ʻE Lava ke Tokoniʻi ʻe he Kau Maté ʻa e Kau Moʻuí?

KO Temipaá, ko ha talavou ia ʻi ʻAfilika Hihifo, naʻe teu ke fai haʻane sivi fakaako.a Naʻe vilitaki ange ʻa ʻene faʻeé naʻe fiemaʻu kiate ia ʻa e tokoni ʻa hono kāinga kuo maté koeʻuhí ke ne lavameʻa. ʻI Palermo, Sisilī, ʻoku ʻaʻahi ai ʻa e kau folau ʻeveʻevá ki he ngaahi fonualoto ʻa ia kuo fakatolonga ʻo fokotuʻutuʻu fakalelei ai ʻa e ngaahi ʻangaʻanga ʻe lauingeau. Ko e ngaahi ʻangaʻanga fakatolonga ko ení ʻoku tui ʻa e niʻihi ʻoku maʻu mei ai ʻa e maluʻi fakaʻotua ki he kau moʻuí. ʻI he taʻu taki taha, ʻoku ʻaʻahi ai ʻa e kakaí ki Lily Dale, ko ha kolo ʻi he fakahihifo ʻo e Vahefonua Niu ʻIoké, ʻi ʻAmelika, ʻoku ʻiloa ʻi he tokolahi anga-kehe ʻa e kau fai fakahaʻele faʻahikehe ʻoku nofo aí. ʻOku haʻu ki ai ʻa e kau ʻaʻahí ʻi he ʻamanaki ʻe lava ke nau fetuʻutaki mo e kāinga pe kaungāmeʻa kuo maté pea maʻu ʻenau tokoní.

ʻOku hokohoko atu takatakai ʻi he foʻi kolopé, ʻa e tui ʻoku lava ke tokoniʻi ʻe he kau maté ʻa e kau moʻuí. Ko e hā hoʻo fakakaukaú? Mahalo pē kuo akoʻi kiate koe ha tui pehē pe ʻokú ke vāofi mo ha taha ʻokú ne maʻu ʻa e fakakaukau ko iá. ʻOku fakanatula pē ʻa e fakaʻamu ke sio ki he ngaahi ʻofaʻanga ʻa ia kuo tau māvae ʻi he maté. ʻOku palōmesi ʻa e kau fakahaʻele faʻahikehé te nau feau ʻa e fiemaʻu ko iá. Naʻe hiki ʻa e lea ʻa ha tokotaha fakahaʻele faʻahikehe ʻi he makasini Time naʻá ne pehē ai ko e nofoʻanga laumālié “ʻoku ʻatā maʻu pē kapau ʻe fai ha ui tokoni ki ai.” ʻOku moʻoni ia? ʻE lava moʻoni ke tokoniʻi ʻe he kau maté ʻa e kau moʻuí? Ko e tali mahino ʻa e Tohi Tapú te ke ʻohovale nai ai.

ʻOku Moʻui ʻa e Kau Maté ʻi ha Feituʻu?

ʻOku fakamatalaʻi ʻe he Tohi Tapú ʻi he kupuʻi lea maʻamaʻa mo faingofua ke mahinoʻi ʻa e tuʻunga ʻo e kau maté. Fakatokangaʻi ange ʻa e meʻa ʻoku fakamatalaʻi ʻi he Koheleti 9:5: “Ko e kau moʻui ʻoku nau ʻilo ai pe te nau pekia: ka ko e kau pekia ʻoku ʻikai te nau ʻilo ha momoʻi meʻa.” ʻOku malava ke pehē ʻoku ʻi ai ha ongoʻi ʻa e kau maté? ʻOku tali ia ʻi he Veesi 6: “Ko ʻenau ʻofa foki, mo ʻenau ngaahi fehiʻa, mo ʻenau ngaahi meheka, kuo loa pe ʻenau mole; pea ʻoku ʻikai hanau kei kaunga ʻo taʻengata ʻi he meʻa kehekehe ʻoku fai ʻi he lalo laʻa.” Fakatokangaʻi ange foki ʻi he veesi 10 ʻo e vahe tatau ʻoku pehē ai “ʻoku ʻikai ha ngaue, pe ha fakakaukau, pe ha ʻilo, pe ha poto ʻi Lolofonua, ʻa e feituʻu ʻoku ke fononga ki ai.” Ko e foʻi lea ko e “Lolofonua” naʻe ngāueʻaki hení ʻoku ʻuhinga iá ko e “faʻitoka anga-maheni ʻo e faʻahinga ʻo e tangatá.” Ko e meʻa mālié, ko e tatau faka-Kalisi ʻo e foʻi lea ko ení, ko e “Hētesi,” ʻoku ngāueʻaki ia ʻi he Tohi Tapú ke fakahaaʻi ʻa e feituʻu naʻe ʻalu ki ai ʻa Sīsū Kalaisi ʻi ha taimi hili ʻene pekiá.—Ngāue 2:31.

Naʻe tokoniʻi ʻe Sīsū ʻa e tokolahi lolotonga ʻene moʻuí, ka naʻá ne ʻiloʻi naʻe pau ke ne pekia. Naʻá ne ʻamanekina te ne kei malava ke tokoniʻi ʻa e kakaí lolotonga ʻa hono taimi ʻi he faʻitoká? ʻIkai. Naʻá ne fakahoa ʻa ʻene pekia naʻe tuʻunuku maí ki ha taimi poʻuli ʻa ia ʻe ʻikai malava ke fai ai ha ngāue. (Sione 9:4) Naʻe ʻiloʻi lelei ʻe Sīsū ʻi he taimi ʻoku ʻikai ke toe moʻui ai ʻa e tangatá, ʻoku “nau bekia [pe ʻikai toe lava ha meʻa].”—Aisea 26:14, PM.

Naʻe toe ngāueʻaki ʻe Sīsū ha fakahoa ʻa ia naʻe ʻomai ai ha poini meimei tatau fekauʻaki mo e maté. ʻI he taimi naʻe mate ai ʻa hono kaumeʻa ko Lāsalosí, naʻe fakatatau ai ʻe Sīsū ʻa ʻene maté ki he mohe. (Sione 11:11-13) ʻOku ʻikai ke tau ʻamanekina ʻe tokoniʻi kitautolu ʻe ha tokotaha ʻoku mohe, ʻikai ko ia? Ko ha tokotaha ʻoku mohe ʻoku ʻikai te ne ʻiloʻi ha meʻa, ʻoku ʻikai malava ke ne ngāue maʻa ha taha.

ʻOku Hao Moʻui ʻa e Laumālié ʻi he Maté?

Kuo akoʻi ki he tokolahi ko e laumālié ko ha ʻataʻi meʻa ia ʻoku hao moʻui ʻi he maté. ʻOku akoʻi ʻe he Tohi Tapú ʻa e meʻa kehe. Ko e ʻuluaki tohi ʻi he Tohi Tapú, ʻa e Senesí, ʻoku fakapapauʻi mai ai ʻa e laumālié kia kitautolu. ʻOku fakahaaʻi ʻi he Senesi 2:7 (PM) ʻi he fakatupu ʻo e ʻuluaki tangatá, naʻá ne ‘hoko koe laumalie moui.’ Ko e tangata kakató, ko ha laumālie ia; ko e fanga monumanú ko e ngaahi laumālie foki ia. (Senesi 1:20-25) Ko ia, ʻoku ʻuhinga lelei, ʻi he taimi ʻoku mate ai ha tangata pe ko ha manu, ʻoku mate ʻa e laumālié. ʻOku fakapapauʻi eni ʻe he Tohi Tapú.—Isikeli 18:4.

Kae kehe, ʻe ʻeke nai ʻe he niʻihi, ‘Fēfē ʻa e ngaahi talanoa lahi fekauʻaki mo e kakai ʻoku nau fetuʻutaki mo e kau maté, ʻo nau fanongo ki he ngaahi leʻo, pe aʻu ʻo sio kia kinautolu?’ Ko e ngaahi talanoa peheé ʻoku failahia ia ʻi he ngaahi feituʻu lahi ʻi he māmaní. ʻOku ʻoange ai ʻa e ʻamanaki ki he kāinga pe kaungāmeʻa ofi ʻoku mamahí, ʻo ueʻi ai ʻa e tokolahi ke nau kumi ki ha tokotaha fakahaʻele faʻahikehe ʻa ia ʻokú ne taukaveʻi ʻe malava ke fetuʻutaki mo e kau maté.

ʻOku moʻoni ʻa e ngaahi talanoa ko iá? Kapau ko ia, ʻikai ʻe fepaki eni mo e fakamatala makatuʻunga ʻi he Tohi Tapú ʻi ʻolungá? Naʻe fakamatalaʻi ʻe Kalaisi Sīsū ʻa e Folofola ʻa e ʻOtuá ko e moʻoní ia. (Sione 17:17) ʻOku ʻikai fepakipaki ʻa e moʻoní ʻiate ia pē. Ko hono moʻoní, ʻoku ʻi ai ʻa e fakahinohino mahino ʻi he Tohi Tapú ki he founga ʻoku totonu ke tau vakai ʻaki ki he ngaahi taukaveʻi ʻo pehē ʻoku lava ke tokoniʻi ʻe he kau maté ʻa e kau moʻuí. ʻOku tala mai ʻe he Tohi Tapú kia kitautolu ʻa e tokotaha naʻá ne feinga ke maʻu ʻa e tokoni mei he kau maté. Ko ha lau fakalelei ʻo e talanoá ʻe fakaeʻa ai ʻa e moʻoní.

Kole Tokoni ha Tuʻi mei he Tokotaha Mate

Ko e meʻa naʻe hokó ko ha malaʻe tau ʻi he fakatokelau ʻo ʻIsilelí. Naʻe fehangahangai ʻa Tuʻi Saula mo ʻene kau taú mo ha kau tau Filisitia fakamanavahē. ʻI he sio ʻa Saula ki he ʻapitanga ʻo e kau Filisitiá, naʻe “tetetete lahi hono loto.” ʻI he taimi ko eni ʻo ʻene tuʻí, naʻe ʻosi liʻaki ʻe Saula ia ʻa e lotu moʻoní. Ko hono olá, naʻe ʻikai tali ʻe Sihova ʻa ʻene ngaahi kole tokoní. Ko fē ʻe hanga ki ai ʻa Saula ki ha tokoní? Ne ʻosi mate ʻa e palōfita ia ʻa e ʻOtuá ko Sāmiuelá.—1 Samiuela 28:3, 5, 6, PM.

Naʻe kumi fakahinohino ʻa Saula mei he tokotaha fakahaʻele faʻahikehe ʻi ʻEnitoa. Naʻá ne kōlenga ki he tokotahá ni ke ne “Fakahaʻele mai ʻa Samiuela” mei he maté. Naʻe ui mai ʻe he tokotaha fakahaʻele faʻahikehé ha faʻahikehe. Ko “Sāmiuela” ko ení, naʻá ne tala ange kia Saula ʻe ikuna ʻa e kau Filisitiá pea ʻe mate ʻa Saula mo hono ngaahi fohá ʻi he taú. (1 Samiuela 28:7-19) Ko Sāmiuela moʻoni ia naʻe toe foki mai mei he maté?

Fakakaukau fekauʻaki mo ia. ʻOku fakahaaʻi ʻe he Tohi Tapú ʻi he maté ko e tokotahá “ʻoku ne foki ki hono kelekele” pea ko “ʻene ngaahi fakakaukau ʻoku mate.” (Sāme 146:4) Naʻe fakatou ʻilo ʻe Saula mo Sāmiuela naʻe fakahalaiaʻi ʻe he ʻOtuá ʻa e fetuʻutaki mo e kau fakahaʻele faʻahikehé. He ko ē, naʻe ʻuluaki takimuʻa ʻa Saula ʻi hono fakaʻauha mei he fonuá ʻa e ngaahi tōʻonga fakafaʻahikehé!—Livitiko 19:31.

Fakaʻuhinga ʻi he meʻá ni. Kapau naʻe kei moʻui ʻa e faitōnunga ko Sāmiuelá ko ha laumālie, te ne maumauʻi ʻa e lao ʻa e ʻOtuá pea ngāue fāitaha mo ha tokotaha fakahaʻele faʻahikehe koeʻuhi ke ne feʻiloaki mo Saula? Naʻe ʻosi fakafisi ʻa Sihova ke talanoa mo Saula. Ko hono moʻoní, ʻe lava ke fakamālohiʻi ʻe ha tokotaha fakahaʻele faʻahikehe ʻa e ʻOtua Māfimafi-Aoniú ke ne fetuʻutaki mo Saula fakafou ʻia Sāmiuela kuo maté? ʻIkai. ʻOku hā mahino, ko “Sāmiuela” ko ení naʻe ʻikai ko e palōfita faitōnunga ia ʻa e ʻOtuá ʻi ha tuʻunga pē. Ko ha laumālie ia—ko ha tēmeniō fulikivanu naʻe fakangalingali ko Sāmiuela ia kuo maté.

Ko e kau tēmenioó ko e kau ʻāngelo naʻa nau angatuʻu ki he mafai ʻo e ʻOtuá ʻi he muʻaki hisitōlia ʻo e tangatá. (Senesi 6:1-4; Siutasi 6) Ko e kau tēmeniō ko ení ʻoku lava ke nau siofi ʻa e kakaí lolotonga ʻenau moʻuí; ʻoku nau ʻiloʻi ʻa e anga ʻo e talanoa, sio mo e tōʻonga ʻa e tokotaha taki taha. ʻOku nau vēkeveke ke pouaki ʻa e fakakaukau ko ia ʻoku ʻikai moʻoni ʻa e meʻa ʻoku leaʻaki ʻe he Tohi Tapú. Tāneʻineʻi ke fakatokanga ʻa e Tohi Tapú fekauʻaki mo ha fetuʻutaki mo e ngaahi kongakau laumālie ko iá! (Teutalonome 18:10-12) Ko e ngaahi laumālie fulikivanu ko ení ʻoku nau kei longomoʻui pē he ʻahó ni.

Sai ʻe lava ke tau sio ki he ʻuhinga ʻoku talanoa ai ʻa e tokolahi fekauʻaki mo e “fanongo” pe “sio” ki he ngaahi ʻofaʻanga kuo maté. Neongo ko e ngaahi faʻahikehe ko iá ʻoku nau hā ngali anga-fakakaumeʻa nai ʻi he taimi ʻe niʻihi, ko e ngaahi kongakau laumālie fulikivanú ʻoku nau fakapapauʻi ke kākaaʻi ʻa e tangatá.b (Efeso 6:12) Pehē foki, fakakaukau angé ki heni: Ko Sihová ko ha ʻOtua ʻofa ʻa ia ʻoku tokanga mai kia kitautolu. Kapau naʻe moʻui ʻa e kau maté ʻi ha feituʻu pea ʻoku lava ke nau haʻu ʻo tokoniʻi ʻa honau kaungāmeʻá mo e fāmilí, ʻe hanga ʻe hotau Tokotaha-Fakatupu ʻofá ʻo tapui ʻa e fetuʻutaki ko iá pea lave ki ai ko ha meʻa “fakalielia”? ʻIkai ʻaupito! (1 Pita 5:7) ʻOku ʻi ai leva ha matavai alafalalaʻanga ʻo e tokoní?

Tokoni Moʻoni ki he Kau Moʻuí mo e Kau Maté

ʻOku tau mahinoʻi mei he meʻa naʻe lave ki ai ki muʻá ko e kau maté ʻoku ʻikai hanau mālohi ke tokoni ki he kau moʻuí. ʻIkai ko ia pē, ko e ngaahi feinga ke kumi ki he tokoni ʻa e kau maté ʻoku kovi ange ia ʻi he ʻikai ola leleí; ʻoku fakatuʻutāmaki ʻaupito ia, he ʻoku maumauʻi ai ʻa e lao ʻa e ʻOtuá pea ʻai kitautolu ki he tuʻunga fakatuʻutāmaki ʻo e tākiekina fakatēmeniō.

ʻOku tataki kitautolu ʻe he Tohi Tapú ki he Matavai lelei taha ʻo e tokoní—ko hotau Tokotaha-Fakatupú, ko Sihova. ʻE lava ke ne fakahaofi kitautolu mei he maté tonu. (Sāme 33:19, 20) ʻI he ʻahó ni ʻokú ne faingamālie ke tokoniʻi kitautolu. Ko ia ʻokú ne ʻomai ʻa e ʻamanaki moʻoni, ʻo ʻikai hangē ko e ngaahi ʻamanaki loi mei he kau fakahaʻele faʻahikehé.

Ko Temipā, naʻe lave ki ai ʻi he kamatá, naʻá ne ʻuluaki ako ʻa e faikehekehe ʻi he vahaʻa ʻo e ngaahi ʻamanaki loi ʻoku tuʻuaki mai ʻe he kau fakahaʻele faʻahikehé mo e moʻoni ʻoku tuku mai ʻe Sihova kia kitautolú. Naʻe taukaveʻi ange ʻe he kau fakahaʻele faʻahikehé kapau heʻikai te ne fai ha feilaulau ki heʻene fanga kui kuo maté, te ne tō ʻi he sivi fakaakó. Naʻe ʻosi kamata ako Tohi Tapu ʻa Temipā mo e Kau Fakamoʻoni ʻa Sihová. Naʻá ne ako ʻo ʻilo ʻa e tuʻunga moʻoni ʻo e kau maté pea pehē ki he tupuʻanga kovi ʻo e faʻahinga ko ia ʻoku nau fakangalingali ko e fanga kui kinautolu kuo maté. Neongo ʻa e tenge lahi mei heʻene faʻeé ke ne kumi tokoni ki ha tokotaha fakahaʻele faʻahikehé, naʻe fakafisi ʻa Temipā, ʻo tala ange kiate ia, “Kapau te u tō, te u feinga mālohi ange ʻi he taʻu kahaʻú.”

Ko e hā ʻa e olá? Naʻe ʻuluaki ʻosi ʻa ʻene siví! Naʻe ʻohovale ʻa ʻene faʻeé, ʻo mole ai ʻene tui ki he kau fakahaʻele faʻahikehé, pea ʻikai ʻaupito toe lave ki ha ngaahi feilaulau pehē. Naʻe ako ʻa Temipā ʻoku fakatokanga mai ʻa Sihova ke tau fakaʻehiʻehi mei he “huhū ki ha kau mate koeʻuhi ko ha kau moʻui.” (Aisea 8:19) Naʻe hanga ʻe he ako Tohi Tapú ʻo ʻai ʻa Temipā ke tuipau kapau te ne manako ʻi he lao ʻa e ʻOtuá, te ne lavameʻa.—Sāme 1:1-3.

Kae kehe, fēfē ʻa e ngaahi ʻofaʻanga kuo tau māvae mo iá? ʻOku ʻi ai ha ʻamanaki kia kinautolu? Tānaki atu ki hono tokoniʻi kitautolu ʻoku moʻuí, kuo talaʻofa mai ʻe Sihova te ne tokoniʻi ʻa e faʻahinga ʻoku ʻi he faʻitoká. Hili hono fakamatalaʻi ʻa e ʻikai ha mālohi ʻo e kau maté, fakatokangaʻi ange ʻa e meʻa ʻoku fakahaaʻi ʻe he palōfita ko ʻAiseá ʻi he vahe 26, veesi 19: “ʻE toe moʻui hoʻo kau pekia: . . . ʻA, ʻo mavava, ʻa e tofā ʻi he efu”! ʻOku toe fakahaaʻi ʻi he kikité ko e faʻahinga kuo “bekia [pe ʻikai toe lava ha meʻa]” te nau toe moʻui.

Sioloto atu ki ai! Ko e laui piliona masiva tokoni ʻoku nau mohe ʻi he faʻitoká ʻe toe fakamoʻui! Ko hono moʻoní, ʻoku fakahaaʻi ʻe he Tohi Tapú ko Sihová ʻokú ne “holi” ke fakamoʻui ʻa e kau maté. (Siope 14:14, 15, PM) ʻOku hā ngali taʻemalava ʻa e talaʻofa ko iá? Naʻe fakapapauʻi ʻaupito ʻe Sīsū Kalaisi ʻa e ʻamanakí ni ʻo ne fakamatalaʻi ko e kau maté ʻoku nau ʻosi moʻui ʻi he vakai mai ʻa Sihová.—Luke 20:37, 38.

Te ke saiʻia ke maʻu ʻa e ʻamanakí ni?c Hokohoko atu hono maʻu ʻa e ʻilo totonu mei he Tohi Tapú. ʻI hoʻo akó, te ke tuipau ai ʻe lava ke tokoniʻi ʻe Sihova ʻa e kau moʻuí mo e kau maté pea ko ʻene ngaahi talaʻofá ʻoku “ala falala ki ai, pea ko e moʻoni ʻo e moʻoni.”—Fakahā 21:4, 5.

[Fakamatala ʻi lalo]

[Fakamatala ʻi he peesi 19]

ʻOku fakanatula pē ʻa e fakaʻamu ke sio ki he ngaahi ʻofaʻanga ʻa ia kuo tau māvae mo ia ʻi he maté

[Fakatātā ʻi he peesi 20]

Naʻe foki mai ʻa e palōfita ko Sāmiuelá mei he maté ʻo fetuʻutaki mo Tuʻi Saula?