Ko Mōsese​—Ko ha Tangata Tui Mālohi

Hangē ko hono ngāueʻaki ʻi he Tohi Tapú, ko e “tui” ʻoku kau ki ai ʻa e tuipau makatuʻunga ʻi he fakamoʻoni fefeka. Ko ha tokotaha ʻokú ne maʻu ha tui ki he ʻOtuá ʻokú ne tuipau te Ne fakahoko kotoa ʻEne ngaahi talaʻofá.

Naʻe fakatefito ʻe Mōsese ʻene moʻuí ʻi he ngaahi talaʻofa ʻa e ʻOtuá. (Sēnesi 22:15-18) Naʻá ne maʻu ʻa e faingamālie ke moʻui fiemālie ʻi he lotolotonga ʻo e tuʻumālie ʻo e kau ʻIsipité, ka naʻá ne tukuange ʻa e faingamālie ko iá, “ʻi heʻene fili ke ngaohikovia ia fakataha mo e kakai ʻa e ʻOtuá kae ʻikai ko e maʻu ʻa e fiefia fakataimi ʻi he angahalá.” (Hepelū 11:25) Ko ha fili fakavave ia, ʻo ne fakaʻiseʻisa ai ki mui? ʻIkai, he ʻoku pehē ʻe he Tohi Tapú ko Mōsesé naʻá ne “hanganaki tuʻu maʻu ʻi heʻene sio atu ko ia ki he Tokotaha ʻa ia ʻoku taʻehāmaí.” (Hepelū 11:27) Naʻe halaʻatā ke fakaʻiseʻisa ʻa Mōsese ʻi heʻene ngaahi fili ʻi he tuí.

Naʻe kumi ʻa Mōsese ke fakaivimālohiʻi ʻa e tui ʻa e niʻihi kehé. Ko e fakatātaá, fakakaukau ki he meʻa naʻe hokó ʻi he taimi naʻe fakakaukau ai ʻa e kau ʻIsilelí naʻa nau fihia he vahaʻa ʻo e kau tau ʻa Feló mo e Tahi Kulokulá. ʻI he manavahē ki he fakatamaki vavé, naʻe tangi ʻa e kau ʻIsilelí kia Sihova pea kia Mōsese. Naʻe anga-fēfē fakafeangai ʻa Mōsesé?

Naʻe ʻikai nai ke ʻilo ʻe Mōsese ko e ʻOtuá te ne fakamavaeua ʻa e Tahi Kulokulá, ʻo fakaʻatā ai ha fonongaʻanga ki he kau ʻIsilelí. Neongo ia, naʻe tuipau ʻa Mōsese ʻe fai ʻe he ʻOtuá ha meʻa ke maluʻi Hono kakaí. Pea naʻe loto ʻa Mōsese ke maʻu ʻe hono kaungā-ʻIsilelí ʻa e tuipau tatau. ʻOku tau lau: “Naʻe lea ʻa Mosese ki he kakai, ʻOua ʻe manavahe; mou tuʻu pe ʻo mamata ki he fakamoʻui ʻa Sihova, ʻa ia te ne fai maʻamoutolu he ʻaho ni.” (ʻEkisoto 14:13) Naʻe lavameʻa ʻa Mōsese ʻi hono fakaivimālohiʻi ʻa e tui ʻa hono kaungā-ʻIsilelí? ʻIo, he ʻoku pehē ʻe he Tohi Tapú ʻoku ʻikai ko Mōsese pē ka ko e kotoa ʻo e kau ʻIsilelí: “ʻI he tuí naʻa nau ʻalu atu ai ʻi he Tahi Kulokulá ʻo hangē ia haʻanau ʻalu ʻi ha fonua mōmoá.” (Hepelū 11:29) Ko e tui ʻa Mōsesé naʻe ʻikai ke ʻaonga pē kiate ia ka ki he tokotaha kotoa naʻe ako mei aí.

ʻOku lava ke tau faʻifaʻitaki kia Mōsese ʻaki hono fakatefito ʻetau moʻuí ʻi he ngaahi talaʻofa ʻa e ʻOtuá. Ko e fakatātaá, ʻoku talaʻofa mai ʻe he ʻOtuá te ne tokangaʻi ʻetau ngaahi fiemaʻu fakamatelié kapau te tau fakamuʻomuʻa ʻene lotú heʻetau moʻuí. (Mātiu 6:33) Ko e moʻoni, te tau ʻilo nai ko ha pole ke fakafepakiʻi ʻa e fakamuʻomuʻa ʻo e ngaahi meʻa fakamatelié ʻa ia ʻoku mafolalahia he ʻaho ní. Ka ʻoku lava ke tau fakapapauʻi kapau te tau fai hotau lelei tahá ke tauhi ke faingofua ʻetau moʻuí mo fakamuʻomuʻa ʻetau lotu kia Sihová te ne tokonaki mai ʻetau fiemaʻú kotoa. ʻOkú ne fakapapauʻi mai: “ʻE ʻikai ʻaupito te u mavahe meiate koe pea ʻe ʻikai ʻaupito te u liʻaki koe.”—Hepelū 13:5.

ʻOku tau toe feinga ke tokoniʻi ʻa e niʻihi kehé ke tupulaki ʻi he tuí. Ko e fakatātaá, ko e ngaahi mātuʻa potó ʻoku nau ʻiloʻi ʻa e fuʻu faingamālie ʻoku nau maʻu ke langa hake ʻa e tui ʻenau fānaú. ʻI heʻenau tupu haké, ʻoku fiemaʻu ʻe he fānaú ʻa e ʻilo mātuʻaki mahuʻinga ʻoku ʻi ai ʻa e ʻOtua pea ʻokú ne akoʻi mai ʻa e tonú mei he halá. Tānaki atu ki ai, ʻoku fiemaʻu ke nau tuipau ko e muimui ʻi heʻene ngaahi tuʻungá ʻa e founga lelei taha ʻo e moʻuí. (ʻAisea 48:17, 18) ʻOku ʻoange ʻe he ngaahi mātuʻá ʻa e meʻaʻofa mahuʻinga ki heʻenau fānaú ʻi he taimi ʻoku nau tokoniʻi ai kinautolu ke nau tui ki he ʻOtuá “ʻoku ʻi ai ia, pea te ne hanga ʻo totongi kiate kinautolu ʻoku kumi hākili kiate ia.”—Hepelū 11:6, Paaki Foʻou.