Fiefia Ē ko e Kakai ʻOku Nau Tauhi ki he “ʻOtua Fiefiá”

 1. Ko e hā ʻoku hoko ai ʻa e Kau Fakamoʻoni ʻa Sihová ko ha kakai fiefiá? (Sio ki he ʻuluaki fakatātā ʻi he kupú ni.)

KO E Kau Fakamoʻoni ʻa Sihová ko ha kakai fiefia. ʻI he taimi ʻoku nau feohi ai, ʻi ha fakataha, ko ha ʻasemipilī, pe ʻi ha fakatahataha fakasōsiale, ʻoku nau talanoa mo kakata fakataha. Ko e hā ʻoku nau mātuʻaki fiefia aí? Ko hono ʻuhinga tefitó ko ʻenau ʻiloʻi ʻa Sihova ko e “ʻOtua fiefiá.” ʻOku nau tauhi kiate ia pea feinga ke faʻifaʻitaki kiate ia. (1 Tīm. 1:11; Saame 16:11) Ko Sihova ʻa e Matavai ʻo e fiefiá, ko ia ʻokú ne loto ke tau fiefia, pea ʻokú ne ʻomi ʻa e ngaahi ʻuhinga lahi ke tau hoko ai ʻo fiefia.​—Teu. 12:7; Tml. 3:12, 13.

2, 3. (a) ʻOku ʻuhinga ki he hā ʻa e hoko ʻo fiefiá? (e) Ko e hā nai ʻe faingataʻa ai ke hoko ʻo fiefiá?

² Fēfē koe? ʻOkú ke fiefia? Ke hoko ʻo fiefiá ʻoku ʻuhinga ia ko e ongoʻi lelei, hoko ʻo fiemālie ʻi hoʻo moʻuí pe fiefia lahi. ʻOku fakahaaʻi ʻe he Tohi Tapú ko e faʻahinga ʻoku tāpuakiʻi ʻe Sihová ʻe lava ke nau fiefia moʻoni. Ka ko e hā leva ʻoku faingataʻa nai ai ke fiefia ʻi he māmani ʻo e ʻaho ní?

³ ʻOku lava ke faingataʻa ke fiefia ʻi heʻetau hokosia ʻa e ngaahi tuʻunga fakalotomafasiá, hangē ko e taimi ʻoku mate pe tuʻusi ai ha taha ʻoku tau ʻofa ai, taimi ʻoku ngata ai ʻetau nofo malí ʻi he veté, pe taimi ʻoku mole ai ʻetau ngāué. ʻOku toe faingataʻa foki ke fiefia ʻi he ʻikai ha melino ʻi ʻapi koeʻuhi ko ha kē maʻu pē, taimi ʻoku manukiʻi ai kitautolu ʻe hotau kaungāngāué pe kaungāakó, pe taimi ʻoku fakatangaʻi ai pe tuku pilīsone kitautolu koeʻuhi ko ʻetau tauhi kia Sihová. Pe ʻoku hōloa nai hotau tuʻunga moʻui leleí, ʻoku tau maʻu nai ha mahaki tauhi, pe ʻoku tau tofanga nai ʻi ha loto-mafasia. Kae manatuʻi ko Sīsū Kalaisi, “ko e Tokotaha Pule fiefia pē ʻe tahá,” naʻá ne saiʻia ke fakafiemālieʻi ʻa e kakaí pea ʻai kinautolu ke nau fiefia. (1 Tīm. 6:15; Māt. 11:28-30) ʻI he Malanga ʻi he Moʻungá naʻe lave ai ʻa Sīsū ki he ngaahi ʻulungaanga ʻe lava ke ne tokoniʻi kitautolu ke tau fiefia neongo ʻoku tau palopalemaʻia koeʻuhi ko ʻetau nofo ʻi he māmani ʻo Sētané.

4, 5. Ko e hā ʻe lava ke tau fai ke hoko ai ʻo fiefia pea hokohoko atu ʻetau fiefiá?

⁴ Ko e ʻuluaki meʻa naʻe lave ki ai ʻa Sīsuú ʻoku tautefito ʻene mahuʻingá. Naʻá ne pehē: “Fiefia ē ko kinautolu ʻoku nau lāuʻilo ki heʻenau fiemaʻu fakalaumālié, he ʻoku ʻonautolu ʻa e Puleʻanga ʻo hēvaní.” (Māt. 5:3) Kapau ʻoku tau lāuʻilo ki heʻetau fiemaʻu fakalaumālié, ʻoku tau ʻiloʻi ʻoku fiemaʻu ke tau ʻiloʻi ʻa e ʻOtuá pea ʻoku tau fiemaʻu ʻene tokoní mo e tatakí. ʻOku anga-fēfē ʻetau fakahaaʻi iá? ʻAki hono ako ʻa e Tohi Tapú, talangofua ki he ʻOtuá, pea ʻai ʻa e lotu kiate iá ko e meʻa mahuʻinga taha ia ʻi heʻetau moʻuí. Ko hono fai ʻa e ngaahi meʻa ko ení ʻe tokoniʻi ai kitautolu ke tau fiefia. Ko ʻetau tui kuo vavé ni ke hoko ʻa e ngaahi talaʻofa ʻa e ʻOtuá ʻe toe mālohi ange ai. Pea ko e “ʻamanaki fakafiefia” ʻoku tau maʻu ʻi he Tohi Tapú te ne fakalototoʻaʻi kitautolu.​—Tai. 2:13.

⁵ Kapau ʻoku tau loto ke fiefia tatau ai pē pe ko e hā ʻoku hoko ʻi heʻetau moʻuí, kuo pau ke hokohoko atu ʻetau ʻai ke mālohi ʻetau kaumeʻa mo Sihová. Naʻe tohi ʻa e ʻapositolo ko Paulá: “Fiefia maʻu ai pē ʻi he ʻEikí. Te u toe lea atu, Mou fiefia!” (Fil. 4:4) Ke hoko ko ha kaumeʻa ofi ʻo Sihova, ʻoku fiemaʻu ke tau maʻu ʻa e poto fakaʻotuá. ʻOku pehē ʻi he Folofola ʻa e ʻOtuá: “Fiefia ē ko e tangata ʻokú ne ʻilo ʻa e potó pea mo e tangata ʻokú ne maʻu ʻa e ʻiloʻiló. Ko ha ʻakau ia ʻo e moʻuí ki he faʻahinga ʻoku nau puke iá, pea ko kinautolu ʻoku nau puke maʻu iá ʻe vakai atu kiate kinautolu ʻoku nau fiefia.”​—Pal. 3:13, 18.

 6. Ko e hā ha toe meʻa kuo pau ke tau fai ke hokohoko atu ai ʻetau fiefiá?

⁶ Ka ke hokohoko atu ʻetau fiefiá, ʻoku mahuʻinga ʻaupito ke hokohoko atu ʻetau ngāueʻaki ʻa e meʻa ʻoku tau ako mei he Tohi Tapú. Naʻe fakamamafaʻi ʻe Sīsū ʻa e mahuʻinga ʻo e meʻá ni ʻi heʻene pehē: “Kapau ʻoku mou ʻiloʻi ʻa e ngaahi meʻá ni, he fiefia ē ko kimoutolu kapau ʻoku mou fai ia.” (Sione 13:17; lau ʻa e Sēmisi 1:25.) ʻOku mahuʻinga eni kapau ʻoku tau loto ke fakalato ʻetau fiemaʻu fakalaumālié pea fiefia ai pē. Ka ʻe lava fēfē ke tau fiefia neongo ʻoku lahi fau ʻa e ngaahi meʻa ʻe lava ke ne toʻo ʻetau fiefiá? Tau sio angé ki he meʻa hono hoko naʻe leaʻaki ʻe Sīsū ʻi heʻene Malanga ʻi he Moʻungá.

 7. ʻE lava fēfē ke fiefia ʻa e faʻahinga ʻoku mamahí?

⁷ “Fiefia ē ko kinautolu ʻoku mamahí, he ʻe fakafiemālieʻi kinautolu.” (Māt. 5:4) Te tau fifili nai, ‘ʻE lava fēfē ke fiefia ʻa e faʻahinga ʻoku mamahí?’ Naʻe ʻikai ke lea ʻa Sīsuú fekauʻaki mo e tokotaha kotoa pē ʻoku mamahí. Ko e kakai fulikivanu tokolahi ʻoku nau mamahi, koeʻuhí ko ʻenau hokosia ʻa e ngaahi palopalema fakalotomafasia ʻi he ‘ngaahi ʻaho fakaʻosi’ ko eni ʻoku fuʻu “faingataʻa ke fekuki mo ia.” (2 Tīm. 3:1) Ka ʻoku nau fakakaukau pē fekauʻaki mo kinautolu ʻo ʻikai fekauʻaki mo Sihova, ko ia ʻoku ʻikai te nau fakatupulekina ha kaumeʻa mo ia, pea heʻikai lava ke nau fiefia. Naʻe lea ʻa Sīsuú fekauʻaki mo e faʻahinga ʻoku nau lāuʻilo ki heʻenau fiemaʻu fakalaumālié. ʻOku nau mamahí koeʻuhi ko ʻenau sio ki he fuʻu tokolahi ʻa e kakai kuo nau siʻaki ʻa e ʻOtuá pea ʻikai ke moʻui ʻi he founga ʻoku fiemaʻu mai ʻe he ʻOtuá. ʻOku nau toe ʻiloʻi ʻoku nau angahalaʻia, pea ʻoku nau sio ki he hoko ʻa e ngaahi meʻa fakalilifu ʻi he māmani ko ení. ʻOku ʻafioʻi ʻe Sihova ʻa e faʻahinga ʻoku nau mamahi moʻoní, fakafiemālieʻi kinautolu fakafou ʻi heʻene Folofolá, pea ʻoange kiate kinautolu ʻa e fiefia mo e moʻui.​—Lau ʻa e ʻIsikeli 5:11; 9:4.

 8. ʻE lava fēfē ke tokoniʻi koe ʻe he anga-maluú ke ke fiefia?

⁸ “Fiefia ē ko e kau anga-maluú, he te nau maʻu ʻa e māmaní.” (Māt. 5:5) ʻE lava fēfē ke tokoniʻi koe ʻe he anga-maluú ke ke fiefia? Ko e kakai tokolahi ʻoku nau anga-kovi mo anga-fakamamahi, ʻa ia ʻe lava ke iku ki he ngaahi palopalema lahi. Ka ʻi heʻenau ako ʻa e moʻoní, ʻoku nau liliu ʻo ʻai ʻa e “angaʻitangata foʻoú.” ʻOku nau fakahāhā he taimí ni ʻa e “manavaʻofa kaungāongoʻi loloto, anga-lelei, anga-fakatōkilalo, anga-malū, mo e kātaki.” (Kol. 3:9-12) Ko hono olá, ʻoku nau maʻu ʻa e nonga, ʻoku nau maʻu ha vahaʻangatae lelei mo e niʻihi kehé, pea ʻoku nau fiefia. Pehē foki, ʻoku talaʻofa ʻi he Folofola ʻa e ʻOtuá te nau “maʻu ʻa e māmaní.”​—Saame 37:8-10, 29.

 9. (a) Naʻe ʻuhinga ki he hā ʻa Sīsū ʻi heʻene pehē ko e kau anga-maluú te nau “maʻu ʻa e māmaní”? (e) Ko e hā ʻe lava ai ke fiefia ʻa “kinautolu ʻoku fiekaia mo fieinua ki he māʻoniʻoní”?

⁹ Naʻe ʻuhinga ki he hā ʻa Sīsū ʻi heʻene pehē ko e kau anga-maluú te nau “maʻu ʻa e māmaní”? ʻE maʻu ʻe he kau paní ʻa e māmaní ʻi heʻenau pule mai ki ai ko e ngaahi tuʻi mo e kau taulaʻeiki. (Fkh. 20:6) Ko e laui miliona kehe ʻoku ʻikai te nau maʻu ʻa e ʻamanaki fakahēvaní te nau maʻu ʻa e māmaní ʻi hono fakaʻatā kinautolu ke nau moʻui taʻengata ʻi ai. Te nau hoko ʻo haohaoa pea maʻu ʻa e melino mo e fiefia. Ko e kakaí ni ko e faʻahinga foki ia naʻe pehē ʻe Sīsū: “Fiefia ē ko kinautolu ʻoku fiekaia mo fieinua ki he māʻoniʻoní.” (Māt. 5:6) Ko ʻenau holi ki he māʻoniʻoní ʻe fakalato ʻi hono toʻo atu ʻe Sihova ʻa e fulikivanú kotoa. (2 Pita 3:13) ʻI he māmani foʻoú, ʻe fiefia ʻa e kakai māʻoniʻoní pea heʻikai ke nau toe mamahi koeʻuhi ko e ngaahi meʻa kovi ʻoku fai ʻe he kakai fulikivanú.​—Saame 37:17.

10. ʻOku ʻuhinga ki he hā ʻa e faimēsí?

¹⁰ “Fiefia ē ko e kau faimēsí, he ʻe faimeesi kiate kinautolu.” (Māt. 5:7) Ke faimēsí ʻoku ʻuhinga iá ke hoko ʻo loto-māfana, anga-ʻofa, mo manavaʻofa, ʻa ia, ko e ongoʻi fakaʻofaʻia ʻi he faʻahinga ʻoku faingataʻaʻiá. Kae kehe, ko e mēsí ʻoku mahulu atu ia ʻi ha ongoʻi manavaʻofa pē. ʻOku akoʻi ʻe he Tohi Tapú ko e hoko ʻo faimēsí ʻoku kau ki ai ʻa hono fai ʻo ha meʻa ke tokoni ki he niʻihi kehé.

11. Ko e hā ʻoku akoʻi mai ʻe he talanoa fakatātā ki he Samēlia anga-fakakaungāʻapí?

¹¹ Lau ʻa e Luke 10:30-37. Ko e talanoa fakatātā ʻa Sīsū fekauʻaki mo e Samēlia anga-fakakaungāʻapí ʻoku fakatātaaʻi lelei ai ʻa e ʻuhinga ʻo e faimēsí. Naʻe ongoʻi ʻe he Samēliá ʻa e manavaʻofa mo e fakaʻofaʻia ʻi he tangata naʻe faingataʻaʻiá, pea naʻe ueʻi ia ʻe he meʻá ni ke ne tokoniʻi ʻa e tangatá. Hili hono fai ʻe Sīsū ʻa e talanoa fakatātā ko iá, naʻá ne pehē: “ʻAlu mo koe ʻo fai ʻa e meʻa tatau.” Ko ia ʻe lava ke tau ʻeke hifo: ‘ʻOku ou fai ʻa e meʻa tatau? ʻOku ou fai ʻa e meʻa naʻe fai ʻe he Samēlia anga-fakakaungāʻapí? ʻI he faingataʻaʻia ʻa e niʻihi kehé, ʻe lava ke u fai ha meʻa ke tokoni kiate kinautolu? ʻE lava ke u fai ha meʻa lahi ange ke tokoni kiate kinautolu? Ko e fakatātaá, ʻe lava ke u tokoniʻi ʻa e faʻahinga taʻumotuʻa ʻi he fakatahaʻangá, kau uitoú, pe ko e fānau ʻoku ʻikai ke tauhi kia Sihova ʻa ʻenau mātuʻá? ʻE lava ke u “lea fakanonga ki he faʻahinga ʻoku loto-mafasiá” ke fakafiemālieʻi kinautolu?’​—1 Tes. 5:14; Sēm. 1:27.

12. Ko e hā ʻoku tau fiefia ai ʻi he taimi ʻoku tau faimeesi aí?

¹² Ko e hā ʻoku tau fiefia ai ʻi heʻetau faimēsí? ʻI heʻetau fakahāhā ʻa e meesi ki he niʻihi kehé, ʻoku tau foaki ai, pea naʻe pehē ʻe Sīsū ko e foakí ʻokú ne ʻai kitautolu ke tau fiefia. Ko e toe ʻuhinga ʻe taha he ʻoku tau ʻiloʻi ʻoku tau fakahōifuaʻi ai ʻa Sihova. (Ngā. 20:35; lau ʻa e Hepelū 13:16.) Naʻe pehē ʻe Tuʻi Tēvita fekauʻaki mo e tokotaha ʻokú ne fakahāhā ʻa e mēsí: “ʻE leʻohi ia ʻe Sihova pea tauhi ia ke ne moʻui. ʻE fakahaaʻi ia ko ha tokotaha fiefia ʻi he māmaní.” (Saame 41:1, 2) Kapau ʻoku tau fakahāhā ʻa e meesi mo e manavaʻofa ki he niʻihi kehé, te tau maʻu foki ai ʻa e meesi ʻa Sihová pea ʻe lava ke tau fiefia ai ʻo taʻengata.​—Sēm. 2:13.

13, 14. Ko e hā ʻoku mahuʻinga ai ke hoko ʻo “loto-maʻá”?

¹³ Naʻe pehē ʻe Sīsū: “Fiefia ē ko kinautolu ʻoku loto-maʻá, he te nau mamata ki he ʻOtuá.” (Māt. 5:8) Ke hoko ʻo loto-maʻa, kuo pau ke tau tauhi ke ʻāsinisini, pe maʻa ʻetau ngaahi fakakaukaú mo e holí. ʻOku mātuʻaki mahuʻinga eni kapau ʻoku tau loto ke tali ʻe Sihova ʻetau lotú.​—Lau ʻa e 2 Kolinitō 4:2; 1 Tīm. 1:5.

¹⁴ Ko e faʻahinga ʻoku loto-maʻá ʻe lava ke nau maʻu ha vahaʻangatae lelei mo Sihova, ʻa ia naʻá ne pehē: “Fiefia ē ko e faʻahinga ʻoku nau fō honau ngaahi kofu tōtōlofá.” (Fkh. 22:14) ʻOku ʻuhinga ki he hā ʻa ʻenau “fō honau kofu tōtōlofá”? Ki he kau Kalisitiane paní, ʻoku ʻuhinga iá ʻoku vakai mai ʻa Sihova kiate kinautolu ʻoku nau maʻa, te ne ʻoange kiate kinautolu ʻa e moʻui taʻefaʻamate ʻi hēvani, pea te nau fiefia ʻo taʻengata. Ki he fuʻu kakai lahí, ʻa ē ʻoku nau ʻamanaki ke moʻui ʻi he māmaní, ʻoku ʻuhinga iá ʻe fakaʻatā ʻe Sihova ke nau hoko ko hono ngaahi kaumeʻa koeʻuhí ʻokú ne vakai mai ʻoku nau māʻoniʻoni. ʻOku pehē ʻe he Tohi Tapú “kuo nau fō honau ngaahi kofu tōtōlofá ʻo fakahinehina kinautolu ʻi he taʻataʻa ʻo e Lamí.”​—Fkh. 7:9, 13, 14.

15, 16. ʻE lava fēfē ke “mamata ki he ʻOtuá” ʻa e kau loto-maʻá?

¹⁵ Naʻe pehē ʻe Sihova: “ʻOku ʻikai ha tangata ʻe lava ke sio kiate au pea moʻui.” (ʻEki. 33:20) ʻE lava fēfē leva ke “mamata ki he ʻOtuá” ʻa kinautolu ʻoku loto-maʻá? Ko e foʻi lea faka-Kalisi ʻoku liliu ko e “mamata” ʻoku lava ke ʻuhinga ia ki he sioloto, mahinoʻi, pe ʻiloʻi. Ko ia ko e “mamata ki he ʻOtuá” ʻoku ʻuhinga iá ko e mahinoʻi pe ko e Tokotaha fēfē ia pea ʻofa ʻi hono ngaahi ʻulungāngá. (ʻEf. 1:18) Naʻe faʻifaʻitaki haohaoa ʻa Sīsū ki he ngaahi ʻulungaanga ʻo e ʻOtuá, ko ia naʻe lava ai ke ne pehē: “ʻIlonga ʻa ia kuó ne mātā aú kuó ne mātā foki ʻa e Tamaí.”​—Sione 14:7-9.

¹⁶ ʻIkai ko ia pē, ʻoku tau “mamata ki he ʻOtuá” ʻi heʻetau hokosia ʻa e founga ʻo ʻene tokoniʻi kitautolu ʻi heʻetau moʻuí. (Siope 42:5) ʻOku lava foki ke tau “mamata,” pe tokangataha ki he ngaahi meʻa fakaofo ʻoku talaʻofa mai ʻe Sihova te ne fai maʻá e faʻahinga ʻoku nau hanganaki maʻa mo tauhi mateaki kiate iá. Pea ko e kau paní te nau mamata moʻoni kia Sihova ʻi heʻenau toetuʻu ʻo ʻalu ki hēvaní.​—1 Sio. 3:2.

17. Ko e hā ʻoku fiefia ai ʻa e kau fakamelinó?

¹⁷ Naʻe hoko atu ʻa Sīsū ʻo ne pehē: “Fiefia ē ko kinautolu ʻoku fakamelinó.” (Māt. 5:9) ʻI heʻetau tamuʻomuʻa ke fakamelino mo e niʻihi kehé, ʻe lava ke tau fiefia ai. Naʻe tohi ʻa e ākonga ko Sēmisí: “Ko e fua ʻo e māʻoniʻoní ʻoku tūtuuʻi ia ʻi he ngaahi tuʻunga melino maʻá e faʻahinga ʻoku fakamelinó.” (Sēm. 3:18) Ko ia kapau ʻokú ke fāinga ke fetaulaki lelei mo ha taha ʻi hoʻo fakatahaʻangá pe ʻi ho fāmilí, kōlenga kia Sihova ke ne tokoniʻi koe ke ke hoko ko ha tokotaha fakamelino. ʻE foaki atu leva ʻe Sihova ʻa hono laumālie māʻoniʻoní, ʻa ia te ne tokoniʻi koe ke ke fakahāhā ʻa e ngaahi ʻulungaanga faka-Kalisitiané, pea te ke fiefia ange ai. Naʻe fakamamafaʻi ʻe Sīsū ʻa e mahuʻinga ke tamuʻomuʻa ke fakamelinó ʻi heʻene pehē: “Kapau leva ʻokú ke haʻu mo hoʻo meʻaʻofá ki he ʻōlitá peá ke manatuʻi hake ai ʻoku ʻi ai ha meʻa ʻoku koviʻia ai ho tokouá ʻiate koe, tuku hoʻo meʻaʻofá ʻi muʻa ʻi he ʻōlitá peá ke ʻalu. ʻUluaki fakamelino mo ho tokouá, peá ke foki mai leva ʻo foaki hoʻo meʻaʻofá.”​—Māt. 5:23, 24.

18, 19. Ko e hā ʻe lava ai ke fiefia ʻa e kau Kalisitiané neongo kapau ʻoku fakatangaʻi kinautolu?

¹⁸ “Fiefia ē ko kimoutolu ʻi hono lumaʻi ʻe he kakaí mo fakatangaʻi kimoutolu mo fai ha ngaahi loi kovi kehekehe fekauʻaki mo kimoutolu koeʻuhí ko au.” Ko e hā naʻe ʻuhinga ki ai ʻa Sīsuú? Naʻá ne toe pehē: “Mou fiefia mo tomeʻe, he ʻoku lahi hoʻomou totongí ʻi hēvani, he naʻe pehē ʻenau fakatangaʻi ʻa e kau palōfita naʻe ʻi muʻa ʻiate kimoutolú.” (Māt. 5:11, 12) ʻI hono haha ʻa e kau ʻapositoló pea fekauʻi ke tuku ʻenau malangá, “naʻa nau ʻalu atu mei he ʻao ʻo e Sanetalimí ʻoku nau fiefia.” Ko e moʻoni, naʻe ʻikai ke nau fiefia ʻi hono haha kinautolú. Ka naʻa nau fiefiá “koeʻuhi kuo lau kinautolu ʻoku taau ke ngaohikoviʻi” koeʻuhi ko e huafa ʻo Sīsuú.​—Ngā. 5:41.

¹⁹ ʻI he ʻahó ni, ʻoku toe kātaki ai ʻi he fiefia ʻa e kakai ʻa Sihová ʻi hono fakatangaʻi kinautolu koeʻuhi ko e huafa ʻo Sīsuú. (Lau ʻa e Sēmisi 1:2-4.) ʻI he hangē ko e kau ʻapositoló, ʻoku ʻikai ke tau fiefia ʻi he mamahí pe ko e fakatangá. Ka ʻo kapau ʻoku tau hanganaki faitōnunga kia Sihova, te ne ʻomai ʻa e loto-toʻa ʻoku fiemaʻu kiate kitautolu ke tau kātakí. Fakakaukau ki he meʻa naʻe hoko kia Henryk Dornik mo hono tokouá. ʻI ʻAokosi 1944, naʻe ʻave ai kinaua ki ha kemi fakamamahi. Naʻe pehē ʻe hona kau fakatangá: “ʻOku faingataʻa ke fakalotoʻi kinaua ke na fai ha meʻa. Ko hono fakamamahiʻi kinauá naʻá na maʻu ai ʻa e fiefia.” Naʻe fakamatala ʻa Henryk: “Neongo naʻe ʻikai haʻaku holi ke hoko ko ha māʻata, ko e faingataʻaʻia fakataha mo e loto-toʻa mo e ongoʻi lāngilangiʻia ʻi heʻeku mateaki kia Sihová naʻá ne ʻomai kiate au ʻa e fiefia.” Naʻá ne toe pehē: “Ko e lotu tōtōiví naʻá ne tohoakiʻi au ke u toe ofi ange kia Sihova, pea naʻá ne fakamoʻoniʻi ko ha Tokotaha-Tokoni alafalalaʻanga ia.”

20. Ko e hā ʻoku tau fiefia ai ke tauhi ki he “ʻOtua fiefiá”?

²⁰ ʻI he hōifua ʻiate kitautolu ʻa Sihova, ko e “ʻOtua fiefiá,” ʻe lava ke tau fiefia ai neongo kapau ʻoku fakatangaʻi kitautolu, kapau ʻoku fakafepakiʻi kitautolu ʻe hotau fāmilí, kapau ʻoku tau puke, pe kapau ʻoku tau hoholo ke motuʻa. (1 Tīm. 1:11) ʻE lava foki ke tau fiefia koeʻuhí ko hotau ʻOtuá ʻa ia “ʻoku ʻikai lava ke loí,” kuó ne talaʻofa mai ha ngaahi meʻa fisifisimuʻa lahi. (Tai. 1:2) ʻI he fakahoko ʻe Sihova ʻene ngaahi talaʻofá, heʻikai ke tau toe manatuʻi ʻa e ngaahi palopalema ʻoku tau maʻu he taimi ní. Ko hono moʻoní, heʻikai lava ke tau sioloto atu ki he fakaofo ʻa e moʻuí ʻi he Palataisí mo e fiefia ʻe hoko kiate kitautolú! ʻIo, te tau “maʻu ʻa e fiefia lahi ʻi he melino hulu fau.”​—Saame 37:11.