Papitaisó​—Ko ha Fiemaʻu ki he Kau Kalisitiané

1, 2. (a) ʻOku fēfē ʻa e ongoʻi ʻa e mātuʻa ʻe niʻihi ʻi he loto ʻenau kiʻi tamá ke papitaisó? (e) Ko e hā ʻoku ʻeke ai ki he faʻahinga ʻoku nau loto ke papitaisó pe kuo nau fakatapui kia Sihová? (Sio ki he ʻuluaki fakatātā ʻi he kupú ni.)

NAʻE siofi ʻe he ongo mātuʻa ʻa Maria ʻa e tuʻu hake ʻa hona kiʻi ʻofefiné fakataha mo e niʻihi kehe naʻa nau loto ke papitaisó. Naʻe ʻeke ʻe he tokotaha-malangá ʻa e ongo foʻi fehuʻi ʻe ua. Naʻe tali ki ai ʻa Maria ʻi ha leʻo-lahi mo mahino. ʻI he hili pē iá, naʻá ne papitaiso.

² Naʻe mātuʻaki laukauʻaki ʻe he ongo mātuʻa ʻa Maria ʻa hona ʻofefiné ʻi heʻene fakatapui ʻa ʻene moʻuí kia Sihova peá ne papitaisó. Ka ki muʻa aí, naʻe kiʻi hohaʻa ʻa e faʻē ʻa Maria. Naʻá ne fifili: ‘ʻOku fuʻu kei siʻi ʻa Maria ke papitaiso? ʻOkú ne mahinoʻi moʻoni ʻa e mafatukituki ʻo ʻene fakatapui kia Sihová? ʻOku totonu ke ne tatali ke kiʻi fuoloa ange peá ne toki papitaiso?’ ʻOku ʻeke hifo ʻe he ngaahi mātuʻa anga-ʻofa tokolahi kiate kinautolu ʻa e ngaahi fehuʻi meimei tatau ʻi he tala ange ʻe heʻenau kiʻi tamá ʻokú ne loto ke papitaisó. (Tml. 5:5) He ko ē, ko e fili mahuʻinga taha ʻe lava ke fai ʻe ha tahá ko e fakatapui ʻene moʻuí kia Sihova pea papitaiso.​—Sio ki he puha “Kuó Ke Fakatapui kia Sihova?”

3, 4. (a) ʻOku anga-fēfē hono akoʻi mai ʻe he ʻapositolo ko Pitá ʻoku mahuʻinga ʻaupito ʻa e papitaisó? (e) Ko e hā naʻe fakahoa ai ʻe Pita ʻa e papitaisó ki hono langa ʻe Noa ʻa e ʻaʻaké?

³ Naʻe fakahoa ʻe he ʻapositolo ko Pitá ʻa e papitaisó ki hono langa ʻe Noa ʻa e ʻaʻaké. Naʻá ne pehē: “Ko e papitaisó, ʻa ia ʻoku fehoanaki mo e meʻá ni, ʻokú ne toe fakahaofi foki kimoutolu he taimí ni.” (Lau ʻa e 1 Pita 3:20, 21.) Naʻe ʻoange ʻe he ʻaʻaké ʻa e fakamoʻoni māʻalaʻala ki he niʻihi kehé naʻe loto ʻaufuatō ʻa Noa ke ne fai ʻa e finangalo ʻo e ʻOtuá. Naʻe fakahoko faitōnunga ʻe Noa ʻa e ngāue naʻe ʻoange ʻe Sihova ke ne faí. Koeʻuhi ko e tui ʻa Noá, naʻe fakahaofi ai ia ʻe Sihova mo hono fāmilí lolotonga ʻa e Lōmakí. Ko e hā naʻe feinga ʻa Pita ke ne akoʻi mai kiate kitautolú?

⁴ ʻI he sio ʻa e kakaí ki he ʻaʻaké, naʻa nau ʻilo naʻe tui ʻa Noa ki he ʻOtuá. ʻI he sio ʻa e kakaí ki ha taha ʻoku papitaisó, ʻoku nau ʻiloʻi kuó ne fakatapui ʻene moʻuí ki he ʻOtuá koeʻuhi ko ʻene tui ki he toetuʻu ʻa Kalaisí. ʻI he hangē ko Noá, ko e faʻahinga ʻoku papitaisó ʻoku nau talangofua ki he ʻOtuá pea fai ʻa e ngāue kuó ne ʻoange kiate kinautolu ke nau faí. Pea hangē tofu pē ko hono fakahaofi ʻe Sihova ʻa Noa lolotonga ʻa e Lōmakí, te ne fakahaofi ʻa ʻene kau sevāniti mateaki ʻosi papitaisó ʻi heʻene fakaʻauha ʻa e māmani fulikivanu ko ení. (Mk. 13:10; Fkh. 7:9, 10) ʻOku hā mahino, ʻoku mahuʻinga ʻaupito ke tau fakatapui ʻetau moʻuí kia Sihova pea papitaiso. Ko hono moʻoní, kapau ʻoku tautoloi ʻe ha taha ʻa ʻene papitaisó, ʻe lava ke mole ai meiate ia ʻa e faingamālie ke moʻui taʻengatá.

 5. Ko e hā te tau ako ʻi he kupu ko ení?

⁵ ʻI heʻetau ʻilo ko eni ʻa e mafatukituki ʻo e papitaisó, ʻoku fiemaʻu ke tau ʻilo ʻa e tali ki he fehuʻi ʻe tolu ko ení: Ko e hā ʻa e lau ʻa e Tohi Tapú fekauʻaki mo e papitaisó? Ko e hā kuo pau ke fai ʻe ha taha ki muʻa ke lava ʻo ne papitaisó? Ko e hā ʻoku totonu ai ke tau manatuʻi maʻu pē ʻa e mahuʻinga ʻo e papitaisó ʻi he taimi ʻoku tau akoʻi ai ʻetau fānaú pe ko ha tokotaha ako Tohi Tapu?

6, 7. (a) Ko e hā ʻa e ʻuhinga ʻo e papitaiso naʻe fai ʻe Sioné? (e) Ko e papitaiso ʻo hai naʻe kehe mei he papitaiso kotoa pē, pea ko e hā hono ʻuhingá?

⁶ ʻI he Tohi Tapú ko e fuofua tokotaha ʻoku tau lau naʻá ne papitaiso ʻa e niʻihi kehé ko Sione Papitaiso. (Māt. 3:1-6) Ko e hā naʻe haʻu ai ʻa e kakaí kiate ia ke papitaisó? Naʻa nau fai iá ke fakahaaʻi naʻa nau fakatomala ʻi heʻenau angahalá, ʻa ia, naʻa nau fakamoʻoniʻi naʻa nau talangataʻa ki he Lao ʻa Mōsesé pea naʻa nau mātuʻaki fakaʻiseʻisa. Ka ko e papitaiso mahuʻinga taha naʻe fakahoko ʻe Sioné naʻe ʻi ai hono ʻuhinga kehe fakaʻaufuli. Naʻe maʻu ʻe Sione ʻa e lāngilangi lahi ʻi heʻene papitaiso ʻa Sīsū, ko e ʻAlo haohaoa ʻo e ʻOtuá. (Māt. 3:13-17) Naʻe ʻikai ʻaupito ha angahala ʻa Sīsū. Naʻe ʻikai fiemaʻu ke ne fakatomala. (1 Pita 2:22) Ko ia ko e hā naʻe papitaiso ai ʻa Sīsuú? Ke fakahaaʻi naʻá ne mateuteu ke ngāueʻaki ʻene moʻuí ki hono fai ʻa e finangalo ʻo e ʻOtuá.​—Hep. 10:7.

⁷ Hili ʻa e kamata ke malanga ʻa Sīsuú, naʻe kamata ke papitaiso ʻe heʻene kau ākongá ʻa e niʻihi kehé. (Sione 3:22; 4:1, 2) Naʻe toe papitaiso ʻa e kakai ko iá he naʻa nau fakatomala ʻi heʻenau angahala fekauʻaki mo e Lao ʻa Mōsesé. Ka ʻi he hili ʻa e pekia mo e toetuʻu ʻa Sīsuú, ko e faʻahinga naʻa nau loto ke hoko ko ʻene kau ākongá kuo pau ke nau papitaiso ʻi ha ʻuhinga kehe.

 8. (a) Ko e hā ʻa e fekau naʻe ʻomai ʻe Sīsū hili ʻene toetuʻú? (e) Ko e hā ʻoku fiemaʻu ai ke papitaiso ʻa e kau Kalisitiané?

⁸ ʻI he taʻu 33, ʻikai fuoloa mei heʻene toetuʻú, naʻe lea ai ʻa Sīsū ki he toko 500 tupu ʻo e kakai tangata, kakai fefine, pea aʻu nai ki he fānau. Ko e taimi nai eni naʻá ne pehē ai: “Ko ia ai, mou ō ʻo ngaohi ko e kau ākonga ʻa e kakai ʻo e ngaahi puleʻanga kotoa pē, ʻo papitaiso kinautolu ʻi he huafa ʻo e Tamaí mo e ʻAló mo e laumālie māʻoniʻoní, pea akoʻi kinautolu ke nau tauhi ʻa e ngaahi meʻa kotoa pē kuó u fekau atu kiate kimoutolú.” (Māt. 28:19, 20; 1 Kol. 15:6) Naʻe fekauʻi ʻe Sīsū ʻa hono kau muimuí ke nau ngaohi-ākonga. ʻIlonga ha taha ʻoku loto ke hoko ko ʻene ākonga pe fua ʻene “ʻioké,” kuo pau ke ne papitaiso. (Māt. 11:29, 30) Ke tauhi ki he ʻOtuá ʻi he founga ʻoku fakahōifua kiate Iá, kuo pau ki ha tokotaha ke ne tali ko Sīsū ʻoku ngāueʻaki ʻe he ʻOtuá ke ne fakahoko ʻa Hono finangaló. ʻE toki lava leva ai ke papitaiso ʻa e tokotaha ko iá ʻo ne maʻu ʻa e hōifua ʻa e ʻOtuá. ʻOku ʻomai ʻe he Tohi Tapú ʻa e fakamoʻoni lahi naʻe ʻiloʻi ʻe he muʻaki kau ākonga ʻa Sīsuú ʻa e mahuʻinga ke hoko ʻo papitaisó. Naʻe ʻikai te nau fakakaukau ʻoku totonu ke nau tatali pea nau toki papitaiso ʻamui ange.​—Ngā. 2:41; 9:18; 16:14, 15, 32, 33.

9, 10. Ko e hā ʻoku lava ke tau ako fekauʻaki mo e papitaisó mei he tangata ʻItiopeá pea mo Saula?

⁹ Lau ʻa e Ngāue 8:35, 36. Ko ha tangata ʻItiopea ʻa ia naʻá ne tali ʻa e tui faka-Siú naʻá ne fononga atu ki hono ʻapí hili ʻene lotu ʻi he temipale ʻi Selusalemá. Naʻe fekauʻi atu ʻe he ʻāngelo ʻa Sihová ʻa Filipe ke ne malanga kiate ia, pea naʻe akoʻi ʻe Filipe kiate ia “ʻa e ongoongo lelei ʻo fekauʻaki mo Sīsuú.” Naʻe fēfē ʻa e fakafeangai ki ai ʻa e tangata ʻItiopeá? Naʻá ne mahinoʻi ʻa e mahuʻinga ke tali ʻa Sīsū ko e ʻEikí ia, pea naʻá ne loto ke fai ʻa e meʻa ʻoku fiemaʻu ʻe Sihova ke fai ʻe he kau Kalisitiané. Ko ia naʻá ne papitaiso ai ʻo ʻikai toe toloi.

¹⁰ Ko ha toe fakatātā ʻe taha ko ha tangata Siu ko Saula. Ko e puleʻanga Siú fakakātoa naʻe ʻosi fakatapui ki he ʻOtuá, ka naʻe siʻaki ʻe Sihova ʻa e kau Siú koeʻuhí naʻe ʻikai te nau talangofua kiate ia. Naʻe tui ʻa Saula naʻe kei tauhi pē ʻa e kau Siú ki he ʻOtuá ʻi he founga totonú, ko ia naʻá ne fakatangaʻi ai ʻa e kau Kalisitiané. Ka ʻi he ʻaho ʻe taha, ko Sīsū kuo toetuʻú, ʻa ia naʻe fakakaukau ʻa Saula kuó ne maté, naʻá ne lea hangatonu mai kia Saula mei hēvani. Naʻe fēfē ʻa e fakafeangai ki ai ʻa Saulá? Naʻá ne tali fiefia ʻa e tokoni mei he ākonga Kalisitiane ko ʻAnanaia. ʻOku pehē ʻe he Tohi Tapú: “Naʻá ne tuʻu hake leva pea naʻá ne papitaiso.” (Ngā. 9:17, 18; Kal. 1:14) Naʻá ne ʻiloa ki mui ai ko e ʻapositolo ko Paulá. Fakatokangaʻi ʻi heʻene mahinoʻi pē naʻe ngāueʻaki ʻe he ʻOtuá ʻa Sīsū ke ne fakahoko ʻa Hono finangaló, naʻe papitaiso ʻa Saula ʻo ʻikai toe toloi.​—Lau ʻa e Ngāue 22:12-16.

11. (a) Ko e hā ʻokú ne ʻai ʻa e kau ako Tohi Tapu he ʻaho ní ke nau fili ke papitaisó? (e) ʻOku fēfē ʻetau ongoʻí ʻi he taimi ʻoku papitaiso ai ha taha?

¹¹ ʻI he ʻahó ni foki, ʻoku meimei tatau ia mo e meʻa ʻoku hoko ki he kau ako Tohi Tapu tokolahi, iiki mo e lalahi. Koeʻuhi ʻoku nau ʻofa mo falala ki he meʻa ʻoku leaʻaki ʻe he Tohi Tapú, ʻoku nau vēkeveke ke fakatapui ʻenau moʻuí kia Sihova pea papitaiso. Ko hono moʻoní, ko e malanga papitaisó ko ha mōmeniti makehe maʻu pē ia ʻi he ngaahi ʻasemipilií mo e fakataha-lahí. ʻOku fiefia ʻa e Kau Fakamoʻoni ʻa Sihová ʻi hono tali ʻe he kau ako Tohi Tapú ʻa e moʻoní pea nau fili ke papitaisó. ʻOku fiefia lahi ʻa e mātuʻá ʻi hono fai ʻe heʻenau fānaú ʻa e meʻa tatau. Lolotonga ʻa e taʻu fakangāue 2017, naʻe papitaiso ai ʻa e faʻahinga foʻou ʻe toko 284,000 tupu ʻo fakahaaʻi ai kuo nau fakatapui ʻenau moʻuí kia Sihova. (Ngā. 13:48) ʻOku hā mahino, naʻa nau mahinoʻi ʻoku fiemaʻu ki he kau Kalisitiané ke nau papitaiso. Ka ko e hā ʻa e meʻa naʻe pau ke nau fai ki muʻa ke lava ʻo nau papitaisó?

12. Ko e hā kuo pau ke fai ʻe he kau ako Tohi Tapú ki muʻa ke lava ʻo nau papitaisó?

¹² Ki muʻa ke lava ʻo papitaiso ʻa e kau ako Tohi Tapú, kuo pau ke nau ako ʻa e moʻoni fekauʻaki mo e ʻOtuá, ko ʻene taumuʻa ki he faʻahinga ʻo e tangatá mo e māmaní, pea mo e meʻa naʻá ne fai ke fakahaofi ʻa e faʻahinga ʻo e tangatá. (1 Tīm. 2:3-6) ʻOku fiemaʻu leva ke nau fakatupulekina ʻa e tuí, ʻa ia te ne tokoniʻi kinautolu ke nau talangofua ki he ngaahi lao ʻa e ʻOtuá pea tuku hono fai ʻa e meʻa ʻokú ne fehiʻa aí. (Ngā. 3:19) ʻOku mahuʻinga eni, koeʻuhí heʻikai ke tali ʻe Sihova ʻa e fakatapui ʻa ha tokotaha ʻokú ne hanganaki fai ʻa e ngaahi meʻa ʻokú Ne fehiʻa aí. (1 Kol. 6:9, 10) Ka ʻoku toe ʻi ai ʻa e meʻa lahi ange. Ko e faʻahinga ʻoku nau loto ke fakatapui ʻenau moʻuí kia Sihová ʻoku fiemaʻu ke nau maʻu ʻa e ngaahi fakataha ʻa e fakatahaʻangá pea malangaʻi maʻu pē ʻa e ongoongo leleí mo akoʻi ʻa e niʻihi kehé. ʻOku fiemaʻu ke fai eni ʻe ha taha pē ʻokú ne loto ke muimui ʻia Kalaisi. (Ngā. 1:8) Kuo pau ke tomuʻa fai ʻe ha tokotaha ako ʻa e ngaahi meʻa kotoa ko ení. Pea ʻe lava leva ke ne fakatapui ʻene moʻuí kia Sihova ʻi ha lotu fakafoʻituitui peá ne papitaiso.

13. ʻI heʻetau akoʻi ʻa e niʻihi kehé, ko e hā kuo pau ai ke tau manatuʻi ʻoku fiemaʻu ke nau papitaiso ʻo hoko ko e kau Kalisitiane moʻoní?

¹³ ʻI heʻetau tokoniʻi ʻetau fanaú mo e kau ako Tohi Tapú ke nau fai ʻa e ngaahi meʻa ko eni ʻoku fiemaʻú, kuo pau ke tau manatuʻi ko e faʻahinga ʻoku nau loto ke hoko ko e kau muimui moʻoni ʻo Sīsuú kuo pau ke nau papitaiso. Heʻikai leva ai ke tau ilifia ke tala ange kiate kinautolu ʻi ha taimi feʻungamālie ʻa e mahuʻinga ʻo e fakatapuí mo e papitaisó. ʻOku tau fiemaʻu ke hanganaki fakalakalaka ʻetau fānaú mo e kau ako Tohi Tapú pea ke nau papitaiso!

14. Ko e hā ʻoku ʻikai ke tau tenge ai ha taha ke ne papitaisó?

¹⁴ Ko e moʻoni, ʻoku ʻikai totonu ke tenge, pe fakamālohiʻi ʻe ha taha ha kiʻi tama pe ko ha tokotaha ako Tohi Tapu ke ne papitaiso. ʻOku ʻikai ke fakamālohiʻi ʻe Sihova ha taha pē ʻo kitautolu ke tauhi kiate ia. (1 Sio. 4:8) ʻI heʻetau akoʻi ʻa e niʻihi kehé, kuo pau ke tau tokoniʻi kinautolu ke nau mahinoʻi ʻa e mahuʻinga ke nau fakatupulekina ha vahaʻangatae fakafoʻituitui mo Sihova. Pea kapau ʻoku houngaʻia moʻoni ha tokotaha ako Tohi Tapu ke ʻilo ʻa e moʻoni fekauʻaki mo e ʻOtuá peá ne loto moʻoni ke fai ʻa e meʻa kotoa pē ʻoku totonu ke fai ʻe he kau Kalisitiane moʻoní, te ne loto ke papitaiso.​—2 Kol. 5:14, 15.

15, 16. (a) ʻOku fiemaʻu ke ʻi ha taʻumotuʻa pau ha tokotaha kae toki papitaiso? Fakamatalaʻi. (e) Ko e hā kuo pau ai ki ha tokotaha ako Tohi Tapu ke ne papitaiso ke hoko ko e taha ʻo e Kau Fakamoʻoni ʻa Sihová neongo kuó ne ʻosi papitaiso ʻi ha lotu ʻe taha?

¹⁵ ʻOku ʻikai fiemaʻu ia ke papitaiso ha taha ʻi ha taʻumotuʻa pau. ʻOku kehekehe ʻa e tokotaha kotoa, pea ʻoku fakalakalaka vave ange ʻa e kau ako ʻe niʻihi ʻi he niʻihi. ʻOku papitaiso ʻa e tokolahi ʻi heʻenau kei siʻí, pea ʻoku nau hanganaki faitōnunga kia Sihova ʻi heʻenau ʻalu ke taʻumotuʻa angé. ʻOku ʻosi taʻumotuʻa pē ʻa e niʻihi ia ʻi heʻenau ako ʻa e moʻoni Fakatohitapú pea papitaisó. ʻOku aʻu ʻo taʻu 100 tupu ʻa e niʻihi!

¹⁶ Ko ha fefine ʻe taha ʻa ia naʻe ako Tohi Tapu naʻá ne ʻosi papitaiso ʻi ha ngaahi lotu kehekehe. Ko e ʻuhinga ia naʻá ne ʻeke ai ki heʻene faiako Tohi Tapú pe ʻoku fiemaʻu moʻoni ke ne toe papitaiso. Naʻe fakahaaʻi ange ʻe heʻene faiakó kiate ia ha ngaahi veesi Tohi Tapu naʻá ne tali ʻa ʻene fehuʻí. ʻI hono mahinoʻi pē ʻe he fineʻeikí ʻa e meʻa ʻoku fiemaʻu mai ʻi he Tohi Tapú, naʻá ne papitaiso, neongo naʻá ne meimei taʻu 80. Ko e hā ʻoku tau ako mei he fakatātā ko ení? ʻE toki tali pē ʻe Sihova ʻetau papitaisó kapau ʻoku tau ʻiloʻi ʻa e moʻoni fekauʻaki mo hono finangaló. Ko ia tatau ai pē pe kuo tau ʻosi papitaiso ʻi ha lotu ʻe taha, ʻoku kei fiemaʻu pē ke tau papitaiso ke hoko ko e taha ʻo e Kau Fakamoʻoni ʻa Sihová.​—Lau ʻa e Ngāue 19:3-5.

17. Ko e hā ʻoku fakakaukau ha tokotaha fekauʻaki mo ia ʻi he ʻaho ʻo ʻene papitaisó?

¹⁷ Ko e ʻaho ʻoku papitaiso ai ha tokotahá ko ha ʻaho mātuʻaki fakafiefia ia. Ko ha toe taimi ia ke fakakaukau fakamātoato ai fekauʻaki mo e meʻa ʻoku kau ki he fakatapuí mo e papitaisó. Ko e ngāue mālohi ʻa hono fai ʻa e meʻa kotoa pē ʻoku fiemaʻu mei ha Kalisitiane moʻoní. Ko e kau ākonga ʻa Sīsuú kuo pau “ke ʻoua te nau kei moʻui maʻanautolu, ka maʻá e tokotaha naʻe pekia maʻanautolu pea fokotuʻu haké.”​—2 Kol. 5:15; Māt. 16:24.

18. Ko e hā ʻa e ngaahi fehuʻi te tau lāulea ki ai ʻi he kupu hono hokó?

¹⁸ Hangē ko ia kuo tau ako ʻi he kupú ni, ko e fili ke hoko ko ha Kalisitiane moʻoní ʻoku mātuʻaki mafatukituki. Ko e ʻuhinga ia naʻe ʻeke hifo ai kiate ia ʻe he faʻē ʻa Maria ʻa e ngaahi fehuʻi naʻe fakamatala ki ai ʻi he kamataʻanga ʻo e kupú. Kapau ko ha mātuʻa koe, kuó ke ʻeke hifo nai kiate koe: ‘ʻOku mateuteu moʻoni ʻa ʻeku kiʻi tamá ke papitaiso? ʻOku ʻilo feʻunga ʻa ʻeku kiʻi tamá ʻo fekauʻaki mo Sihova ke ne fakatapui ai ki he ʻOtuá? ʻOku totonu ke maʻu ʻe heʻeku kiʻi tamá ha tuʻunga fakaako lelei mo ha ngāue ki muʻa ke ne papitaisó? Fēfē kapau ʻe fai ʻe heʻeku kiʻi tamá ha angahala mamafa hili ʻene papitaisó?’ Te tau lāulea ki he ngaahi fehuʻi ko ení ʻi he kupu hono hokó, pea te tau ako ai ki he founga ʻe lava ke maʻu ai ʻe he ngaahi mātuʻa Kalisitiané ʻa e vakai totonu ki he papitaisó.