Kuo Tali ʻa e Ngaahi Fehuʻi ʻe Fā Fekauʻaki mo e Ngataʻangá

NAʻE tomuʻa tala ʻe Sīsū Kalaisi ʻi ha ʻaho ʻi he kahaʻú, “ʻe hoko ʻa e ngataʻanga.” ʻI hono fakamatalaʻi ʻa e taimi ko iá, naʻá ne pehē: “ʻE toki hoko ai ha mamahi lahi, ʻa ia kuo teʻeki hano tatau mei he kamataʻanga ʻo mamani ʻo aʻu mai ki he taimi ni, ʻoi, pea ʻe ʻikai ʻaupito toe ʻi ai.”—Mātiu 24:14, 21.

Ko e ngaahi fakamatala ʻa Sīsū fekauʻaki mo e ngataʻangá, fakataha mo e ngaahi konga tohi Fakatohitapu kehe felāveʻi mo e kaveingá ni, ʻoku langaʻi hake ai ha ngaahi fehuʻi mahuʻinga lahi. Ko e hā ʻoku ʻikai fakaava ai hoʻo Tohi Tapú pea lau ʻa e meʻa ʻoku leaʻaki aí ʻa ia ko e tali ia ki he ngaahi fehuʻi ko iá?

1 Ko e Hā ʻE Ngatá?

ʻOku ʻikai akoʻi ʻe he Tohi Tapú ʻe fakaʻauha ʻa e foʻi māmaní. “Naʻa ne [ʻOtua] fakamaʻu ʻa e fonua ki hono ngaahi tuʻunga,” ko e tohi ia ʻa e tokotaha-tohi sāmé. “Ke ʻoua naʻa ueʻi ʻo lauikuonga pea taʻengata.” (Sāme 104:5) Pea ʻoku ʻikai foki ke akoʻi ʻe he Tohi Tapú ko e meʻamoʻui kotoa pē ʻe fakaʻauha fakaʻaufuli ʻi ha vela fakaemāmani lahi. (Aisea 45:18) Naʻe fakahaaʻi ʻe Sīsū tonu ʻe ʻi ai ʻa e kakai ʻe niʻihi te nau hao atu ʻi he ngataʻangá. (Mātiu 24:21, 22) Ko e hā leva ʻoku pehē ʻe he Tohi Tapú ʻe ngatá?

ʻE ngata ʻa e ngaahi puleʻanga taʻelavameʻá. Naʻe fakamānavaʻi ʻe he ʻOtuá ʻa e palōfita ko Tanielá ke ne tohi: “Ko e ʻOtua ʻo Langi te ne fokotuʻu ha puleʻanga ʻe ʻikai fulihi ʻo taʻengata; pea ko hono pule ʻe ʻikai tuku ki ha kakai kehe: ka te ne laiki mo fakaʻauha ʻa e ngaahi puleʻanga ko ia, kae tuʻu pe ia ʻo taʻengata.”—Taniela 2:44.

ʻE ngata ʻa e taú mo hono ʻuliʻi ʻo e ʻātakaí. ʻI hono fakamatalaʻi ʻa e meʻa ʻe fai ʻe he ʻOtuá, ʻoku pehē ʻe he Sāme 46:9: “ʻOku ne lolololo ʻa e ngaahi tau ʻo aʻu ki he ngataʻanga ʻo mamani, ʻoku ne fesiʻi kaufana, mo tutuʻu tao, mo tutu saliote ʻi he afi.” ʻOku toe akoʻi ʻe he Tohi Tapú ko e ʻOtuá te ne “fakaʻauha ʻakinautolu ʻoku fakaʻauha ʻa e fonua.”—Fakahā 11:18.

ʻE ngata ʻa e faihiá mo e fakamaau taʻetotonú. ʻOku talaʻofa mai ʻe he Folofola ʻa e ʻOtuá: “He ko e kau angatonu te nau nofoʻia ʻa e fonua, pea ko e haohaoa te ne ʻi ai ai pe. Ka ko e kakai kovi ʻe tuʻusi mei he fonua, ʻio, ko kinautolu ʻoku fai kākā ʻe taʻaki mei ai.”a—Palovepi 2:21, 22.

2 ʻE Hoko Fakakū Mai ʻa e Ngataʻangá?

Kuo fokotuʻu ʻe Sihova ko e ʻOtuá ʻi “hono taimi” ke fakangata ʻa e fulikivanú pea ke fokotuʻu ʻa e founga-pule ʻo hono Puleʻangá. (Maake 13:33) Ka ʻoku fakahaaʻi maʻalaʻala ʻe he Tohi Tapú ʻoku ʻikai lava ke tau fakafuofua ʻa e ʻaho pau ki he ngataʻangá. Naʻe pehē ʻe Sīsū: “Ka ko e meʻa ki he ʻaho ko ia mo hono houa, ʻoku ʻikai ha taha ʻoku ʻilo ki ai; ʻio, pe ko e kau angelo ʻi he langi; pea naʻa mo e ʻAlo ʻoku ʻikai; ngata pe ʻi he Tamai toko taha.” (Mātiu 24:36) Kae kehe, naʻe tomuʻa tala ʻe Sīsū mo ʻene kau ākongá ʻa e ngaahi meʻa ʻe hoko ʻi he māmaní ki muʻa pē ke ʻomai ʻe he ʻOtuá ʻa e ngataʻangá. ʻOku tuʻunuku mai ʻa e ngataʻangá ʻi he taimi ʻoku hoko kotoa ai ʻa e ngaahi meʻa hoko haké ʻi he taimi tatau pea takatakai ʻi he māmaní.

ʻOku hoko ʻa e fakahohaʻa lahi fakapolitikale, fakaeʻātakai mo fakasōsiale ʻoku aʻu ki he tuʻunga taʻehano tatau ʻi he hisitōliá. ʻI ha tali ki he ngaahi fehuʻi ʻa e kau ākongá fekauʻaki mo e ngataʻangá, naʻe pehē ʻe Sīsū: “ʻE tuʻu ha kakai ki ha kakai, mo ha puleʻanga ki ha puleʻanga: ʻe ai ha ngaahi mofuike ʻi he ngaahi potu kehekehe, ʻe ai ha ngaahi honge: ko e ngaahi kamata pe ia ʻo e langā.” (Maake 13:8) Naʻe tohi ʻa e ʻapositolo ko Paulá: “Ka hokosia ʻa e kuonga fakamui, ʻe ai ha ngaahi taimi faingataʻa. He ko hono kakai te nau ʻofa kiate kinautolu pe, te nau ʻofa ki he paʻanga, te nau fielahi, te nau angataʻetokaʻi, te nau lea fieʻotua, te nau talangataʻa ki he matuʻa; ko e kau taʻehounga, ko e kau angataʻemolumalu, ko e kau taeʻofa-ki-hoʻota, ko e kau taʻe fakamolemole, ko e kau fakakovi, ko e kau taʻefakamaʻumaʻu, ko e kau angafakamanu, ko e kau taeʻofa ki he lelei, ko e kau lavaki, ko e kau ʻohonoa, ko e kau loto ʻaoʻaofia ʻi he ʻafungi, ko e kau ʻofa ki he malie ʻo ʻikai ʻofa ki he ʻOtua.”—2 Timote 3:1-5.

Kuo fakahoko ha feingangāue fakamalanga ʻi he ngaahi lea kehekehe ʻi māmani lahi. Naʻe pehē ʻe Sīsū: “ʻE ʻoua ke fanongonongo ki mamani katoa ʻa e ongoongolelei ko eni ʻo e puleʻanga, ke ai ha fakamatala ki he ngāhi kakai kotoa pe, pea toki hoko ʻa e ngataʻanga.”—Mātiu 24:14.

3 Ko e Hā ʻE Hoko Mai ʻi he Hili ʻa e Ngataʻangá?

ʻOku ʻikai ke akoʻi ʻe he Tohi Tapú ko e kakai lelei kotoa pē ʻe ʻave mei he foʻi māmaní ke moʻui taʻengata ʻi hēvani. ʻI hono kehé, naʻe akoʻi ʻe Sīsū ko e muʻaki taumuʻa ʻa e ʻOtuá ki he faʻahinga ʻo e tangatá kuo pau ke fakahoko. “Monūʻiaā ka ko kinautolu ʻoku faʻa kataki: he ʻe to moʻonautolu ʻae fonua,” ko e lea ia ʻa Sīsuú. (Mātiu 5:5; 6:9, 10) Ki he faʻahinga ʻoku nau mate ki muʻa ke hoko mai ʻa e ngataʻangá, kuo talaʻofa mai ʻe he Tohi Tapú ha toetuʻu ʻi he kahaʻú. (Siope 14:14, 15; Sione 5:28, 29) Ko e hā ʻe hoko mai ʻi he hili ʻa e ngataʻangá?

ʻE pule mai mei hēvani ʻa Sīsū ko e Tuʻi ʻo e Puleʻanga ʻo e ʻOtuá. “Naʻa ku moʻu sioa pe ʻi he ngaahi visone poʻuli,” ko e tohi ia ʻa e palōfita ko Tanielá, “pea ʻiloange ko ha Taha hange ha hakoʻi tangata [ko Sīsū kuo toetuʻú] naʻe hoko mai mo e ngaahi ʻao ʻo e langi, pea ne aʻu mai kia Talumeimuʻa [Sihova ko e ʻOtuá], ʻio naʻa nau ʻomi ia ki hono ao. Pea naʻe tuku kiate ia [Sīsū] ha hau, mo ha langilangi, mo ha pule, koeʻuhi ke tauhi kiate ia ʻe he ngaahi kakai, matakali, mo faʻahinga lea kehekehe: ko hono hau ko e hau taʻengata, ʻa ia ʻe ʻikai liua, pea ko hono puleʻanga ko e taha ʻe ʻikai ʻauha.”—Taniela 7:13, 14; Luke 1:31, 32; Sione 3:13-16.

Ko e kakai ʻo e Puleʻanga ʻo e ʻOtuá, te nau maʻu ʻa e moʻui lelei haohaoa, maluʻanga tuʻuloa, mo e moʻui taʻengata. “Te nau langa fale, ʻo nofo ai,” ko e tohi ia ʻa e palōfita ko ʻAiseá. “Pea te nau to ngouevaine, pea kai hono fua. ʻE ʻikai te nau langa, kae nofo ai ha taha kehe; ʻe ʻikai te nau to, kae kai ʻe ha taha kehe.” (Aisea 65:21-23) Naʻe tohi ʻa e ʻapositolo ko Sioné fekauʻaki mo e taimi ko iá: “Ko eni, ko e tapanekale ʻo e ʻOtua, ʻoku tuʻu mo e kakai. Pea ʻe nofo hono Sikaina mo kinautolu, pea te nau nofo ko hono kakai; pea ʻe nofo ʻe he ʻEne ʻAfio, ko e ʻOtua ʻoku kau maʻanautolu, ʻio, ko honau ʻOtua. Pea te ne holoholo ʻa e loʻimata kotoa pē mei honau mata; pea ʻe ʻikai toe ai ha mate, pea ʻe ʻikai toe ai ha mamahi, pe ha tangi, pe ha ongosia; kuo mole ʻa e ngaahi meʻa muʻa.”—Fakahā 21:3, 4.

4 Ko e Hā Kuo Pau Ke Ke Fai ke Hao Atu ʻi he Ngataʻangá?

Naʻe lāuʻilo ʻa e ʻapositolo ko Pitá ko e niʻihi ʻoku nau moʻui ʻi he taimi ʻo e ngataʻangá te nau lumaʻi ʻa e fakakaukau ʻe kau mai ʻa e ʻOtuá ki he ngaahi meʻa ʻa e faʻahinga ʻo e tangatá pea fakangata ʻa e fulikivanú ʻi he foʻi māmaní. (2 Pita 3:3, 4) Ka neongo ia, naʻe ekinaki ʻa Pita ki he faʻahinga ʻoku nau moʻui ʻi hotau taimí ke fai ʻa e meʻa hono hoko haké.

Ako mei he hisitōliá. Ko e ʻOtuá “naʻe ʻikai te ne maemaeʻekina ʻa e maama motuʻa, ka ne tauhi pe ha toko fitu, pea valu ʻaki ʻa Noa, ʻa ia naʻa ne malangaʻaki ʻa e maʻoniʻoni, ʻi heʻene ʻomi ʻa e Lōmaki ki he maama ʻo e kau fakaʻotuamate,” ko e tohi ia ʻa Pitá. (2 Pita 2:5) ʻI he fekauʻaki mo e faʻahinga ʻoku nau fakaʻalumá, naʻe pehē ʻe Pita: “He ʻoku puli ʻiate kinautolu ʻa e meʻa ni—ka ko honau loto foki—tokua ko e folofola ʻa e ʻOtua naʻe tuʻu ai ʻa e ngaahi langi ʻi muʻa, pea fokotuʻu ai ʻa e fonua mei he vai pea ʻaki ʻa e vai: ʻa ia naʻe lomaki vai ai ʻa e maama ʻo onoʻaho, ʻo ʻauha: ka ko e ngaahi langi mo e fonuab ʻo onopōni kuo tauhi ʻaki ʻa e folofola ʻa ʻEne ʻAfio, ʻo taʻofi ki he afi, ʻo ka toki hoko ʻa e ʻaho ʻo e fakamāuʻi mo e fakaʻauha ʻo e kakai fakaʻotuamate.”—2 Pita 3:5-7.

Moʻuiʻaki ʻa e ngaahi tuʻunga fakaeʻulungaanga ʻa e ʻOtuá. Ko e faʻahinga ʻoku nau fakaʻamu ke hao ʻi he ngataʻangá te nau fai ʻa e “aga oku tāu mo kimoutolu i he ulugaaga maonioni moe aga pe ngaahi ngāue faka-Otua,” ko e tohi ia ʻa Pitá. (2 Pita 3:11, PM) Fakatokangaʻi ʻoku fakamamafaʻi ʻe Pita ʻa e “aga oku tāu mo kimoutolu i he ulugaaga maonioni moe aga pe ngaahi ngāue faka-Otua.” Ko ia ai, ʻoku ʻi ai ʻa e meʻa lahi ange ʻoku kau ki ai ʻi hono taukaveʻi pē ʻa e tuí pe ko hono toki fai ha feinga ʻi he mōmeniti fakaʻosí ke ʻai ʻa e ngaahi meʻá ke tonu ʻi he ʻao ʻo e ʻOtuá.

Ko e hā ʻa e ngaahi anga mo e ngaahi ngāue pau ʻoku hōifua ki ai ʻa e ʻOtuá? Fēfē ke ke fakahoa ʻa e meʻa ʻokú ke ʻiló mo e meʻa ʻoku akoʻi ʻe he Tohi Tapú fekauʻaki mo e kaveinga ko ení? Ko e Kau Fakamoʻoni ʻa Sihová, te nau fiefia ke tokoniʻi koe. Kole ange kia kinautolu ke nau fakahā atu mei hoʻo Tohi Tapú ʻa e makatuʻunga ki heʻenau ngaahi talí. ʻI hoʻo fai peheé, ʻe tokoniʻi koe ke ke hanga atu ki he kahaʻú mo e loto-toʻa mo e loto-maʻu, neongo ʻa e ngaahi meʻa ʻokú ne fakatupunga ʻa e manavahē ʻa ia ʻokú ne takatakaiʻi kitautolu he taimi ní.

[Fakamatala ʻi lalo]

[Fakamatala ʻi he peesi 7]

ʻE ʻikai ngata ʻa e foʻi māmaní, ka ko e faʻahinga ko ia ʻoku nau maumauʻi iá