Ko e Hā ʻa e Meʻaʻofa Lelei Tahá?

“Ko e meʻaʻofa lelei kotoa pē mo e foaki haohaoa kotoa pē ʻoku mei ʻolunga ia, ʻoku ʻalu hifo ia mei he Tamai ʻo e ngaahi maama fakalangí.” (Sēmisi 1:17) Ko hono moʻoní, ʻoku fakahaaʻi mai ʻe he konga Tohi Tapu ko iá ʻa e nima-homo ʻetau Tamai fakahēvaní, ʻa Sihova ko e ʻOtuá. Neongo ʻa e ngaahi meʻaʻofa lahi kuo foaki ʻe he ʻOtuá ki he faʻahinga ʻo e tangatá, ʻoku ʻi ai ʻa e meʻaʻofa ʻoku lahi ange ia ʻi he kotoa ʻo e toengá. Ko e hā ia? Ko e lea ʻiloa ʻa Sīsū, ʻoku hiki ʻi he Sione 3:16, ʻokú ne tala mai: “Naʻe ʻofa lahi ʻaupito ʻa e ʻOtuá ki he māmaní ʻo ne foaki ai hono ʻAlo tofu-pē-taha-ne-fakatupú, koeʻuhi ko e tokotaha kotoa pē ʻokú ne ngāueʻi ʻa e tui kiate iá ke ʻoua naʻa ʻauha ka ne maʻu ʻa e moʻui taʻengatá.”

Ko e meʻaʻofa ko e ʻAlo tofu-pē-taha-ne-fakatupu ʻo e ʻOtuá—ʻe hoko ia ko e meʻaʻofa lahi taha kuo faifai ange pea maʻu ʻe ha taha, he ʻe fakatauʻatāinaʻi ai kitautolu mei he pōpula ki he angahalá, taʻumotuʻá, mo e maté. (Saame 51:5; Sione 8:34) Neongo haʻatau feinga ʻaki ʻa e lahi taha ʻetau malavá, heʻikai ʻaupito te tau lava ke fakatauʻatāinaʻi kitautolu mei he pōpula ko iá. Kae kehe, ʻi he ʻofa lahi ʻa e ʻOtuá, naʻá ne tokonaki mai ai ʻa e meʻa ʻoku fiemaʻu ke fakahoko ʻaki ʻa e fakatauʻatāina ko iá. ʻI hono foaki mai hono ʻAlo tofu-pē-taha-ne-fakatupú, ʻa Sīsū Kalaisi, ke hoko ko e huhuʻí, naʻe foaki ai ʻe Sihova ko e ʻOtuá ki he faʻahinga talangofua ʻo e tangatá ʻa e ʻamanaki ko e moʻui taʻengata. Ka ko e hā koā ʻa e huhuʻí? Ko e hā ʻoku fiemaʻu aí? Pea ʻe lava fēfē ke tau maʻu ʻaonga mei ai?

Ko e huhuʻí ko ha mahuʻinga ʻoku totongi ke fakafoki mai ʻaki ha meʻa naʻe mole pe ke faiʻaki ha fakatauʻatāina mei ha pōpula. ʻOku fakamatalaʻi ʻe he Tohi Tapú ko ʻetau ʻuluaki ongo mātuʻá, ʻa ʻĀtama mo ʻIvi, naʻe fakatupu kinaua ʻo ʻikai ha angahala, fakataha mo e ʻamanaki ko e moʻui fiefia ʻo taʻengata ʻi ha māmani palataisi mo e fānau te na ʻomai ʻamuí. (Sēnesi 1:26-28) Meʻa pango, naʻá na fakamoleki kotoa ia ʻaki ʻena fili ke talangataʻa ki he ʻOtuá—ʻo na hoko ai ko e ongo angahala. Ko e hā ʻa e olá? ʻOku tali ʻe he Tohi Tapú: “Ko e fou mai ʻi he tangata ʻe toko taha ʻa e hoko mai ʻa e angahalá ki he māmaní pea mo e maté fakafou ʻi he angahalá, pea ʻoku pehē ʻa e mafola ʻa e maté ki he kakai kotoa pē koeʻuhi kuo nau angahala kotoa pē.” (Loma 5:12) ʻI he ʻikai ʻomi ʻe ʻĀtama ʻa e moʻui haohaoá ki heʻene fānaú, naʻá ne ʻomai ʻa e angahalá mo hono nunuʻá, ʻa e maté.

ʻI ha huhuʻi, ko e meʻa ke totongí kuo pau ke tatau ia mo e meʻa naʻe molé. ʻI he talangataʻa loto-lelei ʻa ʻĀtama ki he ʻOtuá, naʻá ne angahala ai, pea ko hono olá ko e mole ʻa e moʻui haohaoa fakaetangatá​—ʻa e moʻui ʻa ʻĀtamá. Fakatatau ki he Tohi Tapú, naʻe hoko ai ʻa e fānau ʻa ʻĀtamá ʻo pōpula ki he angahalá mo e maté. Ko ia, naʻe fiemaʻu ke ʻoatu ha toe moʻui haohaoa fakaetangata ʻe taha​—ko e moʻui ʻa Sīsuú—​ke foaki ko ha huhuʻi kae lava ke tauʻatāina mei he pōpulá. (Loma 5:19; ʻEfesō 1:7) Koeʻuhi pē ko e totongi anga-ʻofa ʻe he ʻOtuá ʻa e huhuʻi ko ení kuo maʻu ai ʻe he faʻahinga ʻo e tangatá ʻa e ʻamanaki ko hono maʻu ʻa e meʻa naʻe fakamoleki ʻe ʻĀtama mo ʻIví​—ʻa e moʻui taʻengata ʻi ha māmani palataisí.​—Fakahā 21:3-5.

Koeʻuhi ko e meʻa kuo fakahoko aí, ʻoku ʻikai ha veiveiua ko e meʻaʻofa ʻa e ʻOtuá ko e huhuʻí, ʻa ia ʻokú ne ʻai ke malava ʻa e moʻui taʻengatá, ko e meʻaʻofa lahi tahá ia. Ke fakahoungaʻi ʻa e “foaki haohaoa” ko iá, tau sio ki he anga hono fakalato ʻe he meʻa ko iá ʻi ha founga fakaofo ʻa e ngaahi moʻoniʻi meʻa ʻokú ne tokoniʻi kitautolu ke tau fakamahuʻingaʻi ha meʻaʻofá, hangē ko ia naʻe lāulea ki ai ʻi he kupu ki muʻá.

Fakatōliʻa hotau lotó. Ko kitautolu faʻahinga ʻo e tangatá ʻoku tau mātuʻaki loto ke tau moʻui atu ai pē. (Tangata Malanga 3:11) Neongo ʻoku ʻikai malava ke tau fakatōliʻa hotau loto ko iá ʻiate kitautolu pē, ʻoku ʻai ʻe he huhuʻí ke tau malava ʻo fai ia. ʻOku pehē ʻe he Tohi Tapú: “He ko e totongi ki he angahalá ko e mate, ka ko e meʻaʻofa ʻoku foaki ʻe he ʻOtuá ko e moʻui taʻengata ʻia Kalaisi Sīsū ko hotau ʻEikí.”​—Loma 6:23.

Fakalato ʻetau fiemaʻu paú. Naʻe ʻikai malava ʻe he faʻahinga ʻo e tangatá ʻo tokonaki mai ʻa e huhuʻí. ʻOku fakamatalaʻi ʻe he Tohi Tapú: “Ko e totongi huhuʻi ki heʻenau moʻuí ʻoku mātuʻaki mahuʻinga ʻa ia ʻoku mahulu atu maʻu pē ia ʻi heʻenau malavá.” (Saame 49:8) Ko ia ai, naʻe mātuʻaki fiemaʻu pau kiate kitautolu ʻa e tokoni ʻa e ʻOtuá koeʻuhi kae fakatauʻatāinaʻi kitautolu mei he pōpula ki he angahalá mo e maté. Kae “fakafou ʻi he fakatauʻatāina kuo fai ʻe he huhuʻi naʻe totongi ʻe Kalaisi Sīsuú,” kuo tokonaki mai ai ʻe he ʻOtuá ʻa e meʻa tofu pē ko ia ʻoku fiemaʻú.​—Loma 3:23, 24.

ʻOku taimi tonu. ʻOku tala mai ʻe he Tohi Tapú: “Naʻe pekia ʻa Kalaisi maʻatautolu lolotonga ʻetau kei hoko ko e kau angahalá.” (Loma 5:8) Koeʻuhi naʻe foaki mai ia “lolotonga ʻetau kei hoko ko e kau angahalá,” ʻoku fakapapauʻi mai ai ʻe he huhuʻí ʻa e loloto ʻo e ʻofa ʻa e ʻOtuá ʻiate kitautolú neongo hotau tuʻunga angahalaʻiá. Pea ʻoku ʻomai ai ʻa e meʻa lahi ke tau fakatuʻamelie atu ki ai, neongo kuo pau ke tau kātakiʻi ʻa e ngaahi nunuʻa ʻo e angahalá.

Fakahaaʻi ha taumuʻa lāngilangiʻia mo taʻesiokita. ʻOku fakahaaʻi mai ʻe he Tohi Tapú ʻa e meʻa naʻá ne ueʻi ʻa e ʻOtuá ke ne foaki hono ʻAló ko e huhuʻí: “Ko e meʻa ʻeni naʻe fakahaaʻi ai ʻa e ʻofa ʻa e ʻOtuá ʻi he fekauʻaki mo hotau tuʻungá, naʻe fekauʻi mai ʻe he ʻOtuá hono ʻAlo tofu-pē-taha-ne-fakatupú ki he māmaní koeʻuhi ke tau maʻu ai ʻa e moʻuí fakafou ʻiate ia. Ko e anga ʻeni ʻo e ʻofá, ʻoku ʻikai ko e pehē ne tau ʻofa ki he ʻOtuá, ka naʻá ne ʻofa ʻiate kitautolu.”​—1 Sione 4:9, 10.

ʻE lava fēfē ke ke fakahaaʻi ʻokú ke houngaʻia ʻi he meʻaʻofa lahi tahá? Manatuʻi ʻoku fakahaaʻi mai ʻe he lea ʻa Sīsū ʻi he Sione 3:16 ko e faʻahinga pē ʻoku nau “ngāueʻi ʻa e tui” kiate iá ʻe fakahaofí. Ko e tuí, fakatatau ki he Tohi Tapú ko e “tuipau ko e meʻa ʻokú ke ʻamanaki ki aí ʻe hoko moʻoni.” (Hepelū 11:1) Ke maʻu ʻa e tuipau ko iá, ʻoku mātuʻaki fiemaʻu ʻa e ʻilo totonú. ʻI he ʻuhinga ko ení, ʻoku mau fakalototoʻaʻi koe ke ke vaheʻi ha taimi ke ako ai ʻo fekauʻaki mo Sihova ko e ʻOtuá, ko e Tokotaha-Foaki ʻo e “foaki haohaoa” ko ení, pea mo e meʻa kuo pau ke ke fai ke ke maʻu ai ʻa e moʻui taʻengatá ʻa ia kuo ʻai ʻe he feilaulau ʻa Sīsuú ke ke maʻú.

ʻE lava ke ke ako ʻa e meʻá ni kotoa ʻaki hono sivisiviʻi ʻa e fakamatala Fakatohitapu ʻoku ala maʻu ʻi he ʻinitanetí ʻi he www.jw.org. ʻOku fiefia ʻa e Kau Fakamoʻoni ʻa Sihová ke tokoniʻi koe. ʻOku mau tuipau ʻi hoʻo ako mo maʻu ʻaonga mei he meʻaʻofa lahi taha ko ení, ʻe ueʻi ai koe ke ke kalanga: “Fakafetaʻi ki he ʻOtuá fakafou ʻia Sīsū Kalaisi ko hotau ʻEikí!”​—Loma 7:25.