Ko e Hā ke Tataki Ai ʻe he Laumālie ʻo e ʻOtuá?

“Ko hoku ʻOtua ʻa hoʻo ʻAfio. Ko ho Laumalie Lelei ke ne taki kita.”—SAAME 143:10.

 1. Fakatātaaʻi ʻa e founga ʻoku lava ke tataki ai ha tokotaha ʻe ha mālohi taʻehāmai.

KUO faifai ange peá ke ngāueʻaki ha kāpasa ke ʻilo ho halá? Ko ha kāpasa ko ha meʻangāue pē ia ʻoku taha pē ʻa hono konga ʻoku ngaué—ko ha hui makinito ʻoku tuhu ki he tokelaú. Koeʻuhi ko ha mālohi taʻehāmai ʻoku ʻiloa ko e ivi fakamakinitó, ko e hui ʻo e kāpasá ʻokú ne fakatonutonu ia ki he malaʻe fakamakinito takatakai ʻi he māmaní ʻi he vahaʻa ʻo hono ongo polé. ʻI he laui senituli, kuo ngāueʻaki ai ʻe he kau kumi fonuá mo e kau fonongá ʻa e kāpasá ke ne tataki honau halá ʻi ʻuta mo tahi.

2, 3. (a) Ko e hā ʻa e ivi mālohi naʻe ngāueʻaki ʻe Sihova ʻi he taimi fuoloa ʻaupito he kuohilí? (e) Ko e hā ʻoku totonu ai ke tau ʻamanekina ʻe tataki ʻe he ivi ngāue taʻehāmai ʻo e ʻOtuá ʻetau moʻuí he ʻahó ni?

² ʻOku ʻi ai ha toe mālohi taʻehāmai ʻa ia ʻoku toe mātuʻaki fiemaʻu ange ia ki hotau tatakí. Ko e hā ia? Ko e mālohi ʻoku fakamatalaʻi ʻi he ongo veesi kamata ʻo e Tohi Tapú. Ko e lau ki he meʻa naʻe fakahoko ʻe Sihova ʻi he taimi fuoloa ʻaupito he kuohilí, ʻoku fakamatalaʻi ʻi he Sēnesí: “I he kamataʻanga naʻe fakatupu ʻe he ʻOtua ʻa e ngaahi langi mo mamani.” ʻI heʻene fai iá, naʻá ne tuku mai ha ivi mālohi, he ʻoku tānaki mai ʻi he fakamatala ki he fakatupú: “Naʻe ʻōʻōfaki ʻe he Laumalie ʻo e ʻOtua.” (Sēn. 1:1, 2) Ko e hā naʻe ngāué? Ko e laumālie māʻoniʻoní—ʻa e ivi mālohi fau naʻá ne fakahoko ʻa e fakatupú. ʻOku tau moʻuaʻaki ʻetau ʻi aí ki hono ngāueʻaki ʻe Sihova ʻa e laumālie ko ení ke ne fakahoko ʻa e kotoa ʻo ʻene ngaahi ngāué.—Siope 33:4; Saame 104:30.

³ ʻI he tuʻunga ko e tangata ʻoku moʻui mo mānavá, ʻoku totonu ke tau ʻamanekina ʻa e ivi ngāue ʻo e ʻOtuá ke ʻi ai hano kaunga lahi ange ki heʻetau moʻuí? Ko e ʻAlo tonu ʻo e ʻOtuá naʻá ne ʻiloʻi ʻoku totonu ke tau pehē, he naʻe pehē ʻe Sīsū ki heʻene kau ākongá: ‘Ko e laumālié te ne tataki kimoutolu ki he kotoa ʻo e moʻoní.’ (Sione 16:13) ʻE anga-fēfē haʻatau mahinoʻi ʻa e laumālie ko ení, pea ko e hā ʻoku totonu ai ke tau loto ke ne tataki kitautolú?

Ko e Natula ʻo e Laumālie Māʻoniʻoní

4, 5. (a) Ko e hā ʻa e fakakaukau hala ʻa e kau tui Tolu-Tahaʻi-ʻOtuá ki he laumālie māʻoniʻoní? (e) ʻE fēfē haʻo fakamatalaʻi ʻa e natula moʻoni ʻo e laumālie māʻoniʻoní?

⁴ Ngalingali, ko e niʻihi ʻo e kakai ʻokú ke talanoa ki ai ʻi he ngāue fakafaifekaú ʻoku nau maʻu ha fakakaukau taʻefakatohitapu fekauʻaki mo e laumālie māʻoniʻoní. ʻOku fakakaukau hala ʻa e kau tui Tolu-Tahaʻi-ʻOtuá ko ha tokotaha laumālie eni ʻoku tatau mo e ʻOtua ko e Tamaí. (1 Kol. 8:6) Ka ko e tokāteline ʻo e Tolu-Tahaʻi-ʻOtuá ʻoku faingofua hono fakahaaʻi ʻa ʻene kehe mei he Folofolá.

⁵ Ko e hā leva ʻa e natula moʻoni ʻo e laumālie māʻoniʻoní? Ko ha fakamatala ʻi lalo ʻi he Sēnesi 1:2 ʻi he New World Translation of the Holy Scriptures—With References ʻoku fakamatala ai: “Tuku kehe ʻa hono liliu ko e ‘laumālié,’ ko e ruʹach [faka-Hepeluú] ʻoku toe liliu ia ko e ‘matangi’ pea ʻe he ngaahi foʻi lea kehe ʻoku ʻuhingá ko ha ivi ngāue taʻehāmai.” (Fakafehoanaki mo e fakamatala ʻi lalo ʻi he Sēnesi 3:8; 8:1.) Hangē pē ko e taʻehāmai ʻa e matangí ka ʻokú ne ʻomai ʻa e mālohi, ʻoku pehē ʻa e taʻehāmai ʻa e laumālie māʻoniʻoni taʻefakamatelie mo taʻefakaetangatá, ka ʻokú ne ʻomai ʻa e ngaahi ola. Ko e laumālie ko ení ko e ivi mei he ʻOtuá ʻoku ʻasi mo ngāue ʻi he kakaí pe ko ha ngaahi meʻa ke fakahoko ʻa hono finangaló. ʻOku faingataʻa ke tui ko ha ivi fakaofo pehē ko e tupu ia mei he Matavai māʻoniʻoní, ʻa e ʻOtua Māfimafi-Aoniú? ʻIkai ʻaupito!—Lau ʻa e ʻAisea 40:12, 13.

 6. Ko e hā ʻa e tautapa mahuʻinga naʻe fai ʻe Tēvita kia Sihová?

⁶ ʻE lava ʻa Sihova ʻo hokohoko atu ʻi hono ngāueʻaki ʻa hono laumālié ke ne tataki kitautolu ʻi he moʻuí? Naʻá ne talaʻofa ki he tokotaha-tohi-saame ko Tēvitá: “Ko au teu fakabotoʻi koe mo akonakiʻi koe i he hala aia te ke alu ai.” (Saame 32:8, PM) Naʻe fiemaʻu ia ʻe Tēvita? ʻIo, he naʻá ne tautapa kia Sihova: “Ako au ke u fai ho finangalo; he ko hoku ʻOtua ʻa hoʻo ʻAfio. Ko ho Laumalie Lelei ke ne taki kita.” (Saame 143:10) ʻOku totonu ke tau maʻu ʻa e holi mo e loto-lelei tatau ke tataki ʻe he laumālie ʻo e ʻOtuá. Ko e hā hono ʻuhingá? Fakakaukau angé ki he ʻuhinga ʻe fā.

ʻOku ʻIkai Ke Tau Taau ke Tataki Kitautolu

7, 8. (a) Ko e hā ʻoku ʻikai ke tau malava ai ke tataki kitautolu ʻo taʻekau ai ʻa e ʻOtuá? (e) Fakatātaaʻi ʻa e ʻuhinga ʻoku ʻikai ke tau teitei feinga ai ke ʻiloʻi hotau halá ʻi he fokotuʻutuʻu fulikivanu ko ení.

⁷ ʻUluakí, ʻoku totonu ke tau loto ke tataki ʻe he laumālie ʻo e ʻOtuá koeʻuhí ʻoku ʻikai ke tau ala malava ke tataki kitautolu. “Ke tataki” ʻoku ʻuhingá “ke fakahinohinoʻi ʻi ha ʻalunga pe fakahaaʻi ʻa e hala ke muimui aí.” Kae kehe, naʻe ʻikai fakatupu kitautolu ʻe Sihova fakataha mo e malava ke fai ia maʻatautolu, tautefito koeʻuhí ko hotau tuʻunga taʻehaohaoá. Naʻe tohi ʻe heʻene palōfita ko Selemaiá: “ʻE ʻEiki, ʻoku ou ʻiloʻi ko e hala ʻo ha tangata ʻoku ʻikai ʻiate ia; ʻoku ʻikai ha mālohi ʻo e tangatá ke ne tataki ʻene ngaahi laká.” (Sel. 10:23, The Bible in Basic English) Pea ko e hā hono ʻuhingá? Naʻe fanongo ʻa Selemaia ki he ʻanalaiso ʻa e ʻOtuá ki he ʻuhinga ʻoku tau taʻemalava ai ʻi he hoko mai ki hono tataki kitautolú. ʻI he lea fekauʻaki mo hotau tangata ʻi lotó, naʻe pehē ʻe Sihova: “Ko e fungani ʻi he meʻa kākā ka ko e loto, pea ʻoku hilio hono kovi: ko hai te ne lava ke ʻilo ia?”—Sel. 17:9; Māt. 15:19.

⁸ ʻIkai ʻe fakavalevale ki ha tokotaha taʻetaukei ke ne ʻalu toko taha, ʻo ʻikai ha tokotaha tataki pōtoʻi pea halaʻatā ha kāpasa, ʻo ʻeveʻeva mamaʻo ki ha vaotā kuo teʻeki ai mapeʻi? ʻI he ʻikai ʻiloʻi ʻa e founga ke hao ai ʻi he ngaahi tuʻunga ʻikai lelei he vaotaá pea ʻikai maʻu ha taukei ke ʻiloʻi lelei ʻa e feituʻu ʻokú ne ʻalu ki aí, te ne ʻai ai ʻene moʻuí ki ha tuʻunga fakatuʻutāmaki. ʻOku pehē pē foki, ko e tokotaha ʻoku fakakaukau ʻe lava ke ne tataki hono ʻalunga ʻi he māmani fulikivanu ko ení ʻo ʻikai fakaʻatā ʻa e ʻOtuá ke ne fakahaaʻi ange ʻa e hala totonú ʻokú ne ʻai ai ʻene moʻuí ki he tuʻunga fakatuʻutāmaki lahi. Ko e faingamālie pē ʻoku tau maʻu ke fononga lavameʻa ai ʻi he fokotuʻutuʻu ko ení ko hono fai ʻa e kole tatau ʻi he lotu kia Sihova ʻo hangē ko ia ne fai ʻe Tēvitá: “Ko e taʻofituʻu ʻeku laka ki ho topuvaʻe, ko e meʻa ia kuo ʻikai humu ai ʻeku haʻele.” (Saame 17:5; 23:3) ʻE malava fēfē ke maʻu ʻa e tataki peheé?

 9. Hangē ko ia ko e fakatātā ʻi he peesi 17, ʻe lava fēfē ke ngāue ʻa e laumālie ʻo e ʻOtuá ko ha tataki papau kia kitautolu?

⁹ Kapau ʻoku tau anga-fakatōkilalo pea loto-lelei ke fakafalala kia Sihova, te ne tuku mai kia kitautolu hono laumālie māʻoniʻoní ko ha tataki papau ki heʻetau ngaahi laká. ʻE fēfē hono tokoniʻi kitautolu ʻe he ivi ngāue ko iá? Naʻe fakamatala ʻa Sīsū ki heʻene kau ākongá: “Ko e tokoní, ʻa e laumālie māʻoniʻoní, ʻa ia ʻe fekau mai ʻe he Tamaí ʻi hoku hingoá, ko e tokoni ko iá te ne akoʻi kiate kimoutolu ʻa e ngaahi meʻa kotoa pē mo fakamanatu atu kiate kimoutolu ʻa e ngaahi meʻa kotoa pē kuó u leaʻaki kiate kimoutolú.” (Sione 14:26) ʻI heʻetau ako maʻu pē pea ʻi he faʻa lotu ʻa e Folofola ʻa e ʻOtuá, ʻo kau ai ʻa e ngaahi lea kotoa pē ʻa Kalaisí, ʻe fakatupulekina ʻe he laumālie māʻoniʻoní ʻetau mahinoʻi ʻa e poto loloto ʻo Sihová, koeʻuhi ke tau lava ai ʻo muimui ofi ʻi hono finangaló. (1 Kol. 2:10) Tānaki atu ki ai, ʻi ha afenga taʻeʻamanekina pē ʻi he hala ki he moʻuí, ʻe fakahaaʻi mai ʻe he laumālié kia kitautolu ʻa e hala ke ʻalu aí. Te ne fakamanatu mai ʻa e ngaahi tefitoʻi moʻoni Fakatohitapu kuo tau ʻosi akó pea tokoniʻi kitautolu ke mahinoʻi ʻa e founga ʻoku ngāueʻaki ai ki hono fakahinohinoʻi ʻetau laka hono hokó.

Naʻe Tataki ʻa Sīsū ʻe he Laumālie ʻo e ʻOtuá

10, 11. Ko e hā e ʻamanaki naʻe maʻu ʻe he ʻAlo tofu-pē-taha-ne-fakatupu ʻo e ʻOtuá fekauʻaki mo e laumālie māʻoniʻoní, pea ko e hā naʻá ne hokosiá?

¹⁰ Ko ha ʻuhinga hono ua ʻoku totonu ke tau loto ai ke tataki ʻe he laumālie māʻoniʻoní he ko e ʻOtuá naʻá ne tataki ʻaki ia ʻa hono ʻAló tonu. Ki muʻa ke ne haʻu ki māmaní, ko e ʻAlo tofu-pē-taha-ne-fakatupu ʻo e ʻOtuá naʻá ne ʻilo fekauʻaki mo e kikite: “ʻOku nofo hifo ki ai ʻa e Laumalie ʻo Sihova, ʻa e laumalie ʻo e poto mo e ʻilomeʻa, ʻa e laumalie ʻo e faleʻi mo e mafai, ʻa e laumalie ʻo e ʻiloʻi ʻo Sihova mo e ʻapasia ki ai.” (ʻAi. 11:2) Kiʻi sioloto atu ki he vēkeveke ʻa Sīsū ke maʻu ʻa e tokoni ʻa e laumālie ʻo e ʻOtuá lolotonga ʻene nofo ʻi he ʻātakai naʻá ne fehangahangai mo ia ʻi heni ʻi he māmaní!

¹¹ Naʻe hoko moʻoni ʻa e ngaahi folofola ʻa Sihová. Ko e lēkooti Kōsipelí ʻoku fakahaaʻi ai ʻa e meʻa naʻe hoko ʻi he hili pē ʻa e papitaiso ʻo Sīsuú: “Pea ko Sīsū, ʻi heʻene fonu ʻi he laumālie māʻoniʻoní, naʻá ne mavahe mei Sioatani, pea naʻe taki holo ia ʻe he laumālié ʻi he toafá.” (Luke 4:1) ʻI ai, lolotonga ʻa e ʻaukai, lotu, mo e fakalaulauloto ʻa Sīsuú, ʻoku ngalingali naʻe fakahinohinoʻi mo fakamaama ʻe Sihova ʻa hono ʻAló fekauʻaki mo e meʻa naʻe toka mei muʻa ʻiate iá. Ko e ivi ngāue ʻo e ʻOtuá naʻe ngāue ia ʻi he ʻatamai mo e loto ʻo Sīsuú, ʻo tataki ʻa ʻene fakakaukaú mo ʻene ngaahi filí. Ko hono olá, naʻe ʻiloʻi ʻe Sīsū ʻa e meʻa ke fai ʻi he tuʻunga taki taha, pea naʻá ne fai ʻa e meʻa tofu pē naʻe fiemaʻu ia ʻe heʻene Tamaí ke ne faí.

12. Ko e hā ʻoku fiemaʻu ai ke tau kole ʻa e laumālie ʻo e ʻOtuá ke ne tataki kitautolú?

¹² ʻI hono ʻiloʻi ʻa e mahuʻinga ʻo e ngaahi ola ʻo e ngāue ʻa e laumālie ʻo e ʻOtuá ʻi heʻene moʻuí tonu, naʻe ʻai ʻe Sīsū ke maongo ki heʻene kau ākongá ʻa e mahuʻinga ʻo ʻenau kole pea hoko ʻo tataki ʻe he laumālie māʻoniʻoní. (Lau ʻa e Luke 11:9-13.) Ko e hā ʻoku mātuʻaki fiemaʻu ai ia kia kitautolú? Koeʻuhí ʻe lava ke ne liliu ʻetau fakakaukaú, ke tatau mo e fakakaukau ʻa Kalaisí. (Loma 12:2; 1 Kol. 2:16) ʻI hono tuku ʻa e laumālie ʻo e ʻOtuá ke ne tataki ʻetau moʻuí, ʻe lava ke tau fakakaukau ai ʻo hangē ko Kalaisí pea faʻifaʻitaki ki heʻene faʻifaʻitakiʻangá.—1 Pita 2:21.

Ko e Laumālie ʻo e Māmaní Te Ne Takiheeʻi Kitautolu

13. Ko e hā ʻa e laumālie ʻo e māmaní, pea ko e hā ʻokú ne fakatupú?

¹³ Ko e ʻuhinga hono tolu ki heʻetau loto ke tataki kitautolu ʻe he laumālie ʻo e ʻOtuá he ʻi he ʻikai iá ʻe lava ke takiheeʻi kitautolu ʻe he laumālie taʻemāʻoniʻoni ko ia ʻoku ngāue ʻi he moʻui ʻa e tokolahi taha ʻo e kakai he ʻaho ní. ʻOku maʻu ʻe he māmaní ʻa e ivi faitākiekina mo mālohi pē ʻaʻana, ʻa ia ʻokú ne fakaʻaiʻai ha ʻalunga ʻoku fehangahangai fakaʻaufuli mo e meʻa ʻe lava ke fakatupu ʻia kitautolu ʻe he laumālie māʻoniʻoní. ʻI he ʻikai fakatupulekina ʻi he kakaí ʻa e fakakaukau ʻa Kalaisí, ko e laumālie ʻo e māmaní ʻokú ne fakatupunga ke tatau ʻenau fakakaukaú mo e tōʻongá mo e fakakaukau ko ia ʻa e pule ʻo e māmaní, ʻa Sētane. (Lau ʻa e ʻEfesō 2:1-3; Taitusi 3:3.) ʻI he ʻulutukua ha tokotaha ki he laumālie ʻo e māmaní pea fai ʻa e ngaahi ngāue ʻo e kakanó, ʻoku iku ai ki he ngaahi nunuʻa mafatukituki, ʻi hono taʻofi ia mei heʻene maʻu tofiʻa ʻi he Puleʻanga ʻo e ʻOtuá.—Kal. 5:19-21.

14, 15. ʻE lava fēfē ke tau lavameʻa ʻi he talituʻu ki he laumālie ʻo e māmaní?

¹⁴ Kuo teuʻi kitautolu ʻe Sihova ke tau talituʻu ki he laumālie ʻo e māmaní. Naʻe pehē ʻe he ʻapositolo ko Paulá ke “hokohoko atu ʻa hono maʻu ʻa e mālohí ʻi he ʻEikí pea ʻi he māfimafi ʻo hono iví . . . ke mou malava ai ke talituʻu ʻaki ʻi he ʻaho fulikivanú.” (ʻEf. 6:10, 13) Fakafou ʻi hono laumālié, ʻoku fakaivia kitautolu ʻe Sihova ke tau matuʻuaki ʻa e ngaahi feinga ʻa Sētane ke takihalaʻi kitautolú. (Fkh. 12:9) Ko e laumālie ʻo e māmaní ʻoku mālohi, pea heʻikai lava ke tau fakaʻehiʻehi fakaʻaufuli mei ai. Kae kehe, ʻoku ʻikai fiemaʻu ia ke ne fakameleʻi kitautolu. Ko e laumālie māʻoniʻoní ʻoku toe mālohi ange ia, pea te ne tokoniʻi kitautolu!

¹⁵ ʻI he faʻahinga naʻa nau siʻaki ʻa e lotu faka-Kalisitiané ʻi he ʻuluaki senitulí, naʻe pehē ʻe he ʻapositolo ko Pitá: “ʻI hono liʻaki ʻa e hala ʻoku hangatonú, kuo takiheeʻi kinautolu.” (2 Pita 2:15) He fakamālō lahi ē ʻe lava ke tau ʻi ai he kuo tau maʻu, “ʻo ʻikai ko e laumālie ʻo e māmaní, ka ko e laumālie ʻa ia ʻoku mei he ʻOtuá”! (1 Kol. 2:12) ʻI he tokoni ʻa ʻene tākiekiná pea ʻi he ngāuekakatoʻaki ʻa e ngaahi tokonaki kotoa ʻa Sihová ke tauhi kitautolu ʻi he hala totonu fakalaumālié, ʻe lava ke tau lavameʻa ai ʻi hono talitekeʻi ʻa e laumālie fakasētane ʻo e māmani fulikivanu ko ení.—Kal. 5:16.

Fakatupu ʻe he Laumālie Māʻoniʻoní ʻa e Fua Lelei

16. Ko e hā ʻa e fua ʻe lava ke fakatupu ʻia kitautolu ʻe he laumālie māʻoniʻoní?

¹⁶ Ko ha ʻuhinga hono fā ki he loto ke ngāue ʻia kitautolu ʻa e laumālie ʻo e ʻOtuá he ʻokú ne fakatupu ʻa e fua lelei ʻi he moʻui ʻa e faʻahinga ko ia ʻokú ne tatakí. (Lau ʻa e Kalētia 5:22, 23.) Ko hai ʻia kitautolu heʻikai te ne taʻeloto ke ʻofa, fiefia, mo melino lahi angé? Ko hai ʻia kitautolu heʻikai te ne taʻesaiʻia ke fonu mahuohua ʻi he kātaki-fuoloa, anga-lelei, mo e leleí? Ko hai ʻia kitautolu heʻikai te ne taʻemaʻu ʻaonga mei hono fakatupulekina ha tui, anga-malū, mo e mapuleʻi-kita lahi angé? Ko e laumālie ʻo e ʻOtuá ʻokú ne fakatupu ʻia kitautolu ʻa e ngaahi ʻulungaanga lelei ʻa ia ʻoku tau maʻu ʻaonga ai mo e faʻahinga ʻoku tau nofo mo ngāue ki aí. Ko hono fakatupulekina ʻa e fua ko ení ko ha ngāue tuʻumaʻu ia ʻoku lolotonga hoko, koeʻuhi ʻoku ʻikai ha fakangatangata ki he lahi ʻo e fua ʻo e laumālié ʻoku tau fiemaʻú pea ʻoku tau fakaʻatā ke fakatupú.

17. ʻE lava fēfē ke tau fakatupulekina ha tafaʻaki ʻo e fua ʻo e laumālié ʻi ha tuʻunga lahi ange?

¹⁷ ʻOku fakapotopoto ke tau kiʻi tuʻu ʻo fakakaukau ke fakapapauʻi ko ʻetau ngaahi leá mo ʻetau ngaahi tōʻongá ʻoku fakamoʻoniʻi ai ʻoku tataki kitautolu ʻe he laumālie māʻoniʻoní pea ʻoku tau fakatupu ʻa hono fuá. (2 Kol. 13:5a; Kal. 5:25) Kapau ʻoku tau sio ʻoku fiemaʻu ke tau fakatupulekina ha ngaahi tafaʻaki ʻe niʻihi ʻo e fua ʻo e laumālié, ʻe lava ke tau ngāue fāitaha mo e laumālie māʻoniʻoní ʻi ha tuʻunga lahi ange ʻi hono fakatupu ʻa e ngaahi ʻulungaanga ko iá. ʻOku tau fai eni ʻaki hono ako ʻa e tafaʻaki taki taha hangē ko ia ʻoku fakahaaʻi fakafou he ngaahi peesi ʻo e Tohi Tapú pea lāulea ki ai ʻi heʻetau ʻū tohi faka-Kalisitiané. ʻOku lava leva ai ke tau ʻiloʻi ʻa e founga ʻoku totonu ke fakahāhā ai ʻa e fua ʻo e laumālié ʻi heʻetau moʻui fakaʻahó pea ngāue leva ke fakatupulekina ia ʻi ha tuʻunga lahi ange.a ʻI heʻetau sio ki he ngaahi ola ʻo e ngāue ʻa e laumālie ʻo e ʻOtuá ʻi heʻetau moʻuí tonu pea pehē ki he moʻui ʻa hotau ngaahi kaungā-Kalisitiané, ʻoku tau sio māʻalaʻala ai ki he ʻuhinga kuo pau ai ke ne tataki kitautolú.

ʻOkú Ke ʻUlutukua ki he Laumālie ʻo e ʻOtuá?

18. ʻOku anga-fēfē ʻa e hoko ʻa Sīsū ko ha sīpinga kia kitautolu ʻi heʻene tali ʻa e laumālie ʻo e ʻOtuá?

¹⁸ ʻI hono tuʻunga ko e “tufunga lahi” ʻa e ʻOtuá ʻi he fakatupu ʻo e ʻuniveesi matelié, naʻe ʻiloʻi ʻe Sīsū ʻa e meʻa kotoa fekauʻaki mo e malaʻe fakamakinito ʻo e māmaní, ʻa ia ʻoku ngāueʻaki ʻe he tangatá ke faifolau holo ai ʻi he māmaní. (Pal. 8:30; Sione 1:3) Kae kehe, ʻoku ʻikai ha fakamoʻoni ʻi he Tohi Tapú ne faifai ange pea ngāueʻaki ʻe Sīsū ʻa e mālohi ko iá ke ne tataki hono halá ʻi he taimi naʻá ne ʻi he māmaní aí. ʻOku fakamatala ʻa e Tohi Tapú ʻo pehē ʻi hono tuʻunga ko ha tangatá, naʻá ne hokosia ai ʻa e fuʻu ivi mālohi ʻo e laumālie māʻoniʻoni ʻo e ʻOtuá ʻi heʻene moʻuí. Naʻá ne talitali lelei ʻene tākiekiná, pea ʻi he taimi naʻá ne ueʻi ai iá, naʻá ne ʻulutukua pea ngāue ʻo fakatatau ki ai. (Mk. 1:12, 13; Luke 4:14) ʻOkú ke pehē?

19. Ko e hā kuo pau ke tau fai ke hoko ai ʻa e laumālie māʻoniʻoní ko e mālohi faitākiekina ʻi heʻetau moʻuí?

¹⁹ Ko e ivi ngāue ʻo e ʻOtuá ʻoku kei ngāue ia ʻi he ngaahi ʻatamai mo e loto fie ngāué ke ne ueʻi mo tataki ia. ʻE lava fēfē ke ke tuku ia ke ngāue ʻiate koe ke ne taki koe ʻi he hala totonú? Lotu maʻu pē kia Sihova ke ne ʻomai hono laumālié pea tokoniʻi koe ke ke ʻulutukua ki heʻene tākiekiná. (Lau ʻa e ʻEfesō 3:14-16.) Ngāue ʻo fehoanaki mo hoʻo ngaahi lotú ʻaki ʻa e fekumi ki he akonaki ʻoku maʻu ʻi he Folofola tohi ʻa e ʻOtuá, ko e Tohi Tapú—ko ha fua ʻo e laumālie māʻoniʻoní. (2 Tīm. 3:16, 17) Talangofua ki he ngaahi fakahinohino fakapotopoto ʻokú ne ʻomaí pea tali vēkeveke leva ʻa e tataki ʻa e laumālie māʻoniʻoní. Ngāue fakataha mo e tui ki he malava ʻa Sihova ke ne tataki lelei koe ʻi he moʻui he māmani fulikivanu ko ení.

[Fakamatala ʻi lalo]

Naʻá Ke Maʻu ʻa e Ngaahi Poini Tefitó?

• ʻE lava fēfē ke ueʻi ʻe he laumālie māʻoniʻoní ʻetau moʻuí?

• Ko e hā ʻa e ʻuhinga ʻe fā ʻoku totonu ai ke tau loto ke tataki kitautolu ʻe he laumālie ʻo e ʻOtuá?

• ʻE lava fēfē ke tau fai ʻetau tafaʻakí ke maʻu ʻaonga kakato mei he tataki ʻa e laumālie māʻoniʻoní?

[Fakatātā ʻi he peesi 15]

Ko e laumālie ʻo e ʻOtuá ko ha ivi faitākiekina ia ʻi he moʻui ʻa Sīsuú

[Fakatātā ʻi he peesi 17]

Ko e laumālie ʻo e ʻOtuá ʻoku ngāue ia ʻi he ngaahi ʻatamaí mo e lotó ke ne ueʻi mo tataki ia