Liliu ʻe he Tohi Tapú ʻa e Moʻuí

Naʻe anga-fēfē hono maʻu ʻe ha tangata naʻe kamata ifi maliuana mo e tapaka ʻi heʻene kei siʻí ʻa e mālohi ke ne taʻofi ʻa e tōʻonga ko iá? Ko e hā naʻá ne ʻai ke malava ʻe ha mēmipa ʻo ha kengi fakamālohi ʻo mapuleʻi ʻa ʻene ʻitá pea ikuʻi ʻa e tāufehiʻa fakamatakalí? Fakakaukau angé ki he meʻa naʻá na taki taha leaʻakí.

FAKAMATALA

HINGOA: HEINRICH MAAR

TAʻUMOTUʻA: 38

FONUA TUPUʻANGA: KĀSAKISITANI

HISITŌLIA: MAʻUNIMĀ ʻE HE MALIUANÁ MO E TAPAKÁ

KUOHILÍ: Naʻe fāʻeleʻi au ʻi he fakatonga ʻo Kāsakisitaní, ʻi he kilomita nai ʻe 120 mei he kolo ko Tashkent. Ko e feituʻú naʻe mōmoa mo vela ʻi he taimi māfaná, pea aʻu ʻa hono fua māfaná ki he tikilī Selosiasi ʻe 45, pea ʻi he taimi momokó naʻe tō ai ʻa e fua māfaná ki he tikilī Selosiasi mainasi 10 nai—ko e tuʻunga lelei ʻaupito ki hono tō fakatouʻosi ʻo e kālepí mo e maliuaná.

Ko ʻeku ongo mātuʻá ko e ongo tupuʻi Siamane. Ko e ongo Kalisitiane lotu fakaʻevangeliō kinaua fakatouʻosi ka naʻe ʻikai te na ngāueʻi ʻa e lotu naʻá na kau ki aí. Kae kehe, naʻá na akoʻi au ke u lau maʻuloto ʻa e Ko ʻEmau Tamaí. ʻI heʻeku taʻu 14, naʻe ako Tohi Tapu ai ʻi ha vahaʻa taimi ʻa ʻeku faʻeé mo hoku tuofefine lahí mo e Kau Fakamoʻoni ʻa Sihová. ʻI he taimi ʻe taha, naʻá ku fanongo atu ai ki hono fakahaaʻi ange ʻe he ongo Fakamoʻoni naʻe ako mo ʻeku faʻeé kiate ia ʻa e huafa ʻo e ʻOtuá, ko Sihova, ʻi heʻene Tohi Tapu motuʻá. Naʻe maongo ia kiate au. Naʻe tuku e ako ʻa e fineʻeikí, pea naʻe ʻikai toe hoko atu ai ʻeku mahuʻingaʻia ʻi he ngaahi meʻa fakalaumālié. Kae kehe, ʻi ha taimi ki mui ai ʻi he akó, naʻe toutou fai ai ʻe heʻemau faiakó ha ngaahi talanoa loi fekauʻaki mo e lotu mavahe ʻoku taku ko e Kau Fakamoʻoni ʻa Sihova. Koeʻuhi naʻá ku ʻalu mo hoku tuofefiné ki he ngaahi fakataha ʻe niʻihi ʻa e Kau Fakamoʻoni ʻa Sihová, naʻá ku tala ange ki he faiakó ko e ngaahi meʻa naʻá ne toutou talanoaʻí naʻe ʻikai moʻoni.

ʻI heʻeku taʻu 15, naʻe ʻave ai au ki Leningrad, ko St. Petersburg, Lūsia ia he taimí ni, ke ako ngāue. Naʻá ku vahevahe ai ki he faʻahinga ʻi homau lokí ʻa e meʻa siʻisiʻi naʻá ku ʻilo fekauʻaki mo Sihová. Kae kehe, naʻá ku kamata ke ifi. ʻI heʻeku ʻaʻahi ki hoku ʻapí ʻi Kāsakisitaní, naʻe faingofua kiate au hono fakatau mai ʻo e maliuaná, neongo naʻe taʻefakalao hono fai iá. Naʻá ku toe inu lahi ʻa e votikaá mo e uaine naʻá ku ngaohi.

Naʻá ku fakaʻosi ʻa e ako ngāué pea hū leva ki he kau tau Sovietí ʻi he taʻu ʻe ua. Neongo ia, naʻá ku kei manatuʻi pē ʻa e niʻihi ʻo e ngaahi moʻoniʻi meʻa naʻá ku ako mei he Tohi Tapú ʻi heʻeku kei siʻí. ʻI he avangamālié pē, naʻá ku talanoa ai ki hoku kaungā sōtiá fekauʻaki mo Sihova pea taukapoʻi ʻa e Kau Fakamoʻoní ʻi he fai ha talanoa loi fekauʻaki mo kinautolu.

ʻI he ʻosi ʻeku ngāue fakakautaú, naʻá ku hiki ki Siamane. Lolotonga ʻeku ʻi ha kemi ki he kau hiki ki he fonuá, naʻá ku maʻu ai ha tatau ʻo ha tohi ako Tohi Tapu ko e faʻu ʻe he Kau Fakamoʻoní. Naʻá ku lau ia fakataha mo e loto-māfana lahi pea fakapapauʻi naʻe moʻoni ʻa e meʻa naʻe lau ki aí. Kae kehe, naʻe ʻikai malava ke taʻofi hono maʻunimā au ʻe he tapaká mo e maliuaná. Hili ha vahaʻa taimi, naʻá ku hiki ai ʻo ofi ki he kolo ko Karlsruhe. Naʻá ku fetaulaki ai mo e taha ʻo e Kau Fakamoʻoni ʻa Sihová, pea naʻá ma kamata ako Tohi Tapu.

FOUNGA HONO LILIU ʻE HE TOHI TAPÚ ʻA ʻEKU MOʻUÍ: Naʻá ku ongoʻi ʻi ha taimi fuoloa ko e Tohi Tapú ko e Folofola ia ʻa e ʻOtuá. Pea ʻi he hili hono lau ʻo e tohi ako Tohi Tapu naʻá ku maʻú, naʻá ku tuipau ai naʻe tali ʻe he Tohi Tapú ʻa e ngaahi fehuʻi mahuʻinga kotoa ʻi he moʻuí. Neongo ia, naʻe fiemaʻu ʻa e taimi lōloa ke liliu ai ʻa ʻeku tōʻongá. Faifai pē, naʻá ku ʻai ki hoku lotó ʻa e akonaki ʻa e Tohi Tapú ʻi he 2 Kolinito 6:19 (2Ko 7:1, PM) peá u fakapapauʻi ke fakamaʻa au mei he “ʻuli kotoa pe ʻo e kakano mo e loto,” ʻa ia naʻe ʻuhinga iá ko hono liʻaki a e maliuaná mo e tapaká.

Naʻá ku malava ai ke meimei tuku ʻosi ʻeku ifi maliuaná. Ka naʻe feʻunga mo e māhina lōloa ʻe ono ke tuku ai ʻeku tōʻongaʻaki ʻa e ifi tapaká. ʻI he ʻaho ʻe taha naʻe ʻeke mai ai ʻe he tokotaha Fakamoʻoni naʻe ako Tohi Tapu mo aú, “Ko e hā ʻa e taumuʻa ʻo hoʻo moʻuí?” Naʻe ʻai moʻoni ʻe he meʻa ko iá ke u fakakaukau fekauʻaki mo hono maʻunimā au ʻe he tapaká. Naʻe tuʻo lahi ʻeku feinga ke tuku ʻa e ifí. Neongo ia, ʻi he taimi ko ení, naʻá ku fakapapauʻi ai ke lotu ki muʻa ke u ala ki ha foʻi sikaletí kae ʻikai toki kole fakamolemole ki he ʻOtuá ʻi he hili ʻeku ifí. ʻI he 1993, naʻá ku fokotuʻu pau ai ha ʻaho ʻa ia ʻe tuku ai ʻeku ifí. ʻI he tokoni ʻa Sihová, kuo ʻikai te u toe ala ki ha foʻi sikaleti talu mei ai.

FOUNGA ʻO ʻEKU MAʻU ʻAONGÁ: ʻI heʻeku ʻatā he taimí ni mei hono maʻunimā ʻe he maliuaná mo e tapaká ʻoku fakamole paʻanga lahi mo fakatupu maumaú, naʻe fakalakalaka ai ʻa ʻeku tuʻunga moʻui leleí. ʻI he ʻaho ní, ʻoku ou maʻu ai ʻa e monū ʻo e hoko ko ha tokotaha ngāue pole ʻi he ʻōfisi vaʻa ʻo e Kau Fakamoʻoni ʻa Sihova ʻi Siamané. ʻOku ou fiefia ʻaupito ʻi heʻeku ako ke ngāueʻaki ʻi heʻeku moʻuí ʻa e poto ʻoku ʻi he Tohi Tapú! Ko hono ʻiloʻi ʻa e meʻa ʻoku akoʻi ʻe he Tohi Tapú kuo ʻomai ai kiate au ʻa e taumuʻa moʻoni ʻi he moʻuí.

FAKAMATALA

HINGOA: TITUS SHANGADI

TAʻUMOTUʻA: 43

FONUA TUPUʻANGA: NAMĪPIA

HISITŌLIA: MĒMIPA ʻO HA KENGI FAKAMĀLOHI

KUOHILÍ: Naʻá ku tupu hake ʻi ha kolo ʻuta ʻi he vahefonua Ohangwena ʻo e fakatokelau ʻo Namīpiá. Ko e kakai ʻi hoku koló naʻe tā mo tāmateʻi kinautolu lolotonga ʻa e tau naʻe fai ʻi he feituʻú ni lolotonga ʻa e 1980 tupú. ʻI hoku koló, naʻe toki lau pē ai kuo fuʻu tangata ha tamasiʻi kapau naʻe poto ʻi he fuhú pea lava ke ne tā ʻa e tamaiki tangata kehé. Ko ia naʻá ku ako fuhu ai!

ʻI he ʻosi ʻa ʻeku akó, naʻá ku ʻalu ʻo nofo mo ʻeku faʻē-tangata ʻi he kolo matāfonua ko Swakopmund. ʻI heʻeku aʻu pē ki aí, naʻá ku kau ai ʻi ha kengi ʻo e kau talavou angatuʻu. Naʻa mau ʻalu ki he ngaahi feituʻu ʻi he koló naʻe ʻikai talitali lelei ai ʻa e kau ʻuliʻulí, hangē ko e ngaahi hōtelé mo e paá, ke fakalanga fuhu pē. ʻI he ngaahi taimi ʻe niʻihi, naʻa mau fuhu ai mo e kau leʻó pea mo e kau polisí. ʻI he pō kotoa pē naʻá ku ʻalu holo ai mo ha hele māsila lōloa pe ko ha panga, ʻa ia ko ha hele pelu, ʻi he mateuteu ke ʻohofi ʻaki ha taha pē naʻe fakafetau mai.

ʻI he pō ʻe taha lolotonga ʻa e fuhu mo ha kengi naʻa mau feʻauʻauhi, naʻá ku meimei mate ai. Naʻe haʻu mei mui ʻiate au ha mēmipa ʻo e kengi he faʻahi ʻe tahá pea ʻi he hiki hono nimá ke tuʻusi hoku ʻulú naʻe tukiʻi ia ʻe ha kaungā mēmipa ʻo ʻemau kengí ʻo ʻikai te ne toe ʻilo ha meʻa. Neongo ʻa e meimei mate ko ení, naʻe hokohoko atu pē ʻa ʻeku moʻui anga-fakamālohí. Kapau naʻá ku kau ki ha fakafekiki mo ha taha, tangata pe fefine, ko au maʻu pē naʻá ku ʻuluaki tukí.

FOUNGA HONO LILIU ʻE HE TOHI TAPÚ ʻA ʻEKU MOʻUÍ: ʻI heʻeku ʻuluaki fetaulaki mo e taha ʻo e Kau Fakamoʻoni ʻa Sihová, naʻe lau mai ʻe he fefiné kiate au ha ngaahi veesi mei he Sāme 37 pea tala mai leva ʻoku ʻi he tohi Fakahaá ʻi he Tohi Tapú ha ngaahi talaʻofa fakaofo kehe ki he kahaʻú. Ka koeʻuhi naʻe ʻikai te ne tala mai pe ko fē ʻi he tohí naʻe ʻi ai ʻa e ngaahi talaʻofa ko ení, naʻá ku maʻu ai ha Tohi Tapu ʻo lau kotoa he pō ko iá ʻa e tohi Fakahaá. Naʻá ku saiʻia ʻi he talaʻofa naʻá ku lau ʻi he Fakahā 21:3, 4 naʻe pehē ai “ʻe ʻikai toe ai ha mate, pea ʻe ʻikai toe ai ha mamahi, pe ha tangi, pe ha ongosia.” ʻI he toe foki mai ʻa e ongo Fakamoʻoní, naʻá ku tali ʻa e tuʻuaki ki ha ako Tohi Tapú.

Naʻe faingataʻa ʻaupito ke liliu ʻa e anga ʻo ʻeku fakakaukaú mo e tōʻongá. Ka naʻá ku ako mei he Ngāue 10:34, 35 “ʻoku ʻikai ke filifilimanako ʻa e ʻOtua: ka neongo pē ko e fēʻia ʻa e kakai, ka ʻilonga ʻa ia ʻoku ʻapasia kiate ia, pea ngāue fai ki he totonu, ʻoku ngofua ke ne aʻu mai kiate ia.” Naʻá ku toe ngāue mālohi ke ngāueʻaki ʻa e Loma 12:18: “Mou nofo melino pe mo e kakai kotoa pe, ʻo kapau ʻe ala lava.”

Tānaki atu ki hono ako ke mapuleʻi ʻa ʻeku ʻitá, naʻe toe pau ke u taʻofi ʻa e maʻunimā mālohi au ʻe he tapaká. Naʻá ku faʻa lotu fakataha mo e loʻimataʻia kia Sihova ke ne tokoniʻi au. Ka ʻi he ʻuluaki taimí ne hā mahino naʻá ku fai ʻa e ngaahi meʻá ʻi he founga hala, ʻi he pehē te u ifi ʻeku foʻi sikaleti “fakaʻosí” pea toki lotu leva ʻi he hili iá. Ko e Fakamoʻoni naʻá ma ako Tohi Tapú naʻá ne tokoniʻi au ke u sio ki he mahuʻinga ʻo e lotu ki muʻa ke u toʻo ha foʻi sikaletí. Naʻe toe fiemaʻu foki ke u fakaʻehiʻehi mei he nofo takai holo ʻi he niʻihi kehe naʻa nau ifí. ʻIkai ko ia pē, naʻá ku muimui ʻi he fokotuʻu ke lea ki hoku kaungāngāué fekauʻaki mo hono kovi ʻo e ifí. Naʻe tokoniʻi moʻoni au ʻe he meʻá ni, he naʻe ʻikai toe lava ke u maʻu taʻetotongi ai ha foʻi sikaleti—naʻe ʻikai kei ʻomai ia kiate au ʻe he kau ifi kehé.

Faifai atu pē, naʻá ku malava ke tuku ʻa e ifí pea mavahe ai mei heʻeku founga moʻui ki muʻá. Hili ʻa e māhina ʻe ono ʻo hono ako mo ngāueʻaki ʻa e ngaahi tefitoʻi moʻoni Fakatohitapú, naʻá ku taau ai ke papitaiso ko e taha ʻo e Kau Fakamoʻoni ʻa Sihová.

FOUNGA ʻO ʻEKU MAʻU ʻAONGÁ: Naʻá ku hoko ʻo tuipau ʻoku ngāueʻi ʻe he Kau Fakamoʻoni ʻa Sihová ʻa e lotu moʻoní ʻi heʻeku sio ki he ʻofa naʻe hā mahino ʻi honau lotolotongá, ʻo tatau ai pē pe ko e hā honau matakalí pe lanu ʻo e kilí. Naʻa mo e ki muʻa ke u papitaiso ʻo hoko ko ha Fakamoʻoní, naʻe fakaafeʻi au ʻe ha mēmipa pālangi ʻo e fakatahaʻangá ki hono falé ke kai mo ia. Naʻe hangē ia ha misí. Kuo teʻeki ai ʻaupito ke u tangutu melino mo ha pālangi, tuku kehe ange ʻa e kai mo ia ʻi hono ʻapí. Naʻá ku hoko he taimi ko ení ko e konga ʻo ha fetokouaʻaki fakavahaʻapuleʻanga moʻoni.

ʻI he kuohilí, naʻe feinga ai ʻa e kau leʻó mo e kau polisí ke fakamālohiʻi au ke liliu ʻa ʻeku fakakaukaú mo e tōʻongá, ka naʻe ʻikai te nau lavameʻa. Ko e Tohi Tapú pē naʻá ne maʻu ʻa e mālohi ke tokoniʻi au ke liliu ʻa hoku angaʻitangatá pea ke hoko ai ko ha tangata fiefia.

[Fakamatala ʻi he peesi 29]

“Naʻá ku faʻa lotu fakataha mo e loʻimataʻia kia Sihova ke ne tokoniʻi au”