Fakaleleiʻi Hoʻo Founga Akó!

 1. Ko e hā ʻoku ʻikai ke fie ako ai ʻa e niʻihi?

ʻI HE ʻahó ni, ko e kakai tokolahi ʻoku fiemaʻu ke nau ngāue mālohi ke maʻu ha paʻanga feʻunga ke moʻui ai. Ko e tokolahi hotau fanga tokouá ʻoku nau ngāue ʻi he ngaahi houa lahi koeʻuhí pē ke tokonaki ʻa e ngaahi fiemaʻu tefito honau ngaahi fāmilí. Ko e tokolahi taʻefaʻalaua kehe ʻoku nau fakamoleki ʻa e houa lahi ʻi he ʻaho taki taha ʻi he fefonongaʻaki mei honau ʻapí ki honau ʻapi ngāué. Ko e tokolahi ʻoku nau ngāue mālohi fakaesino ke poupouʻi kinautolu tonu. ʻI he ngataʻanga ʻo e ʻahó, ko e fanga tokoua mo e fanga tuofāfine ngāue mālohi ko ení ʻoku nau helaʻia! Ko hono moʻoní ʻoku nau fuʻu helaʻia ʻo ʻikai ha ivi ʻe toe ke fai ha ako.

 2. Ko fē ʻa e taimi ʻokú ke vaheʻi ki he akó?

² Kae kehe, ko hono moʻoní, kuo pau ke tau vaheʻi ha taimi ki he akó​—ke ako fakamātoato—​ʻa e Folofola ʻa e ʻOtuá mo ʻetau ʻū tohi faka-Kalisitiané. Ko hotau vahaʻangatae mo Sihová mo ʻetau moʻui taʻengatá ʻoku fakatuʻunga ia ai! (1 Tīm. 4:15) ʻOku ʻā pongipongia ʻa e niʻihi ʻi he ʻaho kotoa ʻo ako ʻi he kei lōngonoa honau ʻapí pea kei foʻou honau ʻatamaí hili ʻenau mālōloó. Ko e niʻihi ʻoku nau vaheʻi ʻa e ngaahi miniti siʻi ʻi he ngataʻanga ʻo e ʻahó ʻoku lōngonoá ke ako pea fakalaulauloto ai ki he ngaahi meʻakai fakalaumālié.

3-4. Ko e hā ʻa e ngaahi liliu kuo fai ki he lahi ʻo e fakamatala kuo tokonaki maí, pea ko e hā hono ʻuhingá?

³ ʻOku ʻikai ha veiveiua ʻokú ke loto-tatau ʻoku mahuʻinga ke vaheʻi ha taimi ke ako. Ka ko e hā ʻa e meʻa ʻoku totonu ke tau akó? ‘ʻOku fuʻu lahi e meʻa ke laú,’ ko hoʻo leá nai ia. ‘ʻOku faingataʻa ke u lau ʻa e meʻa kotoa.’ Ko e niʻihi ʻoku nau malava ke ngāuekakatoʻaki ʻa e tokonaki fakalaumālie kotoa, ka ko e tokolahi hotau fanga tokouá ʻoku nau fāinga ke maʻu ha taimi ke fai pehē. ʻOku lāuʻilo ki heni ʻa e Kulupu Pulé. ʻI he ʻuhinga ko iá, naʻe ʻomai ki muí ni ʻa e fakahinohino ke fakasiʻisiʻi ʻa e ʻū tohi ʻoku pulusí mo ia ʻi he tatau fakaʻilekitulōniká.

⁴ Ko e fakatātaá, ʻoku ʻikai ke tau toe pulusi ʻa e Yearbook of Jehovah’s Witnesses, koeʻuhi ʻoku lahi ʻa e ngaahi hokosia fakalototoʻa ʻoku ala maʻu ʻi he jw.org^® pehē foki ki he polokalama fakamāhina ʻo e JW Broadcasting^®. Ko e pulusinga maʻá e kakaí ʻo e Taua Leʻo mo e Awake! ʻoku pulusi tuʻo tolu pē he taʻu he taimí ni. Kuo ʻikai fai ʻa e ngaahi liliu ko ení ke tau maʻu ai ha taimi lahi ange ki he ngaahi ngāue kehé. Ko hono taumuʻá ke tau malava ʻo tokanga lahi ange ki he “ngaahi meʻa ʻoku mahuʻinga angé.” (Fil. 1:10) Tau lāulea angé ki he founga ʻe lava ke tau fokotuʻu ai ʻa e ngaahi meʻa ke fakamuʻomuʻá mo e founga ʻe lava ke tau maʻu ʻaonga kakato ai mei he ako fakafoʻituitui ʻo e Tohi Tapú.

5-6. Ko e hā ʻa e ʻū tohi ʻoku totonu ke tau fakapapauʻi ke ako fakaleleí?

⁵ Ko e hā ʻoku totonu ke tau ʻuluaki akó? ʻOku totonu ke tau vaheʻi ha taimi he ʻaho taki taha ke ako ʻa e Folofola ʻa e ʻOtuá. Ko e lahi ʻo e ngaahi veesi ʻoku vaheʻi he taimí ni ki he lau Tohi Tapu fakauike ʻa e fakatahaʻangá kuo fakasiʻisiʻi koeʻuhi ke tau maʻu ai ha taimi lahi ange ke fakalaulauloto ki he meʻa ʻoku tau laú pea ke fai ha fekumi lahi ange. Ko ʻetau taumuʻá ʻoku ʻikai ko hono lau pē ʻo e ngaahi vēsí, ka ke fakaʻatā ʻa e pōpoaki ʻo e Tohi Tapú ke aʻu ki hotau lotó pea ke tau ʻunuʻunu ofi ange kia Sihova.​—Saame 19:14.

⁶ Ko e hā mo ha toe meʻa ʻoku totonu ke tau ako fakalelei? Ko e moʻoni, ʻoku tau loto ke teuteu ʻa e Ako Taua Leʻo mo e Ako Tohi Tapu ʻa e Fakatahaʻangá pehē foki ke lau ʻa e fakamatala kehe ki he fakataha he lolotonga ʻa e uiké. ʻOku totonu ke tau lau foki mo e ʻīsiu ʻo e Taua Leʻo.

 7. ʻOku totonu ke tau loto-siʻi kapau ʻoku ʻikai malava ke tau vakaiʻi ʻa e meʻa kotoa ʻoku ʻi heʻetau uepisaití mo e JW Broadcasting?

⁷ Te ke pehē nai, ‘ʻOku lelei ia, kae fēfē ʻa e meʻa kotoa ʻoku hā ʻi heʻetau uepisaiti, jw.org, pehē foki ki he fakamatala ʻoku ʻi he JW Broadcasting? ʻOku lahi fau!’ Fakakaukau ki ha fakatātā: ʻOku lahi ʻa e ngaahi meʻakai vovo kehekehe ʻi ha falekai pāhia. Heʻikai ʻaupito lava ke ʻahiʻahiʻi ʻe he kau kasitomaá ʻa e meʻakai kotoa ʻoku ʻi aí. Ko ia ʻoku nau fili pē ha meʻakai ʻe niʻihi. ʻI he tuʻunga meimei tatau, kapau ʻoku ʻikai lava ke ke vakaiʻi ʻa e meʻa kotoa pē ʻoku tokonaki fakaʻilekitulōnika maí, ʻoua ʻe loto-siʻi. Lau pe sio ʻi he meʻa ʻokú ke malavá. Tau lāulea angé ki he meʻa ʻoku kau ki he akó pea mo e founga ʻe lava ke tau maʻu ai ʻa e ʻaonga lahi tahá mei heʻetau akó.

 8. Ko e hā ʻa e ngaahi sitepu te tau fou nai ai ʻi hono ako ʻa e Taua Leʻo, pea ʻe anga-fēfē hoʻo maʻu ʻaonga mei hono fai iá?

⁸ ʻI hoʻo akó, ʻokú ke tokangataha ki he meʻa ʻokú ke laú koeʻuhi ke ke ako ha meʻa mahuʻinga. ʻOku ʻikai ko e lau fakavave pē ʻa e fakamatala kuo vaheʻi atú mo laineʻi ʻa e talí. Ko e fakatātaá, ʻi hoʻo teuteu ki he Ako Taua Leʻo, ʻuluaki lau ʻa e fakanounou ʻi he kamataʻanga ʻo e kupú. Hokó, fakakaukau ki he kaveinga ʻo e kupú, pehē foki ki he ngaahi kaveinga tokoní mo e ngaahi fehuʻi fakamanatú. Pea lau fakalelei mo māmālie ʻa e kupú. Tokanga ki he sētesi ʻokú ne tala atu ʻa e meʻa ʻoku lāulea ki ai ʻa e palakalafí, ʻa ia ʻoku anga-mahení ko e sētesi ʻuluaki ʻo e palakalafi taki taha. ʻOku faʻa tokoni ʻa e sētesi ko iá ke ke ʻiloʻi ʻa e poini ʻoku fakamatalaʻi ʻi he palakalafí. ʻI hoʻo lau ʻa e kupú, fakakaukau ki he anga hono poupouʻi ʻe he palakalafi taki taha ʻa e kaveinga tokoní mo ʻene fekauʻaki mo e kaveinga tefito ʻo e kupú. Fakaʻilongaʻi ha ngaahi foʻi lea pe poini ʻikai anga-maheni ʻa ia te ke saiʻia ke fekumi lahi ange ki ai.

 9. (a) Ko e hā ʻoku totonu ai ke tau tokanga makehe ki he ngaahi konga Tohi Tapú ʻi heʻetau ako ʻa e Taua Leʻo, pea ʻi he founga fē? (e) Hangē ko ia ʻoku hā ʻi he Siosiua 1:8, ko e hā ʻoku totonu ke tau fai ʻo tānaki atu ki hono lau ʻo e ngaahi konga Tohi Tapú?

⁹ Ko e Ako Taua Leʻo ko ha ako ia ʻo e Tohi Tapú. Ko ia ai, tokanga tefito ki he ngaahi konga Tohi Tapú, tautefito ki he ngaahi konga Tohi Tapu ʻe lau ʻi he lāulea ʻa e fakatahaʻangá ki he fakamatalá. Tokanga makehe ki he anga hono poupouʻi ʻe he ngaahi foʻi lea pe kupuʻi lea tefito ʻi he ngaahi konga Tohi Tapú ʻa e poini ʻo e palakalafí. ʻIkai ngata aí, vaheʻi ʻa e taimi ke fakalaulauloto ai ki he ngaahi konga Tohi Tapu ʻokú ke laú, pea fakalaulauloto ki he founga ʻe lava ke ke ngāueʻaki fakafoʻituitui ai ia ʻi hoʻo moʻuí.​—Lau ʻa e Siosiua 1:8.

10. ʻI he fekauʻaki mo e Hepelū 5:14, ko e hā ʻoku totonu ai ke vaheʻi ʻe he ngaahi mātuʻá ʻa e taimi ʻi he lolotonga e lotu fakafāmilí ke akoʻi ʻenau fānaú ki he founga ke ako mo fai ai ʻa e fekumí?

¹⁰ ʻOku hā mahino, ʻoku loto ʻa e ngaahi mātuʻá ke hoko ʻa e Lotu Fakafāmili fakauiké ko ha taimi fakafiefia ki heʻenau fānaú. Kae kehe, neongo ʻoku totonu maʻu pē ki he ngaahi mātuʻá ke ʻai ha ngaahi meʻa pau ki he lotu fakafāmilí, ʻoku ʻikai fiemaʻu kiate kinautolu ke nau fokotuʻutuʻu maʻu pē ha ngaahi ngāue makehe pe poloseki fakafiefia he uike taki taha. Lolotonga ko e taimi Lotu Fakafāmilí ko e sio nai ʻi he polokalama fakamāhina ʻo e JW Broadcasting pe ko e ngāue ʻi ha poloseki makehe, hangē ko hono langa ʻo e ʻaʻake ʻa Noá, ʻoku toe mahuʻinga ke akoʻi ʻa e fānaú ʻi he founga ke ako aí. Ko e fakatātaá, ʻoku fiemaʻu ke nau ako ki he founga ke teuteu ai ki he ngaahi fakatahá pe ko e founga ke fai ai ha fekumi fekauʻaki mo ha ʻīsiu kuo malanga hake ʻi he ʻapiakó. (Lau ʻa e Hepelū 5:14.) Kapau ʻoku nau vaheʻi ha taimi ke ako ha kaveinga Fakatohitapu ʻi ʻapi, ʻe teuʻi lelei ange ai kinautolu ke tokangataha ki he fakamatala ʻoku ʻomai ʻi he ngaahi fakataha ʻa e fakatahaʻangá, ʻasemipilií mo e fakataha-lahí, ʻa ia ʻoku ʻikai ke kau maʻu pē ai ha vitioó. Ko e moʻoni, ko e lōloa ʻo e taimi ako taki taha ʻe fakatuʻunga ia ʻi he taʻu mo e natula ʻo e fānaú.

11. Ko e hā ʻoku mahuʻinga ai ke tau akoʻi ʻetau kau ako Tohi Tapú ki he founga ke fai ai ha ako mohu ʻuhinga ʻiate kinautolu pē?

¹¹ Ko ʻetau kau ako Tohi Tapú ʻoku fiemaʻu foki ke nau ʻilo ki he founga ke akó. ʻI heʻenau kamata ako ʻa e Tohi Tapú, ʻoku tau fiefia ke sio ki heʻenau laineʻi pē ʻenau talí ʻi he teuteu ki heʻenau ako Tohi Tapú pe ki he fakataha ʻa e fakatahaʻangá. Ka ʻoku fiemaʻu ke tau akoʻi ʻetau kau ako Tohi Tapú ki he founga ke fai ai ʻa e fekumí mo e founga ke fai ai ha ako mohu ʻuhinga ʻiate kinautolu pē. ʻI he founga ko iá, ʻi he taimi ʻe malanga hake ai ʻa e palopalemá, ʻi he ʻikai kole tokoni ʻi he taimi pē ko iá ki he niʻihi kehe ʻi he fakatahaʻangá, te nau ʻilo ʻa e founga ke maʻu ai ʻa e faleʻi ʻaongá ʻaki ʻa e fai ha fekumi ʻi heʻetau ʻū tohí.

12. Ko e hā nai ʻa e taumuʻa ʻoku tau maʻu ʻi he taimi ʻoku tau ako aí?

¹² Kapau ʻoku ʻikai ko ha tokotaha ako tōtōivi koe, te ke fakakaukau nai heʻikai malava ia ke ke fiefia ʻi he akó. Ka ʻe lava. ʻE lava ke ke kamataʻaki ha ako nounou pē pea faai atu pē ʻo fakalahi ʻa e taimí. Fakakaukau ki he taumuʻa hoʻo akó. Ko e moʻoni, ko ʻetau taumuʻa tefitó ke ʻunuʻunu ai pē ke toe ofi ange kia Sihova. Ko ha taumuʻa ʻe taha ʻe lava ke aʻusia vave ko e tali ha fehuʻi ʻoku ʻeke ʻe ha tokotaha pe ko e fai ha fekumi ʻi he fehangahangai mo ha palopalema.

13. (a) Fakamatalaʻi ʻa e sitepu ʻe lava ke fou ai ha toʻutupu ke taukapoʻi ʻene tuí ʻi he ʻapiakó. (e) ʻE lava fēfē ke ke ngāueʻaki ʻa e akonaki ʻoku maʻu ʻi he Kolose 4:6?

¹³ Ko e fakatātaá, ko ha toʻutupu koe ʻokú ke kei ʻi he akó? ʻE fakatangaʻi nai koe ʻe ho kaungāakó koeʻuhi ko e ʻikai ke ke hiva ʻa e fasi fakafonuá. Te ke loto ke taukapoʻi ʻa e meʻa ʻoku leaʻaki ʻe he Tohi Tapú fekauʻaki mo e kaveingá ni, kae mahalo ʻoku ʻikai ke ke ongoʻi taau feʻunga ke fai pehē. ʻOku fiemaʻu ki ai ha poloseki ako! Ko hoʻo taumuʻá ʻe lava ke tafaʻaki ua: (1) Fakaivimālohiʻi hoʻo fakapapau ʻoku totonu ke ke nofoʻaki mavahe mei he māmaní (2) fakaleleiʻi hoʻo malava ke taukapoʻi ʻa e moʻoní. (Sione 17:16; 1 Pita 3:15) Te ke ʻuluaki ʻeke hifo nai kiate koe, ‘Ko e hā ʻa e fakakikihi ʻoku ngāueʻaki ʻe hoku kaungāakó ke poupouʻiʻaki ʻa e hiva ʻi he fasi fakafonuá?’ Pea ngāueʻaki leva ʻetau ʻū tohí, fai ha fekumi fakaʻāuliliki. Ko hono taukapoʻi hoʻo tuí heʻikai nai ke fuʻu faingataʻa ʻo hangē ko hoʻo fakakaukaú. ʻOku tui ʻa e kakai tokolahi tahá ʻoku totonu ke nau hiva ʻa e fasi fakafonuá koeʻuhí pē ko hono tala ange ʻe ha tokotaha ʻoku nau fakaʻapaʻapaʻi ʻoku totonu ke nau fai pehē. Kapau te ke maʻu ha poini ʻe taha pe ua ʻe lava ke ke vahevahe, ʻe lava ke ke fai ha tali fakafiemālie ki ha tokotaha fehuʻi loto-moʻoni.​—Lau ʻa e Kolose 4:6.

14-16. (a) ʻE anga-fēfē nai haʻo hoko ʻo mahinoʻi lelei ange ha tohi ʻo e Tohi Tapú ʻoku ʻikai ke ke fuʻu alāanga mo ia? (e) ʻI hono ngāueʻaki ʻa e ngaahi konga Tohi Tapu ʻoku haá, fakamatala ki he founga ʻe lava ke ke mahinoʻi lelei ange ai ʻa e tohi ʻa ʻĒmosí. (Sio foki ki he puha “ʻAi ʻa e Tohi Tapú ke Moʻoni Kiate Koe!”)

¹⁴ Sioloto atu ʻoku teu ke tau lāulea ʻi he fakataha ʻa e fakatahaʻangá ki he taha ʻi he ngaahi tohi ʻa e kau palōfita īkí, mahalo ko e taha ʻoku ʻikai ke ke fuʻu alāanga mo ia. Ko e ʻuluaki sitepú nai ke fakatupulekina ha mahuʻingaʻia ʻi he meʻa naʻe hiki ʻe he palōfita ko iá. ʻE lava fēfē ke ke fakahoko ia?

¹⁵ ʻUluakí, ʻeke hifo: ‘Ko e hā ʻoku ou ʻiloʻi fekauʻaki mo e tokotaha hiki-tohí? Ko hai ia, naʻá ne nofo ʻi fē, ko e hā ʻene ngāue?’ Ko e puipuituʻa ʻo e tokotahá ʻe hā foki ia ʻi he ngaahi lea pe ko e fakatātā naʻá ne ngāueʻakí. ʻI hoʻo lau ʻa e Tohi Tapú, kumi ʻa e ngaahi kupuʻi lea ʻoku tapua atu ai ʻa e ʻulungaanga ʻo e tokotaha hiki-tohí.

¹⁶ Hokó, ʻe toe tokoni foki kiate koe kapau te ke ʻiloʻi ʻa e taimi naʻe hiki ai ʻa e tohí. ʻE lava ke ke fai ia ʻaki hono vakaiʻi ʻa e “Tēpile ʻo e Ngaahi Tohi ʻo e Tohi Tapú” ʻi he konga ki mui ʻo e Liliu Tohi Tapu ʻo e Māmani Foʻoú ʻo e Tohi Tapu Māʻoniʻoní. Tānaki atu ki aí, ʻe lava ke ke vakaiʻi ʻa e saati ʻo e kau palōfita mo e ngaahi tuʻí ʻi he Fakamatala Fakalahi A6. Kapau ko e tohi ʻo e Tohi Tapú ʻokú ke akó ko ha tohi fakaekikite, ʻe lelei ke ke ako fekauʻaki mo e ngaahi meʻa ne hoko ʻi he taimi naʻe hiki aí. Ko e hā ʻa e ngaahi ʻulungaanga pe tōʻonga kovi naʻe fiemaʻu ki he palōfitá ke ne fakatonutonú? Ko hai ʻa e faʻahinga ne moʻui he taimi ko iá? Ke mahinoʻi lelei ange ʻa e tuʻungá, ʻe fiemaʻu nai ke ke toe vakai ki ha ngaahi tohi kehe ʻo e Tohi Tapú. Ko e fakatātaá, ke mahinoʻi kakato ange ʻa e meʻa naʻe hoko ʻi he taimi ʻo e palōfita ko ʻĒmosí, te ke maʻu ʻaonga mei hono vakaiʻi ʻa e tohi ʻa 2 Tuʻi mo 2 Kalonikali, ʻa ia ʻoku hā ʻi he ngaahi maʻuʻanga fakamatala he tafaʻakí ʻi he ʻĒmosi 1:1. Tānaki atu ki aí, ʻe lava ke ke vakaiʻi ʻa e tohi ʻa Hōseá, ʻa ia naʻe moʻui fakataha nai mo ʻĒmosi. Ko e kotoa ʻo e ngaahi fakamatala ko ení ʻe tokoni ke ke mahinoʻi lelei ange ai ʻa e vahaʻa taimi naʻe moʻui ai ʻa ʻĒmosí.​—2 Tuʻi 14:25-28; 2 Kal. 26:1-15; Hōs. 1:1-11; ʻĒm. 1:1.

17-18. ʻI hono ngāueʻaki ʻa e fakatātā he palakalafí pe ko haʻo fakatātā tonu, fakatātaaʻi ʻa e founga ʻo e hoko ʻa e tokangataha ki he fanga kiʻi fakaikiikí ʻo ʻai ʻa e ako Tohi Tapu fakafoʻituituí ke fakafiefia.

¹⁷ ʻOku lelei ke lau ʻa e Tohi Tapú fakataha mo e holi mālohi ke ako lahi ange. Ko e fakatātaá, tau pehē ʻokú ke lau ʻa e vahe 12 ʻo e kikite ʻa Sākalaiá, ʻa ia ʻoku tomuʻa tala ai ʻa e pekia ʻa e Mīsaiá. (Sāk. 12:10) ʻI hoʻo aʻu ki he veesi 12, ʻokú ke lau ko e “ngaahi fāmili ʻoku kau ki he fale ʻo Nētané” te nau mātuʻaki mamahi ʻi he pekia ʻa e Mīsaiá. ʻI he ʻikai fakalaka fakavave pē ʻi he fakaikiiki ko iá, ʻokú ke kiʻi tuʻu ʻo ʻeke hifo kiate koe: ‘Ko e hā ʻa e fekauʻaki ʻa e fale ʻo Nētané mo e Mīsaiá? ʻOku ʻi ai ha toe fakamatala lahi ange?’ Te ke fai ha fekumi. Ko e maʻuʻanga fakamatala he tafaʻakí te ne ʻave koe ki he 2 Sāmiuela 5:13, 14, ʻa ia te ke ako ai ko Nētané ko e taha ia ʻo e ngaahi foha ʻo Tuʻi Tēvitá. Ko e maʻuʻanga fakamatala hono ua he tafaʻakí, ko e Luke 3:23, 31, ʻoku hā ai ko Sīsuú ko e hako tonu ʻo Nētane fakafou ʻia Mele. (Sio ki he wp16.3 9 pal. 1-3.) ʻOku toʻoa ai ho lotó! Naʻá ke ʻiloʻi naʻe tomuʻa tala ko Sīsuú ʻe hoko ko ha hako ʻo Tēvita. (Māt. 22:42) Ka naʻe laka hake he toko 20 ʻa e ngaahi foha ʻo Tēvitá. ʻIkai ʻoku fakaofo hono fakahaaʻi ʻe Sākalaia ko e fale tonu ʻo Nētané ʻoku ʻi ai hono ʻuhinga ke nau mamahi ʻi he pekia ʻa Sīsuú?

¹⁸ Fakakaukau ki ha fakatātā ʻe taha. ʻI he Luke vahe ʻuluakí, ʻoku tau lau ai naʻe ʻaʻahi ʻa e ʻāngelo ko Kepalelí kia Mele ʻo tala kiate ia te ne fanauʻi ha tama tangata: “ʻE hoko ʻa e tokotahá ni ko e lahi pea ʻe ui ia ko e ʻAlo ʻo e Fungani Māʻolungá, pea ko Sihova ko e ʻOtuá te ne ʻoange kiate ia ʻa e taloni ʻo Tēvita ko ʻene tamaí, pea te ne pule ko e Tuʻi ki he fale ʻo Sēkopé ʻo taʻengata.” (Luke 1:32, 33) Te tau hehema pē nai ke tau tokangataha ki he konga ʻuluaki ʻo e pōpoaki ʻa Kepalelí, ʻa ia ko Sīsū ʻe ui ko e “ʻAlo ʻo e Fungani Māʻolungá.” Ka naʻe toe kikiteʻi ʻe Kepaleli ko Sīsuú ʻe “pule ko e Tuʻi.” Ko ia te tau fifili nai pe ko e hā e fakakaukau ʻa Mele ki he meʻa naʻe tala ange ʻe Kepalelí. Naʻá ne fakakaukau nai naʻe ʻuhinga ʻa Kepalelí ʻe fetongi ʻe Sīsū ʻa Tuʻi Hēlota​—pe ko ha taha ʻi he kau hoko hake ke pule ʻi ʻIsilelí? Kapau naʻe hoko ʻa Sīsū ko ha tuʻi, ʻe hoko ʻa Mele ko e kuini fehuhu, pea ko hono fāmilí te nau nofo ʻi he palasi fakatuʻí. Neongo ia, ʻoku ʻikai ha lēkooti naʻe maʻu ʻe Mele ha fakakaukau pehē; pe kuo faifai ange ʻo tau lau naʻe kole ʻe Mele ha tuʻunga makehe ʻi he Puleʻangá, ʻo hangē ko e ongo ākonga ʻa Sīsuú. (Māt. 20:20-23) Ko e fakaikiiki ko ení ʻoku toe fakamamafaʻi ai ko Melé ko ha fefine mātuʻaki anga-fakatōkilalo moʻoni!

19-20. Hangē ko ia ʻoku fakamatalaʻi ʻi he Sēmisi 1:22-25 mo e 4:8, ko e hā ʻetau taumuʻa ʻi he taimi ʻoku tau ako aí?

¹⁹ Tau manatuʻi ko ʻetau taumuʻa tefito ʻi hono ako ʻa e Folofola ʻa e ʻOtuá mo ʻetau ʻū tohi faka-Kalisitiané ke ʻunuʻunu ofi ange ai kia Sihova. ʻOku tau toe loto foki ke vakai pe “ko e faʻahinga tokotaha fēfē” kitautolu pea mo e liliu ʻoku fiemaʻu ke tau fai koeʻuhi ke fakahōifua ai ki he ʻOtuá. (Lau ʻa e Sēmisi 1:22-25; 4:8.) Pea ʻi he kamataʻanga ʻo e taimi ako taki taha, ʻoku totonu ke tau kole kia Sihova ki hono laumālié. ʻOku totonu ke tau kōlenga kiate ia ke ne tokoniʻi kitautolu ke tau maʻu ʻaonga kakato mei he fakamatalá pea ke tau vakai kiate kitautolu ʻo hangē ko ʻene vakai hifó.

²⁰ ʻOfa ke tau hangē kotoa ko e tangata ʻa e ʻOtuá ʻoku fakamatalaʻi ʻe he tokotaha-tohi-sāmé: “Ko ʻene fiefiá ʻoku ʻi he lao ʻa Sihová, pea ʻokú ne lau leʻo-siʻi ʻa ʻEne laó ʻi he ʻaho mo e pō. . . . Ko e meʻa kotoa pē ʻokú ne faí ʻe lavameʻa.”​—Saame 1:2, 3.