Ko e Hā ke Fakahāhā Ai ʻa e Houngaʻiá?

 1. Naʻe anga-fēfē hono fakahāhā ʻe ha tangata Samēlia naʻe fakamoʻui ʻe Sīsū ʻa e houngaʻiá?

NAʻE ʻi ha tuʻunga fakamamahi ʻa e kau tangata ʻe toko hongofulú. Naʻe maʻu kinautolu ʻe he kiliá, pea naʻe ʻikai ha ʻamanaki ʻe toe lelei ange honau tuʻungá. Ka ʻi he ʻaho ʻe taha, naʻa nau sio atu mei he mamaʻó kia Sīsū, ʻa e Faiako Lahí. Naʻa nau fanongo ʻi hono fakamoʻui ʻe Sīsū ʻa e faʻahinga puke kotoa pē, pea naʻa nau tuipau foki ʻe lava ke ne fakamoʻui mo kinautolu. Ko ia naʻa nau kalanga: “Sīsū, Faiako, ʻaloʻofa mai kiate kimautolu!” Naʻe fakamoʻui fakaʻaufuli ʻa e kau tangata ʻe toko hongofulú. ʻOku ʻikai ha veiveiua naʻa nau houngaʻia kotoa ʻi he anga-lelei ʻa Sīsuú. Kae kehe, ko e taha ʻo kinautolu, naʻá ne fai ʻa e meʻa lahi ange ʻi he ongoʻi houngaʻiá​—naʻá ne fakahāhā ʻene houngaʻiáb kia Sīsū. Ko e tangata ko ia naʻe fakamoʻuí, ko ha tangata Samēlia, naʻe ueʻi ia ke ne “fakalāngilangiʻi leʻo-lahi” ʻa e ʻOtuá.​—Luke 17:12-19.

2-3. (a) Ko e hā nai heʻikai ke tau fakahāhā ai ʻa e houngaʻiá? (e) Ko e hā te tau lāulea ki ai ʻi he kupu ko ení?

² Hangē ko e tangata Samēliá, ʻoku fiemaʻu ke tau fakahaaʻi ʻetau houngaʻiá ki he faʻahinga ʻoku nau anga-leleí. Ka ʻi he tuʻunga ʻe niʻihi, ʻe ngalo nai ʻiate kitautolu ke fakahaaʻi ʻetau ongoʻi houngaʻiá ʻi he lea pe ngāue.

³ ʻI he kupu ko ení, te tau lāulea ai ki he ʻuhinga ʻoku mahuʻinga ai ke tau fakahāhā ʻa e houngaʻiá ʻi he meʻa ʻoku tau leaʻakí mo faí. Te tau ako mei he ngaahi faʻifaʻitakiʻanga ʻo e faʻahinga ʻe niʻihi ʻi he Tohi Tapú naʻa nau houngaʻia mo e niʻihi naʻe ʻikai ke nau pehē. Pea te tau lāulea ki he ngaahi founga ʻaonga ʻa ia ʻe lava ke tau fakahāhā ai ʻa e houngaʻiá.

4-5. Ko e hā ʻoku totonu ai ke tau fakahāhā ʻa e houngaʻiá?

⁴ ʻOku fokotuʻu mai ʻe Sihova ʻa e faʻifaʻitakiʻanga kiate kitautolu ʻi hono fakahāhā ʻa e houngaʻiá. Ko e founga ʻe taha ʻokú ne fai ai ení ko ʻene fakapaleʻi ʻa e faʻahinga ʻoku fakahōifua kiate iá. (2 Sām. 22:21; Saame 13:6; Māt. 10:40, 41) Pea ʻoku fakalototoʻaʻi kitautolu ʻe he Folofolá ke tau “hoko ko e kau faʻifaʻitaki ki he ʻOtuá,ʻi he tuʻunga ko ʻene fānau ʻofeina.” (ʻEf. 5:1) Ko ia ko e ʻuhinga tefito ʻoku totonu ke tau fakahāhā ai ʻa e houngaʻiá he ʻoku tau loto ke muimui ki he faʻifaʻitakiʻanga ʻa Sihová.

⁵ Fakakaukau ki ha ʻuhinga ʻe taha ʻoku tau loto ai ke fakahāhā ʻa e houngaʻia ki he niʻihi kehé. Ko e houngaʻiá ʻoku hangē ia ha kai leleí​—ʻoku fakafiefia ange ʻi hono vahevahe atu iá. ʻI heʻetau ongoʻi ʻoku fakahoungaʻi kitautolú, ʻoku tau fiefia. ʻI heʻetau fakahāhā ʻetau houngaʻiá, ʻoku tau ʻai ai ke fiefia ʻa e niʻihi kehé. Ko e tokotaha ʻoku tau fakahaaʻi ki ai ʻa e houngaʻiá, ʻokú ne ʻiloʻi ko ʻene ngaahi feinga ke tokoniʻi kitautolú pe ʻomai ha meʻa naʻa tau fiemaʻú, ʻoku tuha moʻoni. Ko hono olá, ko e haʻi ʻo e kaumeʻa ʻiate kitautolu mo e tokotaha ko iá ʻoku mālohi ange.

 6. Ko e hā ha ngaahi faitatau ʻe niʻihi ʻo e ngaahi lea ʻo e houngaʻiá mo e ʻāpele ngaohi mei he koulá?

⁶ Ko ʻetau fakahāhā ʻa e houngaʻiá ʻoku mahuʻinga. ʻOku pehē ʻe he Tohi Tapú: “Hangē ha ʻāpele koula ʻi ha ʻaiʻanga meʻa silivá ʻoku pehē ʻa e lea ʻoku fai ʻi he taimi totonú.” (Pal. 25:11) Sioloto atu ki he fakaʻofoʻofa ē ko ha ʻāpele koula ʻoku fokotuʻu ʻi ha ʻaiʻanga meʻa siliva! Pea fakakaukau atu ki he mahuʻinga lahi ē ko ia! ʻE fēfē hoʻo ongoʻí kapau te ke maʻu ha meʻaʻofa pehē? Ko ia, ko e ngaahi lea ʻo e houngaʻia ʻokú ke fakahāhā ki he niʻihi kehé ʻe lava ke mahuʻinga hangē ko iá. Pea fakakaukau angé ki he moʻoniʻi meʻa ko ení: Ko ha ʻāpele ngaohi mei he koulá ʻoku lava ke tuʻuloa. Pehē foki, ko hoʻo fakahāhā ʻa e houngaʻiá ʻe lava ke manatua mo koloaʻaki ia ʻe he tokotaha ʻokú ne maʻu iá ʻi he toenga ʻene moʻuí.

 7. Naʻe anga-fēfē hono fakahāhā ʻe Tēvita, hangē ko ia ʻoku hā ʻi he Saame 27:4, pea mo e kau hiki-tohi saame kehé ʻenau houngaʻiá?

⁷ Ko e tokolahi ʻo e kau sevāniti ʻa e ʻOtuá ʻi he kuohilí naʻa nau fakahāhā ʻa e houngaʻiá. Ko e taha ʻo kinautolu ko Tēvita. (Lau ʻa e Saame 27:4.) Naʻá ne houngaʻia lahi ʻi he lotu moʻoní pea fakahāhā ʻene ngaahi ongoʻí ʻi ha founga hā mahino. Naʻá ne foaki ha fuʻu koloa lahi ki hono langa ʻo e temipalé. Ko e hako ʻo ʻĒsafé naʻa nau fakahāhā ʻa e houngaʻia ʻaki hono hiki ʻa e ngaahi saame, pe ngaahi hiva ʻo e fakafetaʻi. ʻI ha hiva ʻe taha, naʻa nau fakamālō ki he ʻOtuá pea fakahaaʻi ʻenau fakaofoʻia ʻi he ‘ngāue fakaofo’ ʻa Sihová. (Saame 75:1) ʻOku hā mahino ko e hako ʻo Tēvita mo ʻĒsafé naʻa nau loto ke fakahāhā ʻa e lahi ʻo ʻenau houngaʻia ʻia Sihova mo e ngaahi tāpuaki kotoa naʻa nau maʻu meiate iá. ʻE lava ke ke fakakaukau ki ha ngaahi founga ʻe lava ke ke faʻifaʻitaki ai ki he kau hiki-tohi saame ko iá?

8-9. Naʻe anga-fēfē hono fakahāhā ʻe he ʻapositolo ko Paulá ʻa e houngaʻia ʻi hono fanga tokouá mo e fanga tuofāfiné, pea ko e hā hono olá?

⁸ Naʻe houngaʻia ʻa e ʻapositolo ko Paulá ʻi hono fanga tokoua mo e fanga tuofāfiné pea fakahaaʻi ia ʻi he anga ʻo ʻene talanoa fekauʻaki mo kinautolú. Naʻá ne fakamālō maʻu pē ki he ʻOtuá ʻi heʻene ngaahi lotú koeʻuhi ko kinautolu. Naʻá ne toe fakahaaʻi ʻene houngaʻiá ʻi heʻene tohi kiate kinautolú. ʻI he ʻuluaki veesi ʻe 15 ʻo e Loma 16, naʻe lave ai ʻa Paula ki ha kaungā-Kalisitiane ʻe toko 27 ʻaki honau hingoá. Naʻe tautefito ʻa e manatu ʻa Paula kia Pīsila mo ʻAkuila ʻi heʻena “tuku atu ʻena moʻuí ke ʻi ha tuʻunga fakatuʻutāmaki” koeʻuhiā ko ia, peá ne fakamatalaʻi ʻa Fīpē ko ha “tokoni ki he tokolahi” ʻo kau ai ʻa Paula. Naʻá ne fakaongoongoleleiʻi ʻa e faʻahinga ʻofeina ko iá, ko e fanga tokoua mo e fanga tuofāfine ngāue mālohi.​—Loma 16:1-15.

⁹ Naʻe lāuʻilo ʻa Paula ko hono fanga tokouá mo e fanga tuofāfiné naʻa nau taʻehaohaoa, ka ʻi he fakaʻosinga ʻene tohi ki he kau Lomá, naʻá ne fili ke tokangataha ki honau ngaahi ʻulungaanga leleí. Sioloto atu ki he loto-toʻa kuo pau naʻe maʻu ʻe he fanga tokoua mo e fanga tuofāfine ko iá ʻi heʻenau fanongo ki hono lau leʻo-lahi ʻa e ngaahi lea ʻa Paulá ki he fakatahaʻangá! Ko hono olá, ko ʻenau haʻi ʻo e kaumeʻa mo Paulá ʻoku ʻikai ha veiveiua naʻe toe mālohi ange. ʻOkú ke fakahāhā maʻu pē ʻa e houngaʻia ʻi he ngaahi meʻa lelei ʻoku leaʻaki mo fai ʻe he ngaahi mēmipa ʻi hoʻo fakatahaʻangá?

10. Ko e hā ʻe lava ke tau ako mei he founga naʻe fakahāhā ai ʻe Sīsū ʻa e houngaʻiá ki hono kau muimuí?

¹⁰ ʻI heʻene ngaahi pōpoaki ki he ngaahi fakatahaʻanga pau ʻi ʻĒsia Mainá, naʻe fakahaaʻi ʻe Sīsū ʻene houngaʻia ʻi he ngāue naʻe fai ʻe hono kau muimuí. Ko e fakatātaá, naʻá ne kamata ʻene pōpoaki ki he fakatahaʻanga ʻi Taiatailá ʻaki ʻene pehē: “ʻOku ou ʻiloʻi hoʻo ngaahi ngāué, mo hoʻo ʻofá mo hoʻo tuí mo hoʻo ngāue ki he ʻOtuá pea mo hoʻo kātakí, pea ko hoʻo ngaahi ngāue ki muí ʻoku lahi ange ia ʻi hoʻo ngaahi ngāue naʻá ke ʻuluaki faí.” (Fkh. 2:19) Naʻe ʻikai lave pē ʻa Sīsū ki he tupulekina ʻenau ngāué ka naʻá ne toe fakaongoongoleleiʻi kinautolu ki he ngaahi ʻulungaanga naʻá ne ueʻi kinautolu ke nau fai ʻa e ngaahi ngāue leleí. Neongo naʻe fiemaʻu ʻe Sīsū ke akonakiʻi ʻa e niʻihi ʻi Taiataila, naʻá ne kei kamata mo fakaʻosi ʻene pōpoakí ʻaki ʻa e fakalototoʻa. (Fkh. 2:25-28) Fakakaukau ki he mafai ʻo Sīsū ʻi hono tuʻunga ko e ʻulu ʻo e kotoa ʻo e ngaahi fakatahaʻangá. ʻOku ʻikai fiemaʻu ia ke ne fakamālō mai ki he ngāue ʻoku tau fai kiate iá. Neongo ia, ʻokú ne kei fakahāhā pē ʻa e houngaʻiá. He faʻifaʻitakiʻanga lelei ʻaupito ē ʻokú ne fokotuʻu mai ki he kau mātuʻá!

11. Hangē ko ia ʻoku hā ʻi he Hepelū 12:16, ko e hā ʻa e fakakaukau naʻe maʻu ʻe ʻĪsoa fekauʻaki mo e ngaahi meʻa toputapú?

¹¹ Ko e meʻa fakamamahí, naʻe ʻi ai ha niʻihi ʻi he Tohi Tapú naʻe ʻikai ke nau fakahāhā ʻa e houngaʻiá. Ko e fakatātaá, neongo naʻe ʻohake ʻa ʻĪsoa ʻe ha ongo mātuʻa naʻá na ʻofa mo fakaʻapaʻapaʻi ʻa Sihova, naʻe ʻikai ke ne houngaʻia ʻi he ngaahi meʻa toputapú. (Lau ʻa e Hepelū 12:16.) Naʻe anga-fēfē hoko ʻene fakakaukau taʻehoungaʻiá ʻo hā mahinó? Naʻe fakavave ʻa ʻĪsoa ʻo fakatau atu ʻa ʻene totonu ki he ʻuluaki fohá ki hono tokoua siʻisiʻí, ʻa Sēkope, ʻaki pē ha poulu supo. (Sēn. 25:30-34) Ki mui ai, naʻe fakaʻiseʻisa moʻoni ʻa ʻĪsoa ʻi he fili naʻá ne faí. Ka naʻá ne taʻehoungaʻia ʻi he meʻa naʻá ne maʻú, ko ia naʻe ʻikai ha makatuʻunga ke ne lāunga ai ʻi he ʻikai te ne maʻu ʻa e tāpuaki ʻo e totonu ki he ʻuluaki fohá.

12-13. Naʻe anga-fēfē hono fakahāhā ʻe he kau ʻIsilelí ʻa e taʻehoungaʻiá, pea ko e hā hono olá?

¹² Ko e kau ʻIsilelí naʻe lahi ʻa e ngaahi ʻuhinga naʻa nau maʻu ke fakahāhā ai ʻa e houngaʻiá. Naʻe fakatauʻatāinaʻi kinautolu mei he nofo pōpulá hili hono ʻohifo ʻe Sihova ʻa e Mala ʻe Hongofulu ki ʻIsipité. Naʻe fakahaofi leva ʻe he ʻOtuá kinautolu mei he fakatamakí ʻaki hono fakaʻauha ʻa e kau tau kotoa ʻa ʻIsipité ʻi he Tahi Kulokulá. Naʻe houngaʻia lahi ʻa e kau ʻIsilelí ʻo nau hivaʻi ʻa e hiva ʻo e ikuná ʻo fakalāngilangiʻi ʻa Sihova. Ka naʻa nau nofoʻaki houngaʻia ai pē?

¹³ ʻI he fehangahangai ʻa e kau ʻIsilelí mo ha ngaahi pole foʻou, naʻe vave ʻa e ngalo ʻiate kinautolu ʻa e kotoa ʻo e ngaahi meʻa lelei naʻe fai ʻe Sihova maʻanautolú. Pea naʻa nau fakahaaʻi leva ʻenau taʻehoungaʻiá. (Saame 106:7) Anga-fēfē? “Naʻe kamata ke lāunga ʻa e fuʻu fakataha fakakātoa ʻo e kau ʻIsilelí kia Mōsese mo ʻĒlone”​—ko hono moʻoní, naʻa nau lāunga kia Sihova. (ʻEki. 16:2, 8) Naʻá ne mamahi ʻi he taʻehoungaʻia naʻe fakahāhā ʻe heʻene kakaí. Naʻá ne tomuʻa tala ki mui ai ko e toʻutangata fakakātoa ko eni ʻo e kau ʻIsilelí ʻe fakaʻauha ʻi he toafá, tuku kehe pē ʻa Siosiua mo Kēlepi. (Nōm. 14:22-24; 26:65) Tau sio angé ki he founga ʻe lava ke tau fakaʻehiʻehi ai mei he ngaahi faʻifaʻitakiʻanga kovi ko ení pea faʻifaʻitaki ki he ngaahi faʻifaʻitakiʻanga leleí.

14-15. (a) ʻE lava fēfē ke fefakahāhāʻaki ʻe he ongo meʻa malí ʻa e houngaʻiá? (e) ʻE lava fēfē ke akoʻi ʻe he ngaahi mātuʻá ʻenau fānaú ke nau fakahāhā ʻa e houngaʻiá?

¹⁴ ʻI he fāmilí. ʻOku maʻu ʻaonga ʻa e fāmilí kotoa ʻi hono fakahāhā ʻe he mēmipa taki taha ʻa e houngaʻiá. Ko e lahi ange hono fefakahāhāʻaki ʻe he ongo meʻa malí ʻa e houngaʻiá, ko ʻena hoko ange ia ʻo vāofí. ʻOku faingofua ange ai ke na fefakamolemoleʻaki ʻena ngaahi fehālaakí. Ko ha husepāniti ʻokú ne houngaʻia ʻi hono uaifí ʻoku ʻikai ngata pē ʻene fakatokangaʻi ʻa e ngaahi meʻa lelei ʻokú ne leaʻaki mo faí ka ʻokú ne toe ‘tuʻu hake ʻo fakahīkihikiʻi ia.’ (Pal. 31:10, 28) Pea ko ha uaifi fakapotopoto ʻokú ne ʻai ke ʻiloʻi ʻe hono husepānití ʻa e meʻa pau ʻokú ne houngaʻia ai ʻiate iá.

¹⁵ Ngaahi mātuʻa, ʻe lava fēfē ke mou akoʻi hoʻomou fānaú ke nau fakahāhā ʻa e houngaʻiá? Manatuʻi ʻe faʻifaʻitaki ʻa hoʻo fānaú ki he meʻa ʻoku mou leaʻaki mo faí. Ko ia fokotuʻu ʻa e ngaahi faʻifaʻitakiʻanga lelei ʻaki ʻa e lea fakamālō ʻi he fai ʻe he fānaú ha meʻa maʻau. Tānaki atu ki aí, akoʻi hoʻomou fānaú ke lea fakamālō ʻi hono fai ʻe he kakaí ha meʻa maʻanautolu. Tokoniʻi hoʻomou fānaú ke nau mahinoʻi ko hono fakahāhā ʻa e houngaʻiá ʻoku haʻu mei he lotó pea ko ʻenau ngaahi leá ʻoku lahi ʻa hono ʻaongá. Ko e fakatātā, ʻoku pehē ʻe ha kiʻi finemui ko Clary: “ʻI he taʻu 32 ʻeku faʻeé naʻe fakafokifā hono liʻaki ia mo e fānau ʻe toko tolu ke ne ʻohake toko taha pē. ʻI heʻeku taʻu 32, naʻá ku fakakaukau ki he faingataʻa lahi naʻá ne fekuki mo iá. Ko ia naʻá ku tala ange kiate ia ʻa ʻeku houngaʻia lahi ʻi he meʻa kotoa naʻá ne feilaulauʻi ke ʻohake au mo hoku ongo tuongaʻané. Ki muí ni mai, naʻá ne tala mai ko ʻeku ngaahi lea ko iá naʻe maongo moʻoni ki hono lotó, ʻokú ne faʻa fakalaulauloto ki ai, pea ʻokú ne ʻai maʻu pē ia ke ne ongoʻi fiefia.”

16. ʻOmai ha fakatātā ʻa e lava ke fakalototoʻaʻi ʻa e niʻihi kehé ʻi hono fakahāhā ʻa e houngaʻiá.

¹⁶ ʻI he fakatahaʻangá. ʻI heʻetau fakahāhā ʻa e houngaʻia ki hotau fanga tokouá mo e fanga tuofāfiné, ʻoku tau fakalototoʻaʻi ai kinautolu. Ko e fakatātaá, ko Jorge, ko ha mātuʻa taʻu 28, naʻá ne puke lahi. Naʻe ʻikai lava ke ne maʻu ʻa e ngaahi fakatahá ʻi ha māhina. Naʻa mo e hili ʻene foki ki he ngaahi fakatahá, naʻe teʻeki ai ke ne lava ke fakahoko ha konga ʻi he polokalamá. ʻOku pehē ʻe Jorge: “Naʻá ku ongoʻi ʻoku ʻikai haku mahuʻinga koeʻuhi ko hoku ngaahi fakangatangatá mo e ʻikai lava ke u fakahoko ʻa e ngaahi fatongia ʻi he fakatahaʻangá. Ka ʻi he hili ha fakataha ʻe taha, naʻe tala mai ʻe ha tokoua: ‘ʻOku ou loto ke fakamālō atu kiate koe ki hoʻo fokotuʻu mai ʻa e faʻifaʻitakiʻanga lelei ki hoku fāmilí. ʻOku mau fiefia lahi ʻi he ngaahi malanga naʻá ke fai ʻi he ngaahi taʻu siʻi kuo maliu atú. Naʻe tokoni ia ki heʻemau tupu fakalaumālié.’ Naʻe maongo moʻoni ia kiate au ʻo kamata ke u fakatō loʻimata. Ko ʻene ngaahi leá ʻa e meʻa tofu pē naʻá ku loto ke fanongo ki aí.”

17. Hangē ko ia ʻoku lave ki ai ʻi he Kolose 3:15, ʻe lava fēfē ke tau fakahāhā ʻa e houngaʻia kia Sihova ki heʻene nima-homó?

¹⁷ Ki hotau ʻOtua nima-homó. Kuo ʻomai ʻe Sihova ʻa e meʻakai fakalaumālie hulu fau. Ko e fakatātaá, ʻoku tau maʻu ʻa e fakahinohino ʻaonga fakafou ʻi heʻetau ngaahi fakatahá, ʻū makasiní mo ʻetau uepisaití. Kuó ke fanongo ʻi ha malanga, lau ha kupu, pe sio ʻi ha broadcast pea fakakaukau, ‘Ko e meʻa tofu pē ia naʻá ku fiemaʻú’? ʻE lava fēfē ke tau fakahāhā ʻetau houngaʻia kia Sihová? (Lau ʻa e Kolose 3:15.) Ko e founga ʻe taha ko e fakamālō maʻu pē kiate ia ʻi heʻetau ngaahi lotú ki he ngaahi meʻaʻofa lelei ko ení.​—Sēm. 1:17.

18. ʻI he ngaahi founga fē ʻoku tau fakahāhā nai ai ʻa e houngaʻia ʻi hotau ngaahi Fale Fakatahaʻangá?

¹⁸ ʻOku tau toe fakahāhā ʻetau houngaʻia kia Sihová ʻi heʻetau tauhi ke maʻa mo maau hotau feituʻu faiʻanga lotú. ʻOku tau kau maʻu pē ʻi hono fakamaʻa mo tauhi hotau Fale Fakatahaʻangá, pea ko e faʻahinga ʻoku nau ngāueʻaki ʻa e ngaahi naunau fakaʻilekitulōniká ke ʻoua te nau maumauʻi ia. ʻI heʻetau tauhi ke maau hotau Fale Fakatahaʻangá, ʻe tolonga ange pea siʻisiʻi ai ʻa e fiemaʻu ke fai ha ngaahi monomono lalahi. ʻI he founga ko iá, ʻoku tau fakaʻatā ai ʻa e paʻanga lahi ange ke langa mo fakaleleiʻiʻaki ʻa e ngaahi Fale Fakatahaʻanga kehe takatakai he māmaní.

19. Ko e hā naʻá ke ako mei he hokosia ʻa ha ʻovasia sēketi ʻe taha mo hono uaifí?

¹⁹ Ki he faʻahinga ʻoku nau ngāue mālohi maʻatautolú. ʻI heʻetau fakahāhā ʻa e houngaʻiá, ko ʻetau ngaahi leá te ne liliu nai ʻa e anga ʻo e ongoʻi ha taha fekauʻaki mo e ngaahi pole ʻokú ne fehangahangai mo iá. Fakakaukau ki he hokosia ʻa ha ʻovasia sēketi mo hono uaifí. Hili haʻana ngāue fakafaifekau ʻi ha ʻaho kakato ʻi he faʻahitaʻu momokó, naʻá na foki ki hona nofoʻangá kuó na helaʻia. Naʻe momoko ʻaupito ʻo mohe pē ʻa e uaifí mo hono fuʻu kote māfaná. ʻI he pongipongi haké, naʻá ne tala ange ki hono husepānití ʻokú ne ongoʻi heʻikai lava ke ne toe hoko atu ʻi he ngāue fefonongaʻakí. Ki mui ange ʻi he pongipongi ko iá, naʻá na maʻu ha tohi mei he ʻōfisi vaʻá, pea naʻe fakatuʻasila ki he uaifí. Naʻe fakaongoongoleleiʻi loto-māfana ai ia ʻi heʻene ngāue fakafaifekaú mo e kātakí. Naʻe fakahaaʻi ai ʻa e faingataʻa ʻo e hiki mei he feituʻu ʻe taha ki he feituʻu ʻe taha ʻi he uike kotoa. ʻOku pehē ʻe hono husepānití: “Naʻe maongo moʻoni kiate ia ʻa e fakaongoongo lelei ko iá ʻo ʻikai ʻaupito haʻane toe lea ke liʻaki ʻa e ngāue fefonongaʻakí. Ko hono moʻoní, ʻi he ngaahi taimi lahi naʻá ne fakalototoʻaʻi au ke hokohoko atu ʻi he taimi naʻá ku ongoʻi foʻi aí.” Naʻe ngāue fefonongaʻaki ai pē ʻa e ongo meʻá ʻi he meimei taʻu ʻe 40.

20. Ko e hā ʻoku totonu ke tau feinga ke fai he ʻaho taki taha, pea ko e hā hono ʻuhingá?

²⁰ ʻOfa ke tau feinga he ʻaho taki taha ke fakahāhā ʻa e houngaʻia ʻaki ʻetau leá mo e meʻa ʻoku tau faí. Ko ʻetau ngaahi lea pe ngāue loto-moʻoní mahalo ko e meʻa tofu pē ia ʻoku fiemaʻu ʻe ha tokotaha ke ne hoko atu ʻi ha toe ʻaho ʻe taha ʻi he māmani taʻehoungaʻia ko ení. Pea ko ʻetau fakahāhā ʻa e houngaʻiá te ne langa hake ʻa e haʻi ʻo e kaungāmeʻa ʻe lava ke tuʻuloa. Ko e mahuʻinga tahá, te tau faʻifaʻitaki ai ki heʻetau Tamai nima-homo mo houngaʻia ko Sihová.