Sitepu ʻe Fitu ke Maʻu ʻAonga Ai mei he Lau Tohi Tapú

“ʻOku ʻikai ngata pē ʻa e hoko ʻa e Tohi Tapú ko e tohi fakataua lahi taha ia ʻi he kotoa ʻo e taimí, ka ko e tohi fakataua lahi taha ia ʻi he taʻu kotoa pē.”—MAKASINI TIME.

“ʻOku ou lau ʻa e Tohi Tapú ʻi he taimi ʻe niʻihi, ka ʻoku ou ʻilo ʻoku fuʻu fakapipiko ʻaupito.”—KEITH, TOKOTAHA MŪSIKA ʻILOA MEI ʻINGILANI.

KO E meʻa fakaolí ʻoku maʻu ʻe he kakai tokolahi ha Tohi Tapu ka ʻoku hā ngali ʻoku nau maʻu pē ʻa e ʻaonga siʻisiʻi mei hono lau iá. Neongo ia, ko e niʻihi, ʻoku nau koloaʻaki ʻa e meʻa ʻoku nau lau ʻi he Tohi Tapú. Ko e fakatātaá, ko ha fefine ko hono hingoá ko Nancy ʻokú ne pehē: “Talu ʻeku kamata lau mo fakalaulauloto ki he Tohi Tapú ʻi he hengihengi taki taha, ʻoku ou ongoʻi ai ʻoku ou mateuteu ke fehangahangai mo ha meʻa pē ʻe hoko nai ʻi he ʻaho ko iá. Ko e founga tuʻumaʻu ko ení kuo lahi ange ʻa e meʻa kuó ne fai ke fakafiemālieʻi ʻa ʻeku faʻa loto-mafasiá ʻo lahi ange ia ʻi ha meʻa pē naʻá ku ʻahiʻahiʻi laka hake ʻi he taʻu ʻe 35 kuohilí.”

Neongo kapau kuo teʻeki ai ʻaupito ke ke lau ʻa e Tohi Tapú, ʻoku ueʻi nai koe ʻe hono maʻu ʻe ha niʻihi ha tokoni mei aí? Kapau kuó ke ʻosi hoko ko ha tokotaha lau Tohi Tapu, te ke saiʻia ke maʻu ʻaonga lahi ange mei hoʻo lau iá? Kapau ko ia, ʻahiʻahiʻi ʻa e sitepu ʻe fitu ʻoku fakamatalaʻi ʻi he kupu ko ení.

SITEPU 1 Lau fakataha mo e taumuʻa totonu

◼ ʻE lava ke ke lau ʻa e Tohi Tapú ʻo hangē pē ia ha tohi mālié pe koeʻuhí pē ko hoʻo ongoʻi ko ho fatongia ia ke fai pehē, pe ko e fakakaukau ko ia te ke maʻu nai ai ha tataki ʻi he māmani faingataʻa ko ení. Ka te ke maʻu ʻaonga lahi angé, kapau ko hoʻo taumuʻá ia ke ako ʻa e moʻoni fekauʻaki mo e ʻOtuá. Tānaki atu ki aí, te ke utu ʻa e ngaahi tāpuaki lahi kapau ko hoʻo fakaueʻilotó ia ke sio ki he founga ʻe lava ke ueʻi ai ʻe he pōpoaki ʻo e Tohi Tapú ʻa hoʻo moʻuí.

ʻOku fakamamafaʻi ʻe he Tohi Tapú ʻa e mahuʻinga ʻo e lau fakataha mo e taumuʻa totonú ʻaki hono fakahoa ʻa e Tohi Tapú ki ha sioʻata: “Ka ai ha taha, ʻa ia ko ha fanongo pe ki he folofola, ka ko ha taʻe fai ki ai, ʻoku tatau ia mo ha siana ʻoku ne fakasio ki he fōtunga naʻe tupu mo ia ʻi ha sioʻata: he kuo ne fakasio leva kiate ia, pea ne ʻalu, pea ngalo leva pe ko e ha hono anga. Ka ko ia ʻoku ne fakasio hifo ki he lao haohaoa, ʻa e lao tauʻataina, ʻo ne taʻutū ai, kaeʻūmaʻā ʻoku ʻikai te ne hoko ko ha taha fanongo kae ngalo, ka ko ha taha fai ngaue, ʻe, ʻe monuʻia ʻa e toko taha ko ia ʻi heʻene fai.”—Semisi 1:23-25.

Ko e tangata ʻi he fakatātā ko ení naʻá ne fakasio ki hono fofongá ʻi ha sioʻata ka naʻe ngalo ke ne fakatonutonu hono fōtungá. Mahalo naʻá ne kiʻi hila pē kiate ia tonu, pe naʻe ʻikai nai te ne fuʻu tokanga ke fai ha ngaahi fakatonutonu. ʻI he tuʻunga meimei tatau, te tau maʻu ʻa e ʻaonga siʻisiʻi pē kapau ʻoku tau lau noaʻia ʻa e Tohi Tapú pe ʻikai fie ngāueʻaki ʻa e meʻa ʻoku tau laú. ʻI hono kehé, ʻe lava ke tau maʻu ʻa e fiefia moʻoní kapau ʻoku tau fakasio ki he Tohi Tapú fakataha mo e fakakaukau ke tau hoko ko ha tokotaha “fai ki ai,” ʻo fakaʻatā ʻa e fakakaukau ʻa e ʻOtuá ke ne fakafuo ʻetau ngaahi fakakaukaú mo e ngaahi tōʻongá.

SITEPU 2 Fili ha liliu alafalalaʻanga

◼ ʻOkú ke maʻu nai ha ngaahi liliu Tohi Tapu lahi ke fili mei ai ʻi hoʻo leá. Neongo ʻe lava ke ʻaonga kiate koe ha faʻahinga liliu pē ʻo e Folofola ʻa e ʻOtuá, ʻoku ngāueʻaki ʻe he niʻihi ʻa e lea motuʻa pe fakapoto ʻa ia ʻe faingataʻa nai ke mahinoʻi. (Ngāue 4:13) Ko e ngaahi liliu Tohi Tapu ʻe niʻihi ʻoku aʻu ʻo nau liliu ʻa e pōpoaki totonu ʻa e Tohi Tapú ʻaki ʻa e fakafalala ki he ngaahi talatukufakaholó. Ko e fakatātaá, hangē ko ia naʻa tau fakatokangaʻi ʻi he ngaahi kupu kamata ʻo e makasini ko ení, kuo fetongi ʻe he niʻihi ʻa e huafa ʻo e ʻOtuá, ʻa e Sihová, ʻaki ʻa e ngaahi hingoa fakalakanga, ʻo hangē ko e “ʻOtua” pe “ʻEiki.” Ko ia ʻi hono fili ha liliu Tohi Tapu, kumi ha liliu ʻoku liliuʻi totonu ai ʻa e Tohi Tapú ʻi he lea faingofua ke mahinoʻi ʻa ia ʻe fakaʻaiʻai ai hono laú.

Ko e laui miliona ʻo e kau lautohi ʻi he māmaní kotoa kuo nau ʻiloʻi ko e New World Translation ʻokú ne fai ʻa e meʻa tofu pē ko iá.a Fakakaukau ki he tuʻunga ʻo ha tangata taʻumotuʻa ʻi Pulukālia. Naʻá ne maʻu ha fakataha ʻa e Kau Fakamoʻoni ʻa Sihová pea naʻe ʻoange kiate ia ha tatau ʻo e New World Translation. Hili iá, naʻá ne pehē: “Kuó u lau ʻa e Tohi Tapú ʻi he taʻu lahi, ka kuo teʻeki ai ke u lau ha liliu ʻoku faingofua ange ke mahinoʻi pea ʻoku aʻu tonu ki he lotó.”

SITEPU 3 Lotu

◼ ʻE lava ke ke maʻu ʻa e mahino Fakatohitapu lahi ange ʻaki hono kole ki he Faʻu-Tohí ʻene tokoní, hangē ko ia naʻe fai ʻe he tokotaha-tohi-sāmé ʻi heʻene pehē: “Fakaʻa muʻa hoku mata, kau sio meʻa fakaofo ʻi hoʻo lao na.” (Sāme 119:18) Lotu ki he ʻOtuá ʻi he taimi taki taha ʻokú ke lau ai ʻa e Tohi Tapú, ʻo kole kiate ia ke ne tokoniʻi koe ke mahinoʻi ʻa ʻene Folofolá. ʻE toe lava ke ke fakahaaʻi ʻa hoʻo houngaʻia ʻi he Tohi Tapú, he kapau naʻe ʻikai ia ʻe ʻikai ke tau ʻiloʻi ʻa e ʻOtuá.—Sāme 119:62.

ʻOku fanongo mai ʻa e ʻOtuá ki he ngaahi lotu kole tokoni peheé? Fakakaukau ki he meʻa naʻe hoko ki he ongo tautehina fefine taʻu hongofulu tupu ʻi ʻUlukuei. Naʻá na puputuʻu ʻi he meʻa ʻoku leaʻaki ʻe he Tohi Tapú ʻi he Taniela 2:44 peá na lotu ke ʻomai ʻe he ʻOtuá ha taha ke tokoniʻi kinaua ke na mahinoʻi ia. Lolotonga ʻa e kei tuku fakaava ʻa e Tohi Tapu ʻa e ongo tamaiki fefiné, naʻe aʻu atu ha toko ua ʻo e Kau Fakamoʻoni ʻa Sihová ki hona matapaá, ʻo lau ʻa e veesi tofu pē ko ia naʻe lotu ʻa e ongo tamaikí ʻo fekauʻaki mo iá, pea fakamatalaʻi ange ʻoku ʻuhinga iá ko e ngaahi founga-pule faʻu ʻe he tangatá ʻe fetongi ia ʻe he Puleʻanga ʻo e ʻOtuá.b Naʻe tuipau ʻa e ongo tautehina taʻu hongofulu tupú kuo tali ʻe he ʻOtuá ʻa ʻena lotu ki ha tokoní.

SITEPU 4 Lau fakaʻaho

◼ Naʻe fakatokangaʻi ʻe ha tokotaha faʻu-tohi ʻe taha “naʻe ʻi ai hono fuʻu fakataua lahi ʻo e Tohi Tapú” hili ʻa e ʻohofi fakaetautoitoi ʻi he ʻIunaite Seteté ʻi Sepitema 11, 2001. ʻOku hanga ʻa e tokolahi ki he Folofola ʻa e ʻOtuá ʻi he taimi pē ʻo e faingataʻá. Kae kehe, ko e Tohi Tapú, ʻokú ne fakalototoʻaʻi kitautolu ke lau ia ʻi he ʻaho taki taha, he ʻoku pehē ai: “ʻE ʻikai mahuʻi mei ho ngutu ʻa e tohi lao ko ia, ka te ke fakalaulauloto ki ai ʻi he ʻaho mo e po, koeʻuhi ke ke tokanga ke fai ʻo hange ko e meʻa kotoa kuo tohi ai; he te ke toki monuʻia ʻi he meʻa ʻoku ke fou ai, pea te ke fai fakapotopoto ai.”—Siosiua 1:8.

Ko e mahuʻinga ʻo hono lau maʻu pē ʻa e Tohi Tapú ʻe fakatātaaʻi nai ia ʻaki ha tangata ʻa ia naʻe matuʻutāmaki hono mafú pea ʻokú ne fili ke kai ʻa e ngaahi meʻakai ʻoku fakatupu moʻui lelei angé. ʻE tokoniʻi nai ia ʻe he fakahinohino ko ení kapau te ne toki muimui pē ki ai ʻi he taimi ʻokú ne ongoʻi ai ha langa lahi ʻi hono fatafatá? ʻIkai. Kuo pau ke ne muimui tonu maʻu pē ki ha tōʻonga kai moʻui lelei ke maʻu mei ai ha ʻaonga lahi. ʻOku pehē pē, ko hono lau fakaʻaho ʻo e Tohi Tapú ʻe tokoniʻi ai koe ke ke “monuʻia ʻi he meʻa ʻoku ke fou ai.”

SITEPU 5 Fulifulihi hoʻo foungá

◼ Ko hono lau ʻa e Tohi Tapú meia Sēnesi kia Fakahaá ʻe lelei ia, ka te ke ʻilo nai ha ngaahi founga kehe ʻe fakaivifoʻou. Ko e ngaahi fokotuʻu eni ʻe niʻihi.

Muimuiʻi pē ha foʻi tokotaha. Lau ʻa e ngaahi vahe pe ko e ngaahi tohi ʻoku lāulea tefito ai ki ha tokotaha lotu ʻa e ʻOtuá, hangē ko ení:

• Siosifa: Senesi 37-50.

• Lute: Lute 1-3

• Sīsū: Mātiu 1-28; Maake 1-16; Luke 1-24; Sione 1-21.c

Tokangataha ki ha tuʻunga-lea. Lau ʻa e ngaahi konga tohi ʻoku felāveʻi mo iá. Ko e fakatātaá, fekumi fekauʻaki mo e kaveinga ʻo e lotú, pea lau ʻa e akonaki ʻa e Tohi Tapú fekauʻaki mo e lotú pea pehē ki he niʻihi ʻo e ngaahi lotu lahi ʻoku lēkooti ʻi he Tohi Tapú.d

Lau leʻo-lahi. ʻE lava ke ke maʻu ʻaonga lahi ʻaki hono lau leʻo-lahi ʻa e Tohi Tapú. (Fakahā 1:3) ʻE aʻu nai ʻo mou lau leʻo-lahi ko ha fāmili, ʻo taufetongi ʻi hono lau ʻa e ngaahi palakalafí pe ko hono vaheʻi ha foʻi tokotaha ʻi he fakamatalá ki he mēmipa taki taha ʻi he fāmilí. ʻOku mālieʻia ʻa e niʻihi ʻi he fanongo ki ha hiki-leʻo ʻo e Tohi Tapú. “Naʻe faingataʻa kiate au ke u kamata,” ko e lea ia ʻa e fefine ʻe taha, “ko ia naʻá ku kamata leva ke fanongo ki he lau Tohi Tapu kuo ʻosi hiki-leʻó. ʻOku ou ʻiloʻi he taimí ni ko e Tohi Tapú ʻoku fakalotomāfana ange ia ʻi ha tohi talanoa mālie.

SITEPU 6 Fakalaulauloto

◼ Ko e vave mo e ngaahi fakahohaʻa ʻa e moʻui ʻi onopōní ʻoku ʻikai tokoni ia ki he fakalaulaulotó. Kae kehe, hangē pē ko e pau ke fakamolū ʻetau meʻakaí koeʻuhi ka tau maʻu ivi mei aí, kuo pau ke tau fakalaulauloto ki he meʻa ʻoku tau lau mei he Tohi Tapú koeʻuhi ke tau maʻu ʻaonga mei ai. Te tau fai eni ʻaki hono fakamanamanatu ʻa e meʻa ʻoku tau laú pea ʻaki hono ʻeke hifo kia kitautolu ʻa e ngaahi fehuʻi hangē ko ení: ‘Ko e hā kuó u ako fekauʻaki mo Sihova ko e ʻOtuá? ʻOku anga-fēfē ʻa e kaunga ʻa e meʻá ni kiate aú? ʻE anga-fēfē nai haʻaku ngāueʻaki ia ke tokoniʻi ʻa e niʻihi kehé?’

Ko e fakakaukau peheé ʻoku fakaʻatā ai ʻa e pōpoaki ʻo e Tohi Tapú ke maongo ki hotau lotó pea fakautuutu ai ʻa e fiefia ʻoku tau maʻu ʻi hono lau ʻa e Folofola ʻa e ʻOtuá. ʻOku pehē ʻe he Sāme 119:97: “ʻOi ʻeku ʻofa ki hoʻo lao na! ʻOku ou fakalaulauloto ki ai he ʻaho kotoa.” ʻI he fakalaulaulotó, naʻe ʻai ai ʻe he tokotaha-tohi-sāmé ʻa e Tohi Tapú ko e meʻa ia naʻá ne tokanga ki ai ʻi he ʻahó kotoa. Ko ʻene fai peheé naʻe tokoniʻi ai ia ke ne fakatupulekina ha ʻofa loloto ki he meʻa naʻá ne akó.

SITEPU 7 Kumi tokoni ke mahinoʻi

◼ ʻOku ʻikai ke ʻamanekina ʻe he ʻOtuá te tau mahinoʻi kakato ʻa ʻene Folofolá ʻia kitautolu pē. Naʻa mo e Tohi Tapú ʻokú ne fakahaaʻi totonu ʻoku ʻi loto ai ʻa e “ngaahi meʻa ʻoku ʻilongataʻa.” (2 Pita 3:16) ʻOku fakamatalaʻi ʻe he tohi Ngāué ha ʻōfisa ʻItiopea naʻá ne puputuʻu ʻi ha konga ʻo e Tohi Tapú naʻá ne lau. Naʻe fekau atu ʻe he ʻOtuá ʻa e taha ʻo ʻEne kau sevānití ke tokoniʻi ia, pea ko e olá ko e tangata ʻItiopeá naʻe “fai atu ʻene fononga kuo fiefia hono loto.”—Ngāue 8:26-39.

Ko koe foki ʻe lava ke ke maʻu ʻaonga lahi ange mei hono lau ʻa e Tohi Tapú ʻaki ʻa e kumi ha tokoni ke mahinoʻi ʻa e meʻa ʻokú ke laú. Fetuʻutaki ki he Kau Fakamoʻoni ʻa Sihova ʻi ho feituʻú, pe tohi ki he tuʻasila ʻi he peesi 4 ʻo e makasini ko ení ki ha ako Tohi Tapu taʻetotongi ʻi ʻapi.

[Fakamatala ʻi lalo]