ʻOkú Ke Maʻu ʻa e Anga ʻo e Ongoʻi ʻa Sihova ki he Fakamaau Totonú?

1, 2. (a) Ko e hā ʻa e fakamaau taʻetotonu naʻe hokosia ʻe Nēpote mo hono ngaahi fohá? (e) Ko e hā ʻa e ʻulungaanga ʻe ua te tau lāulea ki ai ʻi he kupu ko ení?

ʻOKU tukuakiʻi ʻe ha ongo tangata kovi ha tangata ki ha faihia mafatukituki ʻaupito. Ko e meʻa ʻokú na leaʻakí ko ha loi ia. Ka ʻoku halaia ʻa e tangatá pea ʻe fakapoongi ia. Sioloto atu ki he anga ʻo e ongoʻi ʻa e kakai ʻoku nau ʻofa ʻi he fakamaau totonú ʻi heʻenau vakai atu ki hono tolomakaʻi ki he mate ʻa e tangata tonuhia ko ení mo hono ngaahi fohá! ʻOku ʻikai ko ha talanoa pē eni. Ko e meʻa ia naʻe hoko moʻoni ki ha sevāniti faitōnunga ʻa Sihova ko Nēpote, ʻa ia naʻe moʻui ʻi he taimi naʻe pule ai ʻa Tuʻi ʻĒhapi ʻi ʻIsilelí.—1 Tuʻi 21:11-13; 2 Tuʻi 9:26.

² ʻI he kupu ko ení, te tau lāulea ai ki he meʻa naʻe hoko kia Nēpoté. Te tau toe lāulea ai ki he fehālaaki mafatukituki naʻe fai ʻe ha mātuʻa faitōnunga ʻi he taha ʻo e muʻaki ngaahi fakatahaʻanga Kalisitiané. Ko e ongo fakatātā ko ení te ne fakahaaʻi mai ʻa e founga ʻoku fiemaʻu ai ʻa e anga-fakatōkilaló mo ha loto-lelei ke fakamolemolé kapau ʻoku tau loto ke faʻifaʻitaki ki he anga ʻo e ongoʻi ʻa Sihova ki he fakamaau totonú.

3, 4. Ko e faʻahinga tangata fēfē ʻe Nēpote, pea ko e hā naʻá ne fakafisi ai ke fakatau atu ʻene ngoue vainé kia Tuʻi ʻĒhapí?

³ Naʻe faitōnunga ʻa Nēpote kia Sihova ʻi he taimi naʻe muimui ai ʻa e tokolahi taha ʻo e kau ʻIsilelí ki he faʻifaʻitakiʻanga kovi ʻa Tuʻi ʻĒhapi mo hono uaifí, ʻa e kuini fulikivanu ko Sisipelí. Naʻá na lotu ki he ʻotua loi ko Pēalí pea ʻikai ke na tokaʻi ʻa Sihova pe ko ʻene ngaahi laó. Ka naʻe fakamahuʻingaʻi ʻe Nēpote hono vahaʻangatae mo Sihová ʻo laka ange ia ʻi heʻene moʻuí tonu.

⁴ Lau ʻa e 1 Tuʻi 21:1-3. ʻI he fokotuʻu atu ʻe ʻĒhapi ke fakatau ʻa e ngoue vaine ʻa Nēpoté pe ke fakafetongiʻaki ha ngoue vaine ʻoku lelei angé, naʻe ʻikai ke tali ia ʻe Nēpote. Ko e hā hono ʻuhingá? Naʻá ne fakamatalaʻi anga-fakaʻapaʻapa: “Mole ke mamaʻo haʻaku foaki ʻa e tofiʻa oʻeku ngaahi kui ki he ʻafiona.” Naʻe ʻikai ke tali ʻe Nēpote ʻa e fokotuʻu ange ʻa Tuʻi ʻĒhapí koeʻuhí naʻe fepaki ia mo e lao ʻa Sihova ki he kau ʻIsilelí ke ʻoua naʻa nau fakatau ʻosi atu honau tofiʻa fakafāmilí. (Liv. 25:23; Nōm. 36:7) ʻOku hā mahino, naʻe talangofua ʻa Nēpote kia Sihova.

 5. Ko e hā naʻe fai ʻe Sisipeli koeʻuhí ke maʻu ai ʻa e ngoue vaine ʻa Nēpoté?

⁵ ʻI he ʻikai tali ʻe Nēpote ke fakatau atu ʻene ngoue vainé, naʻe fai ʻe Tuʻi ʻĒhapi mo hono uaifí ʻa e ngaahi meʻa fakalilifu. Koeʻuhi ke maʻu ʻa e ngoue vainé, naʻe kole ʻe Kuini Sisipeli ki he ongo tangata ʻe toko ua ke na tukuakiʻi ʻa Nēpote ki ha hia naʻe ʻikai ke ne fai. Ko hono olá, naʻe tāmateʻi fakatouʻosi ʻa Nēpote mo hono ngaahi fohá. Ko e hā naʻe fai ʻe Sihova ki he fakamaau taʻetotonu fakamamahi ko ení?

6, 7. Naʻe anga-fēfē hono fakahaaʻi ʻe Sihova ʻene ʻofa ʻi he fakamaau totonú, pea ko e hā ʻa e ʻuhinga naʻe fakafiemālie ai eni ki he fāmili mo e ngaahi kaungāmeʻa ʻo Nēpoté?

⁶ Naʻe fekau atu leva ʻe Sihova ʻa ʻIlaisiā ke fehangahangai mo ʻĒhapi. Naʻe tala ange ʻe ʻIlaisiā kia ʻĒhapi ko e tokotaha fakapō ia mo kaihaʻa. Ko e hā ʻa e fili ʻa Sihová? Ko ʻĒhapi, ko hono uaifí mo hono ngaahi fohá ʻe tāmateʻi, ʻo hangē pē ko ia naʻe fai kia Nēpote mo hono ngaahi fohá.—1 Tuʻi 21:17-25.

⁷ Naʻe loto-mamahi lahi ʻa e fāmili mo e ngaahi kaungāmeʻa ʻo Nēpoté ʻi he ngaahi meʻa fakalilifu naʻe fai ʻe ʻĒhapí. Ka naʻe ʻafioʻi ʻe Sihova ʻa e fakamaau taʻetotonú pea naʻá ne fakahoko ha ngāue vave ki ai. Kuo pau pē naʻe fakafiemālie ia kiate kinautolu. Kae kehe, ko ʻenau anga-fakatōkilaló mo e falala kia Sihová ʻe ʻahiʻahiʻi nai ia ʻaki ʻa e meʻa ʻe hoko maí.

 8. Naʻe anga-fēfē ʻa e fakafeangai ʻa ʻĒhapi ʻi heʻene fanongo ki he pōpoaki ʻa Sihová, pea ko e hā ʻa e olá?

⁸ ʻI he fanongo ʻa ʻĒhapi ki he meʻa naʻe pau ke fai ʻe Sihova kiate iá, “naʻa ne hae hifo hono kofu, ʻo ne ʻai tauangaʻa ki hono kakano, mo ne ʻaukai, mo ne kafu ʻaki ʻa e tauangaʻa, mo ne laka fakaʻeteʻete pe.” Naʻe fakatōkilaloʻi ʻe ʻĒhapi ʻa ia tonu! Ko e hā ʻa e olá? Naʻe folofola ʻa Sihova kia ʻIlaisiā: “Ko e meʻa ʻi heʻene fakavaivaiʻi pehe, ko ia ʻe ʻikai te u ʻomi ai ʻa e mala ʻi hono taimi oʻona, ka ʻi he taimi ʻo hono foha te u ʻomi ʻa e mala ki hono fale.” (1 Tuʻi 21:27-29; 2 Tuʻi 10:10, 11, 17) ʻI he taimi ko ení, naʻe tala ʻe ʻIlaisiā kia ʻĒhapi koeʻuhí ko ʻene anga-fakatōkilaló, ʻe ʻikai ke tauteaʻi ʻe Sihova ʻa e fāmili ʻo ʻĒhapí kae ʻoleva ke ne mate. (1 Tuʻi 21:27-29) Ko Sihova, ʻa e tokotaha “sivi loto,” ʻa e tokotaha ʻoku lava ke ne ʻafioʻi moʻoni kitautolú, naʻá ne fakahāhā ʻa e meesi kia ʻĒhapi.—Pal. 17:3.

 9. Ko e hā naʻe hoko ai ʻa e anga-fakatōkilaló ko ha maluʻi ki he fāmili mo e ngaahi kaungāmeʻa ʻo Nēpoté?

⁹ ʻI he taimi naʻe fanongo ai ʻa e fāmili mo e ngaahi kaungāmeʻa ʻo Nēpoté ki he ʻikai ke tauteaʻi ʻa e fāmili ʻo ʻĒhapí kae ʻoleva ke ne maté, naʻe ʻahiʻahiʻi nai ai ʻenau tui ki he ʻOtuá. Ka kuo pau pē naʻe tokoniʻi kinautolu ʻe he anga-fakatōkilaló ke maluʻi ʻenau tuí. Ko e hā hono ʻuhingá? Kapau naʻa nau anga-fakatōkilalo, te nau hokohoko atu ʻi he lotu kia Sihova, ʻo falala heʻikai malava ke taʻefaitotonu ʻa e ʻOtuá. (Lau ʻa e Teutalōnome 32:3, 4.) ʻI he kahaʻú, ʻe hokosia ʻe he fāmili ʻo Nēpoté ʻa e tāpuaki ʻo e sio ki he fokotuʻu mai ʻa honau ngaahi ʻofaʻanga kuo maté. ʻE ʻi ai ʻa e fakamaau totonu haohaoa kia Nēpote mo hono ngaahi fohá. (Siope 14:14, 15; Sione 5:28, 29) ʻOku ʻiloʻi ʻe ha taha anga-fakatōkilalo ʻe “ʻomi ʻe Elohimi ʻa e ngaue kotoa ki he fakamaau, kaeʻumaʻa ʻa e meʻa kotoa ʻoku fufū, pe ʻoku lelei ia pe kovi.” (Koh. 12:14) ʻOku ʻafioʻi ʻe Sihova ʻa e ngaahi moʻoniʻi meʻa ʻoku ʻikai ke tau ʻilo ki aí. Ko ia ʻoku maluʻi kitautolu ʻe he anga-fakatōkilaló mei he mole ʻetau tui kia Sihová.

10, 11. (a) Ko e hā ʻa e ngaahi tuʻunga ʻe ʻahiʻahiʻi nai ai ʻetau ongoʻi ʻo e fakamaau totonú? (e) ʻI he founga fē ʻe maluʻi ai kitautolu ʻe he anga-fakatōkilaló?

¹⁰ ʻE anga-fēfē hoʻo fakafeangaí kapau ʻoku fai ʻe he kau mātuʻá ha fili ʻoku ʻikai ke ke mahinoʻi pe ʻoku ʻikai ke ke loto-tatau mo ia? Ko e fakatātaá, ko e hā te ke faí kapau ko koe pe ko ha taha ʻokú ke ʻofa aí ʻoku mole hoʻomo vāhenga-ngāue kia Sihová? Fēfē kapau ʻoku tuʻusi ho hoa malí, ko ho fohá pe ʻofefiné, pe ko ho kaumeʻa ofí pea ʻoku ʻikai ke ke loto-tatau mo e fili ʻa e kau mātuʻá? Ko e hā te ke faí kapau ʻokú ke tui naʻe fehālaaki ʻa e kau mātuʻá ʻi heʻenau faimeesi ki ha taha kuo faiangahala? Ko e ngaahi tuʻunga ko ení ʻe lava ke ʻahiʻahiʻi ai ʻetau tui kia Sihová pea mo e founga kuó ne fokotuʻutuʻu maau ai ʻa e fakatahaʻangá ʻi he ʻahó ni. ʻE anga-fēfē hono maluʻi koe ʻe he anga-fakatōkilaló kapau ʻoku ʻahiʻahiʻi koe ʻe ha taha ʻo e ngaahi tuʻunga ko iá? Tau lāulea angé ki he founga ʻe ua.

¹¹ ʻUluakí, kapau ʻoku tau anga-fakatōkilalo, te tau loto-tatau ʻoku ʻikai ke tau maʻu kotoa ʻa e ngaahi moʻoniʻi meʻá. Neongo kapau ʻoku tau fakakaukau ʻoku tau ʻilo ʻa e meʻa kotoa fekauʻaki mo ha tuʻunga, ko Sihova pē ʻokú ne ʻafioʻi ʻa e meʻa ʻoku ʻi he loto ʻo ha taha. (1 Sām. 16:7) ʻI heʻetau manatuʻi ení, te tau ʻiloʻi ai ʻi he anga-fakatōkilalo ʻoku ʻi ai hotau ngaahi ngataʻanga pea ʻoku fiemaʻu ke tau fakatonutonu ʻetau fakakaukaú. Uá, kapau ʻoku tau fakatokangaʻi pe hokosia ha fakamaau taʻetotonu, ʻe tokoniʻi kitautolu ʻe he anga-fakatōkilaló ke tau talangofua pea kātaki ʻo tatali kia Sihova ke ne fakatonutonu ʻa e tuʻungá. ʻOku pehē ʻe he Tohi Tapú: “E hoko ae lelei kiate kinautolu oku manavahe ki he Otua.” ʻOku toe pehē ʻe he Tohi Tapú: “Ka e ikai ha lelei ki he agahala, bea e ikai tologa mau ai be hono gaahi aho.” (Koh. 8:12, 13, PM) Kapau te tau hanganaki anga-fakatōkilalo, ʻe ʻaonga ia kiate kitautolu pea pehē ki he tokotaha kotoa ʻoku kaunga ki aí.—Lau ʻa e 1 Pita 5:5.

12. Ko e hā ʻa e fakamatala te tau lāulea ki ai he taimi ní, pea ko e hā hono ʻuhingá?

¹² Naʻe hokosia ʻe he muʻaki kau Kalisitiane ʻi ʻAniteoke Sīlia ha tuʻunga naʻe ʻahiʻahiʻi ai ʻenau anga-fakatōkilaló pea pehē foki ki heʻenau loto-lelei ke fakamolemolé. Tau lāulea angé ki he fakamatala ko iá pea ngāueʻaki ia ke sivisiviʻi ʻa e anga ʻetau fakakaukau fekauʻaki mo e fakamolemolé. ʻE toe tokoniʻi nai ai kitautolu ke tau mahinoʻi ʻa e ʻuhinga ʻoku ngāueʻaki ai ʻe Sihova ʻa e kakai taʻehaohaoá ʻo ʻikai fakavaivaiʻi ai ʻene ngaahi tuʻungá.

13, 14. Ko e hā ʻa e vāhenga-ngāue naʻe maʻu ʻe he ʻapositolo ko Pitá, pea naʻe anga-fēfē ʻene fakahāhā ʻa e loto-toʻá?

¹³ Naʻe hoko ʻa e ʻapositolo ko Pitá ko ha mātuʻa pea naʻe ʻiloʻi lelei ia ʻe he tokolahi taha ʻo e muʻaki kau Kalisitiané. Ko e kaumeʻa fafale ia ʻo Sīsū pea naʻe ʻoange kiate ia ha ngāue mahuʻinga. (Māt. 16:19) Ko e fakatātaá, ʻi he taʻu 36, naʻe vaheʻi ai ʻa Pita ke ne malanga kia Koliniusi mo e tokotaha kotoa ʻi hono falé. Ko e hā naʻe makehe ai ení? Koeʻuhí naʻe ʻikai ko ha Siu ʻa Koliniusi; ko ha Senitaile taʻekamu ia. ʻI he taimi naʻe maʻu ai ʻe Koliniusi mo hono falé ʻa e laumālie māʻoniʻoní, naʻe ʻiloʻi ʻe Pita ʻe malava ke nau papitaiso ko e kau Kalisitiane. Naʻá ne pehē: “ʻE taʻofi koā ʻe ha taha ʻa e vaí ke ʻoua naʻa papitaiso ʻa kinautolú ni ʻa ia kuo nau maʻu ʻa e laumālie māʻoniʻoní ʻo hangē ko ia kuo tau maʻú?”—Ngā. 10:47.

¹⁴ ʻI he taʻu 49, ko e kau ʻapositoló mo e kau mātuʻa ʻi Selusalemá naʻa nau fakataha ke fili pe ʻe fiemaʻu ke kamu ʻa e kau Kalisitiane Senitailé. ʻI he fakataha ko ení, naʻe fakamanatu loto-toʻa ange ʻe Pita ki he fanga tokouá naʻá ne siotonu ki hono maʻu ʻe he kau Senitaile taʻekamú ʻa e laumālie māʻoniʻoní. Ko e hokosia ʻa Pitá naʻe tokoni ia ki he kulupu pulé ki hono fai ʻenau filí. (Ngā. 15:6-11, 13, 14, 28, 29) Kuo pau pē naʻe houngaʻia ʻa e kau Kalisitiane Siú mo e kau Kalisitiane Senitailé ʻi he loto-toʻa ʻa Pita ʻo fakamatalaʻi ʻa e ngaahi moʻoniʻi meʻá. Kuo pau pē naʻe faingofua ki he muʻaki kau Kalisitiane ko iá ke falala ki he tangata faitōnunga mo matuʻotuʻa ko ení.

15. Ko e hā ʻa e fehālaaki naʻe fai ʻe Pita lolotonga ʻa ʻene ʻi ʻAniteoke Sīlia? (Sio ki he ʻuluaki fakatātā ʻi he kupú ni.)

¹⁵ Hili pē ʻa e fakataha ʻi Selusalemá, naʻe ʻaʻahi ʻa Pita ki ʻAniteoke Sīlia. Lolotonga ʻene ʻi aí, naʻá ne fakamoleki ʻa e taimi mo hono fanga tokoua Senitailé. ʻE lava ke tau sioloto atu ki he lahi ʻo e meʻa naʻa nau ako mei he ʻilo mo e hokosia ʻa Pitá. Kae kehe, kuo pau pē naʻa nau ʻohovale mo loto-mamahi ʻi he taimi naʻe taʻofi fakafokifā ai ʻe Pita ʻene kai mo kinautolú. Naʻe tākiekina ʻe Pita ʻa e kau Kalisitiane Siú, kau ai ʻa Panepasa, ke nau fai ʻa e meʻa tatau. Ko e hā naʻe fai ai ʻe he mātuʻa Kalisitiane matuʻotuʻa ko ení ha fehālaaki mafatukitukí, ʻa e fehālaaki ʻe lava ke ne fakamavahevaheʻi ʻa e fakatahaʻangá? Ko e meʻa mahuʻinga tahá, ʻe lava ke tau ako mei he fehālaaki ʻa Pitá ʻa ia ʻe lava ke ne tokoniʻi kitautolu kapau te tau loto-mamahi ʻi ha lea pe tōʻonga ʻa ha mātuʻa?

16. Naʻe anga-fēfē hono fakatonutonu ʻa Pitá, pea ko e hā ʻa e ngaahi fehuʻi ʻoku malanga hake aí?

¹⁶ Lau ʻa e Kalētia 2:11-14. Naʻe manavahē tangata ʻa Pita. (Pal. 29:25) Naʻe ʻiloʻi ʻe Pita ʻa e lahi ʻo e ongoʻi ʻa Sihova ki he kau Senitailé. Neongo ia, naʻá ne manavasiʻi naʻa siolalo ange kiate ia ʻa e kau Kalisitiane Siu kamu naʻe ʻaʻahi mei Selusalemá koeʻuhí ko ʻene feohi mo e kau Kalisitiane Senitaile ko iá. Naʻe tala ange ʻe he ʻapositolo ko Paulá kia Pita naʻá ne mālualoi. Ko e hā hono ʻuhingá? Koeʻuhí naʻe fanongo ʻa Paula naʻe taukapoʻi ʻe Pita ʻa e kau Senitailé ʻi he fakataha ʻi Selusalema ʻi he taʻu 49. (Ngā. 15:12; Kal. 2:13) Naʻe anga-fēfē ʻa e fakafeangai ʻa e kau Kalisitiane Senitaile ko ia naʻe fakalotomamahiʻi ʻe Pitá? Te nau fakaʻatā ke nau tūkia ai? ʻE mole meia Pita ʻene ngāué koeʻuhí ko ʻene fehālākí?

17. Naʻe anga-fēfē ʻa e maʻu ʻaonga ʻa Pita mei he fakamolemole ʻa Sihová?

¹⁷ Naʻe anga-fakatōkilalo ʻa Pita ʻo tali ʻa e fakatonutonu ʻa Paulá. ʻOku ʻikai ke pehē ʻe he Folofolá naʻe mole meia Pita ha taha ʻo hono ngaahi vāhenga-ngāué. Ko e moʻoni, naʻe fakamānavaʻi ia ki mui ai ke ne hiki ʻa e tohi ʻe ua naʻe hoko ko e konga ʻo e Tohi Tapú. ʻI heʻene tohi hono uá, naʻe aʻu ʻo ne lave ai kia Paula ko “hotau tokoua ʻofeina.” (2 Pita 3:15) Ko e fehālaaki ʻa Pitá kuo pau pē naʻe fakamamahi ki he kau Kalisitiane Senitailé. Kae kehe, ko Sīsū ʻa e ʻulu ʻo e fakatahaʻangá, naʻá ne hokohoko atu hono ngāueʻaki iá. (ʻEf. 1:22) Ko e fanga tokoua mo e fanga tuofāfine ʻi he fakatahaʻangá naʻa nau maʻu ha faingamālie ke faʻifaʻitaki ai kia Sīsū mo ʻene Tamaí ʻaki ʻenau fakamolemoleʻi ʻa Pita. ʻOfa pē ʻoku ʻikai ke fakaʻatā ʻe ha taha ʻa ia tonu ke ne tūkia ʻi ha fehālaaki ʻa ha tangata taʻehaohaoa.

18. Ko fē ʻa e taimi ʻoku fiemaʻu ai ke tau faʻifaʻitaki ki he ongoʻi ʻa Sihova ki he fakamaau totonú?

¹⁸ Naʻe ʻikai ha kau mātuʻa haohaoa ʻi he muʻaki fakatahaʻanga Kalisitiané, pea ʻoku ʻikai ha kau mātuʻa haohaoa ʻi he fakatahaʻanga Kalisitiané ʻi he ʻahó ni. ʻOku pehē ʻe he Tohi Tapú: “ʻOku tau fai ʻa e ngaahi fehālaaki kotoa pē ʻo tā-tuʻo-lahi.” (Sēm. 3:2, fakamatala ʻi lalo) ʻOku faingofua hono ʻiloʻi ení, ka ko e hā te tau fai ʻi he taimi ʻoku tau fehangahangai tonu ai mo e ngaahi taʻehaohaoa ʻa ha tokoua? Te tau faʻifaʻitaki ki he ongoʻi ʻa Sihova ki he fakamaau totonú? Ko e fakatātaá, ʻe anga-fēfē hoʻo fakafeangaí kapau ʻoku fai ʻe ha mātuʻa ha fakamatala ʻoku hā ngali ko ha tomuʻa fehiʻa? Te ke tūkia kapau ʻoku leaʻaki taʻefakakaukauʻi ʻe ha mātuʻa ha meʻa ʻoku fakalotomamahiʻi ai koe? ʻI he ʻikai ke fakakaukau leva ʻo pehē ʻoku totonu ke ʻoua ʻe hoko ʻa e tokouá ko ha mātuʻa, te ke tatali anga-kātaki kia Sīsū, ʻa e ʻulu ʻo e fakatahaʻangá? ʻI he ʻikai ke tokangataha ki he fehālākí, te ke manatu ki he taʻu lahi ʻo e ngāue faitōnunga ʻa e tokouá? Kapau ʻoku faiangahala atu kiate koe ha tokoua kae kei hokohoko atu pē ko ha mātuʻa pe naʻa mo ʻene maʻu ha vāhenga-ngāue lahi ange, te ke fiefia ai? Kapau te ke loto-lelei ke fakamolemoleʻi ia, ʻe hā mei ai ʻokú ke faʻifaʻitaki ki he ongoʻi ʻa Sihova ki he fakamaau totonú.—Lau ʻa e Mātiu 6:14, 15.

19. Ko e hā ʻoku totonu ke tau fakapapauʻi ke faí?

¹⁹ Koeʻuhí ko ʻetau ʻofa ʻi he fakamaau totonú, ʻoku tau fakatuʻotuʻa moʻoni atu ki he ʻaho ʻa ia ʻe toʻo ʻosi atu ai ʻe Sihova ʻa e kotoa ʻo e fakamaau taʻetotonu naʻe fakatupunga ʻe Sētane mo ʻene fokotuʻutuʻu fulikivanú. (ʻAi. 65:17) Ki muʻa ke toki aʻu ki aí, ʻi he taimi ʻoku tau hokosia ai ha fakamaau taʻetotonu, tau anga-fakatōkilalo ʻo ʻiloʻi ʻoku ʻikai nai ke tau maʻu ʻa e kotoa ʻo e ngaahi moʻoniʻi meʻá pea fakamolemoleʻi loto-lelei ʻa e faʻahinga ʻoku faiangahala mai kiate kitautolú. Kapau te tau fai ia, te tau faʻifaʻitaki ai ki he ongoʻi ʻa Sihova ki he fakamaau totonú.