“Ko ha Fefine Hoihoifua Koe”

NAʻE tuʻu ʻa Sela ʻi loto-mālie ʻi he lokí ʻo sio takai holo. Sioloto atu ki ha fefine ʻi he Hahake Lotolotó ʻoku kanoʻimata ʻuliʻuli fakaʻofoʻofa. Naʻe hā mai mei ai ha mata mamahi? Kapau ko ia, ʻe ʻikai faingataʻa ke mahinoʻi ʻa hono ʻuhingá. Naʻe lahi ʻa e hisitōlia ʻo e fale ko ení. Ko ia mo hono husepāniti ʻofeiná, ko ʻĒpalahame, naʻá na fakamoleki ʻi heni ha ngaahi houa fiefia taʻefaʻalaua.a Naʻá na ngaohi fakataha ia ko hona ʻapi.

Naʻá na nofo ʻi ʻUa, ko ha kolo tuʻumālie naʻe tokolahi ai ʻa e kau ngāue nima poto, kau nima-meaʻa, mo e kau mēsianiti. Ko ia ʻoku pau pē naʻá na koloaʻia. Ka naʻe mahulu hake kia Sela ʻa hono ʻapí ʻo ʻikai ko ha feituʻu pē ke tauhi ai ʻene koloá. Naʻá ne fevahevaheʻaki ʻi heni mo hono husepānití ha ngaahi taʻu ʻo e fiefia mo e mamahi. Naʻá na lotu ʻi heni ʻi ha taimi lahi fau ki hona ʻOtua ʻofeiná, ʻa Sihova. Naʻe maʻu ʻe Sela ha ʻuhinga lahi ke ʻofa ai ʻi he feituʻú ni.

Kae kehe, naʻe loto-lelei ʻa Sela ke hiki mei he meʻa kotoa naʻe maheni mo iá. Neongo naʻá ne taʻu 60 nai, te ne fononga ki he ngaahi feituʻu taʻeʻiloa pea maʻu ha moʻui mohu fakatuʻutāmaki mo faingataʻa, ʻo ʻikai ha ʻamanaki ki ha toe foki. Ko e hā naʻá ne taki atu ia ki ha liliu fakaʻaufuli ʻi heʻene moʻuí? Pea ko e hā ʻoku lava ke tau ako he ʻahó ni mei heʻene tuí?

ʻOku ngalingali naʻe tupu hake ʻa Selá ʻi ʻUa. ʻI he ʻahó ni, ko e meʻa pē ʻoku toe mei he kolo ko iá ko ha fuʻu fokotuʻunga maumau. Ka ʻi he ʻaho ʻo Selá, naʻe folau holo ʻa e ngaahi vaka ʻa e kau mēsianití ʻi he tahi mo e ngaahi halanga ʻo e Vaitafe ʻIufaletesí, ʻo ʻomi ʻa e koloa mahuʻinga mei he ngaahi feituʻu mamaʻó ki he kolo moʻumoʻuá ni. Naʻe fakatahataha ʻa e kakaí ʻi he hala fāsiʻi mo pikopiko ʻo ʻUá, naʻe tau fepikipikiʻi ʻa e ngaahi vaká ʻi hono ngaahi uafú, pea naʻe lahi fau ʻa e koloá ʻi hono ngaahi māketí. Sioloto atu ki he tupu hake ʻa Sela ʻi he kolo moʻumoʻua ko iá, ʻo ne ʻilo ʻa e hingoa ʻo e kakai tokolahi ʻi ai. ʻOku pau pē naʻa nau manatuʻi mo ia foki, he ko ha fefine hoihoifua taha kehe atu ia. Ne tokolahi foki mo hono fāmili ʻi aí.

ʻOku ʻiloa ʻa Sela ʻi he Tohi Tapú ʻi he lahi ʻo ʻene tuí—ka naʻe ʻikai ko ha tui ia ki he ʻotua ʻo e māhiná ʻa ia naʻe failahia ki ai ʻa e lotú ʻi ʻUá, ʻa ia naʻe tuʻu kaekaea ʻi he koló ha fuʻu taua ki he ʻotua ko iá. ʻI hono kehé, naʻe lotu ʻa Sela ia ki he ʻOtua moʻoní, ʻa Sihova. ʻOku ʻikai ke tala mai ʻe he lēkooti fakamānavaʻí ia ʻa e founga naʻá ne maʻu ai ʻa e tui ko iá. Ko ʻene tamaí, naʻe lotu ʻaitoli ki muʻa. Pe ko e hā ʻa e tuʻungá, naʻá ne mali mo ʻĒpalahame, ko ha tangata naʻá ne lahi ʻaki ʻa e taʻu ʻe hongofulu ʻiate ia.b (Sēnesi 17:17) Naʻe ʻiloa ia ki mui “ko e tamai ʻa e faʻahinga kotoa ʻoku tui.” (Loma 4:11) Naʻá na faʻu ha nofo mali lelei mo mālohi, ʻa ia naʻe fakaʻilongaʻi ʻaki ʻa e fakaʻapaʻapa, fetuʻutaki lelei, mo ha loto-lelei ke ngāue fakataha ʻi he kotoa ʻo e ngaahi palopalema faingataʻá. Kae kehe, hiliō he meʻa kotoa, ko ʻena fāitahá naʻe fakaʻilongaʻi ʻaki ia ʻena ʻofa ki hona ʻOtuá.

Naʻe ʻofa moʻoni ʻa Sela ʻi hono husepānití, pea naʻá na langa hona ʻapí ʻi he lotolotonga ʻo hona kāinga ʻi ʻUá. Kae kehe, naʻe vave ʻa e siva ʻena ʻamanakí. ʻOku tala mai ʻe he Tohi Tapú ko Selá ‘naʻe paʻa; naʻe ʻikai haʻane tama.’ (Sēnesi 11:30) ʻI he anga fakafonua mo e taimi ko iá, naʻe mātuʻaki hoko ko e ʻahiʻahi ʻa e tuʻunga ʻo Selá. Ka naʻe nofoʻaki pīkitai ʻa Sela ki hono ʻOtuá pea ki hono husepānití. ʻOku hā mahino ko hona ʻilamutu tamai-mate ko Loté naʻá ne hoko ʻo hangē ha foha kiate kinauá. Naʻe hokohoko atu ʻa e moʻuí—ʻo aʻu ki he ʻaho naʻe liliu ai ʻa e meʻa kotoa pē.

Naʻe haʻu ʻa ʻĒpalahame kia Sela ʻokú ne fiefia lahi. Ne ʻikai meimei lava ke ne tui ki he meʻa naʻe toki hokó. Ko e toki ʻosi pē ia ʻa e folofola mai kiate ia ʻa e ʻOtua naʻá na lotu ki aí​—naʻe aʻu ʻo ne hā kiate ia, ʻo ʻikai ha veiveiua fakafou ʻi ha ʻāngelo! Sioloto atu kia Sela, naʻe sio fakamamaʻu hono fofonga fakaʻofoʻofá ki hono husepānití, ʻo ne ʻeke mānava tamaki ange: “Ko e hā naʻá ne tala atu kiate koé? Tala mai muʻa!” Mahalo pē naʻe ʻuluaki tangutu hifo ʻa ʻĒpalahame ʻo fakamāʻopoʻopo ʻene fakakaukaú; peá ne toki tala ange ʻa e meʻa naʻe folofolaʻaki ʻe Sihová: “ʻAlu atu mei ho fonuá pea mei ho ngaahi kāingá peá ke hū ki he fonua ʻa ia te u fakahā atu kiate koé.” (Ngāue 7:2, 3) ʻI he holoholo hifo ʻena muʻaki fiefiá, naʻá na fakakaukauloto ki he ngāue naʻe tuku mai ʻe Sihova kiate kinauá. Naʻe pau ke na mavahe mei hona ʻapí tonu mo e moʻui fiemālié ʻo nofo hikihiki holo! Naʻe anga-fēfē ʻa e tali ʻa Selá? ʻOku ʻikai ha veiveiua naʻe siofi fakalelei ia ʻe ʻĒpalahame. Te ne poupouʻi loto-lelei ia ʻi ha fuʻu liliu pehē ʻi heʻena moʻuí?

Ko e fili naʻe fehangahangai mo Selá ʻe ongo faikehe nai ia kiate kitautolu. Te tau fakakaukau nai, ‘Ko eni, kuo ʻikai ʻaupito ke kole mai ʻe he ʻOtuá kiate au pe ko hoku hoá ke ma fai ha meʻa pehē!’ Kae kehe, ʻikai ʻoku tau fehangahangai kotoa mo ha fili meimei tatau? ʻOku tau nofo ʻi ha māmani ʻoku tuli ki he meʻa fakamatelié, ʻa ia ʻoku fakaʻaiʻai nai ai kitautolu ke fakamuʻomuʻa ʻi heʻetau moʻuí ʻa ʻetau fiemālié, koloá, pe ko ʻetau ongoʻi malú. Ka ʻoku enginaki mai ʻa e Tohi Tapú ke tau fai ha toe fili ʻe taha—ke fuofua kumi ki he ngaahi meʻa fakalaumālié, ke fakamuʻomuʻa ʻa hono fakahōhōʻiaʻi ʻa e ʻOtuá ʻi hono fakahōhōʻiaʻi kitautolú. (Mātiu 6:33) ʻI heʻetau fakakaukauloto atu ki he meʻa naʻe fai ʻe Selá, te tau ʻeke hifo nai, ‘Ko e hā ʻa e fili te u fai ʻi he moʻuí?’

ʻI he faʻo ʻe Sela ʻene ʻū meʻá, naʻá ne fehangahangai ai mo ha palopalema ʻi he fili ʻa e meʻa te ne tauhí mo e meʻa ke tukú. Heʻikai lava ke ne tauhi ha meʻa naʻe fuʻu lahi ke fakaheka ʻi ha fanga ʻasi mo e fanga kāmeli, ʻa ia heʻikai ʻaonga ʻi ha moʻui hikihiki holo. ʻOku ʻikai ha veiveiua naʻe pau ke fakatau atu pe foaki ʻa e konga lahi ʻo ʻena koloá. ʻE mole atu foki mo e ngaahi faingamālie ʻo e moʻui ʻi he koló—ʻa e lava ke ʻalu ki he ngaahi māketí ʻa ia naʻe lava ke ne fakatau mai ai ha uite, kakanoʻi-manu, fuaʻiʻakau, vala, mo e ngaahi meʻa kehe naʻe fiemaʻú mo e meʻa ke fiemālie aí.

Mahalo naʻe kei faingataʻa pē kia Sela ke ne tuku ange ʻa hono ʻapí. Kapau naʻe hangē ko e ngaahi fale lahi naʻe ʻilo ʻe he kau keli fakatotoló ʻi ʻUá, naʻe fehangahangai ʻa Sela mo e mole ʻa e moʻui mātuʻaki fiemālie moʻoni. Ko e niʻihi ʻo e ngaahi fale ko iá naʻe hongofulu tupu hono ngaahi lokí, pea pehē ki he ngaahi fauniteni ʻo e vai maʻa pea naʻe ʻosi taki holo. Naʻa mo ha fale anga-maheni naʻe ʻi ai hono ʻato lelei, holisi pea ʻi ai mo ha matapā naʻe lava ke tāpuniʻi malu. ʻE lava ke malu pehē ha tēniti mei he kau kaihaʻá? Pe mei he fanga laioné, lēpatí, peá, mo e fanga ulofí—ʻa ia naʻe lahi ʻi he ngaahi fonua ʻi he Tohi Tapú ʻi he taimi ko iá?

Pea fēfē ʻa e fāmilí? Ko hai ʻe mavahe mei ai ʻa Selá? Ko e fekau ʻa e ʻOtuá ke “ʻalu atu mei ho fonuá pea mavahe mei ho ngaahi kāingá” ʻa e meʻa naʻe tautefito nai ʻene faingataʻa kiate iá. Ko ha fefine loto-māfana mo ʻofa ia, ʻoku pau pē nai naʻe ʻi ai hono fanga tuongaʻane mo e fanga tokoua, ngaahi fakafotu, fanga mehikitanga mo e faʻētangata ʻa ia naʻa nau vāofi ʻaupito pea heʻikai ʻaupito nai te ne toe sio kiate kinautolu. Neongo ia, naʻe hokohoko atu loto-toʻa ʻa Sela, ʻi he ʻaho ki he ʻaho, ʻo mateuteu ke ne mavahe.

Neongo ʻa e ngaahi faingataʻá, naʻe faʻo ʻe Sela ʻene ʻū meʻá pea mateuteu ke ʻalu ʻi he ʻaho naʻe ʻosi fokotuʻú. Ko Tela, ʻi hono tuʻunga ko ha pēteliake ʻi he fāmilí, naʻe pau ke ne ʻalu fakataha mo ʻĒpalahame pea mo Sela, neongo naʻá ne meimei taʻu 200 nai. (Sēnesi 11:31) ʻOku ʻikai ha veiveiua ʻe lahi ʻa e meʻa ke fai ʻe Selá ʻi hono tokangaʻi ʻa e tamai taʻumotuʻa ko ení. Ko Lote foki te ne ʻalu mo kinaua ʻi heʻenau talangofua kia Sihova pea “ʻalu atu leva mei he fonua ʻo e kau Kalitiá.”—Ngāue 7:4.

Ko e fuʻu fonongá naʻa nau ʻuluaki ʻalu ki Hālani, ʻi he maile nai ʻe 600 (kilomita ʻe 960) ki he tokelau-hihifó, ʻo fou ʻi he halanga ʻo ʻIufaletesí. Naʻe nofo ʻa e fāmilí ʻi ha taimi ʻi Hālani. Naʻe puke nai ʻa Tela ʻi he taimi ko ení, ʻo ʻikai lava ke ne fononga mamaʻo. Naʻe nofo ai pē ʻa e fāmilí ʻo aʻu ki heʻene mate ʻi hono taʻu 205. ʻI ha taimi ki muʻa ke hoko atu ʻenau fonongá, naʻe toe folofola ai ʻa Sihova kia ʻĒpalahame, ʻo tala ange kiate ia ke ne mavahe mei he fonua ko ení ʻo ʻalu ki he fonua ʻe fakahaaʻi ange ʻe Sihová. Kae kehe, ʻi he taimi ko ení, naʻe toe tānaki mai ʻe he ʻOtuá ha talaʻofa fakalotomāfana: “Te u ngaohi koe ko ha puleʻanga lahi.” (Sēnesi 12:2-4) Ka ʻi he taimi naʻa nau mavahe ai mei Hālaní, naʻe taʻu 75 ʻa ʻĒpalahame pea taʻu 65 ʻa Sela, pea ʻikai haʻana fānau. ʻE lava fēfē ke hoko mai ha puleʻanga meia ʻĒpalahame? Te ne maʻu ha toe uaifi ʻe taha? Ko e mali tokolahí ko ha tōʻonga anga-maheni ia ʻi he ngaahi ʻaho ko iá, ko ia naʻe fifili nai ʻa Sela ʻo fekauʻaki mo e meʻa ko iá.

Ko e hā pē ʻa e tuʻungá, naʻa nau mavahe mei Hālani ʻo hokohoko atu. Kae kehe, fakatokangaʻi ʻa e faʻahinga naʻe ō mo kinaua ʻi he taimi ko ení. ʻOku tala mai ʻi he fakamatalá naʻe mavahe ʻa e fāmili ʻo ʻĒpalahamé mo e fuʻu koloa naʻa nau maʻú pea pehē foki ki he “kakai naʻa nau maʻu ʻi Hālaní.” (Sēnesi 12:5) Ko hai ʻa e kakai ko iá? ʻOku mātuʻaki ngalingali ko e kau sevāniti. Kae kehe, ʻoku ʻikai ha veiveiua naʻe vahevahe ʻe ʻĒpalahame mo Sela ʻa ʻena tuí ki he faʻahinga naʻa nau loto-lelei ke fanongó. Ko ia ʻoku pehē ʻi ha toe ngaahi fakamatala motuʻa faka-Siu ko e kakai naʻe lave ki ai ʻi he veesi ko ení ko e kau ului Siu foki, ko e kakai naʻa nau kau mo ʻĒpalahame pea mo Sela ʻi he lotu kia Sihová. Kapau ko ia, ko e tui lahi ʻa Selá ʻoku ʻikai ha veiveiua naʻá ne ʻai ke mātuʻaki fakatupu tuipau ʻa ʻene lea ki he niʻihi kehé fekauʻaki mo hono ʻOtuá pea mo ʻene ʻamanakí. ʻOku ʻaonga ke tau fakakaukauloto ki he meʻa ko iá, he ʻoku tau moʻui ʻi ha taimi ʻoku siʻi ʻaupito ai ʻa e tuí mo e ʻamanakí. ʻI hoʻo ako ha meʻa lelei mei he Tohi Tapú, ʻe lava ke ke vahevahe atu ia ki ha taha?

ʻI he hili ʻenau kolosi ʻi ʻIufaletesí, ngalingali ʻi Nīsani 14, 1943 K.M., naʻa nau fou fakatonga ki he fonua naʻe talaʻofa ange ʻe Sihová. (ʻEkisoto 12:40, 41) Sioloto atu kia Sela ʻi heʻene sio takai holo, ʻo toʻoa ʻi he fakaʻofoʻofa, mo e kehekehe, mo e ʻea lelei ʻo e fonuá. Naʻe toe hā ʻa Sihova kia ʻĒpalahame ofi ki he ʻuluʻakau ʻo Molé, ofi ki Sīkemi, ʻo ne folofola ange ʻi he taimi ko ení: “Te u ʻoatu ʻa e fonuá ni ki ho hakó.” ʻĀua, ko e foʻi leá ni, ʻa e “hakó,” naʻe mohu ʻuhinga ia kia ʻĒpalahame! Naʻá ne ʻai moʻoni ia ke foki ʻene fakakaukaú ki he ngoue ʻo ʻĪtení, ʻa ia naʻe tomuʻa tala ai ʻe Sihova ko ha hako ʻe ʻi ai ʻa e ʻaho te ne fakaʻauha ai ʻa Sētane. Naʻe ʻosi tala ʻe Sihova kia ʻĒpalahame ko e puleʻanga ʻe haʻu meiate iá te ne fakaʻatā ʻa e hala ki he ngaahi tāpuaki ki he kakai ʻo e māmaní kotoa.​—Sēnesi 3:15; 12:2, 3, 6, 7.

Neongo ia, naʻe ʻikai ke hao ʻa e fāmilí mei he ngaahi faingataʻa ʻo e māmani ko ení. Naʻe taaʻi ʻe ha honge ʻa e fonua ko Kēnaní, pea naʻe fili ai ʻa ʻĒpalahame ke taki hono fāmilí ki he tongá ki ʻIsipite. Kae kehe, naʻá ne ongoʻi ha fakatuʻutāmaki makehe ʻi he feituʻu ko iá. Ko ia naʻá ne tala ange kia Sela: “Kātaki muʻa ʻo fanongo mai! ʻOku ou ʻilo ko ha fefine hoihoifua koe. Ko ia ʻi he taimi ʻe sio atu ai ʻa e kau ʻIsipité kiate koé, ko e moʻoni te nau pehē, ‘Ko hono uaifí eni.’ Pea te nau tāmateʻi leva au ka nau tuku koe ke ke moʻui. Kātaki muʻa ʻo pehē ange ko koé ko hoku tuofefine, ke u lakalakaimonū ai koeʻuhí ko koe, pea ʻe fakahaofi ai ʻa ʻeku moʻuí.” (Sēnesi 12:10-13) Ko e hā naʻe fai ai ʻe ʻĒpalahame ha kole anga-kehe peheé?

Ko ʻĒpalahamé naʻe ʻikai ko ha tokotaha loi ia pe kete kovi, ʻo hangē ko e tukuakiʻi kuo fai ʻe he kau fakaanga ʻe niʻihi. Ko hono moʻoní, ko Selá ko hono tuofefine tamai-taha. Pea naʻe makatuʻunga lelei ʻa e hohaʻa ʻa ʻĒpalahamé. Naʻe ʻiloʻi ʻe ʻĒpalahame mo Sela naʻe ʻikai ha meʻa ʻe mahuʻinga ange ʻi he taumuʻa ʻa e ʻOtuá ke fanauʻi ha hako makehe mo ha puleʻanga fakafou ʻia ʻĒpalahame, ko ia naʻe hoko ai ʻo mahuʻinga lahi ʻa e tuʻunga malu ʻo ʻĒpalahamé. Ko e taha, kuo fakahaaʻi ʻi he fakamoʻoni ʻi he keli fakatotoló naʻe ʻikai ko ha meʻa foʻou ʻa hono faʻao fakamālohi ʻe he kau tangata maʻu mafai ʻi ʻIsipité ha uaifi ʻo ha tangata pea tāmateʻi ʻa e husepānití. Ko ia naʻe fai fakapotopoto ʻa ʻĒpalahame, pea naʻe ngāue fāitaha ʻa Sela mo ʻene filí ʻi he anga-fakatōkilalo.

ʻIkai fuoloa, naʻe fakamoʻoniʻi ʻi he meʻa naʻe hokó ʻa e makatuʻunga lelei ʻo e manavahē ʻa ʻĒpalahamé; naʻe fakatokangaʻi ʻe he niʻihi ʻo e kau māʻolunga ʻa Feló ʻa e hoihoifua makehe ʻa Selá—ko ha tuʻunga naʻe taau ke fakatokangaʻi ʻi hono taʻumotuʻá. Naʻa nau fakahā ia kia Felo, pea naʻá ne tuʻutuʻuni ke ʻoange ʻa e fefiné! Ko e meʻa faingataʻa ke sioloto atu ki he mamahi ʻa ʻĒpalahamé pe ko e manavahē kuo pau naʻe hoko kia Selá. Kae kehe, ʻoku hā ngali naʻe tōʻongafai kiate ia, ʻo ʻikai ko ha pōpula, ka ko ha fakaafe lāngilangiʻia. Mahalo pē naʻe palani ʻa Felo ke tohoakiʻi ʻene manakó mo ʻai ke maongo kiate ia ʻene koloá pea toki fokotuʻutuʻu leva mo hono “tuongaʻané” ke ne maʻu ia ko hono uaifi.—Sēnesi 12:14-16.

Fakakaukau atu kia Sela, ʻokú ne sio atu ki he vahefonua ʻo ʻIsipité mei ha matapā sioʻata pe ko ha fakafaletolo ʻo e palasí. Naʻe anga-fēfē ʻene ongoʻí, ʻi heʻene toe nofo ʻi loto ʻi ha fale ʻoku holisi, mo ha ʻato mei ʻolunga, mo e meʻakai lelei naʻe tuku ʻi muʻa ʻiate iá? Naʻe fakataueleʻi ia ʻe he moʻui tuʻumālié—ʻe ha moʻui nai naʻe toe tuʻumālie ange ia ʻi ha meʻa pē naʻá ne ʻiloʻi ʻi ʻUa? Fakaʻuta atu ki he fiefia naʻe mei hoko kia Sētané kapau naʻe feinga ʻa Sela ke liʻaki ʻa ʻĒpalahame pea hoko ko e uaifi ʻo e Felo ko ení! Ka naʻe halaʻatā ke fai ʻe Sela ha meʻa pehē. Naʻá ne mateaki ki hono husepānití, ki heʻene nofo malí, pea ki hono ʻOtuá. Pehē ange mai ke fakahāhā ʻe he tokotaha mali kotoa pē ʻi he māmani ʻulungaanga taʻetaau ʻo e ʻaho ní ha mateaki pehē! ʻE lava ke ke faʻifaʻitaki ki he mateaki ʻa Selá ʻi hoʻo feangainga mo ho ʻofaʻangá mo e ngaahi kaumeʻá?

Naʻe kau mai ʻa Sihova ʻo ne maluʻi ʻa e fefine ʻofeina ko ení, ʻo ne tuku atu ha mala kia Felo mo hono falé. ʻI he ʻiloʻi ʻe Felo ko Selá ko e uaifi ʻo ʻĒpalahamé, naʻá ne fakafoki ia ki hono husepānití pea kole ki he fāmilí kotoa ke nau mavahe mei ʻIsipite. (Sēnesi 12:17-20) He fiefia ē ko ʻĒpalahame ʻi heʻene toe maʻu ʻa hono uaifi ʻofeiná! Manatuʻi naʻá ne tala ange kiate ia ʻi he anga-ʻofa: “ʻOku ou ʻilo ko ha fefine hoihoifua koe.” Ka naʻá ne ʻiloʻi ha toe hoihoifua ʻe taha ʻia Sela naʻe laka mamaʻo ange ia—ko ha hoihoifua naʻe mahuʻinga ange ia ʻi he fōtungá pē. Naʻe hoihoifua moʻoni ʻa Sela ʻi loto, ko e hoihoifua ia ʻoku fakamahuʻingaʻi ʻe Sihová. (1 Pita 3:1-5) Ko ha faʻahinga hoihoifua ia te tau lava kotoa ʻo fakatupulekina. Kapau te tau fakamuʻomuʻa ʻa e ngaahi meʻa fakalaumālié ʻi he ngaahi meʻa fakamatelié, feinga ke vahevahe atu ʻetau ʻiloʻi ʻo e ʻOtuá ki he niʻihi kehé, pea pouaki mateaki ʻa e ngaahi tuʻunga fakaeʻulungaanga ʻa e ʻOtuá ʻi he fehangahangai mo e ngaahi ʻahiʻahí, te tau faʻifaʻitaki ai ki he tui ʻa Selá.