Akoʻi Hoʻo Fānaú

Naʻe Piki ʻa Sāmiuela ki he Meʻa Naʻe Totonú

KUÓ KE sio ʻi hano fai ʻe he niʻihi kehé ha ngaahi meʻa ʻoku kovi?—a Ko Sāmiuelá naʻá ne sio ʻi ha meʻa pehē. Naʻá ne nofo ʻi ha feituʻu ʻe ʻikai nai te ke ʻamanekina ʻe hoko ai ha ngaahi meʻa pehē. Ko e tāpanekale ia pe feituʻu faiʻanga lotu ʻo e ʻOtuá, ʻi he kolo ko Sailó. Tau sio angé ki he anga ʻo e hoko ʻa e tāpanekalé ko e ʻapi ʻo Sāmiuela, laka hake ʻi he taʻu ʻe 3,000 kuo maliu atú.

Ki muʻa ʻi hono fāʻeleʻi ʻo Sāmiuelá, naʻe fuʻu fiemaʻu ʻe heʻene faʻē ko ʻAná ke ʻi ai haʻane tama. ʻI ha ʻaʻahi ʻa ʻAna ki he tāpanekalé, naʻá ne lotu ki he ʻOtuá ʻo fekauʻaki mo ia. Naʻe fai tōtōivi ʻaupito ʻene lotú pea ngaue ai hono loungutú. Naʻe ʻai ʻe he meʻá ni ʻa e taulaʻeiki lahi ko ʻĪlaí ke fakakaukau naʻá ne konā. Ka ʻi heʻene ʻilo naʻe ʻikai konā ka ko ʻene faingataʻaʻia lahí, naʻe tāpuakiʻi ia ʻe ʻĪlai, ʻo ne pehē: “Tauange mo e ʻOtua ʻo Isileli ke ne tali ʻa e kole kuo ke fai.”—1 Samiuela 1:17.

Naʻe fāʻeleʻi ki mui ai ʻa Sāmiuela pea naʻe fiefia ʻaupito ʻa ʻAna ʻo ne pehē ki hono husepāniti ko ʻElikená: ‘ʻOua ke u mavae ʻa Sāmiuela, te u ʻave ia ki he tāpanekalé ke ne tauhi ai ki he ʻOtuá.’ Pea ko e meʻa ia naʻá ne faí! ʻI he taimi ko iá, naʻe taʻu fā pe nima nai ʻa Sāmiuela.

Kuo motuʻa ʻa ʻĪlai, pea ko hono ongo foha ko Hofinai mo Fineasí naʻe ʻikai te na lotu kia Sihova ʻi he founga totonú. Naʻe aʻu ʻo na fai ʻa e ʻulungāanga taʻetaau mo e kakai fefine naʻa nau ō atu ki he tāpanekalé! ʻOkú ke fakakaukau ko e hā ʻa e meʻa naʻe totonu ke fai ʻe heʻena tamaí?— Ko ia, naʻe totonu ke ne akonekina kinaua pea ʻoua ʻe fakaʻatā ke na fai ʻa e ngaahi kovi ko iá.

Ko e talavou ko Sāmiuelá naʻe tupu hake ai, pea ʻoku ngalingali naʻá ne ʻilo ʻo fekauʻaki mo e tōʻonga kovi ʻa e ongo foha ʻo ʻĪlaí. Naʻe muimui ʻa Sāmiuela ʻi heʻena faʻifaʻitakiʻanga koví?— ʻIkai, naʻe hokohoko atu ʻene fai ʻa e meʻa naʻe totonú, ʻo hangē pē ko ia naʻe akoʻi ʻe heʻene ongo mātuʻá ke ne faí. Kae kehe, ʻoku ʻikai ha ofo ʻi he houhau ʻa Sihova ʻia ʻĪlaí. Naʻe aʻu ʻo ne ʻoatu ha palōfita ke tala kia ʻĪlai ʻa e tautea te Ne fai ki hono fāmilí, tautefito ki hono ongo foha koví.—1 Samiuela 2:22-36.

Naʻe hokohoko atu ʻa e ngāue ʻa Sāmiuela mo ʻĪlai ʻi he tāpanekalé. Pea ʻi he pō ʻe taha lolotonga ʻa e mohe ʻa Sāmiuelá, naʻe ongo mai ai ha leʻo ʻo ui ʻa hono hingoá. Ko ia, naʻe lele ʻa Sāmiuela kia ʻĪlai, ka naʻe pehē ʻe ʻĪlai naʻe ʻikai ke ne ui ia. Naʻe toe hoko pē ʻa e meʻa tatau. Ka ʻi he hili ʻa e hoko ʻa e meʻa tatau ʻa ia ko hono tuʻo tolú ia, naʻe tala ange ʻe ʻĪlai kia Sāmiuela ke ne pehē: “Fai mai haʻo folofola, ʻEiki; he ʻoku fakaongo atu ʻe hoʻo tamaioʻeiki ko au.” ʻI he taimi naʻe leaʻaki ai ʻe Sāmiuela ʻa e meʻa ko iá, naʻe folofola mai ʻa Sihova kiate ia. ʻOkú ke ʻiloʻi ʻa e meʻa naʻe folofolaʻaki ʻe Sihova kia Sāmiuelá?—

Naʻe toe fakahā ʻe he ʻOtuá kia Sāmiuela ʻa ʻEne taumuʻa ke tautea ʻa e fāmili ʻo ʻĪlaí. ʻI he pongipongi hono hokó naʻe manavahē ʻa Sāmiuela ke tala kia ʻĪlai ʻa e meʻa naʻe folofolaʻaki ʻe Sihová. Ka naʻe kole ʻa ʻĪlai kia Sāmiuela: “[ʻOfa] foki, ʻo ʻoua te ke fufū meiate au.” Ko ia, naʻe tala ange ai ʻe Sāmiuela kia ʻĪlai ʻa e meʻa kotoa pē naʻe folofolaʻaki ʻe Sihova te Ne faí—ʻo hangē tofu pē ko hono fakahā ki muʻa ʻe Heʻene palōfitá kia ʻĪlaí. Naʻe tali ʻe ʻĪlai: “Ke fai pe ʻe ia ʻa e meʻa ʻoku ne [Sihova] finangalo ki ai.” Naʻe faai atu pē ʻo tāmateʻi ʻa Hofinai mo Fineasi, pea naʻe mate foki mo ʻĪlai.—1 Samiuela 3:1-18.

Lolotonga iá, “naʻe tupu ʻa Samiuela, pea naʻe ʻiate ia ʻa Sihova.” ʻI he taimi ko ení, ngalingali naʻe taʻu hongofulu tupu ʻa Sāmiuela, ko ha taimi mahuʻinga ʻi he moʻui ʻa e fānaú. ʻOkú ke fakakaukau naʻe faingofua kia Sāmiuela ke hokohoko atu ʻene fai ʻa e meʻa naʻe totonú naʻa mo e taimi naʻe ʻikai fai pehē ai ʻa e niʻihi kehé?— Neongo naʻe ʻikai ke faingofua, naʻe tauhi faitōnunga ʻa Sāmiuela kia Sihova ʻi he toenga ʻo ʻene moʻuí.—1 Samiuela 3:19-21.

Fēfē nai koe? Te ke hangē nai ko Sāmiuelá ʻi hoʻo tupu haké? Te ke piki ki he meʻa ʻoku totonú? ʻE hokohoko atu ʻa hoʻo talangofua ki he ngaahi akonaki ʻa e Tohi Tapú pea mo e meʻa kuo akoʻi kiate koe ʻe hoʻo ongo mātuʻá? Kapau te ke fai pehē, te ke ʻai ai ke fiefia fakatouʻosi ʻa Sihova mo hoʻo ongo mātuʻá.

[Fakamatala ʻi lalo]

Ngaahi Fehuʻi:

○ Naʻe anga-fēfē ʻa e hoko ʻa Sāmiuela ʻo ngāue ʻi he tāpanekale ʻo Sihová?

○ Ko e hā ʻa e ngaahi pole naʻe fehangahangai mo Sāmiuela ʻi aí?

○ Ko e hā ʻa e faʻifaʻitakiʻanga naʻe ʻomai ʻe Sāmiuela ki he kau talavoú?