʻeku feʻaluʻaki ʻi he vahaʻa ʻo ʻĪtali mo Kalisí, naʻá ku folau maʻu pē ʻi he vaká. Ko e folaú naʻe faʻa toka mālie ʻaupito. Ka ʻi he foʻi folau ʻe taha, ʻi he faʻahitaʻu māfana ʻo e 1971, naʻe kehe ia. Ko ʻeku foki eni ki ʻĪtali ʻi he vaka pāsese ko e Heleanna. Pongipongia ʻi ʻAokosi 28, naʻe mapuna ai ha afi ʻi he peito ʻo e vaká. Naʻe mafola ʻa e afí pea pehē ki he ilifia naʻe ʻi he kau pāsesé. Ne loto-siʻi e finemātuʻá, tangi e fānaú pea ko e mātuʻa tangatá ne nau lāunga mo kaikaila fakamanamana. Naʻe lele ʻa e kakaí ki he fanga kiʻi vaka fakahaofi moʻui ʻi he ongo kaokao ʻo e vaká. Kae kehe, naʻe siʻisiʻi ʻaupito ʻa e ngaahi meʻa kakaú, pea ko e meʻa tuku hifo ʻo e ngaahi vaka fakahaofi moʻuí naʻe ʻikai ke ngāue lelei. Naʻe ʻikai haʻaku meʻa kakau, ka ko e ulo ʻa e afí kuo fakaʻau ia ke māʻolunga ange, ko ia ko e meʻa fakapotopoto pē ke faí ko e puna ki tahi.

ʻI heʻeku tō pē ki tahí, naʻá ku sio ʻoku tētē ofi mai kia au ha fefine ʻokú ne tui ha meʻa kakau. Naʻe hangē ʻoku ʻikai lava ʻo kakaú, ko ia naʻá ku puke ia ʻi hono nimá ʻo fusi mamaʻo mei he vaká ʻa ia ʻoku fakangotongoto hifo. Naʻe fakaʻau ke hou ange ʻa e tahí, pea ko e feinga ko ia ke kei tēteé ne ʻai ai ʻou helaʻia ʻaupito. Ko e tuʻunga kuo hokó ne hangē kuo ʻikai ha toe ʻamanakí, ka naʻá ku hanganaki kole pē kia Sihova ki ha loto-toʻa, pea naʻe ʻomi ai heni kia au ha mālohi. Naʻe ʻikai te u faʻa mataʻofi ʻa ʻeku manatu ki he vaka ngoto naʻe hokosia ʻe he ʻapositolo ko Paulá.​—Ngāue, vahe 27.

ʻI heʻeku piki ki hoku kaungā kakaú, naʻá ku fāinga mo e peaú ʻi ha houa ʻe fā, ʻo kakau ʻi he taimi naʻá ku maʻu ai ha ivi ke fai iá mo ui ai pē kia Sihova ki ha tokoni. ʻI he faai atu ʻa e taimí, naʻá ku fakatokangaʻi ha kiʻi vaka ʻoku fakaofiofi mai. Ne fakahaofi au, ka ko hoku kaungā kakaú ne ʻosi mate ia. ʻI heʻemau aʻu ki he kolo ko Bari, ʻĪtali, naʻe ʻave ai au ki ha falemahaki, ʻa ia naʻe fai ai hoku faitoʻo. Ne pau ke u nofo ʻi he falemahakí feʻunga mo ha ngaahi ʻaho siʻi, pea naʻe tokolahi ʻa e Kau Fakamoʻoni ne ʻaʻahi mai kia au, ʻo ʻomi ʻi he anga-ʻofa ʻa e ngaahi meʻa kotoa naʻá ku fiemaʻú. Ko e ʻofa faka-Kalisitiane naʻa nau fakahāhaá naʻe maongo loloto ia ki he niʻihi kehé ʻa ia naʻa nau ʻi he tafaʻaki ko ia ʻo e falemahakí.b

Hili ʻeku sai leleí, naʻe vaheʻi au ki Loma. Naʻe kole mai ke u ngāueʻi ʻa e feituʻu pisinisi ʻi he loto-mālie ʻo e koló, ʻa ia naʻá ku fai ia ʻi he taʻu ʻe nima, ʻi he tokoni ʻa Sihová. ʻI he taʻu fakakātoa ʻe 20, naʻá ku fiefia ai ʻi he ngāue fakafaifekau ʻi ʻĪtalí, pea naʻá ku hoko ʻo ʻofa ʻi he kakai ʻĪtalí.

Foki ki he Feituʻu Naʻá Ku Kamata Aí

ʻI he faai mai ʻa e taimí, ne hoholo ʻa e moʻui ʻa Ariadne mo hono husepānití ʻo toe kovi ange. Naʻá ku ʻilo kapau te u nofo ofi kia kinaua, ʻe lava ai ke u totongi fakafoki ange ʻi ha tuʻunga ʻa e meʻa kotoa kuó na fai ʻi he anga-ʻofa maʻakú. Te u pehē ko e meʻa fakamamahi moʻoni ia ke mavahe mei ʻĪtali. Neongo ia, ko e fanga tuongaʻane fua fatongiá naʻa nau fakaʻatā mai, pea talu mei he faʻahitaʻu māfana ʻo e 1985 mo ʻeku ngāue tāimuʻa ʻi ʻAtenisi, ʻa ia ne kamata mei ai ʻeku ngāue taimi-kakató ʻi he 1947.

Naʻá ku malanga ʻi he feituʻu ngāue naʻe vaheʻi ki he fakatahaʻanga naʻá ku ʻi aí, pea naʻá ku kole ki he fanga tuongaʻane ʻi he ʻōfisi vaʻá pe ʻe lava ke u toe malanga ʻi he feituʻu pisinisi ʻi he loto-mālie ʻo e koló. Ko e meʻa eni naʻá ku fai ʻi he taʻu ʻe tolu mo ha hoa tāimuʻa. Naʻá ma malava ʻo fai ha fakamoʻoni fakaʻāuliliki ki he kakai naʻe tātātaha ke maʻu kinautolu ki ʻapí.

Kae kehe, ʻi he ʻalu ʻa e taimí, ko ʻeku holi ko ia ke ngāué naʻe hokohoko fakafoʻou maʻu pē ka ko hoku ivi fakaesinó naʻe ʻikai. Kuo mohe eni ʻi he maté ʻa hoku tuongaʻane-ʻi-he-fonó. Ko Ariadne, ʻa ia kuo hangē pē ha faʻē kia aú, kuo ʻikai toe lava ʻo sio. Ka ko au, naʻe lelei ʻeku moʻuí lolotonga ʻa e ngaahi taʻu naʻá ku fakamoleki ʻi he ngāue taimi-kakató. Kae kehe, ki muí ni mai, naʻá ku humu ai ʻi ha sitepu māpele ʻo fasi hoku nima mataʻú. Naʻá ku tō leva ʻo fasi hoku hui-tefito-alangá. Naʻe pau ai ke fai hoku tafa ʻou tokoto mohenga ai ʻi ha taimi lōloa. Kuo ʻikai te u toe lava he taimí ni ʻo ngaungaue takai holo. ʻOku ou ngāueʻaki ha tokotoko ʻo lava ai ke u ʻalu ki ha feituʻu kapau pē ʻe ʻi ai ha taha ke ma kaungā ō. Neongo ia, ʻoku ou fai hoku lelei tahá, ʻo ʻamanaki pē ʻe toe lelei ange hoku tuʻunga fakaesinó. ʻI he kau ʻi he ngāue ako Tohi Tapú, naʻa mo e ʻi ha founga fakangatangatá, ʻoku hokohoko atu ia ko ʻeku maʻuʻanga fiefia mo fiemālie tefitó.

ʻI heʻeku manatu ki he ngaahi taʻu fakafiefia kuó u fakamoleki ʻi he ngāue fakafaifekau taimi-kakató, ʻoku fonu mahuohua ai hoku lotó ʻi he houngaʻia kia Sihova. Ko ia mo e konga fakaemāmani ʻo ʻene kautahá kuó na tokonaki mai maʻu pē ʻa e fakahinohino lelei mo e tokoni mahuʻinga, ʻo fakamafeia ai au ke u aʻusia ʻeku malava taha kuó u fakamoleki ʻi heʻeku moʻuí ʻi he tauhi kiate iá. Ko ʻeku ongoʻi loto-moʻoní ia ke hanga ʻe Sihova ʻo fakaivia au ke hokohoko atu ʻi heʻene ngāué. ʻOku ou fiefia ʻi heʻeku kaunga siʻisiʻi atu ko ia ki he ngāue ako Tohi Tapu fakaemāmani lahi ʻokú ne tatakí. ​—Malakai 3:10.

[Fakamatala ʻi lalo]

[Fakatātā ʻi he peesi 9]

Mo hoku tokouá, Ariadne, mo hono husepānití, Michalis, ʻi heʻeku mavahe ki Kiliatí

[Fakatātā ʻi he peesi 10]

Ko Ruth Hemmig mo au naʻe vaheʻi ki ʻIsitenipulu, Toake

[Fakatātā ʻi he peesi 11]

ʻI ʻĪtali, konga ki muʻa ʻo e 1970 tupú

[Fakatātā ʻi he peesi 12]

ʻI he ʻahó ni, mo hoku tokouá, Ariadne