Fehuʻi mei he Kau Lautohí

ʻOku anga-fēfē hono fakanofo ʻa e kau mātuʻa mo e kau sevāniti fakafaifekau ʻi he fakatahaʻanga taki taha?

▪ ʻI he ʻuluaki senituli T.S., naʻe tala ʻe he ʻapositolo ko Paulá ki he kau mātuʻa naʻe ngāue ʻi he fakatahaʻanga ʻi ʻEfesoó: “Tokanga kiate kimoutolu pea ki he kotoa ʻo e tākangá, ʻa ia kuo fakanofo kimoutolu ki ai ʻe he laumālie māʻoniʻoní ko honau kau ʻovasia, ke tauhi ʻa e fakatahaʻanga ʻa e ʻOtuá, ʻa ia naʻá ne fakatau mai ʻaki ʻa e taʻataʻa ʻo hono ʻAló tonu.” (Ngā. 20:28) Ko e hā ʻa e ngafa ʻo e laumālie māʻoniʻoní ʻi hono fakanofo ʻo e kau mātuʻa mo e kau sevāniti fakafaifekau he ʻaho ní?

ʻUluakí, naʻe ueʻi ʻe he laumālie māʻoniʻoní ʻa e kau hiki Tohi Tapú ke lēkooti ʻa e ngaahi tuʻunga taau ki he kau mātuʻá mo e kau sevāniti fakafaifekaú. Ko e ngaahi fiemaʻu kehekehe ʻe 16 fekauʻaki mo e kau mātuʻá ʻoku lisi ia ʻi he 1 Tīmote 3:1-7. Ko e ngaahi tuʻunga taau lahi ange ʻoku maʻu ia ʻi he ngaahi konga Tohi Tapu hangē ko e Taitusi 1:5-9 mo e Sēmisi 3:17, 18. Ko e ngaahi tuʻunga taau ki he kau sevāniti fakafaifekaú ʻoku fakamatalaʻi ia ʻi he 1 Tīmote 3:8-10, 12, 13. Uá, ko e faʻahinga ʻoku nau fai ʻa e fakaongoongoleleí pea fai ʻa e ngaahi fakanofo ko iá ʻoku mātuʻaki fiemaʻu ke nau lotu ʻo kole ʻa e laumālie ʻo Sihová ke ne tataki kinautolu ʻi heʻenau vakaiʻi pe ʻoku aʻusia ʻe ha tokoua ʻa e ngaahi fiemaʻu Fakatohitapu ki ha tuʻunga taau feʻunga. Tolú, ko e tokotaha ʻoku fakaongoongoleleiʻí ʻoku fiemaʻu ke ne fakahāhā ʻa e fua ʻo e laumālie māʻoniʻoni ʻo e ʻOtuá ʻi heʻene moʻuí tonu. (Kal. 5:22, 23) Ko ia ko e laumālie ʻo e ʻOtuá ʻoku kaunga ia ki he ngaahi tafaʻaki kotoa ʻo hono fai ʻo e fakanofó.

Ka ko hai koā ʻokú ne fakanofo ʻa e fanga tokoua ko iá? ʻI he kuohilí, ko e kotoa ʻo e ngaahi fakaongoongolelei ʻo kau ki hono fakanofo ʻa e kau mātuʻá mo e kau sevāniti fakafaifekaú naʻe ʻave ia ki he ʻōfisi vaʻa fakalotofonuá. ʻI aí, ko e fanga tokoua naʻe fakanofo ʻe he Kulupu Pulé naʻe vaheʻi ke nau vakaiʻi ʻa e ngaahi fakaongoongolelei ko ení pea fai ha fakanofo feʻungamālie. Hokó, ʻe fakahā ia ʻe he ʻōfisi vaʻá ki he kulupu ʻo e kau mātuʻá. Ko e kau mātuʻá leva te nau fakahoko ki he kau tangata fakanofo foʻoú fekauʻaki mo honau fakanofó, ʻo ʻeke kia kinautolu pe ʻoku nau loto-lelei mo taau moʻoni ke tali ʻa e vāhenga-ngāué. Fakaʻosí, naʻe fanongonongo leva ki he fakatahaʻangá.

Ka naʻe anga-fēfē hono fai ʻa e ngaahi fakanofo peheé ʻi he ʻuluaki senitulí? ʻI he taimi ʻe niʻihi, naʻe fai ʻe he kau ʻapositoló ʻa e ngaahi fakanofo pau, hangē ko e taimi naʻa nau fakanofo ai ʻa e kau tangata ʻe toko fitu ke tokangaʻi ʻa e tufa meʻakai fakaʻaho ki he kau uitoú. (Ngā. 6:1-6) Kae kehe, ko e kau tangata nai ko iá naʻa nau ʻosi ngāue ko ha kau mātuʻa, ʻa ia, ki muʻa ke ʻoange ʻa e toe vāhenga-ngāue ko ení.

Neongo ʻoku ʻikai fakamatalaʻi fakaikiiki ʻe he Folofolá ʻa e founga ʻo e fakanofo kotoa naʻe fai ki muʻá, ʻoku tau sio ki he ngaahi founga ʻe niʻihi naʻe fai ai ení. ʻOku tala mai kia kitautolu ʻi he taimi naʻe foki ai ʻa Paula mo Panepasa mei heʻena ʻuluaki ʻaʻahi fakamisinalé, “naʻá na fakanofo ha kau mātuʻa maʻanautolu ʻi he fakatahaʻanga taki taha, pea ʻi hono fai ha lotu fakataha mo e ʻaukai, naʻá na tuku atu kinautolu kia Sihova ʻa ia kuo nau hoko ko ha kau tui ki aí.” (Ngā. 14:23) ʻI he ngaahi taʻu ki mui ai, naʻe tohi ʻa Paula ki hono kaungāfononga ko Taitusí, ʻo pehē: “Naʻá ku tuku koe ʻi Kēliti koeʻuhí ke ke fakatonutonu ʻe koe ʻa e ngaahi meʻa naʻe tamelé pea ke fai ha ngaahi fakanofo ʻo ha kau mātuʻa ʻi he kolo ki he kolo, ʻo hangē ko ia naʻá ku fakahinohino atu kiate koé.” (Tai. 1:5) Pehē foki, ko Tīmote, ʻa ia naʻá ne fai ʻa e ngaahi fononga lahi mo e ʻapositolo ko Paulá, ʻoku hā ngali naʻe ʻoange kiate ia ʻa e mafai meimei tatau. (1 Tīm. 5:22) ʻOku hā mahino leva, ko e ngaahi fakanofo ko ení naʻe fai ʻe he kau ʻovasia fefonongaʻaki, kae ʻikai ko e kau ʻapositolo mo e kau mātuʻa ʻi Selusalemá.

ʻI he fakakaukau ki he ngaahi faʻifaʻitakiʻanga Fakatohitapu ko ení, ko e Kulupu Pule ʻo e Kau Fakamoʻoni ʻa Sihová kuo nau feʻunuʻaki ʻa e founga ʻoku fai ai hono fakanofo ʻa e kau mātuʻa mo e kau sevāniti fakafaifekaú. ʻI Sepitema 1, 2014, ko e ngaahi fakanofó ʻoku peheni: Ko e ʻovasia sēketi taki taha te ne vakaiʻi fakalelei ʻa e ngaahi fakaongoongolelei kuo fai ʻi heʻene sēketí. Lolotonga ʻene ʻaʻahi ki he ngaahi fakatahaʻangá, te ne feinga ke hoko ʻo ʻiloʻi ʻa e faʻahinga kuo fakaongoongoleleiʻí, ʻo ngāue fakataha mo kinautolu ʻi he ngāue fakafaifekaú ʻo ka malava. Hili ʻa e lāulea ki he ngaahi fakaongoongoleleí mo e kulupu fakalotofonua ʻo e kau mātuʻá, ko e ʻovasia sēketí ʻokú ne maʻu ʻa e fatongia ʻo hono fakanofo ʻa e kau mātuʻa mo e kau sevāniti fakafaifekau ʻi he ngaahi fakatahaʻanga ʻi heʻene sēketí. ʻI he foungá ni, ko e fokotuʻutuʻú ʻoku ofi ange ki he sīpinga ʻi he ʻuluaki senitulí.

Ko hai ʻokú ne fakahoko ʻa e ngaahi ngafa kehekehe ʻi he fokotuʻutuʻu ko ení? Ko e “tamaioʻeiki anga-tonu mo potó” ʻokú ne maʻu maʻu pē ʻa e fatongia tefito ki hono fafangaʻi ʻa e kau sevāniti ʻo hono falé. (Māt. 24:45-47) ʻOku kau heni ʻa e fekumi ki he Folofolá, fakataha mo e tokoni ʻa e laumālie māʻoniʻoní, koeʻuhí ke lava ʻo ʻomai ʻa e fakahinohino ʻo hono ngāueʻaongaʻaki ʻa e ngaahi tefitoʻi moʻoni Fakatohitapú ʻa ia ʻoku ʻi ai hono kaunga ki he anga hono fokotuʻutuʻu maau ʻa e fakatahaʻanga ʻi māmani lahí. ʻOku toe fakanofo ʻe he tamaioʻeiki anga-tonú ʻa e kotoa ʻo e kau ʻovasia sēketí mo e ngaahi mēmipa ʻo e Kōmiti Vaʻá. ʻI he tafaʻaki ʻe tahá, ko e ʻōfisi vaʻa taki taha ʻokú ne tokonaki mai ʻa e tokoni ʻaonga ʻi hono fakahoko ʻa e fakahinohino ʻoku ʻomaí. Ko e kulupu taki taha ʻo e kau mātuʻá ʻoku nau maʻu ʻa e fatongia mafatukituki ke vakaiʻi fakaʻāuliliki ʻa e ngaahi tuʻunga taau Fakatohitapu ʻo e fanga tokoua ʻoku fakaongoongoleleiʻi ke fakanofo ʻi he fakatahaʻanga ʻa e ʻOtuá. Ko e ʻovasia sēketi taki taha ʻokú ne maʻu ʻa e fatongia mafatukituki ke fakakaukau fakalelei mo faʻa lotu ki he ngaahi fakaongoongolelei kuo fai ʻe he kau mātuʻá pea fakanofo leva ʻa e kau tangata ʻoku tāú.

ʻI he taimi ʻoku tau mahinoʻi ai ʻa e founga ʻoku fai ai ʻa e ngaahi fakanofó, ʻoku tau houngaʻia lahi ange ʻi he ngafa ʻo e laumālie māʻoniʻoní ʻi he foungá ni. Te tau maʻu leva ʻa e falala-pau lahi ange mo e fakaʻapaʻapa ki he faʻahinga kuo fakanofo ʻi he fakatahaʻanga Kalisitiané.—Hep. 13:7, 17.

Ko hai ʻa e ongo fakamoʻoni ʻoku lave ki ai ʻi he Fakahā vahe 11?

▪ ʻOku fakamatala ʻa e Fakahā vahe 11:3 fekauʻaki mo e ongo fakamoʻoni ʻa ia te na kikite ʻi he ʻaho ʻe 1,260. ʻOku pehē leva ʻe he fakamatalá ko e manu fekaí te ne “ikunaʻi kinaua ʻo ne tāmateʻi kinaua.” Ka ʻi he hili “ʻa e ʻaho ʻe tolu mo e kongá,” ko e ongo fakamoʻoni ko ení te na toe moʻui, naʻe ofo lahi ʻa e kotoa ʻo e kau mamatá.—Fkh. 11:7, 11.

Ko hai ʻa e ongo fakamoʻoni ko ení? Ko e ngaahi fakaikiiki ʻi he fakamatalá te ne tokoniʻi kitautolu ke ʻiloʻi kinaua. ʻUluakí, ʻoku tala mai kia kitautolu ʻoku “fakafofongaʻi ʻa e ongo tamá ni ʻe he ongo fuʻu ʻōlivé pea mo e ongo tuʻunga-māmá.” (Fkh. 11:4) ʻOku fakamanatu mai heni kia kitautolu ʻa e tuʻunga-maama mo e ongo fuʻu ʻōlive ʻoku fakamatalaʻi ʻi he kikite ʻa Sākalaiá. Ko e ongo fuʻu ʻōlivé naʻe pehē naʻá na fakatātaaʻi ʻa e ‘toko ua, kuo bani’ ʻa ia ko Kōvana Seluipēpeli pea mo Taulaʻeiki Lahi Siosiua, “oku na tutuu i he ao o Jihova o mamani kotoabe.” (Sāk. 4:1-3, 14, PM) Uá, ʻoku fakamatalaʻi ʻa e ongo fakamoʻoní ʻokú na fakahoko ʻa e ngaahi mana meimei tatau mo ia naʻe fakahoko ʻe Mōsese mo ʻIlaisiaá.—Fakafehoanaki ʻa e Fakahā 11:5, 6 mo e Nōmipa 16:1-7, 28-35 mo e 1 Tuʻi 17:1; 18:41-45.

Ko e hā ʻa e faitatau ʻi he ngaahi fakamatala ko ení? ʻI he tuʻunga taki taha, ʻoku lave ʻa e fakamatalá ki he kau pani ʻa e ʻOtuá ʻa ia naʻa nau takimuʻa lolotonga ʻa e taimi faingataʻa ʻo e ʻahiʻahí. Ko ia ʻi hono fakahoko ʻo e Fakahā vahe 11, ko e fanga tokoua pani naʻa nau takimuʻa ʻi he taimi ʻo hono fokotuʻu ʻa e Puleʻanga ʻo e ʻOtuá ʻi hēvani ʻi he 1914 naʻa nau “ʻai tauangaʻa” ʻo malanga ʻi he taʻu ʻe tolu mo e konga.

ʻI he ngataʻanga ʻenau ʻai tauangaʻa ʻo malangá, ko e kau pani ko ení naʻe tāmateʻi fakaefakatātā kinautolu ʻi he taimi naʻe lī ai kinautolu ki he pilīsoné ʻi ha kiʻi vahaʻa taimi nounou, ko ha ʻaho fakaefakatātā ʻe tolu mo e konga. ʻI he vakai ʻa e ngaahi fili ʻo e kakai ʻa e ʻOtuá, ko ʻenau ngāué kuo mate, ʻo ʻai ai ke fiefia lahi ʻa e kau fakafepaki ko iá.—Fkh. 11:8-10.

Kae kehe, ʻi he moʻoni ʻa e ngaahi lea ʻo e kikité, ʻi he ngata ʻo e ʻaho ʻe tolu mo e kongá, naʻe toe moʻui mai ʻa e ongo fakamoʻoní. Naʻe ʻikai ko e tukuange mai pē ʻa e kau pani ko ení mei he pilīsoné ka ko e faʻahinga naʻe nofoʻaki faitōnungá naʻa nau maʻu ha fakanofo makehe mei he ʻOtuá ʻo fakafou ʻi honau ʻEikí, ʻa Sīsū Kalaisi. ʻI he 1919 naʻa nau kau ʻi he faʻahinga naʻe fakanofo ke ngāue ko ha “tamaioʻeiki anga-tonu mo potó” ke tokangaʻi ʻa e ngaahi fiemaʻu fakalaumālie ʻa e kakai ʻa e ʻOtuá lolotonga ʻa e ngaahi ʻaho fakaʻosí.—Māt. 24:45-47; Fkh. 11:11, 12.

Ko e meʻa mahuʻingá, ʻoku fakafekauʻaki ʻe he Fakahā 11:1, 2 ʻa e ngaahi meʻá ni ki ha taimi ʻe fua pe fakafuofuaʻi ai ʻa e temipale fakalaumālié. ʻOku lave ʻa e Malakai vahe 3 ki ha sivi meimei tatau ʻo e temipale fakalaumālié, ʻo hoko mai ai ha taimi ʻo e fakamaʻa. (Mal. 3:1-4) Ko e hā hono fuoloa ʻo e sivi mo e fakamaʻa ko ení? Naʻe lele ia mei he 1914 ki he konga ki muʻa ʻo e 1919. Ko e vahaʻa taimi ko ení ʻoku fakatou fakakau ai ʻa e ʻaho ʻe 1,260 (māhina ʻe 42) mo e ʻaho fakaefakatātā ʻe tolu mo e konga ʻoku lave ki ai ʻa e Fakahā vahe 11.

He fiefia ē ko kitautolu ʻi hono fokotuʻutuʻu ʻe Sihova ʻa e ngāue sivi fakalaumālie ko ení ke fakamaʻa ha kakai makehe ki he ngaahi ngāue leleí! (Tai. 2:14) Tānaki atu ki aí, ʻoku tau houngaʻia ʻi he faʻifaʻitakiʻanga ʻoku fokotuʻu mai ʻe he kau pani faitōnunga ko eni ʻa ia naʻa nau takimuʻa lolotonga ʻa e taimi ko ia ʻo e ʻahiʻahí pea hoko ai ko ha ongo fakamoʻoni fakaefakatātā.a

[Fakamatala ʻi lalo]

[Puha ʻi he peesi 29]

NGAFA ʻO E FAʻAHINGA ʻOKU KAU KI HE FAKANOFÓ

KULUPU PULE:

ʻOmai ʻa e fakahinohino ʻi hono ngāueʻaongaʻaki ʻo e ngaahi tefitoʻi moʻoni Fakatohitapú ʻa ia ʻoku ʻi ai hono kaunga ki he anga hono fokotuʻutuʻu maau ʻa e fakatahaʻangá. Fakanofo ʻo e kau ʻovasia sēketi mo e ngaahi mēmipa ʻo e Kulupu Pulé.

ʻŌFISI VAʻA:

Tokonaki mai ʻa e tokoni ʻaonga ʻi hono fakahoko ʻa e fakahinohino ʻa e Kulupu Pulé.

KULUPU ʻO E KAU MĀTUʻA:

Vakaiʻi fakaʻāuliliki ʻa e ngaahi tuʻunga taau Fakatohitapu ʻo e fanga tokoua ʻoku fakaongoongoleleiʻi ke fakanofó.

ʻOVASIA SĒKETI:

Fakakaukau fakalelei mo faʻa lotu ki he ngaahi fakaongoongolelei kuo fai ʻe he kau mātuʻá pea fakanofo leva ʻa e kau tangata ʻoku tāú.

FANGA TOKOUA KUO FAKAONGOONGOLELEIʻI:

Fiemaʻu ke fakahāhā ʻa e fua ʻo e laumālié pea aʻusia ʻa e ngaahi tuʻunga taau Fakatohitapú.

[Fakatātā ʻi he peesi 28]

Lāulea ʻa e kau mātuʻá mo e ʻovasia sēketí ki he ngaahi tuʻunga taau Fakatohitapu ha tokoua (Malauī)

[Saati ʻi he peesi 30]

FAKAHOKOHOKO ʻO E KIKITÉ

FAKAMAʻA ʻO E TEMIPALÉ (Mal. 3:1-3)

Taʻu ʻe 3 1/2 (māhina ʻe 42)

pe ʻaho ʻe 1,260 (Fkh. 11:3)

ʻAho ʻe 3 1/2 (Fkh. 11:9)

1914

1919