Talanoa ki he Moʻuí

Ko e Ngaahi Fili Totonú Naʻe Iku Ia ki he Ngaahi Tāpuaki Tuʻuloa

Fakamatala fai ʻe Paul Kushnir

ʻI HE 1897 naʻe hiki ai ʻa ʻeku ongo kuí mei ʻIukalaine ki Kānata ʻo nofo ofi ki Yorkton, Saskatchewan. Naʻá na tūʻuta ai mo e fānau ʻe toko fā—ko e tamaiki tangata ʻe toko tolu mo ha taʻahine. ʻI he 1923 naʻe hoko ai ʻa e taʻahiné, ʻa ia ko Marinka ko ʻeku faʻeé; ko ʻene fānau ʻaki au hono fitú. Ko e moʻuí ʻi he taimi ko iá naʻe faingofua mo nonga. Naʻa mau maʻu ʻa e meʻakai lelei mo e vala māfana, pea naʻe tokonaki mai ʻe he puleʻangá ʻa e ngaahi ngāue tefito. Ko e ngaahi kaungāʻapi anga-fakakaumeʻá naʻa nau fetokoniʻaki ʻi he ngaahi ngāue lalahí. Lolotonga ʻa e taimi momoko ʻo e 1925, naʻe ʻaʻahi mai ai kia kimautolu ʻa e tokotaha ʻo e kau ako Tohi Tapú, hangē ko ia naʻe uiʻaki ʻa e Kau Fakamoʻoni ʻa Sihová he taimi ko iá. Naʻe ueʻi kimautolu ʻe he ʻaʻahi ko iá ke mau fai ʻa e ngaahi fili ʻa ia ʻoku ou kei houngaʻia ai.

Aʻu Mai ki Homau ʻApí ʻa e Moʻoni Fakatohitapú

Naʻe tali ʻe he fineʻeikí ha fanga kiʻi tohi mei he tokotaha Ako Tohi Tapú pea naʻe vave ʻa ʻene ʻiloʻi ʻa e moʻoní. Naʻá ne fai ʻa e fakalakalaka vave fakalaumālie peá ne papitaiso ʻi he 1926. ʻI he hoko ʻa e fineʻeikí ko ha tokotaha Ako Tohi Tapú, naʻe ʻomai ai ki homau fāmilí ha vakai foʻou fakalūkufua ki he moʻuí. Naʻe hoko ai homau ʻapí ko ha feituʻu talitali kakai. Naʻe faʻa nofo mo kimautolu ʻa e kau ʻovasia fefonongaʻakí, ʻa ia naʻe ui ko e kau pilikimi pea mo e kau Ako Tohi Tapu kehe. ʻI he 1928 naʻe huluʻi mai ai kia kimautolu ʻe ha ʻovasia fefonongaʻaki ʻa e “Tulama ʻIuliká,” ko ha faʻunga fakanounou ʻo e “Tulama-ʻAta ʻo e Fakatupú.” Naʻá ne kole meia kimautolu fānaú ha kiʻi meʻa-vaʻinga ko ha kiʻi poto ʻa ia naʻe tatangi. ʻI he taimi naʻe tatangi ai e kiʻi potó, ko e taimi ia ke fetongi ai ʻa e silaití. Naʻa mau fiefia lahi ʻi he lava ke ʻi ai haʻamau tokoní!

Naʻe faʻa ʻaʻahi mai kia kimautolu ha ʻovasia fefonongaʻaki ko Emil Zarysky mo hono fale taulaní. ʻI he taimi ʻe niʻihi naʻá ne haʻu fakataha ai mo hono foha lahí, ʻa ia naʻá ne fakalototoʻaʻi kimautolu fānaú ke mau fakakaukau fekauʻaki mo e hoko ko ha kau faifekau taimi-kakato, pe kau tāimuʻa. Naʻe toe nofo foki ʻa e kau tāimuʻa tokolahi ʻi homau ʻapí. ʻI he taimi ʻe taha, naʻe ʻoange ai ʻe he fineʻeikí ha sote ki ha tāimuʻa ke ne tui ka ne monomono ʻa hono soté. Naʻe moʻu toʻoa ʻe he tāimuʻá ʻa e soté ʻi he taimi naʻá ne mavahe aí. ʻI he taimi lahi ki mui ai, naʻá ne fakafoki mai ia mo kole fakamolemole ʻi he tuai hono ʻomaí. “Naʻe ʻikai lava ke u maʻu ʻa e sēniti ʻe hongofulu ke ʻoatu ai he meilí,” ko ʻene tohí mai ia. Ne mau fakaʻamu naʻá ne tuku maʻana ʻa e soté! Naʻá ku fakaʻamu ke u malava ʻi ha ʻaho ʻo faʻifaʻitaki ki he kau tāimuʻa feilaulauʻi-kita peheé. ʻOku ou fakamālō ʻi he anga-talitali kakai ʻa e fineʻeikí, ʻa ia naʻe hoko ko e fakakoloa ki heʻemau moʻuí pea langa hake ai ʻemau ʻofa ki he fetokouaʻakí.​—1 Pita 4:​8, 9.

Naʻe ʻikai ke hoko ʻa e tangataʻeikí ko ha tokotaha Ako Tohi Tapu; ka naʻe ʻikai te ne fakafepakiʻi kimautolu. ʻI he 1930 naʻe aʻu ai ʻo ne fakaʻatā ke ngāueʻaki ʻe he fanga tokouá ʻa hono fuʻu fale tukuʻanga meʻá ke fai ai ha ʻasemipilī ʻaho taha. Neongo naʻá ku taʻu fitu pē, naʻe maongo kiate au ʻa e fiefia mo e tuʻunga ngeia ʻo e meʻa ko ia naʻe faí. Naʻe mate ʻa e tangataʻeikí ʻi he 1933. Ko e fineʻeikí ʻi heʻene uitou he taimi ko iá mo e fānau ʻe toko valú, naʻe ʻikai haʻane teitei afe mei heʻene fakapapauʻi ke tauhi kimautolu ʻi he hala ʻo e lotu moʻoní. Naʻá ne fakapapauʻi ke ʻalu mo au ki he ngaahi fakatahá. ʻI he taimi ko iá, ne hā ngali lōloa ʻa e ngaahi fakatahá, pea naʻá ku fakaʻamu ʻe lava ke u kau fakataha mo e fānau kehé, ʻa ia naʻe fakaʻatā ke nau vaʻinga ʻi tuʻa. Kae kehe, ʻi he fakaʻapaʻapa ki heʻeku faʻeé, naʻá ku nofo pē ʻi he fakatahá. Lolotonga ʻa e feimeʻatokoni ʻa e fineʻeikí, naʻá ne faʻa lave ai ki ha konga Tohi Tapu pea tuku mai leva ke u mateʻi ange pe ko e tohi fē ia. ʻI he 1933 naʻa mau maʻu ai ha utu-taʻu fua lahi, pea naʻe ngāueʻaki ʻe he fineʻeikí ʻa e paʻanga hū mai lahi ange naʻe maʻu mei aí ke fakatau mai ʻaki ha kā. Naʻe fakaangaʻi ia ʻe he ngaahi kaungāʻapi ʻe niʻihi ʻi heʻene fakamole paʻangá, ka naʻá ne ʻamanaki ʻe tokoniʻi kimautolu ʻe he kaá ʻi heʻemau ngaahi ngāue fakateokalatí. Naʻe tonu ʻa e fineʻeikí.

Tokoniʻi Au ʻe he Niʻihi Kehe Ke U Fai ʻa e Fili Totonú

ʻOku hoko mai ai ha taimi ʻa ia kuo pau ke fai ai ʻe ha talavou ʻa ʻene ngaahi fili ʻa ia ʻe kaunga ki hono kahaʻú. ʻI he hoko mai ʻa e taimi ko iá ki hoku ongo tuofefine lalahi ko Helen mo Kay, naʻá na kamata ngāue tāimuʻa. Ko ha tāimuʻa ʻa ia naʻá ne fiefia ʻi he anga-talitali kakai ʻi homau ʻapí ko John Jazewsky, ko ha kiʻi talavou anga-lelei. Naʻe kole ʻe he fineʻeikí ʻa John ke ne nofo ʻi ha taimi ʻo tokoni ʻi he ngāue he fāmá. Naʻe mali ki mui ʻa John mo Kay, pea naʻá na ngāue ko e ongo tāimuʻa ʻo ʻikai mamaʻo mei homau ʻapí. ʻI heʻeku taʻu 12, naʻá na fakaafeʻi au ke u ʻalu mo kinaua ʻi he ngāue fakamalangá he lolotonga e tutuku ʻa e akó. Naʻe ʻomai ʻe he meʻa ko iá ʻa e faingamālie ke u ʻahiʻahiʻi ai ʻa e moʻui ʻi he tuʻunga ko ha tāimuʻá.

Ne aʻu ki he taimi naʻá ku malava ai ʻi ha tuʻunga mo hoku taʻokete ko Sioné ke fakalele ʻa e fāmá. Naʻe fakaʻatā ai ʻa e fineʻeikí ke ne ngāueʻaki ʻa e ngaahi māhina he taimi māfaná ke ngāue ai ʻi he tuʻunga ʻoku ui he taimí ni ko e tāimuʻa tokoní. Naʻá ne ngāueʻaki ha saliote veʻe-ua naʻe toho ʻe ha hoosi ne motuʻa. Naʻe ui ʻe he tangataʻeikí ʻa e hoosi motuʻa mapuleʻingataʻa ko ení ko Saul, ka ki he fineʻeikí ko ha meʻamoʻui puleʻingofua ia naʻe lava ke ne ngāueʻaki. Naʻá ku manako mo John he ngāue ʻi he fāmá, ka ʻi he taimi taki taha naʻe foki mai ai ki ʻapi ʻa e fineʻeikí mei he ngāue fakamalangá ʻo talanoa mai ʻene ngaahi hokosiá, naʻe hiki ʻo lahi ange ai ʻema manakó mei he ngāue ʻi he fāmá ki he ngāue tāimuʻá. ʻI he 1938, naʻá ku fakalahi ai ʻa ʻeku ngāue fakamalangá, pea ʻi Fepueli 9, 1940, naʻá ku papitaiso ai.

ʻI ha taimi ki mui ai, naʻe fakanofo ai au ko ha sevāniti ʻi he fakatahaʻangá. Naʻá ku tokangaʻi ʻa e ngaahi lēkooti ʻa e fakatahaʻangá peá u fiefia ʻi he taimi taki taha naʻe ʻi ai ai ha tupulakí. Naʻe ʻi ai ʻa hoku feituʻu ngāue fakafoʻituitui ki he malangá ʻi ha kolo naʻe kilomita nai ʻe ono mei ʻapi. Lolotonga ʻa e taimi momokó, naʻá ku lue ki ai ʻi he uike kotoa pē pea mohe ai ʻi he pō ʻe taha pe ua ʻi he fata ʻo e ʻapi ʻo ha fāmili naʻa nau fakahaaʻi ʻa e mahuʻingaʻia ʻi he Tohi Tapú. Hili e fetalanoaʻaki mo ha faifekau ʻi he siasi Lūteló—ʻa ia naʻe ʻikai ai te u fakapotopoto ʻi ha tuʻunga—naʻá ne fakamana mai ai te ne tala au ki he kau polisí ʻo kapau heʻikai te u tukunoaʻi ʻene tākangá. Naʻe ʻai au ʻe he meʻa ko iá ke toe ʻāsili ange ai ʻeku fakapapauʻi ke tutui atu ki muʻá.

ʻI he 1942 naʻe palani ai ʻa hoku tuofefiné ʻa Kay mo hono husepānití ʻa John, ke na maʻu ha fakataha-lahi ʻi Cleveland, Ohio, ʻi ʻAmelika. Naʻá ku fiefia ʻi hono fakaafeʻi mai ke u ʻalu mo kinauá. Ko e fakataha-lahi ko iá ko e taha ia ʻo e ngaahi meʻa lelei taha ne faifai ange pea hoko kiate aú. Naʻá ne fakafefekaʻi ʻa ʻeku ngaahi palani ki he kahaʻú. ʻI he taimi naʻe fakahoko mai ai ʻe Tokoua Nathan Knorr, ʻa ia naʻe takimuʻa he taimi ko iá ʻi he ngāue ʻi māmani lahí ha fakaafe ki ha kau tāimuʻa ʻe toko 10,000, naʻá ku fili ai he taimi pē ko iá ke hoko ko e taha ʻo kinautolu!

ʻI Sanuali 1943, naʻe ʻaʻahi mai ai ʻa Henry, ko ha faifekau fefonongaʻaki ki heʻemau fakatahaʻangá. Naʻá ne fai ha malanga fakaueʻiloto ʻa ia naʻá ne ʻai ke mau faivelenga. ʻI he ʻaho hili ʻene malangá, naʻe tikilī Selosiasi mainasi 40 ʻa e ʻeá, pea ko ha matangi mālohi ʻi he tokelau-hihifó naʻe ʻai ai ke toe momoko ange. Naʻe anga-maheni ʻaki ʻemau nofo fale lolotonga ʻa e taimi momoko peheé, ka naʻe vēkeveke ʻa Henry ke ʻalu ʻo malanga. Naʻá ne heka mo e niʻihi kehe ʻi ha saliote naʻe ʻi ai ha sitou tafu, ki ha kolo naʻe kilomita ʻe 11 ʻa hono mamaʻó. Naʻá ku ʻalu toko taha ke fai ha ʻaʻahi ki ha fāmili naʻe ʻi ai ha tamaiki tangata ʻe toko nima. Naʻa nau tali ʻeku tuʻuaki ange ke ako Tohi Tapu mo kinautolú, pea ne aʻu ki ha taimi ne nau tali ai ʻa e moʻoní.

Malanga ʻi he Funga ʻo e Tapuí

Lolotonga ʻa e Tau II ʻa Māmaní, naʻe tapui ai ʻi Kānata ʻa e ngāue ʻo e Puleʻangá. Naʻe pau ke ʻoua te mau fakaʻasi ʻemau ʻū tohi Fakatohitapú, pea naʻe lahi ʻa e ngaahi feituʻu fufūʻanga meʻa ʻi heʻemau fāmá. Naʻe toutou ʻaʻahi mai kia kimautolu ʻa e kau polisí ka naʻe ʻikai ʻaupito te nau maʻu ha meʻa. Lolotonga ʻemau malangá, naʻa mau ngāueʻaki pē ʻa e Tohi Tapú. Naʻa mau fakataha ʻi he fanga kiʻi kulupu tokosiʻi, pea naʻe fili au mo hoku tokoua ko John ke ma fai ʻa e ngāue feʻaveʻaki fakamatala fakapulipulí.

Lolotonga ʻa e taimi taú, naʻe kau ai ʻemau fakatahaʻangá ʻi hano tufaki ʻi māmani lahi ʻa e kiʻi tohi ko e End of Nazism. Naʻa mau ō ʻi he tuʻuapoó. Naʻá ku ongoʻi manavasiʻi ʻaupito ʻi heʻemau moulu fakapulipuli ki he ʻapi taki taha ʻo tuku ai ha kiʻi tohi ʻi he sitepú. Ko e meʻa fakatupu ilifia taha ia naʻá ku faí. He meʻa fakafiefia ē ko ia ʻi he taimi naʻa mau tufaki ai ʻa e tatau fakaʻosi ʻo e kiʻi tohi ko iá! Naʻa mau fakavave leva ki he kā naʻe taú, ʻo fakapapauʻi kuo mau kakato, pea pulia vave ʻi he poʻulí.

Ngāue Tāimuʻa, Ngaahi Pilīsone mo e Ngaahi ʻAsemipilī

ʻI Mē 1, 1943, naʻá ku māvae ai mo e fineʻeikí. Naʻá ku fononga ai ki hoku ʻuluaki vāhenga-ngāué mo e paʻanga ʻe 20 ʻi heʻeku uāletí mo ha kiʻi katoleta. Naʻe talitali lelei au ʻe Tokoua Tom Troop mo hono fāmili ʻofá ʻi Quill Lake, Saskatchewan. ʻI he taʻu hono hokó, naʻá ku ʻalu ai ki ha feituʻu ngāue mamaʻo ʻi Weyburn, Saskatchewan. Lolotonga hono fai ʻa e ngāue ʻi he halá ʻi Tīsema 24, 1944, naʻe puke au ʻo ʻave. Hili e fakamoleki ʻa e taimi ʻi ha pilīsone fakalotofonua, naʻe ʻave ai au ki ha ʻapi pōpula ʻi Jasper, Alberta. Naʻá ku ʻi ai mo e Kau Fakamoʻoni kehe, ʻa ia ne takatakaiʻi kimautolu ʻe he tuʻunga fisifisimuʻa ʻo e fakatupu ʻa Sihová, ʻa ia ko e ʻotu moʻunga Rockies ʻo Kānatá. ʻI he konga ki muʻa ʻo e 1945, naʻe fakaʻatā ai kimautolu ʻe he kau ʻōfisa ʻo e ʻapi pōpulá ke mau maʻu ha fakataha ʻi Edmonton, Alberta. Naʻe ʻomai ai ʻe Tokoua Knorr ha līpooti fakalotomāfana fekauʻaki mo e fakalakalaka ʻo e ngāue ʻi māmani lahí. Ne mau fakaʻamu ki he ʻaho ʻa ia ʻe ʻosi ai homau tauhi fakalaó pea lava ai ke mau toe kau kakato ʻi he ngāue fakafaifekaú.

ʻI hono tukuange aú, naʻá ku toe ngāue tāimuʻa. Taimi nounou mei ai, naʻe fanongonongo ai ʻe fai ʻa e ʻAsemipilī “Fakalahi ʻo e Ngaahi Puleʻangá Kotoa” ʻi Los Angeles, Kalefōnia. Naʻe fokotuʻu ai ʻe ha tokoua ʻi hoku vāhenga-ngāue tāimuʻá ʻi heʻene lolí ʻa e sea ki he kau pāsese ʻe toko 20. ʻI ʻAokosi 1, 1947, ne mau kamata ai ʻi ha fononga ʻoku taau ke manatua, ʻa ia ne mau ō ai ʻi he kilomita ʻe 7,200 ʻo fou ʻi he ngaahi manafa, ngaahi toafa mo e mātanga fisifisimuʻa, ʻo kau ai ʻa e ongo paʻake fakafonua ko e Yellowstone mo e Yosemite. Naʻe feʻunga fakakātoa mo e ʻaho ʻe 27 ʻa e fonongá—ko ha hokosia fakaofo moʻoni!

Ko e fakataha-lahí tonu naʻe hoko ia ko ha hokosia fisifisimuʻa heʻikai ʻaupito ke ngalo. Ke maʻu ʻaonga kakato mei he meʻa naʻe hokó, naʻá ku ngāue ai ko ha tokotaha fakanofonofo lolotonga ʻa e taimi ʻahó pea ngāue ko ha tokotaha leʻo lolotonga ʻa e taimi poʻulí. Hili e kau ki ha fakataha maʻá e faʻahinga naʻe mahuʻingaʻia ʻi he ngāue fakamisinalé, naʻá ku fakafonu ai ha tohi kole ka naʻe ʻikai te u ʻamanaki ʻe tali. ʻI he taimi ko ení, ʻi he 1948, naʻá ku tali ai ʻa e fakaafe ki ha kau tāimuʻa ke nau ngāue ʻi he vahefonua Kānata ko Quebec.​—Aisea 6:8.

Kiliati mo e Hili Iá

ʻI he 1949, naʻá ku fiefia ai ke tali ha fakaafe ke kau ki he kalasi hono 14 ʻo e Akoʻanga Tohi Tapu Taua Leʻo ko Kiliatí. Ko e ako ko iá ne ʻai ai ke mālohi ʻeku tuí pea tohoakiʻi ai au ke u ofi ange kia Sihova. Ne ʻosi maʻu tohi fakamoʻoni ako ʻa John mo Kay mei he kalasi hono 11 pea naʻá na ngāue ko e ongo misinale ʻi Lotēsia Tokelau (ko Semipia ia he taimí ni). Ko hoku taʻoketé ko John naʻá ne maʻu tohi fakamoʻoni ako mei Kiliati ʻi he 1956. Naʻá ne ngāue fakataha mo hono uaifí, ko Frieda, ʻi Pelēsila ʻo feʻunga mo e taʻu ʻe 32 ʻo aʻu ki heʻene maté.

ʻI hoku ʻaho maʻu tohi fakamoʻoni akó ʻi Fepueli 1950, naʻe fakalototoʻaʻi lahi au ʻe he ongo mākoni ʻe ua, ko e taha mei he fineʻeikí pea ko e taha mei he fāmili Troop ʻi Quill Lake. Ko e mākoni mei he fāmili Troop, ko hono ʻuluʻitohí ko e “Faleʻi ki ha Tokotaha Maʻu Tohi Fakamoʻoni Ako,” naʻe pehē ai: “Ko ha ʻaho eni ʻo e ngaahi ʻahó kiate koe. Ko ha ʻaho te ke koloaʻaki maʻu pē; pea ʻofa ke ke lavameʻa mo fiefia ai pē.”

Naʻá ku maʻu ha vāhenga-ngāue ke ngāue ʻi he kolo ko Quebec, ka naʻá ku nofo ʻi ha taimi ʻi he Faama ʻo e Puleʻangá ʻi he Vahefonua Niu ʻIoké, ʻa ia naʻe tuʻu ai he taimi ko iá ʻa e Akoʻanga Kiliatí. ʻI he ʻaho ʻe taha naʻe ʻeke mai ai ʻe Tokoua Knorr pe te u loto-lelei ke ʻalu ki Pelisiume. Kae kehe, ʻi ha ʻaho ʻe ua ki mui ai, naʻá ne ʻeke mai pe te u loto-lelei ki ha vāhenga-ngāue ʻi Netaleni. ʻI heʻeku maʻu ʻa e tohi ki he vāhenga-ngāué, naʻe fakahaaʻi mai ai ke u “fai ʻa e ngāue ko e sevāniti ʻi he vaʻá.” Naʻá ku ongoʻi taulōfuʻu.

ʻI ʻAokosi 24, 1950, naʻá ku kamata folau vaka ai ʻi he ʻaho ʻe 11 ki Netaleni—ʻo maʻu ai ʻa e taimi feʻunga ke u lau ʻa e New World Translation of the Christian Greek Scriptures ne toki tukuange foʻou mai. Naʻá ku tūʻuta ʻi Rotterdam ʻi Sepitema 5, 1950, ʻa ia ne talitali māfana ai au ʻe he fāmili Pētelí. Neongo ʻa e fuʻu fakaʻauha ʻa e Tau II ʻa Māmaní, naʻe ngāue mālohi ʻa e fanga tokouá ʻi hono toe ʻai ke toe lele ʻa e ngaahi ngāue faka-Kalisitiané. Lolotonga e fanongo ki heʻenau ngaahi fakamatala fekauʻaki mo hono tauhi maʻu ʻo e anga-tonú ʻi he funga ʻo e fakatanga kakahá, naʻá ku fakakaukau ai ko e ʻamanaki ko ia ke ngāue ʻi he malumalu ʻo e tataki ʻa ha sevāniti vaʻa kei siʻi taʻetaukeí ʻe lava ke hoko ʻo faingataʻa ki he fanga tokoua ko iá. Kae kehe, naʻe vave ʻa e hoko ʻo hā mahino naʻe ʻikai ha makatuʻunga ki haʻaku manavasiʻi.

Ko e moʻoni, naʻe fiemaʻu ke fai ʻa e tokanga ki he ngaahi meʻa ʻe niʻihi. Naʻá ku tūʻuta ai ʻi he ki muʻa pē ke fai ha fakataha-lahi pea naʻe maongo ʻa e sio ki he nofo ʻa e kau fakafofonga ʻe laui afe ʻi he feituʻu faiʻanga fakataha-lahí. ʻI he fakataha-lahi hono hokó, naʻá ku fokotuʻu ai ke mau kumi ha ngaahi nofoʻanga ʻi he ngaahi ʻapi tāutahá. Naʻe fakakaukau ʻa e fanga tokouá ko ha fakakaukau lelei ia—ka ʻoku ʻikai feʻunga ia ʻi honau fonuá. Hili ʻemau fefakaʻuhingaʻaki ʻi he meʻá, ne mau iku ai ʻo felotoi—ko e vaeua ʻo e kau fakafofongá te nau nofo ʻi he faiʻanga fakataha-lahí pea ko e vaeua ʻi he ngaahi ʻapi ʻo e faʻahinga ʻikai ko e Kau Fakamoʻoni ʻi he kolo faiʻanga fakataha-lahí. Naʻá ku fiefia ʻi heʻeku fakahaaʻi ange kia Tokoua Knorr ʻa e olá ʻi heʻene maʻu ʻa e fakataha-lahí. Kae kehe, ne vave e mole ʻa ha ngaahi ongoʻi lavameʻa pē ʻi he taimi naʻá ku lau ai ki mui ha līpooti fekauʻaki mo ʻemau fakataha-lahí ʻi he Taua Leʻo ʻa ia naʻe pehē ai: “ʻOku mau ongoʻi papau ko e taimi hono hokó ʻe ʻuluaki fai ai ʻi he tui ʻa e feinga ke maʻu ha nofoʻanga ki he kau maʻu fakataha-lahí ʻi he feituʻu ola lelei taha ki he faifakamoʻoní, ko e ngaahi ʻapi ʻo e kakaí.” Ko e meʻa tofu pē ia naʻa mau fai ʻi he “taimi hono hokó”!

ʻI Siulai 1961, naʻe fakaafeʻi ai ʻa e ongo fakafofonga ʻo homau ʻōfisi vaʻá ke na kau ki ha fakataha mo e kau fakafofonga vaʻa kehe ʻi Lonitoni. Naʻe fanongonongo ai ʻe Tokoua Knorr ko e New World Translation of the Holy Scriptures ʻe ʻai ke ala maʻu ia i he ngaahi lea lahi ange, ʻo kau ai ʻa e lea faka-Hōlaní. He ongoongo fakafiefia moʻoni ia! Ko e mālié, he naʻe ʻikai haʻamau fakakaukau ki he lahi ʻo e ngāué. ʻI he taʻu ʻe ua ki mui ai, ʻi he 1963, naʻá ku fiefia ai he kau ʻi ha polokalama ʻi ha fakataha-lahi ʻi Niu ʻIoke ʻa ia naʻe tukuange mai ai ʻa e New World Translation of the Christian Greek Scriptures ʻi he lea faka-Hōlaní.

Ngaahi Fili mo e Ngaahi Vāhenga-Ngāue Foʻou

ʻI ʻAokosi 1961, naʻá ku mali ai mo Leida Wamelink. Naʻe tali kotoa ʻe hono fāmilí ʻa e moʻoní ʻi he 1942 lolotonga ʻa e taimi ʻo e fakatanga ʻa e kau Nasí. Naʻe kamata tāimuʻa ʻa Leida ʻi he 1950 peá ne hū ki Pēteli ʻi he 1953. Ko e founga ʻo ʻene ngāue ʻi Pēteli pea ʻi he fakatahaʻangá naʻe fakahaaʻi mai ai kiate au te ne hoko ko ha kaungāfeohi mateaki ʻi heʻeku ngāue fakafaifekaú.

Laka siʻi hake pē he taʻu ʻe taha mei heʻema malí, naʻe fakaafeʻi ai au ki Brooklyn ki ha koosi māhina ʻe hongofulu ko ha ako fakalahi. Naʻe ʻikai ha ngaahi fokotuʻutuʻu ke ō fakataha ʻa e ngaahi uaifí mo honau ngaahi husepānití. Neongo naʻe ʻikai te ne moʻui lelei, naʻe pehē anga-ʻofa ʻe Leida ʻoku totonu ke u tali ʻa e fakaafé. Ki mui ai, naʻe fakaʻau ki he kovi ange ʻa e tuʻunga moʻui lelei ʻo Leida. Naʻá ma feinga ke hokohoko atu ʻema ngāue ʻi Pētelí ka naʻe faifai pē ʻo ma fili ʻe lelei ange ke hokohoko atu ʻema ngāue taimi-kakató ʻi he malaʻe fakamalangá. Ko ia naʻá ma kamata ai ʻi he ngāue fakafaifekau fefonongaʻakí. Taimi nounou mei ai, naʻe pau ai ke fai ha tafa lahi ki hoku uaifí. ʻI he tokoni anga-ʻofa ʻa e ngaahi kaungāmeʻá, naʻá ma malava ai ʻo fekuki mo e tuʻungá, pea ʻi ha taʻu ʻe taha ki mui ai naʻe aʻu ʻo lava ke ma tali ai hono vaheʻi mai ke ma ngāue ʻi he ngāue fakavahé.

Naʻá ma fiefia ʻi he taʻu ʻe fitu ʻo e longomoʻui he ngāue fefonongaʻakí. Naʻe toe hoko mai leva ai ʻa e fiemaʻu ke fai ha fili mafatukituki ʻi hono fakaafeʻi au ke u faiako ʻi he Akoʻanga Ako Fakafaifekaú ʻi Pēteli. Naʻá ma loto ki ai, neongo ko ha feʻunuʻaki faingataʻa ia, koeʻuhi naʻá ma manako he ngāue fakafaifekau fefonongaʻakí. Ko e kalasi ʻe 47 ʻo e akó, ʻo ʻosi ʻa e kalasi taki taha ʻi he uike ʻe ua, ʻa ia ne ʻomai ai kiate au ha faingamālie lelei ke fevahevaheʻaki ʻa e ngaahi tāpuaki fakalaumālie naʻá ku maʻú mo e kau mātuʻa ʻi he fakatahaʻangá.

Lolotonga ʻa e taimi ko iá, naʻá ku teuteu ai ke ʻaʻahi ki heʻeku faʻeé ʻi he 1978. Kae fakafokifā, ʻi ʻEpeleli 29, 1977, naʻá ma maʻu ai ha mākoni ne fakahā mai ai kuo mālōlō ʻa e fineʻeikí. Naʻá ku mamahi lahi ʻi he ʻiloʻi heʻikai te u kei lava ke fanongo ki hono leʻo māfaná pe toe tala ange kiate ia ʻa ʻeku houngaʻia lahi ʻi he meʻa kotoa kuó ne fai maʻakú.

ʻI he fakaʻosinga ʻo e koosi ʻi he Akoʻanga Ngāue Fakafaifekau ʻo e Puleʻangá, naʻe kole mai ai ke ma hoko ko e ongo mēmipa ʻo e fāmili Pētelí. Lolotonga ʻa e ngaahi taʻu hoko atu aí, naʻá ku ngāue ai ʻi he taʻu ʻe hongofulu ko e kouʻotineita ʻo e Kōmiti Vaʻá. ʻI he faai mai ʻa e taimí, naʻe fili ai ʻe he Kulupu Pulé ha kouʻotineita foʻou, ʻa ia naʻá ne malava lelei ange ke fakahoko ʻa e fatongiá. Naʻá ku houngaʻia ʻaupito ʻi he meʻa ko iá.

Ngāue ʻo Fakatatau ki he Taʻumotuʻá

Ko au mo Leida ʻokú ma fakatou taʻu 83. Kuó u fiefia ʻi he ngāue laka hake he taʻu ʻe 60 ʻi he ngāue taimi-kakató, ko e taʻu fakaʻosi ʻe 45 fakataha mo hoku uaifi mateakí. Kuó ne vakai ki heʻene poupou kiate au ʻi he kotoa ʻo homa ngaahi vāhenga-ngāué ko e konga ia ʻo ʻene ngāue fakatapui kia Sihová. ʻI he lolotonga ní, ʻokú ma fai ai ʻa e meʻa ʻokú ma malavá ʻi Pēteli pea ʻi he fakatahaʻangá.​—Aisea 46:4.

ʻI he taimi ki he taimi, ʻokú ma fiefia ai ʻi he manatu ki he niʻihi ʻo e ngaahi taimi fakafiefia taha ʻi heʻema moʻuí. ʻOku ʻikai haʻama fakaʻiseʻisa fekauʻaki mo e meʻa kuó ma fai ʻi he ngāue ʻa Sihová, pea ʻokú ma tuipau ko e ngaahi fili kuó ma fai tōmuʻa ʻi he moʻuí ʻa e fili lelei tahá. ʻOkú ma fakapapauʻi ke hokohoko atu ʻa e tauhi mo hono fakalāngilangiʻi ʻo Sihová ʻaki ʻa e kotoa ʻo homa mālohí.

[Fakatātā ʻi he peesi 13]

Mo Bill, ko hoku taʻoketé, mo Saul, ko ʻemau hōsí

[Fakatātā ʻi he peesi 15]

ʻI homa ʻaho malí, ʻAokosi 1961

[Fakatātā ʻi he peesi 15]

Mo Leida ʻi he ʻahó ni