Ngaahi Fehuʻi mei he Kau Lautohí

ʻOku ʻuhinga nai ʻa e foʻi lea ko e “heiʻilo” ʻi he Sefanaia 2:3 ko e kau sevāniti ʻa e ʻOtuá ʻe ʻikai lava ia ʻo fakapapauʻi te nau maʻu ʻa e moʻui taʻengatá?

ʻOku pehē ʻi he konga Tohi Tapu ko ení: “Vivili kia Sihova, ʻa e kau vaivai ʻo e fonua, ʻa kimoutolu kuo mou feia ʻene konisitutone; mou vivili ki he faitotonu, mou vivili ki he angavaivai: heiʻilo ʻe fufū kimoutolu ʻi he ʻaho ʻo e houhau ʻa Sihova.” Ko e hā ʻoku pehē ai heni ʻi he vēsí “heiʻilo”?

Ke mahinoʻi ʻa e founga ʻe feangainga ai ʻa Sihova mo ʻene faʻahinga faitōnungá ʻi ʻĀmaketoné, ʻoku ʻaonga ke manatuʻi ʻa e meʻa ʻoku akoʻi ʻe he Tohi Tapú ʻo fekauʻaki mo e meʻa ʻe fai ʻe he ʻOtuá ki he faʻahinga ʻoku nau mate ki muʻa ʻi he taimi fakamaau ko iá. Ko e niʻihi te nau hokosia ha toetuʻu ki he moʻui taʻefaʻamaté ʻi he tuʻunga ko ha ngaahi meʻamoʻui laumālie ʻi he ngaahi langí, lolotonga iá ʻe fokotuʻu hake ʻa e niʻihi kehé ki he māmaní fakataha mo e ʻamanaki ke moʻui taʻengata ʻi he Palataisí. (Sione 5:​28, 29; 1 Kolinito 15:​53, 54) Kapau ʻoku manatuʻi pea fakapaleʻi ʻe Sihova ʻa ʻene faʻahinga mateaki ko ia ʻoku mate ki muʻa ʻi ʻĀmaketoné, te ne fakafeangai papau meimei tatau ki heʻene kau sevāniti ʻoku nau moʻui ʻi he ʻaho ʻo ʻene houhaú.

ʻOku toe fakalototoʻa foki ʻa e ngaahi lea fakamānavaʻi ʻa e ʻapositolo ko Pitá. Naʻá ne tohi: “Ka nae fakamoui [ʻe he ʻOtuá] a Noa, aia naa ne malaga aki ae maonioni, moe toko fitu, o ne omi ae lomaki ki he mama oe kakai agahala; O ne tuku ae ogo kolo ko Sotoma mo Komola ki he fakaauha, o ne liliu ia koe efuefu, . . . O ne fakamoui a Lote agatonu, . . . Oku ilo e he Eiki ke fakamoui ae kakai aga faka-Otua mei he gaahi ahiahi, bea ke tuku ae taeagatonu ki he aho oe fakamāu ke tautea.” (2 Pita 2:​5-9, PM) Neongo naʻe fakahoko mai ʻe Sihova ʻa e fakaʻauha ki he fulikivanú ʻi he ngaahi taimi he kuohilí, naʻá ne fakahaofi moʻui fakatouʻosi ʻa Noa mo Lote, ʻa ia naʻá na tauhi faitōnunga kiate iá. ʻE toe fakahaofi ʻe Sihova ʻa e kakai anga-fakaʻotuá ʻi he taimi te ne fakahoko mai ai ʻa e fakaʻauha ki he fulikivanú ʻi ʻĀmaketoné. ʻE hao moʻui ha “fuʻu kakai lahi” ʻo e faʻahinga māʻoniʻoní.—Fakahā 7:​9, 14.

Ko ia ai, ʻoku hā ngalingali ko e “heiʻilo” ʻoku ʻikai ngāueʻaki ia ʻi he Sefanaia 2:3 koeʻuhí ko hano taʻefakapapauʻi ʻa e malava ʻa e ʻOtuá ke fakahaofi ʻa e faʻahinga ʻoku nau maʻu ʻa ʻene hōifuá. ʻI hono kehé, ʻe malava pē ke fufū ha tokotaha ʻi he ʻaho ʻo e houhau ʻa Sihová ʻi heʻene kamata ke vivili ki he faitotonú mo e anga-vaivaí. ʻE makatuʻunga ʻa e fakahaofí ʻi he hokohoko atu ha tokotaha ke vivili ki he anga-vaivaí mo e faitotonú.—Sefanaia 2:3.

[Fakatātā ʻi he peesi 31]

“Oku ilo e he Eiki ke fakamoui ae kakai aga faka-Otua mei he gaahi ahiahi”