Ko ha Ako ko Hono Kau Maʻu Tohi Fakamoʻoni Akó ʻOku Maʻu ʻAonga mei Ai ʻa e Kakai ʻi Māmani Lahi

ʻI HE fakatahaʻanga ʻe 98,000 tupu ʻa e Kau Fakamoʻoni ʻa Sihová ʻi he fonua laka hake he 200, ʻoku akoʻi ai ʻe he ʻOtuá ʻa e kakai mei he tafaʻaki kehekehe ʻo e moʻuí. Ko e tohi ako tefitó ʻa e Tohi Tapú, pea ko e taumuʻa ʻo e akó ni ke tokoniʻi ʻa e faʻahinga tāutaha ke nau laka ki muʻa fakalaumālie, ʻaki hono ako ʻa e finangalo ʻo e ʻOtuá mo e founga ke moʻui ai ʻo fakatatau ki aí. Ko e faʻahinga ʻoku nau tali ʻa e akó ni ʻoku nau maʻu ʻaonga lahi mei ai. Ko e meʻa ʻoku nau akó, ʻoku nau toe vahevahe atu ia ki he niʻihi kehé, ʻi he fehoanaki mo e fakahinohino ʻa Sīsū Kalaisi ke ngaohi ākongá.​—Mātiu 28:​19, 20.

Kuo fokotuʻu ʻe he Kau Fakamoʻoni ʻa Sihová ʻo tānaki atu ki he polokalama ako hokohoko ʻi heʻenau ngaahi fakatahaʻangá, ha ngaahi ako makehe. Ko e taha ʻo e ngaahi akó ni ko e Akoʻanga Ako Fakafaifekaú. Naʻe fokotuʻu ia ʻi ʻOkatopa 1987 ʻi Pittsburgh, Pennsylvania, ʻAmelika. Ko e ʻuluaki kalasí naʻe faʻuʻaki ia ʻa e kau ako lea faka-Pilitānia ʻe toko 24. Talu mei ai kuo fai ʻa e ngaahi koosi ʻi he lea ʻe 21 ʻi he ngaahi fonua ʻe 43. ʻI he aʻu mai ki he taimi ní, kuo ʻosi kau ki ai ʻa e kau mātuʻa mo e kau sevāniti fakafaifekau teʻeki mali mei he ngaahi fonua laka hake he 90. ʻI he kakato ʻa e koosi uike-valú, ʻoku vaheʻi ai ʻa e kau maʻu tohi fakamoʻoni akó ke nau ngāue ʻi he feituʻu ʻoku ʻi ai ha fiemaʻú, ʻi honau fonuá tonu pe ʻi muli. ʻI he aʻu ki he ngataʻanga ʻo e 2005, kuo lavaʻi ai ʻa e kōsí ʻe he kau faifekau Kalisitiane laka hake he toko 22,000. Ko ʻenau ngaahi feinga anga-fakatōkilalo ke pouaki ʻa e ngaahi meʻa ʻo e Puleʻangá pea ke maʻu ʻaonga mei ai ʻa e niʻihi kehé kuo faitāpuekina lahi.​—Palovepi 10:22; 1 Pita 5:5.

Fokotuʻutuʻu ke Kau ki Ai

Koeʻuhi ke kau ki he Akoʻanga Ako Fakafaifekaú, ko e tokolahi taha ʻo e kau akó kuo pau ke nau kole ki ha taimi ʻatā mei heʻenau ngāue konga-taimi pe taimi-kakato fakamāmaní. ʻOku ʻomai ʻe he meʻá ni ʻi he taimi ʻe niʻihi ha palopalema. ʻI Hauaiʻi, naʻe kole ai ʻe ha ongo tangata Kalisitiane ʻa ia naʻe fakaafeʻi ke na kau ki he akó ha taimi ke na ʻatā ai mei heʻena ngāué ʻa ia ko e ongo faiako. ʻI he falala kia Sihová, naʻá na ʻave ʻena tohi kolé, ʻo fakamatalaʻi ai ʻa e ʻuhinga naʻá na loto ai ke kau ki he akó pea mo e founga te na maʻu ʻaonga ai mei aí. Naʻe fakatou fakaʻatā kinaua.

ʻI he ngaahi tuʻunga lahi, ko e Kau Fakamoʻoni kuo nau kole ki ha taimi ʻatā mei he ngāué naʻe tala ange heʻikai te nau toe ngāue ʻi heʻenau foki maí. Naʻa nau fili ke maʻu ʻa e ako mei he kautaha ʻa Sihová, neongo naʻe ʻuhinga iá ko e mole ʻenau ngaahi ngāué. Ko e niʻihi ʻo e faʻahinga tāutahá ni naʻa nau maʻu ki mui ʻa e ngaahi fakaafe mei honau kau pule ngāué ke nau foki ange ʻo ngāue ʻi he ʻosi ʻa e akó. Ko e fakapapauʻi pehē ke kau ki he akó ʻe lava ke fakamatalaʻi nounou ia ʻo peheni: ʻAve hoʻo tohi kolé, lotu ʻo kole ʻa e tokoni ʻa Sihová pea tuku kiate ia ʻa e toengá.​—Sāme 37:5.

“Kau Ako ʻa Sihova”

Ko e koosi uike-valu ʻi he akó ʻoku fakahoko ai hano ako fakaikiiki ʻo e Tohi Tapú. ʻOku ako ai ʻa e kau akó ki he founga ʻoku fokotuʻutuʻu maau ai ʻa e kakai ʻa Sihová ke nau fai hono finangaló mo e founga ʻe lava ke nau ngāue fakafoʻituitui ʻaki ai ʻo toe ola lelei ange ʻa e Tohi Tapú ʻi heʻenau ngāue fakamalangá, ʻi he ngaahi fakataha ʻa e fakatahaʻangá pea ʻi he ngaahi ʻasemipilií.

Ko e tokotaha maʻu tohi fakamoʻoni ako houngaʻia ʻe taha naʻá ne tohi eni ki ha tokotaha ako ne teʻeki ke kau ki he akó: “Tui mai kiate au, te ke hokosia ʻa e ako lelei taha ʻe faifai ange peá ke maʻú. ʻOku toe mohu ʻuhinga ange ai ʻa e konga Tohi Tapu ʻa ia ʻoku lave ai ki he ‘kau ako ʻa Sihova.’ Ko e meʻa kotoa ʻoku hokó ko hano oʻi, fakafuo mo sivi ʻo e lotó mo e angaʻitangatá, ke muimui ofi ange ai ki he faʻifaʻitakiʻanga ʻa Kalaisi Sīsuú. ʻI hoʻo kau ki aí te ke maʻu ai ʻa e hokosia lahi taha ʻi hoʻo moʻuí.”—Aisea 54:13.

ʻEvangeliō, Tauhi mo e Faiako

Ko e kau maʻu tohi fakamoʻoni ako ʻo e Akoʻanga Ako Fakafaifekaú ʻoku nau lolotonga ngāue ʻi he ngaahi fonua ʻe 117. ʻOku kau heni ʻa e ʻotu motu ʻi he Kalipiané, ngaahi feituʻu ʻi he Pasifikí, ʻAtalanitikí, pea pehē ki he lahi taha ʻo e ngaahi fonua ʻa ia ʻoku ʻi ai ʻa e ngaahi ʻōfisi vaʻa ʻo e Kau Fakamoʻoni ʻa Sihová. ʻOku līpooti ʻe he ngaahi vaʻá ʻo pehē ko e ako lelei naʻe maʻu ʻe he kau akó ʻoku tapua atu ia ʻi heʻenau ngāue fakaʻevangelioó, fakaetauhí mo e ngāue fakafaiakó. ʻOku teuʻi kinautolu ʻe heʻenau akó ke nau ngāue lelei ange ʻaki ʻa e Tohi Tapú ʻi he ngāue fakamalangá. (2 Timote 2:​15) ʻI hono tali ʻa e ngaahi fehuʻi ʻa e kakai ʻi he ngaahi ʻapí, ʻoku nau toutou lave ai ki he tohi Reasoning From the Scripturesa pea akoʻi ʻa e kau malanga kehe ʻo e Puleʻangá ke nau fai ʻa e meʻa tatau. Ko e faivelenga ʻa e kau maʻu tohi fakamoʻoni akó ʻoku langaʻi ai ʻa e ongoʻi tatau ʻi he niʻihi kehé, pea ko ʻenau ngaahi ngāué ʻoku ʻai ai ke mālohi ʻa e ngaahi fakatahaʻangá.

ʻOku maʻu ʻe he kau mātuʻa ʻi he fakatahaʻangá ʻa e monū ke “tauhi ʻa e fanga sipi,” ʻo tokoniʻi kinautolu ke nau tokanga ki he ngaahi fiemaʻu fakalaumālie ʻa e niʻihi kehé. (1 Pita 5:​2, 3) Naʻe pehē ʻe ha mātuʻa ʻe taha ʻo fekauʻaki mo e fokotuʻutuʻú: “ʻOku mau houngaʻia ʻi he ʻomai ʻe he ʻōfisi vaʻá ʻa e fanga tokoua kuo akoʻi lelei ke nau tokoniʻi kimautolu ʻi hono fua ʻa e fatongia ko hono tauhi ʻo e tākanga ʻa e ʻOtuá.” Naʻe fakamatala meimei tatau ʻe ha vaʻa ʻi he Hahake Mamaʻó: “Ko e kau maʻu tohi fakamoʻoni akó ʻoku nau manavaʻofa ʻaupito. ʻOku nau ngāue mālohi pea ʻapasiaʻi ai kinautolu ʻe he fakatahaʻangá. Ko ʻenau anga-fakatōkilaló, loto-māfaná mo e vēkeveké ʻoku ʻiloa ia pea ʻoku fakahoungaʻi lahi. ʻOku nau feilaulauʻi loto-lelei kinautolu pea hiki fiefia ki he ngaahi fakatahaʻanga ʻoku nau fiemaʻu ha kau tauhí.” (Filipai 2:4) Ko e kau tangata peheé ʻoku nau fakaivifoʻou ʻa honau kaungātuí pea ʻoku nau tuha mo e fakaongoongolelei.​—1 Kolinito 16:18.

Tānaki atu ki ai, ʻoku tokoniʻi ʻe he kau faiako ʻo e Akoʻanga Ako Fakafaifekaú ʻa e kau akó ke fakalakalaka ʻenau ngaahi pōtoʻi ʻi he tuʻunga ko e kau malanga maʻá e kakaí. ʻI hono ngāueʻaki ʻa e ngaahi fokotuʻu mo e akonaki ʻoku nau maʻú, ko e tokolahi ʻo e kau maʻu tohi fakamoʻoni akó ʻe vavé ni ʻa e lava ke ngāueʻaki kinautolu ʻi he ngaahi polokalama he ʻasemipilī fakasēketí mo e fakataha-lahi fakavahé. Naʻe pehē ʻe ha ʻovasia sēketi ʻe taha ʻoku fai ʻe he kau maʻu tohi fakamoʻoni akó ʻa e “ngaahi malanga lelei ʻaupito pea ngāueʻaki ʻa e fakamatalá ʻaki hono fai ha fakaʻuhinga lelei.”​—1 Timote 4:​13.

Ko e tuʻunga ʻo e faiako ʻi he ngaahi fakataha ʻa e fakatahaʻangá naʻe fakalakalaka lahi ia ʻi ha fonua ʻAfilika hili hono fai ai ʻa e ako ʻi he Akoʻanga Ako Fakafaifekaú pea naʻe vaheʻi ai ʻa e kau maʻu tohi fakamoʻoni akó ki he malaʻe ngāué. Ko e kau mātuʻa kuo fekauʻi atu mei he akoʻangá ʻoku nau fakahoko ʻa e tokoni ʻi he ngāue fakaʻevangelioó, fakaetauhí mo e fakafaiakó, ʻo langa hake fakalaumālie ai ʻa e ngaahi fakatahaʻangá.​—Efeso 4:​8, 11, 12.

Laka ki Muʻa Hono Tokangaʻi ʻo e Fakatahaʻangá

ʻI he ngaahi feituʻu lahi, ʻoku fiemaʻu ai ʻa e kau mātuʻa mo e kau sevāniti fakafaifekau tokolahi ange. Ko e ngaahi fakatahaʻanga ʻe niʻihi naʻe ʻikai ʻaupito ke mei ʻi ai haʻanau kau mātuʻa ʻo kapau naʻe ʻikai fekauʻi atu kia kinautolu ha tokotaha maʻu tohi fakamoʻoni ako mei he Akoʻanga Ako Fakafaifekaú. Ko ia ʻoku vaheʻi ai ʻa e kau maʻu tohi fakamoʻoni ako tokolahi ke nau ngāue ʻi he feituʻu ʻoku ʻi ai ʻa e ngaahi fiemaʻu peheé.

ʻOku līpooti ʻe he ngaahi vaʻa lahi ʻo pehē ko e kau tangata ko ení “ʻoku nau ʻiloʻi lelei ʻa e ngaahi fokotuʻutuʻu fakaekautahá,” “fua fakamātoato honau ngaahi fatongiá,” “tokoniʻi ʻa e niʻihi kehé ke nau mahinoʻi mo fakaʻapaʻapaʻi ʻa e kautaha ʻa Sihová,” pea “tokoni ki he tuʻunga māfana mo e tuʻunga fakalaumālie ʻo ʻenau ngaahi fakatahaʻangá.” ʻOku peheé koeʻuhi ʻoku muimui ʻa e kau maʻu tohi fakamoʻoni ako ʻo e akoʻangá ʻi he meʻa kuo tohi ʻi he Folofola ʻa e ʻOtuá ʻo ʻikai falala ki honau poto ʻonautolú pe lau ʻoku nau poto. (Palovepi 3:​5-7) Ko e kau tangata peheé ʻoku nau hoko ai ko e ngaahi tāpuaki fakalaumālie ki he ngaahi fakatahaʻanga ʻa ia ʻoku vaheʻi kinautolu ki aí.

Ngāue ʻi he Ngaahi Feituʻu Mavahe

Ko e kau maʻu tohi fakamoʻoni ako ʻe niʻihi kuo fakanofo ko e kau tāimuʻa makehé ʻoku nau tokoniʻi ʻa e ngaahi kulupu mavahé ke hoko ko e ngaahi fakatahaʻanga. ʻI hono fakahāhā ʻa e houngaʻia ʻi heʻenau tokoní, naʻe pehē ʻe ha mātuʻa ʻi ha feituʻu mamaʻo ʻi Kuatemala: “Naʻe feʻunga mo e taʻu ʻe 20 ʻeku hohaʻa pe ʻe anga-fēfē hano tokangaʻi ʻo e fuʻu feituʻu ngāue lahi fau ko ení. Naʻá ku faʻa lotu ʻo fekauʻaki mo e meʻá ni. Ko e fanga tokoua mei he Akoʻanga Ako Fakafaifekaú kuo akoʻi lelei kinautolu ki he leá pea pehē ki he ngaahi meʻa fakaekautahá, pea ʻoku ou houngaʻia ʻi he sio ʻoku tokangaʻi anga-ʻofa he taimí ni ʻa e feituʻú.”

Kuo ako ʻa e kau maʻu tohi fakamoʻoni akó ke nau hoko ʻo ola lelei ʻi he ngaahi feituʻu ngāue, ʻa ia kuo pau ai ke nau fai ha ngaahi fononga mamaʻo, ʻi he ngaahi konga fonua moʻungaʻia ke aʻu ai ki he fanga kiʻi kolo moveteveté. ʻOku nau fokotuʻu mo fokotuʻutuʻu vave ai ʻa e fanga kiʻi kulupu mavahe, ʻo aʻu ki he taimi kuo ʻikai lava ai ke fai ia ʻe he niʻihi kehé. Hangē ko ení, naʻe kole ha mātuʻa ʻi Naisa ki he tokoni ʻa e kau maʻu tohi fakamoʻoni akó koeʻuhi naʻá ne ongoʻi ʻe lava ke nau fai ʻa e ngāue lelei ʻaupito ʻi he feituʻu naʻá ne nofo aí. ʻE faingofua ange nai ki he kau tangata taʻemalí, tautefito ʻi he ngaahi feituʻu mamaʻó, ke nau ngāue ko e kau tāimuʻa makehe mo e kau ʻovasia sēketi. ʻI he hangē ko e ʻapositolo ko Paulá, kuo pau ke nau fekuki mo e ‘tuutamaki i he gaahi vai mo e kaihaa kau, i he tuutamaki i he toafá,’ mo e ngaahi hohaʻa fakafoʻituituí pea pehē ki he loto-moʻua ki he ngaahi fakatahaʻanga ʻoku nau tauhí.—2 Kolinito 11:​26-28, PM.

Maʻu ʻAonga ʻa e Toʻutupú

ʻOku fakaʻaiʻai ʻe he Tohi Tapú ʻa e toʻutupú ke nau manatuʻi ʻa honau Tokotaha-Fakatupú. (Koheleti 12:2 [Koh 12:​1, PM]) Ko e kau maʻu tohi fakamoʻoni ako faivelenga ʻi he Akoʻanga Ako Fakafaifekaú ko e ngaahi faʻifaʻitakiʻanga lelei kinautolu ki he toʻutupu Kalisitiané. Hili e tūʻuta ʻa e ongo maʻu tohi fakamoʻoni ako ʻi he fakatahaʻanga ʻe taha ʻi ʻAmelika, naʻe liunga ua ai ʻa e lahi ʻo e taimi fakakātoa naʻe fakamoleki ʻe he fanga tokouá ʻi he ngāue fakafaifekaú. ʻIkai ngata aí, naʻe tupu ʻa e tokolahi ʻo e kau tāimuʻa tuʻumaʻú, pe kau fanongonongo taimi-kakato ʻo e Puleʻangá mei he toko 2 ki he toko 11. Ko e meʻa anga-maheni eni kuo hoko ʻi he ngaahi fakatahaʻanga lahi.

ʻOku toe fakalototoʻaʻi ʻe he kau maʻu tohi fakamoʻoni akó ʻa e kau talavoú ke nau fakakaukau ke kau ki he Akoʻanga Ako Fakafaifekaú. Kuo ueʻi ʻe he meʻá ni ʻa e niʻihi ʻoku teʻeki ai te nau ngāue ko e kau sevāniti fakafaifekaú ke nau kakapa atu ki he monū ko iá. ʻOku ui ʻe he vaʻa ʻi Netalení ʻa e kau maʻu tohi fakamoʻoni ako ʻi he Akoʻanga Ako Fakafaifekaú ko e “ngaahi faʻifaʻitakiʻanga moʻonia ki he kau talavou ʻoku nau fakakaukauloto ki he meʻa te nau fai ʻaki ʻenau moʻuí.”

Ngāue ʻi he Ngaahi Fakatahaʻanga Lea-Muli

ʻI he ngaahi fonua lahi, ʻoku lele-i-matangi ai ʻa e ngaahi feinga ke malangaʻi ʻa e ongoongo leleí ki he kakaí ʻi heʻenau lea tuʻufonuá. Ko e kau maʻu tohi fakamoʻoni ako ʻi he Akoʻanga Ako Fakafaifekaú ʻoku nau faʻa ako ʻa e ngaahi lea kehe pea ngāue ʻi he ngaahi feituʻu ʻoku tokolahi fau ai ʻa e kakai ʻoku hiki atu ki aí. Ko e fakatātaá, ʻi Pelisiume, ʻoku ʻi ai ha fiemaʻu ʻo e kau malanga tokolahi ange ʻo e Puleʻangá ʻi he malaʻe ngāue ʻi he lea faka-Lūsiá, Pēsiá mo e ʻAlipēniá.

Ko e ngaahi fakatahaʻanga mo e kulupu lea muli ʻi Mekisikou, Pilitānia, Siamane, ʻAmelika, ʻĪtali mo e ngaahi fonua kehe, kuo nau ʻosi maʻu ʻaonga lahi mei he kau ʻovasia fefonongaʻaki, kau mātuʻa mo e kau sevāniti fakafaifekau ʻa ia ko e kau maʻu tohi fakamoʻoni ako kinautolu mei he Akoʻanga Ako Fakafaifekaú. Ko e vaʻa ʻi Kōleá ʻoku līpooti ai “ko e kau maʻu tohi fakamoʻoni ako ʻe toko 200 tupu ʻoku nau fakahoko ha ngafa tuʻu-ki-muʻa ʻi hono tokoniʻi ʻa e ngaahi fakatahaʻanga mo e ngaahi kulupu lea mulí.”

Ngāue Fakatōkilalo ʻi he Ngaahi Malava ʻe Niʻihi

Tānaki atu ki he ngāue fakataha mo e ngaahi kulupu mo e fakatahaʻanga lea mulí, ko e faʻahinga kuo maʻu tohi fakamoʻoni ako mei he Akoʻanga Ako Fakafaifekaú ʻoku nau ngāue ko e kau mātuʻa, kau sevāniti fakafaifekau mo e kau ʻovasia fefonongaʻaki. ʻOku tali ʻe he niʻihi ʻa e ngaahi vāhenga-ngāue ʻi he ngaahi fonua kehe, ʻi hono fakalato nai ʻa e ngaahi fiemaʻu fakavavevave ʻi he Potungāue Ngāue ʻi ha vaʻa. Ko e faʻahinga kuo nau maʻu ʻa e ngaahi pōtoʻi fakaelangá ʻoku lava ke nau kau ʻi he polokalama langa Fale Fakatahaʻangá.

Ko e tupu ʻi māmani lahi ʻi he lahi ʻo e ngaahi fakatahaʻangá mo e sēketí ʻoku ʻuhinga iá ʻoku fiemaʻu maʻu pē ʻa e kau ʻovasia fefonongaʻaki tokolahi ange. Ke tokoni ki hono feau ʻa e fiemaʻu ko ení, ʻoku maʻu ai ʻe he kau maʻu tohi fakamoʻoni ako kuo fili mei he Akoʻanga Ako Fakafaifekaú, ha ako uike hongofulu ʻi he ngāue fefonongaʻakí pea nau ngāue leva ko e kau ʻovasia sēketi tokoni pe tuʻumaʻu. Ko e kau maʻu tohi fakamoʻoni ako ʻe toko 1,300 nai ʻoku nau lolotonga ngāue ko e kau ʻovasia fefonongaʻaki ʻi he ngaahi fonua ʻe 97. ʻI he fonua ʻAfilika ʻe taha, ko e peseti ʻe 55 ai ʻo e kau ʻovasia fefonongaʻakí kuo nau maʻu tohi fakamoʻoni ako mei he Akoʻanga Ako Fakafaifekaú. ʻI ha toe fonua ʻAfilika ʻe taha, ko e fiká ai ko e peseti ʻe 70.

ʻI he Hahake Mamaʻó, Kānata, ʻAmelika, ʻAositelēlia mo ʻIulope, kuo fekauʻi atu ai ʻa e kau maʻu tohi fakamoʻoni ako ʻe laui teau ʻo e akoʻangá ke nau fakalato ʻa e ngaahi fiemaʻu makehe ʻi he ngaahi fonua kehé. ʻI he foungá ni, kuo fakaaʻu atu ai ʻa e ngaahi ʻaonga mei he akoʻangá ki māmani lahi.

Fakafou ʻi hono ʻAló, ʻa Sīsū Kalaisi, kuo fokotuʻu ai ʻe Sihova ʻa e kau ʻevangeliō, kau tauhi, kau faiako mo e niʻihi kehe ʻa ia ʻoku nau pouaki ʻa e ngaahi meʻa ʻo e Puleʻangá ʻi he ngaahi ʻaho fakaʻosi ko ení. ʻOku ʻi ai ha ngaahi ʻamanaki ki ha toe tupu lahi ange ʻi he tokolahi ʻo e kakai ʻa e ʻOtuá? ʻAupito! Ko ia ʻoku ʻi ai ha fiemaʻu fakautuutu ki ha kau tangata fakatapui ke nau kakapa atu ki ha fatongia lahi ange. (Aisea 60:22; 1 Timote 3:​1, 13) ʻOku ʻoange ʻe he Akoʻanga Ako Fakafaifekaú ki he kau mātuʻá mo e kau sevāniti fakafaifekaú ha faingamālie ke nau hoko ai ʻo mateuteu ke fano atu ʻi heʻenau ngāue fakafaifekaú, ʻo ʻaonga lahi kia kinautolu tonu pea ki he niʻihi kehe ʻi māmani lahí.

[Fakamatala ʻi lalo]

[Fakatātā ʻi he peesi 10]

Ko e Akoʻanga Ako Fakafaifekaú ʻoku pouaki ai ʻi māmani lahi ʻa e ngaahi meʻa ʻo e Puleʻangá

[Fakatātā ʻi he peesi 13]

ʻOkú ke ʻamanaki ke hū ki he Akoʻanga Ako Fakafaifekaú pea hoko ai ʻo ʻaonga ki he niʻihi kehé?