ʻOku Totonu Ke Ke ʻi Fē ʻi he Hoko Mai ʻa e Ngataʻangá?

ʻI HONO fakangata ʻe Sihova ʻa e fokotuʻutuʻu fulikivanu lolotonga ní ʻi ʻĀmaketoné, ko e hā ʻe hoko ki he kau anga-tonú? ʻOku tali ia ʻi he Palovepi 2:21, 22: “Ko e kau angatonu te nau nofoʻia ʻa e fonua, pea ko e haohaoa te ne ʻi ai ai pe. Ka ko e kakai kovi ʻe tuʻusi mei he fonua, ʻio, ko kinautolu ʻoku fai kākā ʻe taʻaki mei ai.”

Neongo ia, ʻe anga-fēfē ha toe ʻa e haohaoá ʻi he māmaní? ʻE ʻi ai ha maluʻanga maʻa kinautolu? ʻOku totonu ke ʻi fē ʻa e kau anga-tonú ʻi he hoko mai ʻa e ngataʻangá? ʻOku ʻomai ʻa e fakamaama ki he ngaahi meʻá ni ʻe he fakamatala Fakatohitapu ʻe fā fekauʻaki mo e fakahaofi.

Taimi Naʻe Mahuʻinga Ai ʻa e Feituʻú

ʻI he fekauʻaki mo e fakahaofi ʻo e ongo pēteliake ko Noa mo Loté, ʻoku tau lau ʻi he 2 Pita 2:5-7: “Kapau naʻe ʻikai maemaeʻekina [ʻe he ʻOtuá] ʻa e maama motuʻa, ka ne tauhi pe ha toko fitu, pea valu ʻaki ʻa Noa, ʻa ia naʻa ne malangaʻaki ʻa e maʻoniʻoni, ʻi heʻene ʻomi ʻa e Lōmaki ki he maama ʻo e kau fakaʻotuamate: mo ne tutu ke efu ʻa e ongo kolo ko Sotoma mo Komola, mo ne fakamāu ke nofo ko e koto lusa, ʻo ne tuku ai ha taipe ki he kau fakaʻotuamate ʻo e ʻamui; mo ne hamusi ʻa Lote maʻoniʻoni, ʻa ia kuo ne mafasia ʻi he toʻonga ʻa e kau malaki lao na, ʻa ia naʻa nau moʻui ʻaki ʻa e pauʻu fakalielia.”

Naʻe anga-fēfē ʻa e hao ʻa Noa ʻi he Lōmakí? Naʻe tala ʻe he ʻOtuá kia Noa: “Kuo ongo mai kiate au kuo aʻu ʻa e kakano kotoa pe ki hono ngataʻanga; he ko e meʻa ʻiate kinautolu kuo opeope ʻi he fonua ʻa e fakamalohi; pea ko eni, te u fakaʻauha kinautolu fakataha mo e fonua. Ke ke faʻu moʻou ha aake ʻaki ʻa e ʻakau ko e kofa.” (Sen. 6:13, 14) Naʻe faʻu ʻe Noa ʻa e ʻaʻaké ʻo hangē tofu pē ko ia naʻe fekau kiate ia ʻe Sihová. ʻI he ʻaho ʻe fitu ki muʻa ke kamata tō ʻa e Lōmakí, naʻe fakahinohinoʻi ia ʻe Sihova ke fakatahatahaʻi ʻa e fanga manú ki he ʻaʻaké pea ke ne hū ki ai mo e kotoa ʻo hono fāmilí. ʻI he ʻaho hono fitú, naʻe tāpuni ʻa e matapā, “pea naʻe lōvai ki mamani ʻo ʻaho fangofulu mo po fangofulu.” (Sen. 7:1-4, 11, 12, 16) Ko Noa mo hono fāmilí ‘nae fakamoui kinautolu ʻi he vaí.’ (1 Pita 3:20, PM) Ko ʻenau haó naʻe fakatuʻunga ia ʻi heʻenau ʻi loto ʻi he ʻaʻaké. Naʻe ʻikai ha feituʻu kehe ʻi he māmaní ʻe lava ke ne ʻomai ha maluʻanga.—Sen. 7:19, 20.

ʻI he tuʻunga ʻo Loté, naʻe kiʻi kehe ʻa e ngaahi fakahinohinó. Naʻe fakahā ange kiate ia ʻe ha ongo ʻāngelo ʻa e feituʻu naʻe ʻikai totonu ke ne ʻi aí. “Mo hai fua ʻoku ʻiate koe ʻi he kolo ni [ʻo Sōtomá],” ko e tala ange ia ʻe he ongo ʻāngeló kia Loté, “ʻomi kituʻa mei he potu ni: he ʻoku ma teu fakaʻauha ʻa e feituʻu ni.” Naʻa nau “hola pe ki he moʻunga.”—Sen. 19:12, 13, 17.

ʻOku fakamoʻoniʻi ʻe he meʻa naʻe hoko kia Noa mo Loté “ʻoku poto pe ʻa e ʻEiki ke hamusi ʻa e kakai lotumoʻoni mei he ʻahiʻahi, pea ke tauhi tautea ʻa e kau fai taʻetotonu.” (2 Pita 2:9) ʻI he tuʻunga fakatouʻosi ko eni ʻo e fakahaofí, ko ʻena haó naʻe fakatuʻunga ia ʻi he feituʻu naʻá na ʻi aí. Naʻe pau ke hū ʻa Noa ki he ʻaʻaké; naʻe pau ke mavahe ʻa Lote mei Sōtoma. Ka ʻe pehē maʻu pē ʻa e tuʻungá ni? ʻE lava ʻe Sihova ke fakahaofi ʻa e māʻoniʻoní ʻi ha feituʻu pē ʻoku nau ʻi ai, ʻo ʻikai fiemaʻu ia ke nau hiki ki ha feituʻu kehe? Ke tali ʻa e fehuʻi ko iá, fakatokangaʻi ʻa e fakamatala kehe ʻe ua fekauʻaki mo e fakahaofí.

ʻOku Mahuʻinga Maʻu Pē ʻa e Feituʻú?

Ki muʻa ke fakaʻauha ʻe Sihova ʻa ʻIsipite ʻaki hono ʻomai ʻa e mala ʻe hongofulu ʻi he ʻaho ʻo Mōsesé, naʻá Ne fekau ki he kau ʻIsilelí ke afuhi ʻaki ha toto ʻo ha manu Pāsova ʻa e funga matapā mo e kaumatapā ʻo honau falé. Ko e hā hono ʻuhingá? Koeʻuhi “ʻe haʻele atu ʻa Sihova ke tautea ʻa e kau Isipite; pea ʻoka ne ka ʻafioʻi ʻa e toto ʻi he ʻakau fakalava mo e ongo pou matapa, ʻe lakai ʻe Sihova ʻa e matapa, ʻo ʻikai te ne tuku ʻa fakaʻauha ke hu ki homou ngaahi fale ke tautea.” ʻI he pō pē ko iá, “naʻe teʻia ʻe Sihova ʻa e ʻuluaki tama kotoa pe ʻi he fonua ko Isipite, ʻo fai mei he ʻuluaki ʻo Felo naʻe ʻafio ʻi hono taloni, ʻo aʻu ki he ʻuluaki ʻo e popula naʻe ʻi he pilisone; pea mo e ʻuluaki tama kotoa pe ʻa e manu.” Naʻe hao ʻa e ʻuluaki fānau ʻa e kau ʻIsilelí ʻo ʻikai pau ke hiki ʻa e tokotaha kotoa ki ha feituʻu.—Eki. 12:22, 23, 29.

Fakakaukau foki ki he tuʻunga ʻo Lēhapí, ko ha paʻumutu naʻe nofo ʻi he kolo ko Sielikoó. Naʻe teu ke ikunaʻi ʻe he kau ʻIsilelí ʻa e Fonua ʻo e Talaʻofá. ʻI hono ʻiloʻi ʻe Lēhapi kuo ʻosi fakahalaiaʻi ʻa Sielikoó, naʻá ne tala ki he ongo asiasi ʻIsilelí kuo mate manavahē ʻa e koló ʻi he ʻalu atu ʻa e kau ʻIsilelí. Naʻá ne fufū ʻa e ongo asiasí pea kole kia kinaua ke na palōmesi ange ʻe fakahaofi ia mo hono fāmilí kotoa ʻi he taimi ʻe ikunaʻi ai ʻa Sielikoó. Naʻe fakahinohino ʻe he ongo asiasí kia Lēhapi ke fakatahatahaʻi ʻa hono fāmilí ki hono falé, ʻa ia naʻe tuʻu ʻi he ʻā ʻo e koló. Ko e mavahe mei he falé ʻe ʻuhinga iá ko hono fakaʻauha fakataha mo e toenga ʻo e koló. (Sios. 2:8-13, 15, 18, 19) Kae kehe, naʻe tala ki mui ʻe Sihova kia Siosiua ‘e higa lafalafa ae a oe koló.’ (Sios. 6:5, PM) Ko e meʻa naʻe fakapapauʻi ʻe he ongo asiasí ko e feituʻu malu he taimi ko iá naʻe hā ngali fakatuʻutāmaki. ʻE anga-fēfē hano fakahaofi ʻa Lēhapi mo hono fāmilí?

ʻI he taimi ke kapa ai ʻa Sielikoó, naʻe kaila ʻa e kau ʻIsilelí pea kamata ke nau ifi ʻa e ngaahi talupité. “I he fanogo ae kakai [ʻIsilelí] ki he ifi oe mealea, bea kaila e he kakai i he fuu kaila lahi,” ko e fakamatala ia ʻi he Siosiua 6:20 (PM), “nae higa lafalafa ae a ki lalo.” Naʻe ʻikai ha tangata ʻe lava he taimi ko iá ke ne taʻofi e holofa ʻa e ʻaá. Ko ia ai, ʻi he tuʻunga fakaemana, ko e holofa ʻa e ʻā ʻo e koló naʻe ngata ia ʻi he fale ʻo Lēhapí. Naʻe fekauʻi atu ʻe Siosiua ʻa e ongo asiasí: “Hu ki he fale ʻo e fefine feʻauaki, ʻo ʻomi mei ai ʻa e fefine, mo ia kotoa pe ʻoku ʻiate ia, hange ko e fuakava naʻa mo fai kiate ia.” (Sios. 6:22) Naʻe fakahaofi ʻa e faʻahinga kotoa ʻi he fale ʻo Lēhapí.

Ko e Hā Naʻe Mahuʻinga Tahá?

Ko e hā ʻoku tau ako mei he fakahaofi ʻo Noa, Lote, kau ʻIsileli ʻi he ʻaho ʻo Mōsesé mo Lēhapí? ʻOku anga-fēfē hono tokoniʻi kitautolu ʻe he fakamatala ko ení ke tau fakapapauʻi ʻa e feituʻu ʻoku totonu ke tau ʻi ai ʻi he taimi ʻe hoko mai ai ʻa e ngataʻanga ʻo e fokotuʻutuʻu fulikivanu lolotonga ní?

Ko e moʻoni, naʻe fakahaofi ʻa Noa ʻi he ʻaʻaké. Ka ko e hā ʻa e ʻuhinga naʻá ne ʻi ai aí? ʻIkai koeʻuhí naʻá ne ngāueʻi ʻene tuí pea naʻá ne talangofua? Naʻe “fai ʻe Noa; ʻilonga ha meʻa naʻe tuʻutuʻuni kiate ia ʻe he ʻOtua,” ko e lau ia ʻa e Tohi Tapú. “Naʻa ne fai ia.” (Sen. 6:22; Hep. 11:7) Fēfē kitautolu? ʻOku tau fai ʻa e meʻa kotoa kuo fekau mai ʻe he ʻOtuá? Naʻe toe hoko ʻa Noa ko e tokotaha “naʻa ne malangaʻaki ʻa e maʻoniʻoni.” (2 Pita 2:5) ʻI he hangē ko iá, ʻoku tau faivelenga ʻi he ngāue fakamalangá, neongo kapau ʻoku ʻikai fiefanongo ʻa e kakai ʻi hotau feituʻu ngāué?

Naʻe hao ʻa Lote ʻi he fakaʻauhá ʻi heʻene hola mei Sōtomá. Naʻá ne haó koeʻuhí he naʻá ne māʻoniʻoni ʻi he vakai mai ʻa e ʻOtuá pea naʻá ne loto-mamahi lahi ʻi he pauʻu fakalielia ʻa e kakai maumau-lao ʻo Sōtoma mo Komolá. ʻOku fakalotomamahiʻi moʻoni kitautolu ʻe he pauʻu fakalielia ʻoku failahia ʻi he ʻaho ní? Pe ʻoku tau ongonoa ʻi he sio aí ʻo ʻikai ke fakahohaʻasi kitautolu? ʻOku tau fai ʻetau lelei tahá ke ʻiloʻi kitautolu ʻoku tau ‘lelei ʻo taʻe ha ʻila, pea taʻe ha mele’?—2 Pita 3:14.

Ki he kau ʻIsileli ʻi ʻIsipité pea kia Lēhapi ʻi Sielikoó, naʻe fakatuʻunga honau fakahaofí ʻi heʻenau nofo maʻu ʻi honau falé. Naʻe fiemaʻu heni ʻa e tui mo e talangofua. (Hep. 11:28, 30, 31) Fakaʻuta atu ki he fāmili ʻIsileli taki taha ʻa e pau ke hokohoko atu ʻenau sio ki heʻenau ʻuluaki-fānaú kae ʻi “ai ha fuʻu tangi” ʻi he fāmili ʻIsipite taki taha. (Eki. 12:30) Fakaʻuta atu ki he pau ke feʻefiʻefihi fakataha ʻa Lēhapi mo hono fāmilí ʻi heʻene ongoʻi ʻa e ʻuʻulu ofi mo toe ofi ange mai ʻi he holofa ʻa e ʻā ʻo Sielikoó. Naʻe fiemaʻu ke ne tui moʻoni koeʻuhi ke talangofua ai pē pea nofo ʻi he fale ko iá.

Kuo vavé ni ke hoko mai ʻa e ngataʻanga ki he māmani fulikivanu ʻo Sētané. Ko e founga ʻe maluʻi ai ʻe Sihova ʻa hono kakaí ʻi he ‘ʻaho ʻo ʻene houhau’ fakamanavaheé, ʻoku teʻeki ai ke tau ʻiloʻi. (Sef. 2:3) Kae kehe, tatau ai pē pe ʻoku tau ʻi fē pea ko e hā ʻa e tuʻunga ʻoku tau ʻi ai he taimi ko iá, ʻe lava ke tau fakapapauʻi ko ʻetau haó ʻe fakatuʻunga ia ʻi heʻetau tui kia Sihova pea mo ʻetau talangofua kiate iá. ʻI he lolotonga ní, ʻoku totonu ke tau fakatupulekina ha fakakaukau totonu ki he meʻa ʻoku lave ki ai ʻa e kikite ʻa ʻAisea ko hotau “ngaahi loki.”

“Hu ki Ho Ngaahi Loki”

“Haʻu ange, siʻoku kakai, hu ki ho ngaahi loki,” ko e lau ia ʻa e Aisea 26:20. “Toi ko e foʻi kemo pe, kae ʻoua ke laka atu ʻa e tautea.” Ko e kikite ko ení naʻe ʻuluaki fakahoko nai ia ʻi he 539 K.M. ʻi he taimi naʻe ikunaʻi ai ʻa Pāpilone ʻe Mītia mo Pēsiá. ʻI he hū ki Pāpiloné, ʻoku hangehangē naʻe fekauʻi ʻe Kōlesi ko e Pēsiá ʻa e tokotaha kotoa ke nofo ʻi loto koeʻuhi he naʻe fekau atu ʻene kau sōtiá ke tāmateʻi ha taha pē naʻe maʻu ʻi tuʻa.

ʻI hotau ʻahó ni, ko e “ngaahi loki” ʻi he kikite ko ení ʻoku lava ke fakafekauʻaki moʻoni ia mo e fakatahaʻanga ʻe 100,000 tupu ʻa e Kau Fakamoʻoni ʻa Sihova takatakai ʻi he māmaní. ʻOku fakahoko ʻe he ngaahi fakatahaʻanga ko iá ha ngāue mahuʻinga ʻi heʻetau moʻuí. ʻE hokohoko atu ʻenau fai peheé ʻo aʻu ki he “mamahi lahi.” (Fkh. 7:14) ʻOku fekauʻi ʻa e kakai ʻa e ʻOtuá ke nau hū ki honau “ngaahi loki” ʻo toi ai “kae ʻoua ke laka atu ʻa e tautea.” ʻOku mātuʻaki mahuʻinga ke tau fakatupulekina mo tauhi maʻu ha fakakaukau lelei ki he fakatahaʻangá pea fakapapauʻi moʻoni ke nofoʻaki feohi vāofi mo ia. ʻE lava ke tau tukulotoa ʻa e akonaki ʻa Paulá: “Ke tau fetokangaʻaki, ke fefakaʻaiʻaiʻaki ʻa kitautolu ki he feʻofaʻaki mo e ngaue lelei: ʻo ʻoua naʻa tau liʻaki ʻetau ngaahi fakataha, ʻo hange ko e anga ʻo e niʻihi; ka mou feenginakiʻaki, pea ʻasili he ʻoku [tau] sio ki he fakaofiofi mai ʻa e ʻaho.”—Hep. 10:24, 25.

[Fakatātā ʻi he peesi 7]

Ko e hā ʻe lava ke tau ako mei he faifakahaofi ʻa e ʻOtuá ʻi he kuohilí?

[Fakatātā ʻi he peesi 8]

Ko e hā nai ʻoku fakafekauʻaki mo e “ngaahi loki” ʻoku fakahaaʻi ʻi hotau taimí?