Pouaki ʻe Sehu ʻa e Lotu Maʻá

KO Sehú ko ha tokotaha pouaki ia ʻo e lotu maʻá. ʻI hono fakahoko ʻa e ngafa ko ení, naʻá ne longomoʻui, fai vave, ʻikai tauholomui, faivelenga, mo loto-toʻa. Naʻe fakahāhā ʻe Sehu ʻa e ngaahi ʻulungaanga ʻe lelei ke tau faʻifaʻitaki ki ai.

Naʻe maʻu ʻe Sehu ha fekau he taimi naʻe ʻi ha tuʻunga kovi ai ʻa e puleʻanga ʻIsilelí. Ko e fonuá naʻe ʻi he malumalu ʻo e tākiekina fulikivanu ʻa Sisipeli, ko e uitou ʻo ʻĒhapí pea ko e faʻē ʻa e tuʻi naʻe pule ko Siholamé. Naʻá ne pouaki ʻa e lotu kia Pēalí kae ʻikai ko e lotu kia Sihová, tāmateʻi ʻa e kau palōfita ʻa e ʻOtuá, pea fakameleʻi ʻa e kakaí ʻaki ʻene “ngaahi feʻauaki” mo e “tuki fakatevolo.” (2 Tuʻi 9:22; 1 Tuʻi 18:4, 13) Naʻe tuʻutuʻuni ʻe Sihova hono fakaʻauha e fale kotoa ʻo ʻĒhapí, ʻo kau ai ʻa Siholame mo Sisipeli. Naʻe pau ke takimuʻa ʻa Sehu ʻi hono fai ʻa e ngāue ko iá.

ʻOku fakafeʻiloaki mai ʻe he Folofolá ʻa Sehu ʻi heʻene tangutu mo e kau houʻeiki taú ʻi he taimi naʻe faitau ai ʻa ʻIsileli mo e kau Sīliá ʻi Lemoti-kiliatí. Ko Sehú ko ha ʻōfisa māʻolunga ia, pea ko e komanitā nai ia ʻo e kau tau ʻIsilelí. Ko e palōfita ko ʻIlaisá naʻá ne fekauʻi e taha ʻo e ngaahi foha ʻo e kau palōfitá ke ne pani ʻa Sehu ko e tuʻi pea fakahinohinoʻi ia ke ne tāmateʻi ʻa e tangata kotoa pē ʻi he fale tafoki ʻo fakafepaki ki he moʻoní ʻo ʻĒhapí.—2 Tuʻi 8:28; 9:1-10.

ʻI he taimi naʻe ʻeke ai ʻe he ngaahi kaungāʻōfisa ʻo Sehú fekauʻaki mo e taumuʻa ʻo e ʻaʻahi ko ení, naʻe toumoua ʻa Sehu ke lea. Ka ʻi hono tengé, naʻá ne tala kia kinautolu ʻa e moʻoní, pea ko ia mo hono ngaahi kaungāmeʻá naʻe kamata ke nau puleakiʻi ʻa Siholame. (2 Tuʻi 9:11-14) Ngalingali, naʻe ʻi ai e ʻuhinga tefito ʻo e ʻiteʻita mo e fakafepaki ki he founga ngāue ʻa e fale naʻe pulé pea ki he tākiekina ʻa Sisipelí. Kae kehe, naʻe fai ʻe Sehu ʻa e feinga fakamātoato ke maʻu ʻa e founga lelei taha ke fakahokoʻaki e fekau naʻe tuku kiate iá.

Kuo kafo ʻa Tuʻi Siholame ʻi he taú pea kuó ne mavahe ki he kolo ko Sisililí, ʻi he ʻamanaki ke fakaakeake. Naʻe ʻiloʻi ʻe Sehu kapau naʻe fiemaʻu ke lavameʻa ʻa ʻene palaní, kuo pau ke ʻoua ʻe aʻu hano tala ia ki Sisilili. “ʻOua e hao ha taha mei he kolo ke ʻalu, ʻo fakapa ki Sisilili,” ko e lea ia ʻa Sehú. (2 Tuʻi 9:14, 15) Mahalo pē naʻá ne toka fakakaukauʻi ʻe ʻi ai ha fakafepaki ʻi ha tuʻunga mei he ngaahi kongakau naʻe mateaki kia Siholamé. Naʻe loto ʻa Sehu ke fakapapauʻi heʻikai malava ha fakafepaki pehē.

KO HA LELE VAVE FAKAʻULIA!

Ke fakahoko ha tuʻunga fakaʻohovale, naʻe lele ʻa Sehu ʻi heʻene salioté mei Lemoti-kiliati ki Sisilili, ʻi ha mamaʻo ko e maile ʻe 45 (kilomita ʻe 72). ʻI heʻene fakavave atu ki he feituʻu naʻe ʻalu ki aí, naʻe sio mai ha tangata leʻo mei ha taua ki he fuʻu “kau fonoga o Jehu.” (2 Tuʻi 9:17, PM) ʻOku mātuʻaki ngalingali, naʻe ʻalu ʻa Sehu mo ha fuʻu kautau tokolahi koeʻuhí ke fakapapauʻi ʻe fakahoko ʻene taumuʻá.

ʻI he ʻiloʻi ko e tangata loto-toʻa ko Sehú naʻe ʻi he taha ʻo e ngaahi salioté, naʻe kalanga ʻa e tangata-leʻó: “Oku ne alu fakavave aubito.” (2 Tuʻi 9:20, PM) Kapau naʻe lele ʻa Sehu ʻi he anga-mahení ʻi ha founga meimei tatau, ko ʻene fakavave ʻi he fekau makehe ko ení ʻoku pau naʻe ʻi ha lele vave fakaʻulia moʻoni.

Hili e fakafisi ke leaʻaki ha meʻa ki he ongo talafekau naʻe fekauʻi mai kiate iá, naʻe fakafetaulaki ʻa Sehu kia Tuʻi Siholame mo ʻene faʻahi ko ʻAhasaia, tuʻi ʻo Siutá, ʻo taki taha ʻi heʻena saliote. Ko e fehuʻi ʻa Siholame, “ʻOku lelei, Sehu?” naʻe fakafetaulakiʻi mai ia ʻaki ʻa e tali fakaʻita: “ʻO lelei fefe, lolotonga ʻoku pehe fau ʻa e ngaahi feʻauaki ʻa hoʻo faʻe ko Sisipeli, mo ʻene tuki fakatevolo?” ʻI he manavahē he tali ko ení, naʻe tafoki hake ʻa Siholame ke hola. Ka naʻe fuʻu vave ʻa Sehu ʻiate ia! ʻI heʻene tohoʻi hake ha kaufaná, naʻá ne fanaʻi ha foʻi ngahau ʻo tau he mafu ʻo Siholamé, pea naʻe tō ki lalo ʻa e tuʻí ʻo mate ʻi heʻene salioté. Neongo naʻe lava ke hola ʻa ʻAhasaia, naʻe kumi ia ki mui ʻe Sehu ʻo tāmateʻi mo ia foki.—2 Tuʻi 9:22-24, 27.

Ko e mēmipa hoko ʻo e fale ʻo ʻĒhapi ke fakaʻauhá ko Kuini Sisipeli fulikivanu. Naʻe tonu e lave kiate ia ʻa Sehu ko e “fefine malaʻia na.” ʻI he lele atu ʻa Sehu ki Sisililí, naʻá ne sio kiate ia ʻokú ne fakasio hifo mei ha matapā sioʻata he palasí. ʻI he ʻikai toe tatalí, naʻe fekauʻi ʻe Sehu ʻa e kau ʻiunoké pe kau ʻōfisa he lotoʻaá ke lī hifo ʻa Sisipeli mei he matapā sioʻatá. Naʻe ʻai leva ʻe Sehu ʻene fanga hōsí ke nau tāmalaki ʻa e tokotaha fakameleʻi ko eni ʻo e kotoa ʻo ʻIsilelí. Hili iá, naʻe hoko atu ʻa Sehu ke fakaʻauha e kau mēmipa kehe tokolahi ʻi he fale ʻo ʻĒhapi fulikivanú.—2 Tuʻi 9:30-34; 10:1-14.

Neongo ko e fakakaukau ki he fakamālohí ʻoku ʻikai lelei, ʻoku totonu ke tau ʻiloʻi ʻi he ngaahi ʻaho ko iá, naʻe ngāueʻaki ai ʻe Sihova ʻene kau sevānití ke fakahoko ʻene ngaahi fakamāú. ʻOku fakahaaʻi ʻi he Folofolá: “Naʻe mei he ʻOtua ʻa e malaki ʻo Ahasaia, ʻa ia ne aʻahi kia Siholame: he ʻi heʻene aʻu ki ai naʻa ne hu kituʻa mo Siholame kia Sehu foha ʻo Nimisi, ʻa ia kuo pani ʻe Sihova ke tuʻusi ʻa e famili ʻo Ehapi.” (2 Kal. 22:7) ʻI heʻene lī ʻa e sino ʻo Siholamé mei heʻene salioté, naʻe ʻiloʻi ʻe Sehu ko e ngāué ni naʻe fakahoko ai e talaʻofa ʻa Sihova ke fakaaʻu ʻa e tautea ki hono fakapoongi ʻe ʻĒhapi ʻa Nēpoté. ʻIkai ngata aí, naʻe fekau ʻa Sehu ke ne ‘sauni ʻa e toto ʻo e kau tamaioʻeiki ʻa e ʻOtuá’ naʻe lilingi ʻe Sisipelí.—2 Tuʻi 9:7, 25, 26; 1 Tuʻi 21:17-19.

ʻI he ʻahó ni, ʻoku ʻikai ngāueʻaki ai ʻe ha sevāniti ʻa Sihova ʻa e mālohi fakaesinó ke fakafepakiʻi ʻa e kau fakafepaki ki he lotu maʻá. “ʻOku ʻaʻaku ʻa e sāuní,” ko e folofola ia ʻa e ʻOtuá. (Hep. 10:30) Ka ke toʻo mei he fakatahaʻangá ʻa e ngaahi tākiekina fakameleʻi ʻe malava ke hokó, ko e kau mātuʻa Kalisitiané kuo pau ke nau ngāue fakataha mo e loto-toʻa meimei tatau mo ia naʻe maʻu ʻe Sehú. (1 Kol. 5:9-13) Pea ko e kau mēmipa kotoa ʻo e fakatahaʻangá ʻoku fiemaʻu ke nau fakapapauʻi ke fakaʻehiʻehi mei he feohi mo e faʻahinga tāutaha kuo tuʻusí.—2 Sio. 9-11.

NAʻE MAMAHIʻI ʻE SEHU ʻA SIHOVA

Ko e taumuʻa ʻa Sehu ki hono fakahoko e fekau naʻe tuku kiate iá ʻoku hā mahino ia mei heʻene lea hono hoko kia Sionatapi faitōnungá: “Haʻu ke ta ō, ka ke mamata ki heʻeku mamahiʻi ʻa Sihova.” Naʻe tali ʻe Sionatapi ʻa e fakaafe ko iá, ʻo ne heka ki he saliote ʻa Sehú, pea lele mo ia ki Samēlia. ʻI aí, ko Sehú naʻá ne ‘fiemuaʻi kinautolu, koeʻuhi ke ne fakaʻauha ʻa e kau lotu kia Pealí.’—2 Tuʻi 10:15-17, 19.

Naʻe fanongonongo ʻe Sehu naʻá ne fakataumuʻá ke fai ha “fuʻu feilaulau” kia Peali. (2 Tuʻi 10:18, 19) “Ko ha pōtoʻi faiva lea eni naʻe fai ʻe Sehú,” ko e lau ia ʻa ha mataotao ʻe taha. Lolotonga ko e kupuʻi lea naʻe ngāueʻaki hení “ʻoku ʻuhinga fakalūkufuá ko e ‘feilaulau,’ ʻoku toe ngāueʻaki ia ki hono ‘tāmateʻi’ ʻo e kau tafoki ʻo fakafepaki ki he moʻoní.” Koeʻuhí naʻe ʻikai loto ʻa Sehu ke tō ha kau lotu pē ʻa Pēali mei he meʻa ko ení, naʻá ne fakatahatahaʻi kinautolu kotoa ki he fale ʻo Pēalí pea ʻai leva ke nau tui ha vala makehe. “ʻI he faifai pea ʻosi ʻa e feia ʻo e ngaahi feilaulau-moifua,” naʻe ʻai ʻe Sehu ʻa e kau tangata toʻo naunau tau ʻe toko 80 ke nau tāmateʻi ʻa e kau muimui ʻo Pēalí. Naʻá ne haveki leva ʻa e fale ʻo Pēalí pea tuku mavahe hono tuʻuʻangá ko ha ngaahi fale vao, ʻo ʻai ia ke taʻetaau ki he lotú.—2 Tuʻi 10:20-27.

Ko e moʻoni naʻe lilingi ʻe Sehu ʻa e toto lahi. Neongo ia, ʻoku fakahaaʻi ia ʻe he Folofolá ko ha tangata loto-toʻa ʻa ia naʻá ne fakatauʻatāinaʻi ʻa ʻIsileli mei he pule fakafeʻātungia ʻa Sisipeli mo hono fāmilí. Kapau naʻe fiemaʻu ha taki pē ʻo ʻIsileli ke ne lavameʻa hono fai ení, naʻe pau ke ne hoko ko ha tangata loto-toʻa, loto-pau, mo faivelenga. “Ko ha ngāue faingataʻa ia pea naʻe fakahoko ia he tuʻunga fakaʻāuliliki ʻikai tauholomui,” ko e fakamatala ia ha tikisinale Fakatohitapu ʻe taha. Ngalingali ko e ngaahi founga fakavaivai angé naʻe mei taʻemalava ai ke toʻo ʻosi ʻa e lotu Pēalí mei ʻIsileli.”

ʻOku ʻikai ha veiveiua ʻoku lava ke ke sio ko e ngaahi tuʻunga ʻoku fehangahangai mo e kau Kalisitiane he ʻaho ní ʻoku fiemaʻu ai ke nau fakahāhā ʻa e ngaahi ʻulungaanga pau naʻe maʻu ʻe Sehú. Hangē ko ení, ʻoku totonu ke fēfē ʻetau fakafeangaí kapau naʻe fakataueleʻi kitautolu ke kau ʻi ha ngāue pē ʻoku fakahalaiaʻi ʻe Sihova? ʻOku totonu ke tau fai vave, loto-toʻa pea faivelenga ʻi hono talitekeʻi iá. ʻI heʻene hoko mai ki heʻetau anga-līʻoa fakaʻotuá, te tau mamahiʻi ʻa Sihova.

TOKANGA KE FOU ʻI HE LAO ʻA SIHOVÁ

Ko e ngataʻanga ʻo e talanoa ko ení ʻoku ʻomai ai ha fakatokanga. Ko Sehú ‘naʻe ʻikai tafoki mei he muimui ki he uhikiʻi bulu koula aia nae i Beteli bea mo Taní.’ (2 Tuʻi 10:29, PM) ʻOku malava fēfē ke hoko ʻa e fakavaivai ki he tauhi ʻaitolí ʻi he tuʻunga ʻo e tokotaha ne hā ngali mātuʻaki faivelenga ki he lotu maʻá?

Naʻe tui nai ʻa Sehu ko e tauʻatāina e puleʻanga ʻIsilelí mei Siutá naʻe fiemaʻu ai ke mavaeua fakalotu ʻa e ongo puleʻangá. Ko ia ai, hangē ko e ngaahi tuʻi ʻIsileli ki muʻá, naʻá ne feinga ke tauhi kinaua ke na mavaeua ʻaki e hokohoko atu ʻa e lotu ki he ʻuhikiʻi pulú. Ka ʻe hā ʻi he meʻá ni ha taʻefalala kia Sihova, ʻa ia naʻá ne ʻai ia ke hoko ko e tuʻí.

Naʻe fakaongoongoleleiʻi ʻe Sihova ʻa Sehu koeʻuhí naʻá ne ‘fai ʻa e meʻa ʻoku ha totonu ki he loto ʻo e ʻOtuá.’ Ka neongo ia, ko Sehú ‘naʻe ʻikai tokanga ke fou ʻi he lao ʻa Sihova ko e ʻOtua ʻo Isilelí ʻaki hono lotó kotoa.’ (2 Tuʻi 10:30, 31) ʻI he fakakaukau atu ki he meʻa kotoa pē naʻe fai ki muʻa ange ʻe Sehú, te ke ʻiloʻi nai ʻoku fakaʻohovale mo fakalotomamahi ʻa e meʻá ni. Neongo ia, ʻoku tokonaki mai ai ha lēsoni kia kitautolu. Heʻikai ʻaupito lava ke tau fakamaʻamaʻaʻi hotau vahaʻangatae mo Sihová. ʻI he ʻaho kotoa pē, ʻoku fiemaʻu ke tau fakatupulekina ʻa e mateaki ki he ʻOtuá fakafou ʻi hono ako ʻene Folofolá, fakalaulauloto ki ai, pea lotu fakamātoato ki heʻetau Tamai fakahēvaní. Ko ia ai, tau tokanga lahi ʻaupito ke hanganaki fou ʻi he lao ʻa Sihová ʻaki ʻa e kotoa hotau lotó.—1 Kol. 10:12.

[Puha ʻi he peesi 4]

Ko Sehu ʻi he Hisitōlia ʻo e Māmaní

Kuo faʻa fehuʻia ʻe he kau fakaangá pe naʻe ʻi ai moʻoni ʻa e faʻahinga ʻoku lave ki ai he Folofolá. Ko ia ai, ʻoku ʻi ai ha fakamoʻoni Fakatohitapu kehe fekauʻaki mo Sehu?

ʻOku ʻikai toe siʻi hifo he fakamoʻoni ʻe tolu mei ʻAsīlia he kuonga muʻá ʻoku lave ai ki he hingoa ʻo e tuʻi ʻIsileli ko ení. Ko e taha ʻo e ngaahi meʻá ni ʻoku taukaveʻi naʻe hā ai ʻa Sehu, pe ko e taha nai hono kau fakafofongá, ʻoku punou ʻi he ʻao ʻo Tuʻi Salimanesa III ʻo ʻAsīliá ʻo fai ʻene totongi tukuhau. Ko e tohi tongi ʻoku ʻoatu hení ʻoku pehē ai: “Ko e totongi tukuhau ʻa Sehu (Ia-ú-a), foha ʻo ʻOmilai (Hu-um-ri); naʻá ku maʻu meiate ia ʻa e siliva, koula, ko ha poulu saplu koula, ko ha vaasi koula naʻe mui tōtao, ngaahi ipu koula, ngaahi kane koula, tini, ko ha tokotoko ki ha tuʻi, (mo e) ngaahi meʻa papa.” Ko Sehú naʻe ʻikai ko ha ‘foha moʻoni ia ʻo ʻOmilai,’ ka ko e kupuʻi leá ni naʻe ngāueʻaki ia ki he ngaahi tuʻi fakanofo hokohoko ʻo ʻIsilelí, ngalingali koeʻuhí ko e ongoongoa ʻa ʻOmilaí mo ʻene langa ʻa e kolomuʻa ʻo ʻIsilelí, ʻa Samēlia.

Ko e taukaveʻi ʻa e tuʻi ʻAsīliá fekauʻaki mo e totongi tukuhau tokua ʻa Sehú ʻoku ʻikai lava ke fakapapauʻi. Naʻa mo ia, ʻokú ne lave tuʻo tolu kia Sehu—ʻi ha maka, ʻi ha ʻīmisi ʻo Salimanesa, pea ʻi he ngaahi lēkooti ʻo e hisitōlia fakatuʻi ʻo ʻAsīliá. Ko e ngaahi fakamatala ko ení ʻoku ʻikai ha veiveiua ai fekauʻaki mo e moʻoni fakahisitōlia ʻo e tokotaha ko eni ʻi he Tohi Tapú.