ʻOku ʻOfa ʻa Sihova ʻi he Faʻahinga ʻOku Nau “Laku Fua Mai Lolotonga ʻEnau Kātakí”

1, 2. (a) Ko e hā ʻoku fakalototoʻaʻi ai kitautolu ʻe he fanga tokoua mo e fanga tuofāfine ʻoku nau hanganaki malanga ʻi he ngaahi feituʻu ʻoku ʻikai ke fanongo ai ʻa e tokolahi? (Sio ki he ʻuluaki fakatātā ʻi he kupú ni.) (e) Ko e hā naʻe leaʻaki ʻe Sīsū fekauʻaki mo e malanga ʻi hono “feituʻu tupuʻangá”? (Sio ki he fakamatala ʻi lalo.)

KO Sergio mo Olinda ko ha ongo meʻa kinaua ʻokú na tāimuʻa ʻi ʻAmelika. ʻOkú na fakatou taʻu 80 tupu. Ki muí ni mai, ʻoku faingataʻa ʻena lué ʻi he mamahi hona vaʻé. Kae hangē ko ia kuó na fai ʻi he ngaahi taʻu lahi, ʻokú na luelue ki ha feituʻu moʻumoʻua ʻi hona koló ʻi he fitú pongipongi. ʻOkú na tuʻu ai ofi ki ha tauʻanga pasi ʻo tuʻuaki ʻetau ʻū tohí ki he kakai ʻoku fononga mai aí. ʻOku tukunoaʻi kinaua ʻe he tokolahi taha ʻo e kakaí, ka ʻoku tuʻu pē ʻa Sergio mo Olinda ʻi hona tuʻuʻangá ʻo malimali ki he faʻahinga ʻoku nau sio mai kiate kinauá. ʻI he hoʻatā efiafí, ʻokú na luelue māmālie ʻo foki ki ʻapi. ʻI he fitú, he pongipongi hono hokó, ʻokú na foki ki he tauʻanga pasí. ʻOkú na hanganaki malanga he pongipongi ʻe ono ʻi he uike, ʻi he taʻú kotoa.

² Hangē ko Sergio mo Olinda, ʻoku tokolahi ʻa e fanga tokoua mo e fanga tuofāfine faitōnunga kuo nau malanga ʻi honau feituʻu tupuʻangá ʻi he ngaahi taʻu lahi, neongo ʻa e ʻikai ke fanongo ʻa e tokolahi taha ʻo e kakaí. Mahalo pē ʻokú ke malanga foki ʻi ha feituʻu hangē ko iá. Kapau ko ia, ʻoku mau fakaongoongoleleiʻi koe, koeʻuhi ko hoʻo kātaki ʻo hokohoko atu ʻa e malangá neongo ʻene faingataʻá.a (Sio ki he fakamatala ʻi lalo.) Ko hoʻo faʻifaʻitakiʻangá ʻoku fakalototoʻaʻi ai ʻa e fanga tokoua mo e fanga tuofāfine tokolahi, naʻa mo e faʻahinga ʻoku nau maʻu ha taukei ʻi ha ngaahi taʻu. Fakatokangaʻi ʻa e meʻa kuo leaʻaki ʻe he kau ʻovasia sēketi ʻe niʻihi: “ʻI heʻeku ngāue mo e fanga tokoua mo e fanga tuofāfine faitōnunga pehē ʻi he ngāue fakafaifekaú, ʻoku ou ongoʻi longomoʻui ʻi heʻenau faʻifaʻitakiʻangá.” “Ko ʻenau faitōnungá ʻoku fakalototoʻaʻi ai au ke u kītaki mo loto-toʻa ʻi heʻeku ngāue fakafaifekaú tonu.” “Ko ʻenau faʻifaʻitakiʻangá ʻoku māfana ai ʻa hoku lotó.”

 3. Ko e hā ʻa e fehuʻi ʻe tolu te tau lāulea ki aí, pea ko e hā hono ʻuhingá?

³ ʻI he kupu ko ení te tau tali ai ʻa e fehuʻi ʻe tolu: Ko e hā te tau ongoʻi loto-siʻi nai ai ʻi he taimi ʻe niʻihi? ʻOku ʻuhinga ki he hā ʻa e laku fuá? Ko e hā te ne tokoniʻi kitautolu ke tau hanganaki laku fua ai lolotonga ʻa e kātakí? Ko hono ʻiloʻi ʻa e tali ki he ngaahi fehuʻi ko ení ʻe fakalototoʻaʻi ai kitautolu ke hokohoko atu hono fai ʻa e ngāue fakamalanga naʻe ʻomai ʻe Sīsū ke tau faí.

 4. (a) Naʻe ongoʻi fēfē ʻa Paula ʻi he fakafeangai ʻikai lelei mei he tokolahi taha ʻo e kau Siú? (e) Ko e hā naʻe ongoʻi pehē ai ʻa Paulá?

⁴ Kuo faifai ange peá ke ongoʻi loto-siʻi koeʻuhi ko e ʻikai ke fiefanongo ʻa e kakai ʻi ho feituʻú ki he pōpoaki fekauʻaki mo e Puleʻangá? Kapau ko ia, te ke mahinoʻi ʻa e anga ʻo e ongoʻi ʻa e ʻapositolo ko Paulá. Naʻá ne fakamoleki ʻa e taʻu nai ʻe 30 ʻi he malangá, pea naʻá ne tokoniʻi ʻa e kakai tokolahi ke nau hoko ko e kau Kalisitiane. (Ngā. 14:21; 2 Kol. 3:2, 3) Neongo ia, naʻe ʻikai malava ke ne tokoniʻi ʻa e kau Siu tokolahi ke nau hoko ko e kau Kalisitiane. ʻI hono kehé, ko e tokolahi taha ʻo kinautolú naʻa nau fakafisi ke fanongo kia Paula, pea naʻe aʻu ʻo fakatangaʻi ia ʻe he niʻihi. (Ngā. 14:19; 17:1, 4, 5, 13) Naʻe ongoʻi fēfē ʻa Paula ʻi he fakafeangai ʻikai lelei ko iá? Naʻá ne pehē: “ʻOku ou maʻu ʻa e mamahi lahi mo e langa taʻetuku ʻi hoku lotó.” (Loma 9:1-3) Ko e hā naʻá ne ongoʻi pehē aí? Koeʻuhí naʻá ne saiʻia moʻoni ʻi he malangá pea naʻá ne ʻofa ʻi he kakaí. Naʻe tokanga moʻoni ʻa Paula ki he kau Siú pea naʻá ne ongoʻi mamahi ʻi heʻenau talitekeʻi ʻa e meesi ʻa e ʻOtuá.

 5. (a) Ko e hā ʻokú ne ueʻi kitautolu ke tau malangá? (e) Ko e hā ʻoku fakanatula ai pē ke tau ongoʻi loto-siʻi ʻi he taimi ʻe niʻihi?

⁵ ʻI he hangē ko Paulá, ʻoku tau malanga ki he kakaí koeʻuhí ʻoku tau tokanga kiate kinautolu pea loto ke tokoniʻi kinautolu. (Māt. 22:39; 1 Kol. 11:1) ʻOku tau ʻiloʻi mei heʻetau hokosiá tonu ko e tauhi kia Sihová ʻa e founga lelei taha ke moʻui aí. Pea ʻoku tau loto ke tokoniʻi ʻa e niʻihi kehé ke nau sio ki he lelei lahi ʻe lava ke hoko foki ki heʻenau moʻuí! Ko e ʻuhinga ia ʻoku tau hanganaki fakalototoʻaʻi ai kinautolu ke nau ako ʻa e moʻoni fekauʻaki mo Sihová mo ʻene taumuʻa ki he faʻahinga ʻo e tangatá. ʻOku hangē ia ʻoku tau foaki kiate kinautolu ha meʻaʻofa fakaʻofoʻofa pea kōlenga ange: ‘Tali muʻa eni.’ Ko ia ʻi heʻenau talitekeʻi ʻa e meʻaʻofa ko iá, ʻoku fakanatula pē ke tau ongoʻi ʻa e ‘langa ʻi hotau lotó,’ ʻo hangē ko ia naʻe hoko kia Paulá. ʻOku tau ongoʻi ʻa e langa ko ení, ʻo ʻikai koeʻuhí ʻoku siʻi ʻetau tuí, ka koeʻuhí ʻoku tau ʻofa moʻoni ʻi he kakaí. Ko ia neongo ʻoku tau ongoʻi loto-siʻi nai ʻi he taimi ʻe niʻihi, ʻoku hokohoko atu pē ʻetau malangá. ʻOku tau loto-tatau nai mo Elena, ko ha tāimuʻa ʻo laka hake ʻi he taʻu ʻe 25, ʻa ia ʻokú ne pehē: “ʻOku ou ʻiloʻi ʻoku faingataʻa ʻa e ngāue fakamalangá. Neongo ia, ʻoku ʻikai ha toe ngāue kehe te u saiʻia ange ke fai.”

 6. Ko e hā ʻa e fehuʻi te tau tali he taimi ní?

⁶ Ko e hā ʻoku lava ai ke tau fakapapauʻi ʻe lava ke tau lavameʻa ʻi heʻetau ngāue fakafaifekaú ʻo tatau ai pē pe ko fē ʻa e feituʻu ʻoku tau malanga aí? Ke tali ʻa e fehuʻi mahuʻinga ko iá, tau lāulea angé ki he talanoa fakatātā ʻe ua ʻa Sīsū ʻa ia ʻokú ne talanoa ai fekauʻaki mo e fiemaʻu ke laku “fua.” (Māt. 13:23) Ko e ʻuluaki talanoa fakatātaá ʻoku fekauʻaki ia mo ha fuʻu kālepi.

 7. (a) ʻI he talanoa fakatātā ʻa Sīsuú, ko hai ʻoku fakafofongaʻi ʻe he “tauhi ngoué,” “fuʻu kālepí,” mo e “ngaahi vaʻá”? (e) Ko e hā ʻa e fehuʻi ʻoku kei fiemaʻu ke tau talí?

⁷ Lau ʻa e Sione 15:1-5, 8. ʻI he talanoa fakatātā ko ení, naʻe fakamatalaʻi ai ʻe Sīsū ko Sihova ʻa e “tauhi ngoué,” ko Sīsū “ʻa e fuʻu kālepí,” pea ko ʻene kau ākongá “ʻa e ngaahi vaʻá.”b (Sio ki he fakamatala ʻi lalo.) Naʻe tala ange leva ʻe Sīsū ki heʻene kau ʻapositoló: “ʻOku fakalāngilangiʻi ʻa ʻeku Tamaí ʻi he meʻá ni, ʻi he hokohoko atu hoʻomou fua lahí pea mou fakamoʻoniʻi kimoutolu ko ʻeku kau ākonga.” Ko ia ai, ʻoku ʻuhinga ki he hā ʻa e laku fuá? ʻI he talanoa fakatātā ko ení, naʻe ʻikai ke tala hangatonu ai ʻe Sīsū pe ko e hā ʻa e fuá, ka naʻá ne ʻomai ha fakalika ʻe tokoniʻi ai kitautolu ke tau maʻu ʻa e tali ki he fehuʻi ko iá.

 8. (a) ʻI he talanoa fakatātā ʻa Sīsuú, ko e hā heʻikai lava ai ke ʻuhinga ʻa e laku “fuá” ko hono ngaohi ha kau ākonga foʻou? (e) Ko e hā ʻa e moʻoniʻi meʻa fekauʻaki mo e meʻa kotoa pē ʻoku kole mai ʻe Sihova ke tau faí?

⁸ Naʻe pehē ʻe Sīsū fekauʻaki mo ʻene Tamaí: “Ko e vaʻa kotoa pē ʻiate au ʻoku ʻikai fuá ʻokú ne toʻo ia.” ʻI hono fakalea ʻe tahá, ʻe lava ke tau toki hoko ko e kau sevāniti ʻa Sihová ʻo kapau pē te tau laku fua. (Māt. 13:23; 21:43) Ko ia ʻi he talanoa fakatātā ko ení, ko e laku fuá heʻikai lava ke ʻuhinga iá ko hono ngaohi ha kau ākonga foʻou. (Māt. 28:19) Kapau naʻe pehē, ko e Kau Fakamoʻoni faitōnunga ko ē kuo ʻikai te nau tokoniʻi ha taha ke hoko ko ha ākonga ʻa Sīsuú, te nau hangē ko e ngaahi vaʻa ʻoku ʻikai ke fuá. Ka ʻoku ʻikai lava ke moʻoni eni! Ko e hā hono ʻuhingá? Koeʻuhí heʻikai lava ke tau fakamālohiʻi ʻa e kakaí ke nau hoko ko e kau ākonga. Ko Sihová ʻoku anga-ʻofa. Heʻikai ʻaupito te ne kole mai ke tau fai ha meʻa ʻoku ʻikai malava ke tau fai. ʻOkú ne kole mai pē ʻa e meʻa ʻe lava ke tau faí.​—Teu. 30:11-14.

 9. (a) ʻOku anga-fēfē ʻetau laku fuá? (e) Ko e hā ʻa e talanoa fakatātā te tau hoko atu ʻo lāulea ki aí?

⁹ Ko e hā leva ʻa e ʻuhinga ʻo e laku fuá? ʻOku pau pē ko ha meʻa ʻoku tau malava kotoa ke fai. Ko e hā ʻa e ngāue kuo ʻomai ʻe Sihova ki he kotoa ʻo ʻene kau sevānití? Ko hono malangaʻi ʻa e ongoongo lelei ʻo e Puleʻanga ʻo e ʻOtuá.c (Sio ki he fakamatala ʻi lalo.) (Māt. 24:14) Ko e talanoa fakatātā ʻa Sīsū fekauʻaki mo e tangata tūtūʻí ʻokú ne ʻai ke mahino ʻa e meʻá ni. Tau lāulea angé ki he talanoa fakatātā ko iá.

10. (a) Ko e hā ʻa e tenga mo e kelekele ʻi he talanoa fakatātā ʻa Sīsuú? (e) Ko e hā ʻe tupu mai mei ha uite?

¹⁰ Lau ʻa e Luke 8:5-8, 11-15. ʻI he talanoa fakatātā fekauʻaki mo e tangata tūtūʻí, naʻe fakamatala ai ʻa Sīsū ko e tengá “ko e folofola ia ʻa e ʻOtuá,” pe ko e pōpoaki fekauʻaki mo e Puleʻanga ʻo e ʻOtuá. Ko e kelekelé ko e loto ia ʻo ha taha. Ko e tenga naʻe tō ʻi he kelekele leleí naʻe faiaka, tupu, pea hoko ko ha fuʻu ʻakau. Ko e fuʻu ʻakaú leva “naʻe laku fua mai ia ʻo liunga 100.” Kapau ko e ʻakau ko iá ko ha uite, ko e hā ʻa e faʻahinga fua ʻe tupu mai aí? Ko ha fanga kiʻi vaʻa uite? ʻIkai, ʻe tupu mai ʻa e fanga kiʻi tenga, ʻa ia ʻe faai atu pē ʻo tupu pea hoko ko e ngaahi fuʻu uite. ʻI he talanoa fakatātā ko ení, ko e tenga ʻe taha naʻe tupu mai ai ʻa e fanga kiʻi tenga ʻe 100. Ko e hā ʻoku akoʻi mai ʻe he meʻá ni fekauʻaki mo ʻetau ngāue fakafaifekaú?

11. (a) Ko e hā ʻoku akoʻi mai ʻe he talanoa fakatātā fekauʻaki mo e tangata tūtūʻí ʻo kau ki heʻetau ngāue fakafaifekaú? (e) ʻOku anga-fēfē ʻetau fakatupu ha tenga foʻou?

¹¹ ʻI he ʻuluaki akoʻi kitautolu ʻe heʻetau ongo mātuʻa Kalisitiané pe ko ha Kau Fakamoʻoni kehe fekauʻaki mo e Puleʻanga ʻo e ʻOtuá, ne hangē ia naʻa nau tō ha tenga ʻi ha kelekele leleí. Naʻa nau fiefia ʻaupito ʻi heʻenau sio naʻa tau tali ʻa e pōpoakí. Naʻe hanganaki tupu mo tupu ʻa e tenga ko iá ʻo mateuteu ke laku fua. Pea hangē pē ko e ʻikai ke tupu mai mei he fuʻu uité ha ngaahi vaʻa uite foʻou hangē ko ia naʻe lave ki aí, ka ko e tenga foʻou, ʻoku ʻikai ke tau fakatupu ha kau ākonga foʻou, ka ko e tenga foʻou.d (Sio ki he fakamatala ʻi lalo.) ʻOku anga-fēfē ʻetau fai iá? Ko e taimi kotoa pē ʻoku tau talanoa ai ki he niʻihi kehé fekauʻaki mo e Puleʻanga ʻo e ʻOtuá, ʻoku hangē ia haʻatau ʻai ke lahi ange mo movete ʻa e tenga naʻe tō ʻi hotau lotó. (Luke 6:45; 8:1) Ko ia lolotonga ʻetau hanganaki malangaʻi ʻa e pōpoaki fekauʻaki mo e Puleʻanga ʻo e ʻOtuá, ʻoku tau ‘laku fua ai lolotonga ʻetau kātakí.’

12. (a) Ko e hā ʻoku tau ako mei he ongo talanoa fakatātā ʻa Sīsū fekauʻaki mo e fuʻu kālepí mo e tangata tūtūʻí? (e) ʻOku ʻai koe ʻe he lēsoni ko iá ke ke ongoʻi fēfē?

¹² Ko e hā ʻoku tau ako mei he ongo talanoa fakatātā ʻa Sīsū fekauʻaki mo e fuʻu kālepí pea mo e tangata tūtūʻí? ʻOku tau ako ai ko e “laku fua” ʻoku ʻikai fakatuʻunga ia ʻi he fanongo ʻa e kakaí ki he pōpoakí. ʻOku fakatuʻunga ia ʻi heʻetau hanganaki malangá. Naʻe leaʻaki ʻe Paula ʻa e meʻa meimei tatau ʻi heʻene fakamatala: “Ko e tokotaha taki taha te ne maʻu ʻene totongi ʻaʻaná ʻo fakatatau pē ki heʻene ngāué.” (1 Kol. 3:8) ʻE fakapaleʻi kitautolu ʻe Sihova ʻi heʻetau ngāué, ʻo ʻikai ʻi he ngaahi ola ʻo ʻetau ngāué. Ko Matilda, ʻa ia kuó ne tāimuʻa ʻi he taʻu ʻe 20, ʻokú ne pehē, “ʻOku ou fiefia ʻi he ʻiloʻi ʻe fakapaleʻi ʻe Sihova ʻetau ngaahi feingá.”

13, 14. Fakatatau ki he Loma 10:1, 2, ko e hā ʻa e ngaahi ʻuhinga naʻe ʻikai ʻaupito ai ke tuku ʻa e malanga ʻa Paulá?

¹³ Ko e hā te ne tokoniʻi kitautolu ke tau ‘laku fua mai lolotonga ʻetau kātakí’? Tau sio angé ke toe ofi ange ki he faʻifaʻitakiʻanga ʻa Paulá. ʻOku tau ʻiloʻi naʻe ongoʻi loto-siʻi ʻa Paula koeʻuhi ko hono talitekeʻi ʻe he kau Siú ʻa e pōpoaki fekauʻaki mo e Puleʻangá. Kae kehe, naʻe ʻikai ʻaupito ke tuku ʻa e malanga ʻa Paula kiate kinautolú. Naʻá ne fakamatala ki he anga ʻo ʻene ongoʻi fekauʻaki mo e kau Siu ko iá ʻi heʻene pehē: “Ko e fakaʻamu ʻa hoku lotó pea mo ʻeku hū tōtōaki ki he ʻOtuá maʻá e kau ʻIsilelí, ko hono moʻoní, ʻoku fai iá ke fakamoʻui ai kinautolu. He ʻoku ou fakamoʻoni ko kinautolú ʻoku ʻi ai haʻanau faivelenga ki he ʻOtuá, ka ʻoku ʻikai ke fakatatau ki he ʻilo totonú.” (Loma 10:1, 2) Ko ia ko e hā naʻe hokohoko atu ai pē ʻa e malanga ʻa Paulá?

¹⁴ ʻUluakí, naʻe pehē ʻe Paula naʻe ueʻi ia ke ne malanga ki he kau Siú koeʻuhí ‘ko e fakaʻamu ʻa hono lotó.’ Naʻá ne loto moʻoni ke fakahaofi kinautolu. (Loma 11:13, 14) Uá, naʻá ne fakamatala fekauʻaki mo ʻene “hū tōtōaki ki he ʻOtuá maʻá e kau ʻIsilelí.” Naʻe kōlenga ʻa Paula kia Sihova ke ne tokoniʻi ʻa e kau Siú tāutaha ke nau tali ʻa e pōpoaki fekauʻaki mo e Puleʻangá. Tolú, naʻe pehē ʻe Paula: “ʻOku ʻi ai haʻanau faivelenga ki he ʻOtuá.” Naʻe sio ʻa Paula ki he lelei ʻi he kakaí mo e malava ke nau tauhi kia Sihová. Naʻá ne ʻiloʻi ko e kau Siu faivelenga ko iá ʻe lava ke nau hoko ko e kau ākonga faivelenga ʻa Kalaisi, ʻo hangē tofu pē ko iá.

15. ʻE lava fēfē ke tau faʻifaʻitaki kia Paula? ʻOmai ha ngaahi fakatātā.

¹⁵ ʻE lava fēfē ke tau faʻifaʻitaki kia Paula? ʻUluakí, kuo pau moʻoni ke tau loto ke kumi ʻa e faʻahinga ʻoku nau “hehema totonu ki he moʻui taʻengatá.” Uá, ʻoku tau kōlenga kia Sihova ke ne tokoniʻi ʻa e kakai loto-moʻoní ke nau fanongo ʻi he taimi ʻoku tau malanga ai kiate kinautolú. (Ngā. 13:48; 16:14) Ko e meʻa ia ʻoku fai ʻe Silvana, ʻa ia kuó ne tāimuʻa ʻi he meimei taʻu ʻe 30. ʻOkú ne pehē, “Ki muʻa ke u ʻalu ki ha fale ʻi hoku feituʻu ngāué, ʻoku ou lotu kia Sihova, ʻo kole kiate ia ke ne ʻomai kiate au ha fakakaukau pau.” ʻOku tau lotu foki ke tokoniʻi kitautolu ʻe he kau ʻāngeló ke tau maʻu ʻa e kakai ʻoku nau loto-lelei ke fanongó. (Māt. 10:11-13; Fkh. 14:6) Ko Robert, ʻa ia kuó ne tāimuʻa ʻi he taʻu ʻe 30 tupu, ʻokú ne pehē, “Ke ngāue fakataha mo e kau ʻāngeló ʻa ia ʻoku nau ʻiloʻi ʻa e meʻa ʻoku hoko ki he moʻui ʻa e faʻahinga ʻi he ngaahi ʻapí ʻoku fakalotomāfana.” Tolú, ʻoku tau feinga ke sio ki he lelei ʻi he kakaí mo e malava ke nau tauhi kia Sihová. Ko Carl, ko ha mātuʻa ʻa ia naʻe papitaiso laka hake ʻi he taʻu ʻe 50 kuohilí, ʻokú ne pehē, “ʻOku ou fakasio ki ha kiʻi fakaʻilonga pē ʻe fakahaaʻi nai ai ʻa e loto-moʻoni ʻa ha tokotaha, ko ha malimali nai, ko ha sio anga-ʻofa, pe ko ha fehuʻi faitotonu.” Kapau te tau fai ʻa e ngaahi meʻa ko ení, ʻe lava ke tau ‘laku fua mai lolotonga ʻetau kātakí,’ ʻo hangē ko Paulá.

16, 17. (a) Ko e hā ʻa e lēsoni ʻe lava ke tau ako mei he Tangata Malanga 11:6? (e) ʻOku lava fēfē ke ueʻi ʻe heʻetau malangá ʻa e faʻahinga ʻoku nau siofi kitautolú?

¹⁶ ʻOku totonu ke ʻoua ʻaupito naʻa ngalo ʻiate kitautolu ʻa e lahi ʻo e malava ke ueʻi ʻe heʻetau malangá ʻa e kakaí, neongo ʻe hā ngali nai ʻoku ʻikai ha taha ʻe fanongo. (Lau ʻa e Tangata Malanga 11:6.) ʻOku siofi kitautolu ʻe he kakaí. ʻOku nau fakatokangaʻi ʻetau teunga māú pea mo ʻetau anga-fakaʻapaʻapa mo anga-fakakaumeʻá. ʻOku maongo nai eni kiate kinautolu, pea ʻi he faai atu ʻa e taimí, naʻa mo e faʻahinga naʻa nau faʻa fakakaukau ʻikai lelei fekauʻaki mo kitautolú ʻe kamata nai ke nau fakakaukau lelei ange fekauʻaki mo kitautolu. Naʻe ʻiloʻi ʻe Sergio mo Olinda ʻoku moʻoni ʻa e meʻá ni.

¹⁷ ʻOku pehē ʻe Sergio: “Koeʻuhi ko e mahamahakí, naʻe ʻikai te ma ō ai ʻi ha vahaʻa taimi ki he feituʻu moʻumoʻua ʻo e koló. ʻI heʻema foki ki aí, naʻe ʻeke mai ʻe he faʻahinga ʻoku nau feʻaluʻaki aí, ‘Ko e hā ʻa e meʻa naʻe hokó? Naʻa mau ongoʻi hoʻomo pulí.’” ʻOku hoko atu ʻa Olinda mo ne malimali: “Naʻe taʻataʻalo mai kiate kimaua ʻa e kau fakaʻuli pasí pea kaila mai ʻa e niʻihi mei honau sea fakaʻulí, ‘Mālō e ngāue!’ Naʻe aʻu ʻo nau kole haʻanau makasini.” Naʻe ʻohovale ʻaupito ʻa Sergio mo Olinda ʻi he haʻu ha tangata ki heʻena papa faifakamoʻoní, ʻo ʻoange kiate kinaua ha poukei matalaʻiʻakau, pea fakamālō ange ʻi he ngāue ʻokú na faí.

18. Ko e hā ʻokú ke fakapapauʻi ai ke ‘laku fua mai lolotonga hoʻo kātakí’?

¹⁸ ʻI he hokohoko atu ʻa e “ʻoua naʻa tuku ke mālōlō ho nimá” mei he talanoa ki he niʻihi kehé fekauʻaki mo e Puleʻanga ʻo e ʻOtuá, ʻokú ke kau ki ha tafaʻaki mahuʻinga ʻi hono fai ha “fakamoʻoni ki he ngaahi puleʻanga kotoa pē.” (Māt. 24:14) Mahulu hake ʻi he meʻa kotoa, ʻoku lava ke ke maʻu ʻa e fiefia lahi koeʻuhi ko hoʻo ʻilo ʻokú ke ʻai ke fiefia ʻa Sihova. ʻOkú ne ʻofa ʻi he faʻahinga kotoa ʻoku nau “laku fua mai lolotonga ʻenau kātakí”!